1. ?Wanem gudfala fasin we ol man blong Jehova oli gat?

BAEBOL i bin talemaot bifo finis se ol man blong God bambae “oli glad nomo” blong mekem wok blong Jehova, aninit long daereksen blong Jisas. (Sam 110:3) Profet tok ya i stap kamtru tede. Evri yia ol man blong Jehova oli spenem plante milian aoa long wok blong prij. Oli glad nomo blong mekem wok ya, nating se oli no kasem pei from. Mo tu, oli tekem taem blong sapotem ol brata mo sista blong olgeta long saed blong bodi, filing, mo spirit. Ol elda mo ol man blong givhan, oli spenem plante aoa blong rerem ol haf blong miting, mo blong visitim ol brata mo sista blong leftemap tingting blong olgeta. ?Wanem i pulum ol man blong Jehova blong mekem ol wok ya? Hemia lav, lav we oli gat long Jehova mo long ol neba blong olgeta.—Mat. 22:37-39.

2. Folem Rom 15:1-3, ?Jisas i soemaot wanem eksampol?

² Jisas i soem wan nambawan eksampol blong tingbaot nid blong narafala fastaem. Yumi stap mekem bes blong yumi blong folem eksampol blong hem. (Ridim Rom 15:1-3.) Olgeta we oli folem eksampol blong hem, bambae oli kasem blesing. Jisas i talem se: “Man i harem gud moa taem hem i givim samting, i bitim we hem i kasem samting.”—Wok 20:35.

3. ?Bambae yumi tokbaot wanem long stadi ya?

³ Long stadi ya, bambae yumi tokbaot sam samting we Jisas i mekem blong halpem ol narafala, mo olsem wanem yumi save folem eksampol blong hem. Mo tu, bambae yumi tokbaot olsem wanem yumi save glad moa blong halpem ol narafala.

4. ?Jisas i soemaot olsem wanem se hem i tingbaot narafala fastaem?

⁴Jisas i halpem ol narafala nating se hem i taed. Tingbaot samting we Jisas i mekem, taem plante man oli kam blong luk hem antap long wan hil, maet klosap long Kapaneam. Bifo long hemia, Jisas i bin prea ful naet. Ating hem i mas taed tumas, be taem hem i luk bigfala hip blong ol man oli kam long hem, hem i sore tumas long ol puaman mo long olgeta we oli sik. Ale hem i hilim olgeta, be i no hemia nomo, hem i talem sam gudfala toktok tu blong leftemap tingting blong olgeta, we hemia nao Bigfala Toktok Blong Hem Antap Long Hil.—Luk 6:12-20.

5. ?Olsem wanem ol hed blong famle oli save folem eksampol blong Jisas, nating se oli taed?

⁵?Ol hed blong famle oli folem eksampol blong Jisas olsem wanem? Tingbaot eksampol ya. Wan hed blong famle i kambak long haos afta long wan longfala dei blong wok mo hem i taed tumas. Maet hem i wantem kanselem program blong famle wosip we oli sud gat long sapa ya, be hem i askem strong long Jehova blong i givhan long hem blong i mekem se program i save gohed. Jehova i ansarem prea blong hem, nao oli gohed blong mekem famle wosip olsem we oli stap mekem evri wik. Ol pikinini oli lanem wan impoten lesen long sapa ya, hemia se papa mama i putum ol samting long saed blong spirit fasples.

6. Tokbaot olsem wanem Jisas i tekem taem blong halpem ol narafala.

⁶Jisas i tekem taem blong halpem narafala, nating se hem i wantem stap hem wan. Traem tingbaot filing blong Jisas taem hem i harem se fren blong hem Jon Baptaes i ded. I sua se Jisas i harem nogud bigwan. Baebol i talem se: “Taem Jisas i harem [se Jon i ded], hem i aot long ples ya, i klaem long wan bot, blong go long wan ples we i no gat man long hem, blong hem i save stap hem wan.” (Mat. 14:10-13) Yumi kasemsave from wanem Jisas i wantem stap hem wan. Sam man oli laekem blong stap olgeta wan, taem oli harem nogud. Be Jisas i no gat janis blong stap hem wan, from wan bigfala hip blong ol man oli kamtru fastaem long ples we hem i wantem go long  hem. ?Jisas i mekem wanem? Hem i tingbaot nid blong olgeta, mo i “sore tumas long olgeta.” Hem i luksave se oli nidim ol samting long saed blong spirit blong leftemap tingting blong olgeta. Ale, kwiktaem nomo hem i halpem olgeta. Long taem ya, hem i tijim olgeta [i no jes long sam samting nomo, be] long plante samting.”—Mak 6:31-34; Luk 9:10, 11.

