1. Jijɔ ɖagbe tɛ́ togun Jehovah tɔn ka ɖó?

 É KO lín tawun din bɔ Biblu ɖɔ ɖ’ayǐ ɖɔ mɛ e ɖo togun Mawu tɔn mɛ lɛ́ é ná zé “yěɖée jó kpó jlǒ kpó” bá sɛn Jehovah ɖo alixlɛ́mɛ Vǐ tɔn tɔn glɔ́. (Ðɛh. 110:3, nwt) É ɖo wɛn ɖɔ nǔɖɔɖayǐ énɛ́ ɖo jijɛnu wɛ ɖo égbé. Xwewú xwewú ɔ, mɛsɛntɔ́ Jehovah tɔn kanɖódónǔwútɔ́ lɛ́ nɔ zán ganxixo lǐvi mɔ̌kpán ɖo wɛnɖagbejíjlázɔ́ ɔ mɛ. Yě nɔ wa mɔ̌ kpó jlǒ kpó, kpó akwɛ́ yěɖésúnɔ tɔn lɛ́ kpó. Yě nɔ lɛ́ ba hwenu dó nɔ gǔdo nú nǔɖitɔ́ hǎtɔ́ yětɔn lɛ́ ɖo agbaza, lěe nǔ nɔ cí nǔ mɛ é kpó gbigbɔ kpó lixo. Mɛxó agun tɔn lɛ́ kpó devízɔ́watɔ́ sinsɛnzɔ́wiwa tɔn lɛ́ kpó nɔ zán ganxixo gěgé dó sɔ́ nǔ nú kplé lɛ́ sín akpáxwé lɛ́, lobo nɔ lɛ́ yi ba nɔví súnnu kpó nɔví nyɔ̌nu kpó yětɔn lɛ́ kpɔ́n, bó ná dó dó wǔsyɛ́n lanmɛ nú yě. Aniwú togun Mawu tɔn ka nɔ wa azɔ̌ tootóbú énɛ́ lɛ́? Wǎn e mǐ yí nú Jehovah kpó nɔzo mǐtɔn lɛ́ kpó é wú wɛ é nɔ sín.—Mat. 22:37-39.

2. Lěe è tínmɛ gbɔn ɖo Hlɔ̌manu lɛ́ 15:1-3 mɛ é ɔ, kpɔ́ndéwú tɛ́ Jezu ka sɔ́ ɖ’ayǐ?

² Jezu sɔ́ kpɔ́ndéwú tají ɖé ɖ’ayǐ, ɖó hudó mɛ ɖěvo lɛ́ tɔn nɔ ɖu ayi mɛ n’i. Mǐ ɖo nǔ e wú mǐ kpé é bǐ wa wɛ bá sɔ́ afɔ dó afɔdo tɔn lɛ́ mɛ. (Xa Hlɔ̌manu lɛ́ 15:1-3.) Mɛ ɖěɖěe nɔ wa nǔ éɖɔhun lɛ́ é ná ɖu le gěgé. Jezu ɖɔ: “Nǔnámɛ nɔ dó xomɛhunhun nú mɛ hú nǔyíɖomɛsí.”—Mɛ. 20:35.

3. Étɛ́ lɛ́ jí mǐ ka ná ɖɔ xó dó ɖo xóta élɔ́ mɛ?

³ Ðo xóta élɔ́ mɛ ɔ, mǐ ná gbéjé nǔ ɖěɖěe Jezu wa dó d’alɔ mɛ ɖěvo lɛ́ é ɖé lɛ́ kpɔ́n, bó ná lɛ́ mɔ lěe mǐ sixú xwedó kpɔ́ndéwú tɔn gbɔn é. Mǐ ná lɛ́ ɖɔ xó dó lěe mǐ sixú bló gbɔn bɔ jlǒ e mǐ ɖó bó ná nɔ d’alɔ mɛ ɖěvo lɛ́ é ná jɛjí é jí.

