1. ¿Mbaʼépa ojeprofetisa vaʼekue ojapotaha Ñandejára siervokuéra, ha mbaʼéichapa ojekuaa upéva?

 YMAITEREÍMA la Bíbliape ojeprofetisa hague Ñandejára siervokuéra kyreʼỹme ojeofresetaha ombaʼapo hag̃ua chupe g̃uarã, ha péva pe traváhore oñenkarga hína Itaʼýra Jesús (Sal. 110:3). Upe profesía ningo oñekumpli porãiterei ñane tiémpope, pórke ñande jaservíva Jehovápe káda áño jaipuru millones de óra japredika hag̃ua, hiʼarive avave ndopagái ñandéve upévare síno ñande voluntárionte. Ha avei ñañehaʼãmbaite ñaipytyvõ ñane ermanokuérape opa mbaʼe oikotevẽvape. Umi ansiáno katu ohasa hetaiterei tiémpo oprepara hag̃ua umi párte orekótava rreunionhápe, ha avei oñangareko hag̃ua ermanokuéra oĩvare kongregasiónpe. Hetaiterei ningo la traváho oĩva Jehová organisasiónpe. ¿Péro mbaʼépa ñanemomýi jajapo hag̃ua entéro koʼã mbaʼe? Ñande jahayhueterei Jehovápe ha avei la héntepe (Mat. 22:37-39).

2. Ohechaukaháicha Romanos 15:1-3, ¿mbaʼe ehémplopa oheja vaʼekue Jesús?

² Jesús oheja vaʼekue ñandéve peteĩ ehémplo iporãitereíva, pórke haʼe siémpre omotenonde vaʼekue la héntepe ha nopensái ijehénte. Ñande katu ñañehaʼãmbaite jasegi hag̃ua iñehémplo (elee Romanos 15:1-3). Ha jajapóramo upéva jahupytýta hetaiterei mbaʼe porã. Upévare voi Jesús heʼi vaʼekue: “Javyʼaiteve ñameʼẽvo, ñandéve oñemeʼẽ rangue” (Hech. 20:35).

3. ¿Mbaʼépa ñaanalisáta ko artíkulope?

³ Ko artíkulope ñaanalisáta mbaʼe mbaʼépa ojapo vaʼekue Jesús  omotenonde hag̃ua la héntepe, ha ohechauka hag̃ua nopensaiha ijehénte. Avei ñaanalisáta mbaʼéichapa ñande ikatu jasegi iñehémplo, ha mbaʼépa ñanepytyvõta ñamotenondese hag̃ua ñande rapichakuérape.

4. ¿Mbaʼéichapa Jesús omotenonde vaʼekue umi ótrope opensa rangue ijehénte?

⁴ Jesús oipytyvõ vaʼekue la héntepe, ikaneʼõitereíramo jepe. Epensamína mbaʼépa ojapo vaʼekue Jesús peteĩ vuéltape oúrõ guare hetaiterei hénte hendápe peteĩ montáñape, posívlemente oiméne Capernaúm ypýrupi raʼe. Pe pyhare upe mboyve ningo Jesús tóda la nóche oñemboʼe kuri, ha oiméne ikaneʼõiterei raʼe. Péro ohechárõ guare umi hénte apytépe oĩha heta imboriahúva ha hasykatúva, oipytyvõseterei voi chupekuéra. Ha ndahaʼéi omongueránteva umi héntepe, síno upérõ guare ojapo vaʼekue peteĩva umi diskúrso iporãvéva ojejapóva koʼág̃a peve: Pe Sermón del Mónte (Luc. 6:12-20).

5. ¿Mbaʼéichapa umi omoakãva ogapy ikatu osegi Jesús ehémplo ikaneʼõramo jepe?

