1. Jehova sagokɛlaw be ni kɛcogo ɲuman juman lo ye?

KABI wagatijan, Bibulu tun kɔnna k’a fɔ ko Jehova sagokɛlaw “bena u yɛrɛ di ni diyanye ye” a ka baara la Yezu ka kuntigiya kɔrɔ (Zab. 110:3, NW). Siga t’a la, o kiraya kuma be dafara bi. Saan o saan, Jehova sagokɛlaw b’u yɛrɛ di waajuli baara kama. U be lɛri miliyɔn caaman kɛ o baara la. U tɛ u sara o baara kama. Nka, a ka di olu yɛrɛ lo ye k’a kɛ. U be wagati ta fana k’u balimaw dɛmɛ u k’u makoɲɛfɛnw sɔrɔ, u b’u jija ani k’u ka limaniya barika bonya. Diinan mɔgɔkɔrɔw ni kɔrɔsigi cidenw be lɛri caaman kɛ ka kalanw labɛn lajɛnw kama ani k’u balimaw jija. Mun lo be Jehova sagokɛlaw lasun k’o baaraba kɛ? U b’o kɛ sabu u be Jehova n’u mɔgɔɲɔgɔn kanu.—Mat. 22:37-39.

2. Ka kɛɲɛ ni Ɔrɔmukaw 15:1-3 ka fɔta ye, Yezu ye ɲɛyirali juman lo to an ye?

² Yezu y’a yira ko a b’a janto kosɔbɛ mɔgɔ wɛrɛw makow la ka tɛmɛ a yɛrɛ taw kan. An b’an seko bɛɛ kɛra walisa k’a ladegi (Ɔrɔmukaw 15:1-3 kalan). N’an b’o kɛ, o b’an nafa. Yezu y’a fɔ ko: “Nisɔndiya be mɔgɔ sɔnni na ka tɛmɛ sɔrɔli kan.”—Kɛw. 20:35.

3. An bena mun lo lajɛ barokun nin na?

³ Barokun nin na, an bena koo dɔw lajɛ Yezu ye minw kɛ walisa ka mɔgɔ wɛrɛw dɛmɛ ani an bena a ye an be se k’a ladegi cogo minw na. An bena a ye fana cogo min na  an be se k’a ɲini ka tɔɔw mako ɲɛ n’an dusu bɛɛ ye.

4. Yezu y’a yira cogo di ko a b’a janto mɔgɔ wɛrɛw makow la ka tɛmɛ a yɛrɛ taw kan?

⁴Yezu ye mɔgɔ wɛrɛw dɛmɛ hali k’a sɔrɔ a tun sɛgɛnnin lo. Miiri k’a filɛ Yezu ye min kɛ tuma min na jamaba dɔ nana a sɛgɛrɛ kulu dɔ gɛrɛfɛ. N’a sɔrɔ o kɛra Kapɛrnaum dugu gɛrɛfɛ le. Yezu tun ye suu kuru bɛɛ kɛ delili la. N’a sɔrɔ a tun sɛgɛnnin lo kosɔbɛ. Nka tuma min na a ye o jamaba ye, fantanw ni banabagatɔ minw tun b’u cɛma, a makarila u la. A ye banabagatɔw kɛnɛya. Ka fara o kan, a ye kalan barikaman dɔ kɛ o kulu kan min ye mɔgɔw jija kosɔbɛ. O kalan ɲɔgɔn ma deli ka kɛ ka ye.—Luka 6:12-20.

5. Sotigiw be Yezu ka yɛrɛsaraka hakili ladegi cogo di n’u sɛgɛnnin lo?

⁵Sotigiw be Yezu ladegi cogo min ma. Miiri k’a filɛ: sotigi dɔ ye baara kɛ tile kuru bɛɛ kɔnɔ ani a sɛgɛnninba kɔsegira soo. U ka gwa kɔnɔ batoli be yen o loon sufɛ ani n’a sɔrɔ a b’a fɛ k’o lasa. Nka, a be Jehova deli a ka fanga di a ma walisa a ka se k’o batoli ɲɛminɛ. Jehova b’a ka delili jaabi ani u be o batoli kɛ i ko u be deli k’a kɛ cogo min na. U deenw be kalan nafaman dɔ sɔrɔ o loon sufɛ. O ye ko u bangebagaw fɛ, Alakow kɔrɔtanin lo ka tɛmɛ fɛɛn bɛɛ kan.

6. Ɲɛyirali dɔ fɔ k’a yira cogo min na Yezu y’a ka wagati ta ka tɔɔw dɛmɛ.

