1. ¿Kʼãrẽ nebiata obʉ Jeowa pʉwʉrʉbara?

 DÃÃRABA Daizeze Bedʼeaba jaradata, ẽbẽra Daizeze pʉwʉrʉdebemabara okĩrã odaibasita Jeowaba yi warra Jesudeba zokʼadata (Sal. 110:3). Idi naʉ̃ propesiara aripe berabarinʉmʉ, poagaza Jeowa ode panʉrabara ewari mejãcha jʉrʉpanʉ jaradiaita. Mamina ãya naʉ̃ oira plata widida ẽ, awuarabʉrʉ soiduba okĩrã opanʉ. Adewara ãyira ewari jʉrʉpanʉ mebẽrã kongregasionebema kʼarebaita ãya nesidabʉde, zowaĩnĩgʉa diaita akʉza so zarea diaita mawũã Jeowa kʼawa panamarẽã. Zõrãrãta akʉza zõrãrã kʼarebabarirãra ãba yi jʉrebarima wãi nãã biʼia estudiapanʉ, ãba yi jʉrebʉrʉde biʼia jaradiaita adewara akʉ wãpanʉ mebẽrã kongregasionebemata, ¿kʼãrẽa mawũã opanʉ? Jeowata kãgapanʉ baera akʉza wuabemarata (Mat. 22:37-39).

2. Romanos 15:1-3 bayeda jarabʉdebara, ¿kʼãrẽ yizata diasi Jesubara?

² Jesubara yiza biata amaesi, nãã akʉbasi baera wuabemaraba nesidabʉta maʉ̃ tẽã iya nesidabʉta. Dayirãsida zarea odaibara Jesu yizade kĩrãkʼa odaita (akʉra Romanos 15:1-3). Dayirãba Jesuba obada kĩrãkʼa obʉbʉrʉ nebia mejãcha ũdudayi, iya jarasi baera: «Audre sobiabʉ daya diabʉde dayaʼa diapanʉira» (Hech. 20:35).

3. ¿Kʼãrẽta kʼawuadayi naʉ̃ artikulodera?

³ Naʉ̃ artikulode kʼawuadayi Jesuba kʼãrẽta osita wuabemara  kʼarebaita akʉza sãwũã dayirãba iyide kĩrãkʼa oseapanʉta. Adewara kʼawuadayi kʼãrẽta oseapanʉta wuabemara audre kʼarebadaita.

4. ¿Sãwũã ũdubisi Jesubara nãã akʉbʉta wuabemaraba nesidabʉta?

⁴ Jesubara kʼarebabasi wuabemara iyi aukarabasidu. Kĩrãbedadrʉ, ewari aba Jesura chuasi katuma Capernaúm kʼawa, iyira mama yiwidʼi ũnadrʉsi maʉ̃ kʼarea mejãcha mapaebasi, ¿mawũẽra kʼãrẽta osi Jesubara ẽbẽrarã iyima uruta ũdusidera? Jesu mapaebasimina iya so borekea akʉsi, ẽbẽrarã mejãchabʉde panasi baera, yi nekʼãrẽ neẽãbʉta, kayaberata. Adewara Jesubara bebisi yi kayabʉra akʉza diskurso audre yibiata jaradiasi naʉ̃ trʉ̃ra: Katumane bedʼea bia jarada (Luc. 6:12-20).

5. ¿Mebẽrã burubara sãwũã Jesude kĩrãkʼã opanʉ ãyi mapaebʉmina?

⁵ Mebẽrã burubara Jesude kĩrãkʼa opanʉ. Krĩchara naʉ̃ta, mebẽrã buru abaʉta aukara zebʉrʉ trajodeba, maʉ̃ kʼarea krĩchabʉ yi mebẽrãbawara Jeowa ʉ̃rʉ kʼawuapanʉra obeda ẽ baita awuarabʉrʉ tẽãne oita, mamina Jeowaʼa widibʉ zarea diamarẽã yi mebẽrãbawara ãba estudiaita, Jeowabara panʉsi iya widibʉra mawũã estudiasida yi mebẽrãbawara ãya semanaza obʉ kĩrãkʼa. Mawũã yibarirabara ãyi wũãwũãra jaradiapanʉ Daizezedebema oita audre yibiata ãyitara.

