1. Iehova ena taunimanima be dahaka kara namodia idia hahedinaraia?

 BAIBEL ia peroveta Dirava ena taunimanima be Iesu ena hakaua henunai ‘mai moale ida do idia lao,’ Iehova idia hesiai henia totona. (Sal. 110:3) Hari unai peroveta herevana ia guguru noho. Lagani ta ta ai, Iehova ena hesiai taudia be haroro gaukara totona hora milioni momo idia gaukaralaia. Idia be mai ura ida unai gaukara idia karaia, bona pei idia abia lasi. Danu nega idia atoa tadikaka taihu dekenai heduru idia henia, bona hekwakwanai negadia ai idia hagoadaia Iehova idia lalokau henia totona. Elda bona hesiai taudia be hora momo lalonai hebou gaudia idia hegaegaelaia bona edia tadikaka taihu idia hagoadaia totona idia vadivadi henia. Dahaka dainai unai gaukara idauidau idia karaia? Badina Iehova bona taunimanima idia lalokau henia.​—Mat. 22:37-39.

2. Roma 15:1-3 hegeregerena, Iesu be dahaka haheitalai namona ia hahedinaraia?

² Iesu be ma haida edia ura ia atoa guna. Ita hekwarahi ia ita tohotohoa totona. (Roma 15:1-3 duahia.) Bema unai bamona ita karaia, namo do ita davaria. Iesu ia gwau: “Henia kara ena moale be bada, to abia kara ena moale be maragi.”​—Kara 20:35.

3. Inai atikol ai dahaka do ita herevalaia?

³ Inai atikol ai, Iesu be ma haida durua totona gau haida ia karaia bona ia ita tohotohoa dalana do ita herevalaia.  Danu mai ura ida ma haida ita durua daladia do ita herevalaia.

4. Edena dala ai Iesu be ma haida edia ura ia atoa guna?

⁴ Ena be Iesu ia hesiku, to ma haida ia durua. Taunimanima momo be Iesu dekenai idia lao, reana unai be Kaperanauma kahirakahira ena ororo ta ai, bona ia karaia karana mani ita laloa. Iesu be hanuaboi ibounai lalonai ia guriguri. Reana ia hesiku bada, to hutuma ia itaia neganai, ogogami bona gorere taudia dainai ia hebogahisi. Ia ese gorere taudia ia hanamoa bona idia totona pablik tok namona ta ia henia, ena ladana be Ororo Harorona.​—Luka 6:12-20.

5. Ena be ruma bese kwaradia idia hesiku bada, to edena dala ai Iesu ena lalokau karana idia tohotohoa diba?

⁵ Ruma bese kwarana ese Iesu ia tohotohoa dalana. Mani inai haheitalai oi laloa: Tama ta be moni gaukara amo ia giroa lou murinai ia hesiku bada. Ena be ia ura unai adorahi ai Ruma Bese Tomadiho do idia karaia lasi, to stadi ia karaia totona Iehova amo goada ia noia. Iehova ese ena guriguri ia kamonai, bona edia stadi idia reaia lasi. Unai adorahi ai natudia be edia tama sina amo gau ta idia dibaia, unai be, Iehova tomadiho henia karana be mai anina bada.

6. Edena dala ai Iesu be ma haida totona ena nega ia henia? Haheitalai gwauraia.

⁶ Iesu be ma haida totona ena nega ia henia. Iesu ena hemami mani oi laloa, ena turana Ioane Bapatiso idia hamasea neganai, reana ia lalohisihisi bada. Baibel ia gwau: “Iesu be [Ioane ena mase sivaraina] ia kamonai neganai, bouti amo unai gabu ia rakatania bona taunimanima lasi gabuna dekenai ia lao, sibona ia noho totona.” (Mat. 14:10-13) Iesu ia ura sibona ia noho ena badina ita lalopararalaia diba. Haida idia lalohisihisi neganai idia ura sibona idia noho. To Iesu be unai ia karaia lasi, badina sibona ia ura noho gabuna ai hutuma idia ginidae vadaeni. Iesu be dahaka ia karaia? Ia be hutuma edia mauri dalana ia laloa bona “ia hebogahisi henidia.” Ia laloparara idia be Dirava amo heduru bona goada idia abia be namo, unai  dainai karaharaga idia ia durua. Oibe, “idia dekenai [gau haida sibona lasi, to] gau momo ia hadibaia matamaia.”​—Mar. 6:31-34; Luka 9:10, 11.