⁶Yezu tun b’a ka wagati ta ka tɔɔw dɛmɛ. Tuma min na a y’a mɛn ko u y’a teri Zan Batizelikɛla kuun tigɛ, miiri k’a filɛ o ye min kɛ a la! Siga t’a la, a dusu kasira yɛrɛ le! Bibulu b’a fɔ ko: “Yezu ye Zan fagako mɛn tuma min na, a bɔra o yɔrɔ la. A kelen donna kurun kɔnɔ ka taga yɔrɔlakolon dɔ la.” (Mat. 14:10-13). An b’a faamu fɛɛn min kama Yezu tun b’a fɛ ka to a kelen. N’an ka mɔgɔ dɔ sara, an caaman b’a fɛ k’o dusukasi kɛ an kelen. Nka Yezu ma wagati sɔrɔ k’o kɛ. A tun be tagara yɔrɔ min na, jamaba dɔ kɔnna a ɲɛ yen. Yezu ye mun lo kɛ do? A miirila o jamaba makoya la ani “u hinɛ donna a la.” A y’a faamu ko u  mako gwɛlɛ be dɛmɛ na Alako ta fan fɛ. O kama, a sinna k’u dɛmɛ. A m’u kalan fɛɛn damanin dɔrɔn na, nka, “a y’a daminɛ k’u kalan fɛɛn caaman na.”—Mariki 6:31-34; Luka 9:10, 11.

7-8. Ɲɛyirali dɔ fɔ min b’a yira diinan mɔgɔkɔrɔ kanutigiw be Yezu ladegi cogo min na ni kafoden dɔ mako be dɛmɛ na.

⁷Diinan mɔgɔkɔrɔ kanutigiw be Yezu ladegi cogo min na. Diinan mɔgɔkɔrɔw be u yɛrɛ di ka baara min kɛ an nafa kosɔn, an be u waleɲuman lɔn kosɔbɛ o la. U be baaraba min bɛɛ kɛra, kafodenw fanba t’o kala ma. Balima minw be dɛmɛ don jolintanya furakɛli koo la (CLH), olu be sin k’u balimaw dɛmɛ ni bana cunna u kan. Tuma caaman na, bana be cun balimaw kan dugutilama le. Nka, o diinan mɔgɔkɔrɔ kanutigiw n’u ka denbaya mɔgɔw be makari u balimaw na gwɛlɛya wagati la. O kama, u be u janto o balimaw makow la ka tɛmɛ u yɛrɛ taw kan.

⁸ Diinan mɔgɔkɔrɔw be dɛmɛ don fana Masaya Boonw n’a ɲɔgɔnnaw lɔli baara la ani u be balimaw dɛmɛ ni balawo cunna u kan. Ka fara o kan, an ka kafo diinan mɔgɔkɔrɔw be u ka wagati caaman ta ka an kalan, k’an jija ani k’an dɛmɛ. An ka ɲi k’an kɔnɔ gwɛ k’o balimaw n’u ka denbaya mɔgɔw tando. U be jijali minw kɛra walisa k’an dɛmɛ, Jehova ka u duga o kosɔn. Nka, diinan mɔgɔkɔrɔw ani an bɛɛ yɛrɛ ka ɲi ka koow kɛ ka dama kɛɲɛ. U man ɲi k’u ka wagati bɛɛ kɛ Alako baaraw la, fɔɔ u tɛ wagati sɔrɔ k’u janto u ka denbaya mɔgɔw la.

9. Ka kɛɲɛ ni Filipikaw 2:4, 5 ye, kerecɛnw bɛɛ ka ɲi ka kɛ ni miiriya juman lo ye?

⁹ Filipikaw 2:4, 5 kalan. Tiɲɛn lo ko an bɛɛ tɛ diinan mɔgɔkɔrɔw ye. Nka, an bɛɛ be se k’a ɲini ka Yezu ka yɛrɛsaraka hakili ladegi. Bibulu b’a fɔ ko a ye “jɔɔn cogo ta.” (Filip. 2:7). Miiri k’a filɛ an be kalan min sɔrɔ o koo la. Jɔɔn wala baaraden ɲuman be sababuw ɲini walisa k’a koo diya a matigi ye. An ye Jehova ka jɔɔnw ye ani an be baara kɛ an balimaw nafa kosɔn. O kama, an b’a fɛ ka Jehova dusu diya kosɔbɛ ani k’an balimaw mako ɲɛ bɛrɛbɛrɛ. An be se k’o kɛ an kɛtɔ ka ladili nɔfɛtaw sira tagama.

