1. Ebɛn suban pa na Jehovah n’asomfo da no edzi?

 BIBLE no kãe too hɔ dadaada dɛ Nyankopɔn n’asomfo “dze hɔnho bɛma ɔpɛdo” asom Jehovah wɔ Jesus n’akwankyerɛ ase. (Ndw. 110:3) Yebotum akã esi no pi dɛ dɛm nkɔnhyɛ no enya ne mbamu ndɛ. Afe biara, Jehovah n’asomfo a wɔyɛ nsi dze ndɔnhwer ɔpepem pii yɛ asɛnka edwuma no. Hɔnankasa na wofi hɔn pɛ mu yɛ dɛm edwuma yi na wɔnngye akatua biara. Ber kor no ara so, wɔgye mber boa hɔn nuanom ma hɔn nsa ka dza wohia, wɔhyɛ hɔn nkuran na wɔboa hɔn ma wɔnye Jehovah nya ebusuabɔ papa. Asafo mu mpanyimfo nye asomfo dze ndɔnhwer pii siesie hɔnho ansaana wɔakɔ asafo nhyiamu anaa wɔakɛsera hɔn nuanom ahyɛ hɔn nkuran. Ebɛnadze na ɔka hɔn ma wɔyɛ iyinom nyina? Ɔyɛ ɔdɔ. Wɔdɔ Jehovah nye hɔn nuanom.​—Matt. 22:37-39.

2. Dɛ mbrɛ wɔakã ho asɛm wɔ Romefo 15:1-3 no, ebɛn nhwɛdo na Jesus yɛe?

² Jesus daa no edzi dɛ ɔdze afofor hɔn ehiadze dzi kan. Iyi yɛ nhwɛdo pa ma hɛn. Yɛreyɛ dza yebotum biara dɛ yebosũasua dza ɔyɛe no. (Kenkan Romefo 15:1-3.) Sɛ yɛyɛ dɛm a, yebenya nhyira pii. Jesus kãa dɛ: “Ɔma yɛ nhyira kyɛn ɔgye.”​—Andw. 20:35.

3. Ebɛnadze na yebosusu ho wɔ adzesua yi mu?

³ Adzesua yi mu no, yɛbɔhwɛ ndzɛmba ahorow bi a Jesus dze bɔɔ afɔr mbrɛ ɔbɛyɛ a ɔdze afofor hɔn ehiadze bedzi kan. Yɛbɛsan ahwɛ dza yebotum ayɛ dze esũasua no nhwɛdo no. Afei so, yɛbɔhwɛ dza ɔbɔboa hɛn ma yeenya ɔpɛ a no mu yɛ dzen dɛ yɛbɔsom hɛn nuanom.

4. Ebɛnadze na Jesus yɛe dze kyerɛɛ dɛ ɔdze afofor hɔn ehiadze dzi kan?

⁴ Jesus boaa afofor ber mpo a nna ɔaberɛ no. Nyimpadodow bi kɔr Jesus ne nkyɛn wɔ bepɔw bi do. Obotum aba dɛ nna hɔ bɛn Capernaum. Hom mma yɛnhwɛ dza Jesus yɛe. Nna Jesus abɔ mpaa anafua mũ no nyina. Ɔbɛyɛ dɛ nna ɔaberɛ paa naaso aber a ohun nyimpadodow no, ne yamu hyehyee no maa ehiafo nye ayarfo a nna wɔwɔ hɔn mu no. Jesus saa hɔn a wɔyar no yarba na ɔmaa ɔkasa bi. Sɛ yɛkã ɔkasa ahorow a ɔhyɛ nkuran paa a, dɛm ɔkasa yi ka ho bi. Wɔfrɛ dɛm ɔkasa no Bepɔw Do Asɛnka.​—Luke 6:12-20.

5. Sɛ ɔba no dɛ egyanom aberɛ mpo a, ebɛnadze na wɔyɛ dze sũasua Jesus?

⁵ Dza mbusua tsir reyɛ dze esũasua Jesus. Hom mma yɛnhwɛ dɛm asɛm yi: Egya bi apon edwuma aba fie na ɔaberɛ paa, naaso ɔsɛ dɛ ɔnye n’ebusua yɛ Ebusua Som dɛm ewimbir no. Ɔnam dɛ ɔaberɛ ntsi, nkyɛ ɔpɛ dɛ otu hyɛ da. Naaso, ɔbɔ mpaa serɛ Jehovah dɛ ɔmma no ahoɔdzen ma ɔmfa nyɛ adzesua no. Jehovah tsie ne mpaabɔ na adzesua no kɔ do dɛ mbrɛ wɔyɛ no dapɛn biara no. Dza egya no yɛe no maa ne mba no nyaa esuadze tsitsir bi. Wohun dɛ Jehovah no som hia hɔn awofo kyɛn biribiara.