6. Jara ũrĩbira sãwũã Jesubara ewari jʉrʉsita wuabemara kʼarebaita.

⁶ Jesubara ewari jʉrʉbasi wuabemabawara bʼaita iyi doba bʼaita nesidabasimina. Krĩchadadrʉ Jesu sãwũã sentibasita iyi neũdukʼawua Juan el Bautista beida kʼarea, iyira mejãcha sopʉabasi. Daizeze Bedʼeaba jarabʉ: «Jesúsbara maʉ̃ta ũrĩpe mamaʉ̃bara dobʼa jãbadʼe wãsia miõ ne ẽãĩnu» (Mat. 14:10-13). Edaʉde ʉ̃kʉrʉ ẽbẽra ãyi mebẽrã beibʉrʉdera doba bakĩrãpanʉ, maʉ̃ kʼarea Jesusida doba bakĩrãbasi.  Mamina Jesu doba ba be ẽ basi, maʉ̃ kʼarea iya krĩchabasi miõ neẽ mae wãita, maʉ̃ta ẽbẽraba ũrĩside nãã wãsida Jesu jʉ̃ãita ãyira kabanabasi, aramaʉ̃ta, ¿kʼãrẽta osi Jesura? Jesubara ũdusi naʉ̃ra ẽbẽrarãbara iyi kʼarebata nesidabasita. Maʉ̃ kʼarea so borea akʉsi akʉza kʼarebasi, mõbe ãyaʼa nekʼãrẽ mejãcha jaradianʉmesi (Mar. 6:31-34; Luc. 9:10, 11).

7, 8. Mebẽrãba kʼareba nesidapanʉnera, ¿zõrãrãbara sãwũã Jesuba oda kĩrãkʼa oũdubipanʉ?

⁷ Zõrãrãbara Jesude kĩrãkʼa oseapanʉ. Dayirãbara zõrãrãʼa biga diakĩrãpanʉ ãya opanʉ kʼarea. Mebẽrãbara zõrãrãba nekʼãrẽ obʉra jõmara kʼawuada ẽ. Bari jaraita, mebẽã aba kayabʉrʉdera, zõrãrã medikobawara bedʼeabʉra mesera wãbʉ ãyi kʼarebade. Naʉ̃ra edaʉde diamasi mawũã berabaribʉmina zõrãrãbara mebẽrã kongregasionebemata so borekea akʉpanʉ baera wãpanʉ kʼarebade. Adewara zõrãrã mebẽãitabida audre yibia mebẽrãta akʉita.

⁸ Zõrãrãbara kʼarebabʉ Daizeze de parãita akʉza mebẽrã naʉ̃ drʉade neida berabaribʉrʉde kʼareba wãita. Adewara zõrãrã kongregasionebemara ewari mejãcha jʉrʉbʉ, dayirãʼa so zarea diaita, kʼarebaita akʉza nejaradiaita, maʉ̃ kʼarea dayirãbara zõrãrãʼa akʉza yi mebẽrãʼa soiduba biga diaibara ãya opanʉ kʼarea. Adewara Jeowabida ãya nebiata diabʉ. Mamina zõrãrãra jʉra kʼawuabaibara, mebẽrã kongregasionebema akʉita ewari jʉrʉbʉ kʼarea, iyi mebẽrã akʉita ewari neẽbai kʼarea.

9. Filipenses 2:4, 5de jarabʉdera, ¿dayirãbara kʼãrẽta okĩrãpanaibara?

⁹ (Akʉra Filipenses 2:4, 5). Dayirã jõmaʉ̃ta zõrãrã kongregasionebema ẽ mina, dayirãbida nãã akʉseabʉ wuabema nesidabʉta Jesuba oda kĩrãkʼa. Daizeze Bedʼeabara jarabʉ Jesu ʉ̃rʉ, iyira nezokʼa kĩrãkʼabasita (Filip. 2:7). ¿Kʼãrẽta jarakĩrãkʉ naʉ̃ bedʼeaba? Yi nezokʼabara sobiabikĩrãbʉ iyi nokʼota, abarika dayirãsida Jeowa nezokʼa kĩrãkʼa bʉ baera iyita sobiabikĩrãbʉ akʉza wuabemarata kʼarebakĩrãpanʉ. Atia akʉdaya, kʼãrẽta oibara mawũã oita.

10. ¿Dayikʉza kʼãrẽta widibara?

