1. Rari ḇepyum rosai Yahwe kawasa Ḇyesi sifasnai na?

 FYOR iwara, Refo ḇyardi kwar Allah kawasa Ḇyesi ”nari sifarmyan ḇe I kuker sne ḇemarisen” ma siso akurfasnai ro Rumgun Ḇyedi. (Mz. 110:3) Komam ḇardadi ine ryarirya kaku ro fafisu koḇedine.Taun ḇe taun, Yahwe kawasa Ḇyesi siryaḇ kaku fa sbuk oras nasyadi ri milyar oser ro fararur ḇaḇebaryas. Sifrur na kuker sne ḇemarisen ma sor ḇabyak oḇa. Oso wer ido, simarisen sifnoḇek min Kristen sesi ro fandun rasras sena ma sifnoḇek si fa sfanam ḇe Yahwe I. Sisambraḇser yae si kako. Penatua ma hamba pelayanan sya sbuk oras nabor fa sfasos farkarkor na sawos ro fananjur ma sfarandouws naek srar ro sidang. Rosai ḇefnai fa Yahwe kawasa Ḇyesi simarisen sifrur roi nane kam? Kukro siswar Yahwe ma siswar min sesi.​—Mat. 22:37-39.

2. Imnis wos ḇero Roma 15:1-3, nyan ḇepyum rosai Yesus fyasnai na?

² Yesus fyasnai nyan ḇepyum kaku isoine myam epon fandun ro snonggaku ḇese. Komarisen kosewar kaku fa kakso nyan ḇyanane. (Wasya Roma 15:1-3.) Kofrur na ido na kosmai payamyum. Yesus doḇe, ”Kobuk ido na koḇeaski syadi ḇardibur ro kosmai ya.”​—Kis. 20:35, NW.

3. Rosai nari kawos ro farkarkor ineni?

³ Ro farkarkor ine, nari kawos rariso Yesus ifnoḇek  snonggaku ḇese kuker sne ḇemarisen ma moḇsa kakso nyan ḇyena rai. Na kawos kako nyan insama komarisen syadi fa kofnoḇek ḇesesya.

4. Rariso Yesus myam epon fandandun ro snonggaku ḇese?

⁴ Yesus imbrus kaku mboi imarisen ifnoḇek snonggaku ḇese. Ras oso kawasa ḇebor srama faro i ro bon fanam ḇe Kapernaum. Fafisu anya, Yesus imbrus kaku kukro ḇyenadi ro roḇ ya ḇesiper. Ḇape, rofyor myam kawasa ansi iswar kaku si. Ifawi ḇebor ro si sesabarar ma sidufe. Inja, byuk pararei faro snonggaku ḇeduf sya. Ḇape irya monda ḇa. Yesus dawos faya ḇesambraḇser si kako, ḇebor sifawi na ḇe Faya ro Urek.​—Luk. 6:12-20.

5. Rariso ḇebukor ro kina siso Yesus nyan ḇyena rai?

⁵ Nyan fa ḇebukor ro kina siso Yesus i. Kwarapan roi ine. Ḇebukor ro kina fyararur ro ras oser ḇesiper kwar, inja na imbrus fafaya ḇa. Randak ya kyara iḇye mura roḇ ine sifrur awer resari nadi ro kina sedi. Ḇape, mura ḇyenadi dor samambraḇ ro Yahwe I. Yahwe kyarem nadi ḇyena, inja bisa sifrur nadi ro kina sedi imnis rasras ḇepon na. Roḇ anya romawa ḇyesi sismai farkarkor ḇefandun kaku isoine smam sinan sesi smam epon nadi faro Yahwe I ro roi ḇesena.

