1. Na itovo vinaka cava e laurai vei ira na tamata i Jiova?

ENA gauna makawa sara, e tukuna na iVolatabu ni o ira na tamata ni Kalou era na “yalorawarawa ni cabori ira” mera qaravi Jiova ena veidusimaki ni Luvena. (Same 110:3) Sa vakayacori tiko na parofisai qori nikua. E veiyabaki era vakayagataka na dauveiqaravi gugumatua i Jiova e vica vata na drau na milioni na aua ena cakacaka vakavunau. Era sega ni saumi kina, era vakayagataka ga nodrau iyau. E tiko tale ga na gauna mera vukei ira kina era vakabauta vata ena veika era gadreva, mera vakayaloqaqataki ira, mera vakadeitaka tale ga nodra vakabauta. Era vakayagataka na qase kei na dauveiqaravi ni ivavakoso e vica vata na aua mera vakarautaka nodra itavi ena soqoni kei na veivakatawani. Na cava e uqeti ira na tamata i Jiova mera qarava na cakacaka kece qo? Oya nodra lomani Jiova, era lomani ira tale ga na lewenivanua.—Maciu 22:37-39.

2. Na ivakaraitaki cava i Jisu e tukuni ena Roma 15:1-3?

² E vakasakiti na ivakaraitaki i Jisu ni kauaitaka na veika e yaga vei ira eso tale, e sega ni kauaitaki koya ga. Eda na saga ena noda vinaka kece meda vakatotomuri koya. (Wilika Roma 15:1-3.) Ena yaga nida cakava qori. E kaya o Jisu: “E marau vakalevu o koya e solia na ka, vakalailai o koya e taura na ka.”—Caka. 20:35.

3. Na cava eda na veivosakitaka ena ulutaga qo?

³ Eda na veivosakitaka ena ulutaga qo eso na ka e cakava o Jisu me vukea eso tale kei na sala meda vakatotomuria  kina na nona ivakaraitaki. Eda na veivosakitaka tale ga noda rawa ni vukei ira vakalevu eso tale.

4. E vakaraitaka vakacava o Jisu ni kauaitaki ira eso tale?

⁴ E vukea eso tale o Jisu ena gauna mada ga e wawale tu kina. Vakasamataka mada na ka e cakava o Jisu nira lako yani vua na ilala levu ena yasa ni ulunivanua, rairai volekati Kapenaumi. A masu o Jisu ena bogi taucoko. De dua e wawale sara ga, ia ni raici ira na ilala levu dua na ka nona lomani ira na dravudravua kei ira na tauvimate. E mani vakabulai ira, e dua tale ga nona ivunau veiuqeti qai guiguilecavi dredre, ya na Vunau ena Ulunivanua.—Luke 6:12-20.

5. Era vakatotomuri Jisu vakacava na ulunivuvale ena gauna era wawale kina?

⁵ Era vakatotomuri Jisu na ulunivuvale. Vakasamataka mada na ituvaki qo: Ni oti e dua na siga ni cakacaka, e lesu mai vale e dua na ulunivuvale, e wawale sara ga. E vinakata me daro na Sokalou Vakavuvale ena bogi qori, ia e masuti Jiova me solia vua na kaukaua me vakayacora na vuli. E rogoca o Jiova nona masu, mani vakayacori ga na vuli me vaka e dau caka e veimacawa. Ratou vulica na gone e dua na ka vinaka ena bogi qori, ya ni bibi duadua vei rau na itubutubu na veika vakayalo.

6. Tukuna e dua na ivakaraitaki ni nona solia nona gauna o Jisu me vukea eso tale.

⁶ E dau solia nona gauna o Jisu. O bau vakasamataka na ivakarau ni loma i Jisu ni rogoca ni sa tamusuki na ulu i nona itokani, o Joni na Dauveipapitaisotaki? Sa na bau rarawa sara ga. E kaya na iVolatabu: “Ni rogoca na itukutuku ya o Jisu e vodo sara i waqa me gole ina dua na vanua lala me tiko duadua kina.” (Maciu 14:10-13) Eda kila na vuna e vinakata kina o Jisu me tiko duadua. Eso vei keda e vinakata me lolosi duadua ga. A sega ni rawa qori vei Jisu. Baleta?  Ni bera ni yaco ena vanua lala, era sa gole yani e dua na ilala levu. Na cava e cakava o Jisu? E vakasamataka na ka era gadreva, “dua na ka nona lomani ira.” E raica ni vinakati mera vakacegui vakayalo, e totolo gona nona vukei ira. E “mani vakavulici ira ena levu sara na ka, [sega ni vica ga].”—Mari. 6:31-34; Luke 9:10, 11.

