1. Aha do na dipaboa Bibel taringot naposo ni Jahowa, jala songon dia i masa saonari?

 NUNGNGA dipaboa Bibel hian rade do naposo ni Jahowa melayani Ibana jala mangihutton petunjuk sian Jesus. (Ps. 110:3) Nungnga masa na didok ayat on saonari. Ganup taon dipakke naposo ni Jahowa do marratus juta jom di ulaon marbarita. Las do roha ni nasida mangulahon i nang pe dang digaji nasida. Jala dipakke nasida do tikki ni nasida lao mangurupi jala patoguhon akka donganna. Asing ni i, godang tikki na dipakke akka sintua dohot parhobas lao mempersiappon acara parpunguan dohot kunjungan penggembalaan. Boasa olo nasida mangulahon i? Ala holong roha ni nasida tu Jahowa dohot tu akka dongan.​—Mat. 22:37-39.

2. Songon na dipaboa di Rom 15:1-3, sitiruon aha do na dibahen Jesus tu hita?

² Dibahen Jesus do kebutuhan ni halak na asing lebih penting sian kebutuhanna sandiri. Berupaya do hita maniru Jesus. (Jaha Rom 15:1-3.) Molo tatiru ibana godang do manfaat na tadapot. Didok Jesus, “Umlas do roha ni halak na mangalehon sian na manjalo.”​—Ul. 20:35.

3. Aha do na lao tabahas di artikel on?

³ Di artikel on, tabahas ma akka pengorbanan na dibahen Jesus lao mangurupi na asing jala songon dia caratta maniru ibana. Dung i tabahas ma songon dia carana asa tergerak rohatta mangurupi na asing.

4. Sian dia taboto na rade do Jesus mangurupi na asing?

⁴ Nang pe loja Jesus, alai rade do ibana mangurupi. Sada tikki lao ma Jesus tu sada dolok, na di jonok ni Kapernaum. Disi ma ibana saborngin manipat martangiang tu Debata. Marsogotna i ro ma godang halak manjuppangi ibana. Sasittongna nga loja hian Jesus tikki i. Alai asi do rohana tu nasida apalagi ma tu halak na pogos dohot tu na marsahit. Alani i dipamalum Jesus ma nasida jala dipasahat ibana do jamita na patoguhon nasida. Digoari do jamita on Jamita na di Dolok. On ma jamita ni Jesus na paling terkenal sahat tu saonari.​—Luk. 6:12-20.

5. Songon dia do akka kepala keluarga boi maniru Jesus?

⁵ Cara ni kepala keluarga maniru Jesus. Bayakkon ma situasi on. Adong sahalak kepala keluarga na baru mulak sian parkarejoanna. Loja hian do ibana ala nungnga karejo sadari manipat. Gabe tubu ma di rohana naeng mambatalhon ibadat keluarga di borngin i. Alai martangiang do ibana tu Jahowa mangido gogo asa sanggup memandu ibadat keluarga i. Ditangihon Jahowa do tangiangna. Gabe boi ma diulahon ibadat keluarga di borngin i songon na somal. Hasilna boi ma diida gellengna massai penting do manomba Jahowa di natua-tuana.

6. Paboa ma contoh na patuduhon olo do Jesus paradehon tikki mangurupi na asing.

⁶ Olo do Jesus paradehon tikkina tu na asing. Tabayakkon ma songon dia perasaan ni Jesus, dung diboto ibana nungnga dipamate si Johannes Pandidi. Pasti lungun hian do roha ni Jesus. Bibel mandok, “Dung dibege Jesus na masa i, lao ma sahalakna marparau tu inganan na lungun.” (Mat. 14:10-13) Boi do taattusi boasa lao Jesus tu inganan i sahalakna. Hita pe songon i do ra, molo lagi lungun rohatta lomo rohatta menyendiri asa unang diganggu halak na asing. Alai di tikki i, godang do halak na mandapotton Jesus tu inganan i. Bahkan parjolo do nasida sahat disi. Boha do reaksi ni Jesus? Dung diida ibana halak i, “gabe asi ma rohana” mangida nasida. Diboto Jesus do porlu nasida diurupi jala dipatogu. Jadi pittor diurupi Jesus ma nasida.  Jala dipaboa do di Bibel, “Godang ma diajarhon [Jesus] tu nasida taringot tu Debata.”​—Mrk. 6:31-34; Luk. 9:10, 11.

