1. Ngeso ehe nyinja abantu ba Mungu bali bayerekana?

KURHENGA mira, Ebiblia yabaga lebere oku abantu ba Mungu “bakachihaanire oku bulonza” omu kasi ka Yehova kayumangirwe n’Omugala. (Zb. 110:3) Kweri, obola bulebi buli bwayenera zene. Buli mwaka, abakozi ba Yehova bagwerhe obushiru, bali bageza amamiliyoni m’esa omu kasi k’okuhubiri. Bali bakola akola kasi oku bulonza na buzira kulipwa. Kandi banakolesa akasanzi kabo omu kurhabala bene-babo na bali-babo omu kubahereza ebintu by’omubiri bakenere, omu kubaheba omurhima, n’oku barhabala bakomeze obwira bwabo haguma na Yehova. Abashamuka n’abagwasi b’akasi banageza saa zinene omu kurheganya embuganano n’okurhangula bene-babo na bali-babo omu kubaheba omurhima. Bichi binabashunika bakole akola kasi koshi? Buli buzigire, obuzigire bwagwerhe ku Yehova n’oku bantu.​—Mt. 22:37-39.

2. Nk’oku olwandiko lwa Waroma 15:1-3 luyerekene, mufano guchi Yesu arhulekere?

² Yes aliyerekene oku alagire bwenene oku by’abandi bakenere kulusha ebyage. Rhulirhwajira okwerhu koshi yi rhumuyiganya. (Osome Waroma 15:1-3.) Balala bayiganya Yesu, nji bagwarha emigisho. Yesu aderha ntya: “Hali busime bunene omu kuhaana kulusha omu kuhaabawa.”​—Mdo. 20:35.

3. Bichi rhwaganirako mu gunola mwazi?

³ Mu gunola mwazi, rhwashambala ku bintu bilebe Yesu ajiraga y’abarhabala abandi, rhwanashuba kuganira nka gurhe rhwayiganya omufano gwage. Kandi, rhwashambala okuntu rhwakakuza enyorha yeru y’okurhabala abandi.

4. Nka gurhe Yesu alihirire enyungu z’abandi embere y’ezage?

⁴Yesu aliri arhabala abandi chiro akaba oku aliluhire. Waza oku bilolere okuntu Yesu ajiraga amango abantu banene bayinja kubuganana naye oku musozi, bishobokene oku hofi ne Kapernaumu. Yesu abaga agezeze obudufu boshi eyi ali asalira. Alikwanene kuba eyi aluhire bwenene, aliko amango abona ebigusho by’abantu, ayunvira obonjo abakene n’abalwala baliri mw’ebyola bigusho. Arhabafumyaga konyine s’aliko anabagezeza ejambo lihebere omurhima bwenene limanyikane nka Mahubiri m’oku Musozi.​—Lu. 6:12-20.

5. Gurhe amarhwe m’emilala bayiganya Yesu omu kuyerekana obuzigire amango baluhire?

⁵Okuntu marhwe m’emilala manayiganya Yesu. Waza k’ogula mufano: Enyuma y’okukola akasi olusiku loshi, erhwe ly’omulala anagera ahambuga analuhire bwenene. Nkabaga ali awaza gurhe akaheba Obuharamye b’omu Mulala bwe egolo oku lwindi lusiku, aliko amahema Yehova emisi y’agala kujira obola buharamye. Yehova amashubiza oku masala mage, n’erhwe ly’omulala amagala kujira obola buharamye nk’oku anarhula ajira buli boso. Abana bamayiga echintu ch’akamaro mw’elyola golo, k’okuderha, abazere babwene oku ebintu by’ekiroho by’ebya’akamaro kulusha ebindi byoshi.

