1. Uce ō ya olɔhi nyá nɛ ācɛ ɔlɛ Ujehofa lɛ a?

 UBÁYÍBU tɛtɛ le ka taajɛ ku ācɛ ɔlɛ Ɔwɔico géē ‘cɛ̄ í fu iyī uwā tá ɔ ɔkwu’ abɔ é yɔ i yɛce ɔwɛ nɛ Ujisɔsi yɔ i mafu a. (Aíjē 110:3) Ó lɛ aafu ŋ, akacɛ ɔɔma yɔ i ya jila icɛ. Ihayi doodu, ācɛ ɔlɛ Ujehofa gē bi ɔtu caca le bi umiliyɔn alɛwa ku awa le yuklɔ ipu uklɔ ku ɔna ō ta a. É gē gba uwa ije ipu uklɔ nyā néē i ya a nóó, amáŋ é gē ya ɔ ohigbu kē dɔka ō ya ɔ. É klla gē bi eko ku uwa o ya ɛɛ kéē je otabɔ lɛ ayinɛ uwa kéē lɛ aɔdā néē cɛgbá, kéē ta uwa ɔtu kwu ɔtu, mɛmla ō ta uwa abɔ ku ihɔtu néē lɛ lɛ Ujehofa a kóō lɔfu. Anyakwɔcɛ ku ujɔ mla ācɛ nōo gē ta uwa abɔ a gē bi awa alɛwa le tutu ku aya ɛyɛɛyɛyi ku ōjila ku ujɔ, mɛmla ō nyɔ gáā má ayinɛ uwa nɔnyilɔ mla ayinɛ uwa nɔnya o ya ɛɛ cɛɛ kéē ta uwa ɔtu kwu ɔtu. Ɔdi wɛ ɔdā nōo ya ɛɛ nɛ ācɛ ɔlɛ Ujehofa gē ya ɛjɛɛji auklɔ nōo bā nyā a mɛ? Ohigbu ihɔtu néē lɛ lɛ Ujehofa mla ācɛ a nɛ.—Umát. 22:37-39.

2. Ɛgɛ néē ma ɔ fu ipu ɔkpá ku Ācɛ Uróm 15:1-3 a, ɛdɔ ocabɔ nyá nɛ Ujisɔsi le taajɛ a?

² Ujisɔsi mafu ka ó lɛ ɛlá wu ɛgbá ku ācɛ ɔhá fiyɛ aku nu. Alɔ kē i ceyitikwu mla ɛjɛɛji ɔfu ku alɔ o ya ɛɛ ku alɔ lɛbɛɛka anu a. (Jé Ācɛ Uróm 15:1-3.) Ɔdaŋ ku a gē ya ɛnyā, a géē lɛ itene nɛhi. Ujisɔsi kahinii: “Aɔ́dā olɔhi [amāŋ eeye] kóō yɔ̄ lɛ ɔ̄cɛ nōo gē je ā fíyɛ́ ɔ̄cɛ nōo gē mīyɛ ā.”—Ācot. 20:35.

3. Ɔdi nɛ alɔ gáā leyi yɛ ɔ ipu ikpɛyi ɛlā nyā a?

³ Ipu ikpɛyi ɛlā nyā, alɔ géē leyi yɛ aɔdā ōhī nɛ Ujisɔsi ya o ya ɛɛ kóō ta ācɛ ɔhá abɔ, mla ɛgɛ nɛ alɔ géē gbla ocabɔ mafu  ku nu ya a. Alɔ klla géē kɛla lɛyikwu ɛgɛ nɛ alɔ géē ya ku alɔ le tutu fiyɛ ō fu iyi alɔ tɛɛcɛ ō cɛ ācɛ ɔhá ɛhɔ a.

4. Ɛgɛnyá nɛ Ujisɔsi lɛ ɛgbá ku ācɛ ɔhá ta iyɔbu gbɔbu lɛ aku nu a?