6. Ebɛn kwan do na Jesus dze mber a nna ohia dze ayɛ n’adze no boaa afofor?

⁶ Jesus nyaa mber maa afofor. Ɔwodze dwen ho hwɛ o: Ehwɛ a Jesus tsee nka dɛn aber a ɔtsee dɛ woeku ne nyɛnko John Onumanyi no? Ɔbɛyɛ dɛ no werɛ hoow paa! Bible no kã dɛ: “Jesus tsee [John no wu ho asɛm] no, ɔtwee noho fii hɔ nam hɛn mu kɔr sar do nkyɛn beebi.” (Matt. 14:10-13) Hɛn mu pii wɔ hɔ a, ɔyɛ a yɛpɛ dɛ hɛn nkotsee yɛkɛhyɛ beebi dzi awerɛhow, ntsi sɛ nna Jesus so pɛ dɛ nankotsee kɛhyɛ beebi kedzi awerɛhow a, yɛtse no ase. Naaso Jesus dze, oennya no dɛm. Aber a okodur hɔ no, nna nyimpadodow bi edzi kan wɔ hɔ dada rotweɔn no. Ebɛnadze na Jesus yɛe? Osusuu dza nyimpadodow no hia no ho, “na ne yamu hyehyee no” maa hɔn. Ohun dɛ wohia awerɛkyekyer nye Nyankopɔn no mboa paa, ntsi ntsɛmara na ɔhyɛɛ ase dɛ ɔrekyerɛkyerɛ hɔn Nyankopɔn ho adze. Nokwasɛm  nye dɛ Jesus annkyerɛkyerɛ nyimpadodow no ndzɛmba kakraabi, mbom Bible no kã dɛ, “ɔhyɛɛ ase kyerɛkyerɛɛ hɔn ndzɛmba pii.”​—Mark 6:31-34; Luke 9:10, 11.

7-8. Ma nhwɛdo a ɔkyerɛ dza asafo mu mpanyimfo yɛ dze sũasua Jesus ber a hɔn nua bi hia mboa no.

⁷ Dza asafo mu mpanyimfo a wɔwɔ ɔdɔ no yɛ dze sũasua Jesus. Hɛn enyi sɔ edwumadzen a asafo mu mpanyimfo fi hɔn pɛ mu yɛ dze boa hɛn no paa. Edwumadzen a wɔyɛ dze boa hɛn no, ɔnnyɛ ne nyinara na yehu. Dɛ nhwɛdo no, sɛ ayarsa ho asɛm soɛr awerɛfir mu a, enuanom a wɔsom wɔ Ayarsabea Ntamu Nkitahodzi Egyinatukuw mu no yɛ ntsɛm kɔboa hɔn nuanom. Mpɛn pii no nsɛm a ɔtse dɛm no sisi anafua! Ɔba dɛm a, nna ɔwɔ dɛ wɔdze hɔn nda mpo bɔ afɔr. Naaso, osian ɔdɔ na ayamuhyehye a dɛm asafo mu mpanyimfo yi wɔ ma hɔn nuanom ntsi, wɔkɔboa hɔn aber a hɔnho akyer hɔn no. Ɔyɛ a hɔn mbusua so boa hɔn ma wɔdze hɔn nuanom ehiadze dzi kan.

