1. Wɛtʋ kɩbandʋ ndʋ Yehowa samaɣ taa mba wɛna?

 BIBL kaayɔɔdɩ ɖooo lɔŋ se Ɛsɔ “samaɣ kaɣ ka-tɩ haʋ faaa” nɛ Yesu ɖiyi-kɛ nɛ kala Yehowa tʋma. (Keɣa 110:3; nwt) Pɩtʋʋ fɛyɩ se natʋ tɔm ndʋ tiɖiɣni labʋ sɔnɔ. Yehowa sɛyaa wɛ kpekpeka; nɛ paa pɩnaɣ ŋga lɛ, pakpakɩɣ ñɩɣtʋ miiliyɔɔwaa sakɩyɛ nɛ palakɩnɩ tɔm susuu tʋmɩyɛ. Paahɛyɩɣ-wɛ pʋcɔ nɛ palakɩ tʋmɩyɛ nɖɩ, pa-maɣmaɣ pahaɣnɩ pa-tɩ faaa nɛ palakɩ-ɖɩ. Pɩtasɩ lɛ, pakpakɩɣ alɩwaatʋ nɛ pasɩɣnɩ po-koobiya Krɩstʋ mba tomnaɣ yɔɔ, pakpazɩɣ-wɛ ɖoŋ, nɛ pasɩɣnɩ-wɛ fezuu taa. Ɛgbɛyɛ taa ɛzʋtʋyaa nɛ ɛgbɛyɛ taa tʋmlaɖaa kpakɩɣ ñɩɣtʋ sakɩyɛ nɛ pɔñɔɔzʋʋnɩ kediɣzisi hɔɔlɩŋ ndɩ ndɩ nɛ pekilimiɣ koobiya yɔɔ se pakpazɩ-wɛ ɖoŋ. Ɛbɛ seɣtiɣ-wɛ nɛ palakɩ tʋma ana a-tɩŋa? Palakɩ mbʋ, mbʋ pʋyɔɔ yɔ pɔsɔɔlɩ Yehowa nɛ ɛyaa lalaa.—Mat. 22:37-39.

2. Ɛzɩ Roma mba 15:1-3 yɔɔdʋʋ yɔ, kɩɖaʋ ŋgʋ Yesu hawa?

² Yesu ɖɛzaɣ lalaa kɛzɛsɩ nɔɔ, nɛ ɛkɛ kɩɖaʋ kɩbaŋʋ hɔɔlʋʋ ŋgʋ kɩ-taa. Ðɩwɛɛ nɛ ɖɩlakɩ ɖo-ɖoŋ ɖeɖe se ɖɩɖɔ ɛ-nɩŋgbanzɩ taa. (Kalɩ Roma mba 15:1-3.) Ye ɖɩmaɣzɩɣnɩ-ɩ yɔ, pɩlʋlʋʋ pee kɩbana. Yesu yɔɔdaa se: “Taa leleŋ wɛ haʋ taa nɛ pɩkɩlɩ mʋʋ taa.”—Tʋma 20:35.

3. Ɛbɛ ɖɩkaɣ naʋ tɔm ñʋʋ kʋnɛ kɩ-taa?

³ Tɔm ñʋʋ kʋnɛ kɩ-taa, ɖɩkaɣ naʋ kɩlaŋ weyi Yesu lawa se pɩsa nɛ ɛsɩnɩ lalaa yɔ ɩ-taa nɩɩyɩ, nɛ ɖɩkaɣ naʋ ɖɔɖɔ ɛzɩma ɖɩpɩzɩɣ nɛ ɖɩmaɣzɩnɩ ɛ-kɩɖaʋ yɔ. Pɩtasɩ lɛ, ɖɩkaɣ naʋ mbʋ pɩpɩzɩɣ pɩsɩnɩ-ɖʋ nɛ ɖɩsɔɔlɩ faaa se ɖɩsɩnɩ lalaa nɛ pɩkɩlɩ yɔ.

4. Ɛzɩma tɩyɛ Yesu ɖɛzɩ lalaa kɩcɛyɩm nɔɔ?

