1. Omaukwatya mawa elipi tu wete mokati koshiwana shaJehova?

OMBIIBELI oya xunganeka omido da pita ya ti kutya oshiwana shaKalunga otashi ke “lilongekidila nehalo liwa” oilonga yaJehova, oyo i li mepashukilo lOmona waye. (Eps. 110:3) Exunganeko olo otali wanifwa filufilu kunena. Omudo keshe, ovapiya vaJehova ovaladi ohava longo eevili omamiliyona omafele moilonga yokuudifa. Ohave shi ningi nehalo liwa nohava longifa oiniwe yavo. Ohava kongo yo efimbo, opo va yambidide ovaitaveli vakwao palutu, pamaliudo nopamhepo. Ovamwatate, ovo va nangekwa po, ohava longifa eevili dihapu, opo ve lilongekidile oitukulwa yokwoongala nokuninga omatalelepo oufita. Oshike hashi ve linyengifa va longe oilonga aishe oyo? Ohava ningi ngaho, molwaashi ove hole Jehova novanhu vakwao. — Mat. 22:37-39.

2. Jesus okwa tula po oshihopaenenwa shilipi, ngeenge hatu tale mOvaroma 15:1-3?

² Jesus okwa tula po oshihopaenenwa sha denga mbada shi na sha nokupitifa komesho ouwa wavamwe. Ohatu ningi eenghendabala ngaashi hatu dulu, opo tu shikule eenghatu daye. (Lesha Ovaroma 15:1-3.) Ovo have mu hopaenene ohava mono ouwa. Jesus okwa ti: “Okuyandja ohaku eta ehafo shi dulife okupewa.” — Oil. 20:35.

3. Oshike hatu ka kundafana moshitukulwa eshi?

³ Moshitukulwa eshi, ohatu ka kundafana omaliyambo amwe oo Jesus a li a ninga, opo a kwafele vamwe. Ohatu ka tala nghee hatu dulu okushikula oshihopaenenwa shaye. Ohatu ka kundafana  yo osho tashi dulu oku tu kwafela tu kale twa halelela okukwafela vamwe.

4. Jesus okwa ulika ngahelipi kutya okwa pitifa komesho eemhumbwe davamwe?

⁴Jesus okwa li ha kwafele vamwe, nonande okwa li ha kala a loloka. Diladila nghee Jesus a li e linyenga eshi a li a mona eemhunga dovanhu de ke mu shakeneka kombinga ikwao yomhunda, tashi dulika popepi naKapernaum. Molwaashi Jesus okwa hangwa opo a ilikana oufiku aushe, oku na okukala a li a loloka neenghono. Ashike eshi a mona eengudu dovanhu, okwa li a udila olukeno eehepele novanaudu, ovo va li mokati kavo. Ka li ashike a velula ovo va li tava vele, ndele okwa li yo e va pa oshipopiwa tashi tu omukumo neenghono shomEudifo lokOmhunda. — Luk. 6:12-20.

5. Ongahelipi omitwe domaukwaneumbo tadi dulu okuhopaenena omhepo yeliyambo yaJesus, ngeenge da loloka?

⁵Nghee omitwe domaukwaneumbo tadi dulu okuhopaenena Jesus. Diladila koshihopaenenwa eshi: Natu tye nee omutwe woukwaneumbo owa dimbuka koilonga pexulilo lefiku wa loloka. Nonande owa li wa hala okukaleka Elongelokalunga lOukwaneumbo, olo la li li na okuningwa onguloshi oyo, owa ilikana kuJehova, opo e u pe eenghono u dule okukwatela komesho. Jehova okwa nyamukula eilikano laye, nova ninga elongelokalunga ngaashi hava ningi shito. Ounona ove lihonga oshilihongomwa sha fimana onguloshi oyo, osho kutya okulongela Kalunga osho oshinima sha fimanenena kovadali vavo.