6. Rariso Yesus imarisen byuk swaf ḇyena faro snonggaku ḇesesya?

⁶ Yesus imarisen byuk swaf faro snonggaku ḇesesya. Kwarapan kada moḇsa Yesus ḇyaḇir rai fafisu ifawi smun Yohanes Ḇebaptis ra imar? Yesus na ḇyesnesno fafaya ḇa. Rofyor ryower bati ḇyedine imar kwar, ’ibur moḇ ani ma dek wai oso ḇemoḇ ḇeḇeursḇa’ fa kyain ro manggundi. (Mat. 14:10-13) Yesus imbe kyain ro manggundi ima sasar oḇa. Fyor snonggaku koswar sya simar ido, na kakfrur rarirya kako. Ḇape Yesus jadi fa kyain ro manggundi ḇa. Fafisu ryo moḇ ani kwar, kawasa ḇebor sisya siwaf i kwar. Moḇsa Yesus myam si rai? Iswar kaku si, ma kyara fandandun sena. Myam sisya sfandun wos samarawraw ma fafnoḇek ro Allah, inja ifnoḇek si ḇeri. Fyarkor si kermgun  monda ḇa imboi ”fyarkor si ro roi nabor”.​—Mrk. 6:31-34; Luk. 9:10, 11.

7-8. Raris Yesus i, rariso penatua sya simarisen sifnoḇek ḇesesya?

⁷ Nyan fa penatua sya siso Yesus i. Koḇesyowi kaku penatua sya snar sfararur marbak kuker sne ḇemarisen faro ko. Ḇebor ro naek srar ro sidang sifawi nakam ḇa roi penatua sya sifrur na. Rupa ra, rofyor naek srar siduf ma sfandun fafnoḇek beri, mambesrar ḇefnoḇek ro Panitia Penghubung Rumah Sakit nari fasaw fa sbuk fafnoḇek. Ono ido, fafisu ḇeradine nejadi ro romfaḇru. Imḇape penatua sya simarisen sifnoḇek naek srar ḇesmai samwen sine snar siswar si. Penatua ansi ma kina sesya simarisen smam epon naek srar fandandun sena ro fandun manggun sena ḇardi.

⁸ Penatua sya kako sifnoḇek naek srar ḇesmai rim beba, fararur ḇaḇebawes Balai Kerajaan, ma ḇaḇawes ḇese organisasi ḇyena. Ro sidang kako, simarisen sbuk oras nabor fa sfarkor ma sisambraḇser ko. Penatua ansine ma kina sesya fandun fa kobuk wos sandik ḇe si. Yahwe na ḇyebarakas roi sifrur kuker sne ḇemarisen anna! Imnis ra ko, penatua sya kako fandun fa sirwas pyum oras sena. Sbuk oras sena fa nabro faro sidang ya monda ḇa rawo smam fandun ro kina sesya ḇa.

9. Imnis wos ḇero Filipi 2:4, 5, snonggaku Kristen fandun fa smam manggunsi ḇe mansei?

⁹ Wasya Filipi 2:4, 5. Kakuḇae, ḇebor ro ko penatua si ko ḇa. Ḇape, kokame bisa koso Yesus ḇemarisen ḇefnoḇek  ḇesesya. Refo doḇe Yesus ”ryir nakam kwar ma ḇyeimnis mankundi raris manfyan oso”. (Flp. 2:7) Rosai kofarkor ro mnuk ine? Women ḇaido manfyan oso, na syewar fa ifrur tuan ḇyedi imarisen. Koḇe women faro Yahwe I ma koḇe manfyan faro naek srar koḇesi. Inja, komarisen kofararur pyum faro Yahwe ma min Kristen koḇesya. Rarirya ido komam pan anun ḇeḇeso nane.

