1. Mambe mam malam bagwélél ba Yéhôva ba mboñ?

 MBAÑ i Bibel yada i bi kal le bagwélél ba Yéhôva ba ga ‘ti bomede ni ngôñ’ inyu gwélél Yéhôva isi énél i Man wé. (Tjémbi 110:3) I mbañ i, i yé yon munu ngéda yés. Hiki nwii, bagwélél ba Yéhôva ba nlôôs didun di ngeñ i añal ñañ nlam. Mut a nyégsa bé bo i sal i bôlô i, ba mpémés ki nkus wap inyu sal yo. Ba nti ki lôk kéé i mam ma mbéda bo, ba nhôgbaha bo, ba nhôla ki bo i lédés hémle yap. Mimañ ni bahôla nson ba nlôôs ki ngandak ngéda i kôôba minkwel ni i yuuga lôk kéé i bôda ni i bôlôm inyu lédés bo. Kii i ntinde bo i boñ i mam ma? Gwéha inyu Yéhôva ni bôt bap ba libôk.​—Matéô 22:37-39.

2. Kiki kaat Rôma 15:1-3 i ñéba bés, imbe ndémbél ilam Yésu a bi yigle bés?

² Yésu a bi yigle bés ndémbél ilam mu kiki a bé tôñ bôt bape iloo nyemede. Di noode odop mu mabal mé. (Añ Rôma 15:1-3.) I bôt ba nigle nye ba ga kôs ngandak bisai. Yésu a kal le: “Ti i nlona maséé iloo kôhna.”​—Minson mi baôma 20:35.

3. Kii d’a tehe munu yigil ini?

³ Munu yigil ini, di ga tehe bisesema Yésu a bi boñ inyu hôla bôt bape, ni lelaa di nla nigle ndémbél yé.  Di ga tehe ki lelaa di nla kônde hôla bôt bape.

4. Kii i ñéba le Yésu a bé tôñ bôt bape iloo nyemede?

⁴ Yésu a bé hôla bôt bape yak i ngéda a bé nwaak. Di bigda i jam Yésu a bi boñ i ngéda limut li bôt li bi lo i boma nye i hikôa hiada, bebek bebee ni Kapernaum. Yésu a bé a ma soohe u wo-nsôna. Bebek a bé nwaak, ndi i ngéda a bi tehe mamut, a kônôl diyeyeba ni bakokon ngoo. A bi mélés bakokon, a ti yak loñge nkwel u ba nsébél le nkwel i ngii hikôa.​—Lukas 6:12-20.

5. Lelaa basañ mbai ba nigle Yésu i ngéda ba yé nwaak?

⁵ Lelaa basañ mbai ba nigle Yésu. Di hégda le isañ mbai a nsal ngim kel yosôna, a huu i ndap nwaak. Kiki a yé nwaak, a gwé bé ngôñ i tégbaha bibégés bi ndap lihaa i kôkôa i, ndi a nyemhe Yéhôva le a hôla nye i tégbaha yo. Yéhôva a ntimbhe masoohe mé, yigil i tagbe kiki lem. I kôkôa i, boñge ba nok le inyu bagwal bap, mam ma mbuu ma yé nseñ iloo mam mamosôna.

6. Ti hihéga hi hi ñéba lelaa Yésu a bi ti ngéda yé inyu hôla bôt.

⁶ Yésu a bé ti ngéda yé inyu hôla bôt. Baa di yé le di hégda i ndutu Yésu a bi nok i ngéda ba bi legel nye le ba nkit Yôhanes Nsôble ño? I jam li li bi lama lôôha tééñga Yésu. Bibel i nkal le: “Kiki a nok [le Yôhanes a nwo], Yésu a jôp i môñgô, a nyodi ha, a ke i homa a yé nwee inyu ba nyetama.” (Matéô 14:10-13) Di nla hégda inyuki a bé sômbôl ba nyetama. Ngandak bôt i ngwés i ñee i ngéda i yé yotama. Ndi Yésu a bé bé le a ba nyetama; limut li bôt likeñi li bi bol nyoo homa a bé ke ilole nye a mbol. Yésu a bi boñ lelaa? A bi hoñol mandutu i bôt ba ba bé boma, “a kon bo ngoo.” A bi tehe le ba gwé ngôñ ni Bañga i Djob, jon “a bôdôl niiga bo [he ndék mam bé,  ndi] ngandak mam.”​—Markô 6:31-34; Lukas 9:10, 11.

7-8. Ti hihéga hi hi ñéba lelaa mimañ mi nigle Yésu i ngéda lôk kéé i gwé ngôñ ni mahôla.