6. Lerha omufano guyerekene okuntu Yesu akolesaga akasanzi kage omu kurhabala abandi.

⁶Yesu aliri ageza akasanzi haguma n’abandi chiro n’amango alikenere akasanzi k’okuba yenyine. Wakawaza okuntu alichiyunvirhe amango ayunva oku Yowane Mubatiza ayirhirwe? Yesu akwanene kuba eyi aliyunvirhe akahinda kanene. Ebiblia ederhere ntya: “Amalire yunva [oku Yowane afire], Yesu arhenga ahola n’echombo n’okuja ahali bwihunze y’aba yenyine.” (Mt. 14:10-13) Echola chakarhuma rhwanyunva bichi byarhumaga alonza abe yenyine. Banene banasiima kulakira ozimugirwa wabo wafire eyi banali bwihunze. Aliko birhalishobokere Yesu oku abe yenyine. Echigusho ch’abantu chamurhanga eyo munda alilonzeze kuja bwihunze. Yesu ajira gurhe? Awaza okuby’echola chigusho chalikenere “n’okubayunvira obonjo.” Abona oku balikenere oburhabale, n’echirhulizo  chirhengere emwa Mungu, echo charhuma abarhabala juba-juba. Kweri “ahwanza kubayigiriza [arhali bintu bigeke, s’aliko] bintu binene.”​—Mk. 6:31-34; Lu. 9:10, 11.

7-8. Lerha omufano guyerekene okuntu abashamuka banayiganya Yesu omu kuyerekana obuzigire amango muntu mulebe akenere oburhabale.

⁷Okuntu abashamuka bagwerhe obuzigire banayiganya Yesu. Rhugwerhe eshukrani nene oku kasi k’okuchihaana abashamuka banarhukolera! Bene-berhu na bali-berhu banene omu chibaga barhaba bamenyere akasi koshi abashamuka banakola. Omufano, amango mwene-werhu changwa mwali-werhu akenere kubukwa juba-juba, bene-berhu banakola omu Commité de Liaison Hospitalier banajira juba-juba kumurhabala. Hanene ebyola binazigana kurhengerera ahagarhi-garhi omu budufu! Aliko bulala bayunvirhire obonjo mwene-werhu changwa mwali-werhu, abo bashamuka bazigirwa haguma n’emilala yabo, banaheba enyungu z’ababo Bakristu oku nafasi y’oburhanzi ahali h’ezabo.

⁸ Abashamuka banarhabala oku kasi k’okuyumbaka Amachumbi m’Obwami n’ezindi nju z’olubaga lwa Yehova, n’omu kasi k’okuhaana oburhabale amango m’echinjira. Kandi rhwakaderha binene oku bilolere esa zinene abashamuka banakolesa omu chibaga chawe omu kuyigiriza, kurhuheba omurhima n’omu kurhurhabala. Rhukwanene kubwira koko abola bene-berhu boshi n’emilala yabo! Yehova agishe omurhima bali bayerekana. Aliko kuguma n’abandi boshi, abashamuka barhakwanene kuleka kasi kaguma kayirha akandi. Barhakwanene kugeza ebisanzi byoshi omu kasi k’echibaga, naho banabula ebisanzi by’okuha emilala yabo ebi bakenere.

9. Nk’oku Wafilipi 2:4, 5, borhere buchi Abakristu boshi bakwanene kugwarha?

⁹ Osome Wafilipi 2:4, 5. Arhali abashamuka bonyine babakwanene kuyiga Yesu, s’aliko rhweshi rhwakajira ntyo. Ebiblia ederhere oku Yesu “achijira nka muja.” (Flp. 2:7) Waza bichi ebila binwa biderhere. Omuja changwa omukozi w’akamaro, analonza gurhe akasimisa waliha wage. Rhwabo nka baja ba Yehova nabakozi ba bane-berhu na bali-berhu, rhulonzeze kukolera bwenene Yehova na bene-berhu na bali-berhu. Wakajira ntyo omu kukengera kw’amala mahano makulikire.

