1. Mbamba été nsisim mbé bebo bisaé be Yéhôva be bili?

 KALATE Zambe a nga kuli ajô na, bebo bisaé be Zambe bé bo “meva’a ya ve bebien” asu ésaé Jé éjôé Mone wé si. (Bs. 110:3) Nkulan ajô ôte wo tôébane melu ma. Mbu ôse, Bengaa be Yéhôva ba lôte mintete bemillion mewolo ésaé nkañete. Ba ya’ane ke be asu ésaé éte, ba bo je a nleme wop ôse. Ba belane fe éyoñe jap asu na be su’u bobejañ a besita mfa’a ya minsôn a mfa’a ya nsisim. Bemvendé a bediakon ba lôt abui mewolo be kômesa’ane minlô mejô asu bisulan ba nyoñe fe ngab a bobejañ. Jé ja tindi bia bese na bi bo ésaé éte? Fo’o ve nye’an. Bia nye’e Yéhôva, a bia nye’e bôte bevo’ abui.​—Mt. 22:37-39.

2. Bela’ane Beromain 15:1-3 asu na ô liti mbamba éve’ela Yésus a nga li’i bia.

² Yésus a nga liti mbamba éve’ela mfa’a ya telé miñyiane mi bôte bevo’ ôsu. Bia ve ngul ése na bi vu nye. (Lañe’e Beromain 15:1-3.) Bôte ba tôñ éve’ela jé bé bi abui bibotan. Yésus a nga jô na: “Môt a ve a nyô a nyoñ, nyô a ve a dañe yen ébotan.”​—Mam. 20:35.

3. Jé bia zu yen ayé’é di?

³ Ayé’é di, bia zu yene mam méziñe Yésus a nga nyum émien asu na a saane bôte bevok, a aval avé bi ne vu nye. Bii yene fe aval avé bi ne tu’a bi nkômbane ya saane bôte bevok.

4. Aval avé Yésus a nga telé miñyiane mi bôte bevo’ ôsu?

⁴ Yésus a nga volô bôte bevok, to’o éyoñ a mbe nte’an. Tame simesan avale Yésus a nga bo éyoñe nkunda bôt ô nga zu koone nye nkôl éziñ, éko éziñ fefele Capernaüm. Yésus a nga lôte ngumba alu meye’elan été. A mbe a nga yiane bo nya nte’ane, ve éyoñ a nga yene bôte be za’ak, a nga wô’ô minkôkon a minzôzoé mi mbe zañe jap éngôngol. A nji su’u ve na a saé be, a nga bo fe angôndô ya mbamba nkañete ya mengana bôt: Nkañete ya nkôle yôp.​—Luc 6:12-20.

5. Aval avé minlô ya menda me bôte mi ne vu Yésus mfa’a ya telé miñyiane mi bôte bevo’ ôsu to’o éyoñe mi ne nte’an?

⁵ Avale minlô ya menda me bôte mi ne vu Yésus. Tame fas éve’an ji: Nlô ya nda bôte wo so ésaé mame ngô’é, ô te’eya ne botok a ésaé. Mbôle a ne nte’an, éko éziñ a ne kômbô na be bu’u ayé’é ya nda bôte ngô’é éte, a bo de môs ôfe. Ve a ja’é Yéhôva ngule Jé asu na a bo de. Mvuse ya valé, Yéhôva a yalane meye’elane mé, a ayé’é da bobane ngô’é éte avale be wô’ô jaé zu ba bo. Bone bé ba bi beta ñye’elan ngô’é éte. Ba yene na mame ya nsisim mme ma dañe mfi asu bebiaé bap a lôte mam mevo’o mese.

6. Liti’ aval avé Yésus a nga nyum émiene mam asu na a volô bôte bevok.

⁶ Yésus a nga nyoñ éyoñe ya volô bôte bevok, to’o éyoñ a mbe a yi’ na a tabe étam. Tame ve’ele simesan avale Yésus a nga wô’ôtan éyoñ a nga wô’ô na ba te wôé mvôé jé, Jean Baptiste. Jam ete e nga yiane nye taé nlem angôndô. Kalate Zambe a jô na: “Éyoñ Yésus a nga wô’ô [na Jean a wuya], a nga ke éfunga été a kôlô vôm ate, a ke fé vôm bôt be mbe momo.” (Mt. 14:10-13) Bi ne wô’ô amu jé Yésus a mbe a kômbô’ô tabe étam. Abui ya be bia da nye’e e yônô’ô vôme be ne étam. Ve Yésus nye a nji bi éyoñe ya tabe étam. Ôsusua na a kui vôm a mbe a kele’e, nkunda bôte ô mbe ô nto wôé ô yange’e nye. Yésus a nga bo aya éyoñ a nga yene be? A nga fas ajô  miñyiane mi bôte bete, ane “a nga ko be éngôngo.” A nga yene na be mbe be yi’ bidi ya nsisim, “ane a nga taté ye’ele be [sake jame da, ve] abui mejô.”​—Marc 6:31-34; Luc 9:10, 11.

7-8. Va’a éve’ane ja liti aval avé bemvendé ba vu nye’ane Yésus éyoñ bobejañ a besita ba yi mvolan.

