1. Sitih inlahen kui lōn öich vē tarik Yāvē yěn la-evṙen?

 EŪKA ön nö imat ngam Paipöl tö më tarik ngam Tēv nö ‘kētöre nö löknyö kuilōn re nö la-evṙen.’ (Sal. 110:3) Tumṙeūtöre cha-a nö in Yēsū. Ngam tö eūnyu nö ngaich angū-ö nö teungtökūö töngamuh. Örheūheu in minë samyeūheu yip tö ngön nö lök lōn Yāvē nö lāku körōlu ṙòken kahëti tö ṙētak re nö im inhangka tölöök inhāngö. Hö-ö yin nö teūngen tö pësa nö in ngih la-en, pön lamönknyö ellōn cha angū-ö nö kētöre nö in ngih la-en nö la-evṙen. Ngaich kēnyö ṙētak re inrē cha-a nö hayööken yip tahëng hěnghöre hangönken yip tahëng nö asīöp ngam ṙinatö-ellōnre. Ngatī inrē më minṙöinylen hēk tö më mahayööken töla-evṙen nö kētö ṙētak re nö hayööken yip tahëng. Tö sā ngih, lēnngen tī cha-a nö halēnlen minë tôk nö el mīting hēk hareuskö alaha më prötör sistör inrē nö meuk kūö cha. Kūö yòh öich vē tarik ngam Tēv nö ngatī nganötö nö la-evṙen? Pön hangenlōn cha-a tö Yāvē hēk hangenlōn inrē tö yip hanöng kisānöre inrē.—Mët. 22:37-39.

2. Sā ṙô ngam tö vënyu Rōma 15:1-3, sitih inlahen ang Yēsū nö vai nö inchōḵ elmat hī?

² Öt fēköre ang Yēsū, pön fēkö mufē yip tahëng anga-aṅ. Mihôiṅ in ayī-ö öi ma-ainyre asīnken Yēsū. (Vë-evkūö Rōma 15:1-3.) Pōyen nup yanöölen hī yěi asīnkö inlahen Yēsū. Ngö ṙô anga-aṅ: “Mötlö kanôlò an ngam kinëḵëṅti, tö ngam kinëḵeṅ.”—Inl. 20:35.

3. Asuh öp min tö kakka in ngih ātiköl?

³ In ngih ātiköl min öi mikahtökūö re tö Yēsū nö sitih inlahen nö hayööken yip tahëng nö harööḵngen re, ngaich sitih inlahen ayī-ö mihôiṅ öi asīken ò. Mikahtökūö re inrē min ayī-ö tö hī öi sitih inlahen öi asīöp ngam kuilōn re öi i inyööken yip tahëng.

4. Sitih inlahen ang Yēsū nö hameuktöre nö möḵlö lōn tö yip tahëng?

⁴ Pòrô ang Yēsū nö lāṙaḵ sön pöri anga-aṅ nö hayööken yip tahëng. Ik sā Yēsū nö hěngheuh nö i Kafarnahum ngaich hěng mitööm ṙô anga-aṅ nö vë-ekūötēv. Ik tahëng sakamö anga-aṅ nö lāṙaḵ. Ngaich ik sā yik tömaṙôngö tarik nö yihtöre nö in ò, ngaich kò-òren öi ngëichkö inlahen ò, nö sitih inlahen anga-aṅ. Meuk yip yāch anga-aṅ in cha hēk tö vahavö inrē. Ngaich aṙē-ěvlōn anga-aṅ nö meukö cha. Rö-ö anga-aṅ nöng halanken yik tö vahavö pön kētö minkahten, ngam mikahkūö hī töngamuh ngam minkahten i kui ròngö.—Lūk. 6:12-20.

5. Pòrô ṙung nö lāṙaḵ më kui ngam mikūönö sön anga-aṅ nö sitih inlahen?

⁵ Sitih inlahen aich më kui ngam mikūönö nö asīnken Yēsū nö harööḵngen re? Töi ngëichken ngih inchōḵ elmat. Hěng sumkam ngam kui ngam mikūönö nö la-evṙen ngaich havan anga-aṅ nö i patī ngaich lāṙaḵ. Ngö mufē anga-aṅ: ‘Hö-ö in töngamuh öi kēken ngam manūlö mikūönö, yò-òv ṙētak in min öi kēken e.’ Vë-ekūö Yāvē pöri anga-aṅ nö havëkö kumlēḵ re, ngaich hang ṙô ò ang Yāvē ngaich mūl ngaich cha-a nö kēken ngam manūlö mikūönö. Hěng pöri ngam tö yöölen tī tö më nyīö im hē e, tö cha nö akahakūö tö kuilōn minā inyöngö nö möḵlö ngam vinë-ekūö Yāvē nö in cha.