4. Nɛ̌ hudó mɛ ɖěvo lɛ́ tɔn lɛ́ ka nɔ ɖu ayi mɛ nú Jezu hú éɖésúnɔ tɔn lɛ́ gbɔn?

⁴ Nǔ cikɔ nú Jezu có, é d’alɔ mɛ ɖěvo lɛ́. Dǒ nukún nǔ e Jezu wa hwenu e mɛ wɔ̌búwɔ́bú ɖé wá gɔ̌n tɔn ɖo só ɖé kpá, vlafo ɖo malínmálín dó Kafaanawúmu é mɛ kpɔ́n. Zǎn ɔ bǐ wɛ Jezu sɔ́ dó xo ɖɛ ná. É ɖo gaan ɖɔ nǔ cikɔ n’i tawun, amɔ̌, hwenu e é mɔ ahwan ɔ é ɔ, nǔ wamamɔnɔ kpó azinzɔnnɔ kpó e ɖo yě mɛ lɛ́ é tɔn blá wǔ n’i. É nyí azɔn kɛ́ɖɛ́ wɛ é gbɔ nú yě ǎ, loɔ, é lɛ́ xwlé xóɖiɖɔ e dó wǔsyɛ́n lanmɛ nú mɛ hú gǎn bɔ è ma ko xwlé mɛ kpɔ́n ǎ é ɖé yě; é wɛ nyí Mawuxóɖiɖɔ Só jí tɔn ɔ.—Luk. 6:12-20.

5. Nɛ̌ tatɔ́ xwédo tɔn lɛ́ ka nɔ xwedó kpɔ́ndéwú mɛɖée sísɔ́ dó sá vɔ̌ tɔn Jezu tɔn hwenu e nǔ cikɔ nú yě é gbɔn?

⁵ Lěe tatɔ́ xwédo tɔn lɛ́ nɔ wa nǔ Jezu ɖɔhun gbɔn é. Dǒ nukún ninɔmɛ élɔ́ mɛ kpɔ́n: Tatɔ́ xwédo tɔn ɖé wa azɔ̌ syɛ́nsyɛ́n ɖo kéze ɖé mɛ ɖo azɔ̌ jí, bó lɛ́ kɔ wá xwégbe kpó nǔcikɔ kpó. Bóyá é jló ná sɛ do nú Sinsɛn-bíbló xwédo tɔn e yě nɔ bló gbadanu énɛ́ é, amɔ̌, é byɔ́ Jehovah ɖɔ é ní ná émí hlɔ̌nhlɔ́n bónú émí ná kpé nukún d’é wú. Jehovah se ɖɛ tɔn bɔ yě kplɔ́n nǔ ɔ lěe é nɔ ko nyí gbɔn hwɛhwɛ é. Vǐ lɛ́ kplɔ́n nǔ tají ɖé gbadanu énɛ́, énɛ́ wɛ nyí ɖɔ, nǔ gbigbɔ tɔn lɛ́ wɛ ɖo tɛn nukɔntɔn ɔ mɛ nú mɛjitɔ́ yětɔn lɛ́.

6. Nǎ kpɔ́ndéwú lěe Jezu sɔ́ hwenu tɔn dó sá vɔ̌ dó d’alɔ mɛ ɖěvo lɛ́ gbɔn é tɔn ɖé.

⁶ Jezu nɔ ɖi hwenu tɔn sín gwě ǎ. Dǒ nukún lěe nǔ cí nú Jezu hwenu e é se ɖɔ è gbo ta xɔ́ntɔn tɔn e nyí Jaan Batɛ́mublónúmɛtɔ́ ɔ é mɛ kpɔ́n. Jezu ɖó ná ko blá wǔ tawun. Biblu ɖɔ: “Ée Jezu se ɖɔ Jaan [Batɛ́mublónúmɛtɔ́] ɔ kú ɔ, é byɔ́ tɔjíhún ɖé mɛ, bó ɖidó zɔ fí e mɛɖé ma ná mɔ ɛ ɖe ǎ é.” (Mat. 14:10-13) Mǐ sixú mɔ nǔ jɛ nǔ e wú é ba ná nɔ éɖokpónɔ é wú. Mɛɖé lɛ́ tíin bɔ ényí yě ɖo aluwɛ mɛ ɔ, yě nɔ ba ná nɔ yěɖokpónɔ. Amɔ̌, Jezu kpé wú bó nɔ éɖokpónɔ ǎ. Mɛ wɔ̌búwɔ́bú ɖé ko yi fí e jɛ zɔ bɔ é jló ná nɔ é cóbɔ é yi fí ɔ. Nɛ̌ Jezu ka wa nǔ gbɔn? É lin tamɛ dó hudó mɛ lɛ́ tɔn jí, bɔ nǔ yětɔn “blá wǔ” n’i. Jezu mɔ ɖɔ yě ɖó hudó alɔdó kpó gbɔ e Mawu nɔ dó nú mɛ é kpó tɔn, énɛ́ wú ɔ,  é yá wǔ jɛ alɔ dó yě jí. Nǔgbó ɔ, “é jɛ nǔ [é nyí kpɛɖé ǎ, loɔ,] gěgé kplɔ́n yě jí.”—Mak. 6:31-34; Luk. 9:10, 11.