7-8. Tukuna e dua na ivakaraitaki ni nodra vakatotomuri Jisu na qase ni ivavakoso dauloloma.

⁷ Era vakatotomuri Jisu na qase ni ivavakoso dauloloma. Eda vakavinavinakataka vakalevu nodra cakacaka na qase ni ivavakoso ena vukuda! Levu na cakacaka qori eda sega ni raica na lewe ni ivavakoso. Kena ivakaraitaki, ni vinakati na veiqaravi vakavuniwai, e totolo nodra gole na lewe ni Komiti Veitaratara kei na Valenibula mera vukei ira na mataveitacini. Levu na gauna e basika na leqa va qori ena lomalomanibogi! Ia na loloma e uqeti ira na qase qo kei na nodra vuvale mera vukei ira na mataveitacini era sotava na leqa, e tu vakarau kina mera vukei ira.

⁸ Na itavi cava tale era vakaitavi kina na qase? Era vakaitavi ena tara Vale ni Soqoni kei na so tale na vale ni isoqosoqo, vaka kina na cakacaka ni vakacoko. Levu tale ga na gauna era vakayagataka ena veivakavulici, veivakayaloqaqataki, kei na nodra tokoni keda. E vinaka meda dau vakavinavinakataki ira kei na nodra vuvale. Me vakalougatataka mada ga o Jiova na nodra vakuai ira. Ia e vinakati mera yalomatua na qase. Me kua ni levu tale na  gauna era vakayagataka ena ivavakoso me lai vakawaleni kina na nodra itavi ena vuvale.

9. Me vaka e tukuni ena Filipai 2:4, 5, na rai cava me tiko vei keda kece na lotu vaKarisito?

⁹ Wilika Filipai 2:4, 5. Eda rawa kece ni vakatotomuria na nona dau vakuai koya o Jisu, sega nira vuli ga kina na qase ni ivavakoso. E kaya na iVolatabu ni “okati koya me vaka na bobula.” (Fpai. 2:7) Vakasamataka mada na ka eda vulica ena tikinivolatabu qori. Na bobula se dauveiqaravi yaga ena qara na sala me vakamarautaka kina na nona turaga. Nida bobula i Jiova eda qaravi ira tale ga na tacida, e macala nida vinakata meda yaga vakalevu vei Jiova kei ira na mataveitacini. O rawa ni cakava qori ni o muria e vica na vakatutu tarava.

10. Na cava meda taroga?

¹⁰ Dikeva nomu rai. Mo taroga: ‘Au dau tu vakarau meu vakuai au meu vukea eso tale? Me kena ivakaraitaki, na cava au na cakava keu kerei meu sikova e dua na tacida tagane itabaqase ena valenimalumalumu se ina nona vale, se meu kauta e dua na tacida yalewa itabaqase ina soqoni? Vakacava au dau totolo ni bole ena samaki ni vanua ni soqo ni veiwasewase, se vakavinakataki ni Vale ni Soqoni?’ E marau o Jiova nida solia noda gauna kei na iyau meda vukei ira kina na tacida. Na gauna eda yalayala kina vei Jiova, eda yalataka tale ga meda vakayagataka na ka kece e tu vei keda meda qaravi koya kina. Ke da kila ni tiko eso na ka meda vakavinakataka, na cava meda cakava?

11. Ena yaga vakacava na masu meda yalorawarawa ni veivuke?

¹¹ Masu mai vu ni lomamu vei Jiova. Kaya mada ni o kila mo vakavinakataka eso na ka, ia e sega ni gu na lomamu mo veisau. Na cava mo cakava ena ituvaki qori? Masu mai vu ni lomamu vei Jiova. Mo kua ni vunitaka e dua na ka. Tukuna vei Jiova na nomu rai qai kerea ‘mo kua ni vinakata wale ga, mo cakava sara ga.’—Fpai. 2:13.

12. E rawa vakacava ni veivuke ena ivavakoso na tacida tagane gone sa papitaiso?

¹² Ke o dua na tacida tagane gone o sa papitaiso, kerei Jiova mo vinakata mo veivuke vakalevu ena ivavakoso. Eso na vanua e levu na qase ni ivavakoso, e lailai na dauveiqaravi. Levu na dauveiqaravi qori era sa uabula se itabaqase. Ni levu tiko mai na ivavakoso, e vinakati e levu na tacida gone mera vukei ira na qase ni ivavakoso ena nodra qaravi na tamata i Jiova. O na marau ke o yalorawarawa ni veivuke ena vanua e vinakati kina. Na vuna? Ni o vakamarautaki Jiova, ena vinaka na kemu irogorogo, o na lomavakacegu tale ga ni o veivuke.

