1. ¿Bajcheʼ miʼ pʌsob wem bʌ i melbal jiñi i tejclum Jehová?

JIÑI Biblia wajalix tsiʼ wʌn alʌ chaʼan jiñi i tejclum Jehová mi caj i yʌcʼob i bʌ ti jumpʼejl i pusicʼal chaʼan miʼ melbeñob (chaʼlebeñob) i yeʼtel (troñel) tiʼ coltaya i Yalobil (Sal. 110:3). Ili profecía wolʌch i tsʼʌctiyel ili ora. Ti jujumpʼejl jab, jiñi i wiñicob Dios tijicñayob miʼ wen chaʼleñob subtʼan ti jumpʼejlob i pusicʼal i maʼañic miʼ chʼʌmob i tojol. Cheʼ jaʼel, miʼ yʌqʼueñob i yorajlel chaʼan miʼ coltañob, miʼ ñuqʼuesʌbeñob i pusicʼal yicʼot chaʼan miʼ pʼʌtʼesʌbeñob i ñopoñel jiñi hermanojob. I jiñi ancianojob yicʼot jiñi siervo ministerialob miʼ wen aqʼueñob i yorajlel chaʼan miʼ chajpañob i bʌ chaʼan jiñi asignación tac yicʼot jiñi discurso tac yaʼ ti congregación, i miʼ melob visita de pastoreo. ¿Chucoch miʼ melob ili? Come miʼ cʼuxbiñob Jehová yicʼot i piʼʌlob (Mat. 22:37-39).

2. Cheʼ bajcheʼ miʼ yʌl Romanos 15:1-3, ¿chuqui ti ejemplo tsiʼ pʌsbeyonla Jesús?

² Jesús tsiʼ ñaxan qʼuelbe i wenlel yambʌlob, i jiñi xñoptʼañonbʌla mi lac chaʼlen wersa lac lajin (pejcan Romanos 15:1-3). Mi mucʼʌch lac mel, mi caj laj qʼuelben i wenlel. Jesús tsiʼ yʌlʌ: «Ñumen an tijicñʌyel cheʼ mi la cʌcʼ i mach jiñic cheʼ mi lac chʼʌm» (Hech. 20:35).

3. ¿Chuqui mi caj laj qʼuel ti ili estudio?

³ Ti ili estudio mi caj laj qʼuel chuqui tac tsiʼ mele Jesús tiʼ  tojlel yambʌlob yicʼot bajcheʼ miʼ mejlel lac lajin. Mi caj laj qʼuel jaʼel chuqui miʼ mejlel lac mel chaʼan mi lac ñumen mulan laj coltan yañoʼ bʌ.

4. ¿Bajcheʼ tsiʼ pʌsʌ Jesús chaʼan jiñʌch tsiʼ ñaxan ñaʼta jiñi yañoʼ bʌ?

⁴Jesús tsiʼ colta yañoʼ bʌ anquese lujbix. Laʼ cu lac ñaʼtan chuqui tsiʼ mele cheʼ bʌ yonlel lac piʼʌlob tsaʼ majli i qʼuelob yaʼ ti wits, tajol jiñi lʌcʼʌl bʌ an yaʼ ti Capernaúm. Jesús tajol wen lujbix come jumpʼejl acʼʌlel tsiʼ chaʼle oración. Pero cheʼ bʌ tsiʼ qʼuele pejtelel jiñi lac piʼʌlob tsiʼ pʼunta jiñi pʼumpʼuñoʼ bʌ yicʼot jiñi cʼamoʼ bʌ. Mach tsaʼic jach i tsʼʌcayob, tsiʼ yʌqʼueyob jaʼel jiñi cʌntesa wen utsʼatax bʌ cʼʌlʌl ili ora: Jiñi Cʌntesa yaʼ ti wits (Luc. 6:12-20).

5. ¿Bajcheʼ miʼ lajiñob Jesús jiñi i jol familia cheʼ bʌ lujbob?