7-8. Nǎ kpɔ́ndéwú e xlɛ́ lěe mɛxó agun tɔn wǎnyíyínɔ lɛ́ nɔ wa nǔ Jezu ɖɔhun gbɔn, hwenu e mɛɖé ɖó hudó alɔdó tɔn ɖo agun ɔ mɛ é tɔn ɖokpó.

⁷ Lěe mɛxó agun tɔn wǎnyíyínɔ lɛ́ nɔ wa nǔ Jezu ɖɔhun gbɔn é. Azɔ̌ syɛ́nsyɛ́n e mɛxó agun tɔn mǐtɔn lɛ́ nɔ wa dó sɔ́ yěɖée dó sá vɔ̌ dó ta mǐtɔn mɛ é nɔ su nukún mǐtɔn mɛ tawun! Azɔ̌ gěgé tíin bɔ yě nɔ wa bɔ agun ɔ ka tuun nǔ ɖě d’é wú ǎ. Ði kpɔ́ndéwú ɔ, ényí ajijimɛnú éé kúnkplá dotóoxwéxó é ɖé wá xwetɔ́n ɔ, nɔví ɖěɖěe ɖo Wěɖegbɛ́ e nɔ kpé nukún dó dotóoxwéxó lɛ́ wú é mɛ é nɔ d’alɔ nɔví súnnu kpó nɔví nyɔ̌nu kpó yětɔn lɛ́. Hwɛhwɛ ɔ, zǎnxwete wɛ ajijimɛnú énɛ́ lɛ́ ka nɔ jɛ! Amɔ̌, wǔvɛ́sexámɛ nɔ sísɛ́ mɛxó agun tɔn vívɛ́ énɛ́ lɛ́ kpó mɛ e ɖo xwédo yětɔn mɛ lɛ́ é kpó, bɔ hudó nǔɖitɔ́ hǎtɔ́ yětɔn lɛ́ tɔn sín do súsú nɔ myá nukún nú yě hú yěɖésúnɔ tɔn lɛ́.

⁸ Mɛxó lɛ́ nɔ lɛ́vɔ́ ɖ’alɔ ɖo Kpléxɔ Axɔ́súɖuto ɔ tɔn lɛ́ kpó xɔ yɛhwexɔ́súɖuto ɔ tɔn ɖěvo lɛ́ kpó gbígbá mɛ; yě nɔ lɛ́ ɖ’alɔ ɖo sɔhɛnmɛzɔ́ lɛ́ mɛ. Gɔ́ ná ɔ, yě nɔ zán ganxixo maxamaxa lɛ́ dó kplɔ́n nǔ mǐ, lobo nɔ lɛ́ dó wǔsyɛ́n lanmɛ nú mǐ. É jɛxá ɖɔ mǐ ní kpa nɔví énɛ́ lɛ́ bǐ kpó xwédo yětɔn lɛ́ kpó tawun. Jehovah ní bó kɔn nyɔ̌ná dó jlǒ ɖagbe yětɔn jí! Nǔgbó ɔ, mɛ lɛ́ bǐ ɖɔhun ɔ, é byɔ́ ɖɔ mɛxó agun tɔn lɛ́ lɔ ní nɔ jlɛ̌ jí. Yě ɖó ná nɔ zán hwenu dó agun ɔ sín nǔ lɛ́ tamɛ káká bó ná nɔ ba hwenu e yě ná zán dó kpé nukún dó xwédo yětɔn wú é kpo ǎ.

