1. Tera te aroaro ae raoiroi ae ti noria i buakoia ana aomata Iehova?

 E A KAMAN taekinaki n te Baibara bwa ana aomata te Atua, a na ‘kukurei n anga ngaiia’ bwa a na beku ibukin Iehova i aan ana kairiri Natina. (TaiAre. 110:3) E a kakoroaki bukin te taetae ni burabeti anne ngkai. Ni katoa ririki, ao ana toro Iehova a kabanei aoa aika bati n aia mwakuri n uarongorongo. A aki kabooaki ibukini karaoan aei, ma a boni kani karaoia. A karekea naba aia tai ni buokiia tariia ni baike a kainnanoi, ni kaungaia, ao ni kakorakorai aia onimaki. A kabanea aia tai ae bati unimwaane ao tabonibai, ibukini katauraoan tibwangaia n taiani bobotaki ao kawaraia taari n aia auti ibukini kaungaaia. Tera bukini karaoan te mwakuri aei? Bon ibukin te tangira, ae tangiran Iehova ao tangiraia raoia n aomata.—Mat. 22:37-39.

2. Ni kaineti ma ae taekinaki n I-Rom 15:1-3, tera te katoto are e kateia Iesu?

² E katea te katoto ae rianako Iesu n arona ni moanibwaia nanoia tabemwaang nakon oin nanona. Ti karaoa ara kabanea ni konaa ni kakairi n arona. (Wareka I-Rom 15:1-3.) A na boni karekei kakabwaia naake a kakairi irouna. E taku Iesu: “E kakukurei riki te anga nakon te anganaki.”—Mwa 20:35.

3. Tera ae ti na rinanona n te kaongora aei?

³ N te kaongora aei, ti na rinanoi bwaai tabeua ake e karaoi Iesu ibukini buokaia tabemwaang ao arora ni kakairi n ana katoto. Ti na rinanon naba arora ni karikirakei nanora ni kani buokiia tabemwaang.

4. E kangaa Iesu ni moanibwaia nanoia tabemwaang nakon oin nanona?

⁴ E boni buokiia naba tabemwaang Iesu e ngae ngke e a kua. Iangoa aron Iesu nakoia aomata aika mwaitikurikuri ake a kawaria i aon te maunga tao i rarikini Kaberenaum. E a tia Iesu n tataro ni kangainaa. E a bae n rangi ni kua, ma ngke e noriia aomata aika bati, e nanoangaiia naake a maiu ni kainnano ao ake a aoraki i buakoia. E aki tii katoki aorakia ma e anga naba te kabwarabwara ibukia aomata ae moan te anainano ae ataaki bwa te Kabwarabwara i Aon te Maunga.—Ruka 6:12-20.

5. A na kangaa atun utu ni kakairi n aron Iesu n anga ngaia, e ngae naba ngkana a a kua?

⁵ Aroia atun utu ni kakairi iroun Iesu. Iangoa aei: Ngke e oki man ana mwakuri atun te utu temanna, e a bae n rangi ni kua. E boni bae ni kaririaki bwa e na taona moa aia taromauri n utu are a na riai ni karaoia n te tairiki anne. Ma e bubutiia Iehova te korakora bwa e aonga ni kona ni kaira te reirei. E kaekaa ana tataro Iehova ao e a karaoaki te reirei n aron ae a taneiai iai. E reke reireiaia ae kakawaki natiia n te tairiki anne, bwa a moanibwai riki bwaai n taamnei aia karo nakoni bwaai ni kabane.

6. Taekina te katoto teuana ibukin aron Iesu n anga oin ana tai ni buokiia iai tabemwaang.

⁶ E bon tituaraoi Iesu n anga ana tai. Ko kona n iangoa ana namakin Iesu ngke e a ataia ae e a kamateaki raoraona are Ioane te tia Bwabetito? E boni bae n rangi n nanokawaki iai. E kangai te Baibara: “Ngke e ongo Iesu [maten Ioane] ao e kitana ikekei n te booti nakon te tabo ae akea kaaina bwa e na kaokoroa iai.” (Mat. 14:10-13) Ti ota bwa e aera ngkai e kan tiku n tii ngaia. A bati i buakora aika a kan tiku n tii ngaiia naba ngkana a nanokawaki. Ma e bon aki reke anne iroun Iesu, bwa a a kaman roko aomata aika bati imwaina n te tabo are akea kaaina. Ma tera aron Iesu? E iaiangoa te bwai ae a kainnanoia aomata aika bati aikai, ao “e korakora nanoangaaia.” E ataia bwa a kainnanoa  buokaia ao kabebeteaia mairoun te Atua, ngaia are e a waekoa naba ni buokiia ngkekei. “E a reireinia [tiaki tii bwaai tabeua, ma boni] baika bati.”—Mareko 6:31-34; Ruka 9:10, 11.

7-8. Taekina te katoto ae kaotaki iai aroia unimwaane aika tatangira ni kakairi iroun Iesu ngkana iai ae e kainnanoa buokana.

