1. Ka lubuidun igaburi harufudubei lumutuniña Heowá?

 SARAGU dan guentó lúmagiñe lariñawagún tidan Bíbülia lidan aban profesía hederegeraguba lan buga lubúeingu Heowá lun lau sun hagundan lun heseriwidun lun afalareina ladundehan Liráü (Sal. 110:3). Chóuruti lagunfuliruña lan profesía le uguñe weyu. Sagü irumu, apurichihatiña lubúeingu Bungiu lau ubebeni saragu san míñunu oura lau sun hagundan ani maguburahanga. Yusu hamuti giñe hadaani lun híderaguniña hábirigu. Lanwoun lira, sügütiña giñe wéiyaaña lidan afiñeni hama ídehatiña lidan damuriguaü saragu oura aransera lubá adamuridaguni, lubá híchugun yanu luma lubá habisidahaniña lílana damuriguaü. Ka ínchahabaliña adügei sun le? Ínsiñeni luagu Heowá luma hawagu gürigia (Mat. 22:37-39).

2. Según Rómana 15:1-3, ka hénpulu líchugubei Hesusu woun?

² Áluaha lumuti meha Hesusu le buídutimabei houn amu lubaragiñe le buídutimabei lun, ani wagía kristiánugu áfaaguatiwa lun wáyeihani lubuidun lani hénpulu (aliiha huméi Rómana 15:1-3). Anhein wadüga, buídubei lidin woun. Ariñagati Hesusu: ‘Gúndaatimati le íchugubei sügǘ lau le eresibirubei’ (Adü. 20:35, LBID).

3. Kaba wakutiha lidan aturiahani le?

³ Lidan aturiahani le, wayanuhaba luagu fiu sákürifisiu le ladügübei Hesusu hawagu amu, wayanuhaba giñe ida luba lan wáyeihani lani hénpulu. Warihibei ka lan gayaraabei wadügüni lun aranseñu wamá lun weseriwidun houn amu.

4. Ida liña larufuduni Hesusu áluaha lani le buídutimabei houn amu lubaragiñe le buídutimabei lun?

⁴ Íderagua lumutiña Hesusu amu íbini dan le buchaali lan luagu. Samina wamá luagu le ladügübei dan le hóundaragunbei saragu gürigia lugudina aban wübü lun haganbuni, másiñati yarafa lan lun Kafarünaumu. Másiñati giñe buchañu liña lan luagu Hesusu dan ligía lárigiñe lafurieidun bou larugan. Ligía lubeiti, dan le larihinbaliña sun gürigia hagía aba hagudemedagun ha gudemebaña hama ha sándibaña lun. Mama areidaguagüdarügü lumutiña, ruti giñe aban lubuidun yanu le ánhingichubarun hanigi gürigia hagía lidan dan ligía luma lidan wadaani: yanu le líchugubei luagu Wübü (Luk. 6:12-20).

5. Ida liña háyeihani hachügüdina tílana muna sákürifisiu le ladügübei Hesusu dan le buchaali lubéi luagu?

⁵ Ida liña hafalaruni hachügüdina tílana muna lani Hesusu hénpulu. Samina wamá luagu aban úguchili le achülürübei lúbiñoun lau lubucha uagu lárigiñe wadagimanu. Guñoun ligía hadügübei áhuduraguni lun Bungiu kei iduheñu. Busenti hamuga lun lígiruni lubá amu weyu, lau sun lira, aba lamuriahan erei luma Heowá. Aganba lumuti Heowá lafurieidun, ani aturiahatiña liduheñu kéiñaha hadügüni sagü dimaasu. Guñoun ligía furendeitiña lisaanigu aban lubuidun katei: súdini lan katei lúmagiñe Bungiu houn hagübürigu.

6. Írida humá aban sügǘ le ídanbei ladüga Hesusu sákürifisiu lun larufudahan houn amu.

