DISOLO YA KULONGUKA 9
Landa Mbandu ya Yezu ya Kusadisa Bantu ya Nkaka
“Kiese ke vandaka mingi na kupesa, kansi na kubaka kiese ke vandaka fioti.”—BIS. 20:35.
NKUNGA 17 ‘Me Zola’
MAMBU YINA DISOLO YAI KE TUBILA *
1. Inki kikalulu ya mbote bansadi ya Yehowa ke vandaka ti yo?
BAMVULA mingi me luta, Biblia tubaka nde bansadi ya Nzambi ta “kudipesa na luzolo na bo mosi” na kisalu ya Yehowa na nsi ya lutwadisu ya Mwana na yandi. (Nk. 110:3) Mambu yango ke na kulungana kibeni bubu yai. Konso mvula, bansadi ya kikesa ya Yehowa ke sala bamilio ya bangunga na kisalu ya kusamuna. Bo ke salaka yo na luzolo na bo mosi mpi bo ke futaka bo ve. Bo ke pesaka mpi bampangi na bo bima yina bo kele ti yo mfunu, bo ke pesaka bo kikesa mpi bo ke sadisaka bo na kimpeve. Bankuluntu mpi bansadi ya kisalu ke salaka bangunga mingi na kuyidika balukutakanu mpi bo ke kwendaka kutala bampangi na bo sambu na kupesa bo kikesa. Bo ke salaka mambu yina yonso sambu bo ke zolaka Yehowa mpi bantu.—Mat. 22:37-39.
2. Mutindu Baroma 15:1-3 ke monisa yo, nki mbandu Yezu me pesaka beto?
2 Yezu pesaka beto mbandu ya kuluta mbote na yina me tala kutula mambote ya bantu ya nkaka na kisika ya ntete. Beto ke salaka yonso sambu na kulanda mbandu na yandi. (Tanga Baroma 15:1-3.) Bantu yina ke landaka mbandu na yandi ta baka mambote. Yezu tubaka nde: “Kiese ke vandaka mingi na kupesa, kansi na kubaka kiese ke vandaka fioti.”—Bis. 20:35.
3. Inki beto ta tubila na disolo yai?
3 Na disolo yai, beto ta tubila mambu yina Yezu salaka sambu na kusadisa bantu ya nkaka mpi beto ta mona mutindu beto lenda landa mbandu na yandi. Beto ta tubila mpi mambu yina beto lenda sala sambu na kukuma ti mpusa ya ngolo ya kusadisa bantu ya nkaka.
LANDA MBANDU YA YEZU
Ata Yezu vandaka ya kulemba, nki yandi salaka ntangu kimvuka ya bantu kwisaka na yandi? (Tala paragrafe 4)
4. Inki mutindu Yezu tulaka mambote ya bantu ya nkaka na kisika ya ntete?
4 Yezu vandaka kusadisa bantu ata ntangu yandi vandaka ya kulemba. Yindula mambu yina Yezu salaka ntangu bantu mingi kwisaka kukutana ti yandi na lweka ya ngumba, mbala ya nkaka pene-pene ya Kapernaumi. Yezu sambaka mpimpa ya mvimba. Yandi vandaka kibeni ya kulemba kansi ntangu yandi monaka bantu yina yonso, yandi wilaka bansukami mpi bambefo yina vandaka na kati ya bantu yina mawa. Yandi sukaka ve kaka na kubelula bo kansi yandi salaka mpi diskure mosi yina pesaka bo kibeni kikesa. Bo ke bingaka diskure yango nde Disolo na Zulu ya Ngumba.—Luka 6:12-20.
Inki mutindu beto lenda landa mbandu ya Yezu ya kutula mambote ya bantu ya nkaka na kisika ya ntete? (Tala paragrafe 5)
5. Inki mutindu bamfumu ya mabuta ke landaka mbandu ya Yezu ya kutula mambote ya bantu ya nkaka na kisika ya ntete ata ntangu bo me lemba?