⁴ Ujisɔsi ta ācɛ ɔhá abɔ eko nɛ ɛ̄jɛ̄ kóō le jɛ ɔ. Gbɛla lɛyikwu ɔdā nɛ Ujisɔsi ya eko nɛ ācɛ alɛwa gáā ta ɔ eko nɛ ó yɔ ɛgiyi ɛfu, a jé ŋ, ɛ̄nɛ̄ ó kwu Ukapanɔm ajaajɛ a. Gbɔbu lɛ eko ɔɔma Ujisɔsi gbɔɔkɔ ŋma ɔtu jaa gbo ɔci ɔɔma. Ó lɛ aafu ŋ ɛ̄jɛ̄ gē yɛ i jɛ ɔ nɛhi ɛ, amáŋ eko nɛ ó lɛ ɛwa a má a, nɛ ó má ācɛ nōo wɛ ogbɛha mɛmla ācɛ nōo yɔ i doōcē ɔtahɛ ku uwa a, é le ta ɔ eyinyinyi. Ó hɛ uwa ta foofunu nóó, amáŋ ó klla ka ɛnɛɛnɛ ɛlā ō ta ɔtu kwu ɔtu ɛ̄nɛ̄ ó lɛ ɛdɔ ŋ ma tɛɛcɛ lɛ uwa, néē gē hi ka aɛlā ō nwu ku Ujisɔsi ɛyi ɛfu a.—Ulúk. 6:12-20.

5. Ɛgɛnyá nɛ aotrɛyi ku apɔlɛ gē yɛce ocabɔ ku Ujisɔsi ō mafu ihɔtu eko nɛ ɛ̄jɛ̄ le jɛ uwa a?

⁵ Ɛgɛ nɛ aotrɛyi ku apɔlɛ gē gbla Ujisɔsi ya a. Gbɛla lɛyikwu ocabɔ nyā ɛ: Igbihi nɛ otrɛyi ku apɔlɛ gā ɔnu uklɔ nyɔ i yuklɔ lɔfu lɔfu ɛ ma, ó gā ɔlɛ ɛ̄jɛ̄ le jɛ ɔ. A jé ŋ, ɔdā nōo yɔ ipu ɔtu ku nu ō ya a wɛ ō lɛ abɔ ci ɛ̄gbā ō gba ku apɔlɛ ku nu ku ɔnɛ ɔɔma, amáŋ ó gbɔɔkɔ lɛ Ujehofa kóō je ɔfu lɛ ɔ o ya ɛɛ kóō ya ɛ̄gbā ō gba a kpɔ. Ujehofa lɛ ɔkɔ ō gba ku nu cila, adā a kē lɛ ɛ̄gbā ō gba ku apɔlɛ a ya mla apɔlɛ ku nu ɛgɛ néē tɛtɛ gē ya ɔ lɛ alaadi doodu a. Ayipɛ a lɛ ɛlā ō cɛgbá nɛhi éyi nwu imɔnɛ ɔɔma, ɛlā ō nwu ɔɔma kē wɛ kahinii, ō gba Ujehofa ɛ̄gbā wɛ ɔdā nōo cɛgbá fiyɛ duu lɛ ɛ́nɛ́ uwa mɛmla adā uwa a.