⁵ ¿Mbaʼéichapa umi omoakãva ogapy ikatu osegi Jesús ehémplo? Eñeimahinamína peteĩ ermáno ikaneʼõitereiha og̃uahẽvo hógape ombaʼapo rire un día pytã. Ikatu hína upe situasiónpe haʼe opensa iporãvetaha ndojapóinteramo hikuái pe estúdio de família orekóva planeádo upe pyharépe g̃uarã. Péro ojerure Jehovápe omombaretemi hag̃ua chupe ikatu hag̃uáicha ojapo pe estúdio ikaneʼõramo jepe. Jehová okontesta chupe la iñemboʼe ha upévare ojapo hikuái pe estúdio de família. ¿Mbaʼéichapa oipytyvõta upéva umi mitãme? Haʼekuéra oaprendéta álgo iñimportantetereíva upe pyharépe, pórke ohechakuaáta ituakuérape g̃uarã iñimportantetereiha iñadorasión Jehovápe.

6. Emombeʼu mbaʼépa ojapo vaʼekue Jesús oipytyvõ hag̃ua la héntepe oĩséramo jepe haʼeño.

⁶ Jesús oñemotiémpo vaʼekue oipytytvõ hag̃ua la héntepe, sapyʼánte oĩséramo jepe haʼeño. ¿Ikatúpa reñeimahina mbaʼéichapa oiméne haʼe oñeñandu raʼe oikuaárõ guare ojejuka hague Juan el Bautístape? Oiméne Jesús ombyasyeterei raʼe upéva. La Biblia heʼi voi: “Ohendúvo upéva, Jesús ojupi peteĩ varkoʼípe ha oho upégui peteĩ lugár ikatuhápe oĩ haʼeño” (Mat. 14:10-13). Ha ñantende porãiterei mbaʼérepa haʼe oñeñandu kuri upéicha, pórke oĩ heta ñande apytépe oñembyasýramo ihénte mano jave oĩséva haʼeñónte peteĩ tiémpore. Péro Jesús ndaikatumoʼãi kuri ojapo  upéva, pórke hetaiterei hénte oho hendápe pe lugár haʼe oho haguépe oĩ hag̃ua haʼeño. ¿Ha mbaʼéichapa orreaksiona Jesús ohechávo chupekuéra? Haʼe ombyasyeterei umi héntepe ha upévare opensa mbaʼéichapa ikatu oipytyvõ chupekuéra. Jesús ohechakuaa umi hénte oikotevẽha oñepytyvõ ha oñekonsola chupekuéra Ñandejára Ñeʼẽ rupive. Upévare oñepyrũ omboʼe chupekuéra, ha ndahaʼéi pyaʼe pyaʼénte, la Biblia heʼi voi oñepyrũ hague “omboʼe chupekuéra heta mbaʼe” (Mar. 6:31-34; Luc. 9:10, 11).

7, 8. Emombeʼu mbaʼe mbaʼépa ojapo umi ansiáno osegi hag̃ua Jesús ehémplo ermanokuéra oikotevẽ jave ajúda.

⁷ ¿Mbaʼéichapa umi ansiáno osegi Jesús ehémplo? Ñande ningo ñamombaʼeterei la ojapóva guive ñanderehehápe umi ansiáno. Haʼekuéra ningo hetaiterei ombaʼapo pe kongregasión rehehápe, ha la majoría ñande apytépe ni ndajahechái umi traváho ojapóva hína hikuái. Por ehémplo, oĩ jave peteĩ emerhénsia médika, umi ermáno ombaʼapóva Komite de Enlásepe pyaʼe oho oipytyvõ hag̃ua ermanokuérape. Heta koʼãichagua emerhénsia ningo oiko jepi pyhare rei, péro koʼã ansiáno ha umi ifamiliakuéra nopensái ijehénte, upéva rangue omotenonde umi ermánope.