5 Mutindu bamfumu ya mabuta ke landaka mbandu ya Yezu. Beto tadila mbandu yai: Mfumu mosi ya dibuta me sala mingi kilumbu ya mvimba mpi yandi me vutuka na nzo ya kulemba kibeni. Mbala ya nkaka yandi ke zola nde bo sala ve Lusambu ya Dibuta na nkokila yina kansi yandi me lomba Yehowa nde yandi pesa yandi ngolo ya kutwadisa Lusambu ya Dibuta. Yehowa me pesa mvutu na kisambu na yandi mpi bo me sala Lusambu ya Dibuta mutindu bo ke salaka yo konso mposo. Bana me baka dilongi ya mfunu na bibuti na bo na nkokila yina. Disongidila, bo me bakisa nde mambu ya kimpeve, fwete baka kisika ya ntete.
6. Pesa mbandu ya ke monisa nde Yezu sadilaka ntangu na yandi sambu na kusadisa bantu ya nkaka?
6 Yezu vandaka kusadila ntangu na yandi sambu na kusadisa bantu. Keti nge lenda yindula mutindu Yezu waka ntangu bo songaka yandi nde bo me zenga ntu ya nduku na yandi Yoane Mbotiki? Yandi vandaka na mawa kibeni. Biblia ke tuba nde: “Ntangu Yezu waka [lufwa ya Yoane], yandi katukaka pana na maswa mpi kwendaka na kisika mosi ya kingenga sambu na kuvanda yandi mosi.” (Mat. 14:10-13) Beto ke bakisa sambu na nki yandi zolaka kuvanda yandi mosi. Bantu ya nkaka ke zolaka kudila na kingenga. Kansi Yezu kukaka ve kuvanda yandi mosi. Bantu mingi kumaka na kisika yina ya kingenga na ntwala nde Yezu kukuma pana. Inki Yezu salaka? Yandi yindulaka bampusa ya bantu yina mpi yandi “wilaka bo mawa.” Yezu bakisaka nde bo vandaka ti mfunu ya lusadisu mpi kikesa. Yo yina yandi sadisaka bo kukonda kusukinina. Yandi “yantikaka kulonga bo [mambu fioti ve kansi] mambu mingi.”—Mar. 6:31-34; Luka 9:10, 11.
7-8. Pesa mbandu ya ke monisa nde bankuluntu ya zola ke landaka mbandu ya Yezu kana mpangi mosi kele ti mfunu ya lusadisu na dibundu.
7 Mutindu bankuluntu ya zola ke landaka mbandu ya Yezu. Beto ke pesa bankuluntu mersi mingi sambu na kisalu yina bo ke salaka sambu na kusadisa beto sambu bo ke tulaka mambote ya bantu ya nkaka na kisika ya ntete. Bampangi mingi na dibundu ke monaka ve bisalu yonso yina bankuluntu ke salaka. Mu mbandu, bankuluntu yina ke salaka na Komite ya Kuwakana ti Balupitalu ke sadisaka bampangi kukonda kusukinina na mambu ya maladi. Mbala mingi, bo ke sadisaka bo na kati-kati ya mpimpa. Bankuluntu yina ya zola mpi mabuta na bo ke wilaka bampangi yina ke kutana ti mpasi mawa mpi bo ke tulaka mambote ya bampangi yango na kisika ya ntete.
8 Bankuluntu ke sadisaka mpi bampangi na kisalu ya kutunga Banzo ya Kimfumu, banzo ya nkaka ya lusambu mpi bo ke sadisaka bantu yina me bwila mpasi ya kisumbula. Bo ke lutisaka mpi ntangu mingi na kulonga beto na dibundu, na kupesa beto kikesa mpi na kusadisa beto. Yo me fwana kibeni nde beto sikisa bampangi yina yonso mpi mabuta na bo. Beto ke lomba Yehowa na kusakumuna bo mutindu bo ke tulaka mambote ya bantu ya nkaka na kisika ya ntete. Ya kieleka, bankuluntu fwete vanda bukati-kati bonso bantu yonso. Bankuluntu fwete lutisa ve ntangu yonso kaka na kusala mambu ya dibundu kansi bo fwete bumba mpi ntangu ya kulungisa bampusa ya mabuta na bo.