6. Sitih inlahen ang Yēsū nö kē-eny ṙētak re nö in yip tahëng?

⁶ Kētö ṙētak re ang Yēsū nö in yip tahëng. Kò-òren öi fē-a ik sā Yēsū nö akahalōn tö ök holre ang Yôhan öp vamôk nö röki likeun, ngaich iṙòken miṙivlōn anga-aṅ. Ngö kinūichngö ön nö imat ngam Paipöl: “Hē Yēsū nö hāngö e, ṙuhöngre ngaich Anga-aṅ nö ṙa-ang umuh, nö el kupòk nö ik elinchōn.” (Mët. 14:10-13) Akahakūö ayī-ö tö Yēsū nö kūö yòh nö hòṅ hěngtiṙah. Ngatī inlahen yip tarik inrē töngamuh yēn haṙivlōn ngaich hòṅ hěngtiṙah acha-a. Pòrô lang Yēsū nö hòṅ ngatī inlahen ötkô anga-aṅ nö ngatī inlahen nö hěngtak. Ik sā ò pöri nö in öp tö chēvhakṙen chūök ngaich meuk yip tamaṙòngö anga-aṅ nö urēhten nö umuh  nö hòṅ hangihtö ṙô ò. Sitih inlahen pöri ang Yēsū? Fēkö inlahen më tarik anga-aṅ. “Ngaich yih ngam miṙivlōn ò nö meukö cha.” Akahakūö ngaich anga-aṅ tö cha nö ha-euk tö ṙô ngam Tēv. Lökten anga-aṅ nöng öt rahëichhata nö haköpten yip tarik ‘pön pōyen ṙô nö haköpten cha.”—Māk 6:31-34; Lūk. 9:10, 11.

7-8. Sitih inlahen aich më minṙöinylen nö asīnken Yēsū nö harööḵngen re? Vë-eny ngam töhěng inchōḵ elmat.

⁷ Sitih inlahen aich më minṙöinylen nö asīnken Yēsū nö harööḵngen re? Ṙamlōn in tö inlahen më minṙöinylen nö chö-önyten hī nö harööḵngen re. Pōyen yip prötör sistör aṅ el ngam māṅ, töt akahakūö tö ṙôken la-en më minṙöinylen. Tö sā ngam inlahen cha, yěn ōt yip prötör sistör tö vahavö hēk tö hòṅ le-ënö inrē, ngaich ilööṙen më Hospital Liaision Commettee nö kētö inyööken cha. Ṙolheuh in inrē öi meuk inlahen minë kanihngen nö el hatööm. Sön pöri më minṙöinylen nö öt ngëichkö ngam ṙētak re. Harööḵngen pöri cha-a kūö hanangelōn re tö më prötör sistör.

⁸ Kētöre yin më minṙöinylen nö in minë la-en minānlö ngam patī pūlngö, hēk sinömten minë relief inrē nö in yip tarik. Rö-ö nöng anū-ö, pön kē-ěny ṙētakre cha-a nö haköpten yip prötör sistör hēk hareuskö alaha cha inrē. Kô-en nö hòṅ eu-eū ngam inlahen më minṙöinylen tö më mikūönö cha nö harööḵngen. Lōnu in tö Yāvē nö hayööken cha nö iṙūhen nö ngatī inlahen. Hòṅ chumkūöṙen pöri cha-a inrē nö ötkô nöng yahlö mufē nö in minë la-en el ngam māṅ, ngaich öt ṙētakvö nö in yip mikūönöre nö sā yip tahëng.

9. Sā ṙô ngam Filipī 2:4, 5, hòṅ sitih inlahen mufē aich më Kristīön?

⁹ Vë-evkūö Filipī 2:4, 5. Kô-en in öt ṙòkhöre öi la-en tö ngam minṙöinylen, mihôiṅ pöri öi asīnken Yēsū öi harööḵngen re. Vënyu nang in töm Paipöl tö Yēsū nö “kēḵ inlaha mahalanṙen.” (Filip. 2:7) Töi ngëichkö ngam manah e. Tö sā inlahen öp mahalanṙen nö chöh inlahenre nö meukṙen öp mā re. Ngatī in ayī-ö tanöölô ngam Tēv Yāvē öi meukṙen yip prötör sistör re. Lökten in öi lōnu töre öi hayööken yip holmaneukre hēk löklōn Yāvē inrē. Sitih inlahen öi asīöp ngam kuilōnre?

