1. Ki bèl mantalité sèrvitèr Jéova-ya gen ?

 TAN-LONTAN, Labib-a té di ki sèrvitèr Jéova-ya té ké ‘bay yé fòrs ké tout yé tchò’ pou sèrvi Jéova anba dirèksyon so Pitit (Ps. 110:3). Nou ka byen wè sa profési-a ka fèt jòdla. Chak lannen, a ké bon balan sèrvitèr Jéova-ya ka pasé roun patché lèr ka préché. Pésonn pa ka péyé yé pou yé fè sa. Yé ka fè sa paské yé lé fè l’. Yé ka pran tan osi pou idé yé frè ké sò-ya trapé sa yé bézwen, pou ankourajé yé ouben pou fè yé lafwa annan Jéova vin pi fò. Ansyen ké asistan-yan, yé menm, ka pasé bokou tan ka préparé diskour yé ké bay é pou alé wè yé frè ké sò pou ankourajé yé. Kisa ki ka pousé pèp Jéova-a fè tout sa travay-a ? A paské yé kontan Jéova é yé kontan moun-yan (Mat. 22:37-39).

2. Dapré Romains 15:1-3, ki èkzanp Jézi bay ?

² Èkzanp Jézi bay nou-a bèl toubonnman : i toujou té ka gadé pou sa ròt-ya té bézwen anvan i gadé pou sa li menm té bézwen. Nou ka fè tousa nou pouvé pou nou fè kou li (li Romains 15:1-3). É sa-ya ki ka fè kou li ka trapé bénédiksyon. A sa menm Jézi di : « Nou gen plis tchò kontan lò nou ka bay ki lò nou ka rousouvwè » (Actes 20:35).

3. Kisa nou ké wè annan sa artik-a ?

³ Annan sa artik-a, nou ké wè plizyèr sakrifis Jézi fè pou idé ròt-ya, é nou ké wè kouman nou pouvé imité l’. Nou ké wè osi sa nou pouvé fè pou nou plis anvi sèrvi ròt-ya.

4. Kouman Jézi gadé pou ròt-ya anvan i gadé pou so kò ?

⁴ Jézi idé ròt-ya menm lò i té las. Sonjé kouman Jézi réyaji lò roun patché moun vin jwenn li asou roun montangn, pitèt tou pròch ké Kafarnaòm. Jézi té pasé tout lannwit ka priyè, donk i té divèt byen las. Mé i vin gen lapenn pou maléré-ya ké moun malad ki té la. A pou sa i géri yé. Mé i bay osi pi bèl diskour ankourajan moun pa janmen tandé : Diskour asou montangn-an (Luc 6:12-20).

5. Kouman chèf fanmi-ya ka imité mantalité Jézi lò yé las ?

⁵ Kouman chèf fanmi-ya ka imité Jézi ? Imajiné sa : Roun chèf fanmi ka rantré an so kaz apré i travay rèd tout lajournen, i las menm. Mé sa jou-a, a jou pou étidyé Labib-a ké so fanmi. I té ké byen anvi pa fè l’ sa jou-a mé i ka sipliyé Jéova bay li fòrs. Jéova ka réponn so lapriyè é papa-a ka étidyé Labib-a ké so fanmi kou yé gen labitid fè l’ chak simenn. Sa jou-a, timoun-yan ka anprann roun bagaj ki enpòrtan : pou yé papa ké yé manman, adoré Jéova, a sa ki pi enpòrtan pasé pyès ròt bagaj.

6. Bay roun èkzanp ki ka montré ki Jézi té ka pran asou so tan pou idé ròt-ya.

⁶ Jézi té ka pran asou so tan pou idé ròt-ya. Ès to pouvé imajiné kouman Jézi té fika lò i anprann ki yé té tchwé Janbatis, so bon zanmi ? Jézi té divèt gen bokou chagren. Labib-a ka di : « Lò i tandé sa [ki Jan té mouri], Jézi pran bato-a, i soti koté i té fika é i alé annan roun koté i pa té gen pyès moun, pou i rété li rounso » (Mat. 14:10-13). Nou ka konprann poukisa i té lé rété li rounso. Bokou moun pi kontan rété yé rounso pou pléré asou moun yé kontan ki mouri. Mé sa kou-a, Jézi pa rivé fè sa. Roun patché moun rivé annan sa koté-a anvan li menm. Kouman Jézi réyaji ? I konprann sa sa moun-yan té bézwen é i « koumansé gen pityé pou yé ». Jézi wè ki yé té bézwen Bondjé idé yé ké konsolé yé, donk i kouri idé yé. Si to ka byen gadé,  « i koumansé anprann yé [pa déztrwa bagaj, mé] roun patché bagaj » (Marc 6:31-34 ; Luc 9:10, 11).

