1. Unsang maayong panghunahuna ug binuhatan ang gipakita sa katawhan ni Jehova?

 DUGAY nang gitagna sa Bibliya nga ang katawhan sa Diyos “kinabubut-ong magtanyag sa ilang kaugalingon” sa pag-alagad kang Jehova ubos sa pagpanguna sa iyang Anak. (Sal. 110:3) Kanang tagnaa nagakatuman gyod karon. Kada tuig, ang madasigong mga alagad ni Jehova naggahin ug milyonmilyong oras sa pagsangyaw. Gihimo ni nila nga kinabubut-on; wala silay suweldo. Naningkamot pod sila nga matagan-an ang pisikal, emosyonal, ug espirituwal nga panginahanglan sa mga igsoon. Ang mga brader nga nagapanguna naggahin ug daghang oras sa pagpangandam para sa ilang mga bahin sa tigom ug sa pag-shepherding sa mga igsoon. Nganong ginahimo ni sa katawhan ni Jehova? Tungod sa gugma—gugma para kang Jehova ug sa ilang isigkatawo.—Mat. 22:37-39.

2. Base sa Roma 15:1-3, unsang ehemplo ang gipakita ni Jesus?

² Si Jesus nagpakitag maayo kaayong ehemplo sa pag-una sa kaayohan sa uban. Naningkamot ta nga sundogon siya. (Basaha ang Roma 15:1-3.) Kadtong nagsundog niya makadawat ug mga kaayohan. Si Jesus miingon: “Dunay labaw nga kalipay sa paghatag kay sa pagdawat.”—Buh. 20:35.

3. Unsay atong hisgotan niining artikuloha?

³ Niining artikuloha, hisgotan nato ang pipila sa mga sakripisyo  nga gihimo ni Jesus aron tabangan ang uban ug kon unsaon nato siya pagsundog. Hisgotan pod nato kon unsay atong himoon aron mas madasig ta sa pagtabang sa uban.

4. Giunsa pag-una ni Jesus ang kaayohan sa uban?

⁴ Gitabangan ni Jesus ang uban bisag gikapoy siya. Hunahunaa ang gihimo ni Jesus dihang giduol siya sa daghang tawo didto sa bukid nga tingali duol sa Capernaum. Una pa niana, tibuok gabii nga nag-ampo si Jesus. Tingali gikapoy kaayo siya, pero pagkakita niya sa mga tawo, naluoy kaayo siya sa mga pobre ug masakiton. Gawas nga giayo niya sila, gihatag pod niya ang usa sa makapadasig kaayong pakigpulong sukad masukad—ang Wali sa Bukid.—Luc. 6:12-20.

5. Unsaon pagsundog sa mga ulo sa pamilya si Jesus sa pagsakripisyo dihang gikapoy sila?

⁵ Kon giunsa pagsundog sa mga ulo sa pamilya si Jesus. Imadyina ni: Human sa tibuok adlawng trabaho, ang amahan miabot sa balay nga gikapoy. Gusto unta niya nga dili una mag-family worship nianang gabhiona, pero nangayo siyag kusog kang Jehova. Gitubag ni Jehova ang iyang pag-ampo ug naka-family worship sila. Ang mga anak nakakat-on ug importanteng leksiyon nianang gabhiona. Nakita nila nga para sa ilang mga ginikanan, ang pagsimba kang Jehova mao gyod ang pinakaimportante.

6. Paghatag ug pananglitan kon giunsa pagsakripisyo ni Jesus ang iyang panahon sa pagtabang sa uban.

⁶ Gisakripisyo ni Jesus ang panahon nga para unta sa iyang kaugalingon. Maimadyin ba nimo ang gibati ni Jesus pagkadungog niya nga gipunggotan ang iyang higala nga si Juan nga Tigbawtismo? Seguradong naguol kaayo siya. Ang Bibliya nag-ingon: “Sa pagkadungog [nga namatay si Juan], si Jesus misakay ug sakayan paingon sa mingaw nga dapit aron mag-inusara.” (Mat. 14:10-13) Masabtan nato kon nganong gusto niyang mag-inusara. Daghan nato ang gustong mag-inusara kon magul-anon kaayo ta. Pero wala nâ mahimo ni Jesus. Miadto siya sa mingaw nga dapit, pero naa nay mga tawo nga nakaunag abot didto. Unsay  reaksiyon ni Jesus? Naghunahuna siya sa panginahanglan sa mga tawo ug “naluoy siya kanila.” Nakita niya nga nagkinahanglan gyod silag espirituwal nga pagdasig, ug iya dayon silang gitabangan. Gani, “gitudloan niya sila ug [dili lang pipila ka butang, kondili] daghang butang.”—Mar. 6:31-34; Luc. 9:10, 11.