⁷ Lelaa mimañ mi nigle Yésu. Di yé maséé ngandak ni bisesema gwobisôna mimañ mi mboñ inyu yés! Libim li bôlô ba nsal, lôk kéé i ntehe bé yo. Kiki hihéga, i ngéda mankéé a nkwo kon, lôk kéé i i nsal i comités de liaison hospitaliers i nhoo ke i ti mahôla. Ba mbéna sébél bo i ñem mau! Ndi kiki i mimañ mi ni mahaa map, ba nkônôl i lôk kéé i ngoo, ba ntôñ bo iloo yak bomede.

⁸ Mimañ mi nhôla yak i maoñ ma mandap ma Ane ni mandap ma ntôñ mape, yak ni inyu ti lôk kéé i i nkôs bikuu mahôla. Mimañ mi ntégbaha ki ngandak ngéda i niiga lôk kéé, i lédés bo, ni i hôgbaha bo. Di nlama bégés i lôk kéé ini yosôna ni mahaa map. Yéhôva a sayap bo inyu mahoñol malam ba gwé! Ndi kiki ini lôk kéé ipe, mimañ mi nlama bé tégbaha ngéda yap yosôna mu minson mi. Ba nlama bé nwas le minson mi mi yuu bo kayéle ba laa ha bé tééda mahaa map.

9. Inoñnaga ni kaat Filipi 2:4, 5, mambe mahoñol bikristen gwobisôna bi nlama bana?

⁹ Añ Filipi 2:4, 5. Bésbobasôna di ta bé mimañ, ndi bésbobasôna di nla hôla bôt kiki Yésu. Bibel i nkal le: “A yoñ libak li nkol.” (Filipi 2:7) Di ôt le  pék mu bibañga bi. Loñge nkol, tole ngwélél, a nyéñ manjel i lémél nwet wé. Kiki di yé minkol mi Yéhôva, ibabé pééna, di gwé ngôñ i kônde sélél Yéhôva ni i hôla lôk kéé yés i bôda ni i bôlôm. Maéba di ntehe hanano, ma nla hôla bés.

10. Mambe mambadga di yé le di badba?

¹⁰ Wan mahoñol moñ. Badba ma-mbadga mana le: ‘Baa me yé bebee i boñ bisesema inyu hôla bôt bape? Lelaa me ga boñ ibale ba nkal me le me kee me yuuga mankéé nu a ñun i homa ba ntéédana mimañ mi bôt, tole ibale ba nkal me le me kena mbômbô wada i makoda? Baa me yé bebee i hôla i ngéda ba nsômbôl lôk kéé inyu pubus ndap makoda makeñi tole ndap Ane?’ Kiki di bi ti bésbomede nkikip inyu gwélél Yéhôva, a yé maséé i ngéda a ntehe bés di nti ngéda yés ni nkus wés inyu hôla bôt bape. Ibale ngim jam i yé munu le di mboñ bé, kii di nlama boñ?

11. Lelaa masoohe ma yé le ma hôla bés i boñ bisesema inyu hôla bôt?

¹¹ Yible Yéhôva ñem woñ. Hégda le u nléba le u nlama boñ ngim jam, ndi u gwé bé ngôñ i boñ jo. Ibale hala a mpémél we, soohe Yéhôva ni ñem woñ wonsôna. U sôô bañ nye jam jo ki jo. Kal Yéhôva kii u nôgda, u soohe ki nye le a ti we “ngôñ lôñni ngui i boñ mam.”​—Filipi 2:13.

12. Kii mañge wanda nu a yé nsôblege a nla boñ?

¹² Ibale u yé mañge wanda nu a yé nsôblege, soohe Yéhôva le a hôla we i bana ngôñ i kônde gwel minson mi likoda. I ngim biloñ, mimañ mi yé ngandak iloo bahôla nson, i bahôla nson ba yé nyoo, ngandak i ta ha bé boñge ba wanda, bape ba ñun. Kiki ntôñ u Yéhôva u nke ni bisu i hol, di gwé ngôñ ni boñge ba wanda ba ba ga hôla i kena makoda. Ibale u nti mahôla het ngôñ i yé, u ga ba maséé. Inyuki? Inyule w’a lémél Yéhôva, w’a bana jôl lilam, w’a kon ki maséé inyule u nhôla bôt bape.

13-14. Kii di nla boñ inyu hôla lôk kéé yés i bôda ni i bôlôm? (Béñge titii i lipep li bisu.)