13-14. Sala cava eda na vukei ira kina na tacida? (Raica na iyaloyalo ena waqana)

¹³ Meda kila na ka era vinakata eso tale. E uqeti ira na Iperiu na yapositolo o Paula: “Moni kua tale ga ni guilecava na caka vinaka kei na nomuni wasea vei ira tale na so na ka e tu vei kemuni, ni taleitaka na Kalou na isoro va qori.” (Iper. 13:16) E yaga dina na ivakasala ya! Ni oti ga vakalailai nodra wilika na ivola qori, era biuta sara  nodra vale na lotu vaKarisito e Jutia, era biuta nodra bisinisi kei na wekadra era sega ni vakabauta “mera dro sara ina ulunivanua.” (Maciu 24:16) E bibi dina ena gauna qori mera dau veivukei. Ke ra muria tiko na ivakasala i Paula ni bera qori, ya mera wasea na ka e tu vei ira, e macala ni na rawarawa mera matau ena nodra bula vou.

¹⁴ Era na sega ni vakaraitaka wasoma vei keda na mataveitacini na ka era gadreva. Me kena ivakaraitaki, ena rairai takali e dua na tacida yalewa qai lolosi tiko o watina. Vakacava ena vinakati me saqa na kena, vakavodoki, se qaravi na cakacaka ni vale? Ena rairai sega ni tukuna mai e dua na ka de nanuma ni na vakaosoosotaki keda. Ia ena marautaka vakalevu na tacida qori ke da vakaliuliu meda veivuke. Meda kua ni nanuma ni dua tale na tacida ena vukei koya, se me tukuna mai meda vukei koya. Mo taroga, ‘Keu tu ena kena ituvaki, na cava au vinakata meu vukei kina?’

15. Na cava meda cakava meda veivuke kina?

¹⁵ Mo torovi rawarawa. E macala ni o kilai ira na mataveitacini ena nomu ivavakoso era tu vakarau mera veivuke. Era yalorawarawa mera veivuke ke da kerei ira. Eda rawa ni nuitaki ira ke basika na leqa, eda via vakataki ira sara ga! Kena ivakaraitaki o Alan, e dua na qase ni ivavakoso yabaki 40 vakacaca, e vinakata me torovi rawarawa. Ni vakasamataka na ivakaraitaki nei Jisu, e kaya: “E osooso o Jisu, ia era torovi koya e levu e duidui nodra yabaki, era doudou mera kere veivuke vua. Era kila ni kauaitaki ira dina. Au vinakata sara ga meu vakataki Jisu, meu kilai niu  torovi rawarawa, au veikauaitaki qai veinanumi.”

16. Ena yaga vakacava vei keda na Same 119:59, 60 meda vakatotomuria voleka na ivakaraitaki nei Jisu?

¹⁶ Meda kua ni yalolailai ke da sega ni vakatotomuri Jisu vakavinaka. (Jeme. 3:2) Na gonevuli ena sega ni vakatotomuria sara vakavinaka na ka e cakava nona qasenivuli. Ni vuli mai na nona cala ni saga me vakatotomuria voleka na cakacaka nei nona qasenivuli, ena vinaka tiko ga kina. Eda va tale ga qori nida muria na ka eda vulica ena noda vuli vakataki keda, gumatua meda veisautaka na noda malumalumu, eda na vakatotomuria vakavoleka na ivakaraitaki Jisu.—Wilika Same 119:59, 60.

17-18. Na cava na yaga ni noda vakatotomuria na nona vakuai koya o Jisu?

¹⁷ Nida tu vakarau meda veivuke, qori ena uqeta eso tale mera vakatotomuri keda. E kaya o Tim, e dua na qase ni ivavakoso: “Eso na tacida gone era sa lesi mera dauveiqaravi ni ivavakoso. Dua na vuna nira raica nodra tu vakarau eso tale mera veivuke, era vinakata sara ga mera vakatotomuria. Nodra vakuai ira e yaga ina ivavakoso, era tokoni ira tale ga na qase ni ivavakoso.”

¹⁸ E levu ena gauna qo era nanumi ira ga. Ia eda duidui sara na tamata i Jiova. E uqeti keda na nona vakuai koya o Jisu da qai gumatua meda vakatotomuria na nona ivakaraitaki. Eda na sega ni muri koya vakavinaka sara, ia eda na “muria voleka na weniyavana.” (1 Pita 2:21) Nida gumatua meda vakatotomuria nona vakuai koya o Jisu, eda na marautaka tale ga na veivakadonui i Jiova.