⁴ Yesu ha ɛ-tɩ faaa nɛ ɛsɩnɩ lalaa halɩ pɩkpɛndɩnɩ alɩwaatʋ ndʋ pɩnɩ-ɩ yɔ. Maɣzɩ mbʋ Yesu laba alɩwaatʋ ndʋ ɛyaa samaɣ sɔsɔɔ nakɛyɛ woba nɛ kakatɩ-ɩ pʋʋ nakʋyʋ cɔlɔ yɔ pɩ-yɔɔ nɛ ŋna; pɩkɛɣnɩ Kapɛrɩnawum cɔlɔ. Yesu kaakpaɣ ɖoo pilim nɛ  ɛtɩmɩ. Pʋyɔɔ lɛ, pɩtʋʋ fɛyɩ se pɩɩnɩ-ɩ siŋŋ; ɛlɛ alɩwaatʋ ndʋ ɛna samaɣ yɔ, kʋñɔndɩnaa nɛ kʋdɔndɩnaa mba paawɛ ka-taa yɔ, pɔ-tɔm labɩ-ɩ pʋtɔdɩyɛ. Pɩtasɩna se ɛwa pa-kʋdɔmɩŋ lɛ, ɛyɔɔdɩ ɖɔɖɔ samaɣ taa tɔm natʋyʋ ndʋ tɩ-wayɩ fɛyɩ yɔ nɛ tiseɣti ɛyaa siŋŋ. Samaɣ taa tɔm yɔɔdʋʋ mbʋ payaɣ se Pʋʋ Yɔɔ Tɔm Yɔɔdʋʋ.—Luka 6:12-20.

5. Alɩwaatʋ ndʋ pɩnɩɣ hɔŋ ñʋndɩnaa yɔ, ɛzɩma pamaɣzɩɣnɩ Yesu tɩ laʋ lɩmaɣza?

⁵ Ɛzɩma hɔŋ ñʋndɩnaa maɣzɩɣnɩ Yesu yɔ. Maɣzɩ wɛtʋ tʋnɛ tɩ-yɔɔ nɛ ŋna: Hɔʋ ñʋʋdʋ nɔɔyʋ labɩ tʋmɩyɛ evemiye tɩŋa, nɛ ɛpɩsɩ nɛ ɛkɔɔ ɖanaɣ yɔɔ pɩnɩ-ɩ siŋŋ. Paa pɩɩlakaɣ-ɩ ɛzɩ pataala hɔʋ taa Ɛsɔ sɛtʋ ndʋ pɩwɛɛ se pala ɖanaɣ ŋga yɔ, ɛtɩmnɩ Yehowa se ɛha-ɩ ɖoŋ nɛ ɛcɔnɩ kpɛlɩkʋʋ mbʋ pɩ-yɔɔ. Yehowa cosi ɛ-adɩma yɔɔ nɛ pala kpɛlɩkʋʋ mbʋ ɛzɩ patɩɩlakʋʋ yɔ. Piya kpɛlɩkɩ lɔŋ kɩbaŋ nɩɩyɩ ɖanaɣ ŋga. Ɛnɩ yɔ: Sɩ-lʋlɩyaa ɛsɩndaa lɛ, fezuu taa wondu tɔm kɩlɩnɩ cɛyʋʋ pɩtɩŋa payɩ.

