1. Was fer kuut aanxtelung fine mer in Yeehoowa sayn folek?

XON fiile yoore tsurik, hot ti Piipel kesaat tas Kot sayn folek teet sich “fraywilich aan piite” fer Yeehoowa tiine unich Yeesus sayn fiirung. (Psal. 110:3) Meyer siin tiise profetsii sich hayt erfiile. Yeetes yoer, tuun Yeehoowa sayn flaysiche tiiner milyoone xtune in te preetich aarwayt penutse. Tii kriin khee kelt too tefun: tii mache tas wayl se tas wole. Tii kepe aach fon sayn tsayt aus fer ti priiter helfe ti neetiche tinge hon, fer tëne uf muute un fer tëne sayn klaape ferxtërke. Ti elteste un ministeryaale tiiner tuun fiil fon sayn tsayt hoole fer ti teele fon te fersamlunge foer perayte un fer sayn priiter un xwestere uf muute. Warom macht Yeehoowa sayn folek tiise kanse aarwayt? Wayl se Yeehoowa un ti anere liipe. (Mat. 22:37-39)

2. Tëm noo Romaaner 15:1-3, was fer kuute payxpiil hot Yeesus fer uns kelos?

² Yeesus hot ketsaycht tas eyer sich mee kekhimert hot mit te anere wii mit sich selepst. Meyer wole unser pestes mache fer tëm sayn kuute payxpiil noo mache. (Lees Romaaner 15:1-3.) * Un kuute resultaate khome weeche tiise aanxtrengung. Yeesus hot kesaat: “Kepe pringt mee frooheet wii se kriin.” (Aph. 20:35)

3. Was tuun mer in tiise artikel lërne?

 ³ Was fer sin etliche tinge woo Yeesus kemacht hot fer ti anere helfe? Wii khene mer tëm sayn payxpiil noo mache? Un wii khene mer unser wunx ferkreese fer ti anere tiine? Tas is was mer in tiise artikel lërne tuun.

4. Wii hot Yeesus ketsaycht tas eyer sich mee mit te anere kekhimert hot wii mit sich selepst?

⁴Yeesus hot ti anere keholef soo kaar wii eyer miit waar. Yeesus hot ti kans nacht kepeet uf een përich ticht pay Kafarnaum; awer xtel tich mool foer wii Yeesus sich kexpiirt hot wii een kroos folek tëm trefe khom is. Opwool eyer miit waar, hot eyer mitlayt kexpiirt un hot aan kefang ti kranke heele. Un net ploos tas: in tiise situatsyoon, hot eyer ti Përich Reet kehal, eene fon te ufmuutichste reete woo xon kehal kep is. (Luk. 6:12-20)

5. Wii tuun ti familye khep Yeesus noo mache wën se miit sin?

⁵Wii tuun ti familye khep Yeesus noo mache? Xtel tich tas neekste payxpiil foer: te fater hot te kanse taach in sayn aarwayt xtram kexaft, un tee khomt hëm aarich miit. Fiilaycht wil eyer net ti familye aanpeetung in tiise nacht mache, awer tee halt aan fer Yeehoowa tëm helfe tas xtuutyum mache. Yeehoowa tuut tiise kepeet antworte un tas xtuutyum wërt kemacht wii ti familye keweent is. In tiise nacht, tuun ti khiner een wichtich lisyoon lërne: Yeehoowa aan peete is tas haupste in tëm leepe fon sayn eltere.

6. Wii hot Yeesus fon sayn tsayt kep fer ti anere helfe? Kep een payxpiil.

⁶Yeesus hot fon sayn tsayt fer ti anere kep soo kaar wën eyer praycht aleen plaype. Xtel tich mool foer: wii meecht Yeesus sich kexpiirt hon wii eyer tsum wise kriit hot tas sayn froynt Yoohan te Taafer um keprung kep is? Sicher hot tas Yeesus aarich traurich kelos. Ti Piipel saat: “Wii Yeesus tas keheert hot [tas Yoohan te Taafer um keprung kep is], is eyer mit een xif fat kang tsu een plats woo eyer khent aleen plaype.” (Mat. 14:10-13) Es is laycht tsum ferxteen warom  eyer aleen plaype wolt. Fiile fon uns hon tiise selwich aanxtelung wën mer traurich sin weeche te toot fon yemant woo mer liipe. Awer Yeesus sayn plaan hot net richtich kep. Wii eyer pis tas plats hin khom is, waar xon een kroos folek tat tëm am waarte. Was hot Yeesus kemacht? Tee hot kemërkt tas ti layt praychte hilef un troost fon Kot kriin. Tes weeche hot eyer “se ketauert” un hot klaych aan kefang tëne helfe. Yawool, “tee hot aan kefang fiil tings tëne in se lërne”. (Mar. 6:31-34; Luk. 9:10, 11)

7-8. Wii tuun liipliche elteste Yeesus noo mache wën yemant hilef in te kemaynt praycht? Kep een payxpiil.