7-8. Paghatag ug pananglitan kon giunsa pagsundog sa mahigugmaong mga ansiyano si Jesus dihang naay panginahanglan ang mga igsoon.

⁷ Kon giunsa pagsundog sa mahigugmaong mga ansiyano si Jesus. Mapasalamaton kaayo ta sa pagsakripisyo sa mga ansiyano para nato! Daghan sa ilang ginahimo dili makita sa mga igsoon sa kongregasyon. Pananglitan, kon naay medikal nga emerhensiya, ang mga membro sa Hospital Liaison Committee motabang dayon sa mga igsoon. Sagad, ang maong mga emerhensiya mahitabo sa alanganing oras sa kagabhion. Pero tungod sa kaluoy, ang mahigugmaong mga ansiyano ug ang ilang pamilya nag-una sa kaayohan sa mga igsoon nga nanginahanglag tabang.

⁸ Ang mga ansiyano motabang pod sa disaster relief ug sa pagtukod ug mga Kingdom Hall ug ubang pasilidad. Naggahin pod silag daghang panahon sa pagtudlo, pagdasig, ug pagtabang nato. Kini nga mga brader ug ang ilang pamilya angayan gyod sa atong kinasingkasing nga apresasyon. Hinaot panalanginan sila ni Jehova tungod sa ilang pagsakripisyo! Siyempre, sama sa uban, ang mga ansiyano kinahanglang balanse. Dili nila angayng hutdon ang ilang panahon sa teokratikanhong mga buluhaton nga wala na silay panahon sa ilang pamilya.

9. Sumala sa Filipos 2:4, 5, unsang panghunahuna ang angayng ugmaron sa tanang Kristohanon?

⁹ Basaha ang Filipos 2:4, 5. Dili lang mga ansiyano ang angay mosundog sa pagsakripisyo ni Jesus, kondili kitang tanan. Ang Bibliya nag-ingon nga siya “nahisamag ulipon.” (Filip. 2:7) Hunahunaa kon unsay atong makat-onan niana. Ang kasaligang ulipon, o alagad, maningkamot gyod nga mapalipay ang iyang agalon. Ingong ulipon ni Jehova ug alagad sa mga igsoon, seguradong gusto nimo nga mas magamit ka ni Jehova ug mas makaalagad ka sa mga igsoon. Mahimo nimo nâ pinaagi sa pagpamalandong sa mosunod nga mga sugyot.

10. Unsay atong ipangutana sa kaugalingon?

¹⁰ Susiha ang imong panghunahuna. Puwede nimong pangutan-on ang imong kaugalingon: ‘Andam ba kong mosakripisyo aron tabangan ang uban? Pananglitan, unsay akong himoon kon hangyoon ko nga bisitahon ang edarang brader sa nursing home o dad-on sa tigom ang edarang sister? Moboluntaryo ba dayon ko kon kinahanglang hinloan ang asembliyahanan o mentinahon ang Kingdom Hall?’ Malipay si Jehova dihang atong isakripisyo ang atong panahon, kusog, ug materyal nga mga butang—nga atong gipanaad nga ihatag kaniya—sa pagtabang sa uban. Kon nakita nato nga naa tay angayng pauswagon, unsay atong himoon?

11. Sa unsang paagi ang pag-ampo makatabang nato nga mahimong mas andam mosakripisyo?

¹¹ Pag-ampo kang Jehova nga kinasingkasing. Ibutang nato nga naa kay nakita nga angayng pauswagon, pero wala kaayo kay interes nga mohimog kausaban. Kon ingon ana ang imong kahimtang, pag-ampo kang Jehova nga kinasingkasing. Isulti kang Jehova ang tanan nimong gibati, ug hangyoa siya nga ‘palig-onon ang imong tinguha sa pagbuhat sa mga butang nga gusto niya.’—Filip. 2:13.

12. Sa unsang paagi makatabang sa kongregasyon ang batan-on nga bawtismadong brader?

¹² Kon bawtismado ka nga brader nga batan-on pa, hangyoa si Jehova nga tabangan kang maugmad ang tinguha nga mas makatabang sa kongregasyon. Sa ubang mga nasod, mas daghan ang mga ansiyano kay sa ministeryal nga mga alagad, ug daghan sa maong ministeryal nga mga alagad edaran na. Kay nagkadako ang organisasyon, gikinahanglan ang mas daghan nga batan-ong mga brader nga motabang sa pag-atiman sa katawhan ni Jehova. Kon andam kang moalagad bisag asa ka gikinahanglan, magmalipayon ka. Ngano? Kay mapalipay nimo si Jehova, mailhan ka nga matinabangon, ug mobati kag katagbawan sa pagtabang sa uban.