10. Bibazo bihe rhwakachibaza?

¹⁰Ogerereze oborhere bwawe. Ochibaze ebibazo bili nk’ebila: ‘Ka ndi tayari kukolesa akasanzi kani n’emisi yani omu kurhabala abandi? Omufano gurhe nakajira amango bamambwira oku nji rhangula mwene-werhu oli omu nju banashishikalamo abashaja changwa kuheka mwali-werhu oshajire oku mbuganano? Ka nampaana oburhabale bwani juba-juba amango hakenere abantu b’okuchihaana omu kukola akasi k’okuchesa aharhunajirira embuganano zikulu changwa kukwiza Echumbi ly’Obwami?’ Amango rhuchihaana emwa Yehova, rhwalimulaganyize oku rhwakolesa ebirhuhere byoshi yi rhumukolera. Rhulonzeze kukolesa akasanzi kerhu, emisi, n’ebintu byerhu by’omubiri yi rhurhabala abandi. Binamusimisa amango rhwamajira ntyo n’omurhima goshi. Amango rhwamabona oku hali ebirhukenere kushuba kujira bwinja, gurhe rhwakajira?

11. Gurhe esala lyakarhurhabala rhugwarhe enyorha y’okurhabala abandi?

¹¹Osalire Yehova n’omurhima goshi. Nkabaga bikuhemere kuchihaana bwenene, aliko wanachiyunva oku orhakajira ntyo. Akaba ntyo kubili osalire Yehova n’omurhima goshi. Orhamubishaga chintu. Omubwire okuntu oli wachinyunva onamuheme “akuhe enyorha n’emisi y’okukola.”​—Flp. 2:13.

12. Nka gurhe bene-berhu babatizwe bachili misole banarhabala ebibaga byabo?

¹² Akaba oli mwenye-werhu wabatizwe ochili musole, oheme Yehova akuhe enyorha y’okukolera bwenene bene-benyu na bali-bali benyu omu chibaga. Mu bihugo binene, muli bashamuka banene kulusha abagwasi b’akasi, n’abanene mw’abola bagwasi b’akasi barhachili misole. Bulala olubaga lwa Yehova luli lwagenderera kugaliha, rhukenere bwenene bene-berhu bachili misole b’okurhabala oku kasi k’okushishikala abantu ba Mungu. Akaba olonzeze kukola omu njira yoshi-yoshi, wagwarha obusime. Bulagurhe? Bulala wasimisa Yehova, wagwarha erenge linja, wagwarha n’obusime omuntu anapata amango amarhabala abandi.

13-14. Bichi rhwajira yi rhurhabala bene-berhu na bali-berhu? (Olole efoto eli oku chiganda.)

¹³Ololereze onamenye amango muntu mulebe akenere oburhabale. Paulo alihanwire Abaebrania ntya: “Mumenye mwayibagira kujira amenja n’okusangira n’abandi ebi mugwerhe, bulala Mungu anasimiswa n’enterekero zili nk’ezola.” (Ebr. 13:16) Elyola lyaliri hano linja! Kasanzi kageke enyuma y’okupata amola maruba, Abakristu be Yudea balikwanene baleke amaju mabo, amakasi mabo, bene-babo barhali Bakristu; banalikwanene “kulibirhira oku misozi.” (Mt. 24:16) Amola mango, nta ngangane balibwene oku bili by’akamaro barhabalane buli muguma n’owindi. Akaba babaga barhondere kukolesa elyola hano lya Paulo, ly’okusangira n’abandi ebi baligwerhe embere echola chihe chihike, byakabayorohere kulama na bintu bigeke omu kalamo kabo kahya-hya.

