1. San den sama di e dini Yehofa e du?

 OMEN ondoo yali pasa, a Wowtu fu Gadu be taki ‘den sama di e dini Gadu be o de kabakaba’ fu du san en Manpikin taki (Ps. 110:3). Wi e si fa a polofeititoli ya e kon tuu aini a ten ya. Ala yali a omen miliyun yuu a foluku fu Yehofa e du a peleikiwooko. A ná sama e musu den fu du a wooko ya. Den nai fende moni fi en tu, toku den e du en anga piisii. Ma a ná peleiki namo den e peleiki. Den e koboloiki den ten anga den kaakiti fu holibaka gi den baala anga sisa fu den. Den baala di e teke fesi, e teke omen yuu ala wiki fu seeka gi den komakandaa. Den e du ala san den poi fu toosutu den baala anga sisa aini a kemeente tu. Saide den sama di e dini Yehofa e du den sani ya? A di den lobi Yehofa anga taa sama.​—Mat. 22:37-39.

2. Enke fa Romesama 15:1-3 e soi, da fa Yesesi be e tyai enseefi di a be de a goontapu ya?

² Di Yesesi be de a goontapu ya, a be soi kiin taki ai booko en ede anga taawan. Ala sama di e dini Yehofa mu meke moiti fu du sani enke Yesesi. (Leisi Romesama 15:1-3.) A omen wini wi o fende te wi e du a sani ya. Yesesi be taki: ‘Te wan sama e gi taawan sani, ai de koloku moo enke te taawan e gi en sani.’​—Toli 20:35.

3. San wi o luku aini a artikel ya?

³ Aini a artikel ya, wi o luku wantu fasi fa Yesesi be soi  taki den sani di taawan abi fanowdu, be pelensipali gi en moo enke san enseefi be abi fanowdu. Wi o luku tu fa u sa waka neen baka, anga san u sa du efu u nai fii fu yeepi taawan a sani.

4. Fa Yesesi soi taki a be e si den sani di taawan abi fanowdu pelensipali moo enke san enseefi be abi fanowdu?

⁴ Winsi Yesesi be weli, toku a be e holi taawan a pakisei. Pakisei fa Yesesi be e fii di wan gaan kulu sama go miti en a wan mongo di be de koosube a Kaperna-um. Yesesi be musu weli, bika a hii neti de a be de anga ain e begi en Dda. Ma di a si den sama, tyali fu den kisi en. Yesesi deesi den sama di be siki. Baka dati a holi wan fu den moo moin lezing di Beibel e taki fi en.​—Luk. 6:12-20.

5. Fa osufamii edeman e soi taki den e waka a Yesesi baka?

⁵ Osufamii edeman sa waka a Yesesi baka. Meke u taki na a kaba fu wan wooko dei, a dda doo a osu weliweli. Ma na a neti de den mu du a Osufamii Anbegi. Fu di a á wani diipi en go a wan taa dei, meke ai akisi Yehofa fu gi en a kaakiti di a abi fanowdu. Yehofa aliki a begi fi en, neen meke en anga en osufamii e holi a Osufamii Anbegi enke fa den be gwenti. A sani di a du ya leli den pikin taki den sani di den mu du gi Yehofa pelensipali moo iniiwan taa sani, winsi den weli.

6. Gi wan toli di e soi taki Yesesi be de kabakaba fu yeepi taawan winsi enseefi be abi booko-ede.

⁶ Yesesi be e koboloiki en ten fu yeepi taawan. Fa i denki Yesesi be e fii di a yee taki en mati, Yohanisi a Dopuman dede? Te go taki a ná siki a siki neen a dede, a sama kii en a wan ogii-ati fasi. A sani ya be musu hati Yesesi. Beibel e taki: ‘Di Yesesi yee san pasa, a teke boto fu go a wan koo peesi, bika a be wani de en wawan’ (Mat. 14:10-13). Wi e fusutan saide Yesesi be wani de en wawan. Gaanse sama á lobi de aini sama ini te den e tyali. Ma fosi Yesesi doo pe a be e go, wan gaan kulu sama be de ape e wakiti en. San a du? A poti den fii fi en a wan se,  neen a luku san den sama be abi fanowdu. Te a be e luku den a be e si taki den be abi toosutu fanowdu, neen meke a be de kabakaba fu yeepi den. Winsi fa Yesesi be wani de en wawan, toku a á leli den sama wantu sani gawgaw, da a sende den gwe. Beibel taki ‘a leli den omen sani’.​—Malik. 6:31-34; Luk. 9:10, 11.