⁵¿Bajcheʼ miʼ lajiñob Jesús jiñi i jol familia? Laʼ cu lac ñaʼtan juntiquil tatʌl wen lujbix bʌ miʼ cʼotel tiʼ yotot cheʼ bʌ miʼ yujtel ti eʼtel. Ti jimbʌ qʼuin an jiñi i chʼujutesaya ti familia. Miʼ ñumel tiʼ jol chaʼan ti yanto bʌ qʼuin miʼ mel, pero miʼ cʼajtiben Jehová chaʼan miʼ yʌqʼuen i pʼʌtʌlel. Jehová miʼ jacʼben i yoración, i ti jimbʌ ora miʼ comol chaʼleñob estudio cheʼ bajcheʼ miʼ melob ti jujumpʼejl semana. Ti jimbʌ ora jiñi i yalobilob tsiʼ cʌñʌyob chaʼan tiʼ tojlelob jiñi i tat i ñaʼ jiñi ñumen ñuc bʌ i cʼʌjñibal jiñʌch cheʼ lʌcʼʌl miʼ yajñelob tiʼ tojlel Jehová.

6. ¿Baqui ora tsiʼ yʌqʼue i yorajlel Jesús chaʼan miʼ coltan yambʌlob?

⁶Jesús tsiʼ yʌqʼue i yorajlel chaʼan miʼ yajñel yicʼotob yambʌlob. Laʼ cu lac ñaʼtan chuqui woli (choncol) i ñusan: Jesús tsaʼ jaxto i yubi chaʼan Juan jiñi Xʼacʼ chʼʌmjaʼ, jiñi i yamigo, tsaʼ tsʌnsʌnti, i tajol wen chʼijyem. Jiñi Biblia miʼ yʌl: «Cheʼ bʌ Jesús tsiʼ yubi iliyi, tsaʼ majli i tsaʼ letsi ti jumpʼejl barco chaʼan miʼ majlel baqui miʼ mejlel ti bajñel ajñel» (Mat. 14:10-13). Miʼ mejlel lac ñaʼtan chaʼan yom bajñel ajñel. An muʼ bʌ i mulañob bajñel ajñel cheʼ bʌ an majqui miʼ chʌmel (sajtel) i chaʼañob. Pero Jesús mach mejlic i mel jiñi come yonlelob yaʼix añob i pijtan yaʼ baqui woli (yʌquel) i majlel. ¿Chuqui tsiʼ mele? Tsiʼ ñaʼta chuqui tac woliʼ ñusañob jiñi lac piʼʌlob i «tsiʼ wen pʼuntayob». Tsiʼ qʼuele chaʼan  yomob coltʌntel, i tsaʼʌch i coltayob. Cheʼ jaʼel, «cabʌl chuqui tsaʼ caji i pʌsbeñob» (Mar. 6:31-34; Luc. 9:10, 11).

7, 8. Alʌ jumpʼejl ejemplo chaʼan bajcheʼ miʼ lajiñob Jesús jiñi ancianojob cheʼ bʌ an majqui yom coltʌntel.

⁷¿Bajcheʼ miʼ lajiñob yicʼotob i cʼuxbiya i yejemplo Jesús jiñi ancianojob? Mi laj qʼuel ti ñuc pejtelel chuqui miʼ melob jiñi ancianojob, ¿ñomach? Cabʌlonla mach luʼ la cujilic chuqui miʼ melob. Jumpʼejl ejemplo, cheʼ bʌ an majqui wen cʼam, jiñi ochemoʼ bʌ ti jiñi Comité muʼ bʌ i pejcan doctorob ti ora miʼ coltañob jiñi hermanojob, i an i tajol tiʼ yojlil acʼʌlel. Pero jiñi ancianojob yicʼot jiñi i familiajob mucʼʌch i yʌcʼob ti ñaxan i wenlel jiñi hermanojob come añob i pʼuntaya.