6. Ha kɩɖaʋ ŋgʋ kɩwɩlɩɣ se Yesu kpaɣ alɩwaatʋ ndʋ ɛɛsɔɔlaa se ɛwɛɛ e-ɖeke yɔ nɛ ɛsɩnɩ ɛyaa lalaa yɔ.

⁶ Yesu haɣaɣ ɛ-alɩwaatʋ ɛyaa lalaa halɩ pɩkpɛndɩnɩ alɩwaatʋ ndʋ ɛɛsɔɔlaa se ɛwɛɛ e-ɖeke yɔ. Ŋpɩzɩɣ nɛ ŋmaɣzɩ nɛ ŋna ɛzɩma pɩɩlabɩ Yesu alɩwaatʋ ndʋ ɛnɩwa se pakʋ ɛ-taabalʋ Yohanɛɛsɩ Lɩm Mɩyɩsɩyʋ yɔ? Pɩtʋʋ fɛyɩ se piiyeba nɛ Yesu wɛɛ laŋwɛɛkɩyɛ taa siŋŋ. Bibl yɔɔdʋʋ se: “Yesu nɩ [Yohanɛɛsɩ sɩm tɔm] lɛ, ɛkʋyɩ peeɖe nɛ ɛkpa kpɩyʋʋ taa nɛ ewolo lone nɖɩ ɖɩ-taa ɛpɩzɩɣ nɛ ɛwɛɛ e-ɖeke yɔ.” (Mat. 14:10-13) Ðɩpɩzɩɣ nɛ ɖɩnɩɩ mbʋ pʋyɔɔ Yesu kaasɔɔlaa se ɛwɛɛ e-ɖeke yɔ pɩ-taa. Ɛyaa nabɛyɛ sɔɔlaa se pɛwɛɛ pe-ɖeke alɩwaatʋ ndʋ pɛwɛɣ kʋñɔwiye taa yɔ. Ɛlɛ Yesu lɛ, ɛtɩpɩzɩ nɛ ɛwɛɛ e-ɖeke. Ɛyaa samaɣ sɔsɔɔ nakɛyɛ talɩ lone nɖɩ ɖɩ-taa ewokaɣ se ɛwɛɛ e-ɖeke yɔ pʋcɔ nɛ ɛ-maɣmaɣ ɛtalɩ peeɖe. Ɛzɩma Yesu laba? Ɛmaɣzɩ samaɣ ŋga ka-kɩcɛyɩm yɔɔ, nɛ “kalabɩ-ɩ pʋtɔdɩyɛ.” Yesu kaaɖiɣzinaa se pɩpɔzʋʋ-wɛ sɩnʋʋ nɛ laŋɩyɛ hɛzʋʋ mbʋ pɩlɩnɩ Ɛsɔ cɔlɔ yɔ; nɛ ɛpaɣzɩ-wɛ sɩnʋʋ kpaagbaa. Toovenim taa lɛ, ‘ɛpaɣzɩ-kɛ tɔm wɩlʋʋ [pɩtɩkɛ tɔm pazɩ, ɛlɛ] tɔm sakɩyɛ.’—Mark. 6:31-34; Luka 9:10, 11.

7-8. Ha kɩɖaʋ ŋgʋ kɩwɩlɩɣ ɛzɩma ɛgbɛyɛ taa ɛzʋtʋyaa maɣzɩɣnɩ Yesu alɩwaatʋ ndʋ pɩpɔzʋʋ se pasɩnɩ nɔɔyʋ ɛgbɛyɛ taa yɔ.

⁷ Ɛzɩma ɛgbɛyɛ taa ɛzʋtʋyaa maɣzɩɣnɩ Yesu yɔ. Ðɩwɛnɩ ɛsɩmɩyɛ kpem tʋma wena  ɛgbɛyɛ taa ɛzʋtʋyaa lakɩ nɛ pasɩɣnɩ-ɖʋ yɔ a-yɔɔ! Koobiya sakɩyɛ tɩtɩlɩ tʋma wena ɛgbɛyɛ taa ɛzʋtʋyaa lakɩ yɔ a-tɩŋa. Kɩɖaʋ nakʋyʋ yɔ: Alɩwaatʋ ndʋ pɩpɔzʋʋ se pasɩnɩ koobu nɔɔyʋ ɖɔkɔtɔ tɛ kpɛdɛyɛ yɔ, koobiya mba palakɩ tʋmɩyɛ Ðama nɩnʋʋ nɛ ɖɔkɔtɔnaa kɔɔmiite taa yɔ, pakʋyʋʋ nɛ pasɩɣnɩ-ɩ kpɛdɛyɛ. Ðoŋ ɖoŋ lɛ, ɖoo taa koobiya yaɣ-wɛ se powolo nɛ pasɩnɩ-wɛ. Ɛlɛ ɛgbɛyɛ taa ɛzʋtʋyaa mba nɛ pɔ-hɔŋ taa ñɩma panɩɣ po-koobiya mba pɛwɛ kʋñɔŋ taa yɔ pe-siziŋ, nɛ piseɣtiɣ-wɛ nɛ pɛɖɛzɩɣ po-koobiya mba pɛ-kɛzɛsɩ nɔɔ.