10. An be se k’an yɛrɛ ɲininga mun ni mun lo la?

¹⁰I ka miiriyaw sɛgɛsɛgɛ. I be se k’i yɛrɛ ɲininga ko: “Yala n’ be sɔn ka n’ yɛrɛ di ka tɔɔw dɛmɛ wa? Misali la, n’ bena mun lo kɛ n’u y’a ɲini n’ fɛ ko n’ ka taga bɔ balima cɛkɔrɔba dɔ ye mɔgɔkɔrɔbaw ladonyɔrɔ dɔ la, wala ko n’ ka balima musokɔrɔba dɔ ta ka na lajɛnw na? Yala n’ ka teli ka n’ yɛrɛ di ka dɛmɛ don ka lajɛnba yɔrɔ wala Masaya Boon saniya wa?” An y’an yɛrɛkun di Jehova ma minkɛ, an y’an daa di ko anw wo, an bololafɛnw wo, u bɛɛ ye Jehova ta ye. N’an be baara kɛ n’an bololafɛnw ani an ka wagati ye ka an balimaw mako ɲɛ, o ka di Jehova ye. N’an y’a ye ko an ka ɲi ka yɛlɛmani don koo dɔw la, an be se ka mun lo kɛ do?

11. Delili be se k’an dɛmɛ cogo di ka kɛ ni yɛrɛsaraka hakili ye?

¹¹Jehova deli n’i dusu bɛɛ ye. N’i y’a ye ko i ka ɲi ka yɛlɛmani don koo dɔw la, nka o kɛ lɔgɔ t’i la do? N’o lo Jehova deli n’i dusu bɛɛ ye. I kɔnɔ gwɛ a ye. I dusukunnakow fɔ a ye ani a deli ko a ka o koo ‘kɛli nigɛ don i la k’a kɛ see di i ma.’—Filip. 2:13.

12. Balima kanbele min batizera, ale be se ka dɛmɛ don a ka kafo kɔnɔ cogo di?

¹² N’i ye kanbele ye ani i batizera, Jehova deli a k’i dɛmɛ i k’a ɲini ka dɛmɛ don bɛrɛbɛrɛ i ka kafo kɔnɔ. Jamana dɔw la, diinan mɔgɔkɔrɔw ka ca ni kɔrɔsigi cidenw ye. O kɔrɔsigi cidenw fanba sii hakɛ ka ca wala u kɔrɔnin lo. Dɔ be farala Jehova Seerew hakɛ kan minkɛ, an mako be kanbele caaman na walisa ka diinan mɔgɔkɔrɔw dɛmɛ u k’u janto Jehova sagokɛlaw la. U mako b’i la ka baara o baara kɛ, n’i b’i yɛrɛ di k’o kɛ, i bena ninsɔndiya sɔrɔ. Mun na do? Sabu i bena Jehova dusu diya, i bena tɔgɔ ɲuman sɔrɔ ani i bena ninsɔn diya sabu i be tɔɔw dɛmɛ.

13-14. An be se ka koo tigitigi jumanw lo kɛ k’an balimaw dɛmɛ? (Jaa lajɛ ɲɛɛ fɔlɔ kan.)

¹³Kɔrɔsili kɛ k’a filɛ ni mɔgɔ dɔ mako be dɛmɛ na. Kerecɛn minw tun be Zude mara la, Pol ye u jija ko: “Aw kana ɲinɛ ka ɲumanya kɛ, ani ka ɲɔgɔn dɛmɛ. O saraka nunu ɲɔgɔn le ka di Ala ye.” (Eburuw 13:16). O tun ye ladili ɲuman yɛrɛ le ye! O lɛtɛrɛ sɔrɔnin kɔ a ma mɛɛn, Zude balimaw tun ka ɲi k’u ka soow, u ka baara n’u somɔgɔ dannabaliw to yen ani “ka boli ka taga kuluyɔrɔw la.” (Mat. 24:16). O wagati la, siga t’a la a tun kɔrɔtanin lo kosɔbɛ o balimaw ka ɲɔgɔn dɛmɛ. Pol tun ye ladili di u ma ko u ka u bololafɛnw tilan ni ɲɔgɔn ye. Ka kɔn kɔrɔbɔli ɲɛ, n’u tun be o ladili sira tagamana, a tun tɛna gwɛlɛya u ma ka deli u ka ɲɛnamaya kɛcogo kura la.

