1. Ania a nasayaat a kababalin ti makitkitatayo iti ili ni Jehova?

 NABAYAGEN nga impakpakauna ti Biblia a “sisasagananto dagiti tattao [ti Dios] nga agboluntario” iti panagserbi ken Jehova nga idadauluan ti Anakna. (Sal. 110:3) Talaga a matungtungpalen ita dayta a padto. Kada tawen, ginasut a milion nga oras ti us-usaren dagiti nareregta nga adipen ni Jehova iti trabaho a panangasaba. Boluntario nga ar-aramidenda dayta ken iti bukodda a gastos. Mangiwaywayada met iti tiempo a tumulong kadagiti kapammatianda iti pisikal, emosional, ken naespirituan a pamay-an. Dagiti naapointaran a kakabsat a lallaki ket mangilatlatang iti adu nga oras a mangisagana kadagiti pasetda iti gimong ken mangipastor kadagiti kapammatianda. Ania ti mangtigtignay iti ili ti Dios a mangaramid kadagita? Ayat​—ti ayatda ken Jehova ken iti kaarrubada.​—Mat. 22:37-39.

2. Kas nadeskribir iti Roma 15:1-3, ania ti inyulidan ni Jesus?

² Nagsayaat ti inyulidan ni Jesus iti panangyun-unana iti pagimbagan ti sabsabali ngem iti bagina. Ar-aramidentayo ti amin a kabaelantayo a suroten dagiti addangna. (Basaen ti Roma 15:1-3.) Adunto a gunggona ti apiten dagidiay mangtultulad kenkuana. Kinuna ni Jesus: “Naragragsak ti mangted ngem ti umawat.”​—Ara. 20:35.

3. Ania ti usigentayo iti daytoy nga artikulo?

³ Iti daytoy nga artikulo, repasuentayo ti dadduma nga insakripisio ni Jesus tapno makapagserbi iti sabsabali ken usigentayo no kasanotayo a matulad ti ulidanna. Pagsasaritaantayo met no kasanotayo a maparayray ti tarigagaytayo nga agserbi iti sabsabali.

4. Kasano nga inyun-una ni Jesus dagiti kasapulan ti dadduma ngem iti kasapulanna?

⁴ Timmulong ni Jesus uray no nabambannog. Panunotentayo ti inaramid ni Jesus idi immay kenkuana ti adu a tattao iti sikigan ti maysa a bantay, a posible nga asideg iti Capernaum. Nagpatpatnag a nagkarkararag ni Jesus. Nabambannog la ketdi isuna. Ngem idi nakitana ti bunggoy, naasian kadagiti napanglaw ken masakit kadakuada. Saanna laeng a pinaimbag ida no di ket impalawagna pay ti maysa kadagiti makaparegta unay a pangpubliko a diskurso a pagaammo kas ti Sermon iti Bantay.​—Luc. 6:12-20.

5. Kasano a tultuladen dagiti ulo ti pamilia ti kinamanagsakripisio ni Jesus no nabambannogda?

⁵ No kasano a tultuladen dagiti ulo ti pamilia ti ulidan ni Jesus. Panunotenyo daytoy nga eksena: Kalpasan ti agmalmalem a panagtrabaho ti maysa nga ulo ti pamilia, agawid a nabambannog. Kayatna koma a kanselaren ti Panagdaydayaw ti Pamiliada a nakaeskediul iti dayta a rabii. Ngem impakaasina ken Jehova a maaddaan koma iti pigsa a mangidaulo iti panagadalda. Sinungbatan ni Jehova ti kararagna, ket natuloy met laeng ti panagadalda. Adda importante a nasursuro dagiti ubbing iti dayta a rabii: Para kadagiti nagannakda, ti panagdaydayaw ken Jehova ti kapatgan iti amin.

6. Mangted iti pagarigan no kasano nga insakripisio ni Jesus ti oras a para koma iti bagina tapno tumulong iti sabsabali.