⁶ Aranseñu liña meha Hesusu lun letenirun houn amu. Samina wamá luagu sügǘ le: sun liña meha laganbun Hesusu afarúa lan Huan le abadiseihabei le lumada hilagubei ani másiñati adüga lan meha lira lun lírudun Hesusu. Ariñagatu Bíbülia: “Dan laganbunbalin Hesusu katei le, aba lidin ñéingiñe háurügü lani disipulugu tidan aban ugunei lidoun aban fulasu mageirawati” (Mat. 14:10-13). Gunfurandawati busén lan meha lun lábuguarügü lan. Añahein gürigia himei hamagili hábuguarügü hamá dan le hegeburihan. Hénrengubei meha lun Hesusu lun lerederun lábuguarügü ladüga hagurabahañein meha saragu gürigia lidan fulasu ligía. Kati ladügübei? Saminati luagu le hemegeirubei gürigia hagía ani “aba hagudemedagun lun”. Aba líchugun fe megei hamá gürigia hagía haganbun luagu Bungiu lau lóufudagun ani aba larufudahan houn sin lasaminaruni bián  wéiyaasu. “Aba lagumeserun arufudaha saragu katei houn” (Mar. 6:31-34; Luk. 9:10, 11).

7, 8. Ru humá somu hénpulu ida liña lan háyeihani wéiyaaña lidan afiñeni Hesusu dan le híderagun aban íbiri.

⁷ Ida liña háyeihani wéiyaaña lidan afiñeni lau ínsiñehabuni lani Hesusu hénpulu. Ma wéiriti lebegi sákürifisiu le hadügübei wéiyaaña lidan afiñeni wawagu woun? Saragu wádangiñe ibidiñeti woun sun le hadügübei. Kei hénpulu, dan le lasandirun aban íbiri, ídehati Sétanu le Arihibei lau luáguti Agaranihani tidan Háspitali lau lóufudagun ani saragu wéiyaasu saratiña lílana sétanu le áriebu lun hídehan. Kei gudemehabu habéi áluaha hamuti wéiyaaña hínsiñehabutiña ha hama haduheñu le buídubei houn amu lubaragiñe le buídubei houn.

⁸ Ídehatiña giñe wéiyaaña lidan afiñeni lidan tábunawagun Luban Adamuridaguni luma lidan amu ábunaguni luma dan le ñein lan burí somu chagaguaü le ladügübei liñawan dan. Míridunga sun oura le hásügürübei arufudaha, ídeha luma íchiga dǘgüdaguaü houn íbirigu ha lídanbaña damuriguaü. Gadünatiña sun wéiyaaña ha hama haduheñu lun lariñawagún houn buidu lan hadüga. Agurabatiwa lun labiniruniña Heowá luagu áfaaguni le hadügübei. Kei lagurabúniwa hámagiñe sun kristiánugu, lunti marabachun hamá wéiyaaña lidan afiñeni luagu ni aban oubaü. Moun lumuti hásügürün saragu dan etenira lun hani buligasion metenirunga houn haduheñu.

9. Según Filipuna 2:4, 5, ka igaburi lunbei gagaburi hamani sun kristiánugu?

⁹ (Aliiha huméi Filipuna 2:4, 5). Inarüni mama sun wagía weseriwiduña kei wéiyaaña, lau sun lira, gayaraati wáyeihani igaburi lánina  sákürifisiu le larufudubei Hesusu. Ariñagatu Bíbülia aba lan ladügagun lungua “kei ubúeini” (Fili. 2:7). Ka larufudahabei dimurei le woun? Aban ubúein buiti áluaha lumuti le aubei lagundaara labureme. Kei lidamun lubéi Heowá wagía ani seriwi wagía houn wábirigu, ayumahatiwa lun húutima wamá lun Wabungiute luma houn wábirigu. Ida luba wibihini? Ariha wamá fiu adundehani.