7-8. Fa owluman e soi taki den e waka Yesesi baka?

⁷ Owluman e meke moiti fu waka a Yesesi baka. Wi e teke a taanga wooko di den owluman e du fu bigi. Gaanse fu u nai sabi seefi on fuu den owluman e du gi den baala anga sisa aini a kemeente. Wan fasi fa owluman e yeepi den baala anga sisa, a te wan sama siki. Te wan baala efuso sisa de na ati-osu, da den baala fu a Ati-osu Komte e seeka sani gawgaw fu go yeepi en. Son yuu a gaan mama neti den abi fu komoto a osu fu go na ati-osu. Ma fu di den lobi den baala anga sisa fu den, meke den e du ala san den poi fu yeepi den. Den famii fu den baala ya e holibaka gi den tu.

⁸ A omen taa wooko den owluman e du tu. Den e yeepi anga bow-wooko. Den e yeepi den baala anga sisa te wan gaan ogii pasa a wan peesi tu. Boiti dati, a omen yuu den e teke ala wiki fu seeka gi den kemeente komakandaa, anga fu gi den baala anga sisa taanga-sikin. Wi e gafa den baala ya, anga den osufamii fu den fu a fasi fa den e yeepi taawan. Ma u sabi taki winsi fa owluman e yeepi a kemeente, toku den mu e meke ten gi den osufamii tu. Den á mu e yeepi taawan te da den nai poti pakisei a den osufamii.

9. Enke fa Filipisama 2:4, 5 e soi, da fa wan Kelesten mu e tyai enseefi?

⁹ Leisi Filipisama 2:4, 5. Winsi fa ala wi á poi toon owluman, toku u sa waka a Yesesi baka. Beibel taki ‘Yesesi be kon de enke wan saafu’ (Filip. 2:7). Pakisei san a sani ya wani taki. Wan saafu di e lesipeki a masaa fi en e du ala san a poi fu meke en masaa piisii. Efu wi e si useefi enke saafu fu Yehofa, wi o du ala san u poi fu yeepi den baala anga sisa fu u. Aini den paragraaf di e kon, wi o poti pakisei a wantu sani di i sa du fu moo yeepi taawan.

10. Sowtu akisi i sa poti gi iseefi?

¹⁰ Ondoosuku iseefi luku. Akisi iseefi taki: ‘Mi de kabakaba fu fika wan sani di mi be wani du fu yeepi taawan? San mi be o du efu den akisi mi fu go luku wan gaandi baala di e tan a gaansama peesi, efuso fu go teke wan gaandi sisa tyai go a komakandaa? Te den e suku sama fu kiin a Kownukondee zaal efuso den peesi pe den e holi gaan komakandaa, mi a wan fu den sama di e go poti mi nen? Yehofa e piisii te i de kabakaba fu gi i ten anga i kaakiti fu yeepi taawan. Kande di yu ondoosuku iseefi i si taki i sa du moo. San i sa du te i si a sani ya?

11. Fa begi o yeepi u fu de kabakaba fu yeepi taawan?

¹¹ Begi Yehofa fayafaya. Baka te yu ondoosuku iseefi, yu o si san i mu kengi. Ma san i mu du efi i nai fii fu kengi a fasi fa i be e du sani? A fosi sani, a fu taigi Yehofa fa yu e fii. Akisi en fu gi yu ‘a fii anga a kaakiti’ fu du sani di o meke a piisii.​—Filip. 2:13.

12. San yonkuu baala di dopu sa meke moiti fu du?

¹² Efi yu a wan yonkuu baala di dopu, i sa akisi Yehofa fu a gi yu a fii fu du moo aini a kemeente. Aini son kondee, den owluman ipi moo den dinali. Gaanse fu den dinali aini den kondee ya a ná yonkuu baala tu. Ma u sabi taki a olikanisâsi e bigi dei fu dei, neen meke wi abi yonkuu baala fanowdu fu du den somen wooko di de fu du aini den kemeente. Efi i meke moiti fu du moo aini a kemeente, Yehofa o piisii anga i. Den baala anga sisa o lobi i tu. Boiti dati, yu o piisii fu di yu e yeepi taawan.

13-14. Fa u sa yeepi u baala efuso sisa te den fuka? (Luku a fowtow a fesise fu A Wakititolen.)