⁷Wii tuun liipliche elteste Yeesus noo mache? Meyer wole hërtslich tanke ti kanse elteste woo soo fiil xafe fer uns helfe! Ti meyerste priiter un xwestere in te kemaynt siin net ti kans aarwayt woo se mache. Tsum payxpiil: wën een propleem pasiirt un yemant mus xnel een tokter hon, ti mitkliiter fon te Krankehaus Ferpiinungs Komisyoon tuun sayn priiter xnel helfe. Soo sorte situatsyoone pasiire ofts in te nacht. Awer tiise liipliche elteste un sayn familye, weeche mitlayt, tuun sich mee mit te anere khimere wii mit sich selepst.

⁸ Ti elteste helfe aach in te umaniteer hilef un in te paueray fon Raych Saale un anere kepaye. Tii tuun aach fiil fon sayn tsayt kepe fer uns in lërne un uf muute. Tiise mëner un sayn familye fertiine unser hërtsliche loope kriin! Tas Yeehoowa seechent ti kans aanxtrengung woo se mache! Awer, soo wii meyer al, mise ti elteste aach uf phase: tii sole net soo fiil tsayt fer ti kemaynt xafe tas se khee mee tsayt hon fer sayn familye uf phase.

9. Tëm noo Filiper 2:4, 5, wii sole al ti kriste sich aan xtele?

⁹ Lees Filiper 2:4, 5. * Yeesus hot uns tas payxpiil kelos: meyer sole uns mee mit te anere khimere wii mit uns selepst. Un meyer al mise tas mache, net ploos ti elteste. Ti Piipel saat tas Yeesus ‘is een sklaaw kep’. (Fili. 2:7) Tenk mool noo was mer too temit lërne khene. Eene kuute sklaaw, orer tiiner, hot sich aan kextrengt fer sayn hër kefale. Meyer sin sklaawe fon Yeehoowa un tiiner fon unser priiter. Tes weeche, wole mer imer unser pestes mache fer nutslicher fer Yeehoowa un fer unser priiter sin. Ti neekste itee tuun uns helfe tas hin kriin.

10. Was fer frooche khene mer uns selepst mache?

¹⁰Tenk iwer tayn aanxtelung. Mach tich soo sorte frooche: ‘Sin ich wilich fer mayn tsayt un kraft penutse fer ti anere helfe? Tsum payxpiil: was tuun ich mache wën se mich ferlange fer een elter pruuter in een alterhaym pesuuche keen, orer fer een elter xwester hoole un se tsu te fersamlung nëme? Sin ich wilich fer mich aan piite wën hilef ferlangt wërt fer tas konkrës plats sauwer mache orer fer te Raych Saal in te ray lose?’ Wii mer uns tsu Yeehoowa tetikiirt hon, hon mer ferxproch tas mer teete ales was mer hon penutse fer tëm tiine. Un tee wil hon tas mer unser kraft, tsayt un tinge penutse fer ti anere helfe. Tes weeche, wërt eyer froo wën mer tas mache. Awer, was khene mer mache wën mer mërke tas mer mise uns too traan ferpesere?

11. Wii khan tas kepeet uns helfe unser wunx fer ti anere helfe ferkreese?

¹¹Mach hërtsliche kepeete tsu Yeehoowa. Wole mer saan tas tuu mërkst tas tuu must tich ferpesere, awer es feelt tich te muut fer ti neetiche ënerunge mache. Was khanst tuu mache? Tuu hërtslich tsu Yeehoowa peete un tëm saan wiis tuu tich wërklich xpiirst. Ferlang tëm aach “te wunx un ti macht fer in krayfe”. (Fili. 2:13)

12. Wii khene ti yunge ketaafte priiter ti Orkanisatsyoon helfe?

¹² Wëns tuu een yunge ketaafte pruuter pist, ferlang Yeehoowa sayn hilef fer tayn wunx ferkreese fer ti priiter in te kemaynt tiine. In etliche lënter, kepts mee elteste wii ministeryaale tiiner, un fiile fon tiise ministeryaale tiiner sin net yung. Awer ti Orkanisatsyoon is am wakse. Tes weeche, mise mer mee yunge priiter hon fer ti elteste helfe Kot sayn folek uf phase. Wëns tuu wilich pist fer se tiine un helfe, sicher tuust tuu frooheet kriin. Warom? Wayl tuu tuust Yeehoowa kefale, een kuute naame mache un aach ti frooheet kriin woo khomt fon te anere helfe.

13-14. Was khene mer mache fer unser priiter un xwestere helfe? (Kuk tas pilt am aanfang fom piichelche.)