⁸ Pɩtasɩ lɛ, ɛgbɛyɛ taa ɛzʋtʋyaa ɖʋʋ nesi Kewiyaɣ Kpaamɩŋ nɛ teokrasɩ kuduyuŋ lɛɛŋ maʋ tʋmɩyɛ; nɛ paɖʋʋ ɖɔɖɔ nesi alɩwaatʋ ndʋ asɛyɩŋ lakɩ yɔ. Nɛ ɖa-agbaa taa ɛzʋtʋyaa kpakɩɣ ñɩɣtʋ sakɩyɛ nɛ pawɩlɩɣ-ɖʋ tɔm, pakpazɩɣ-ɖʋ ɖoŋ, nɛ pasɩɣnɩ-ɖʋ. Koobiya mba nɛ pɔ-hɔŋ taa mba pamʋnaa se ɖɩsam-wɛ nɛ ɖa-laŋɩyɛ pilim. Tɛtɛ nɛ Yehowa wɛɛ nɛ ɛwazɩɣ maɣzɩm mbʋ pɛwɛna yɔ! Toovenim taa lɛ, ɛzɩ pɩpɔzʋʋ ɖa-tɩŋa payɩ ɖɔ-hɔɔlʋʋ taa yɔ, pɩwɛɛ se ɛzʋtʋyaa ɩtɩlɩ labʋ nɛ pataakpilini hɔɔlʋʋ nakʋyʋ yɔɔ. Pɩtɩpɔzɩ se pakɩlɩ kpaɣʋ alɩwaatʋ teokrasɩ tʋma ana a-labʋ taa nɛ piyele nɛ paawɛɣnɩ alɩwaatʋ se pɔcɔnɩ pɔ-hɔŋ kɩcɛyɩm ɖeɖe.

9. Ɛzɩ Filiipi mba 2:4, 5 yɔɔdʋʋ yɔ, maɣzɩm mbʋ pɩwɛɛ se Krɩstʋ mba tɩŋa ɩñaɣ pana nɛ pɛwɛɛna?

⁹ Kalɩ Filiipi mba 2:4, 5. Toovenim taa lɛ, pɩtɩkɛ ɖa-tɩŋa ɖɩkɛnɩ ɛgbɛyɛ taa ɛzʋtʋyaa, ɛlɛ ɖa-tɩŋa ɖɩpɩzɩɣ nɛ ɖɩmaɣzɩnɩ Yesu tɩ laʋ lɩmaɣza. Bibl yɔɔdʋʋ se: “Ɛkpaɣ yom wɛtʋ.” (Fil. 2:7) Maɣzɩ nɛ ŋna lɔŋ  weyi ɖɩpɩzɩɣ nɛ ɖɩkpɛlɩkɩ mayaɣ kanɛ ka-taa yɔ. Yom kɩbanʋ yaa lɩmɖʋyʋ ñɩnɩɣ nʋmɔŋ weyi ɩ-yɔɔ ɛpɩzɩɣ nɛ ɛtɩŋna nɛ ɛ-tɔm kɛdɩnɩ ɛ-caa yɔ. Ŋkɛ Yehowa yom nɛ ño-koobiya lɩmɖʋyʋ; pʋyɔɔ lɛ, pɩtʋʋ fɛyɩ se ŋsɔɔlaa se ŋwɛɛ wazaɣ Yehowa nɛ ño-koobiya Krɩstʋ ñɩma nɛ pɩkɩlɩ. Ye ŋmaɣzɩɣ lɔŋ tasʋʋ mbʋ pɩkɔŋ yɔ pɩ-yɔɔ yɔ, ŋpɩzɩɣ nɛ ŋla mbʋ.