¹³ Suku fasi fu yeepi taawan. Apostel Pawlesi be taigi den Hebrew Kelesten taki: ‘Wi á mu feegete fu e du bun. Wi á mu feegete fu e paati san wi abi anga taawan tu. Bika Gadu lobi den sowtu ofaandi ya’ (Heb. 13:16). A wan bun sani Pawlesi be taigi den Kelesten ya. Wan pisiten baka di a sende a biifi ya gi den, ‘den be abi fu lowe go a den mongo’. Den be fika den osu, den bisnis, anga den famii fu den di á be e dini Yehofa (Mat. 24:16). A pisiten de den be abi fu e yeepi denseefi fu pasa den dei. Efu den Kelesten ya be meke moiti wooko anga a sani di Pawlesi be taigi den, da a á be o taanga gi den tumisi fu yeepi taawan baka di den lowe go a taa foto.

¹⁴ A ná ala yuu den baala anga sisa fu wi o go e taigi u taki den abi yeepi fanowdu. Meke u taki a uman fu wan baala lasi libi. A baala o abi sama fanowdu fu yeepi en boli, kiin osu, efuso du taa wooko. Kande a ná o taigi sama taki a  abi yeepi fanowdu fu di a á wani sama fuka gi en. Ma a be o teke en fu bigi efu useefi luku fa u sa yeepi en sondee fu a akisi u. Wi á mu denki taki fu di wan sama e dini Yehofa da a ná abi yeepi fanowdu. U mu holi a pakisei tu taki a ná ala sama lobi akisi taawan fu yeepi den a sani. A bun fu akisi useefi taki: ‘Efu a mi sowan sani be miti, san mi be o wani taawan du gi mi?’

15. San u mu du efu u wani taawan e kon a u te den abi yeepi fanowdu?

¹⁵ Sama á mu e feele fu kon a yu. Ala u sabi wan baala efuso sisa di de kabakaba fu yeepi taawan ala yuu. Noiti den sowtu baala efuso sisa ya e meke taawan fii enke den ná abi ten gi den. Ala sama sabi taki solanga den abi yeepi fanowdu den sa go a den. Ala u mu meke moiti fu abi a manii ya. Alan, wan owluman di pasa 40 yali, di e meke moiti fu abi a manii ya taki: ‘Te i luku a libi fu Yesesi, da a omen sani a be e abi fu du ala dei. Toku sama á be e feele fu go neen, bika den be e fii taki a abi ten gi den. Den be poi si taki Yesesi e booko en ede anga den tuutuu. Leti enke Yesesi, mi wani den baala anga sisa fu mi fii taki den sa kon a mi te den fuka.’

16. Fa a sani di sikiifi a Psalm 119:59, 60 o yeepi u fu waka a Yesesi baka?

¹⁶ Wi á mu lasi-ati te u si taki wi á poi du ala sani pilisisi enke Yesesi (Yak. 3:2). Wan sama di e leli wan wooko ná o poi du en pilisisi enke a sama di e leli en a wooko, a go e meke fowtu. Ma efu ai leli wan sani fu den fowtu di ai meke, a o du en wooko moo bun. A mu e luku fa a sama di e leli en a wooko e du sani tu. Efu u wani waka a Yesesi baka, u mu e  meke moiti ala yuu fu e du den sani di wi e leli aini Beibel. Te u si taki u mu kengi wan sani, wi á mu daaidaai fu du en.​—Leisi Psalm 119:59, 60.

17-18. Sowtu wini wi o fende te wi e meke moiti fu waka a Yesesi baka?

¹⁷ Te u nai denki useefi namo, wi o go e yeepi taawan ala yuu. Efu wi abi a manii ya, taawan o waka u baka. Wan owluman den e kai Tim taki: ‘A omen yonkuu baala aini a kemeente toon dinali fu di den si fa taawan e du ala san den poi fu yeepi den baala anga sisa. Fu di den yonkuu baala ya de kabakaba fu du san den poi gi taawan, meke a wooko fu den owluman e moo lekiti pikinso.’

¹⁸ Wi e libi aini wan goontapu di e gi sama taanga-sikin fu poti pakisei a denseefi namo. Ma a foluku fu Yehofa e du sani taa fasi, fu di den e meke moiti fu waka a Yesesi baka. Yesesi á be e poti pakisei neenseefi namo, ma ala yuu a be e du san a poi fu yeepi taawan. A tuu taki u ná o poi du sani pilisisi enke en, ma toku u sa meke moiti fu waka neen baka (1 Peit. 2:21). Te wi e du sani enke Yesesi, wi o piisii fu di u sabi taki Yehofa e piisii anga u.