MUTINDU YA KUTULA MAMBOTE YA BANTU YA NKAKA NA KISIKA YA NTETE
9. Bafilipi 2:4, 5 ke monisa nde Bakristu yonso fwete yedisa nki kikalulu?
9 Tanga Bafilipi 2:4, 5. Bankuluntu mpamba ve bantu fwete landa mbandu ya Yezu ya kutula mambote ya bantu ya nkaka na kisika ya ntete. Beto yonso fwete sala yo. Biblia ke tuba nde Yezu “kumaka bonso mpika.” (Bafil. 2:7) Yindula malongi yina beto lenda baka na mambu yina Biblia ke tuba. Mpika ya mbote to nsadi ya mbote ke sosaka mabaku ya kusepedisa mfumu na yandi. Beto ke zola kusadila diaka Yehowa mingi mpi kusadisa mingi bampangi na beto sambu beto kele bampika ya Yehowa. Mambu yai ya ke landa ta sadisa beto na kusala yo.
10. Inki bangiufula beto lenda kudiyula?
10 Kuditadila mbote-mbote. Nge lenda kudiyula nde: ‘Keti mono ke ndimaka kusadila na luzolo yonso ntangu mpi ngolo na mono sambu na kusadisa bantu ya nkaka? Mu mbandu, nki mono ta sala kana bo lomba mono na kukwenda kutala mpangi mosi ya mununu na nzo na yandi to na kunata mpangi-nkento mosi ya mununu na balukutakanu? Kana bo kele ti mfunu ya muntu sambu na kutula bunkete na nzo ya balukutakanu ya nene to sambu na kuyidika Nzo ya Kimfumu, keti mono ke ndimaka kusala yo na luzolo yonso?’ Yehowa ke sepelaka ntangu beto ke sadilaka na luzolo yonso ntangu mpi bima na beto sambu na kusadisa bantu ya nkaka. Sambu ntangu beto kudipesaka na yandi, beto songaka yandi nde beto ta sadila bima na beto yonso sambu na kusadila yandi. Kana yo ke lomba nde beto yidika kisika mosi, nki beto fwete sala?
11. Inki mutindu kisambu lenda sadisa beto kana yo ke lomba nde beto soba kisika mosi?
11 Samba Yehowa na masonga yonso. Yindula nde nge me bakisa kibeni nde nge fwete soba kisika mosi kansi nge ke kuka ve kusala yo. Kana yo kele mpidina, samba Yehowa na ntima ya mvimba mpi na masonga yonso. Songa yandi mutindu nge ke kudiwa mpi lomba yandi na kupesa nge “nzala ti ngolo ya kusala mambu.”—Bafil. 2:13.
12. Inki batoko ya babakala yina me bakaka mbotika lenda sala sambu na kusadisa dibundu?
12 Kana nge kele toko ya bakala mpi nge me bakaka mbotika, lomba Yehowa na kusadisa nge na kukuma ti nzala ya ngolo ya kusadisa dibundu. Na bansi ya nkaka, bankuluntu kele mingi kuluta bansadi ya kisalu mpi mingi na kati ya bansadi ya kisalu yango kele bambuta mpi minunu. Organizasio ya Yehowa ke landa kukuma nene yo yina beto kele ti mfunu ya bampangi-babakala mingi ya batoko sambu na kusadisa bankuluntu na kukeba mameme ya Yehowa. Kana nge ke ndima kusala na luzolo yonso konso kisalu yina bo ke pesa nge na dibundu, nge ta vanda na kiese. Sambu na nki? Sambu nge ta sepedisa Yehowa, bampangi ta tuba mambu ya mbote sambu na nge mpi nge ta wa kiese yina bantu ke waka kana bo ke sadisa bantu ya nkaka.