¹³ Di yéñ yi mam ma mbéda lôk kéé yés. Ñôma Paul a bi kal Lôk Héber le: “Ni hôya bañ i boñ loñge, ni kabak i mam ni gwé ni bôt bape, inyule i nya bisesema ini yon i nlémél Nyambe.” (Lôk Héber 13:16) Kinje maéba malam! Ndék ngéda i mbus le Paul a pot bibañga bini, lôk kéé i Yudéa i bé lama tjôô mandap map, nyuñga yap, ni bôt bap ba lihaa ba ba bé bé bikristen, inyu “ke ngwéé i dikôa.” (Matéô 24:16) Ha ngéda i, ibabé pééna i bé béda le ba hôlna. Ibale bikristen bi, bi bé bi ma bôdôl nôgôl maéba ma Paul mana le ba kap i gwom ba gwé ni bôt bape, wee hala a bi lédél bé bo i niñ nyoo i homa ba bi ke.

¹⁴ Bebek lôk kéé y’a kal bé bés hiki ngéda le ba gwé ngôñ ni mahôla. Kiki hihéga, ibale sita yada i nwo, nlôm a yégle yik, di yé le di badba le: Baa i mankéé nu a gwé ngôñ ni bijek, moni mi ndiyô, tole mahôla inyu bibôlô bi ndap? Bebek a ga kal bé bés jam jo ki jo inyule a nsômbôl bé  bééga bés mbegee. Ndi a ga ba maséé ngandak ibale di nti nye mahôla to a mbat bé bés. Di nlama bé hoñol le mut numpe a ga hôla mankéé, tole nyemede a nlama ndugi bat bés mahôla. Di badba le: ‘Ibale men me ban-ga i ndutu ini, ki me nsômbôl le ba bôñôl kii me?’

15. Inyu hôla lôk kéé yés, kii di nlama boñ?

¹⁵ Boñ le lôk kéé i kôôge we bebee. Ibabé pééna, u nyi ngim lôk kéé mu likoda joñ i i yé bebee i hôla bôt bape hiki ngéda. Kekikel ba mboñ bé we-ngoñle di ntééñga bo. I ngéda di gwé ngôñ ni mahôla, di nyi le ba ga hôla bés, di nsômbôl yak ba kiki bo! Mañ wada le Alan nu a gwé 45 nwii, a gwé ngôñ le lôk kéé i kôôge nye bebee. I ngéda a ñôt pék mu ndémbél i Yésu, a nkal le: “Yésu a bé a pégi, ndi mintén mi bôt nwominsôna mi bé kôôge nye bebee, ba bé kon bé woñi i bat nye mahôla. Ba bé yi le a ntôñ toi bo. Me nsômbôl nigle ndémbél i Yésu nu bôt ba bé kon bé woñi i kôôge bebee, ba bé gwés nye, a bé tôñ ki bo.

16. Lelaa kaat Tjémbi 119:59, 60 i nla hôla bés i noñ ndémbél Yésu?

¹⁶ Di nlama bé tomb ibale di nla bé nigle ndémbél i Yésu i nya i yôni. (Yakôbô 3:2) Ñudu a nla bé boñ i mam momasôna malét a mboñ. Ndi ibale ñudu a mboñ hihôha, a ôt biniigana, a boñ kii yosôna a nla inyu nigle malét, a ga kônde hol. Yak bés ibale di mboñ i mam di nok mu i yigil yés bésbomede, di boñok kii yosôna di nla inyu héñha bilem gwés, di ga  pam i noñ ndémbél i Yésu.​—Añ Tjé-mbi 119:59, 60.

17-18. Bimbe bisai di ga kôs ibale di nhôla bôt kiki Yésu?

¹⁷ Ibale di mbéna hôla bôt, di yé le di tinde bôt bape i boñ nlélém jam. Mañ wada le Tim a nkal le: “Lôk kéé i i yé boñge ba wanda i bi hol i yila bahôla nson. Bahogi ikété yap ba yé boñge ngandak. Ba bi pam i hol hala inyule ba bi nigle lôk kéé ipe i i mbéna hôla bôt i likoda. I bôlô ba nsal i yé nseñ inyu likoda, ba nhôla yak mimañ nga-ndak.”

¹⁸ Munu nkoñ ’isi unu, bôt ba ntôñ ndik bomede, ndi Mbôgi Yéhôva i ta bé hala. Ndémbél i Yésu nu a bé boñ bisesema inyu hôla bôt i nlôôha tihba bés. Inyu hala nyen di gwé ngôñ i nigle nye. Di ta bé le di nigle nye i nya i yôni, ndi di nla “odop yaga mu mabal mé.” (1 Pétrô 2:21) Ibale di mboñ kii yosôna di nla inyu nigle ndémbél i Yésu, di ga ba maséé inyule di nlémél Yéhôva.