1. Met sókkun féffér mi múrinné néún Jiowa kewe aramas ra féfféri?

 LÓÓM LÓÓM, ewe Paipel a oesini pwe néún Kot kewe aramas repwe angang ngeni i seni “püsin letiper” fán emmwenien Néún we. (Kölf. 110:3) Ena oesini a fókkun pwénúetá lón ei fansoun. Iteiten ier, néún Jiowa chón angang mi tinikken ra néúnéú fite million awa lón ewe angangen afalafal. Iir rese peiof lón ei angang, nge ra féri pokiten ina mocheniir. Ra pwal awora ar fansoun le álisi chiechier kewe chón lúkú. Ra álisiir lón pekin aion, memmeef, me pekin lúkú. Ekkewe mwán mi ásimaw me chónálillisin mwichefel ra néúnéú fite fite awa le ammólnatá ar kewe kinikin lón mwich me apéchékkúla chiener kewe chón lúkú. Met popun néún Jiowa aramas ra féri ekkeei esin angang? Pokiten ra tongei Jiowa me tongei aramas.​—Mat. 22:37-39.

2. Ifa ewe leenien áppirú Jesus a isetiw mi mak lón Rom 15:1-3?

² Jesus a isetiw eú leenien áppirú mi fókkun múrinné ren an akkomwa osupwangen ekkewe ekkóch lap seni pwisin i. Kich sia achocho úkúkún ach tufich le tapweló mwirin lón ipwan. (Álleani Rom 15:1-3.) Ika sia féri ena, sipwe kúna feiéch mwirilóón. Jesus a apasa: “Sia feiöch ren ach fang lap seni ach angei mettoch.”​—Föf. 20:35.

3. Met sipwele káé lón ei lesen?

³ Lón ei lesen, sipwe pwóróus wóón ekkóch mettóch Jesus a féri le álisi ekkewe ekkóch me sipwe pwal ppii ifa usun sia tongeni áppirú an leenien áppirú. Sipwe pwal pwóróusfengen  wóón ifa usun sia tongeni alapaaló ach mochen angang fán iten ekkewe ekkóch.

4. Ifa usun Jesus a akkomwa osupwangen ekkewe ekkóch lap seni pwisin i?

⁴ Jesus a álisi ekkewe ekkóch pwal mwo nge atun a mélúlú. Anchangei met Jesus a féri atun chómmóng aramas ra etto chuuri me wóón ewe chuuk, usun kkan ngeni Kapernaum. Jesus a iótek lón unusen ewe pwinin. Iwe, ese mwáál i a fókkun mélúlú, nge atun a kúna ekkewe aramas, a fókkun tongei ekkewe mi mwelele me ekkewe mi semmwen me leir. I ese chék echikarer, nge a pwal eáni eú me lein ekkewe afalafal mi kon apéchékkúl me iteféúló seni meinisin, ina ewe Afalafal Wóón ewe Chuuk.​—Luk. 6:12-20.

5. Ifa usun ekkewe mékúren famili ra áppirú Jesus le pwári tong atun ra pekkus?

⁵ Usun án ekkewe mékúren famili áppirú Jesus. Ekieki ei pwóróus. Sárin ewe mékúren famili le angang weires lón eú ránin, a wareiti imwan lón an fókkun pekkus. Inaamwo ika a mochen ámweta ar we fansoun Famili Fel lón ena pwinin, nge a tingormaú ngeni Jiowa an epwe fang ngeni péchékkúl pwe epwe emmweni ewe káé. Jiowa a pélúweni an na iótek, iwe ewe káé a fis usuusun chék ar káé iteiten wiik. Lón ena pwinin, ekkewe nau ra káé eú lesen mi aúchea. Ra kúna pwe me ren semer kewe me iner, fel ngeni Jiowa ina ewe mi kon aúchea seni meinisin.

6. Áweweei ifa usun Jesus a fangóló an fansoun le álisi ekkewe ekkóch.

⁶ Jesus a fangafangéch an fansoun. Anchangei meefien Jesus atun a silei pwe chiechian we Johannes Soupapatais a ninniiló. Ese wor tipemwaramwar pwe Jesus a fókkun letipechou. Paipel a apasa: “Lupwen Jesus a rong ewe pworaus usun [ninniilóón] Johannes, a fiti efoch wa seni ikenan o feila ngeni eu leni ia esap wor aramas ie.” (Mat. 14:10-13) Sia weweiti popun an a mochen epwe chék áláeménúló. Chómmóng me leich sia kan mochen áláeménúló atun sia nóm lón letipeta. Nge ren Jesus, ese tongeni áláeménúló chék. Chómmóng aramas ra  fen akkomw wareiti ewe leeni lap seni i. Met Jesus a féri? I a ekieki osupwangen ekkewe aramas, me “a fokun tongeer.” A kúna pwe ra osupwangen álillis me ourur seni Kot, ina minne a mwittir poputá le álisiir. I a poputá “le afalafala ngeniir chomong mettoch.”​—Mark. 6:31-34; Luk. 9:10, 11.