Bakristu ya Yudea ke sabuka Nzadi Yordani sambu na kukwenda na Pela. Bayina kumaka na ntwala na mbanza yango ke kabudila bampangi na bo Bakristu yina me katuka kukuma bima ya kudia (Tala paragrafe 13)
13-14. Inki mambu beto lenda sala sambu na kusadisa bampangi? (Tala kifwanisu ya lutiti ya zulu.)
13 Tula dikebi na bampusa ya bantu ya nkaka. Ntumwa Polo songaka Bakristu yina vandaka kuzinga na Yudea nde: “Beno vila ve na kusala mambu ya mbote mpi na kukabula ti bankaka bima yina beno kele na yo, sambu Nzambi ke waka kiese na bimenga ya mutindu yina.” (Baeb. 13:16) Yo vandaka ndongisila ya mbote kibeni. Mwa bilumbu na nima ya kuwa mambu yina, yo lombaka nde Bakristu yina kubikisa banzo na bo, bisalu na bo, bantu ya mabuta na bo yina vandaka ve kusambila Yehowa mpi bo ‘yantika kutina na bangumba.’ (Mat. 24:16) Ntembe kele ve nde na ntangu yina, yo vandaka kibeni mfunu nde bo sadisana. Na ntwala nde mambu yina kusalama, kana bo vandaka kusadila dezia ndongisila ya Polo ya kuvanda ti kikalulu ya kukaba, yo zolaka kuvanda pete sambu bo yikama ti luzingu na bo ya mpa.
14 Bampangi ta songa beto ve ntangu yonso kima yina bo kele ti yo mfunu. Mu mbandu, kana nkento ya mpangi-bakala mosi me fwa, keti mpangi yina kele ti mfunu nde beto sadisa yandi na madia, na transpore to na bisalu ya nzo? Yandi lenda songa beto ve kima yina yandi kele ti yo mfunu sambu yandi ke zola ve kuyangisa beto. Kansi yandi ta sepela mingi kana beto sadisa yandi na ntwala nkutu nde yandi lomba beto lusadisu. Beto fwete yindula ve nde muntu ya nkaka ta sadisa yandi to nde yandi ta songaka beto ntangu yonso kima yina yandi kele ti yo mfunu. Kudiyula nde: ‘Kana mono muntu kutanaka ti diambu yina, mono zolaka kuvanda ti mfunu ya nki?’
15. Inki beto fwete sala sambu na kusadisa bantu ya nkaka?
15 Vanda muntu yina bo ke solulaka ti yandi kukonda mpasi. Ntembe kele ve nde nge ke zaba bampangi ya dibundu na beno yina ke sadisaka ntangu yonso bantu ya nkaka kukonda mpasi. Bo ta yindula ve ata fioti nde beto ke yangisa bo kana beto lomba bo lusadisu. Beto ke zaba nde bo ta ndima kusadisa beto ntangu yonso mpi beto ke zola kuvanda bonso bo. Mpangi Alan kele nkuluntu mpi yandi kele ti bamvula 45, yandi ke zolaka nde bantu kusolula ti yandi kukonda mpasi. Yandi ke tuba mambu yai sambu na Yezu: “Yezu vandaka ti mambu mingi ya kusala kansi bantu ya bamvula yonso vandaka kukwenda pene-pene na yandi mpi bo vandaka ve kuwa boma ya kulomba yandi lusadisu. Bo bakisaka nde yandi vandaka kutudila bo kibeni dikebi. Mono ke zola kuvanda bonso Yezu mpi mono ke zola nde bantu kuzaba nde bo lenda solula ti mono kukonda mpasi, nde mono ke zolaka bo mpi nde mono ke tudilaka bo dikebi.”
16. Kana beto ke sala mambu yina Nkunga 119:59, 60 ke tuba, nki mutindu yo ta sadisa beto na kulanda mbote-mbote mbandu ya Yezu?