 ¹⁴ Hali mango bene-berhu na bali-berhu barhakarhubwira obulagirire bagwerhe. Omufano, mwe-werhu amafisa mukage, n’okuyorha agwerhe kahinda kanene. Ka mwene-werhu akenere omuntu w’okumurhabala agwarhe akalyo, w’okumuheka emunda akaja, changwa w’okumurhabala kujira amakasi m’omu nju? Nkabaga arhakarhuhema oburhabale bulala arhalonzeze rhuchiyunve kubi. Aliko achiyunva agwerhe eshukrani bwenene amango rhwamurhabala chiro n’embere arhuheme oburhabale. Rhurhakwanene kuwaza oku muntu mulebe amurhabala changwa oku buli mango arhubwira bichi akenere. Ochibaze ntya: ‘Nka naliri mw’eyola hali, burhabale buhe nakakenere bampereze?’

15. Bichi rhukwanene kujira akaba rhulonzeze kurhabala abandi?

¹⁵Obe muntu abandi bakahema oburhabale juba-juba. Nta ngangane, omenyere bene-berhu na bali-berhu b’omu chibaga chawe bazigana kurhabala abandi juba-juba. Barhajira haba nakatyu rhuchiyunve nka rhwabere muzigo okubo. Rhumenyere oku rhwakabanihira amango rhugwerhe obulagirire, rhwakanasima rhube kuguma nabo! Alan, mushamuka w’echibaga ogwerhe myaka 40, alonzeze abe muntu abandi bakahema oburhabale juba-juba. Alan aderhere ntya oku bilolere omufano gwa Yesu: “Yesu aligwerhe binene by’okujira, aliko abantu ba buli lugero baliri bachiyunva huru kumuyegera, n’okumuhema oburhabale. Balimenyere oku kweri ali muntu obalagireko. Ndonzeze mbe kuguma na Yesu, namenyikane nka muntu abandi bakahema oburhabale juba-juba, onashagalukira abandi, n’oku bashishikala.”

16. Nka gurhe okukolesa olwandiko lwa Zaburi 119:59, 60 kwakarhurhabala rhuyiganye bwinja-bwinja omufano gwa Yesu?

¹⁶ Rhurhakwanene kuvunika omurhima akaba rhwagambirwe kuyiganya Yesu oku bushinganyanya.  (Yak. 3:2) Omwanafunzi arhakalusha omwalimu wage. Aliko amango amachihangana y’ajira okwage koshi omu kuyiganya omwalimu nk’oku akanagala, oyola mwanafunzi ajira amajambere. Konakuguma, amango rhwamakolesa ebi rhwayigire omu funzo lyeru ly’Ebiblia rhwenyine, n’okuchihangana kuhima obuzamba bwerhu, rhwakagala kukulikira bwinja-bwinja omufano Yesu arhulekere.​—Osome Zaburi 119:59, 60.

17-18. Amango rhwamayiganya omufano gwa Yesu g’okurhabala abandi, nyuungu zichi rhwagarha?

¹⁷ Amango rhulitayari kurhabala abandi, abandi nabo barhuyiganya. Mushamuka muguma oyirikirwe Tim aderhere ntya: “Rhugwerhe bene-berhu bachili misole bajirire amajambere banahikira kushimikwa bagwasi b’akasi, n’abaguma mubo bachili misole bwenene, mpavu nguma eli oku baliri babona gurhe baguma bali tayari kurhabala abandi, nabo balonza babe kuguma nabo. Eyola misole enarhabala echibaga cherhu n’okurhabala abashamuka bwenene.”

¹⁸ Bantu banene omu gulu zene bali bakuchikaziza bwenene. Aliko abantu ba Yehova barhali kuguma nabo. Omufano gwa Yesu g’okuntu aliri arhabala abandi gwarhuhumire oku murhima, rhunahigirire kumuyiganya. Rhurhakagala kukulikira ebishando byage oku bushinganyanya, aliko rhwakagala “kukulirika ebishando byage bwinja-bwinja.” (1 Pe. 2:21) Amango rhwajira okwerhu koshi omu kuyiganya omufano gwa Yesu, g’okurhabala abandi, nerhu rhwagwarha omwishingo bulala rhulirhwasimisa Yehova.