1. Nama ulah ti manah ke dikembuan nembiak Jehovah?

 BUP KUDUS udah madahka, nembiak Petara deka “datai mantu” ba pengawa ke Jehovah, dibaruh iring Anak Iya, Jesus. (Mas. 110:3) Jaku ti benabi tu benung dikeamatka kemayaharitu. Ninting taun, nembiak Jehovah udah ngena mayuh jam ba pengawa nginjil. Sida enda dibayar lebuh ngereja pengawa tu lalu sida ngereja nya enggau ati ti deka. Sida mega meri utai ke diguna bala menyadi Kristian, meri awak meransang sida sereta nulung sida negapka pengarap ngagai Jehovah. Bala tuai gempuru enggau penulung gempuru ngena mayuh awak nyediaka utai ke deka dikenataika maya begempuru. Sida mega datai meransang bala menyadi Kristian. Nama kebuah nembiak Jehovah ngereja semua pengawa tu? Tu ketegal sida rinduka Jehovah sereta orang bukai.—Mat. 22:37-39.

2. Nitihka Rome 15:1-3, nama teladan ke ditetapka Jesus?

² Jesus nunjukka diri ibuhka utai ke diguna orang bukai lebih agi ari utai ke diguna diri empu. Kitai enggau naka ulih nunda teladan iya. (Bacha Rome 15:1-3.) Enti kitai ngereja tu, kitai deka bulih penguntung. Jesus madahka: “Beberekat agi orang ke meri, ari orang ke nerima.”—SKR. 20:35.

3. Nama deka dipejuraika kitai ba artikel tu?

³ Ba artikel tu, kitai deka berandauka sekeda utai ke digaga Jesus kena nulung orang bukai lalu baka ni kitai ulih neladan iya. Kitai mega deka berandauka baka ni kitai ulih ngemansangka pengeran kitai deka nulung orang bukai.

4. Baka ni Jesus beberat agi utai ke diguna orang ari utai ke diguna diri empu?

⁴ Jesus tetap nulung orang bukai taja pan iya berasai lelak. Pikirka utai ke digaga Jesus lebuh orang mayuh datai betemu enggau iya. Maya nya Jesus ba endur bebukit, engka semak enggau Kapernaum. Sebedau nya, Jesus udah besampi sepemanjai malam. Iya tentu berasai amat lelak. Tang lebuh iya meda sida, iya berasai sinu kelebih agi ngagai sida ke seranta enggau ke sakit. Maya nya, iya ukai semina ngeraika sida tang mega meri cheramah ke ulih meransang sida. Cheramah nya dikumbai Jaku Ajar ba atas Bukit.—Luk. 6:12-20.

5. Baka ni tuai bilik ulih neladan Jesus, kelebih agi lebuh sida berasai lelak?

⁵ Chara tuai bilik ulih neladan Jesus. Perundingka situasi tu: Pengudah gawa sepemanjai hari, seiku apai berasai lelak lebuh pulai ke rumah. Iya engka deka nginsil pengawa Belajarka Bup Kudus enggau Diri Sebilik ke udah ditetapka ba hari nya. Taja pia, iya minta pengering ari Jehovah ngambika ulih ngiring pengawa Belajarka Bup Kudus enggau Diri Sebilik. Jehovah nyaut sampi iya lalu iya ulih ngiring pengawa belajar enggau diri sebilik baka selama. Ari tu, bala anak ulih belajar utai ti beguna, iya nya apai indai sida beberat agi ke sembah ngagai Jehovah lebih ari utai bukai.

6. Taja pan Jesus begunaka awak deka kediri, tang nama digaga iya?

⁶ Jesus ngena awak nulung orang bukai taja pan iya begunaka awak deka kediri. Ulih nuan ngambarka asai ati Jesus lebuh iya nemu kaban iya, John Pemaptisa, udah dibunuh? Jesus tentu berasai amat tusah ati. Bup Kudus madahka: ‘Lebuh Jesus ninga nya, [pasal pemati John], iya mupuk kediri ari endur nya ngena perau ngagai endur ti sunyi.’ (Mat. 14:10-13) Kitai ulih meretika kebuah Jesus deka kediri. Lebuh lenyau orang ke dikesayau, sekeda ari kitai engka deka kediri. Tang maya nya, Jesus enda ulih kediri laban orang mayuh udah dulu ngagai endur ke deka dituju Jesus. Nama digaga Jesus? Iya berundingka utai ke diguna sida lalu iya “sinu ati” ke sida. Jesus nemu sida begunaka tulung sereta pengelantang ari Petara lalu Jesus enggau jampat deka nulung sida. Nya alai, ‘iya lalu belabuh ngajar sida mayuh macham utai.’—Mrk. 6:31-34; Luk. 9:10, 11.

7-8. Padahka baka ni tuai gempuru ti bepengerindu neladan Jesus lebuh bala menyadi begunaka tulung.