7-8. Kongrigeisen ai ta be heduru ia ura neganai, edena dala ai elda taudia be Iesu idia tohotohoa? Haheitalai gwauraia.

⁷ Elda taudia ese Iesu idia tohotohoa dalana. Elda taudia be ita totona sibona edia ura idia dadaraia dainai idia ita hanamoa! Idia karaia gaukara momo be tadikaka taihu ese idia itaia lasi. Hegeregere, tadikaka o taihu ta be medikol heduru ia ura neganai, Hospital Liesen Komiti ena elda haida be karaharaga heduru idia henia. Bona nega momo unai be hanuaboi ai ia vara! To elda taudia be edia tadikaka taihu idia laloa bada dainai, idia bona edia famili be edia tadikaka taihu edia ura idia atoa guna.

⁸ Elda taudia be Kingdom Hall bona bildin ma haida idia haginia bona disasta idia vara neganai heduru idia henia danu. Bona nega bada idia gaukaralaia ita idia hadibaia bona hagoadaia totona. Unai tadikaka bona edia famili ita tanikiu henia be namo. Idia be sibona edia ura idia dadaraia dainai, Iehova ese idia ia hanamoa! Oibe, ita ibounai, elda taudia danu, ese laloa maoromaoro karana ita hahedinaraia be namo. Namo lasi elda taudia ese nega bada idia henia orea ena gaukara idauidau idia durua totona, to namona be nega idia atoa edia famili idia durua danu.

9. Filipi 2:4, 5 hegeregerena, Keristani taudia ese dahaka kara idia hahedinaraia be namo?

⁹ Filipi 2:4, 5 duahia. Elda taudia sibona lasi to ita ibounai ita gaukara goada  Iesu ita tohotohoa bona sibona eda ura ita dadaraia. Baibel ia gwau, Iesu be “hesiai tauna bamona ai ia lao.” (Fili. 2:7) Unai siri amo dahaka ita dibaia? Hesiai tauna namona be dala do ia tahua ena biaguna ia hamoalea totona. Ita be Iehova ena hesiai taudia bona eda tadikaka taihu edia hesiai gaukara ita karaia dainai, ita ura Iehova ese ita ia gaukaralaia bona eda tadikaka taihu ita durua. Mani unai ita karaia daladia haida ita laloa.

10. Sibona dekenai dahaka henanadai ita henia diba?

¹⁰ Emu kara oi tahua namonamo. Sibona oi nanadaia: ‘Egu nega bona goada lau gaukaralaia ma haida lau durua totona, a? Hegeregere, bema lau idia noia tadikaka burukana ta lau vadivadi henia, eiava taihu burukana ta be hebou dekenai lau abia lao, dahaka do lau karaia? Hebouhebou gabuna eiava Kingdom Hall hagoevaia gaukarana totona karaharaga heduru lau henia, a?’ Iehova dekenai ita gwauhamata ia do ita hesiai henia dainai, ma haida ita durua totona iseda nega, goada bona kohu ita gaukaralaia neganai Iehova ia moale. Bema ita itaia iseda kara haida ita hanamoa be namo, dahaka do ita karaia?

11. Edena dala ai guriguri ese ita durua, mai ura ida ma haida ita durua totona?

¹¹ Mai momokani ida Iehova guriguri henia. Reana oi itaia ma haida durua karana oi habadaia be namo, to bema oi laloa unai oi karaia lasi, mai momokani ida Iehova dekenai unai oi gurigurilaia. Bona ia dekenai emu hemami oi gwauraia bona oi noia ‘ura bona goada ia henia, ia ura henia gaudia oi karaia totona.’​—Fili. 2:13.

12. Bapatiso tadikaka matamata be dahaka heduru idia henia diba?

¹² Bema oi be bapatiso tadikaka matamata, namona be Iehova oi noia unai amo emu ura ia habadaia tadikaka taihu oi durua totona. Tano haida ai, elda taudia be momo to hesiai taudia be momo lasi, bona unai hesiai taudia momo edia mauri lagani be bada eiava idia buruka. Iehova ena orea be ia bada noho dainai, namona be tadikaka matamata ese elda taudia idia durua tadikaka taihu idia naria totona. Bema mai ura ida hesiai gaukara idauidau oi karaia, do oi moale. Dahaka dainai? Badina Iehova do oi hamoalea, ladana namona do oi abia, bona ma haida durua karana amo do oi moale.

13-14. Iseda tadikaka taihu durua totona dahaka ita karaia be namo? (Rau 1 ena laulau itaia.)