13-14. Unsay atong mahimo aron tabangan ang mga igsoon? (Tan-awa ang hulagway sa atubangan sa magasin.)

¹³ Matikdi ang panginahanglan sa uban. Gitambagan ni apostol Pablo ang mga Hebreohanon: “Ayawg kalimti ang pagbuhat ug maayo ug ang pagpaambit sa imong mga nabatonan, kay malipay pag-ayo ang Diyos sa maong mga halad.” (Heb. 13:16) Praktikal kaayo nâ nga tambag! Wala madugay human madawat sa mga Kristohanon sa Judea kining sulata, kinahanglan nilang biyaan ang ilang balay, negosyo, ug ang ilang dili Kristohanong mga paryente ug ‘nangikyas [sila] ngadto sa kabukiran.’ (Mat. 24:16) Nianang panahona, importante kaayo nga magtinabangay sila. Kon ila nang gipadapat  ang tambag ni Pablo sa wala pa ni mahitabo, posibleng naka-adjust ra dayon sila sa bag-o nilang kahimtang.

¹⁴ Dili tingali kanunayng ipahibalo sa mga igsoon ang ilang panginahanglan. Pananglitan, ang usa ka brader namatyan tingalig asawa. Nagkinahanglan kaha siyag tabang sa iyang pagkaon, transportasyon, ug himoonon sa balay? Tingali dili siya mosulti kay dili siya gustong magpabug-at. Pero maapresyar gyod niya kon ato siyang tabangan bisag wala ni niya hangyoa. Dili ta maghunahuna nga naa ray motabang niya o nga isulti niya kanunay kon unsay iyang panginahanglan. Pangutan-a ang imong kaugalingon, ‘Kon naa ko sa iyang situwasyon, unsang tabang ang akong gikinahanglan?’

15. Unsay atong paningkamotan aron makatabang ta sa uban?

¹⁵ Ipabati nga dali kang duolon. Sa inyong kongregasyon, segurado nga naa kay nakitang mga igsoon nga kanunayng andam motabang. Dili gyod nila ipabati nga nakapabug-at ta nila. Makasalig ta nga andam gyod silang motabang nato, ug gusto nato silang sundogon! Konsideraha ang ansiyano nga si Alan, nga kapin nag 40 anyos. Gusto niya nga dali siyang duolon. Iyang gipamalandong ang ehemplo ni Jesus ug siya miingon: “Busy si Jesus, pero ang mga bata ug tigulang ganahan niya ug dili mahadlok nga mangayog tabang niya. Nahibalo sila nga si Jesus interesado gyod kanila. Gusto gyod nakong sundogon si Jesus aron mailhan ko nga daling duolon, mahigalaon, ug interesado sa uban.”

16. Sa unsang paagi ang pagpadapat sa Salmo 119:59, 60 makatabang nato nga masundog pag-ayo ang ehemplo ni Jesus?

¹⁶ Dili ta angayng maluya kon dili nato  perpektong masundog si Jesus. (Sant. 3:2) Ang usa nga nagtuon ug painting dili gyod perpektong makasundog sa gihimo sa iyang maestro. Pero kon mokat-on siya sa iyang sayop ug maningkamot nga mosundog sa ehemplo sa iyang maestro kutob sa iyang maarangan, mouswag siya. Kon ato pong ipadapat ang atong nakat-onan sa Bibliya ug maningkamot nga mouswag, atong masundog pag-ayo ang ehemplo ni Jesus.—Basaha ang Salmo 119:59, 60.

17-18. Unsay mga kaayohan kon sundogon nato si Jesus?

¹⁷ Kon andam tang mosakripisyo, sundogon ta sa uban. Ang ansiyano nga si Tim miingon: “Naay batan-on pa kaayong mga brader nga miuswag ug nahimong mga ministeryal nga alagad. Ang usa ka rason niini mao nga ilang gisundog ang mga igsoon nga andam mosakripisyo. Dako kaayo silang tabang sa kongregasyon ug sa mga ansiyano.”

¹⁸ Daghan sa mga tawo karon kaugalingon ray gihunahuna. Pero lahi ang katawhan ni Jehova. Natandog gyod ta sa pagsakripisyo ni Jesus ug gusto nato siyang sundogon. Tinuod, dili nato siya perpektong masundog, pero ‘masunod nato pag-ayo ang iyang mga tunob.’ (1 Ped. 2:21) Kon himoon nato ang atong maarangan sa pagsundog kang Jesus, magmalipayon ta kay uyonan ta ni Jehova.