⁸ Asafo mu mpanyimfo san so boa ma wosisi Ahendzi Asa nye asafo adan afofor. Dɛmara na sɛ atoyerɛnkyɛm bi so si a, wɔkɔboa hɔn nuanom. Wɔ hɛn asafo ahorow mu so, mber dodow a asafo mu mpanyimfo gye dze kyerɛkyerɛ hɛn, wɔhyɛ hɛn nkuran na wɔboa hɛn no, sɛ yɛkã dɛ yɛrekã ho asɛm a, adagyer bɔbɔ hɛn. Ɔsɛ dɛ yefi hɛn akoma mu kamfo enuanom yi nye hɔn mbusua wɔ dza wɔyɛ ma hɛn no nyinara ho. Yɛserɛ dɛ Jehovah nhyira hɔn wɔ dza wɔyɛ no ho! Yenyim dɛ adze biara a yɛyɛ no, ɔsɛ dɛ yɛyɛ ahwɛyie na wɔanngye hɛn mber nyina, dɛmara na ɔsɛ dɛ asafo mu mpanyimfo so yɛ. Ɔnnsɛ dɛ wɔdze hɔn mber nyinara dzi asafo no n’ehiadze ho dwuma araa ma ɔkɛba no dɛ woegya hɔn mbusua hɔ.

9. Dɛ mbrɛ Philippifo 2:4, 5 kyerɛ no, ebɛn suban na ɔwɔ dɛ hɛn nyina da no edzi?

⁹ Kenkan Philippifo 2:4, 5. Ɔwɔ mu, nnyɛ hɛn nyina na yɛsom dɛ asafo mu mpanyimfo, naaso hɛn nyina botum esũasua mbrɛ Jesus fii ne pɛ mu boaa afofor no. Bible no kã dɛ, ɔfaa “akowaa subea.” (Phil. 2:7) Hom mma yɛnhwɛ dza yebotum esũa efi asɛm yi mu. Akowaa a ɔsom bo ma no wura no, ɔbɔbɔ noho mbɔdzen dɛ ɔbɔsɔ no wura n’enyi. Hɛn so yɛyɛ Jehovah no nkowaa na yɛsom hɛn nuanom. Iyi ntsi, ɔda edzi kofee dɛ yɛpɛ dɛ yɛbɔ hɛnho mbɔdzen dɛ yɛbɔsom Jehovah nye hɛn nuanom. Sɛ yebotum ayɛ dɛm a, hom mma yensusu nyansahyɛ a odzidzi do yi ho.

10. Ebɛn nsɛm na yebotum ebisa hɛnho?

¹⁰ Susu mbrɛ isi yɛ w’adze no ho. Ibotum ebisa woho nsɛm bi tse dɛ: ‘Ana mowɔ ɔpɛ dɛ medze me mber na m’ahoɔdzen bɔboa afofor? Dɛ nhwɛdo no, sɛ wɔkã kyerɛ me dɛ menkɛsera onua bi a ne mfe akɔ enyim anaa menkɛfa akyerɛbaa bi a ne mfe akɔ enyim nkɔ asafo nhyiamu a, meyɛ m’adze dɛn? Sɛ wohia enuanom bi ma woeekesiesie Ahendzi Asa do anaa beebi a wɔbɛyɛ ehyiadzi a, ana mutu moho ma ntsɛmara kɔboa anaa?’ Aber a yehyiraa hɛnho do maa Jehovah no, yɛkãa kyerɛɛ no dɛ yɛdze dza yɛwɔ nyina bɔsom no. Na ɔpɛ so dɛ yɛdze hɛn mber, hɛn ahoɔdzen, nye hɛn ahodze nyina som hɛn nuanom. Sɛ yefi hɛn pɛ mu yɛ dɛm a, Jehovah n’enyi gye paa. Naaso, sɛ yehu dɛ wɔaka hɛn kakra wɔ iyi mu a, ebɛnadze na ɔwɔ dɛ yɛyɛ?

11. Mpaabɔ besi dɛn aboa hɛn ma yeenya ɔpɛ no dze som hɛn nuanom?

¹¹ Fi w’akoma mu bɔ Jehovah mpaa. Yɛmfa no dɛ dza yɛakã ho asɛm yi, ehu dɛ etɔ sin wɔ beebi, naaso ɔyɛ dzen ma wo dɛ ebɛyɛ nsesa a ohia no. Sɛ dɛm na ɔtse wɔ w’afamu a, fi w’akoma mu bɔ Jehovah mpaa. Kã wo haw no nyina ho asɛm kyerɛ no. Kã mbrɛ isi tse nka no ho asɛm kyerɛ Jehovah na serɛ no dɛ ɔmboa wo ma ‘nya ɔpɛ’ na ahoɔdzen a edze bɔsom wo nuanom.​—Phil. 2:13.