⁷ Aroia unimwaane aika tatangira, ni kakairi iroun Iesu. Ti rangi ni kakaitau ngkai a anga ngaiia unimwaane ibukira! A aki ataaki baike a karaoi aika bati irouia angia taari n te ekaretia. N te katoto, ngkana iai te kabuanibwai ae karina n riki, ao kaain te Komete Ibukin te Reitaki ma te Onnaoraki, a waekoa ni buokiia taari. N angiin te tai, a riki kabuanibwai akanne n te nukanibong! Ma ibukin nanoangaaia raoia n te onimaki aika reke n te kangaanga, ao unimwaane aikai ma aia utu a karimoaa moa kainnanoia taari aikai nakon oini kainnanoia.

⁸ A ibuobuoki naba unimwaane ni katean Taabo n Taromauri ao kateitei riki tabeua, n ikotaki ma mwakuri n ibuobuoki n tain te kabuanibwai. Ao a kabanea naba aia tai ae bati n reireinira ao ni kakaungaira. Ti bon riai ni kamoamoaia taari mwaane aikai ma aia utu. E bia kakabwaiaa Iehova nanoia aika raraoi ake a kaotiotii! A bon riai unimwaane ni bwaina te iangoraoi naba n aroia aomata nako. A aki riai ni kabanea aia tai ae e a rangi ni bati ni mwiokoaia n te ekaretia, n te aro are ai akea aia tai n tabeakinia aia utu.

9. Ni kaineti ma I-Biribi 2:4, 5, tera te aroaro ae a riai ni karikirakea Kristian?

⁹ Wareka I-Biribi 2:4, 5. Ti bane ni  kona ni kakairi iroun Iesu ni moanibwaia kainnanoia tabemwaang nakon oini kainnanora, ma tiaki tii unimwaane. E taekinaki n te Baibara bwa e “arona aron te toro.” (IBir. 2:7) Iangoa kakawakin te taeka anne. E boni bae te toro ke te tia mwakuri ae kakaonimaki ni kakaaei aanga ake e na kukurei iai ana toka. Ngkai ana toro Iehova ngaira ao ti beku ibukia taari, akea te nanououa bwa ti kani kamanenaaki n te aro ae bati riki ibukin Iehova ao raora n te onimaki. Ko kona ni karaoa anne man rinanoan reirei aika imwina.

10. Baikara titiraki aika ti kona n titirakinira iai?

¹⁰ Nenera aroarom. Titirakiniko ni kangai: ‘I kukurei n anga au tai ao korakorau ibukini buokaia tabemwaang? N te katoto, tera arou ngkana I tuangaki bwa N na kawara te tari te mwaane ae e a kara n aia tabo kaara, ke tao ni kakaira te tari te aine ae e a kara nakoni bobotaki? I waekoa n anganano bwa N na ibuobuoki ngkana e kainnanoaki kaitiakan te tabo ae e na bo iai te bwabwaro, ke kateimatoaan raoiroin te Tabo n Taromauri?’ E kukurei Iehova ngkana ti tituaraoi n anga ara tai ao kaubwaira ake a katabuaki nakoina ibukini buokaia tabemwaang. Ngkana ti nori arora ake ti riai ni kanakoraoi, tera ae ti kona ni karaoia?

11. E na kangaa te tataro ni buokira ni karikirakea nanora ni kan anga ngaira?

¹¹ Kakorakorako n tataro nakon Iehova. Iangoia bwa ko a ataia ae iai aroarom aika ko riai ni kanakoraoi n itera tabeua, ma akea nanom ni kani karaoi bitaki. Ngkana ngaia anne, kakorakorako n tataro nakon Iehova. Bwaina te koaua. Taekina am namakin nakon Iehova ao butiia bwa e na karekea ‘nanom ma ni mwakuri.’—IBir. 2:13.

12. A na kangaa taari mwaane aika ataei riki ake a a tia ni bwabetitoaki n ibuobuoki n aia ekaretia?

¹² Ngkana te tari te mwaane ngkoe ae ko ataei, butiia Iehova bwa e na buokiko ni karikirakea nanom ni kani kabatiaa riki am tai ni buokiia taari. N aaba tabeua, a bati riki unimwaane nakoia tabonibai, ao angia tabonibai akanne a a boni mwaane. Ma ngkai e a ririkirake mwaitiia kaain ana botaki Iehova, ti a kainnanoia taari mwaane aika ataei riki bwa a na buokiia unimwaane n tararuaiia ana aomata Iehova. Ngkana ko tauraoi ni beku n itera ake ko kainnanoaki iai, ko na boni kukurei. Bukin tera? Ibukina bwa ko kakukureia Iehova, e a ataaki arom irouia taari ae ko tatauraoi n ibuobuoki, ao e na reke iroum te raunnano mani buokaia tabemwaang.

13-14. Tera ae ti kona ni karaoia ni buokiia iai taari? (Nora te taamnei ni moan te maekatin.)