¹³ Oi noho hegaegae ma haida oi durua totona. Aposetolo Paulo ese Iudea ai idia noho Keristani taudia ia hamaoroa: “Umui laloaboio lasi, kara namodia do umui karaia noho bona ma haida ida emui kohu do umui haria, badina Dirava ese unai bamona boubou karadia ia moalelaia.” (Heb. 13:16) Unai sisiba be mai anina bada! Iudea ai idia noho Keristani taudia be unai revareva idia abia bona daudau lasi murinai, edia ruma, edia bisinesi, bona abidadama lasi varavara taudia idia rakatania bona “ororo dekenai idia heau lao matamaia.” (Mat. 24:16) Unai nega ai, ta ta idia durua heheni be mai anina bada. Bema matamanai Paulo ese ia henia sisiba, ma haida dekenai edia kohu idia haria karana idia badinaia, reana do ia auka lasi edia noho gabuna matamata ai kohu momo lasi maurina idia noholaia totona.

¹⁴ Nega momo iseda tadikaka taihu be  ita dekenai edia ura gaudia do idia gwauraia lasi. Hegeregere, tadikaka ta be ena adavana ia mase. Iseda tadikaka be aniani, motuka, eiava ena ruma gaukara totona heduru do ia ura, a? Reana ita dekenai unai do ia gwauraia lasi badina ia ura lasi maduna ia henia. To dala ita tahua ia ita durua neganai, do ia moale bada. Namo lasi ita laloa ma ta ese unai tadikaka do ia durua eiava ita laloa heduru ia ura neganai ita do ia hadibaia. Sibona oi nanadaia, ‘Bema egu hekwakwanai be unai tadikaka hegeregerena, dahaka heduru do lau moalelaia?’

15. Ma haida ita durua totona dahaka ita karaia be namo?

¹⁵ Tura namona ai oi lao. Emu kongrigeisen ai tadikaka taihu haida be nega ibounai idia noho hegaegae ma haida idia durua totona. Idia ura lasi do ita laloa idia ita hahekwarahia. Ita diba idia be nega ibounai idia ura ita idia durua, bona ita ura idia ita tohotohoa! Elda ta, Alan, ena mauri lagani be 45, ia ura tura namona ai ia lao. Alan be Iesu ena haheitalai ia herevalaia: “Ena be Iesu ia bisi, to mauri lagani idauidau taudia be ia idia ura henia bona mai gari lasi ida iena heduru idia noia. Idia diba Iesu be idia ia laloa bada. Lau ura Iesu lau tohotohoa bona egu tadikaka taihu lau tura henia namonamo bona do idia mamia idia lau laloa bada.”

16. Edena dala ai Salamo 119:59, 60 ese ita ia durua Iesu ena haheitalai ita tohotohoa totona?

¹⁶ Bema nega haida ia auka Iesu ita tohotohoa totona, ita lalomanoka lasi. (Iam. 3:2) Stiuden be tisa ese ia torea laulau hegeregerena ia torea namonamo diba lasi. To ia hekwarahi unai laulau ia torea namonamo neganai, laulau torea dalana  do ia hanamoa noho. Unai hegeregerena, bema Baibel ita stadilaia bona ita dibaia gaudia ita badinaia, bona ita hekwarahi eda kara ita hanamoa noho, Iesu ena haheitalai do ita tohotohoa diba.​—Salamo 119:59, 60 duahia.

17-18. Iesu ita tohotohoa neganai, dahaka namo do ia vara?

¹⁷ Mai ura ida ma haida ita durua neganai, idia danu be unai bamona do idia karaia. Elda ta ladana Tim ia gwau: “Tadikaka matamata haida be hesiai gaukara ena maduna idia abia. Badina idia itaia ma haida be mai ura ida heduru idia henia, bona idia ura unai bamona idia karaia danu. Unai tadikaka matamatadia be emai kongrigeisen idia durua bona elda taudia ida idia gaukara hebou.”

¹⁸ Hari inai negai taunimanima momo be sibona edia ura idia atoa guna. To Iehova ena taunimanima be unai bamona lasi. Ita ura bada Iesu ita tohotohoa bona ma haida edia ura ita atoa guna. Ena be Iesu ena ‘aena gabudia ai do ita raka’ diba, to do ita badinaia goevagoeva lasi. (1 Pet. 2:21) Bema ita gaukara goada Iesu ita tohotohoa, do ita moale badina Iehova ita hamoalea danu.