⁷ Avale bemvendé ba vu Yésus. Bi ne angôndô ya mevak éyoñe bia yene mbamba ésaé bemvendé ba bo asu dangan. Abui bobejañ a besita ya akônda da kôme ke yem ésaé ése ba bo. Éve’an é ne na, bobejañe ya émo’o ja volô bobejañ a besita ba ke menda mebiañ (comité de liaison hospitalier) be wô’ô ji’a ke volô bobejañe be ne menda mebiañ éyoñ ajô metyi da bômbô. Biyoñe biziñ, e wô’ô sili na be ke su’u be zañ alu. Mbôle ba wô’ô bobenyañ a bekale bap mintaé, bemvendé bete a menda me bôte map be wô’ô telé miñyiane miap fefel asu na be ke volô bobejañe be tele mbia été.

⁸ Bemvendé ba nyoñe fe ngap ésaé nlôñane Meba m’Éjôé a menda mefe ékôane Yéhôva ja belane me. Be wô’ô fe ke su’u bobejañe ba te tôban ébubua. A ba lôt abui éyoñ asu na be ye’ele bia a ve bia ngule nyul. Bia bese bia yiane fo’o se’e bobejañe bete a bibu’a ya menda me bôte map. Yéhôva a kele’ ôsu a botane mbamba été nsisim be bili. Ve jame da bemvendé ba yiane bi mbamba ñyenane mam. Be nji yiane nyoñ éyoñe jap ése na be bo ve bisaé bi tyii a ékôane Yéhôva aval e ne na, teke fe éyoñe ya nyoñe ngap a menda me bôte map.

9. Mbamba été nsisim mbé Bephilippien 2:4, 5 a jô na Kristen ése ja yiane bi?

⁹ Lañe’e Bephilippien 2:4, 5. E ne été na bia bese bi nji bo bemvendé, ve môt ase ya be bia a ne vu Yésus a telé miñyiane mi bôte bevo’ ôsu. Kalate Zambe a jô na Yésus a nga “tabe ane mbo ésaé.” (Beph. 2:7) Jé éfus éte ja ye’ele bia? Mbamba mbo ésaé a jeñe kom ése fane ya ve masa wé nlem mevak. Mbôle bi ne bebo bisaé be Yéhôva a bia kômbô saane bobejañ, teke bisô na bia jeñe mezene ya tu’a bo mfi asu Yéhôva a bobejañ. Bi tame zu yene melebe me ne volô bia mfa’a ôte.

10. Minsili mivé bi ne sili biabebien?

¹⁰ Fase’ été nsisim jôé. Sili’i womien avale minsili di: ‘Ye me ne ôjeja’a ya nyume mamiene mam asu na me volô bôte bevok? Mé bo aya nge ba sili ma môs éziñe na me ke jome nnôme mojañe nda jé, nge ke na me ke liti nnôme sita éziñ ésulan? Ye me ne avôle ya nyoñe ngap ésaé mfubane ya Aba Éjôé, a meba bia belane me asu bitôkan?’ Éyoñe bi nga ve biabebiene ngumba be Yéhôva, bi nga ka’ale Nye na bii belane biôme bise bi bili asu na bi bo Nye ésaé. A yi na bi belan éyoñe jangan, ngule jangan, a biôme bi mo bi bili asu na bi volô bôte bevok. Ajô te, éyoñe bia bo de a nleme wongan ôse, bia ve Yéhôva nlem avak. Nge bia yene na bia yiane tu’a ve ngule mfa’a éziñ, jé bi ne bo?

11. Aval avé meye’elane me ne volô bia na bi tu’a bi nkômbane ya volô bôte bevok?

¹¹ Ye’ela’ane Yéhôva a nleme wôé ôse. Éko éziñe wo yene na wo yiane tu’a ve ngule ya telé miñyiane mi bôte bevo’ ôsu, ve ô nji bi nkômbane ya bo de. Wo yiane ye’elane Yéhôva a nlem ôse asu jam ete. Bo’o zôsôô. Kate’e Yéhôva avale wo wô’ôtan, a sili Nye na a ve wo nkômban a ngule ya bo avale da yian.​—Beph. 2:13.

12. Aval avé ésoé mojañ é ne volô ékôane Yéhôva?

¹² Nge ô ne ésoé mojañ, sili’i Yéhôva na a ve wo nkômbane ya nene ésaé wo bo akônda. Mesi méziñ, bemvendé be ne abui adañe bediakon, a abui bediakon ya été be nto benya bôtô abui. Nté ékôane Yéhôva é ne ve nen, bia tu’a yi abui bisoé bi bobejañe bi ne volô bemvendé na be nyoñe ngab a bebo bisaé be Yéhôva. Nge ô ne nkômesane ya saé vôm ase ékôane Yéhôva ja ye lôme wo, wé bo mevak. Amu jé? Amu wé ve Yéhôva nlem avak, a bobejañe ba ye yene na ô bili nkômbane ya volô bôte bevok. Wo ye fe bi ava’a da so éyoñe wo volô bôte bevok.