9. Sɔgbe xá Filípunu lɛ́ 2:4, 5 ɔ, linlin tɛ́ Klisánwun lɛ́ bǐ ka ɖó ná ɖó?

⁹ Xa Filípunu lɛ́ 2:4, 5. Nǔgbó ɔ, mǐ bǐ nyí mɛxó agun tɔn ǎ có, mǐ bǐ sixú kplɔ́n bó ná nɔ sɔ́ mǐɖée dó sá vɔ̌ Jezu ɖɔhun. Biblu ɖɔ ɖɔ é “zé ninɔmɛ mɛsɛntɔ́ tɔn.” (Filí. 2:7) Lin tamɛ dó nǔ e wěmafɔ énɛ́ sixú kplɔ́n mǐ é jí. Kannumɔ, alǒ mɛsɛntɔ́ e è nɔ wlíbo ná é ɖé ɖó ná ba ali e nu é ná wa nǔ bó ná nyɔ́ gǎn tɔn nukúnmɛ ɖe lɛ́ é. Ðó mǐ nyí mɛsɛntɔ́ Jehovah tɔn lɛ́, bó nɔ lɛ́ wa devízɔ́ nú nɔví lɛ́ wútu ɔ, mǐ ba ná nyɔ́ zán nú Jehovah kpó nɔví lɛ́ kpó d’é jí. Alixlɛ́mɛ e bɔ d’é wú lɛ́ é gbígbéjé kpɔ́n sixú d’alɔ we bɔ a ná wa mɔ̌.

10. Étɛ́ lɛ́ mǐ ka sixú kanbyɔ́ mǐɖée?

¹⁰ Nɔ gbéjé linlin towe lɛ́ kpɔ́n. Nɔ kan nǔ lěhun lɛ́ byɔ́ hwiɖée: ‘Nɛ̌ do un ka ɖo gbesisɔmɛ bó ná sɔ́ nyiɖée dó sá vɔ̌ dó d’alɔ mɛ ɖěvo lɛ́ sɔ? Ði kpɔ́ndéwú ɔ, ényí è byɔ́ mì ɖɔ nyi ní yi ba nɔví súnnu mɛxómɔ ɖé kpɔ́n ɖo xwé tɔn gbe, alǒ nyi ní nɔ sɔ́ nɔví nyɔ̌nu mɛxómɔ ɖé yi kplé agun tɔn lɛ́ ɔ, nɛ̌ un ka nɔ wa nǔ gbɔn? Ényí è ɖó hudó mɛ e ná d’alɔ bɔ è ná jlá fí e è ná bló kpléɖókpɔ́ ɖe é ɖé, alǒ Kpléxɔ Axɔ́súɖuto ɔ tɔn ɖé ɖó é tɔn ɔ, un ka nɔ ɖo gbesisɔmɛ bó nɔ sɔ́ nyiɖée jó a?’ Hwenu e mǐ sɔ́ mǐɖée jó nú Jehovah é ɔ, mǐ d’akpá n’i ɖɔ mǐ ná zán nǔ e mǐ ɖó lɛ́ é bǐ dó sɛn ɛ. É bá ɖɔ mǐ ní zán hwenu mǐtɔn, hlɔ̌nhlɔ́n mǐtɔn kpó nǔɖókan mǐtɔn lɛ́ kpó dó d’alɔ mɛ ɖěvo lɛ́. Énɛ́ wú ɔ, ényí mǐ ma wa mɔ̌ kpó cejɛ́nnábí kpó ǎ ɔ, xomɛ nɔ hun i. Ényí é byɔ́ ɖɔ mǐ ní bló hǔzúhúzú lɛ́ ɔ, étɛ́ mǐ ka sixú wa?