10. Tɔm ndʋ ɖɩpɩzɩɣ nɛ ɖɩpɔzɩ ɖa-tɩ?

¹⁰ Maɣzɩ nɛ ŋna se maɣzɩm mbʋ ŋwɛna. Pɔzɩ ña-tɩ tɔm ɛzɩ tʋnɛ yɔ: ‘Mɔnsɔɔlɩ faaa se mankpaɣ ma-alɩwaatʋ nɛ mon-ɖoŋ nɛ mansɩnɩ lalaa na? Ye pɔpɔzɩ-m se mowoki nɛ manaɣ koobu abalɩñɩnʋ akpadɩyʋ nɔɔyʋ yaa ye pɔpɔzɩ-m se mowoki nɛ mankpakɩɣ koobu halɩñɩnʋ akpadɩyʋ nɔɔyʋ nɛ mowokini kediɣzisi taa yɔ, ɛzɩma malakɩ? Alɩwaatʋ ndʋ pɩpɔzʋʋ se koobiya ɩha pa-tɩ faaa nɛ pɔñɔɔzɩ kigbeɣluu lone naɖɩyɛ taa yaa Kewiyaɣ Kpaaŋ taa nɛ pɩwɛɛ cɩɖɩ cɩɖɩ yɔ, mahaɣ man-tɩ faaa se mansɩna?’ Alɩwaatʋ ndʋ ɖɩha ɖa-tɩ Yehowa yɔ, ɖɩlabɩ-ɩ tamaɣ se ɖɩkaɣ labɩnʋʋ tʋmɩyɛ mbʋ ɖɩwɛna yɔ nɛ ɖɩsɛɛnɩ-ɩ. Ɛsɔɔlaa se ɖɩkpaɣ ɖa-alɩwaatʋ, ɖo-ɖoŋ, nɛ mbʋ ɖɩwɛnɩ tomnaɣ yɔɔ yɔ nɛ ɖɩsɩnɩ lalaa. Pʋyɔɔ lɛ, ye ɖɩfɛyɩnɩ piɖeni men-ɖeke wɛtʋ nɛ ɖɩlakɩ mbʋ yɔ, ɛ-taa lakɩ leleŋ. Ye ɖiɖiɣzinaa se pɩpɔzʋʋ se ɖɩñaɣ pana nɛ pɩkɩlɩ yɔ, ɛbɛ ɖɩpɩzɩɣ nɛ ɖɩla?

11. Ɛzɩma adɩma pɩzɩɣ asɩnɩ-ɖʋ nɛ ɖɩsɔɔlɩ faaa se ɖɩsɩnɩ lalaa?

¹¹ Tɩmnɩ Yehowa nɛ ña-laŋɩyɛ pilim. Ðɩkpaɣ se ŋɖiɣzinaa se pɩpɔzʋʋ se ŋñaɣ pana hɔɔlɩŋ nɩɩyɩ taa nɛ pɩkɩlɩ, ɛlɛ piiseɣti-ŋ se ŋla lɛɣzɩtʋ ndʋ pɩpɔzʋʋ yɔ. Ye ŋwɛ wɛtʋ ndʋ tɩ-taa yɔ, tɩmnɩ Yehowa nɛ ña-laŋɩyɛ pilim. Heyi-i toovenim. Heyi Yehowa ɛzɩma pɩlakɩ-ŋ yɔ nɛ ŋpɔzɩ-ɩ se ɛsɩnɩ-ŋ nɛ ‘ŋsɔɔlɩ nɛ ŋtɛ ŋwɛɛnɩ ɖoŋ nɛ ŋla mbʋ payɩ ɛsɔɔlaa yɔ.’—Fil. 2:13.