6. Je ocabɔ nōo mafu ɛgɛ nɛ Ujisɔsi bi eko nɛ ó cika ō yɔ foofunu a le ta ācɛ ɔhá abɔ a.

⁶ Ujisɔsi gē lɛ eko ku nu taajɛ lɛ ācɛ ɔhá naana nɛ anu abɔyi nu kóō cɛgbá eko ō yɔ foofunu a. Ɛgɛnyá nɛ a gbɛla ku ɔtu ya Ujisɔsi lɛ eko nɛ ó po kē lɛ oklobiya ku nu Ujɔni ō ya ubatisim ŋmo ɛ ma? Ó lɛ aafu ŋ, ɔtu biya lɛ ɔ nɛɛnɛhi. Ubáyíbu da alɔ kahinii: “Eko nɛ̄ Ujísɔ̄si lɛ ɔ̄kā [lɛyikwu ikwū ku Ujɔni] po a, ó le tá ipú ɔkɔ nyɛ̄ɛ̄ ŋmá abɔ́ɔ le tá ɛga céé éyi nōó í yɔ̄ ōfūnū.” (Umát. 14:10-13) Alɔ jɛyi ku ɔdā nōo ya ɛɛ nɛ ó dɔka ō yɔ ɛga éyi céé foofunu a. Ohigbu ku ɔdaŋ ku ācɛ ōhī dɔka ō yekwu, é gē dɔka ō yɔ foofu uwa. Amáŋ ō yɔ foofunu a i tɔɔtɛ lɛ Ujisɔsi ŋ. Gbɔbu ɛɛ ku Ujisɔsi kóō faajɛ ɛga nɛ ó dɔka ō yɔ foofunu  a, ɛwa nɛhi ku ācɛ kóō faajɛ abɔɔ gbɔbu lɛ ɔ ɛ. Ɔdi nɛ Ujisɔsi ya a? Ó gbɛla lɛyikwu ɔdā nōo wɛ ɛgbá ku ɛwa nɛhi nyā, é kē “le tū ɔ̄ eyīnyinyi.” Ujisɔsi le má kē cɛgbá otabɔ mla ɔtu ō tu lé ŋma ɛgiyi Ɔwɔico, ohigbu ɛnyā, ó gbɔɔ ō ta uwa abɔ boobu. Ku ɛlā ɔkwɛyi a ba, “ó gbɔɔ́ ō nwū uwā [ó wɛ ɛlā ligii nóó, amáŋ] ɔdā alɛwa.”—Umák. 6:31-34; Ulúk. 9:10, 11.

7-8. Je ocabɔ nōo mafu ɛgɛ nɛ anyakwɔcɛ ku ujɔ nōo yihɔtu alɔ a gē gbla Ujisɔsi ya eko duuma nɛ ɔcɛ cɛgbá otabɔ ipu ujɔ a.

⁷ Ɛgɛ nɛ anyakwɔcɛ ku ujɔ nōo lɛ ihɔtu a gē gbla Ujisɔsi ya a. Uklɔ nɛ anyakwɔcɛ ku ujɔ ku alɔ gē fu iyi uwa tɛɛcɛ ō ya a jɛ alɔ eyī nɛɛnɛhi! Ɛyinɛhi ku ayinɛ nɔnyilɔ mla ayinɛ nɔnya nōo yɔ ipu ujɔ a, i jé ɛjɛɛji uklɔ nɛ anyakwɔcɛ ku ujɔ nōo ba nyā gē ya a ŋ. Ocabɔ mafu, eko duuma nɛ ɛlā acigili le ya néē kwu ɔyinɛ alɔ u bi gā inɛci, ayinɛ alɔ nɔnyilɔ nōo gē yuklɔ mla u Hospital Liaison Committee a, gē nyɔ i je otabɔ lɛ ayinɛ uwa fiyaa. Igbalɛwa aɔdā acigili nyā gē ya ahaapa ɔtu! Amáŋ ohigbu eyinyinyi néē lɛ lɛ ayinɛ uwa nɔnyilɔ mɛmla ayinɛ uwa nɔnya nōo yɔ ipu unwalu a, anyakwɔcɛ ku ujɔ nyā nōo yihɔtu alɔ a, mɛmla apɔlɛ ku uwa gē je ɛgbá ku ayinɛ uwa ipu ujɔ ta iyɔbu gbɔbu lɛ aku uwa.

⁸ Anyakwɔcɛ ku ujɔ klla gē je otabɔ lɛ uklɔ ku Agbla ku Ajɔɔcɛ ō gwo mla Aagbla ɔhá, mɛmla ō je otabɔ eko nɛ aɔdā amiya le ya. É klla gē bi eko ku uwa nɛhi gē nwu alɔ ɛlā klla gē ta alɔ ɔtu kwu ɔtu. Alɔ cika ō yɔ i ta ayinɛ alɔ nɔnyilɔ nōo ba nyā mla apɔlɛ ku uwa ahinya, é cɛgbá nu i bi. Ujehofa kóō hɔhā ce uce olɔhi ku uwa nyā néē yɔ i mafu a! Ku ɛlā ɔkwɛyi a ba, bɛɛka ācɛ ɔhá a, anyakwɔcɛ ku ujɔ cika ō jé ɛji ku uwa duu. É cika ō bi eko ku uwa nɛhi yɔ i ya odee lɛ ujɔ a, nōo géē ya kē  hii lɛ ɛga ō teyi tu ɛgbá ku apɔlɛ ku uwa gɛ ŋ.