⁶ Insakripisio ni Jesus ti orasna a para koma iti bagina. Maimadyinyo kadi ti narikna ni Jesus idi naammuanna a naipapugot ti gayyemna a ni Juan a Mammautisar? Sigurado a naladingitan unay ni Jesus. Kuna ti Biblia: “Idi naammuan daytoy ni Jesus, [ti ipapatay ni Juan,] naglugan iti bangka ket napan iti naiputputong a lugar tapno agmaymaysa.” (Mat. 14:10-13) Maawatantayo no apay a kayatna idi ti agmaymaysa. Adu kadatayo ti kayatna ti agmaymaysa no agladladingit. Ngem saan a naaramid dayta ni Jesus. Adu a tattao ti immun-una a nakadanon iti dayta a naiputputong a lugar. Ania ti reaksion ni Jesus? Pinanunotna dagiti kasapulan ti bunggoy, ken “naasian” kadakuada. Nakitana a  kasapulanda unayen ti naespirituan a pannakabang-ar, isu a dagus nga impaayna dayta. Kinapudnona, “insurona ida [saan la nga iti sumagmamano a banag, no di ket] iti adu a banag.”​—Mar. 6:31-34; Luc. 9:10, 11.

7-8. Mangted iti pagarigan no kasano a tultuladen dagiti naayat a panglakayen ti ulidan ni Jesus no adda panagkasapulan.

⁷ No kasano a tultuladen dagiti naayat a panglakayen ti ulidan ni Jesus. Apresiarentayo unay ti ar-aramiden dagiti managsakripisio a panglakayen para kadatayo! Adu kadagita ti saan a makitkita ti kaaduan iti kongregasion. Kas pagarigan, no adda medikal nga emerhensia dagiti kakabsat, sidadaras a tulongan ida dagiti miembro ti Hospital Liaison Committee. Masansan pay met a mapasamak dagita nga emerhensia iti tengnga ti rabii! Ngem gapu iti pannakipagriknada kadagiti kakabsatda nga adda iti narigat a situasion, iyun-una dagita a naayat a panglakayen, agraman ti pamiliada, ti pagimbagan dagiti kapammatianda.

⁸ Tumultulong met dagiti panglakayen iti pannakaibangon dagiti Kingdom Hall ken dadduma pay a pasilidad, kasta met iti panangsaranay no adda didigra. Ken di mabilang nga oras ti ipapaay dagiti panglakayen iti kongregasiontayo a mangisuro, mangparegta, ken tumulong kadatayo. Maikari amin dagitoy a kakabsat ken ti pamiliada iti naimpusuan a komendasiontayo. Bendisionan koma ni Jehova ti kinamanagsakripisioda! Siempre, kas kadatayo amin, masapul nga agbalin a balanse dagiti panglakayen. Saanda koma nga usaren ti kaaduan a tiempoda kadagita a nateokratikuan nga aktibidad nga uray la mabaybay-anen ti kasapulan ti pamiliada.

9. Sigun iti Filipos 2:4, 5, ania a panagpampanunot ti masapul a kultibaren ti amin a Kristiano?

⁹ Basaen ti Filipos 2:4, 5. Saantayo met ketdi amin a panglakayen, ngem masursurotayo amin a tuladen ti kinamanagsakripisio ni Jesus. Ibaga ti Biblia nga isu ket “nagbalin a kas adipen.” (Fil. 2:7) Panunotem ti kaipapanan dayta a bersikulo. Ti maysa a maipatpateg nga adipen, wenno agserserbi, ket agbirok kadagiti oportunidad tapno maparagsakna ti amona. Kas adipen ni Jehova ken agserserbi kadagiti kakabsatmo, sigurado a kayatmo nga ad-adu pay ti maaramidam para ken Jehova ken kadagiti kapammatiam. Maaramidam dayta no surotem dagiti sumaganad a suhestion.