11. Nɛ̌ ɖɛxixo ka sixú d’alɔ we bɔ a ná ɖo gbesisɔmɛ hú gǎn bá d’alɔ mɛ ɖěvo lɛ́ gbɔn?

¹¹ Nɔ xo ɖɛ vívɛ́ sɛ́dó Jehovah. Vlafo a mɔ ɖɔ é byɔ́ ɖɔ a ní sɔ́ hwiɖée dó sá vɔ̌ d’é jí, amɔ̌, a ka ɖó jlǒ e ná wa mɔ̌ é ǎ. Ényí ninɔmɛ énɛ́ mɛ wɛ a ɖe hǔn, xo ɖɛ vívɛ́ sɛ́dó Jehovah. Ðɔ xó jɔ xó n’i. Ðɔ lěe nǔ cí nú we é nú Jehovah, bó byɔ́ ɛ ɖɔ é ní bló bónú a ní ɖó “jlǒ [kpó hlɔ̌nhlɔ́n kpó, nwt] bó ná nɔ wa nǔ.”—Filí. 2:13.

12. Étɛ́ lɛ́ sín do dɔ̌nkpɛvú e ko bló batɛ́mu é ɖé ka sixú sú?

¹² Ényí dɔ̌nkpɛvú e ko bló batɛ́mu é ɖé wɛ nú we hǔn, byɔ̌ Jehovah ɖɔ é ní d’alɔ we bónú a ní ɖó jlǒ hú gǎn bá d’alɔ nɔví ɖěɖěe ɖo agun towe mɛ lɛ́ é. Ðo to ɖé lɛ́ mɛ ɔ, mɛxó agun tɔn lɛ́ nɔ sukpɔ́ hú devízɔ́watɔ́ sinsɛnzɔ́wiwa tɔn lɛ́, bɔ devízɔ́watɔ́ sinsɛnzɔ́wiwa tɔn énɛ́ lɛ́ gěgé ka nɔ ko zɛ wǐnnyáwínnyá xwe lɛ́ wú. Ðó tutoblónúnǔ ɔ fɔ́n bó ɖo ada gbló wɛ wútu ɔ, mǐ ɖó hudó nɔví súnnu wínnyáwínnyá lɛ́ tɔn hú gǎn bónú yě ná d’alɔ mɛxó agun tɔn lɛ́, nú yě ná kpé nukún dó nɔví ɖěɖěe ɖo agun ɔ mɛ lɛ́ é wú. Ényí a ɖo gbesisɔmɛ bó ná wa devízɔ́ ɖo fí ɖěbǔ e è ɖó hudó towe ɖe é ɔ, a ná ɖ’awǎjijɛ. Étɛ́wú? Ðó xomɛ Jehovah tɔn ná hɛn hun wɛ a ɖe wútu ɔ, a ná ɖó nyǐkɔ ɖagbe ɖé, bó ná lɛ́ mɔ le e ɖo alɔdidó mɛ ɖěvo lɛ́ mɛ lɛ́ é.

13-14. Ðɔ afɔ tawun tawun e mǐ sixú ɖe dó d’alɔ nɔví súnnu kpó nɔví nyɔ̌nu kpó mǐtɔn lɛ́ é ɖé lɛ́. (Kpɔ́n ɖiɖe e ɖo akpa ɔ jí é.)

¹³ Nɔ ɖ’ayi hudó mɛ ɖěvo lɛ́ tɔn wú. Mɛsɛ́dó Pɔ́lu ɖɔ nú Klisánwun ɖěɖěe ɖo Judée lɛ́ é ɖɔ: “Mi ma wɔn bó gɔn ɖagbe wa ó; mi ma wɔn bó gɔn nǔ e ɖo mi sí lɛ́ má xá miɖée ó, ɖó vɔ̌sísá mɔ̌hunkɔtɔn lɛ́ wɛ nɔ nyɔ́ Mawu nukúnmɛ.” (Ebl. 13:16) Wěɖexámɛ ɖagbe ɖé wɛ nyí énɛ́! Klisánwun ɖěɖěe ɖo Judée lɛ́ é mɔ wěmasɛ́dómɛ énɛ́, bɔ é ná nɔ zaan é ɔ, yě jó xwé yětɔn lɛ́, ajɔ̌ yětɔn lɛ́, kpó mɛ yětɔn e ma nyí nǔɖitɔ́ ǎ lɛ́ é kpó dó, bó “hɔn yi  sókan mɛ.” (Mat. 24:16) Hwenɛ́nu ɔ, é ɖo tají tawun ɖɔ yě ní d’alɔ yěɖée. Jɛ nukɔn nú énɛ́ ɔ, nú yě ko nɔ xwedó wěɖexámɛ Pɔ́lu tɔn e ɖɔ ɖɔ yě ní nɔ má nǔ e yě ɖó lɛ́ é xá yěɖée lɛ́ é ɔ, é ná bɔwǔ nú yě hú gǎn bɔ yě ná húzú sɔgbe xá gbɛzínzán yětɔn yɔ̌yɔ́ ɔ.