 ¹⁴ N’a sɔrɔ an balimaw tɛna a fɔ an ye tuma bɛɛ ko u mako be dɛmɛ na. Misali la, balimamuso dɔ sara k’a cɛɛ to yen. Yala o balimacɛ mako b’a la dɔ ka tobili kɛ a ye, k’a ta ka taga yɔrɔ dɔ la wala ka sokɔnɔ baara dɔw kɛ a ye wa? N’a sɔrɔ a tɛna foyi fɔ an ye sabu a t’a fɛ k’an sɛgɛn. Nka, a bena diya a ye kosɔbɛ n’an y’a latigɛ k’a dɛmɛ sanni a k’o ɲini an fɛ. An man ɲi k’a miiri ko mɔgɔ wɛrɛ bena o kɛ a ye wala ko n’a mako b’an na tuma o tuma a bena o fɔ an ye. I yɛrɛ ɲininga ko: “Ni n’ tun b’a nɔɔ na, a tun bena diya n’ ye u ka mun lo kɛ n’ ye?”

15. Walisa ka kɛ ni yɛrɛsaraka hakili ye, an ka ɲi ka mun lo kɛ?

¹⁵Kana a to tɔɔw ka siran ka dɛmɛ ɲini i fɛ. N’a sɔrɔ i be balima dɔw lɔn i ka kafo kɔnɔ minw labilanin lo tuma bɛɛ ka tɔɔw dɛmɛ. U t’a to an b’a miiri fewu ko an b’u sɛgɛnna. An b’a lɔn ko an be se k’an jigi la u kan gwɛlɛyaw wagati la ani an b’a fɛ k’u ladegi. Alan be ni saan 45 ye ani diinan mɔgɔkɔrɔ lo. A t’a fɛ mɔgɔw ka siran ka dɛmɛ ɲini a fɛ. A miirila Yezu ka ɲɛyirali la ani a ko: “Yezu bolo tun degunnin lo. Nka denmisɛnw wo, mɔgɔkɔrɔbaw wo, u si tun tɛ siran ka gwɛrɛ a la ani ka dɛmɛ ɲini a fɛ. U tun b’a lɔn ko Yezu b’a janto u la sɔbɛ la. N’ b’a fɛ ni n’ dusu bɛɛ ye ka Yezu ladegi. N’ b’a fɛ mɔgɔw k’a ye ko n’ b’u kanu, n’ be n’ janto u la ani n’ t’a fɛ u ka siran ka gwɛrɛ n’ na.”

16. Min fɔra Zaburuw 119:59, 60 kɔnɔ n’an b’o sira tagama, o b’an dɛmɛ cogo di ka Yezu ladegi koɲuman?

¹⁶ N’an tɛ sera ka Yezu ladegi cogo dafanin na, an man ɲi k’an fari faga (Zaki 3:2). Kalanden tɛ se k’a ka kalanfa  ka baara ladegi cogo dafanin na. Nka, a be fili minw kɛ n’a be kalan sɔrɔ u la ani n’a b’a jija k’a ka kalanfa ladegi koɲuman, a bena to ka ɲɛtaga kɛ. O cogo kelen na, an ye min faamu an ka kelenna kalan na, an ka koow kɛ ka kɛɲɛ n’o ye. An ye fili minw kɛ, an k’an seko bɛɛ kɛ fana ka kalan sɔrɔ u la. O la, an bena se ka Yezu ladegi koɲuman.—Zaburuw 119:59, 60 kalan.

17-18. N’an be Yezu ka yɛrɛsaraka hakili ladegi, nafa jumanw lo b’o la?

¹⁷ N’an be ni yɛrɛsaraka hakili ye, o bena mɔgɔ wɛrɛw lasun k’an ladegi. Diinan mɔgɔkɔrɔ dɔ tɔgɔ ko Tim ani a ko: “Balima kanbele minw sii hakɛ man ca, u dɔw kɛra kɔrɔsigi cidenw ye. Kuun minw kama u ye saratiw dafa, u dɔ ye ko u y’a ye cogo min na balima dɔw tun labilanin lo ka tɔɔw dɛmɛ ani u y’a ɲini k’u ladegi. O balima kanbelew be dɛmɛ don kafo kɔnɔ ani u be diinan mɔgɔkɔrɔw fana dɛmɛ kosɔbɛ.”

¹⁸ Duniɲa kɔnɔ bi, mɔgɔ caaman be miiri u yɛrɛ nafa dɔrɔn lo la. Nka, Jehova sagokɛlaw be dan na. Yezu ka yɛrɛsaraka hakili ye nɔɔ to an kan ani an jijanin lo k’a ladegi. Tiɲɛn lo, an tɛ se k’a ladegi cogo dafanin na. Nka, an be se ka ‘tugu a sennɔ kɔ’ koɲuman (1 Piyɛri 2:21, Biblu Ala ta Kuma). N’an b’an seko bɛɛ kɛ ka Yezu ka yɛrɛsaraka hakili ladegi, an bena ninsɔndiya sɔrɔ sabu an be Jehova dusu diyara.