¹⁰ Biʼia krĩchara bʉa obʉta. Bʉyikʉza widira, ¿mʉ̃ra ewari jʉrʉkĩrãbʉka wuabemara kʼarebaita? ¿Kʼãrẽta oi mʉ̃ra, jaradara ẽbẽra wẽrã kĩrãdawarabʉta ãba yi jʉrebarima edemarẽã akʉza mebẽã zõrãbʉta akʉ wãmarẽã jaradara? ¿Mʉ̃ra wãkĩrãbʉka asamblea obarimae de imaita mawũã ẽ bʉrʉ Daizeze Nokʼo ʉ̃rʉ bedʼeabari de sʉgʉita? Dayirã bebʉ Jeowaʼa diaya asidera, jarasida dayirãba nekʼãrẽ jõma erbʉra zokʼadaita Jeowaba jarabʉ jõma oita. Jeowabara kãgabʉ dayirãba wuabemara kʼarebamarẽã, daya ãyitaʼa ewari jʉrʉbʉdeba, zarea diabʉdeba, adewara daya nekʼãrẽ erbʉdeba kʼarebabʉde, maʉ̃ta dayirãba soiduba odara Jeowara sobiabayi. Mamina naʉ̃ oita dayirãita zareabʉbʉrʉ, ¿kʼãrẽta oibara?

11. ¿Sãwũã kʼarebabʉ yiwidʼibʉbara audre kʼarebakĩrãita wuabemarata?

¹¹ Soiduba yiwidʼira Daizezeʼa. Dayita kʼãrẽ oamabʉbʉrʉ akʉza sentibʉbʉrʉ nekʼãrẽta wũẽta oseabʉta, ¿kʼãrẽta oibara? Jeowa yiwidʼida okĩrãbimarẽã akʉza obimarẽã (Filip. 2:13).

12. ¿Kʉ̃rãra buru kʼoebʉbara sãwũã kʼarebaseabʉ kongregasionera?

¹² Bʉta kʉ̃rãbʉrʉ akʉza yi buru kʼoemabʉbʉrʉ, widida Jeowaʼa bʉa kʼarebakĩrãita mebẽrã kongregasionebemata. Ʉ̃kʉrʉ drʉadera mejãchabʉ zõrãrã kongregasionebemara mamina wiñabʉ zõrãrã kʼarebabarira adewara mama zõrãrã kʼarebabari panʉra warrara ẽ. Kongregasionʼra wuabʉrʉ eaba wã baera, nesidapanʉ kʉ̃rãra zõrãrã kongregasionebema kʼarebadamarẽã. Bʉta wãseabʉbʉrʉ kʼarebaita yi nesidabʉmae bʉra sobia bayi, ¿kʼãrẽa? Jeowata sobiabi baera akʉza wãrĩnu ũdubi baera wuabemarata kʼarebakĩrãbʉta.

13, 14. ¿Kʼãrẽta oseapanʉ dayirã mebẽrã kʼarebadaita? (Akʉra poto yi nããrabemata).

¹³ Mebẽrãba nesidabʉta akʉbaibara. Pablobara naʉ̃ ũrãgʼata diasi: «Kĩrãduaraidua wuabemaraita nebia oita, mia kĩrãduaraidua maraba erbʉta wuabemarabida diaita, Daizezeba maʉ̃ sakripisiota mejãcha kãgabʉ baera» (Heb. 13:16). Naʉ̃ ũrãgʼa ũrĩna tẽã, Judadebemara wãibarabasi katumaena, amaeibarabasi ãyi deta, ãyi trajota akʉza ãya nekʼãrẽ jõma erbʉta (Mat. 24:16). Mawũã berabarinʉmʉenara ãyirainʉ yi kʼarebaibarabasi. Ãya naʉ̃ ũrãgʼata ũrĩsidabʉrʉ katumama wãi nãã, zʉrʉbʉria ẽ bakasi ãyi bidamae.

¹⁴ Dayirã mebẽrãbara edaʉde jara ẽ ãya kʼãrẽta nesidabʉra. Bari jaraita, mebẽã yumakẽrã juwa jidabʉta pẽdrababidara, ¿bʉmara? ¿Mebẽãbara nesida ẽka kʼareba neoita, motode edeita,  mawũã ẽ bʉrʉ iyi de imaita? Mebẽãta so pera sentibʉbʉrʉ, dayirãʼa kʼareba widi ẽ bayi mamina iyira sobiabayi dayirã areba iyita kʼareba wãnara, adewara krĩchada ẽ baibara awuruba kʼarebaita mebẽãra akʉza iyabʉrʉ kʼawua jaraita sãwũã kʼarebamarẽã bʉra. Krĩchara, bʉta mawũã berabarira, ¿sãwũã kãgai bʉta kʼarebadamarẽã?