12. Piya evelisi nzɩ pamɩyɩsɩ-sɩ lɩm yɔ, ɛzɩma sɩpɩzɩɣ nɛ sɩsɩnɩ ɛgbɛyɛ?

¹² Ye ŋkɛ koobu pɩɣa evelaɣ ŋga pamɩyɩsɩ-kɛ lɩm yɔ, pɔzɩ Yehowa se ɛsɩnɩ-ŋ nɛ ŋsɔɔlɩ se ŋla sakɩyɛ nɛ pɩkɩlɩ nɛ ŋsɩnɩ ñɛ-ɛgbɛyɛ taa koobiya. Ajɛɛ naayɛ taa lɛ, ɛgbɛyɛ taa ɛzʋtʋyaa ɖɔwa nɛ pɩkɩlɩ ɛgbɛyɛ taa tʋmlaɖaa, nɛ ɛgbɛyɛ taa tʋmlaɖaa mba pa-taa sakɩyɛ tɩtasɩ kɛʋ evebiya. Ɛgbɛyɛ wɛɛ nɛ ɖihukuu; nɛ pʋyɔɔ lɛ, pɩpɔzʋʋ-ɖʋ piya evelisi se sɩsɩnɩ-ɖʋ nɛ ɖɩcɔnɩ Yehowa samaɣ yɔɔ. Ye ŋsɔɔlɩ faaa se ŋɖʋ nesi ɖenɖe pɔpɔzʋʋ-ŋ se ŋɖʋ nesi yɔ, ŋkaɣ hiɣu taa leleŋ. Ɛbɛ yɔɔ? Mbʋ pʋyɔɔ yɔ, ñɔ-tɔm kaɣ kɛdɩnʋʋ Yehowa, ŋkaɣ wɛnʋʋ hɩɖɛ kɩbanɖɛ, nɛ ŋkaɣ hiɣu taa leleŋ weyi ɛlɩɣnɩ lalaa sɩnʋʋ taa yɔ.

13-14. Ɛbɛ ɖeyi ɖeyi ɖɩpɩzɩɣ ɖɩla nɛ ɖɩsɩnɩ ɖo-koobiya? (Cɔnɩ takayaɣ huyuu yɔɔ kɩlɛmʋʋ.)

¹³ Tɩlɩ cɔnʋʋ nɛ ŋɖiɣzini alɩwaatʋ ndʋ pɩpɔzʋʋ se ŋsɩnɩ lalaa yɔ. Apostoloo Pɔɔlɩ tasɩ lɔŋ Ebree Krɩstʋ ñɩma mba paawɛ Yuudee yɔ se: “Ɩtaasɔɔ se ɩla kɩbandʋ nɛ mɩ nɛ lalaa ɩtayɩ mbʋ ɩwɛna yɔ, mbʋ pʋyɔɔ yɔ kɩlaŋ ɛnɩ ɩkɛdɩɣnɩnɩ Ɛsɔ siŋŋ.” (Ebr. 13:16) Pɩɩkɛ lɔŋ tasʋʋ kɩbam kpem! Krɩstʋ ñɩma mba paawɛ Yuudee yɔ, pamʋ takayaɣ ŋga nɛ pitileɖi lɛ, pɩpɔzɩ se peyele pa-ɖɩsɩ, pa-tadɩyɛ, nɛ pɔ-hɔŋ taa ñɩma mba patɩkɛ Krɩstʋ ñɩma yɔ nɛ “papaɣzɩ seu nɛ pakpa pʋŋ taa.” (Mat. 24:16) Alɩwaatʋ ndʋ tɩ-taa, pɩtʋʋ fɛyɩ se pɩɩcɛyɩ se pasɩnɩ ɖama kpɛdɛyɛ. Pʋcɔ nɛ pɩtalɩɣ mbʋ lɛ, ye paawɛɛ nɛ pɔɖɔŋ lɔŋ weyi Pɔɔlɩ kaatasɩ-wɛ se pa nɛ lalaa patayɩɣ mbʋ pɛwɛna yɔ ɩ-yɔɔ yɔ, pɩɩwɛ-wɛ kɛlɛʋ se wezuu kɩfalʋʋ ŋgʋ papaɣzɩ caɣʋ yɔ kɩmalɩnɩ-wɛ.