¹³Peopach op ti anere hilef prayche. Te aphostel Phaul hot ti hepreeyer, woo in Yutea keleept hon, aan keret: “Ferkest aych net tas kuutes se mache un se teele was teyer hot mit te anere, wayl Kot kefalt sich mit tiise opfere.” (Hep. 13:16) Tas waar een kuut aanreet! Net fiil tsayt xpeeter, muste ti kriste fon Yutea “fer ti përiche aus rayse”. (Mat. 24:16) Tii hon sayn hayser, sayn kexefte un parente woo net kriste waare im xtich kelos. Kewis, in tiise tsayt waars aarich wichtich tas se sich naner helfe teete. Wën se xon aan kewënt hëte Phaul sayn aanreet — ti tinge mit te anere teele —, weyers tëne laychter sich traan keweene mit sayn naye leepe.

 ¹⁴ Unser priiter un xwestere tuun uns net imer saan wën se hilef prayche. Tsum payxpiil: im xtant is een pruuter sayn fraa kextorep. Meecht tee een karona mise hon, orer hilef fer ese in richte orer anere tinge in sayn haus mache? Fiilaycht tuut eyer uns net hilef ferlange, wayl eyer uns net ëriche wil. Awer sicher wërt eyer aarich petanklich wën mer te eyerste xrit kepe fer tëm helfe. Meyer sole net tenke: ‘Yemant anere tuut tëm helfe’; orer: ‘Wën eyer hilef mus hon, tuut eyer mich was saan.’ Xtats tas, froo tich: ‘Wën ich in te selwich situatsyoon weyer, was fer hilef teet ich kërn kriin?’

15. Was mise mer mache wën mer wole ti anere helfe?

¹⁵Say yemant woo ti layt khee pang hon fer hilef ferlange. Sicher khënst tuu priiter un xwestere in tayn kemaynt woo imer fërtich sin fer hilef kepe. Wën mer se hilef ferlange, hon mer khee pang tas mer se ëriche tuun. Meyer wise tas tii imer wilich sin fer uns helfe. Es weyer kuut soo wii tii sin, kël? Alan, een pruuter woo 45 yoore alt is, wil tas mache. Tee saat iwer Yeesus sayn payxpiil: “Yeesus hat imer fiil se tuun, awer yunge un eltere layt hate tëm kërn un tii hate khee pang fer tëm hilef ferlange. Tii wuste tas eyer sich wërklich mit tëne kekhimert hot. Ich wil mit mayn kanse hërts soo wii Yeesus sin: froyntlich un liiplich. Ich wil tas ti layt khee pang hon fer mit mich xpreche un hilef ferlange.”

16. Wii Psalm 119:59, 60 aan wëne khan uns helfe Yeesus sayn payxpiil ticht noo keen?

¹⁶ Meyer kriin es net hin Yeesus sayn payxpiil perfekt noo mache; awer mer sole net oone muut too teweeche wëre. (Tya. 3:2) Wën een xiler am lërne is een instrumënt xpiile, tuut eyer es net hin kriin kraat soo wii sayn leerer xpiile. Awer tee tuut imer peser  xpiile wën eyer sich aan xtrengt fer sayn leerer soo ticht wiis meechlich is noo mache, un wën eyer fon sayn feeler lërnt. Kraat soo, wën mer aan wëne was mer fon te Piipel lërne un uns aan xtrenge fer unser feeler korikiire, tuun mer es hin kriin Yeesus sayn payxpiil noo mache. (Lees Psalm 119:59, 60.) *

17-18. Was fer nutse tuun mer kriin wën mer Yeesus sayn payxpiil noo mache?

¹⁷ Wën mer wilich sin fer ti anere helfe, khene mer se uf muute fer tas selwiche mache. Een elteste, woo Tim heest, saat: “Too in unser kemaynt sin etliche yunge priiter, ministeryaale tiiner kep. Tii hon kesiin wii ti anere wilich waare fer se tiine un wolte soo wii tii sin. Tiise yunge priiter helfe unser kemaynt un ti elteste wërklich fiil.”

¹⁸ Hayt, fiile layt in te welt tuun ploos aan sich selepst tenke. Awer Yeehoowa sayn folek is kans anerste. Soo wii Yeesus, meyer wole imer wilich sin fer ti anere helfe. Kewis, kriin mer es net hin Yeesus sayn payxpiil perfekt noo mache, awer meyer khene ‘tëm sayn xrite ticht noo keen’. (1 Phe. 2:21) Tan, wole mer uns aan xtrenge fer Yeesus sayn payxpiil noo mache un uns mee mit te anere khimere wii mit uns selepst. Soo tuun mer froo sin wayl mer tuun Yeehoowa froo lose.