6. Yandja oshihopaenenwa shanghee Jesus a li ha yambe po efimbo laye, opo a kwafele vamwe.

⁶Jesus okwa li ha yambe po efimbo laye, opo a kwafele vamwe. Diladila kunghee Jesus a li e udite, eshi a li a uda kutya kaume kaye, Johannes Omuninginifi, okwa tetwa omutwe! Jesus oku na okukala a li a nyika oluhodi neenghono. Ombiibeli oya ti: “Eshi Jesus e shi uda [efyo laJohannes], okwa londa mowato nokwa ya konhele ye likalela opo a ka kale oye aeke.” (Mat. 14:10-13) Otu shi shii kutya omolwashike Jesus a li a hala okulikalela. Vahapu vomufye otu hole okulikalela, ngeenge twa nyika oluhodi. Ashike Jesus ka li ta dulu okuninga ngaho. Ofimbo ina fika konhele ye likalela oko a li ta i, okwa hanga ongudu inene yovanhu ya fika ko  nale. Mbela Jesus okwa li e linyenga ngahelipi? Okwa li a diladila kombinga yeemhumbwe davo nokwa li “e va uditile olukeno.” Okwa li a didilika kutya ova pumbwa ekwafo nehekeleko laKalunga. Onghee hano, okwa li a hovela diva oku va kwafela. ‘Okwa li a hovela oku va honga oinima ihapu.’ — Mark. 6:31-34; Luk. 9:10, 11.

7-8. Yandja oshihopaenenwa osho tashi ulike nghee ovakulunhuongalo hava hopaenene Jesus, ngeenge umwe a pumbwa ekwafo.

⁷Nghee ovakulunhuongalo ovanahole hava hopaenene Jesus. Ohatu pandula neenghono oilonga yovakulunhuongalo oyo hava longo opo ve tu kwafele. Ovamwatate novamwameme vahapu meongalo ihava kala ve shii oilonga aishe oyo hava longo. Pashihopaenenwa, ngeenge pa holoka onghalo yopaulumomhumbwe yopaunamiti, Okomitiye yOkukwatafana nOipangelo ohai katuka diva onghatu, opo i kwafele ovaitaveli vakwao. Luhapu eenghalo da tya ngaho, ohadi holoka po mokati koufiku. Ashike omolwolukeno, ovakulunhuongalo ovo ovanahole nomaukwaneumbo avo ohava pitifa komesho ouwa wovaitaveli vakwao, nohave va kwafele pomafimbo oo madjuu.

⁸ Ovakulunhuongalo ohava kufa yo ombinga moilonga yokutunga Omalupale Ouhamba, momatungo amwe ehangano nosho yo moilonga yokuyandja oikwafa. Ohava longifa efimbo lihapu, ngeenge tava hongo momaongalo, tave tu tu omukumo noku tu yambidida. Ohatu pandula neenghono ovamwatate aveshe ovo nosho yo omaukwaneumbo avo. Jehova na kale pamwe navo, eshi tava ulike omhepo yeliyambo. Oshoshili kutya ovakulunhuongalo ova pumbwa okukala nondjele, ngaashi ashike ovanhu aveshe. Kave na okukala hava longifa efimbo lihapu unene momalipyakidilo eongalo, ndele tava dimbwa okufila oshisho omaukwaneumbo avo.

9. Metwokumwe nOvafilippi 2:4, 5, Ovakriste aveshe ove na okukala hava diladila ngahelipi?

⁹ Lesha Ovafilippi 2:4, 5. Atusheni ohatu dulu okuhopaenena omhepo yaJesus yeliyambo, ndele havakulunhuongalo ashike. Ombiibeli oya ti kutya okwa li “e li ngaashi omupika.” (Fil. 2:7) Diladila kwaasho hatu lihongo movelishe oyo. Omupika, ile omupiya, oo a fimanekwa, oha kongo eemhito, opo a hafife omwene waye. Molwaashi otu li ovapiya vaJehova nohatu kwafele ovamwatate, osha yela kutya otwa halelela okulongifwa pauyadi kuJehova nokukwafela ovaitaveli vakwetu. Omaetepo taa shikula otae tu kwafele tu mone nghee hatu dulu okuninga ngaho.