⁸ Cheʼ jaʼel, jiñi ancianojob miʼ chaʼleñob coltaya tiʼ melol jiñi i Yotlel tac tempa bʌ yicʼot yan tac bʌ, i miʼ chaʼleñob coltaya cheʼ bʌ miʼ yujtel wocol bajcheʼ yujquel o yan tac bʌ. Cheʼ jaʼel, miʼ wen aqʼueñob i yorajlel chaʼan miʼ chaʼleñob cʌntesa, miʼ coltañob yicʼot miʼ ñuqʼuesʌbeñob i pusicʼal jiñi hermanojob yaʼ ti congregación. Jin chaʼan, joñonla yom mi lac subeñob jiñi ancianojob yicʼot jiñi i familia chaʼan weñʌch chuqui woliʼ melob. La com chaʼan Jehová miʼ yʌcʼ i bendición chaʼan pejtelel chuqui woliʼ melob. Pero yomʌch pʼisbilob tiʼ yeʼtel jaʼel. Mach yomic ñumeñix ti pʼis miʼ yʌqʼueñob i yorajlel jiñi i yeʼtel ti congregación i maʼañix miʼ wen qʼuelob i familia.

9. Cheʼ bajcheʼ miʼ yʌl Filipenses 2:4, 5, ¿bajcheʼ yilal bʌ lac ñaʼtʌbal yom mi lac taj jiñi xñoptʼañonbʌla?

⁹ (Pejcan Filipenses 2:4, 5). I sujmʌch chaʼan mach luʼ ancianojoñicla, pero ti lac  pejtelel miʼ mejlel laj cʌn lac mel cheʼ bajcheʼ tsiʼ mele Jesús. Jiñi Biblia miʼ yʌl chaʼan «tsaʼ ochi bajcheʼ juntiquil xyaj eʼtel» (Filip. 2:7). ¿Chuqui miʼ pʌsbeñonla ili tʼan tac? Juntiquil wem bʌ xʼeʼtel miʼ chaʼlen wersa i tijicñesan i yum. Joñonla xʼeʼtelonla i chaʼan Jehová yicʼot xcoltayajonla i chaʼan la quermañujob, jin chaʼan la com lac ñumen mel chuqui tac wem bʌ tiʼ tojlel Jehová yicʼot tiʼ tojlel la quermañujob. ¿Bajcheʼ miʼ mejlel lac mel? Laʼ laj qʼuel.

10. ¿Chuqui yom bʌ mi lac wen qʼuel ti lac tojlel?

¹⁰Wen qʼuele bajcheʼ yilalet. Cʼajtiben a bʌ: «¿Comʌch ba j cʌy chuqui tac mic mulan chaʼan mij coltan yañoʼ bʌ? ¿Bajcheʼ cʌlʌ cheʼ muqʼuic c subentel chaʼan mic julaʼtan juntiquil hermano ñoxix bʌ o chaʼan mic pʌy majlel ti tempa bʌ juntiquil hermana ñoxix bʌ? ¿Ti ora ba mi cʌl chaʼan mi caj c chaʼlen coltaya tiʼ sʌqʼuesʌntel baqui miʼ yujtel jiñi colem tempa bʌ o tiʼ cʌntʌntel jiñi i Yotlel tempa bʌ?». Cheʼ bʌ tsaʼ la cʌcʼʌ lac bʌ ti Jehová, tsaʼ lac sube chaʼan mi caj laj cʼʌn pejtelel chuqui an lac chaʼan chaʼan mi lac melben i yeʼtel, i yaʼ ochem jiñi lac tiempo yicʼot chuqui tac an lac chaʼan. Jin chaʼan, Jehová wen tijicña miʼ yubin cheʼ bʌ mi laj cʼʌn chaʼan mi laj coltan yañoʼ bʌ. Pero ¿chuqui yom mi lac mel mi tsaʼ laj qʼuele chaʼan anto chuqui yom mi lac tojʼesan ti lac tojlel?

11. ¿Bajcheʼ miʼ mejlel i coltañonla jiñi oración chaʼan mi lac mulan laj coltan yambʌlob?

¹¹Pejcan Jehová ti jumpʼejl a pusicʼal. Mi tsaʼ qʼuele chaʼan anto chuqui yom maʼ tojʼesan pero mach a womic a mel, pejcan Jehová ti jumpʼejl a pusicʼal. Suben bajcheʼ yubil maʼ wubin i cʼajtiben jiñi a «pʼʌtʌlel yicʼot jiñi i mulʌntel i melol chuqui miʼ mulan» (Filip. 2:13).

12. ¿Bajcheʼ miʼ mejlel i coltañob i yorganización Jehová jiñi chʼitoñobto bʌ chʼʌmʌlix bʌ i chaʼañob jaʼ?