⁸ Oĩ avei umi ansiáno ombaʼapóva oñemopuʼã hag̃ua Salón del Reino, Salón de Asambléa ha sukursál, ótro katu ombaʼapo umi Komite de Sokórrope. Ha ikatu avei ñapensa umi ansiáno oĩvare ñane kongregasiónpe voi, haʼekuéra ningo oipuru hetaiterei tiémpo ikatu hag̃uáicha ñanemboʼe, ñanemokyreʼỹ ha ñandeapoja. Entéro koʼã ermáno ha ifamiliakuéra ningo omerese jafelisita chupekuéra, ha Jehová katuete ovendesíta umi mbaʼe ojapóva hikuái. Péro umi ansiáno oñatende vaʼerã avei pono ohasa la rrája. Por ehémplo naiporãmoʼãi oipurúramo hetaiterei tiémpoma koʼã asignasiónpe, ha upéicha rupi ndaikatuvéima okuida porã ifamíliare.

9. Ohechaukaháicha Filipenses 2:4, 5, ¿mbaʼépa oñehaʼarõ entéro kristiánogui?

⁹ (Elee Filipenses 2:4, 5). Jaikuaaháicha, naentéroi oĩva kongregasiónpe haʼe ansiáno, péro enterovéva ikatu jasegi Jesús ehémplo. La Biblia heʼi voi hese oiko hague “peteĩ esklávoicha” (Filip. 2:7). Ha epensamíntena la heʼisévare ko téxto. Peteĩ esklávo ivaliósova ningo oheka voi oportunida ojapo hag̃ua umi mbaʼe ogustáva ipatrónpe. Ha ñande ningo haʼe Jehová esklávo ha jaservise avei ñane ermanokuérape. Upévare jajapose opa ikatúva Jehová servísiope ha ñane ermanokuéra rehehápe. Ñaanalisamína unas kuánta kósa ikatúva jajapo jahupyty hag̃ua upéva.

10. ¿Mbaʼe mbaʼépa iporãta ñañeporandumi?

¹⁰ Epensamína ndejehe. Eñeporandumína koʼã mbaʼe: “¿Aimépa dispuésto ajapóvo umi mbaʼe ndachegustáiva? ¿Añemotiémpopa aipytyvõ hag̃ua che ermanokuérape? ¿Mbaʼépa ajapóta ojejeruréramo chéve avisita hag̃ua peteĩ ermáno ijedávape aipytyvõ hag̃ua chupe hógape, térã agueraha hag̃ua peteĩ ermána ijedávape umi rreunionhápe? ¿Ajeofresépa ambaʼapo hag̃ua de voluntário umi asambleahápe térã ojejapóta jave mantenimiénto Salón del Réinope?”. Jehová ningo ovyʼaitereíta ñandereheve ohecháramo jaipuruha ñane tiémpo ha umi mbaʼe jarekóva ñaipytyvõ hag̃ua ñane ermanokuérape. Péicha ningo ñakumpli hína pe promésa jajapo vaʼekue ñañemeʼẽrõ guare chupe. Upévare, ¿mbaʼépa ikatu jajapo jahechakuaáramo ikatuha ñamehora koʼã mbaʼépe?

11. ¿Mbaʼépa jajapo vaʼerã ikatu hag̃uáicha ñaipytyvõse ñane ermanokuérape?

¹¹ Eñemboʼe Jehovápe nde pyʼaite guive. Ñamoĩ chupe rehechakuaaha tekotevẽha remehora koʼã mbaʼépe, péro ndahaʼéi la nekyreʼỹetereíva rejapo hag̃ua umi kámbio tekotevẽva. ¿Mbaʼépa ikatu rejapo upe kásope? Eñemboʼe Jehovápe nde pyʼaite guive. Nesinsérokena hendive ha emombeʼu porã chupe eikotevẽha haʼe omeʼẽ ndéve “pe deséo ha pe podér” eipytyvõ hag̃ua ermanokuérape (Filip. 2:13).

12. ¿Mbaʼépa ojapokuaa umi ermáno imitãva oipytyvõ porãve hag̃ua Jehová organisasiónpe?