¹⁴ Pɩtɩla yɔ, pɩtɩkɛ paa ɛzɩmtaa ɖo-koobiya heyiɣ-ɖʋ pa-kɩcɛyɩm. Ðɩkpaɣ se  koobu halɩñɩnʋ nɔɔyʋ sɩba nɛ eyele ɛ-walʋ nɛ ɛlɛ wɛɛ kʋñɔwiye taa. Ɛzɩ pɩpɔzʋʋ se pasɩnɩ koobu ɛnʋ tɔɔnaɣ labʋ, yaa pakpaɣ-ɩ nɛ powoni ɖoli, yaa pasɩnɩ-ɩ ɖɩɣa taa tʋma labʋ na? Pɩtɩla ɛɛyɔɔdʋʋ se ɖɩsɩnɩ-ɩ mbʋ pʋyɔɔ yɔ ɛtɩsɔɔlɩ se ɛcɛyɩ-ɖʋ. Ɛlɛ, ɛ-taa lakɩ leleŋ ye ɖɩkpaɣ lɩmaɣza nɛ ɖɩla nabʋyʋ se ɖɩsɩnɩ-ɩ yɔ. Pɩtɩpɔzɩ se ɖɩmaɣzɩ se nɔɔyʋ kaɣ-ɩ sɩnʋʋ yaa se paa ɛzɩmtaa lɛ, ɛkaɣ-ɖʋ heyuu hɔɔlʋʋ ŋgʋ kɩ-taa ɖɩsɩnɩ-ɩ yɔ. Pɔzɩ ña-tɩ se: ‘Ye maawɛnɩ wɛtʋ ndʋ tɩ-taa, ɛbɛ maasɔɔlaa se pala nɛ pasɩnɩ-m?’

15. Ye ɖɩsɔɔlaa se ɖɩsɩnɩ lalaa yɔ, ɛbɛ pɩwɛɛ se ɖɩtɛ ɖa-taa se ɖɩlakɩ?

¹⁵ Yele nɛ pɩwɛɛ lalaa kɛlɛʋ se pɔñɔtɩnɩ-ŋ nɛ pɔpɔzɩ-ŋ sɩnʋʋ. Pɩtʋʋ fɛyɩ se ŋsɩm ñɛ-ɛgbɛyɛ taa koobiya mba paa ɛzɩmtaa lɛ, pɔsɔɔlɩ faaa se pasɩnɩ lalaa yɔ. Paayeki kpa se ɖɩmaɣzɩ se ɖɩcɛyɩɣ-wɛ. Ðɩnawa se ɖɩpɩzɩɣ nɛ ɖɩtaa-wɛ liu alɩwaatʋ ndʋ pɩpɔzʋʋ se pasɩnɩ-ɖʋ yɔ, nɛ ɖɩsɔɔlaa se ɖɩmaɣzɩnɩ-wɛ. Alan kɛ ɛgbɛyɛ taa ɛzʋtʋyʋ nɛ ɛwɛnɩ pɩnzɩ 40 mbʋ yɔ. Ɛsɔɔlaa se ɛkɛ koobu weyi pɩwɛ lalaa kɛlɛʋ se pɔñɔtɩnɩ-ɩ nɛ pɔpɔzɩ-ɩ sɩnʋʋ yɔ. Alan maɣzɩ Yesu kɩɖaʋ yɔɔ lɛ, ɛyɔɔdɩ se: “Pɩɩɖɔkɩnɩ Yesu kpem; paa mbʋ yɔ, piya nɛ sɔsaa pɔñɔtaɣnɩ-ɩ nɛ sɔɔndʋ taakpaɣ-wɛ se pɔpɔzɩ-ɩ nɛ ɛsɩnɩ-wɛ. Paaɖiɣzinaa se ɛmaɣzaɣ pɔ-yɔɔ siŋŋ. Mɔnsɔɔlɩnɩ ma-laŋɩyɛ pilim se mamaɣzɩnɩ Yesu nɛ ɛyaa sɩmɩ-m se mɛnkɛ ɛyʋ weyi papɩzɩɣ nɛ pɔñɔtɩnɩ-ɩ kɛlɛʋ yɔ, weyi ɛsɔɔlɩ-wɛ nɛ ɛmaɣzɩɣ pɔ-yɔɔ yɔ.”