¹⁴ Hwe lɛ́ bǐ nu wɛ nɔví súnnu kpó nɔví nyɔ̌nu kpó mǐtɔn lɛ́ ná sixú nɔ ɖɔ nǔ e nɔ hudó yě lɛ́ é nú mǐ ǎ. Ði kpɔ́ndéwú ɔ, nɔví súnnu ɖé sín asi kú. Nɔví súnnu mǐtɔn ɔ sixú ɖó hudó mɛ e ná ɖa nǔ n’i, sɔ́ ɛ yi fí ɖé, alǒ wa xwégbezɔ́ lɛ́ n’i é tɔn. É sixú nɔ gɔn alɔdó byɔ́, ɖó é ba ná nyí agban ɖo kɔ jí nú mǐ ǎ wútu. Amɔ̌, ényí mǐɖésúnɔ ɖe afɔ nukɔntɔn ɔ, bó byɔ́ ɛ ɖɔ mǐ ná d’alɔ ɛ ɔ, é ná su nukún tɔn mɛ tawun. Mǐ ɖó ná nɔ lin ɖɔ mɛ ɖěvo ná d’alɔ ɛ, alǒ, é ná nɔ ɖɔ nǔ e sín hudó é ɖó é nú mǐ hwebǐnu ǎ. Kanbyɔ́ hwiɖée ɖɔ: ‘Ényí nyɛ wɛ ka ɖo ninɔmɛ mɔ̌hun mɛ ɔ, alɔdó tɛ́ sín hudó un ka ná ɖó?’

15. Ényí mǐ ba bó ná nɔ d’alɔ mɛ ɖěvo lɛ́ ɔ, étɛ́ mǐ ka ɖó ná nɔ wa?

¹⁵ Nyɔ̌ lyá. É ɖo wɛn ɖɔ a tuun nɔví súnnu kpó nɔví nyɔ̌nu kpó ɖěɖěe ɖo agun towe mɛ, bó nɔ ɖo gbesisɔmɛ hwebǐnu bó ná d’alɔ mɛ ɖěvo lɛ́ é. Yě nɔ wa nǔɖé gbeɖé b’ɛ nɔ xlɛ́ ɖɔ agban wɛ mǐ nyí bó ɖo kɔ jí nú yě ǎ. Mǐ tuun ɖɔ yě ná ɖo gbesisɔmɛ hwebǐnu bó ná d’alɔ mǐ, bɔ mǐ ba ná cí yě ɖɔhun! Alan e nyí mɛxó agun tɔn ɖé, bó ɖo xwe 45 ɖó wɛ é ba ná nyɔ́ lyá. Alan lin tamɛ dó kpɔ́ndéwú Jezu tɔn jí, bó ɖɔ: “Jezu sín alɔnu nɔ ján, amɔ̌, gbɛtɔ́ e ɖó xwe vovo lɛ́ é nɔ wá gɔ̌n tɔn, bó nɔ vo fɛɛ, bó nɔ byɔ́ alɔdó tɔn. Yě nɔ mɔ ɖɔ nya ɖé wɛ é nyí, bɔ nǔ émítɔn nɔ ɖu ayi mɛ n’i nǔgbó nǔgbó. Un ba bó ná cí Jezu ɖɔhun, bó ná nɔ nyɔ́ lyá, nɔ dó xɔ́ntɔn mɛ, lobo nɔ lɛ́ ké ya nú mɛ.”