13-14. Mam mevé bi ne bo asu na bi volô bobejañ a besita? (Fombô’ô fôtô ya ékô’ôla.)

¹³ Jeñe’e na ô yem miñyiane mi bôte bevok. Nlômane Paul ô nga lebe Behébreu na: “Mi bo’o te vuane bo mame ya volô bôt a kabane biôm, amu na, avale mimvean ete nde Zambe a tu’a yen mvaé.” (Beh. 13:16) A mbe fo’o mbamba melep! Éyoñe be biya kalate ate, Bekristene bete be nga beta bo mone éyoñ e Judée, ane e nga sili na be kôlô menda map a li’i makite map, a bivuvumane biap bi nji be Bekristen asu na ‘be ke mimbile minkô.’ (Mt. 24:16) Éyoñe nalé a nga kui, e mbe nya mfii na môt ase a volô nyu mbok. Nge be nga taté na ba tôñe melebe me Paul ôsusua na  jam ete da boban, wôna e nga yiane bo tyi’ibi asu dap na be ke nyiñe mfefé nlame be mbe na ba ke tabe.

¹⁴ Bobejañ a besita ba ye ke bia zu kate éyoñ ése na ba yi jame si jame ka. Bi tame jô na minga mojañ éziñ a te wu. Ye mojañ ate é yi mvolan asu nnam, mboane makit, nge ke bisaé bife ya nda? Éko éziñ, a ne bo teke bia zu sili mvolan amu a ko woñe na a ndeñele bia. Ve é yiane wô’ô angôndô ya mevak nge bia ve nye mvolan a yi ôsusua na a sili bia wô. Bi nji yiane simesane na môte mfe é ke volô nye, nge ke na émien é zu kate bia nge a yi mvolan. Sili’i womiene na: ‘Nge ma me mbe me tele été éte, me nga ye yi avale mvolan avé?’

15. Jé bia yiane bo nge bia kômbô volô bôte bevok?

¹⁵ Bo’o avale môt bôte ba subu bebé tyi’ibi. Teke bisô na wo yem bobejañ a besita ya akônda dôé be ne avôle ya volô bôte bevok. Teke môs éziñe be boya na bi wô’ôtan ve ane nge bia ndeñele be. Bia yeme na bi ne be ke yen éyoñ ése bi ne yi mvolan, a bia kômbô fo’o vu be. Alan, mvendé éziñ é bili mimbu 45, a mbe a yi’ na a bo avale môt bôte ba subu bebé tyi’ibi. A nga bindi éve’ela Yésus a jô na: “Yésus a mbe fo’o a bili abui mame ya bo, ve bôte ya ôkala ôse be mbe be subu’u nye bebé, teke ko woñe ya sili nye mvolan. Be mbe be yene’e nye ane môt a wô’ô be angôndô ya mintaé. Ma fe ma kômbô bo ane Yésus, ma yi na bôte bevok be yene ma ane môt a ne ôsesa, a nyu a wô’ô bôte bevo’o mintaé.”

16. Aval avé Besam 119:59, 60 a ne volô bia na bi tôñ éve’ela Yésus?

¹⁶ Bi nji yiane bili atek nge bia kate kui  na bi tôñ éve’ela Yésus ne tiññ. (Jc. 3:2) Môt a yé’é ésaé éziñ a vo’o tôñ éve’ela ñye’ele wé ne tiññ. Ve nge ñyé’é a bo te bili atek éyoñ a bo bikop a ve ngul ése na a tôñ éve’ela ñye’ele wé, é kui na a bo mintyendane mia sili. Aval ete da da, nge bia tôñe mame bia yé’é Bible, a ve ngul ése na bi bo mintyendane mia sili, bii kui na bi tôñ éve’ela Yésus a nga li’i bia.​—Lañe’e Besam 119:59, 60.

17-18. Bibotane bivé bii bi nge bia ke ôsu a vu Yésus?

¹⁷ Éyoñe bia ve ngule na bi volô bobejañ a besita, be fe be ne bi nkômbane ya vu bia. Mvendé éziñ é ne jôé na Tim, ja jô na: “Bisoé bi bobejañ biziñe bi nga yaé nsisim a tebe bediakon amu bi nga kômbô vu bobejañe béziñe ya akônda be nga liti fulu ya telé miñyiane mi bôte bevok ôsu. Bisoé bite bia volô akônda a su’u bemvendé nya abuii.”

¹⁸ Bôt abui ya émo ji ba vuñulu fo’o ve ayôñe ya tô’ô jap. Ve bebo bisaé be Yéhôva be nji ve’ele bo nalé. Bi nga yen aval avé Yésus a mbe a nyumu’u émiene mam asu na a volô bôte bevok, a jam ete e nga nambe bia abui. Nde bi nga nyoñe ntyi’ane na bia zu tôñ éve’ela jé. E ne été na bi vo’o “tôñe bibô’a mebo bié” ne tiññ, ve nge bia wulu ba’aba’a a nye bii bo ngule ya tôñe bie abim éziñ. (1 P. 2:21) Nge bia ve ngule jangan ése na bi vu Yésus, bia fe bii bi abui mevak amu bii ve Yéhôva nleme mvaé.