9. Oŋma ɛlā nōo yɔ ipu ɔkpá ku Ācɛ Ufílipāyi 2:4, 5 a, uce ō ya nyá nɛ ɛjɛɛji Ācɛ O Yɛce Ukraist cika ō ceyitikwu ya kéē lɛ a?

⁹ Jé Ācɛ Ufílipāyi 2:4, 5. Ɛjɛɛji alɔ cika ō nwu ɛgɛ nɛ alɔ géē gbla Ujisɔsi ya klla lɛ ɛgbá ku ācɛ ɔhá ta iyɔbu gbɔbu lɛ aku alɔ, ó wɛ anyakwɔcɛ ku ujɔ cika ō ya ɛnyā foofunu ŋ. Ubáyíbu kɛla lɛyikwu Ujisɔsi kahinii: “Ó kwú iyī nū ú yá bɛ̄ɛka ɔ̄cocɛ̄hɔ̄ ā.” (Ufíl. 2:7) Gbɛla lɛyikwu ɔdā nɛ alɔ lɔfu nwu ŋma ɔgba ku Ubáyíbu ɔɔma a. Ɛnɛɛnɛ ɔcocɛhɔ géē dɔka ɔwɛ nōo géē ya ɔdā nōo géē he ɔkpani ku nu ɔtu. Abɔ alɔ wɛ acocɛhɔ ku Ujehofa nɛ alɔ kē yɔ i cɛ ayinɛ alɔ ɛhɔ a, alɔ dɔka ō tiile ɛgiyi Ujehofa mɛmla ɛgiyi ayinɛ alɔ duu. Aɔdā nɛ alɔ gáā kɛla lɛyikwu ɔ babanya a géē ta alɔ abɔ má ɛgɛ nɛ alɔ lɔfu ya ɛnyā gla.

10. Aɔka nyá nɛ alɔ lɔfu da iyi alɔ a?

¹⁰ Gbɛla lɛyikwu uce ō ya ku uwɔ. Da iyi uwɔ aɔka bɛɛka ɛnyā nōo kahinii: ‘Ɛgɛnyá nɛ um tutu lɛ ō bi eko mla ɔfu ku um le ta ācɛ ɔhá abɔ a? Ocabɔ mafu, ɔdi nɛ um gáā ya ɔdaŋ kē da um ku um nyɔ i má ɔyinɛ alɔ nɔnyilɔ nōo le hila okplicii ɛ ma ɔlɛ nu, amāŋ ō bi ɔyinɛ alɔ nɔnya nōo kwu hila ɛ ma gā ōjila ku ujɔ a? N le tutu ō je iyi um tɛɛcɛ ō je otabɔ ō lɛ ɛga nɛ alɔ gē ya ojileyi nɛhi amāŋ Agbla ku Ajɔɔcɛ tubi amāŋ gla ɔ ya?’ Eko nɛ alɔ je iyi alɔ gwɛɛya lɛ Ujehofa a, alɔ cokonu lɛ ɔ ku alɔ géē bi ɛjɛɛji ɔdā nɛ alɔ lɛ a le gba ɔ ɛ̄gbā. Ó dɔka ku alɔ bi eko, ɔfu, mla aɔdā agbenu ku alɔ le ta ācɛ ɔhá abɔ. Ohigbu ɛnyā, ó gē gweeye nɛhi eko duuma nɛ alɔ gē ya ɛnyā ŋma ipiipu ɔtu ku alɔ. Amáŋ ɔdaŋ ku alɔ má ka ó le aya éyi nɛ alɔ cika ō ya lɔhi fiyɛ, ɔdi nɛ alɔ cika ō ya a?

11. Ɛgɛnyá nɛ ɔkɔ ō gba lɔfu ta alɔ abɔ ku alɔ le tutu ō je iyi alɔ tɛɛcɛ fiyɛ ō ta ācɛ ɔhá abɔ a?