 ⁷ Chara bala tuai gempuru ti bepengerindu ulih neladan Jesus. Kitai amat beterima kasih ngagai bala tuai gempuru ke bebendar gawa ke kitai! Kebendar iya, mayuh ari pengawa bala tuai gempuru enda dipeda bala menyadi Kristian. Ambika chunto, lebuh seiku menyadi patut diperubat enggau lengkas, menyadi lelaki ke gawa ba Komiti Besilih Penemu Sepital enggau jampat nulung iya. Penusah ngenyit ke baka tu suah nyadi maya tengah malam! Tang ketegal pengerindu sida ngagai bala menyadi Kristian, bala tuai gempuru enggau ruang bilik sida beberat agi ke utai ti diguna bala menyadi ari utai ke diguna diri empu.

⁸ Bala tuai gempuru mega nulung ba pengawa nirika Palan Gempuru sereta bengunan teokratik ke bukai. Sida mega nulung lebuh bisi penusah ninggang bala menyadi Kristian. Lalu bala tuai gempuru ngena mayuh awak ba pengawa ngajar sereta meransang kitai. Semua tuai gempuru tu enggau ruang bilik sida patut dipuji. Arapka Jehovah merekatka semua pengawa ke digaga sida! Taja pia, bala tuai gempuru patut seimbang. Sida enda patut ngena kelalu mayuh awak ba pengawa sida ke eklisia nyentukka sida nadai awak ngintu utai ke diguna ruang bilik sida.

9. Nitihka Pilipi 2:4, 5, nama ulah ke patut dikemansangka semua orang Kristian?

⁹ Bacha Pilipi 2:4, 5. Kebendar iya, ukai semina tuai gempuru aja ke patut neladan Jesus. Semua kitai ulih neladan Jesus ke sanggup beberat agi ke utai ti diguna orang bukai.  Bup Kudus madahka Jesus milih deka “nyadi ulun.” (Plp. 2:7) Perundingka utai ke ulih dipelajarka kitai ari ayat tu. Ulun ti manah seruran ngiga peluang ngelantangka ati tuan iya. Kitai mega dikumbai ulun Jehovah sereta gawa ke bala menyadi Kristian. Nya alai, kitai tentu bisi pengingin deka dikena Jehovah sereta beguna ba bala menyadi Kristian. Nuan ulih ngereja nya enti nuan nitihka chara ke dipadah pengudah tu.

10. Nama tanya ke ulih diperundingka kitai?

¹⁰ Peresa meh ulah diri empu. Nuan ulih perundingka tanya tu: ‘Kati aku sanggup ngena awak sereta pengering nulung orang bukai? Nama deka digaga aku enti aku diasuh ngabas seiku menyadi lelaki ke tuai ba rumah iya tauka mai seiku menyadi indu ke tuai datai ngagai gempuru? Kati aku deka jampat nulung lebuh bala menyadi begunaka tulung ba pengawa meresi endur ke deka dikena konvensyen tauka nyeruri Palan Gempuru?’ Lebuh kitai nyerahka diri ngagai Jehovah, kitai besemaya deka ngena semua utai ke dikembuan kitai nyembah Iya. Iya deka kitai ngena awak, pengering sereta utai ke dikemisi kitai kena nulung orang bukai. Nya alai, Iya gaga ati enti kitai ngereja nya. Enti sema kitai nemu diri patut ngemansangka agi pengeran deka nulung orang bukai, nama ulih digaga kitai?

11. Baka ni sampi ulih nulung kitai bisi pengingin deka nulung orang bukai?

¹¹ Besampi ngagai Jehovah ari ati. Diatu nuan engka nemu utai ke patut dikemansangka nuan. Tang baka ni enti nuan nadai pengingin deka ngaga ubah? Enti pia, besampi meh ngagai Jehovah ari ati. Padahka semua asai ati nuan ngagai Jehovah lalu minta Iya nulung nuan ngambika nuan “deka sereta ulih ngereja utai ti ngerinduka ati Iya.”—Plp. 2:13.

12. Baka ni menyadi lelaki ke biak ulih nulung ba eklisia?

¹² Enti nuan menyadi lelaki ke biak sereta udah dibaptisa, pinta meh Jehovah nulung nuan ngemansangka pengingin deka nulung bala menyadi Kristian. Ba sekeda menua, penyampau bala tuai gempuru mayuh agi ari penulung gempuru lalu mayuh ari penulung gempuru nya ukai orang ke biak. Ketegal majak mayuh orang berengkah nyembah Jehovah, kitai begunaka mayuh agi menyadi lelaki ke biak nulung bala tuai gempuru ngibun menyadi Kristian ba eklisia. Enti nuan sanggup nulung eklisia, enda ngira nama-nama pengawa ke diberi ngagai nuan, nuan deka gaga ati. Nama kebuah? Laban nuan ulih ngelantangka ati Jehovah, bulih nama ti manah lalu deka puas ati ketegal udah nulung orang bukai.