10. Ania dagiti mabalintayo nga isaludsod iti bagitayo?

¹⁰ Panunotem ti kababalinmo ken dagiti reaksionmo. Isaludsodmo dagitoy iti bagim: ‘Situtulokak kadi a mangisakripisio iti tiempo ken pigsak a tumulong iti sabsabali? Kas pagarigan, ania ti reaksionko no makiddaw kaniak a bisitaek ti maysa a lakay a kabsat, wenno dagasek ti maysa a baket a kabsat a mapan makigimong? Alistoak kadi nga agboluntario no adda awis a mangdalus iti pagkombensionan wenno mangmantener iti Kingdom Hall?’ Maragsakan ni Jehova no sipaparabur nga usarentayo a tumulong ti tiempo, pigsa, ken sanikuatayo, ta inkaritayon nga ipaaytayo amin dagita kenkuana. Ania ti aramidentayo no adda makitatayo a masapul pay a parang-ayentayo?

11. Kasano a makatulong ti kararag tapno agbalintayo a managsakripisio?

¹¹ Sipapasnek nga agkararagka ken Jehova. Ipapantayon nga adda dagiti nakitam a masapul a balbaliwam tapno agbalinka a managsakripisio, ngem kurang ti tarigagaymo a mangaramid kadagita. No kasta, sipapasnek nga agkararagka ken Jehova. Agbalinka a napudno. Ibagam ken Jehova ti marikriknam ken ipakaasim nga ipaayna kenka ti “tarigagay ken ti pannakabalin a mangaramid iti amin a banag a pakaragsakanna.”​—Fil. 2:13.

12. Ania ti maitulong dagiti bautisado nga agtutubo a lallaki?

¹² No maysaka a bautisado nga agtutubo a lalaki, kiddawem ken Jehova a maaddaanka iti tarigagay nga agpausar iti ad-adu pay a pamay-an para iti kongregasion. Iti dadduma a nasion, ad-adu ti panglakayen ngem ministerial nga adipen, ken adu kadakuada ti nataenganen. Bayat a dumakdakkel ti organisasion, kasapulantayo ti ad-adu nga agtutubo a brother a tumulong iti pannakaaywan ti ili ni Jehova. No situtulokka nga agserbi iti sadinoman nga adda panagkasapulan, agbalinka a naragsak. Apay? Gapu ta maparagsakmo ni Jehova, maaddaanka iti nasayaat a reputasion, ken mariknam ti pannakapnek nga iyeg ti panangtulong iti sabsabali.

13-14. Ania dagiti praktikal a maitulongtayo kadagiti kapammatiantayo? (Kitaen ti ladawan iti akkub.)

¹³ Nasiputka koma no siasino dagiti agkasapulan iti tulong. Imbalakad ni apostol Pablo kadagiti Hebreo: “Diyo liplipatan ti agaramid iti nasayaat ken ti mangibingay kadagiti bambanag nga adda kadakayo, ta maragsakan unay ti Dios kadagita a daton.” (Heb. 13:16) Praktikal dayta a balakad! Di nagbayag, kalpasan a naawat dagiti Kristiano idiay Judea daytoy a surat, masapul a panawanda ti balbalayda, negosioda, ken di manamati a kakabagianda ket “agkamangda koman iti kabambantayan.” (Mat. 24:16) Iti dayta a tiempo, sigurado a kasapulan unay nga agtitinnulongda. No sakbay pay dayta ket iyap-aplikardan  ti balakad ni Pablo, nga ibingayda ti adda kadakuada, nalaklakada nga iruam ti bagida iti baro a pamay-an ti panagbiag.