¹¹ Gbɔɔkɔ lɛ Ujehofa ŋma ipu ɔtu ku uwɔ. Ɔdaŋ ku a gáā le má ku a cika ō ya lɔhi fiyɛ ɔwɛ ɛgɛ nɛ a gē ta ācɛ ɔhá abɔ, amáŋ nɛ ɔtu ku uwɔ gē ya uwɔ ku a hii ya ɔ ŋ bɛ? Ɔdaŋ ka ó lɛ a, gbɔɔkɔ lɛ Ujehofa ŋma ipu ɔtu ku uwɔ. A hii lɛ ɔdā duuma tayinu ŋma ɛgiyi nu ŋ. Da ɔ ɛgɛ nɛ ɔtu gē ya uwɔ lɛ a, ku a klla ba ɔ ɛba kóō ‘je ɔfu gā uwɔ, ku ɔtu kóō he uwɔ, cɛ́ɛ́ kú a yá ɔdā nōó dɔɔ̄kā kú a yá ā.’—Ufíl. 2:13.

12. Ɛgɛnyá nɛ ayinɛ nɔnyilɔ nōo wɛ aɛdrɔ nōo lɛ ubatisim ya ɛ ma lɔfu ta ɔwa ku alɔ abɔ a?

¹² Ɔdaŋ ku a wɛ ɔyinɛ nɔnyilɔ nōo wɛ ɛdrɔ nɛ a klla lɛ ubatisim ya ɛ, gbɔɔkɔ lɛ Ujehofa kóō ta uwɔ abɔ ku a lɛ ɔtu ō je otabɔ lɛ ayinɛ nōo yɔ ipu ujɔ ku uwɔ a fiyɛ. Ipu éwo ōhī, anyakwɔcɛ ku ujɔ lɛwa fiyɛ ācɛ ō ta anyakwɔcɛ ku ujɔ abɔ a, ɛyinɛhi ku aɛ̄nɛ̄ ō kē wɛ ācɛ ō ta anyakwɔcɛ ku ujɔ abɔ a wɛ aɛdrɔ kpɔ amāŋ le ya anyakwɔcɛ ɛ. Abɔ ujɔ a yɔ i jɛ gɔbu a, alɔ cɛgbá ayinɛ nɔnyilɔ nōo wɛ aɛdrɔ kéē ta anyakwɔcɛ ku ujɔ abɔ, ō leyi kwu ayinɛ nɔnyilɔ mla ayinɛ nɔnya nōo yɔ ipu ujɔ a. Ɔdaŋ ku a le tutu ō tabɔ ɛga duuma néē cɛgbá otabɔ gla, a géē lɛ eeye nɛhi. Ohigbu ɔdi? Ohigbu ku a gē yɔ i ya ku Ujehofa kóō gweeye, ayinɛ a kē géē má uwɔ ku a wɛ ɔcɛ nōo le tutu ō ta ācɛ ɔhá abɔ, a klla géē lɛ eeye nōo gē wa ŋma ō ta ācɛ ɔhá abɔ a.

13-14. Ɔdi nɛ alɔ lɔfu ya o ya ɛɛ ku alɔ ta ayinɛ alɔ nɔnyilɔ mla ayinɛ alɔ nɔnya abɔ a? (Má ifoto nōo yɔ iyɔbu ku Ɔda Ō Gbaaja nyā a.)

¹³ Leyi taajɛ lɔɔlɔhi ku a lɔfu jé eko nɛ ɔcɛ cɛgbá otabɔ. Upɔlu da Ācɛ O Yɛce Ukraist nōo lā Ujudiya a kahinii: “Aá híī mlanyī olɔhi ō yá lɛ ācɛ ŋ́, ká aá kɔ̄ ɔdā nɛ̄ aá lɛ ā mla ācɛ ɔhá. Ohígbū ka ɛ̄nyā wɛ ɛdɔ kú ɛya ogwó nōo gē he Ɔwɔicō ɔtū á.” (Uhíb. 13:16) Ukɔ́ ɔɔma wɛ ukɔ́ olɔhi! Eko yɛɛ igbihi nɛ Upɔlu ta ɔkpá  nyā fu Ācɛ O Yɛce Ukraist a, ayinɛ nyā gáā cɛgbá ō nyɛɛ ŋma ɔlɛ uwa, ō habɔ ɔhi ō ta ku uwa, mla ō habɔ amaapu uwa nōó wɛ Ācɛ O Yɛce Ukraist ŋ ma ta, mɛmla ō “le kwu ga ɛyí ɛfu.” (Umát. 24:16) Ɛpleeko ɔɔma, ó cɛgbá nɛhi kéē ta iyi uwa abɔ. Ɔdaŋ kē humayi bi ukɔ́ ku Upɔlu lɛyikwu ō kɔ ɔdā néē lɛ a mla iyi uwa le yuklɔ gbɔbu ɛ, ɛnyā géē ya kóō tɔɔtɛ lɛ uwa fiyɛ o ya ɛɛ cɛɛ kéē lɔfu lɔtu āhɔ̄ néē yɔ ipu nu babanya a.