7-8. Songon dia do akka sintua maniru Jesus?

⁷ Cara ni akka sintua maniru Jesus. Mandok mauliate do hita tu kerja keras ni akka sintua lao mangurupi hita. Godang do pengorbanan na dibahen nasida na so diida akka dongan di huria. Misalna, adong do akka sintua na gabe anggota Panitia Penghubung Rumah Sakit. Molo adong akka dongan na porlu bantuan medis, pittor hatop do nasida mangurupi nang pe ikkon lao nasida di tonga borngin. Boasa olo nasida termasuk keluargana mambahen pengorbanan sisongon i? Ala holong roha ni nasida tu akka dongan.

⁸ Dohot do akka sintua mangurupi ulaon pembangunan Bale Harajaon dohot fasilitas organisasi. Dohot do muse nasida mangurupi panitia penanggulangan bencana. Asing ni i, godang do tikki na dilehon nasida lao mangajari jala patoguhon akka dongan di huria. Jadi patut do akka donganta on dohot keluargana dipuji. Pasti dipasu-pasu Jahowa do sude pengorbanan na dibahen nasida i! Alai ikkon tetap do seimbang akka sintua. Unang ma sappe dang adong be tikki ni nasida lao mangurus na porlu di keluargana alani ulaon teokratis.

9. Sesuai tu Pilippi 2:4, 5, aha do na ikkon diulahon halak Kristen?

⁹ Jaha Pilippi 2:4, 5. Hita sude dang soal sintua manang na dang, porlu do maniru  Jesus na rade mangurupi na asing. Bibel mandok olo do Jesus “gabe songon hatoban”. (Plp. 2:7) Aha do na boi taparsiajari sian ayat i? Sahalak hatoban pasti berupaya do pasonakkon roha ni tuanna. Dos songon i ma hita, hatoban ni Jahowa do hita jala pelayan ni akka donganta. Tottu lomo do rohatta boi dipakke Jahowa lao mangurupi akka dongan. Asa boi taulahon i, taida ma piga-piga carana.

10. Sukkun-sukkun aha do na porlu tapikkirhon?

¹⁰ Tapareso ma diritta. Boi do tapikkirhon sukkun-sukkun on: ‘Olo do au paradehon tikki dohot gogokku lao mangurupi na asing? Boha do sikaphu molo dipangido lao mangunjungi sahalak donganta naung matua, manang mangalap ibana asa rap tu parpunguan? Olo do au mangurupi paiasson gedung kebaktian manang Bale Harajaon?’ Tikki talean diritta tu Jahowa, marjanji do hita mangalehon sude na adong di hita lao manomba Ibana. Jadi pasti las do rohana molo talehon tikkitta, gogotta, dohot hepengta lao mangurupi na asing. Molo taida adong dope na porlu tapadenggan sian diritta, aha ma na boi taulahon?

11. Aha do na porlu taulahon molo hurang semangat dope hita mangurupi na asing?

¹¹ Martangiang ma tu Jahowa. Molo tarasa hurang semangat dope hita mangurupi na asing, aha ma na boi taulahon? Martangiang ma tu Jahowa. Paboa ma sude na di rohatta tu Ibana. Tapaboa ma songon dia perasaanta jala tapangido ma asa ‘dibahen Ibana hita rade jala margogo’ mangurupi na asing.​—Plp. 2:13.

12. Aha do na boi diulahon akka donganta bawa na poso naung tardidi?

¹² Molo sahalak bawa na poso jala nungnga tardidi hamu, pangido ma tu Jahowa asa tergerak rohamuna lao mangurupi akka dongan di huria. Di piga-piga negara unggodang do jumlah ni sintua sian parhobas. Jala godangan sian akka parhobas i dang poso be. Ala lam godang halak na bergabung tu organisasi ni Jahowa, porlu do akka donganta bawa na poso mangurupi akka sintua. Molo rade hamu mangurupi tugas aha pe di huria, gabe puas ma hamu jala marlas ni roha. Boasa? Ala nungnga dibahen hamu las roha ni Jahowa jala ditanda akka dongan ma hamu halak na rade mangurupi.

13-14. Aha do na boi taulahon lao mangurupi akka dongan? (Ida gambar sampul.)