10. Fakfuken rosai monda bisa kokara na?

¹⁰ Kwarauser kenem manggun Bena. Kwarapan fakfuken-fakfuken nane: ’Yamarisen yabuk oras ma samambraḇ yena fa yafnoḇek ḇesesya ke? Rupa ra, fyor sor aya fa yara yamamfar naek ḇesinan kwar ḇebarek ro manggundi, ḇaido yun pyan imbesrar ḇesinan kwar ḇe fananjur ido, na yamarisen fa yafrur na ke? Ḇaido, fyor sifandun snonggaku ḇemarisen ḇefrur sren moḇ faro munara sarawrow regional ḇaido Balai Kerajaan ido, yamarisen yafnoḇek beri ke?’ Fafisu kobuk kenem koḇena faro Yahwe, kokofen ḇe I kwar nari kobuk roi nakam kosmai na fa kofarmyan ḇe I. Imarisen insama kobuk oras, samambraḇ, ma nana arasai koḇena fa kobukifnoḇek snonggaku ḇesesya. Inja, Allah Yahwe na imarisen kaku fyor kofrur roi nakam kuker sne ḇemarisen. Kokarauser kenem manggun koḇena kwar mboi roi ono kofrur ḇaim na rariso? Rosai bisa kofrur ya?

11. Rariso nadi ifnoḇek ko fa komarisen syadi kofnoḇek ḇesesya?

¹¹ Benadi kuker kakaku ḇe Yahwe I. Imḇude wafawi fandun fa wafnoḇek snonggaku ḇese kuker sne ḇemarisen syadi wer, ḇape rya waryaḇ fa wafrur na ḇa. Rarirya ido, ḇenadi ḇe Yahwe I kuker kakaku. Fawar roi ḇaḇir nakam faro I, ma wor insama byuk ḇe Au marisen ma samambraḇ fa wafrur marisen Ḇyenakam.​—Flp. 2:13.

12. Rosai ḇefnai Yahwe organisasi Ḇyedi fyandun mambesrar ḇebabo ḇebaptis kwar fafnoḇek sena?

¹² Mambesrar ḇebabo ḇebaptis kwar mgoya, mgor ro nadi ḇe Yahwe I fa byuk ḇe mgo marisen fa mgofrur roi nabor syadi wer faro naek srar ro sidang sya. Ro sup ḇeḇeso ḇeyuffarmyan ḇe penatua sya sibor syadi ro hamba pelayanan sya. Ma hamba pelayanan ḇeḇeso sya, sḇesinan kwar. Oso wer ido, snonggaku ḇeyaksun ro organisasi siḇor syadi wer. Inja, sfandun mambesrar ḇebabo sya fa sifnoḇek penatua sya fa suffarmyan naek srar ro sidang. Mgomarisen mgofnoḇek ro moḇ risai monda ḇefandun fafnoḇek ido, nari mgosmai marisen. Rosai ḇefnai ya? Kukro (1) Yahwe nari imarisen kaku, (2) naek srar na smam mgoma mgomarisen mgofnoḇek ḇesesya, (3) manggun mgo nari mgomarisen snar bisa mgofnoḇek snonggaku ḇese.

13-14. Rosai monda bisa kofrur fa kofnoḇek naek srar koḇesya? (Mam sonin ḇero barpon.)

¹³ Mam snonggaku ḇese roi sfandun na. Manwawan Paulus danunepen snonggaku Kristen ḇero Yudea sya, ”Mkofanander awer mkofrur roi ḇeḇye ma mkofnoḇekyae mko, snar Allah i marisen samsom ḇerarirya.” (Ibr. 13:16) Wos anun ine nasrow beri. Sismai syapram ro Paulus i fyoro ḇa mura, fandun fa siḇur rum sena, fararur sena, kina ḇena kakyar oser kuker si ḇa ma ”sifrar siḇur ḇe bon na”. (Mat. 24:16) Ro fafisu ḇeradirya, sfandun kaku fafnoḇek ro ḇesesya. Siso wos anun Paulus byuk ḇe si na fa sifnoḇekyae si ido, ro moḇ ḇebabo nari samswen ḇe si ḇa fafisu sna roebor naḇor ḇa.