¹⁴ Ó wɛ eko doodu nɛ ayinɛ alɔ cɛgbá otabɔ a néē gáā wɛ gáā da alɔ a ŋ. Ocabɔ mafu, alɔ je ɔ ku ɔnyā ku ɔyinɛ alɔ nɔnyilɔ éyi gekwu. Ɔba nu nyā géē cɛgbá otabɔ lɛyikwu ɔcɛ nōo géē he uce lɛ ɔ, bi ɔ ŋma ɛga éyi gā ɛga ɔhá, amāŋ ō ta ɔ abɔ yuklɔ ɔlɛ? Ó gáā lɔfu wa i ta alɔ ku anuɔ cɛgbá otabɔ ŋ, ohigbu ka ó dɔka ō junwalu lɛ alɔ ŋ. Amáŋ ó géē jɛ ɔ eyī nɛhi ɔdaŋ ku alɔ je otabɔ lɛ ɔ, naana nōó kóō wa i ta alɔ ō da alɔ ɛ ŋ ma. Alɔ kóō hii gbɛla ku ɔcɛ ɔhá géē ta ɔ abɔ, amāŋ ku anu a géē wa gáā da alɔ ɔdā nōó cɛgbá nu a eko doodu ŋ. Da iyi uwɔ ɔka kahinii: ‘Ɛdɔ otabɔ nyá nōo géē jɛ um eyī ku ɔcɛ kóō je gā um, ɔdaŋ ku um yɔ ipu ɛdɔ unwalu nōó yɔ ipu nu a?’

15. Ɔdi nɛ alɔ cika ō ya ɔdaŋ ku alɔ dɔka ō ta ācɛ ɔhá abɔ a?

¹⁵ Lɛ ɔ ya tɔɔtɛ ku ācɛ ɔhá kéē lɔfu wa i ta uwɔ ku a ta uwa abɔ gla. Ó lɛ aafu ŋ, a jé ayinɛ ipu ujɔ ku uwɔ nōo le tutu ō ta ācɛ ɔhá abɔ eko doodu. Ayinɛ nōo ba nyā i gē ya ku ɔtu kóō ya alɔ bɛɛka alɔ yɔ i junwalu lɛ uwa ŋ. Alɔ jé kē géē yɔ i tutu ō ta alɔ abɔ eko doodu, alɔ kē géē dɔka ō lɛbɛɛka uwa a duu! Alan ɔnyakwɔcɛ ku ujɔ éyi nōo wɛ ihayi ofu ɛpa ce ɛhɔ (45) a, dɔka ō ya kóō tɔɔtɛ lɛ ācɛ ɔhá ō wa i ta ɔ gla. Alan kɛla lɛyikwu ocabɔ ku Ujisɔsi kahinii: “Ujisɔsi i wɛ ɔcɛ ō lɛ ɛga ŋ, amáŋ ācɛ nōo wɛ aɛdrɔ mla ācɛ nōo jikoko bɛɛka anu a, i gē yuufi ō nyɔ i ta ɔ kóō ta uwa abɔ ŋ. É jé  ka ó lɛ ɛlá wu uwa nɛhi. N dɔka ō gbla Ujisɔsi ya o ya ɛɛ cɛɛ ku ācɛ kéē jé um, ku um wɛ ɔcɛ nɛ ɔcɛ lɔfu ta ɔ kóō je otabɔ lɛ ɔ, ɔcɛ nōo yihɔtu ācɛ, nōo klla lɛ ɛlá wu uwa nɛhi.”