¹⁴ Mabalin a saan a kanayon nga ibaga dagiti kapammatiantayo dagiti kasapulanda. Kas pagarigan, nabalo ti maysa a kabsat a lalaki. Kasapulan kadi nga adda tumulong kenkuana a mangisagana iti taraonna, mangilugan kenkuana, wenno mangasikaso kadagiti trabaho iti balayna? Baka mabain nga agpatulong ta dinatay kayat a maobligar. Ngem mabalin nga apresiarenna unay no agboluntariotayo a mangipaay iti kasapulanna a tulong. Ditay koma ipapan nga addanto sabali a tumulong kenkuana wenno kanayon a maibagana kadatayo dagiti kasapulanna. Isaludsodmo iti bagim, ‘No siak ti adda iti situasionna, ania a tulong ti apresiarek unay?’

15. Tapno agbalintayo a managsakripisio, ania ti masapul a determinasiontayo?

¹⁵ Nalakaka koma a maas-asitgan. Sigurado nga ammotayo no siasino kadagiti kakongregasiontayo ti kanayon a nakasagana a tumulong. Dida pulos iparikna nga ob-obligarentayo ida. Ammotayo a mapangnamnamaantayo ida no adda problema, ken kayattayo la ketdi a tuladen ida! Kayat ni Alan, a maysa a panglakayen a nasurok a 40 ti tawenna, ti agbalin a nalaka a maas-asitgan. Imbaga ni Alan maipapan iti ulidan ni Jesus: “Busy idi ni Jesus, ngem nalag-an ti rikna dagiti tattao kenkuana, aniaman ti edadda, ken saanda a mabuteng nga agpatulong kenkuana. Ammoda a talaga a maseknan kadakuada. Kayatko unay a tuladen ni Jesus tapno maam-ammodak kas maysa a nalaka a maas-asitgan, nadungngo, ken manangisakit.”

16. Kasano a masurottayo a naimbag ti ulidan ni Jesus no iyaplikartayo ti Salmo 119:59, 60?

¹⁶ Saantayo koma a maup-upay no ditay matulad  ni Jesus iti perpekto a pamay-an. (Sant. 3:2) Ti maysa nga estudiante nga agsursuro nga agbalin nga artist dina perpekto a matulad ti obra ti maestrona. Ngem rumang-ay a rumang-ay isuna bayat a makasursuro kadagiti kamalina, ken ikagumaanna a tuladen a naimbag ti maestrona agingga a posible. Kasta met, no iyaplikartayo dagiti nasursurotayo iti personal a panagadaltayo iti Biblia, ken aramidentayo ti amin a kabaelantayo a mangkorehir iti aniaman a kamalitayo, sibaballigi a masurottayo ti pagtuladan nga imbati ni Jesus kadatayo.​—Basaen ti Salmo 119:59, 60.

17-18. Bayat a tultuladentayo ti kinamanagsakripisio ni Jesus, ania dagiti gunggona a matagiragsaktayo?

¹⁷ Makaakar ti kinamanagsakripisiotayo. Kinuna ni Tim a maysa a panglakayen: “Adda dagiti agtutubo iti kongregasionmi a rimmang-ay ken naapointaran kas ministerial nga adipen. Nakaub-ubing pay ngarud ti dadduma kadakuada. Ti maysa a rason ket tinuladda ti nakitada a kinatulok ti dadduma nga agserbi iti sabsabali. Gapu iti di managimbubukodan a panagreggetda, mabembenepisiaran ti kongregasionmi ken ad-adu ti tumultulong kadagiti panglakayen.”

¹⁸ Agbibiagtayo iti lubong a namurumoran kadagiti managimbubukodan a tattao. Ngem naiduma ti ili ni Jehova. Natukay ti pusotayo gapu iti kinamanagsakripisio ni Jesus, ket determinadotayo a mangtulad iti ulidanna. Siempre, saantayo a perpekto a masurot dagiti addangna, ngem kayatayo a ‘suroten a naimbag dagiti addangna.’ (1 Ped. 2:21) Bayat nga ar-aramidentayo ti amin a kabaelantayo a mangtulad iti kinamanagsakripisio ni Jesus, naragsaktayo met ta adda kadatayo ti pabor ni Jehova.