16. Ye ɖɩɖɔŋ tɔm ndʋ tɩwɛ Keɣa 118:59, 60 taa yɔ tɩ-yɔɔ yɔ, ɛzɩma pɩpɩzɩɣ pɩsɩnɩ-ɖʋ nɛ ɖɩmaɣzɩnɩ Yesu kɩɖaʋ ɖeyi ɖeyi?

¹⁶ Ye ɖɩɩpɩzɩɣ se ɖɩmaɣzɩnɩ Yesu nɛ pɩtalɩ pilim yɔ, pɩtɩpɔzɩ se pitibi-ɖʋ yɔɔɔ. (Yak. 3:2) Weyi eɖiɣni kpɛlɩkʋʋ anjaʋwaa lɩzʋʋ yɔ, ɛɛpɩzɩɣ nɛ ɛmaɣzɩnɩ ɛ-wɩlɩyʋ nɛ  pɩtalɩ pilim. Ɛlɛ, alɩwaatʋ ndʋ ɛkpɛlɩkɩɣ lɔŋ hɔɔlɩŋ weyi ɩ-taa picoɖuu-i yɔ nɛ ɛñakɩ pana se ɛmaɣzɩnɩ ɛ-wɩlɩyʋ ɖeyi ɖeyi yɔ, ɛkaɣ wobu pɩ-yɔɔ nɛ ɛwɛɛ niye nɛ pɩkɩlɩ. Mbʋ ɖɔɖɔ, ye ɖɩɖɔŋ lɔŋ weyi ɖɩkpɛlɩkɩɣ ɖa-tɩ yɔɔ Bibl kpɛlɩkʋʋ alɩwaatʋ taa yɔ ɩ-yɔɔ, nɛ ɖɩlakɩ ɖo-ɖoŋ ɖeɖe se ɖɩñɔɔzɩ hɔɔlɩŋ weyi ɩ-taa ɖɩwɛnɩ ɛjandʋ yɔ, ɖɩpɩzɩɣ nɛ ɖɩmaɣzɩnɩ kɩɖaʋ ŋgʋ Yesu ha-ɖʋ yɔ.—Kalɩ Keɣa 118:59, 60.

17-18. Ye ɖɩmaɣzɩɣnɩ Yesu tɩ laʋ lɩmaɣza yɔ, ɛbɛ kaɣ lɩʋ pɩ-taa?

¹⁷ Ye ɖɩwɛnɩ tɩ laʋ lɩmaɣza yɔ, pɩpɩzɩɣ nɛ piseɣti lalaa nɛ pala mbʋ ɖɔɖɔ. Payaɣ ɛgbɛyɛ taa ɛzʋtʋyʋ nɔɔyʋ se Tim. Ɛyɔɔdaa se: “Ðɛ-ɛgbɛyɛ taa piya evelisi nzɩ pamɩyɩsɩ-sɩ lɩm yɔ, sɩ-taa nasɩyɩ wobini ɛsɩndaa nɛ paha-sɩ waɖɛ nɛ sɩkɛ ɛgbɛyɛ taa tʋmlaɖaa. Mbʋ pɩsɩnɩ-sɩ yɔ pɩ-taa nabʋyʋ lɛ se sɩna ɛzɩma lalaa sɔɔlɩ faaa se pasɩnɩ po-koobiya yɔ nɛ sɩmaɣzɩnɩ-wɛ. Piya evelisi nzɩ, sɩsɩɣnɩ ɖɛ-ɛgbɛyɛ nɛ sɩɖʋʋ nesi ɛzʋtʋyaa siŋŋ.”

¹⁸ Ðɩwɛ ɛjaɖɛ nɖɩ ɖɩ-taa ɛyaa sakɩyɛ wɛnɩ piɖeni men-ɖeke wɛtʋ yɔ. Ɛlɛ Yehowa samaɣ ñɛwɛ ndɩ. Yesu tɩ laʋ lɩmaɣza tukuuni-ɖʋ, nɛ ɖɩtɛm ɖa-taa se ɖɩmaɣzɩɣnɩ ɛ-kɩɖaʋ. Toovenim taa lɛ, ɖɩɩpɩzɩɣ nɛ ɖɩtɩŋ Yesu nɩŋgbanzɩ taa nɛ pɩtalɩ pilim, ɛlɛ ɖɩpɩzɩɣ nɛ ‘ɖɩtɩŋ ɛ-nɩŋgbanzɩ taa ɖeyi ɖeyi.’ (1 Pɩy. 2:21) Ye ɖɩlakɩ ɖo-ɖoŋ ɖeɖe nɛ ɖɩmaɣzɩɣnɩ Yesu tɩ laʋ lɩmaɣza yɔ, ɖa-taa kaɣ labʋ leleŋ mbʋ pʋyɔɔ yɔ, ɖɔ-tɔm kɛdɩɣnɩ Yehowa.