10. Asuh nup kanahngen hī intöönö?

¹⁰ Ngëichköre man. Hòṅ hatöönöre in öi ngö ṙô, ‘Ilööṙen öich chū-ö hayööken yip tahëng? Hō hòng chū-ö, yēk chu öich töölô hayööken yip tö ṙēḵtivö prötör hēk sistör inrē, öich kumten cha nö chuh el mīting? Yēḵ chu inrē öich töölô öich ha-et chūök hī im Könvensön hēk minë inlēnö el ngam patī pūlngö, kētöre hòng chū-ö öich holṙen cha? Ik sā hī ngaich öi kētöre öi in Yāvē, ngaich kilēḵngôre ayī-ö tö hī öi keuheūttöre öi i linöökö lōn ò. Lōnu ang Yāvē tö hī öi kētö ṙētakre, kumlēḵre hēk kētö inyööken holre inrē öi hayööken cha öi kētö pësa cha. Lökten yēḵ hī ngatī inlahen öi harööḵngen re, ngaich ṙamlōn min anga-aṅ. Hòṅ sitih inlahen pöri ayī-ö yēḵ hī kihngen harööḵngen re?

11. Kūö yòh öi hòṅ vë-ekūötēv, yěi kihngen öi harööḵngen re?

¹¹ Vë-ekūö Yāvē man. Tö sā meh öre öm ngëichkö re, ngaich akahaiṙen më-eṅ öm hòṅ hēk öm hameuktö inlahenre öm harööḵngen re. Hö-ö pöri më-eṅ öm hòṅ ngatī kuilōn. Hòṅ sitih inlahen öm kò-òren? Keuheūtnyö ellōnre öm vë-ekūö Yāvē. Ngaich tölṙô ò nö ngëichken ngam kuilōn meh tö meh öm hòṅ asīöp ngam inlahenre öm in ngam inrööḵngen. Hòṅ ò min nö ‘asīöp ngam ellōn meh, hēk kētö kumlēḵ meh’ öm harööḵngen re.—Filip. 2:13.

12. Asūp inlahen më tö ayālö ṙēti prötör nö kūö urěh nö el ngam māṅ?

¹² Töhěng tak öm më-eṅ, tö ayālö ṙēḵti prötör öm ngaich öm kamë ngam vinôkö? Yěn heūṅ, ngaich vë-ekūö Yāvē më-eṅ nö asīöp ngam kuilōn meh öm hayööken yip prötör sistör. In nup tahëng panam nö pōyen yip minṙöinylen tö më mahayööken tö la-evṙen. Ngaich yip mahayööken tö la-evṙen nö pōyen cha-a tö ṙat ṙēḵti yip prötör hēk tö ṙēḵtivö inrē. Sīöpö ṙôken më prötör sistör nö el ngam söngkötön, lökten ayī-ö hòṅ lōnu tö yip ṙālö nö hayööken yip minṙöinylen nö la-evṙen. Yēḵ meh öm ngatī inlahen öm i inyööken yip tahëng nö kūö urěh ngaich teūngen min më-eṅ tö yanöölenre. Yēḵ meh ngatī inlahen im inyööken yip tahëng ngaich ṙamlōn ang Yāvē nö meuk inlahen meh. Ṙamlōn inrē min yip prötör sistör tö meh öm ngatī inlahen öm kētöre in minë la-en ngaich teūngen inrē min më-eṅ tö ngam ṙanamlōn.

13-14. Asūp tö hòṅ inlahen hī i inyööken më prötör sistör? (Ngëichköm lama uk nyat.)

¹³ Chumkūöṙen hayööken yip tahëng. Kūich chitri më Kristīön aṅ Yūta ang Pôl, “la-evṙen pöri tö tölöök meukṙen inrē, un vaichngö pò në tö ngatī tö kētu ṙanamlōn ngam Tēv.” (Hep. 13:16) Tövai an ngih nö inlēnö! Ik sā taneūngen cha tö ngam chitri Pôl, unôichrit e cha-a nö falngöre nö chuh kui rôngö. (Mët. 24:16) Ṙòkhöre nuk ṙahangö cha kanôlò hēk patī tö yip mak alaha cha yip töt sā ṙinatö-ellōn cha. Lökten nö töt ṙanāngen ngam inlahen  cha nö hayööken yip tahëng. Urěhkūö cha nö falngöre, hang ngam inlēnö cha-a ṙô Pôl. Lökten nö mihôiṅ nö chuh in öp tufömngöre chūökö nö harunöre nö ha-aṅ nômöre nö in minë tö rahëichyen taneunglenre.