16. Nɛ̌ xó e è ɖɔ ɖo Ðɛhan 119:59, 60 mɛ lɛ́ é zínzán ka sixú d’alɔ mǐ bɔ mǐ ná wa nǔ Jezu ɖɔhun ganjí gbɔn?

 ¹⁶ Ényí mǐ ma kpé wú bó wa nǔ Jezu ɖɔhun bónú xó bǐ vɔ ɖ’é wú ǎ ɔ, awakanmɛ ɖó ná kú mǐ ǎ. (Ja. 3:2) Mɛ e ɖo alɔlyɛnzɔ́ kplɔ́n wɛ é ɖé sixú wa nǔ gǎn tɔn ɖɔhun bónú xó bǐ nɔ vɔ ɖ’é wú ǎ. Amɔ̌, ényí nǔ e é nɔ wa nyi do lɛ́ é nɔ kplɔ́n nǔ i, bɔ é nɔ lɛ́ dó gǎn bó nɔ wa nǔ gǎn tɔn ɖɔhun lěe é kpé wú gbɔn é ɔ, é ná kpo ɖo azɔ̌ tuun d’é jí wɛ. Ðo ali ɖokpó ɔ nu ɔ, ényí mǐ nɔ dó gǎn bá zán nǔ e mǐ kplɔ́n ɖo Biblu kplɔ́nkplɔ́n mǐtɔn hwenu lɛ́ é, lobo nɔ lɛ́ dó gǎn bá kpɔ́n te d’é jí ɔ, mǐ ná kpé wú bá xwedó kpɔ́ndéwú Jezu tɔn hú gǎn.—Xa Ðɛhan 119:59, 60.

17-18. Ényí mǐ nɔ xwedó kpɔ́ndéwú mɛɖée sísɔ́ dó sá vɔ̌ tɔn Jezu tɔn ɔ, le tɛ́ lɛ́ mǐ ka ná mɔ?

¹⁷ Ényí mǐ nɔ sɔ́ mǐɖée dó sá vɔ̌ ɔ, é sixú sísɛ́ mɛ ɖěvo lɛ́ lɔ bɔ yě lɔ ná wa nǔ ɖokpó ɔ. Mɛxó agun tɔn ɖé nɔ nyí Tim, bó ɖɔ: “Nɔví súnnu wínnyáwínnyá ɖé lɛ́ ɖo mǐ gɔ́n, bɔ yě yi nukɔn, bó húzú devízɔ́watɔ́ sinsɛnzɔ́wiwa tɔn lɛ́; yě mɛ ɖé lɛ́ ka ɖo wǐnnyáwínnyá mɛ tawun. Hwɛjijɔ e wú wɛ é ɖokpó wɛ nyí ɖɔ yě mɔ lěe mɛ ɖěvo lɛ́ ɖo gbesisɔmɛ bá d’alɔ sɔ é, bɔ yě lɔ jló ná wa nǔ yě ɖɔhun. Nɔví súnnu wínnyáwínnyá énɛ́ lɛ́ d’alɔ agun mǐtɔn, bó lɛ́ d’alɔ mɛxó agun tɔn lɛ́ tawun.”

¹⁸ Mɛ gěgé nyí cejɛ́nnábínɔ tawun ɖo gbɛ ɔ mɛ ɖo égbé. Amɔ̌, togun Jehovah tɔn gbɔn vo bǐ mlɛ́mlɛ́. Gbigbɔ mɛɖée sísɔ́ dó sá vɔ̌ tɔn Jezu tɔn dɔn mǐ tawun, bɔ mǐ kán ɖ’é jí bó ná wa nǔ éɖɔhun. É ɖo gaan ɖɔ mǐ kún sixú wa nǔ Jezu ɖɔhun bónú xó bǐ vɔ ɖ’é wú ó, amɔ̌, mǐ sixú “sɔ́ afɔ dó afɔdo tɔn lɛ́ mɛ” télélé. (1 Pi. 2:21) Ényí mǐ nɔ wa nǔ e wú mǐ kpé é bǐ bó nɔ wa nǔ Jezu ɖɔhun ɔ, mǐ ná ɖ’awǎjijɛ, ɖó mǐ tuun ɖɔ nǔ mǐtɔn nyɔ́ Jehovah nukúnmɛ.