1. Ki leta lespri bann serviter Zeova i annan?

DEPI byen lontan, Labib ti predir ki pep Bondye ti pou “ofer zot lekor volonterman” pour servi Zeova anba direksyon Zezi. (Ps. 110:3, NWT) Sa profesi pe ganny akonplir ozordi. Tou le lannen, bann serviter Zeova i pas plizyer milyon erdtan dan sa travay predikasyon. Zot pa ganny peye pour fer sa travay me zot fer li akoz zot anvi. Zot osi pran letan pour ed zot bann frer ek ser ganny bann keksoz ki zot bezwen, ankouraz zot e ranforsi zot lafwa. Bann ansyen ek bann serviter kongregasyon i pas plizyer erdtan pe prepar zot bann partisipasyon dan renyon e pe vizit bann frer ek ser pour ankouraz zot. Akoz bann serviter Zeova i fer sa travay? Sa i akoz zot kontan Zeova ek zot prosen.​—Mat. 22:37-39.

2. Dapre Romen 15:1-3, ki legzanp Zezi in kite pour nou?

² Zezi ti met lentere lezot avan sa ki pour li e nou pe fer nou mye pour swiv son legzanp. (Lir Romen 15:1-3.) Bann ki swiv son legzanp pou ganny bann byenfe. Zezi ti dir: “I annan plis lazwa pour donnen ki pour resevwar.”​—Akt 20:35.

3. Ki nou pou vwar dan sa lartik?

³ Dan sa lartik, nou pou vwar serten keksoz ki Zezi ti fer pour ed lezot e nou pou vwar ki mannyer nou kapab swiv son legzanp. Nou pou osi vwar kwa ki kapab ed nou pour pli pare pour ed lezot.

4. Ki mannyer Zezi ti met lentere lezot avan sa ki pour li?

⁴Zezi ti ed lezot menm ler i ti fatige. Mazin sa ki Zezi ti fer ler en gran lafoul ti vin kot li lo montanny ki tre probab ti o bor Kapernaoum. Zezi ti’n pas lannwit antye pe priye e i tre probab ki i ti fatige. Me ler i ti vwar sa lafoul, i ti pran pitye pour bann pov ek bann ki malad parmi zot. I pa ti zis geri zot me i ti osi fer enn bann diskour pli ankourazan ki’n deza ganny fer e sa i sa Sermon lo Montanny.​—Lik 6:12-20.

5. Ki mannyer bann sef fanmir pe swiv legzanp Zezi menm ler zot fatige?

⁵Lafason ki bann sef fanmir i swiv legzanp Zezi. Annou vwar en legzanp. Apre en gran lazournen travay, en sef fanmir i ariv kot lakour byen fatige. Petet i anvi kennsel Ladorasyon Fanmir sa zour swar me i sipliy Zeova pour donn li lafors pour fer Ladorasyon Fanmir. Zeova i reponn son lapriyer e sa sef fanmir i fer letid avek son fanmir parey i abitye fer tou le semenn. Sa zour swar, bann zanfan i aprann en leson enportan. Zot aprann ki pour zot paran, bann keksoz spirityel i pli enportan ki tou lezot keksoz.

6. Ki mannyer Zezi ti ed lezot menm ler i ti anvi reste li tousel? Donn en legzanp.

⁶Zezi ti ed lezot menm ler i ti anvi reste li tousel. Eski ou kapab mazinen ki mannyer Zezi ti santi ler i ti tande ki zot ti’n koup latet Zan ki batize? I bezwen ki i ti vreman sagren ler i ti konnen ki son zanmi ti’n mor. Labib i dir: “Ler Zezi ti tann sa, i ti anbark dan kannot pour al dan en landrwa izole kot i ti pou tousel.” (Mat. 14:10-13) Nou kapab konpran akoz i ti anvi reste li tousel. I annan en kantite dimoun ki pli kontan reste tousel ler zot sagren. Me pour Zezi, sa pa ti posib parski en gran lafoul ti’n ariv avan li dan sa landrwa izole kot i ti anvi ale. Ki Zezi ti fer? Zezi ti reflesir lo sa ki sa bann dimoun ti bezwen e “son leker ti fermal.” Zezi ti realize ki sa bann dimoun ti bezwen led ek rekonfor ki sorti  kot Bondye. Alor deswit i ti konmans ed zot. Anfet, “i ti konmans ansenny zot en kantite keksoz.”​—Mark 6:31-34; Lik 9:10, 11.