 ¹⁴ Naek srar koḇesi na sikofenḇair ker ḇe ko ḇa sfandun fafnoḇek ro ko. Rupa ra, naek oso imḇude fyafardun kaker kukro swari insape imarbur i. Imbude fyandun fafnoḇek fa fyasos roḇean ḇaido ifrur fararur rasras ro rum na. Ḇaido imbude fyandun snonggaku oso fa dun farma i ḇe moḇ oso. Ḇape, imewer ikofenḇair na kukro imewer ifrur samswen ko. Dor fafnoḇek ro ko ḇa, mboi kosewar fa kofnoḇek i ido, nari ḇyesyowi kaku na. Kokara awer snonggaku ḇese nari sifnoḇek i kwar ḇaido fyandun fafnoḇek ido nari ḇyeḇair ḇe ko. Imḇape, kokarapan: ’Yaksmai samswen ḇemnis ra i ido, fafnoḇek rosai yafandun na?’

15. Komarisen kofnoḇek snonggaku sya raris Yesus ido, rosai fandun fa kofrur ya?

¹⁵ Ḇe fa ḇesesya napyan fa sfanam yoḇ Au. Ro sidang koḇedi naek srar ono sisya simarisen sifnoḇek ḇesesya. Kokyar simarisen sifnoḇek ko fafisu kosmai samswen. Na skara ḇaḇeri kofrur marmor si monda. Komarisen kakfrur rarirya kako ḇae. Penatua ḇeumur taun ri 40 snori Alan, imarisen snonggaku sya napyan fa sfanam yoḇ i. Doḇe, ”Yesus ima nya fararur nabore, ḇape snonggaku ḇesinan kwar ma ḇebabo sya simarisen sfanam yoḇ i ma simgak ḇa fa sor fafnoḇek ro i. Sifawi Yesus ima iswar kaku si. Yamarisen yakfrur ra Yesus i, sifawi aya ḇe snonggaku ḇefrurpyum, ḇesaswar, ma napyan fa sfanam yoḇ aya.”

16. Rariso koso pyum syadi Yesus nyan ḇepyum ḇyena imnis wos ḇero Mazmur 119:59, 60 ?

¹⁶ Rofyor jadi fa koso mnis kaku Yesus nyan ḇyena ḇa yo, kofafko awer. (Yak. 3:2) Snonggaku ḇefarkor babo fa ifrur kareren nari fararur ḇyena imnis ra ḇefarkor i ḇa, kukro ima ḇyekir kwar ro ifrur  kararen. Kakuḇae, na ifrur sasar kako, ḇape fyarkor ro sasar ifrur na ma syewar fa iso pyum nyan ro guru ḇyedi fyasnai na ido, nari ifrur kareren ḇepyum syadi. Rarya kako, rofyor kofrur rosai kofarkor ro Refo, ma kosewar fa kofadwer kenem koḇena ido, nari koso pyum syadi Yesus nyan ḇepyum ḇyena.​—Wasya Mazmur 119:59, 60.

17-18. Raris Yesus i komarisen kofnoḇek ḇesesya ido, payamyum rosai kosmai na?

¹⁷ Komarisen kofnoḇek snonggaku ḇese ido, ḇesesya nari sakmarisen sakfrur rarirya kako. Penatua oso snori Tim doḇe, ”Mambesrar ḇeḇeso ḇebabo kaker simarisen suffarmyan ḇe hamba pelayanan. Roi oso ḇefnai ya iso snar smam roi ḇepyum ro snonggaku ḇese ḇemarisen fa ḇefnoḇek ḇesesya. Inja sakmarisen sakfnoḇek ḇesesya kako. Mambesrar ḇebabo ansine sifnoḇek kaku penatua ma sidang.”

¹⁸ Snonggaku ḇebor ro dunya ine sfandun manggunsi ḇardi. Ḇape, Yahwe kawasa Ḇyesi koine koḇese. Sne koḇena naprei kaku fyor komam Yesus imarisen ifnoḇek ḇesesya, ma komarisen kakfrur raris i kako. Kakuḇae nyan Yesus fyasnai na jadi fa koso mnis kaku na ḇa, ḇape bisa ’kosopyum wewur ḇyena.’ (1 Ptr. 2:21) Fyor kosewar kaku fa koso Yesus nyan ḇyena ido, nari komarisen snar kofrur Yahwe sneri imarisen.