10. Ka álügüdahani gayaraabei wadügüni wóuniwagua?

¹⁰ Akutiha huméi higaburi. Álügüdagua humá hungua: “Aranseñu niña san lun nadügün sákürifisiu lun níderagun amu? Ida luba hamuga nóunabun anhein amuriahóua numa lun nabisidahani aban íbiri derebuguhali o lun nanügünün aban íbiri derebuguharu lidoun adamuridaguni? Aranseñu niña san lun nídehan lidan larumadahóuniwa aban fulasu le ñein lubéi ladügǘwa aban adamurini o lidan taransehóun Luban Adamuridaguni?”. Dan le wederegeragunbei woungua lun Heowá, füramasetiwa lun wayusurubei lan sun wámati lun weseriwidun lun, wadaani luma wamegen laganagua. Ligíati wéiriti lugundan lau wayusuruni sun burí katei le lau sun wagundan lun wíderaguniña amu. Guentó, ka gayaraabei wadügüni ánhawa íchiga fe mosu lan wabuidurun lidan somu igaburi?

11. Ida liña gayara lan líderaguniwa furíei arufuda aban igaburi lánina sákürifisiu?

¹¹ Furíei humá lun Heowá tídangiñe sun hanigi. Ánhaadün íchiga fe mosu lan habuidurun lidan somu igaburi, ani míchahounti hun lun hadügüni, furíei humá lun Heowá tídangiñe sun hanigi. Furangu humá lun. Ariñaga huméi lun ida liña lan hasandiragun hungua ani amuriaha humá luma lun líderagunün adügei le labusenrunbei (Fili. 2:13).

12. Ida luba híderagunu wügüriña badiseihaña ha nibureingiña lóundarun Heowá?

¹² Aban san wügüri nibureingili buguya ani le badiseihali? Anhein ítara liña lubéi, amuriahabá luma Heowá lun líderagunibu lun busenbá baganwoundagüdüni beseriwidun lidan damuriguaü. Anihein burí damuriguaü le ñein habéi saragu wéiyaaña lidan afiñeni sügǘ hau ídehatiña lidan damuriguaü, ani saragu hádangiñe ídehatiña ha derebuguhaña. Kei aganwoundeina haña lan tílana lóundarun Heowá, mégeiwatiña íbirigu nibureingiña lun híderaguniña wéiyaaña óunigiraña lubúeingu Heowá. Ánhabu eseriwida le ñein lubéi mégeiwa lan gúndaabadibu ladüga bagundaaragüdüñein giñe Heowá, badügüba aban iri buiti ligibugiñe Bungiu ani basandiraguba bungua buidu lau bíderaguniña amu.

13, 14. Ka gayaraabei wadügüni lun wíderaguniña wábirigu? (Ariha huméi dibuhu le luágubei tidáü garüdia).

¹³ Ariha huméi ka lan hemegeirubei ha híbiri. Ru lumuti apostolu Pábulu adundehani le tidan gárada to labürühaboun houn ebüréana: “Mabulieida humá hadügüni le buídubei, luma lun hafanreinruni húmati hadan ha mibihinbaña; lugundun ligía burí katei le aubei lagundaara Bungiu” (Ebü. 13:16). Ma lubuidun dimurei! Murusun dan lárigiñe heresibirunu íbirigu ha Hudeabaña gárada, mosu meha hígirunu haban, hani bísinisi, haduheñu ha mámabaña kristiánugu lun hanurahan áraabun (Mat. 24:16). Furanguti súdini lan meha lun híderagun hámagua lidan dan ligía. Anhein falá habalin meha adundehani le líchugubei Pábulu houn lun hafanreinhani hámati hama amu, ménrengunbei meha houn héchudun luagu iseri habagari.

¹⁴ Gayaraati mariñagun habéi lan wábirigu woun súnwandan ka lan hemegeirubei. Samina wamá luagu likesin aban íbiri le féridi láaruboun lani weiriou lidan óunweni. Mégeiti san ídemuei lun lábouwagun lun, lun lanügǘniwa lidoun adamuridaguni o lun tarumadahóun luban? Másiñati mariñagunbei lan ni kata ladüga mabusenrun lan lun aban lan ihürügün.  Gama lumoun, chóuruti seremei lubadiwa lan ánhawa íderaguei. Masaminara wamá híderagubei lan somu gürigia o lariñagubei lan woun súnwandan ka lan lemegeirubei. Álügüdagua wamá woungua: “Lun hamuga nuguya lan lidan lilugaarun, ka hamuga katei hínsiñebei nun lun hadügüni nuagu?”.