16. Ɛgɛnyá nōo yuklɔ mla ɛlā nōo yɔ ipu ɔkpá ku Aíjē Kú Ɛ̄gbā 119:59, 60 a, gáā ta alɔ abɔ ku alɔ yɛce ocabɔ ku Ujisɔsi lɔɔlɔhi a?

¹⁶ Ɔtu ka ó hii biya lɛ alɔ ɔdaŋ ku alɔ i lɔfu gbla Ujisɔsi ya mɛɛlɛ ŋ. (Ujɛ́m. 3:2) Ɔcɛ ō nwu uklɔ abɔ i gáā lɔfu yuklɔ mɛɛlɛ bɛɛka ɔkpani ku nu a gla ŋ. Amáŋ ɔdaŋ ka ó nwu ɛlā ŋma inyileyi ku nu, klla ceyitikwu kóō yɛce ocabɔ ku ɔkpani ku nu lɔɔlɔhi ɛgɛ duuma nōó jé ka anuɔ ya gla, ɔcɛ ɔɔma géē yɔ i ya lɔhi fiyɛ. Ɔwɛ ekponu ɔɔma, ɔdaŋ ku alɔ yɔ i bi ɛlā nɛ alɔ yɔ i nwu eko nɛ alɔ gē ya oklɔcɛ ku Ubáyíbu a le yuklɔ, nɛ alɔ klla yɔ i ceyitikwu ya lɔhi fiyɛ, alɔ géē yɔ i gbla ocabɔ mafu ku Ujisɔsi ya lɔɔlɔhi.—Jé Aíjē Kú Ɛ̄gbā 119:59, 60.

17-18. Itene nyá nɛ alɔ géē lɛ ɔdaŋ ku alɔ gbla Ujisɔsi ya ɔwɛ ɛgɛ nɛ ó je iyi nu tɛɛcɛ ō ta ācɛ ɔhá abɔ lɛ a?

¹⁷ Ɔdaŋ ku alɔ le tutu ō ta ācɛ ɔhá abɔ, ó géē lɛ abɔ kwu ācɛ ɔhá ɔtu kéē ya lɛ a duu. Ɔnyakwɔcɛ ku ujɔ éyi nōo le ku Tim a kahinii: “Ayinɛ alɔ nɔnyilɔ ōhī nōo wɛ aɛdrɔ a kwu piya ācɛ ō ta anyakwɔcɛ ku ujɔ abɔ ɛ. Ɔdā éyi nōo ya ɛɛ néē ya ɛnyā a wɛ kahinii, é má ɛgɛ nɛ ācɛ ɔhá le tutu ō je otabɔ, ó kē yɔ i ŋmo uwa unwu kéē gbla uwa ya duu. Ayinɛ alɔ nɔnyilɔ nōo wɛ aɛdrɔ nyā gē ta ujɔ ku alɔ abɔ, é ke i ta anyakwɔcɛ ku ujɔ abɔ nɛhi.”

¹⁸ Ācɛ alɛwa ipu ɛcɛ nyā gē ya ɔdā nōo géē tiile lɛ iyi uwa foofunu. Amáŋ ācɛ ɔlɛ Ujehofa i lɛ a nóó. Ɔwɛ ɛgɛ nɛ Ujisɔsi ta ācɛ ɔhá abɔ a lɛ abɔ kwu alɔ ɔtu nɛhi, ohigbu ɔɔma, alɔ lɛ ɔtu ku alɔ ya ekponu ō yɛce ocabɔ ku nu. Alɔ jé ku alɔ i gáā yɛce ocabɔ mafu ku nu mɛɛlɛ gla ŋ, amáŋ alɔ lɔfu ‘yɛce ikpo ku nu lɔɔlɔhi.’ (1 Upít. 2:21) Abɔ alɔ gē bi ɛjɛɛji ɔfu ku alɔ yɔ i gbla Ujisɔsi ya a, alɔ géē lɛ eeye nɛhi, ohigbu ku alɔ jé ku alɔ yɔ i ya ɔdā nōo he Ujehofa ɔtu a.