7-8. Bay roun èkzanp ki ka montré kouman ansyen-yan ka imité Jézi lò roun moun annan asanblé-a bézwen yé idé l’.

⁷ Kouman ansyen-yan ka imité Jézi ? Nou gen bokou rékonésans pou travay nou ansyen ka fè pou nou ké tout yé tchò ! Souvan frè ké sò-ya annan yé asanblé pa savé tousa yé ka fè. Parèkzanp, lò i gen roun irjans, frè-ya ki annan “comité de liaison hospitalier”-a ka kouri idé yé frè ké sò ki ka soufri. É souvan, a an mitan lannwit sa ka rivé ! Mé kou yé gen konpasyon pou yé, sa ansyen-yan, ansanm ké yé fanmi, ka mété entérè yé frè ké sò anvan yépa.

⁸ I gen ansyen ki ka idé osi pou konstrwi sal di Rwayonm-yan ké ròt batiman ankò é ki ka idé osi annan komité pou poté sékour. É pa menm palé di tan yé ka pasé ka ansényé ké ankourajé yé frè ké sò annan yé asanblé ! Tout sa frè-ya ké yé fanmi ka mérité nou félisité yé. Jéova ké rékonpansé bèl mantalité yé gen ! Mé, kou tout moun, ansyen-yan divèt rézonab. Yé pa divèt pasé tèlman tan ka fè bagaj pou asanblé-a ki yé pa gen tan pou okipé di yé fanmi ankò.

9. Dapré Philippiens 2:4, 5, ki mantalité tout krétyen-yan divèt chaché gen ?

⁹ (Li Philippiens 2:4, 5.) A pa ansyen-yan rounso ki divèt anprann imité  Jézi. A nou tout ki divèt mété entérè ròt-ya anvan noupa. Labib-a ka di ki Jézi « pran fòrm roun èsklav » (Phil. 2:7). Réfléchi asou sa sa lé di. Roun bon èsklav ouben roun bon sèrvitèr té ka chaché okazyon pou fè so mèt plézi. Paské to sa èsklav Jéova é to ka sèrvi to frè ké sò-ya, to lé ankò pi itil pou Jéova ké pou to frè ké sò-ya. Pou to rivé fè sa, réfléchi asou konsèy nou ké wè aprézan.

10. Kisa nou pouvé doumandé nou kò ?

¹⁰ Réfléchi asou ki mantalité to gen. Doumandé to kò : « Ès mo toujou paré pou bay mo tan ké mo fòrs pou idé ròt-ya ? Parèkzanp, kouman mo ka réyaji lò yé ka doumandé mo alé wè roun frè ki gen so ti laj, ouben alé chaché roun sò ki ja granmoun pou mennen l’ annan réinyon-yan ? Ès mo ka kouri idé lò yé bézwen moun pou nétwayé koté nou ka fè nou gran asanblé ouben pou nétwayé sal di Rwayonm-an ? » Lò nou vouwé nou lavi pou Jéova, nou promèt li ki nou té ké sèrvi tousa nou gen pou adoré li. I lé nou itilizé nou tan, nou fòrs ké tousa nou gen pou idé ròt-ya. Donk so tchò kontan lò i ka wè nou ka fè sa ké tout nou tchò. Si nou ka wè ki nou gen progrè pou fè, kisa nou pouvé fè ?

11. Kouman lapriyè pouvé bay nou plis anvi sèrvi ròt-ya ?

¹¹ Priyè Jéova ké tout to tchò. Si aprézan to ka wè ki to divèt fè progrè mé to pa djè anvi chanjé, priyè Jéova é di li franchman sa ki annan to tchò. Di li sa to ka rousanti é doumandé li bay to « anvi aji é an menm tan fòrs pou aji » (Phil. 2:13).

12. Kouman roun jenn frè pouvé idé so asanblé ?

¹² Si to sa roun jenn frè, doumandé Jéova idé to pou to plis anvi fè plis bagaj pou idé frè ké sò-ya annan to asanblé. Annan plizyèr péyi, i gen plis ansyen pasé i gen asistan é roun patché annan yé ja gen yé ti laj. Anplis di sa, kou òrganizasyon-an ka grandi, nou bézwen plis jenn frè pou idé nou pran swen di pèp Jéova-a. Si to paré asèpté fè nenpòrt ki bagaj yé ka doumandé to fè pou sèrvi to frè ké sò-ya, to tchò ké kontan. Poukisa ? Paské to ké fè Jéova plézi, to ké gen roun bon répitasyon é to ké kontan pas to idé ròt-ya.

13-14. Kisa nou pouvé fè pou idé nou frè ké sò-ya ? (gadé zimaj-a anlè prémyé paj-a).