7-8. Tokbaot olsem wanem ol elda oli folem eksampol blong Jisas, taem narafala i nidim help.

⁷?Ol elda oli folem eksampol blong Jisas olsem wanem? !Yumi glad tumas long ol gudfala wok we ol elda oli mekem blong givhan long yumi! Plante taem yumi no save evri wok we oli stap mekem. Eksampol, taem i gat wan brata o sista i sik bigwan mo i nidim blong go long hospital kwiktaem, ol memba blong Komiti Blong Toktok Wetem Dokta, oli go kwiktaem blong givhan long brata o sista ya. !Plante taem samting olsem i hapen long medel naet! Be from we ol elda ya mo ol famle blong olgeta oli sore long brata o sista ya we i sik, oli tingbaot moa blong go givhan long hem fastaem.

⁸ Ol elda tu oli givhan long wok blong bildim ol Haos Kingdom mo ol narafala bilding, mo oli givhan tu long taem blong disasta. Mo oli spenem plante taem blong tijim mo leftemap tingting blong yumi. Yes, yumi nidim blong talem gudfala tok blong leftemap tingting blong ol brata ya mo ol famle blong olgeta. !I gud Jehova i blesem olgeta from ol gudfala fasin blong olgeta! Mo olsem evriwan, ol elda tu oli nidim blong skelem gud ol samting. Oli no mas spenem tumas taem long ol tiokratik wok, nao oli moa lukaot gud long famle blong olgeta.

9. Folem Filipae 2:4, 5, ?wanem fasin we evri Kristin oli sud gat?

⁹ Ridim Filipae 2:4, 5. I no ol elda nomo, be yumi evriwan i save lanem blong folem eksampol blong Jisas, blong tingbaot nid blong narafala fastaem. Baebol i talem se Jisas “i kam olsem wan slef nomo.” (Fil. 2:7) Tingbaot samting we yumi save lanem long vas ya. Wan gudfala slef o man blong wok, bambae i tekem evri janis blong mekem masta blong hem i glad. From we yumi slef blong Jehova mo yumi stap mekem wok blong givhan long ol brata mo sista blong yumi, yumi wantem kam gud moa long fasin ya. Ol haf we i kam biaen bambae oli givhan long yumi long saed ya.

10. ?Wanem ol kwestin we yumi save askem long yumi wan?

¹⁰Skelem fasin blong yu. Blong mekem olsem, yu save askem ol kwestin ya: ‘?Mi mi glad blong yusum taem mo paoa blong mi blong halpem ol narafala? Eksampol, ?bambae mi mi mekem wanem sipos oli askem mi blong go visitim wan olfala brata we i stap long haos blong ol olfala, o tekem wan olfala sista i go long ol miting? ?Mi mi kwik blong givhan taem i gat nid blong klinim ples blong asembli o Haos Kingdom?’ Jehova i glad taem yumi rere blong yusum taem mo ol samting we yumi gat, blong givhan long narafala olsem we yumi bin promes blong mekem, taem yumi givim laef blong yumi long hem. Sipos yumi luk se i nidim blong yumi kam gud moa, ?yumi save mekem wanem?

11. ?Olsem wanem prea i save givhan blong yumi glad moa blong halpem narafala?

¹¹Prea long Jehova. Sipos yu luksave se yu nidim blong kam gud moa long sam samting, be yu no gat strong tingting blong mekem olsem, i gud yu prea long Jehova. Yu mas tok tru mo talemaot filing blong yu long Jehova, mo askem hem blong i mekem se ‘yu wantem wok mo i givim paoa long yu blong mekem olgeta samting we hem i laekem.’—Fil. 2:13.

12. ?Olsem wanem wan yangfala brata we i baptaes, i save givhan long kongregesen?

¹² Sipos yu yu wan yangfala brata we i baptaes finis, askem Jehova blong i halpem yu, blong yu wantem mekem moa samting blong halpem ol brata mo sista long kongregesen blong yu. Long sam kantri, i gat plante moa elda i bitim ol man blong givhan, mo plante long ol man blong givhan ya oli no ol yangfala. From we oganaesesen blong Jehova i stap gru, yumi nidim moa ol yangfala blong oli save givhan blong lukaot long ol man blong Jehova. Sipos yu glad blong mekem eni wok we oli askem yu blong mekem, bambae yu glad. ?From wanem? From we Jehova bambae i glad long yu, bambae yu gat gudnem long kongregesen, mo bambae yu kasem glad from yu stap givhan long ol narafala.

13-14. ?Yumi save mekem wanem blong halpem ol brata mo sista? (Yu luk pija long fran pej.)