¹² Nde haʼéramo peteĩ ermáno imitãva, ejerurékena Jehovápe tanepytyvõ ejapose hag̃ua hetave mbaʼe iñorganisasiónpe. Heta lugárpe ningo oĩ hetave ansiáno umi siérvo ministeriálgui, ha heta koʼã siérvo ministeriál ndahaʼevéima la imitãitereíva. Péro Jehová organisasión ningo osegi okakuaa ohóvo pyaʼeterei, ha upévare oñekotevẽ umi ermáno imitãva ikatu vaʼerãichagua okuida pe kongregasiónre. Ha ikatu reime segúro nde reiméramo dispuésto reservi hag̃ua oñekotevẽhápe, revyʼaitereitaha. ¿Eikuaa mbaʼérepa? Pórke Jehová ndeguerohorýta, avei ermanokuéra ohecháta mbaʼeichaitépa ndeguápo ha ehechakuaáta mbaʼeichaitépa ñañeñandu porã ñaipytyvõ jave ñande rapichakuérape.

13, 14. ¿Mbaʼe mbaʼépa ikatu jajapo ñaipytyvõ hag̃ua ñane ermáno ha ermanakuérape? (Ehecha pe taʼanga oĩva ko rrevísta apére).

¹³ Nembaʼerechakuaákena umi oikotevẽvandi. Apóstol Pablo ningo omeʼẽ vaʼekue ko konsého umi kristiáno hebréope: “Ani penderesarái pejapo vaʼerãha iporãva ha pekomparti vaʼerãha la peguerekóva pende rapichakuérandi. Koʼã mbaʼe ningo peteĩ ofrénda Ñandejárape g̃uarã ha ombovyʼaiterei chupe” (Heb. 13:16). Ha ikatu jaʼe haʼe omeʼẽ hague chupekuéra ko konsého hiʼoraitépe, pórke tiémpo riremínte umi kristiáno oikóva Judéape tekotevẽ vaʼekue oho upégui, ha oheja hóga, itraváho ha ihentekuéra ndahaʼéiva kristiáno ikatu hag̃uáicha odipara ha oho “umi montáñare” (Mat. 24:16). Ha upe tiémpope iñimportanteterei kuri koʼã kristiánope g̃uarã okomparti oñondive umi mbaʼe orekóva. Oiméramo haʼekuéra osegi rakaʼe pe konsého Pablo omeʼẽ vaʼekue chupekuéra oiko mboyve entéro koʼã mbaʼe, katuete ifasilvéta kuri chupekuéra ojapo hag̃ua upéva  ijetuʼúramo jepe hendivekuéra la situasión oho rire hógagui.

¹⁴ Ikatu ningo sapyʼánte ñane ermáno ha ermanakuéra noñanimái heʼi ñandéve umi mbaʼe oikotevẽva. Por ehémplo, ñamoĩ chupe peteĩ ermána omano hague anga, ha la iména opytáva viúdo oñembyasyeterei upe haguére. ¿Serápa pe ñane ermáno noikotevẽi hína ñaipytyvõ chupe oñekosina hag̃ua, oho hag̃ua algún lugárpe térã ojapo hag̃ua umi tembiapo ogapypegua? Ikatu haʼe noñanimáinte anga ojerure ñandéve ajúda, openságui ñaneincha reitaha. Péro segúro ovyʼaitereíta ñande voi ñanembaʼerechakuaáramo hendive ha ñaipytyvõ chupe umi mbaʼe oikotevẽvape. Naiporãmoʼãi ñapensáramo oĩtanteha voi álgien oipytyvõva chupe ñande ndajajapóiramo upéva, ha ndovaléi avei ñapensa haʼe si o si omombeʼutaha ñandéve la oikotevẽva. Upévare eñeporandumína: “Che aimérire isituasiónpe, ¿mbaʼépa aipota vaʼerãmoʼã che ermanokuéra ojapo cherehehápe?”.

15. ¿Mbaʼépa jajapo vaʼerã ñaipytyvõséramo ñane ermanokuérape?