¹² ¿Chʼitoñetto ba i tsaʼix a chʼʌmʌ jaʼ? Suben Jehová chaʼan miʼ coltañet chaʼan maʼ mulan a ñumen chaʼlen eʼtel yaʼ ti congregación. An baqui ñumen an ancianojob i mach cabʌlobic jiñi siervo ministerialob, i cabʌlob jiñi siervo ministerialob añobix i jabilel chaʼan miʼ yochelob bajcheʼ anciano. Jiñi i yorganización Jehová woliʼ bej colel majlel, jin chaʼan anto yom hermanojob maxto bʌ wen añobic i jabilel chaʼan miʼ coltañob jiñi ancianojob tiʼ cʌntʌntel i tejclum Jehová. Mi mucʼʌch a chaʼlen coltaya baqui i cʼʌjñibal, tijicñayet come mi caj a tijicñesan Jehová, wen bajcheʼ mi caj a cʌjñel i tijicña mi caj a wubin chaʼan woli a coltan yañoʼ bʌ.

13, 14. ¿Chuqui yom mi lac mel chaʼan mi laj coltan la quermañujob? (Qʼuele jiñi dibujo am bʌ tiʼ tejchibal).

¹³Wen qʼuele chuqui i cʼʌjñibal i chaʼan yañoʼ bʌ. Jiñi apóstol Pablo tsiʼ yʌcʼʌ ili ticʼojel tiʼ tojlel jiñi hebreojob: «Mach ñajʌyic laʼ chaʼan laʼ mel chuqui wen yicʼot laʼ tʼoxben yambʌlob chuqui an laʼ chaʼan, come ili majtañʌl tac miʼ wen mulan Dios» (Heb. 13:16). ¡Tsaʼʌch i wen coltayob ili tʼan! Mach cabʌlic ora tsaʼ ñumi i jiñi hermanojob ti Judea tsiʼ cʌyʌyob i yotot, i yeʼtel yicʼot jiñi mach bʌ xñoptʼañobic i familia i tsaʼ putsʼiyob majlel ti wits (Mat. 24:16). Tsiquil chaʼan ti jimbʌ ora wen ñuc i cʼʌjñibal cheʼ miʼ coltañob i bʌ. Mi tsaʼix i jacʼʌyob jiñi i ticʼojel Pablo ti ñaxan chaʼan yom miʼ tʼoxob chuqui añob i chaʼan, mach wen wocolic mi caj i yubiñob chaʼan miʼ ñʌmʼañob yaʼ baqui tsaʼ majliyob.

¹⁴ An i tajol jiñi la quermañujob maʼañic mi caj i subeñonla chuqui i cʼʌjñibalob i chaʼan. Laʼ cu lac ñaʼtan tiʼ tojlel juntiquil hermano viudo bʌ. ¿Yom ba miʼ coltʌntel tiʼ bʌl i ñʌcʼ, chaʼan an baqui miʼ pʌjyel majlel o miʼ coltʌntel yaʼ tiʼ yotot? Tajol maʼañic chuqui miʼ subeñonla come mach yomic i yʌqʼueñonla la queʼtel. Pero mucʼʌch caj i qʼuel ti ñuc cheʼ  muqʼuic laj coltan. Mach yomic mi lac ñaʼtan chaʼan añix majqui mi caj i coltan o chaʼan tiʼ pejtelel ora mi caj i subeñonla chuqui i cʼʌjñibal i chaʼan. Laʼ laj cʼajtiben lac bʌ: «Cheʼ joñoñic wolic ñusan bajcheʼ jiñi, ¿chuqui com chaʼan miʼ melob tic tojlel?».

15. ¿Chuqui yom mi lac mel mi la com laj coltan yañoʼ bʌ?