¹³Luksave taem narafala i nidim help. Aposol Pol i talem long ol Kristin we oli laef long Judia se: “Yufala i no mas fogetem blong mekem ol gudfala fasin, mo blong serem olting blong yufala long ol narafala, from we God i glad long ol kaen sakrefaes olsem.” (Hib. 13:16) !Hemia wan nambawan advaes! I no longtaem afta we ol Kristin long Judia oli kasem leta ya, oli lego haos blong olgeta, bisnes blong olgeta, mo ol famle blong olgeta we oli no Kristin, mo “oli ronwe i go long ol bigfala hil.” (Mat. 24:16) Long taem ya, i rili impoten blong oli givgivhan long olgeta. Sipos oli bin folem advaes blong Pol blong serem olting blong olgeta wetem ol narafala, bambae i isi  blong oli glad nomo long wanem samting we oli gat, long niufala ples we oli go long hem.

¹⁴ Maet i no oltaem we ol brata mo sista oli talem long yumi samting we oli nidim. Eksampol, maet wan brata i lusum waef blong hem long ded. ?Olsem wanem? ?Hem i nidim help long saed blong kakae, transpot, o blong klinim haos? Maet hem i fraet blong askem help, from hem i no wantem mekem hadwok long yumi. Be bambae hem i glad tumas sipos yumi nao yumi faswan blong go, mo givhan long hem long ol samting we hem i nidim. Yumi no mas ting se narafala bambae i go givhan long hem, o se bambae hem i askem help sipos hem i nidim. Askem yu wan se: ‘Sipos mi mi stap long situesen ya, ?wanem samting nao mi wantem se narafala i mekem blong givhan long mi?’

15. ?Yumi mas mekem wanem sipos yumi wantem halpem ol narafala?

¹⁵Mekem i isi blong narafala i save askem help long yu. I sua se yu save gud ol brata mo sista long kongregesen blong yu we oltaem oli rere blong givhan long ol narafala. Oli neva mekem yumi harem se yumi stap mekem hadwok long olgeta. Yumi save se oltaem oli rere blong halpem yumi, mo maet yumi wantem mekem sem mak olsem olgeta. Alan, wan elda we i gat 45 yia i wantem mekem i isi blong narafala i kam askem help long hem. Alan i tokbaot eksampol blong Jisas i se: “Jisas i wan man we i bisi, be ol yangfala mo ol olfala oli kam long hem mo oli no fraet blong askem hem blong i halpem olgeta. Oli save se hem i rili kea long olgeta. Mi wantem mekem olsem Jisas blong kea long narafala, mo mekem i isi blong oli kam askem help long mi.”

16. ?Olsem wanem Ol Sam 119:59, 60 i halpem yumi blong folem eksampol blong Jisas?

¹⁶ Yumi no mas harem nogud sipos yumi no  folem gud eksampol blong Jisas. (Jem. 3:2) Wan studen i no save mekem samting we i stret gud olsem tija blong hem. Be sipos studen ya i lanem samting from mastik blong hem, mo i traehad blong folem gud samting we tija blong hem i mekem, bambae hem i kam gud moa. Long sem fasin, sipos yumi folem samting we yumi lanem long prapa stadi blong yumi, mo yumi traehad blong kam gud moa, bambae i moa isi blong yumi folem eksampol blong Jisas.—Ridim Ol Sam 119:59, 60.

17-18. ?Bambae yumi kasem wanem blesing sipos yumi folem eksampol blong Jisas?

¹⁷ Taem yumi glad blong halpem narafala, hemia bambae i pulum ol narafala tu blong wantem mekem sem mak. Wan elda we nem blong hem Tim, i talem se: “Mifala i gat plante yangfala brata we oli gohed gud, mo oli kam ol man blong givhan. Samfala oli yangfala nomo be oli kasem mak ya, hemia from we oli luk eksampol blong ol narafala we oli glad blong givhan, mo olgeta tu oli wantem mekem sem mak. Ol yangfala ya oli givhan long kongregesen mo oli sapotem bigwan ol elda.”

¹⁸ Plante man long wol tede oli tingbaot olgeta nomo. Be ol man blong Jehova oli no olsem. Yumi luk gudfala eksampol blong Jisas, mo yumi gat strong tingting blong wantem mekem sem mak olsem hem. I tru, yumi no save mekem stret olsem Jisas, be yumi save “folemgud trak blong leg blong hem.” (1 Pita 2:21) Sipos yumi mekem bes blong yumi blong folem eksampol blong Jisas, bambae yumi harem gud from yumi save se yumi mekem Jehova i glad.