12. Ebɛnadze na enuanom mberantsɛ a woenuma hɔn no botum ayɛ dze aboa asafo no?

¹² Sɛ eyɛ onua aberantsɛ a woenuma wo a, bɔ mpaa serɛ Jehovah dɛ ɔmboa wo ma nya ɔpɛ a edze bɛyɛ pii aboa wo nuanom a enye hɔn wɔ asafo no mu no. Wɔ aman ahorow bi do no, asafo mu mpanyimfo no dɔɔ sõ kyɛn asomfo no. Dɛm asomfo yi mu pii so enyi efir. Jehovah n’ahyehyɛdze no so reyɛ kɛse, ntsi yehia enuanom mberantsɛ pii a wɔbɔboa ma wɔaahwɛ Jehovah n’asomfo. Sɛ ifi wo pɛ mu som wo nuanom wɔ beebiara a wobehia wo mboa a, w’enyi bɛgye papaapa. Ebɛnadze ntsi a? Osiandɛ sɛ eyɛ dɛm a, ebɔsɔ Jehovah n’enyi, ibenya dzin pa na w’akoma so bɔtɔ wo yamu wɔ mboa a edze ma afofor no ho.

13-14. Ebɛnadze na yebotum ayɛ dze aboa hɛn nuanom? (Hwɛ mfonyin a ɔwɔ Ɔweɔn-Aban yi enyim no.)

¹³ Fa w’enyi to famu ama eehu mboa a wo nuanom hia. Ɔsomafo Paul tuu Hebrewfo no fo dɛ: “Yieyɛ nye adzekyɛ mma hom werɛ mmfir, na dɛm afɔrbɔdze yi na ɔsɔ Nyankopɔn enyi.” (Heb. 13:16) Nna dɛm afotu yi yɛ ne ber mu dze paa! Aber a Christianfo a wɔwɔ Judea no nsa kaa krataa no, wɔannkyɛr biara na no ho behiaa dɛ wogya hɔn efi, hɔn ndwuma nye hɔn ebusuafo a wɔnnyɛ Christianfo no hɔ na ‘woguan kɔ nkokwaa do.’ (Matt. 24:16) Dɛm aber no nna no ho hia paa dɛ hɔn mu biara boa no nua. Nna Paul etu Christianfo no fo dɛ wɔnye hɔn nuanom nkyɛ dza wɔwɔ. Sɛ nna wɔdze Paul n’afotu yi yɛ edwuma dada a, nna ɔnnkɛyɛ dzen ama hɔn dɛ  wɔnye hɔn nuanom bɛkyɛ dza wɔwɔ wɔ asetsena fofor a wɔkɔr mu no mu.

¹⁴ Ɔtɔfabi a, bi a ɔbɛyɛ dzen ama hɛn nuanom binom dɛ wɔbɛkã akyerɛ hɛn dɛ wohia hɛn mboa. Fa no do onua bi ne yer ewu ma oridzi awerɛhow. Ana onua no behia obi ma ɔaaboa no ma ɔaayɛ edziban, fie ndwuma anaa kaar ho nhyehyɛɛ? Bi a ɔbɛyɛ dzen ama no dɛ ɔbɛkã akyerɛ hɛn dɛ ohia hɛn mboa, osiandɛ ɔmmpɛ dɛ ɔhaw hɛn. Naaso sɛ hɛnankasa yefi hɛn pɛ mu yɛ dɛm ndzɛmba ahorow yi boa no a, n’enyi bɔsɔ papaapa. Ɔnnsɛ dɛ hɛn adwen yɛ hɛn dɛ mbrɛ ɔtse biara ɔnoara botum ayɛ ndwuma ahorow yi, anaa obi fofor bɔboa no. Afei so, ɔnnsɛ dɛ yenya adwen dɛ aber biara a obehia hɛn mboa no, nankasa bɛkã akyerɛ hɛn. Bisa woho dɛ, ‘Sɛ emi na mowɔ tsebea a ɔtse dɛm mu a, nkyɛ ebɛnadze na m’enyi bɛgye ho dɛ afofor bɛyɛ ama me?’