¹⁵Pʌsʌ chaʼan mucʼʌch i mejlel i cʼajtibeñetob a coltaya. Mi la cʌl chaʼan yaʼ ti laj congregación an hermanojob yicʼot hermanajob yomoʼ bʌ i coltan yañoʼ bʌ tiʼ pejtelel ora. Maʼañic baʼ ora miʼ yʌqʼueñonla la cubin chaʼan woli lac wen aqʼueñob i yeʼtel. La cujil chaʼan mucʼʌch i mejlel laj cʼajtibeñob i coltaya, i la com lac lajiñob. Juntiquil anciano i cʼabaʼ Alan am bʌ 45 i jabilel woliʼ chaʼlen wersa chaʼan miʼ pʌs ili melbalʌl (chaʼlibal). Tiʼ tojlel i yejemplo Jesús, tsiʼ yʌlʌ: «Jesús cabʌl chuqui miʼ mel, pero pejtelel jiñi lac piʼʌlob tsiʼ mulayob ajñel yicʼot i tsaʼʌch i cʼajtibeyob i coltaya. Yujilob chaʼan mucʼʌch i ñaʼtañob tiʼ sujm. Jiñi ñumen com bʌ jiñʌch chaʼan mic sujtel bajcheʼ Jesús i chaʼan jiñi yañoʼ bʌ miʼ qʼueloñob bajcheʼ juntiquil mucʼʌch bʌ i mejlel i cʼajtibeñob i coltaya, uts bʌ yicʼot mucʼʌch bʌ i chʼʌmob ti ñuc».

16. ¿Bajcheʼ miʼ coltañonla Salmo 119:59, 60 chaʼan mi lac chʌn tsajcan majlel i yejemplo Jesús?

¹⁶ Mach yomic mi la cubin lac chʼijyemlel mi maʼañic miʼ mejlel lac lajin Jesús ti toj (Sant. 3:2). Juntiquil alumno mach ñumen ñuquic bajcheʼ jiñi i maestro, pero mi añʌch chuqui miʼ cʌn ti jiñi i sajtemal tac muʼ bʌ i taj yicʼot miʼ chaʼlen wersa i lajin i maestro cheʼ bajcheʼ cʼamel miʼ mejlel, mucʼʌch caj i ñumen cʌn majlel. Cheʼ jaʼel, mi mucʼʌch lac jacʼ muʼ bʌ laj cʌn majlel cheʼ bʌ mi lac chaʼlen estudio yicʼot mi lac chaʼlen wersa chaʼan mi lac tojʼesan jiñi lac sajtemal mucʼʌch caj i mejlel lac lajin tsaʼ bʌ i mele Jesús (pejcan Salmo 119:59, 60).

17, 18. ¿Chuqui ti wenlel mi caj lac taj cheʼ mi lac lajin bajcheʼ tsiʼ chaʼle coltaya Jesús?

¹⁷ Cheʼ mi lac chaʼlen coltaya cheʼʌch mi caj i melob jaʼel jiñi yañoʼ bʌ. Juntiquil anciano i cʼabaʼ Tim miʼ yʌl: «Yaʼ ti lon j congregación, an hermanojob xcolelobto bʌ añʌch bʌ i chaʼleyob wersa i tsaʼix sujtiyob ti siervo ministerial, junchajp tsaʼ bʌ i coltayob jiñʌch cheʼ tsiʼ qʼueleyob chaʼan jiñi yañoʼ bʌ miʼ chaʼleñob coltaya i tsaʼ caji i lajiñob. Jiñi wem bʌ i melbalob miʼ coltan jiñi congregación yicʼot jiñi ancianojob».

¹⁸ Ila ti Pañimil cabʌlob mucʼ jach bʌ i bajñel ñaʼtañob i bʌ, pero joñonla mach choʼoñicla bajcheʼ jiñi. Mi lac wen qʼuel ti ñuc pejtelel tsaʼ bʌ i mele Jesús chaʼan miʼ coltan yañoʼ bʌ i la comʌch lac lajin. I sujmʌch chaʼan maʼañic miʼ mejlel lac mel ti toj, pero mucʼʌch i mejlel lac tsajcʌben i melbal yicʼot lac xucʼtʌlel (1 Ped. 2:21). Mi mucʼʌch lac chaʼlen wersa bajcheʼ cʼamel mi lac mejlel chaʼan mi lac lajin bajcheʼ tsiʼ chaʼle coltaya Jesús, tijicña mi caj la cubin cheʼ la cujil chaʼan utsʼat miʼ qʼuelonla Jehová.