16 Beto fwete lemba ve nitu kana beto ke kuka ve kulanda mbandu ya Yezu na mutindu ya kukuka. (Yak. 3:2) Mwana ya nzo-nkanda ke lutaka ve longi na yandi. Kansi kana yandi ke baka malongi na bifu yina yandi ke sala mpi yandi ke sala bikesa ya kulanda mbote-mbote mbandu ya longi na yandi, yandi ta kuma bonso longi na yandi. Mutindu mosi, kana beto ke sadila mambu yina beto ke longuka na Biblia mpi kana beto ke sala yonso sambu na kusoba bikalulu ya mbi, beto ta landa mbote-mbote mbandu ya Yezu.—Tanga Nkunga 119:59, 60.
MAMBOTE YINA BETO TA BAKA KANA BETO KE SADISA BANTU YA NKAKA
Ntangu bankuluntu ke landaka mbandu ya Yezu ya kutula mambote ya bantu ya nkaka na kisika ya ntete, bo ke pesaka batoko mbandu ya mbote (Tala paragrafe 17) *
17-18. Inki mambote beto ta baka kana beto landa mbandu ya Yezu?
17 Kana beto ke tula mambote ya bantu ya nkaka na kisika ya ntete, bo mpi ta sala mutindu mosi. Mpangi Tim kele nkuluntu mpi yandi ke tuba nde: “Na dibundu na beto, beto kele ti bampangi ya babakala ya batoko yina yelaka mbote na kimpeve mpi bo me kumaka bansadi ya kisalu. Bankaka vandaka batoko kibeni ntangu bo kumaka bansadi ya kisalu. Kima ya nkaka yina salaka nde bo kuma bansadi ya kisalu, kele yai: bo monaka mutindu bampangi vandaka kundima kusadisa bantu ya nkaka na luzolo yonso mpi bo vandaka kuzola kusala mutindu mosi. Bampangi yina ya batoko ke sadisaka dibundu na beto mpi bo ke sadisaka bankuluntu mingi kibeni.”
18 Bubu yai, beto ke zinga na nsi-ntoto yina bantu mingi kele bwimi kansi bansadi ya Yehowa kele ve bonso bantu yina. Beto me sepela mingi ti kikalulu ya Yezu ya kutula mambote ya bantu ya nkaka na kisika ya ntete. Yo yina beto ke zola kulanda mbandu na yandi. Ya kieleka, beto ta kuka ve kulanda mbandu na yandi na mutindu ya kukuka kansi beto lenda “landa bitambi na yandi mbote-mbote.” (1 Pie. 2:21) Kana beto ke sala bikesa ya kulanda mbandu ya Yezu ya kutula mambote ya bantu ya nkaka na kisika ya ntete, beto ta vanda mpi na kiese sambu beto ta sepedisa Yehowa.
NKUNGA 13 Kristu Kele Mbandu na Beto
^ par. 5 Yezu vandaka kutula ntangu yonso mambote ya bantu ya nkaka na kisika ya ntete. Na disolo yai, beto ta tubila mambu yina beto lenda sala sambu na kulanda mbandu na yandi. Beto ta tubila mpi nki mutindu kulanda mbandu ya Yezu ya kutula mambote ya bantu ya nkaka na kisika ya ntete ta natila beto mambote ya kukonda nsuka.
^ par. 57 NTENDULA YA BIFWANISU: Mpangi Dan ya kele toko ke tala bankuluntu zole yina me kwisa kutala papa na yandi na opitale. Mbandu ya bankuluntu yina zole me simba kibeni ntima na yandi. Yo me pusa yandi mpi na kusadisa bampangi ya nkaka na dibundu. Mpangi ya nkaka ya toko Ben ke tala mutindu Dan ke sadisa mpangi ya nkaka. Mbandu ya mpangi Dan me sadisa mpi mpangi Ben na kutula bunkete na Nzo ya Kimfumu.