13-14. Nama ulih digaga kitai kena nulung bala menyadi Kristian? (Peda gambar ba mua majalah.)

¹³ Peratika utai ke diguna bala menyadi Kristian. Rasul Paul madah ngagai orang Kristian ke diau ba Judea: ‘Anang enda ngereja utai ti badas lalu bekunsika utai ti dikemisi kita, laban nya [“pemeri,” NWT] ti dikerinduka Petara.’ (Heb. 13:16) Jaku lalau tu amat sesuai ba sida. Enda lama pengudah nerima surat ari Paul, orang Kristian ba Judea patut ninggalka rumah sida, pengawa dagang, sereta kaban belayan sida ke enda arap lalu “rari ngagai bukit.” (Mat. 24:16) Maya nya, sida enda tau enda nulung pangan diri. Enti sida udah nitihka jaku lalau Paul sebedau nya, sida tentu deka senang agi nelebaka diri enggau gaya pengidup ti baru.

¹⁴ Bala menyadi Kristian kitai engka enda seruran madahka kitai pasal utai ke diguna sida. Ambika chunto, seiku menyadi lelaki berasai tusah ati ketegal bini iya udah nadai. Kati iya begunaka tulung baka nyediaka pemakai, ngereja pengawa ba rumah tauka  nulung nganjung iya ngagai sekeda endur? Iya engka enda minta tulung laban enggai ngenusahka bala menyadi Kristian. Nyadi, enti kitai dulu agi nulung iya sebedau iya minta tulung, iya tentu berasai beterima kasih. Anang meh ngumbai tentu bisi orang bukai deka nulung iya tauka ngumbai iya deka seruran madahka pasal utai ke diguna iya ngagai kitai. Kitai patut nanya diri empu, ‘Enti sema aku napi penanggul ti sama, nama tulung ke diguna aku?’

15. Nama patut digaga kitai enti kitai deka nulung orang bukai?

¹⁵ Orang enda nangi minta tulung ari nuan. Nuan tentu ngelala menyadi Kristian ke seruran sedia deka nulung orang bukai. Lebuh kitai minta tulung, sida nadai kala ngasuh kitai ngasaika utai ke dipinta kitai nya ngenusahka sida. Kitai nemu kitai ulih bepanggai ba sida lebuh kitai begunaka tulung lalu kitai pan deka nunda sida! Alan, seiku tuai gempuru ke beumur 45 taun deka neladan Jesus. Ku Alan madahka: “Taja pan Jesus kisuk, tang orang ke tuai tauka biak sama bela rinduka iya lalu enda nangi minta tulung ari iya. Sida nemu Jesus amat ibuhka sida. Aku bebendar deka neladan Jesus lalu ka dikumbai orang ke senang enggau begulai, bepengerindu sereta ibuhka orang.”

16. Baka ni nitihka Masmur 119:59, 60 ulih nulung kitai nunda teladan Jesus enggau manah?

¹⁶ Taja pan kitai enda ulih neladan Jesus enggau sempurna, anang meh asa ati. (Jas. 3:2) Ambika chunto, bisi seiku orang ke biak deka belajar ngaga bakul ari ini iya. Iya tentu enda ulih ngaga bakul semanah ke digaga ini iya. Tang, lebuh iya belajar ari penyalah iya maya ngaga bakul lalu enggau naka ulih nitihka chara ini iya, iya deka ngemansangka pengelandik iya ngaga bakul. Kitai mega ulih mujur neladan Jesus enti kitai ngena utai ke udah dipelajar kitai ari Bup Kudus, sereta  ngaga ubah ba ulah diri empu.—Bacha Masmur 119:59, 60.

17-18. Nama penguntung ke diulih kitai enti kitai neladan Jesus ke beberat agi ke orang bukai?

¹⁷ Lebuh kitai beberat agi ke orang bukai, orang mega deka diperansang ngereja utai ti sama. Seiku tuai gempuru ke benama Tim madahka: “Sekeda menyadi lelaki ke biak udah ngaga pemansang lalu dipilih nyadi penulung gempuru. Sekeda ari sida amat biak lebuh nerima pengawa tu. Tu ketegal sida nunda teladan bala menyadi ke rindu nulung orang bukai. Pengawa ke digaga bala menyadi lelaki ke biak tu nulung eklisia lalu nyukung bala tuai gempuru.”

¹⁸ Mayuh orang kemayaharitu semina berundingka diri empu. Tang nembiak Jehovah enda baka nya. Ketegal kitai udah belajar pasal Jesus ti rindu nulung orang bukai, kitai mega diperansang deka nitihka teladan iya. Taja pan kitai enda ulih nitihka teladan Jesus enggau sempurna, tang kitai deka ‘nitihka singkang iya’ enggau naka ulih. (1 Pet. 2:21) Lebuh kitai bebendar neladan Jesus, kitai tentu deka gaga ati laban kitai ngelantangka ati Jehovah.