¹³ Parrohahon ma kebutuhan ni na asing. Didok si Paulus do tu halak Kristen na di Judea, “Unang ma lupa hamu mangulahon akka na denggan jala urupi hamu ma na asing sian nasa tolapmuna. Ai lomo do roha ni Debata tu akka pelean sisongon i.” (Heb. 13:16) Cocok do nasehat ni si Paulus i. Alana dang leleng dukkon dipaboa ibana suratna i, ikkon ditinggalhon halak Kristen na di Judea i do jabuna, karejona, dohot keluargana na so sahaporseaon. Jala “ikkon lari do [nasida] tu dolok”. (Mat. 24:16) Di tikki i, ikkon marsiurupan do nasida. Alani i, molo nungnga diulahon nasida sebelumna nasehat ni si Paulus nakkin, pasti lam mura ma nasida mambahen penyesuaian di inganan na baru.

¹⁴ Sipata dang sai dipaboa akka dongan aha na dihaporluhon nasida. Tabayakkon ma jo situasi on. Misalna, adong sahalak donganta bawa na baru mate istrina. Porlu do ra taurupi ibana paradehon sipanganonna, manaruhon ibana tu parpunguan, manang paiasson jabuna. Bisa  jadi dang dipaboa ibana i tu hita, ala dang olo ibana mambahen repot akka dongan. Alai pasti mandok mauliate do ibana molo hita na parjolo menawarhon bantuan. Unang ma tapikkir pasti adong do annon na mangurupi ibana, manang molo porlu ibana diurupi pasti paboaonna do i tu hita. Tapikkirhon ma sukkun-sukkun on, ‘Molo au di situasina aha do na huhaporluhon?’

15. Ikkon songon dia do sikapta asa unang segan halak mangido bantuan tu hita?

¹⁵ Ramah ma jala mura dijonoki. Pasti ditanda hamu do akka dongan di huria na sai rade mangurupi na asing. Dang hea nasida merasa repot mangurupi akka dongan. Sai rade do nasida mangurupi tikki dihaporluhon. Jadi pasti lomo rohatta maniru nasida. On ma na dihilala si Alen sahalak sintua na marumur 45 taon. Didok ibana, “Sibuk do Jesus, alai dang segan halak mangido bantuan sian ibana. Dang soal sadia umur ni nasida, leluasa do nasida manjonoki Jesus. Boi do diida nasida na holong roha ni Jesus tu nasida. Jadi lomo do rohakku maniru Jesus. Berupaya do au gabe halak na ramah, mura dijonoki, jala parduli tu na asing.”

16. Sesuai tu Psalmen 119:59, 60 aha do na ikkon taulahon asa boi maniru Jesus?

¹⁶ Unang ma metmet rohatta molo dang boi sempurna hita maniru Jesus. (Jak. 3:2) Dang undenggan murid sian guruna. Alai molo olo ibana marsiajar sian kesalahanna jala torus mangihutton guruna i, lam leleng gabe songon guruna i ma ibana. Dos songon i ma hita, molo taulahon sude na taparsiajari sian Bibel jala berusaha padenggatton pangalahotta, lam leleng gabe boi ma tatiru Jesus.​—Jaha Psalmen 119:59, 60.

17-18. Aha do manfaatna molo tatiru Jesus na rade mangurupi?

¹⁷ Molo rade hita mangurupi, gabe tergerak ma donganta na asing mangulahon na sarupa. Sahalak sintua na margoar si Tim mandok, “Adong do piga-piga donganta bawa na poso na tergerak lao mangurupi huria ala diida nasida teladan sian akka dongan. Alani i gabe berupaya ma nasida mambahen kemajuan jala ujungna dilantik gabe parhobas. Rade do nasida mangurupi huria jala mangurupi akka sintua.”

¹⁸ Godang do halak saonari on na egois, alai molo hita naposo ni Jahowa dang songon i. Nungnga taparsiajari teladan ni Jesus na rade mangurupi na asing jala bertekad do hita maniru ibana. Memang dang boi hita sempurna maniru Jesus, alai berupaya ma hita sian nasa gogotta mangihutton “bogas ni patna”. (1 Ptr. 2:21) Molo tatiru Jesus pasti las ma rohatta ala nungnga tabahen las roha ni Jahowa.