7-8. Áweweei ifa usun ekkewe mwán mi ásimaw mi tong ra áppirú Jesus atun emén lón ar mwichefel a osupwangen álillis.

⁷ Usun án ekkewe mwán mi ásimaw áppirú Jesus. Sia fókkun kilisou ren met ekkewe mwán mi ásimaw mi tong ra féri fán ásengesich. A chómmóng ekkewe angang ra kan féri chón mwichefel rese kan silei usun. Áwewe chék, atun a weiweitá án emén pwiich tolong lón pioing, chón ewe Hospital Liaison Committee ra mwittir álisi. Fán chómmóng, a kan fis ena lepwin! Nge fán tong, ekkewe mwán mi ásimaw, fitifengen me chón ar famili, ra akkomwa osupwangen pwiir kewe Chón Kraist mi nóm lón weires.

⁸ Ekkewe mwán mi ásimaw ra pwal álillis lón ewe angangen kaúún Leenien Mwich me pwal ekkóch imw fán iten ach mwicheich. Ra pwal mwo nge álillis atun a fis feiengaw watte. Ra áeá watteen ar fansoun le asukula, apéchékkúla, me álisi chón ar kewe mwichefel. A mmen fich ngeni meinisin ekkeei mwán mi ásimaw fitifengen me chón ar kewe famili ach sipwe apúnger seni enletin letipach. Amwo Jiowa epwe efeiéchú minne ra féfféri. Ekkewe mwán mi ásimaw ra usun chék kich meinisin, a pwal lamot repwe itepék me rúúepek. A lamot repwe túmúnú pwe resap áeá watteen ar fansoun ngeni ewe mwichefel nge likitaló osupwangen ar famili.

9. Me ren Filipi 2:4, 5, ifa ewe napanap a lamot meinisin Chón Kraist repwe eáni?

⁹ Álleani Filipi 2:4, 5. Ewer, esap kich meinisin, kich mwán mi ásimaw, nge kich meinisin sia tongeni áppirú Jesus me akkomwa osupwangen ekkewe ekkóch lap seni pwisin kich. Ewe Paipel a apasa pwe i “a lapalapeni lapalapen eman chon angang.” (Fil. 2:7) Ekieki met sia tongeni káé seni ena. Emén slave, are chón angang, a kútta ifa usun epwe apwapwaai néún masta. Nge pokiten kich néún Jiowa chón angang me sia angang fán iten pwiich kewe, sia mochen alapaaló ach angang ngeni Jiowa me álillis ngeni pwiich kewe. Ka tongeni féri ena ren óm fiti ekkeei pesepes.

10. Ikkefa ekkewe kapas eis sia tongeni pwisin eisinikich?

¹⁰ Etittina ekiekum me féfférum. Pwisin eisinuk ekkeei esin kapas eis: ‘Ua kan tipemecheres le áeá ai fansoun me péchékkúlei le álisi ekkewe ekkóch? Met upwe féri, áwewe chék, ika emén a tingoreei ai upwe ló chuuri emén Chón Kraist mwán chinnap lón eú leenien túmún chinnap are uwei emén Chón Kraist fefin chinnap ngeni ekkewe mwich? Ua kan tipemecheres le álillis atun elimelimen eú leenien mwichelap are lón túmúnún ewe Leenien Mwich?’ Sia fen fang ngeni Jiowa ach fansoun me wéúch, me a pwapwa atun sia fangafangéch le áeá ekkena le álisi ekkewe ekkóch. Ika sia kúna pwe a lamot ach sipwe amúrinnééló ekiekich me féfférúch, met sipwe féri?

11. Ifa usun iótek a tongeni álisikich le alapaaló ach pennúkúóló pwisin mochenich?

¹¹ Iótek ngeni Jiowa seni enletin letipom. Eli ka meefi pwe a lamot óm kopwe alapaaló óm pennúkúóló pwisin mochenum, nge ka meefi pwe kese mochen féri. Ika ina, tingormaú ngeni Jiowa lón iótek. Wenechar ngeni le ereni met meefiom, me tingorei an epwe fang ngonuk óm ‘mochen me om tufichin apwönüetä letipan.’​—Fil. 2:13.

12. Ifa usun ekkewe át sáráfé mi papatais ra tongeni álisi ar mwichefel?

¹² Ika en emén át sáráfé mi papatais, tingorei Jiowa an epwe álisuk pwe epwe lapóló óm mochen álisi pwiium kewe lón óm we mwichefel. Lón ekkóch leeni, a kan chómmóng mwán mi ásimaw lap seni chónálillisin mwichefel, nge chómmóng me lein ekkena chónálillisin mwichefel ra fen ierini ierin mwán are fen lap seni. Pokiten a chómmóngoló chóchóón án Jiowa we mwicheich, a lamot pwal ekkóch át sáráfé mi papatais pwe repwe álisi ekkewe mwán mi ásimaw le túmúnú chón ar kewe mwichefel. Ika ka tipemecheres le mochen álillis lón ese lifilifil angang, kopwe fókkun pwapwa. Pwata? Pún kopwe apwapwaai Jiowa, pwiium kewe repwe kúna pwe ka tipemecheres le mochen álisi ekkewe ekkóch, me kopwe meefi ewe pwapwa mi pop seni óm álisi aramas.