15. Sɛ yebotum efi hɛn pɛ mu aboa afofor a, ebɛnadze na ɔwɔ dɛ yesi hɛn bo dɛ yɛbɛyɛ?

¹⁵ Yɛ dza ɔbɛma afofor etum abɛn wo. Ɔda edzi kofee dɛ, inyim enuanom a wɔwɔ w’asafo mu a wɔayɛ krado aber nyina dɛ wɔbɔsom hɔn nuanom no. Dɛm enuanom yi nnyɛ biribiara a ɔma yɛtse nka dɛ yɛrehaw hɔn. Yenyim dɛ aber biara a yebehia hɔn mboa no, wɔayɛ krado dɛ wɔbɔboa hɛn, na yɛpɛ dɛ yesũasua hɔn! Alan yɛ asafo mu panyin a ɔwɔ ne mfe 40 mu. Ɔpɛ dɛ ɔyɛ dza ɔbɛma enuanom etum abɛn no. Alan kãa dza Jesus yɛe no ho asɛm dɛ: “Nna Jesus nnyi adagyer koraa, naaso nna nyimpa nyina, ɔmmfa ho mfe a woedzi no tum bɛn no. Nna wonnsuro so dɛ wobebisa no hɔ mboa. Nna wohu Jesus dɛ ɔyɛ obi a ɔdwen hɔnho papaapa. Mepɛ dɛ mifi m’akoma nyina mu sũasua suban a Jesus daa no edzi no, na mema enuanom hu dɛ modɔ hɔn, modwen hɔnho na wobotum so abɛn me.”

16. Sɛ yɛdze asɛm a ɔwɔ Ndwom 119:59, 60 no yɛ edwuma a, ebɛn kwan do na ɔbɔboa hɛn ma yeedzi Jesus no nhwɛdo ekyir?

 ¹⁶ Sɛ yeenntum ennsũasua Jesus pɛpɛɛpɛr mpo a, ɔnnsɛ dɛ yɛma hɛn abaw mu bu. (Jas. 3:2) Siantsir nye dɛ, osuanyi runntum nnsũasua dza ne kyerɛkyerɛfo yɛ no pɛpɛɛpɛr. Ɔnyɛ dɛn ara a obedzi mfom wɔ dza ne kyerɛkyerɛfo no dze akyerɛ no no mu, naaso sɛ osũa biribi fi mfom a odzii no mu, na ɔyer noho sũasua ne kyerɛkyerɛfo no a, obenya nkɔenyim. Dɛmara na hɛn so, sɛ yɛdze dza yesũa fi Bible mu yɛ edwuma, na yɛbɔ mbɔdzen dɛ yebotu mpon wɔ beebi a yɛtɔ sin no a, yebotum edzi Jesus no nhwɛdo ekyir ma aayɛ yie.​—Kenkan Ndwom 119:59, 60.

17-18. Sɛ yesũasua Jesus ne pɛ mu a ofii soom afofor no a, ebɛn nhyira na yebenya?

¹⁷ Sɛ yefi hɛn pɛ mu som hɛn nuanom a, afofor so bosũasua. Asafo mu panyin bi a wɔfrɛ no Tim kãa dɛ: “Yɛwɔ enuanom mberantsɛ pii a woenya nkɔenyim wɔ Jehovah no som mu, na wɔapaw hɔn dɛ asafo mu asomfo. Adze kor a ɔboaa hɔn nye dɛ wohun mbɔdzen a enuanom binom fii hɔn pɛ mu bɔe dze soom afofor no, na hɔn so wonyaa ɔpɛ dɛ wɔbɛyɛ dɛmara. Hɔn pɛ mu a wofi som enuanom no boa asafo no paa, na dɛm a wɔyɛ no so boa asafo mu mpanyimfo no kɛse.”

¹⁸ Nyimpa a wɔwɔ wiadze yi mu no, pɛsɛankonya ahyɛ hɔn mã. Naaso, Jehovah n’asomfo dze, wɔyɛ soronko koraa. Nna Jesus fi ne pɛ mu boa afofor na hɛn so yeesi hɛn bo dɛ yɛbɛyɛ dɛmara. Ɔwɔ mu dɛ yerunntum nndzi Jesus n’anamɔn ekyir pɛpɛɛpɛ dze, naaso yebotum ‘edzi ekyir’ pɛɛ. (1 Pet. 2:21) Sɛ yɛyɛ dza yebotum biara dɛ yebosũasua mbrɛ Jesus fii ne pɛ mu soom afofor no a, hɛn so hɛn enyi bɛgye osiandɛ yɛreyɛ dza ɔsɔ Jehovah n’enyi.