¹³ Byen gadé pou wè lò roun moun bézwen yé idé li. Apot Pòl di krétyen-yan ki té ka rété Jidé : « Pa bliyé fè sa ki byen é partajé ké ròt-ya, pas Bondjé kontan sa kalité sakrifis-ya » (Héb. 13:16). A té roun bon konsèy ! Déztrwa lannen apré yé rousouvwè sa lèt-a, sa krétyen-yan té gen pou lésé yé kaz, yé travay ké yé fanmi ki pa té krétyen. É yé té divèt « kouri alé séré pa bò d’ montangn-an » (Mat. 24:16). A sa moman-an, sa té enpòrtan pou yé té idé yé konpanyen. Si yé té ja pran labitid partajé sa yé té gen ké yé konpanyen, kou Pòl té di yé fè l’, lò yé rivé annan yé nouvo koté sa té pi fasil pou yé adapté yé kò.

¹⁴ Nou frè ké sò-ya pa toujou ka di nou si yé bézwen roun bagaj. Parèkzanp, roun sò ka mouri é i ka lésé so mari li rounso. Ès nou frè té ké bézwen yé fè manjé pou li, yé mennen l’ roun koté ouben yé idé l’ nétwayé kaz-a ? Pitèt i pa ké  di anyen paské i pa lé déranjé pésonn. Mé i té ké byen kontan si nou té ka idé li anvan menm i doumandé nou fè l’. Nou pa divèt pansé ki i ké toujou gen roun moun pou idé frè-a ouben ki i ké toujou fè nou savé kouman nou pouvé idé l’. Doumandé to kò : « Si mo té annan so sitiasyon, kisa mo té ké lé yé fè pou mo ? »

15. Kisa nou divèt fè si nou lé sèrvi nou frè ké sò-ya ?

¹⁵ Fè ròt-ya santi yé kò alèz pou yé vin doumandé to idé yé. Pitèt to konnèt frè ké sò annan to asanblé ki toujou paré pou idé ròt-ya. Yé pa ka janmen fè nou santi ki nou ka déranjé yé. É nou savé ki yé toujou paré pou idé nou. Nou té ké byen lé sanblé yé ! Alan, roun ansyen ki gen 45 an, réfléchi asou èkzanp Jézi paské i té lé fè ròt-ya santi yé kò alèz pou yé vini doumandé li idé yé. Men sa i ka di : « Jézi té okipé, mé tout moun, piti kou gran, té kontan li é yé pa té pè doumandé li idé yé. Yé té savé ki i té ka vréman gadé pou yé. Sa mo lé, a imité Jézi. Épi mo lé yé wè mo kou roun moun yé pouvé vini wè fasilman pou doumandé mo idé yé, roun moun ki agréyab, roun moun ki ka sousyé so kò di ròt-ya. »

16. Si nou ka fè sa Psaume 119:59, 60 ka di, kouman sa ké idé nou byen swiv èkzanp Jézi ?

¹⁶ Nou pa divèt dékourajé si nou pa ka rivé imité Jézi san nou pa fè pyès fot (Jacq. 3:2). Lò roun apranti ka koumansé anprann ké roun mèt artizan, i pa pouvé rivé roufè tousa mèt-a ka fè san i pa fè pyès fot. Mé si i ka korijé so kò lò i ka fè roun fòt é si i ka fè tousa i pouvé pou imité mèt artizan-an, piti piti i ké  vin pi vayan. A menm bagaj-a pou nou : si nou ka fè sa nou ka anprann lò nou ka étidyé Labib-a é nou ka fè tousa nou pouvé pou korijé nou défo, nou ké rivé byen swiv modèl Jézi lésé pou nou (li Psaume 119:59, 60).

17-18. Si nou ka imité mantalité Jézi, ki bénédiksyon nou ké trapé ?

¹⁷ Lò nou paré pou idé, ròt-ya anvi fè menm bagaj-a. Roun ansyen yé ka aplé Tim ka di : « Nou gen jenn frè ki fè progrè é ki divini asistan. Roun ran annan yé té jenn toujou. Roun bagaj ki idé yé, a ki yé té ka wè kouman ròt-ya té paré pou idé é yé té lé fè kou yé. Sa jenn frè-ya ka idé nou bokou annan asanblé-a é yé ka randé travay ansyen-yan pi fasil pou fè. »

¹⁸ Nou ka viv annan roun monn koté tout moun ka gadé pou yé douvan lèstomak. Mé annan pèp Jéova-a, a pa konsa sa ka pasé. Fason Jézi té toujou paré pou sèrvi ròt-ya ka touché nou, é nou byen désidé swiv so èkzanp. A vré, nou pa pouvé swiv tras Jézi san nou pa fè pyès fot. Mé nou pouvé « byen swiv so tras » (1 Pierre 2:21). Si nou ka fè tousa nou pouvé pou imité mantalité Jézi, nou osi nou ké kontan pas nou ka fè Jéova plézi.