13-14. Met sia tongeni féri le álisi pwiich kewe? (Ppii ewe sasing wóón péén.)

¹³ Silleni met ekkewe ekkóch ra osupwangan. Ewe aposel Paulus a ereni ekkewe Chón Kraist lón Jutea: “Ousap manlükala ämi oupwe föri föför mi öch o alilisfengen lefilemi, pun ena sokun asor Kot a pwapwa ren.” (Ipru 13:16) Ina eú kapasen emmwen mi múrinné. Ekiseló chék mwirin an tori ekkena Chón Kraist ena taropwe, a lamot ar repwe ló seni leenier kewe, ar kewe business, me aramaser kewe esap iir Chón Kraist me “sütä won ekewe chuk.” (Mat. 24:16) Lón ena atun, a fókkun lamot ar repwe álillisfengen lefiler. Ika ra akkapwénúetá án Paulus  we kapasen emmwen ar repwe álillisfengen lefiler, iwe epwe mecheres ngeniir le eérenaaló nónnómun manawer lón ewe mineféén leeni ra nóm ie.

¹⁴ Esap fansoun meinisin, pwiich kewe ra kan erenikich met ra osupwangan. Áwewe chék, pwúlúwen emén Chón Kraist mwán a má seni. Pwiich na mwán a itá osupwangen álillis ren anan mwéngé, waan, are angangen lón imwan? Neman esap mochen tingor álillis pokiten ese mochen osukosukakich. Nge neman epwe fókkun kilisou ika sia álisi inaamwo ika ese tingoreikich ach sipwe álisi. Sisap ekieki pwe emén epwe wisen álisi, are i epwe pwisin ekkerenikich met a osupwangan. Pwisin eisinuk, ‘Ika ngang ei ú nóm lón ei esin osukosuk, met sókkun álillis upwe pwapwa le etiwa?’

15. Met a lamot sipwe féri ika sia mochen álisi ekkewe ekkóch?

¹⁵ Ámecheresi án aramas repwe tingoreok óm álillis. Ese mwáál ka silei ié kewe lón óm we mwichefel mi tipemecheres le álisi aramas iteitan. Rese kan ámmeef ngenikich pwe sia kan osukosuker. Sa silei pwe sia tongeni lúkúlúkúr atun sa osupwangen álillis, me sia mochen áppirúúr. Emén mwán mi ásimaw itan Alan 45 ierin, a mochen chienan kewe Chón Kraist repwe meefi kinamwe le tingorei an álillis. A ekieki usun án Jesus we leenien áppirú, iwe iei met a erá: “A chómmóng met Jesus a kan féfféri, nge sókkopaten aramas ra mochen nóm ren me rese pireir le tingorei an álillis. Ra silei pwe i a fókkun áfánniir. Ua mochen usun Jesus me silleló pwe ua enletin mochen álisi aramas, chiechiéch ngeniir, me chúngúúr.”

16. Ifa usun ach apwénúetá Kölfel 119:59, 60 a tongeni álisikich le áppirú Jesus?

¹⁶ A lamot sisap letipengaw ika sise sópwéch  lón ach unusen áppirúfichi Jesus. (Jas. 3:2) Emén chón sukul chón chúnga ese tongeni unusen áppirúfichi chúnganien néún we sense. Nge atun a káé seni met a mwáálliló wóón me achocho le áppirú néún we sense úkúkún an tongeni, epwe múrinnéló lón an chúnga. Pwal ina chék usuch, ika sia apwénúetá met sia káé lón ach pwisin káéén Paipel, achocho úkúkún ach tufich le apwúngú met sa mwáálliló wóón, sia tongeni sópwéch lón ach áppirú án Jesus leenien áppirú.​—Álleani Kölfel 119:59, 60.

17-18. Met feiéchún ach achocho le áppirú án Jesus pennúkúóló pwisin mochenin?

¹⁷ Ika sia tipemecheres le awora álillis, iwe chókkewe mi kúna ach féri ena, repwe pwal mochen áppirúkich. Emén mwán mi ásimaw itan Tim, a apasa: “A wor ekkóch át sáráfé Chón Kraist ra kewis ar repwe chónálillisin mwichefel. Eú popun, pún ra kúna tipemecheresin ekkewe ekkóch le álillis me ra mochen áppirúúr. Ekkeei át sáráfé Chón Kraist ra álisi ám mwichefel me álisatá ekkewe mwán mi ásimaw.”

¹⁸ Chómmóng aramas lón ei fansoun ra achéchééi pwisin iir. Nge néún Jiowa kewe aramas rese fókkun ina usun. A mmen chúng letipach ren án Jesus pennúkúóló pwisin mochenin, me sia tipeppós le mochen áppirú. Ewer, kich sise tongeni unusen áppirúfichi Jesus, nge sia tongeni achocho le “tapwela mürin lon ipwan.” (1 Pet. 2:21) Atun sia achocho úkúkún ach tufich le áppirú án Jesus pennúkúóló pwisin mochenin, kich sipwe pwapwa pún sia apwapwaai Jiowa.