¹⁵ Ehechaukákena ermanokuérape ikatuha ojerure ndéve ajúda oikotevẽ vove hikuái. Katuete ningo ne kongregasiónpe oĩ umi ermáno siémpre oipytyvõva ótrope. Koʼã ermáno heʼi joʼa joʼa voi ñandéve jajerurénte hag̃ua chupekuéra ajúda ñaikotevẽ vove, ha ndahaʼeiha íncha chupekuéra g̃uarã upéva. Upévare ñaime segúro ñaikotevẽha óra oimeraẽ mbaʼe, haʼekuéra ñanepytyvõtaha. ¡Ha jajoguaseterei voi chupekuéra! Peteĩ ansiáno hérava Alan, orekóva 45 áño, heʼi haʼe oñehaʼãmbaiteha ojapo hag̃ua upéva. Haʼe ojepyʼamongeta meme Jesús ehémplore, ha upévare heʼi: “Jesús ningo hembiapoiterei vaʼekue, péro enterovévante, tahaʼe imitãva térã ijedáva, oñeñandu porã vaʼekue hendive ha naiprovlémai ojerure hag̃ua chupe ajúda. Haʼekuéra ningo ohechakuaa vaʼekue Jesús rreálmente ojepyʼapyha hesekuéra. Che chepyʼaite guive asegise Jesús ehémplo, ha aipota ermanokuéra  ohechakuaa ikatuha ojerure chéve ajúda oikotevẽha óra, ha siémpre aĩtaha chupekuéra g̃uarã”.

16. ¿Mbaʼéichapa Salmo 119:59, 60 ikatu ñanepytyvõ jasegi hag̃ua Jesús ehémplo?

¹⁶ Ndovaléi ningo ñañedesanima nosẽiramo ñandéve opa mbaʼe Jesús ojapo hagueichaite (Sant. 3:2). Ñamoĩmína peteĩ ehémplo ñantende hag̃ua upéva. Peteĩ persóna oaprendeséramo ombopu mbaraka, ndaikatumoʼãi ensegída voi ojapóma imaéstro ojapohaichaite, pórke ojavýtante voi oñehaʼãmbaitéramo jepe. Péro oaprendéramo koʼã mbaʼégui, mbeguekatúpe ojoguátama avei ohóvo la imaéstrope, ha péicha osegíta omehora ombopukuaa peve la mbaraka. Upeichaite avei ñande kásope. Ñande ningo ñaaprendéma hetaiterei mbaʼe jastudia rupi la Biblia, ha ñañehaʼãmbaitéramo jakorrehi umi mbaʼe ndajajapoporãiva, mbeguekatúpe jajoguavétama jahávo Jesúspe ha jasegi porãvéta la iñehémplo (elee Salmo 119:59, 60).

17, 18. ¿Mbaʼépa jahupytýta ñamotenondéramo ótrope Jesús ojapo haguéicha?

¹⁷ Ñañehaʼãmbaitéramo ñamotenonde umi ótrope, umi ermáno ohecháva la jajapóva osegiséta ñane ehémplo. Peteĩ ansiáno hérava Tim heʼi: “Ore kongregasiónpe oĩ heta ermaníto iguapoitereíva, ha imitã reheve voi oñenombráma chupekuéra siérvo ministeriál. Heta mbaʼe oipytyvõ chupekuéra upearã, por ehémplo oñehaʼãmbaite hikuái osegi pe ehémplo omoĩva umi ermáno omotenondéva ótrope. Ha haʼekuéra ojapo rupi avei upéicha, tuichaiterei oipytyvõ porãve kongregasiónpe ha ombovevyive avei ansianokuérape hembiapo”.

¹⁸ Ko múndope ningo umi hénte siémpre oiko opensa ijehénte, péro ñande jaservíva Jehovápe katu ñanediferentete chuguikuéra. ¿Mbaʼérepa? Pórke opokoiterei ñanderehe pe ehémplo Jesús omoĩ vaʼekue ñandéve, ha ñaime desidído jasegitaha upéva. Ndaikatúi ningo añete jajapo entéro mbaʼe haʼe ojapo hagueichaite, péro lomímonte jajapo vaʼerã ikatumíva guive ‘jaguata hag̃ua ipyporére’ (1 Ped. 2:21, nóta). Ñañehaʼãmbaitéramo jasegi Jesús ehémplo, katuete javyʼaitereíta pórke Jehová ñandeguerohorýta.