¹⁴ Öt uroh më prötör sistör nö ṙöpö ṙô nö lōntö inyöökenre. Tö sā ò yěn kapahlöng töp pīhöre, ngaich hòṅ pi-a lohten anga-aṅ nö hòṅ vī-i nyā-aṅkūö hēk hayöökaṙen inrē in nup tahëng la-en patī, ōt ṙô-òvö pöri anga-aṅ tö inyööken re. Pön sōten yip tahëng nö langan tö tī ò. Yēḵ hī pöri öi yihtöre öi vë-ekūö ò tö inyööken ò, ngaich ṙamlōn min anga-aṅ. Ötkô öi ngö mufē, tahëng yip min mahayööken ò hēk yěn hòṅ lōnu anga-aṅ öthō min nö öt vë-eny nup hanaktenre. Ngam inlahen hī pöri öi hòṅ fēken ò, ‘yēḵ chu i chūök ò öre, asuh nup tö hòṅ urööṙen lōn chu. Asuh öre nup inyööken chu inrē?’

15. Hòṅ sitih inlahen öi yěi hòṅ hayööken yip tahëng?

¹⁵ Vī-i re man im innôlö. Ōtre yip ṙung el ngam māṅ yip prötör sistör, tö örheūheu nö i inyööken yip tahëng. Öt hěngheuh cha-a nö vë-enyre nö in hī töre nö kihngen tö tī hī, hēk lāngan inrē. Akahakūö in töre yěi hòṅ lōnu tö inyöökenre, ngaich chuh in cha ṙung. Hěng tak öp i minṙöinylen tö Ellen minënyi tö 45 samyeūheu ngö ṙô anga-aṅ: “Pòrô ök Yēsū nö tö sānngen sön pöri anga-aṅ nö kē-ěny ṙētakre nö in yip tahëng. Hameuktöm chumkūöṙen re anga-aṅ nö in cha, lökten yip tökiröng hēk tö kūṅnö, ṙòkhöre cha-a nö haröhtöre nö in ò. Öt piyū-u ṙô cha-a nö havëkö inyöökenre, hòṅ ngatī inlahen chin chū-ö inrē öich asīnken Yēsū, hòṅ lōnu inrē chū-ö tö yip tahëng nö un piyū-en nö chuh in chu nö vī-i re nö hol chu.”

16. Sā ṙô ngam Salmai 119:59, 60, sitih inlahen öi mihôiṅ öi asīnkö röön Yēsū?

 ¹⁶ Öt keuheūttöre inlahen in öi asīnken Yēsū, lökten ayī-ö ötkô öi haṙivlōn öi fēken e. (Yāk. 3:2) Sā ngih inchōḵ elmat hī, sā ngam istutent nö harunöre nö i vīni-i ngam pēnting nö in ngam tīchör re, pò ngam tīchör nö tö heuveū-en nö pēnting, sön ngam istutent nö öt sā tī ngam tīchör nö i vinī-i ngam pēnting. Yēḵ ò pöri nö halööktit ngam vanaichöre ngaich mihôiṅ min anga-aṅ nö sā tī ngam tīchör re nö pēnting. Ngatī inlahen in ayī-ö öt sāḵta in Yēsū. Yēḵ hī pöri örheūheu öi vë-ekūö ngam Paipöl hēk örheūheu inrē öi harīkngen minë tinrīkenre, ngaich ma-asīnkö röön Yēsū min ayī-ö.—Vë-evkūö Salmai 119:59, 60.

17-18. Asūp yanöölen hī yěi harööḵngen re öi sā Yēsū?

¹⁷ Yēḵ hī öi meūkö öi hayööken yip tahëng, ngaich asīnkaṙen min ayī-ö tö yip prötör sistör nö hayööken yip tahëng. Ngö ṙô ök i minṙöinylen Tim minënyi, “pōyen yip ṙālö el ngam māṅ yip mahayööken tö la-evṙen. Ṙen cha-a nö ngatī inlahen pön harunöre nö hayööken yip tahëng. Vē ṙālö prötör, pōyen tī cha-a nö hayööken më minṙöinylen hēk tö më prötör sistör aṅ el ngam māṅ.”

¹⁸ Pōyen yip tarik töngamuh töng ngamëichköre. Hö-ö pöri më tarik Yāvē nö ngatī inlahen, pò cha nö lökngöre tö ngam inlahen Yēsū nö harööḵngen re, ngaich hòṅ asīntöre cha-a nö in ò. Kô-en pöri ngam inlahen hī öt keuheūttöre öi sā inlahen Yēsū. Mihôiṅ pöri öi asīnkö röön ngam vanangö ò öi ‘haröhtö röön re öi sā vanangö ò.’ (1 Pīt. 2:21) Yēḵ hī min öi asīnken Yēsū öi harööḵngen re ngaich hō-en hī min ang Yāvē, ngaich teungen min ayī-ö tö ṙanamlōnre.