15. ¿Wuabema kʼarebaira kʼãrẽta oseapanʉ?

¹⁵ Ẽbẽra biabʉrʉ, wuabemaba bʉ kʼarebata jʉrʉseabʉ. Bʉa ũdukʼawua bʉbaibara bʉ kongregasione wuabema ẽbẽrarã kʼarebakĩrãta, ãyira ẽbẽra bia baera wuabemaba ãyaʼa kʼareba widibʉrʉdera bia sentibʉ. Dayirãbara kʼawuapanʉ ẽbẽraba ãyi kʼareba widibʉrʉdera ãya kʼarebaita, dayirãbida ãyide kĩrãkʼa okĩrãpanʉ. Alanʼra zõrãrã kongregasionebema iyira 40 poagabʉ, iyara Jesude kĩrãkʼa okĩrãbʉ, iya jarabʉ: «Jesu nekʼãrẽ mejãcha obasimina, iya ẽbẽrata bia edabasi baera ẽbẽrarã pera ẽ basi iyaʼa kʼareba widita, ũdupanasi baera Jesubara kʼarebakĩrãbʉta. Mʉ̃ara Jesude kĩrãkʼa okĩrãbʉ, wuabemaba akʉdamarẽã mʉ̃ra ẽbẽra biata akʉza mʉ̃ta orradamarẽã».

16. Salmo 119:59, 60de jarabʉdebara, ¿sãwũã kʼãrẽbabʉ Jesude kĩrãkʼa oita?

¹⁶ Biode krĩcha oẽ baibara Jesuba obada kĩrãkʼa aripe oẽ bʉrʉ (Sant. 3:2). Bari jaraita, yi kʉrrʉma kʼa kʼawuabʉba awuru ẽbẽra jaradiara, maʉ̃ ẽbẽrabara aripe oẽbayi iyaʼa kʉrrʉma kʼa jaradiabʉde kĩrãkʼara, mamina iyita zarea ora, yi kʉrrʉma kʼa kʼawuabʉde kĩrãkʼa biʼia oyi. Abarika dayirã dobaʉba Daizeze Bedʼea akʉbʉde kʼawuadara nekʼãrẽ opanʉta, naʉ̃ta ara opanʉbʉrʉ  Jesude kĩrãkʼa odayi (akʉra Salmo 119:59, 60).

17, 18. ¿Dayirãbara kʼãrẽ nebiata ũdudai Jesude kĩrãkʼa opanʉbʉrʉ?

¹⁷ Dayirãba wuabemara kʼarebabʉdera, naʉ̃ba obibʉ wuabemarabida abarika odamarẽã. Zõrãrã kongregasionebema yi trʉ̃ Timba jarabʉ: «Dai kongregasionera mejãchabʉ kʉ̃rãrata, ãyara ũdusida mebẽrã kongregasionebemaba sãwũã kʼarebabʉta wuabemarara. Maʉ̃ kʼarea ãyabida kʼarebakĩrãsi adewara kongregasionebemara zõrãrã kʼarebabari babisida kʉ̃rãbasimina. Naʉ̃ra kʉ̃rãrabara biode kʼarebabʉ zõrãrãta akʉza mebẽrãta».

¹⁸ Ẽbẽrarã naʉ̃ drʉdebemabara ãyitrʉ jʉ̃zaba krĩchabʉ mamina Daizeze pʉwʉrʉra awuarabʉ, ¿kʼãrẽa mawũã awuarabʉ? Jesude kĩrãkʼa okĩrãpanʉ baera. Jesubara jõma daucha obasi nemitia oka baera, mawũẽra dayirãsida zarea opanʉbʉrʉ iyide kĩrãkʼa oseapanʉ (1 Ped. 2:21). Dayirãta zarea opanʉbʉrʉ wuabemara kʼarebaita Jesuba oda kĩrãkʼa, mejãcha sobiapanañi Jeowaba bia akʉi baera.