7-8. Ki mannyer bann ansyen i swiv legzanp Zezi ler en dimoun i bezwen led dan kongregasyon? Donn en legzanp.

⁷Lafason ki bann ansyen i swiv legzanp Zezi e demontre lanmour. Bann ansyen i met lentere lezot avan sa ki pour zot. Nou vreman rekonesan pour sa travay ki zot fer pour nou. Anfet, nou pa konn laplipar travay ki bann ansyen i fer. Par egzanp, ler en frer oubyen en ser i bezwen swen medikal irzan, deswit bann frer ki lo Komite lyezon lopital i al ed sa frer oubyen sa ser. Souvandfwa, sa i ariv dan milye lannwit! Me vi ki sa bann ansyen ek zot fanmir i annan konpasyon pour zot bann frer ek ser, zot met lentere zot bann frer ek ser avan sa ki pour zot.

⁸ Bann ansyen i ede pour konstri bann Lasal Rwayonm ek lezot batiman. Zot osi partisip dan travay led sekour. Zot pas en kantite letan pe ansenny, ankouraz e ed nou. Sa bann frer ek zot fanmir i merit ganny felisite. Ki Zeova i beni zot leta lespri! Me parey tou dimoun, bann ansyen i bezwen rezonnab. Zot pa devret pas sitan bokou letan pe fer keksoz pour kongregasyon ki zot napa letan pour pran swen avek zot fanmir.

9. Dapre Filipyen 2:4, 5, ki latitid tou Kretyen i devret annan?

⁹ Lir Filipyen 2:4, 5. Nou tou nou kapab swiv legzanp Zezi pour met lentere lezot avan sa ki pour nou, me pa zis  bann ansyen. Labib i dir ki Zezi ti pran “menm natir ki en lesklav.” (Fili. 2:7) Ki nou aprann avek sa verse? En lesklav oubyen en serviter i rod tou loportinite pour fer plezir son met. Vi ki nou bann lesklav Zeova e nou servi nou bann frer ek ser, nou anvi vin pli itil pour Zeova e pour nou bann frer ek ser. Annou vwar serten sizesyon lo ki mannyer nou kapab fer sa.

10. Ki bann kestyon nou kapab demann nou lekor?

¹⁰Egzamin ou latitid. Demann ou lekor sa bann kestyon parey, ‘Eski mon pare pour sakrifye mon letan ek lenerzi pour ed lezot? Ki mon pou fer si mon ganny demande pour al vizit en frer aze ki reste dan lakaz bann dimoun aze oubyen pour anmenn en ser aze renyon? Eski mon pare pour ede pour netway sa landrwa kot pe fer lasanble oubyen ede avek bann louvraz kot Lasal Rwayonm?’ Ler nou ti dedye nou lavi avek Zeova, nou ti promet li, ki nou pou servi tou sa ki nou annan pour servi li. I anvi ki nou servi nou letan, lenerzi ek nou bann keksoz materyel pour ed lezot. Alor i kontan ler nou met lentere lezot avan. Si nou vwar ki nou bezwen fer bann sanzman, ki nou kapab fer?

11. Ki mannyer lapriyer i kapab ed nou pour pli pare pour met lentere lezot avan sa ki pour nou?

¹¹Priy Zeova senserman. Meton ou vwar ki ou bezwen fer bann sanzman pour ou kapab met lentere lezot avan sa ki pour ou, me ou pa anvi fer sa. Si ou santi koumsa, priy Zeova senserman. Dir li egzakteman ki mannyer ou santi e demann li pour donn ou “sa dezir ek lafors pour azir.”​—Fili. 2:13.

12. Ki mannyer bann zenn frer i kapab ede dan lorganizasyon Zeova?

¹² Eski ou en zenn frer ki’n batize? Demann Zeova pour ed ou devlop sa dezir pour fer plis dan kongregasyon. Dan serten pei, i annan plis ansyen ki bann serviter kongregasyon e en kantite sa bann serviter kongregasyon nepli zenn. Anmezir ki lorganizasyon Zeova i agrandi, nou bezwen plis zenn frer pour ed bann ansyen pran swen avek bann frer ek ser dan kongregasyon. Si ou en zenn frer e ou pare pour al ede dan nenport landrwa, ou pou zwaye. Akoz? Parski ou pou fer plezir Zeova, bann frer ek ser pou vwar ki ou anvi ed zot e ou pou zwaye akoz ou pe ed zot.

13-14. Ki nou kapab fer pour ed nou bann frer ek ser? (Vwar portre lo kouvertir.)