15. Ka lunbei wadügüni anhein busén wabéi wíderaguniña amu?

¹⁵ Adüga humá lun ménrengun lan houn amu hamuriahan ídemuei huma. Chóuruti añahein lan íbirigu lidan damuriguaü le ñein wabéi aranseñu haña lun híderaguniña amu gürigia. Maweiyasuntiña adüga lun wasandiragun woungua aban wamá ihürügün. Lubaragiñe lira, subudi wamuti súnwandan gayara lan wáluahaniña, ani busentiwa wáyeihani hani hénpulu. Dálaali aban wéiyaali lidan afiñeni, 45 irumu lau, gíriti Alan, lidoun lichügü láfaagua lan lun ménrengun lan lun hayarafadun amu lun. Lau lasaminarun luagu lani Hesusu hénpulu, aba lariñagun: “Aban meha wügüri bereseguti Hesusu, lau sun lira, sun meha gürigia busentiña meha herederun lurugabu ani manufudetiña meha hamuriahan ídemuei luma. Subudi hamuti meha gürigia hagía luagu nidiheri lan hawagu. Le nayumahabei lun ítara nan kei Hesusu luma lun harihinina amu aban lan gürigia le gayaraati layarafadúniwa lun, le arufuduti ínsiñehabuni ani chubaluguti”.

16. Ida liña líderaguniwa Sálumu 119:59, 60 lun wafalaruni lani Hesusu hénpulu lau úaraguni?

¹⁶ Moun lumuti lábürühan warüna anhein siñá lubéi wáyeihani Hesusu buidu buidu (Sant. 3:2). Aban aturiahati siñabei láyeihani lumaisturun buidu buidu, gama lumoun, anhein afurendeira lídangiñe lichara guánarügü ani áfaagua ligía lun láyeihani lumaisturun buidu, abuidureina luba ligaburi ladügüni katei. Ítarameme, ánhawa awinwandei le wafurendeirubei tídangiñe Bíbülia dan waturiahan wábuguarügü  ani áfaagua wagía lun waransehani wachara, wibihiba lun wafalaruni lani Hesusu hénpulu (aliiha huméi Sálumu 119:59, 60).

17, 18. Kaba buiti asagarúa lau láyeihani gürigia igaburi lánina sákürifisiu le larufudubei Hesusu?

¹⁷ Ménrengunti lun háyeihani amu igaburi lánina sákürifisiu. Ariñagati aban wéiyaali lidan afiñeni gíriti Tim: “Lidan damuriguaü le ñein nubéi, añahein íbirigu nibureingiña ha awanseeña lidan hamadagua luma Bungiu ani chülühaña lun aban hamá ídehatiña lidan damuriguaü, ítara habéi ladüga harihini aranseñu haña lan amu lun hídehan ani áyeiha hamuti igaburi ligía. Adügati aranseñu hamá nibureintiña ha lun gayara lan híderaguni damuriguaü ani aban óunwenbu ídemuei hagía houn wéiyaaña lidan afiñeni”.

¹⁸ Buin liña ubóu hau gürigia ha asaminarubaña hawouguounrügü, anhein wagía lubúeingu Heowá mítarantiwa. Hingí lumutu wanigi lau warihini aranseñu liña lan Hesusu lun líderagun amu ani aranseñu waña giñe lun wáyeihani. Inarüni siñá lan wáyeihani machararunga, lau sun lira, gayaraati wafalaruni lani hénpulu (1 Fe. 2:21). Ánhawa áfaagua buidu lun wáyeihani igaburi lánina sákürifisiu le larufudubei Hesusu, wasandiruba ugundani lau wasubudiruni gúndaabei lan Heowá wau.