¹³ Kamatairikiko nakoni kainnanoia tabemwaang. E kauringia taian Ebera Bauro ni kangai: “Tai mwaninga ni karaoa ae raoiroi ma n tituaraoi ni buokiia aomata tabemwaang n ami bwai, bwa e kukurei te Atua n aeka ni karea akanne.” (Ebera 13:16) Bon te taeka n reirei ae manena anne! E aki maan imwin reken te reta aei irouia Kristian ake i Iutaia, ao a a bon riai ni kitani mwengaia, aia bitineti, aia utu aika tiaki kaain te onimaki, ao a a riai ni “birinako nakoni maunga.” (Mat. 24:16) N te tai anne, a a boni bae ni kainnanoa te ibuobuoki i marenaia. Ngkana arona bwa a a kamani maiuakina ana taeka n reirei Bauro are a na tituaraoi n ibuobuoki i marenaia n aia bwai, e na boni bebete bitakin aroia nakoni maiuia ae boou.

¹⁴ A boni bae taari n aki tuangira n taai nako baike a kainnanoi. N te katoto, e matunako n te mate te tari te aine temanna,  ao e a tiku imwina buuna ma te rawawata. E kainnanoa buokana te tari te mwaane aei ibukini kanana, baona, ke tabena ni mwengana? E boni bae n aki taekina te bwai teuana bwa e rawa ni karawawataira. Ma e na bon rangi ni kakaitau ngkana ti biririmoa ni buokia n te bwai ae e kainnanoia. Ti aki riai n iangoia bwa iai temanna ae e na buokia ke e na bon tuangira n taai nako te bwai ae e kainnanoia. Titirakiniko ni kangai, ‘Ngke arona bwa e riki aei nakoiu, tera te ibuobuoki ae I rangi ni kainnanoia?’

15. Tera ae ti riai ni karaoia ngkana ti kani buokiia tabemwaang?

¹⁵ Riiki bwa te tari ae kai kawaraki. Ko bae ni kinaia taari n am ekaretia aika tauraoi n taai nako ni buokiia tabemwaang. A aki kona n anganira te namakin ae ti a katabetabeia. Ti ataia ae ti kona ni kawariia ngkana ti kainnanoa buokara, ao ti kani kakairi naba irouia! E tangiria naba Alan ae te unimwaane n te ekaretia ae ai 40 tabun ana ririki, bwa e na kai kawaraki. E iaiangoa ana katoto Iesu ao e taku: “E rangi n tatabetabe Iesu, ma a kai kawaria aomata aika kakaokoro nako aia ririki ao a aki maakinna ni bubutiia buokaia. A ataia ae e bon tabeakinia raoi Iesu. I rangi ni kani kakairi n aroaron Iesu ao ni kinaaki bwa temanna naba ae e kai kawaraki, e tatangira, ao e mwamwannano.”

16. E na kangaa maiuakinan Taian Areru 119:59, 60, ni buokira bwa ti na kakairi raoi n ana katoto Iesu?

¹⁶ Ti aki riai ni kabwarai nanora ngkana ti kabwaka ni kakairi iroun Iesu n te aro ae kororaoi. (Iak. 3:2) Te aomata ae kataneiaaki n te korotaamnei, e bon aki kona ni katotonga ana mwakuri ana tia reirei n te aro ae kororaoi. Ma ngkana e karekea reireiana man ana kairua ao ni kakorakoraa  ni kakairi n ana katoto ana tia reirei, e na bon ririkirake nakoraoin ana korotaamnei. N aron naba anne, ngkana ti maiuakini baike ti reiakin n ara ukeuke n reirei n te Baibara, ao ti kakorakoraira ni kaetii arora ake ti kabwaka iai, e na bon nakoraoi arora ni kakairi n ana katoto Iesu.—Wareka Taian Areru 119:59, 60.

17-18. Baikara kakabwaia aika ti na karekei ngkana ti kakairi n aron Iesu n anga boni ngaia?

¹⁷ Ngkana ti tatauraoi n ibuobuoki, a na manga kaungaaki tabemwaang bwa a na karaoa naba anne. E taekina aei te unimwaane n te ekaretia ae Tim: “Iai taari mwaane aika rikirake n te onimaki ao a a mwiokoaki ngkai bwa tabonibai. A rangi n ataei tabeman i buakoia. Bukina teuana ngkai e riki anne, bwa a nora tauraoia tabemwaang n ibuobuoki ao a kani kakairi naba irouia. Ibukin aroia n anga ngaiia, e a buokaki iai ara ekaretia ao a boutokaiia naba unimwaane.”

¹⁸ Ti a maeka ngkai n te aonnaba ae taabangaki iai te bangaomata. Ma a rangi ni kaokoro ana aomata Iehova. A anaaki nanora n aron Iesu n anga boni ngaia, ao ti a motikia bwa ti na kakairi n ana katoto. Ti bon aki kona ni kakairi irouna n te aro ae kororaoi, ma ti kona n “toua raoi mwini mwanekana.” (1Bet. 2:21) Ngkana ti karaoa ara kabanea ni konaa ni kakairi n aron Iesu n anga boni ngaia, ti na boni kukurei ibukina bwa ti kakukureia Iehova.