¹³Obzerv byen pour ou kapab remarke ler lezot i bezwen led. Zapot Pol ti dir bann Kretyen ki ti pe reste Zide: “Pa oubliye fer dibyen e partaz sa ki zot annan avek lezot, parski Bondye i kontan bann sakrifis koumsa.” (Ebr. 13:16) Sa ti en bon konsey! Pa bokou letan apre ki zot ti’n ganny sa let, sa bann Kretyen ti bezwen kit zot lakour, zot biznes ek zot fanmir ki pa ti Kretyen e zot ti bezwen “konmans sov dan montanny.” (Mat. 24:16) Sa letan, i ti vreman enportan pour zot ed kanmarad. Si depi avan sa zot ti’n aplik konsey Pol pour partaz sa ki zot annan avek lezot, i ti pou pli fasil pour zot viv avek mwens keksoz dan zot nouvo lakour.

¹⁴ I kapab ki nou bann frer ek ser pa pou toultan dir nou ler zot bezwen led. Par egzanp, i kapab arive ki madanm en  frer i mor. Eski sa frer i bezwen led pour kwi manze, pour al bann landrwa oubyen pour fer bann louvraz kot lakour? Petet i pa pou demann nou led parski i pa anvi fatig nou. Me i pou vreman apresye si nou ed li avan menm ki i demann led. Nou pa devret mazinen ki en lot dimoun pou ed li oubyen ki i pou toultan dir nou sa ki i bezwen. Demann ou lekor, ‘Si mon ti dan sa sityasyon, ki mon ti pou kontan lezot i fer pour mwan?’

15. Ki nou bezwen fer si nou anvi ed lezot?

¹⁵Fer li fasil pour lezot demann ou led. San dout, ou konn bann frer ek ser dan ou kongregasyon ki toultan pare pour ed lezot. Zot pa zanmen fer nou santi ki nou pe fatig zot. Nou konnen ki zot toultan pare pour ed nou e nou ti pou kontan vin parey zot. En ansyen ki apel Alan e ki annan 45 an, i anvi fer li fasil pour lezot vin demann li led. Alan ti medit lo legzanp Zezi e i ti dir: “Zezi ti bizi me dimoun tou laz, ki swa zot ti zenn oubyen aze, ti alez pour al kot Zezi e pour demann li led. Zot ti konnen ki i ti vreman kontan zot. Mon vreman anvi swiv legzanp Zezi e mon anvi ki lezot i vwar mwan konman en dimoun ki fasil pour demann led, ki amikal e ki kontan lezot.”

16. Ki mannyer ler nou aplik Psonm 119:59, 60, sa i ed nou pour swiv legzanp Zezi pli byen?

¹⁶ Nou pa devret dekouraze si nou pa toultan kapab swiv legzanp Zezi. (Zak 3:2) En dimoun ki pe aprann desinen pa pou desin parey sa dimoun ki pe montre li desinen e ki’n desinen pour plizyer lannen. Me anmezir ki i aprann avek bann fot ki i fer e i fer tou sa ki i kapab pour swiv legzanp son ansenyan, i pou kontinyen amelyore. Pareyman, si nou aplik sa ki nou aprann dan nou letid personnel e nou kontinyen fer tou sa ki nou kapab pour amelyore, nou pou kapab swiv legzanp Zezi pli byen.​—Lir Psonm 119:59, 60, NWT.

17-18. Ki byenfe nou pou gannyen si nou swiv legzanp Zezi e met lentere lezot avan?

¹⁷ Ler nou pare pour ed lezot, lezot osi pou anvi fer parey. En ansyen ki apel Tim i dir: “Serten frer ki vreman zenn in vin bann serviter kongregasyon. En rezon akoz i parski zot ti anvi fer parey bann ki pare pour ed lezot. Sa bann zenn frer i ed bann frer ek ser dan kongregasyon e zot osi ed bann ansyen en kantite.”

¹⁸ En kantite dimoun dan lemonn i mazin zis zot prop lekor. Me bann serviter Zeova pa koumsa. Lefet ki Zezi in met lentere lezot avan sa ki pour li, sa in anmenn bann byenfe pour nou. Alor nou determinen pour swiv son legzanp. I vre nou pa toultan kapab swiv son legzanp, me nou kapab “swiv son lepa fidelman.” (1 Pyer 2:21) Anmezir nou fer nou mye pour swiv legzanp Zezi e met lentere lezot avan, nou pou zwaye parski nou pou pe fer plezir Zeova.