10. Ohatu dulu okulipula omapulo elipi?

¹⁰Konakona omaukwatya oye. Lipula omapulo taa shikula: ‘Mbela ohandi kala ngoo nda halelela okuninga omaliyambo, opo ndi kwafele vamwe? Pashihopaenenwa, ohandi ke linyenga ngahelipi, ngeenge onda pulwa ndi ka talele po omumwatate omunamido, oo iha dulu okudja mo meumbo? Ile ongahelipi ngeenge onda pulwa ndi twale omumwameme omunamido kokwoongala? Mbela ohandi endelele ngoo ndi kwafele, ngeenge otapa pulwa ovaliyambi va ka wapaleke konhele yoshoongalele, ile va ka kwafele mokukaleka Olupale lOuhamba monghalo iwa?’ Ngeenge otwa kala hatu longifa efimbo letu nosho yo oiniwe yetu, opo tu kwafele vakwetu, ohatu ka hafifa Jehova. Ohatu ka ninga po shike, ngeenge otwa didilike opo twa pumbwa okuxwepopala?

11. Ongahelipi eilikano tali dulu oku ku kwafela u kulike omhepo yeliyambo?

¹¹Ilikana kuJehova wa mana mo. Natu tye nee ngeno owa didilika kutya owa pumbwa okuxwepopala moshinima shonhumba. Ashike ou wete uhe na eenghono dokuninga omalunduluko oo a pumbiwa. Monghalo ya tya ngaho, ilikana kuJehova wa mana mo. Kala omunashili. Lombwela Jehova nghee u udite noku mu pula e ku ‘kwafele u kale wa hala okulonga ehalo laye.’ — Fil. 2:13.

12. Ongahelipi ovamwatate ovanyasha, ovo va ninginifwa, tava dulu okukwafela momaongalo avo?

¹² Ngeenge ou li omumwatate omunyasha a ninginifwa, ilikana kuJehova e ku kwafele u kale wa halelela okukwafela meongalo. Moilongo imwe, omu na ovakulunhuongalo vahapu ve dule ovayakuliongalo. Ovayakuliongalo vahapu ovo, ove li pomido dopokati, ile ovanamido. Eshi ehangano tali ende tali tamunuka mo, otwa pumbwa ovamwatate vahapu ovanyasha, opo va file oshisho oshiwana shaJehova. Ngeenge owa halelela okukwafela keshe pamwe, otashi ke ku etela ehafo linene. Omolwashike mbela? Omolwaashi oto ka hafifa Jehova, to liningile edina liwa noto ka mona ehafo, olo hali di mokukwafela vamwe.

13-14. Opo tu kwafele ovamwatate novamwameme, otu na okukatuka eenghatu dokondadalunde dilipi? (Tala efano kombada yoshifo.)

¹³Kala ho konenene nokudidilika ovo va pumbwa ekwafo. Omuyapostoli Paulus okwa lombwela Ovaheberi a ti: “Inamu dimbwa okulonga ouwa nokutukulilafana navamwe osho mu na, osheshi omayambo a tya ngaho ohaa hafifa unene Kalunga.” (Heb. 13:16) Oo kaa li tuu omayele mawa! Diva konima eshi Ovakriste vOmujudea va yakula onhumwafo oyo, ova li ve na okufiya po omaumbo avo, eengeshefa davo nosho yo ovapambele, ovo va li ihava longele Jehova. Ova li ve na ‘okuya onhapo keemhunda.’ (Mat. 24:16) Osha yela kutya osha li sha fimanenena kuvo okukwafelafana pefimbo olo. Ngeno ova li va hangwa va tula moilonga omayele oo va li va pewa kuPaulus e na sha nokutukulilafana osho ve na, ngeno osha ka kala shipu kuvo okutambula ko onghalo oyo ipe.

 ¹⁴ Ovamwatate novamwameme otashi dulika vehe tu lombwele alushe osho va pumbwa. Pashihopaenenwa, omumwatate otashi dulika a filwa omukulukadi waye. Mbela omumwatate oo okwa pumbwa oikulya, olefa, ile oipumbiwa ikwao yomeumbo? Otashi dulika a kale a tila okukonga ekwafo kufye, ta diladila kutya ote tu piyaaneke. Ndele ote ke tu pandula neenghono, ngeenge otwa katuka eenghatu tu mu pe ekwafo olo a pumbwa. Onghee hano, inatu fika pexulifodiladilo kutya ope na umwe oo te ke mu kwafela, ile kutya ote ke tu lombwela osho a pumbwa. Lipula kutya, ‘Ngeno aame nda li monghalo ei, ngeno ohandi ka kala nda hala okukwafelwa ngahelipi?’

15. Otu na okukala twa tokola toko okuninga shike, opo tu kale tu na omhepo yeliyambo?

¹⁵Kala ho popiwa naave noupu. Nopehe na omalimbililo, ou shii ovamwatate novamwameme meongalo leni, ovo hava kwafele alushe vamwe. Ihave tu ningifa nandenande tu kale tu udite twa fa ngeno hatu va piyaaneke. Otu shii kutya ohava kala va halelela oku tu kwafela, ngeenge pa holoka oupyakadi. Nafye otwa hala okukala twe va fa. Alan, omukulunhuongalo womido 40 nasha, okwa li a hala okukala ha popiwa naye noupu kovamwaxe. Eshi a dilonga koshihopaenenwa shaJesus, okwa ti: “Nonande Jesus okwa li ha kala e lipyakidila, okwa li a panga oukaume novanhu vomapupi aeshe, nova li hava kala va manguluka oku mu pula ekwafo. Ova li ve mu tala ko e li omulumenhu oo a li shili he va file oshisho. Naame onda hala okukala nda fa Jesus, handi popiwa naame noupu, ndi munahole nondi na ko nasha novanhu.”

16. Ongahelipi Epsalme 119:59, 60 tali tu kwafele tu shikule oshihopaenenwa shaJesus filufilu?

¹⁶ Inatu teka omukumo, ngeenge otwa dopa okushikula oshihopaenenwa shaJesus monghedi ya wanenena. (Jak. 3:2) Omuhongwa  oo te lihongo okufaneka ita dulu okuhopaenena filufilu omufaneki omunekeka. Ashike ngeenge omuhongwa okwa kala te lihongo komapuko aye mwene nokukendabala okuhopaenena filufilu omufaneki omunekeka, ota ka enda ta xwepopala. Sha faafana, ngeenge otwa kala hatu ningi eenghendabala tu tule moilonga osho hatu lihongo pekonakonombiibeli letu lopaumwene, nokuninga ngaashi hatu dulu, opo tu xwepopaleke omapuko etu, ohatu ka shikula filufilu oshihopaenenwa shaJesus. — Lesha Epsalme 119:59, 60.

17-18. Ngeenge otwa hopaenene omhepo yaJesus yeliyambo, ohatu ka mona ouwa ulipi?

¹⁷ Ohatu ka nwefa mo nawa vamwe, ngeenge otwa kala tu na omhepo yeliyambo. Omukulunhuongalo wedina Tim okwa ti: “Otu na ovamwatate ovanyasha, ovo va ninga exumokomesho, nova nangekwa po ve li ovayakuliongalo, eshi va li pomido dinini lela. Ova li va ninga ngaho, molwaashi ova li va hopaenena vamwe, ovo va li ve na omhepo yeliyambo. Ovamwatate ovo ovanyasha ove li ekwafo linene meongalo. Ohava yambidida neenghono ovakulunhuongalo.”

¹⁸ Otu li mounyuni oo u na ovanhu vahapu ve lihole vo vene. Ashike oshiwana shaJehova hasho shi li ngaho. Otwa kwafelwa koshihopaenenwa shaJesus shomhepo yaye yeliyambo notwa tokola toko oku shi shikula. Oshoshili kutya itatu dulu okuhopaenena eenghatu daye monghedi ya wanenena, ashike ohatu dulu ‘okushikula filufilu eenghatu daye.’ (1 Pet. 2:21) Ngeenge otwa ningi ngaashi hatu dulu tu hopaenene omhepo yaJesus yeliyambo, nafye ohatu ka mona ehafo olo hali di mokukala twa hokiwa kuJehova.