9-زەرتتەۋ ماقالاسى
وزگەلەرگە يسا سياقتى قىزمەت ەتەيىك!
«العاننان گورى بەرگەن باقىتتى» (ەل. ٸس. 20:35).
17-ٵن «قالايمىن»
اڭداتپا *
1. بۇگىندە ەحوبانىڭ حالقى قانداي ىستەردە ايانباي تەر توگىپ ٴجۇر؟
كيەلى كىتاپتىڭ ٴبىر پايعامبارلىعىندا قۇدايدىڭ حالقى يسانىڭ جەتەلەۋىنە ەرىپ، ەحوباعا قىزمەت ەتۋگە «دايىن تۇراتىنى» ايتىلعان (ٴزاب. 110:3). بۇل پايعامبارلىقتىڭ ٴبىزدىڭ كەزىمىزدە ورىندالىپ جاتقانىندا ٴسوز جوق. مىسالى، ەحوبانىڭ حالقى ۋاعىز ىسىنە قۇلشىنا اتسالىسىپ، جىل سايىن ميلليونداعان ساعات جۇمسايدى. ولار بۇل ٸستى ەرىكتى تۇردە ٵرى تەگىن اتقارادى. سونداي-اق ولار باۋىرلاستارىنا ماتەريالدىق جاعىنان كومەكتەسەدى، ٴبىر-ٴبىرىن جىگەرلەندىرەدى، سەنىمدەرىن نىعايتادى. ال ارالارىنداعى جاۋاپتى ەر باۋىرلاستار بولسا كەزدەسۋلەردى وتكىزۋگە دايىندالۋ ٷشىن جانە باۋىرلاستارعا باقتاشىلىق ساپار جاساۋ ٷشىن قىرۋار ۋاقىت جۇمسايدى. ەحوبانىڭ حالقى نەگە وسىلاي ايانباي تەر توگەدى؟ ويتكەنى ەحوبانى جانە باسقا ادامداردى سۇيەدى (مات. 22:37—39).
2. ريمدىكتەرگە 15:1—3-تارماقتارعا ساي، يسا قانداي ۇلگى قالدىردى؟
2 يسا ٵرقاشان وزىنە ەمەس، وزگەگە جاقسى بولسىن دەگەن. ٴبىز دە ونىڭ ىزىمەن جۇرگىمىز كەلەدى (ريمدىكتەرگە 15:1—3 وقىڭىز). وسىلاي ەتسەك، جەمىسىن كورەمىز. ويتكەنى يسا: «العاننان گورى بەرگەن باقىتتى»،— دەگەن (ەل. ٸس. 20:35).
3. وسى ماقالادا نە قاراستىرامىز؟
3 وسى ماقالادا يسا وزگەلەرگە قىزمەت ەتۋ ٷشىن نەنى قۇربان ەتكەنىن، ٴبىز وعان قالاي ەلىكتەي الاتىنىمىزدى جانە وزگەلەرگە قىزمەت ەتۋگە دەگەن ىقىلاسىمىزدى قالاي ارتتىرا الاتىنىمىزدى قاراستىرامىز.
يسانى ۇلگى ەتىڭىز
يسا شارشاپ تۇرسا دا، الدىنان شىققان قالىڭ جۇرتتى كورگەندە نە ىستەدى؟ (4-ابزاستى قاراڭىز)
4. قالاي يسا وزگەنىڭ قامىن وزىنىكىنەن جوعارى قويدى؟
4 يسا شارشاپ تۇرسا دا، وزگەنىڭ قامىن ويلاعان. بىردە قاپارناۋم جاقتا بولسا كەرەك، قالىڭ جۇرت يسانى كورۋگە كەلەدى. يسا بولسا سول ٴتۇنى ۇيىقتاماي، دۇعا ەتىپ شىققان ەدى. ول شارشاپ تۇرسا دا، كەلگەن كەدەي-كەپشىكتەر مەن اۋرۋ ادامداردى كورگەندە، جانى اشىپ، ولارعا كومەكتەسەدى. يسا ولاردى ساۋىقتىرىپ قانا قويماي، تاريحتاعى ەڭ اسەرلى بايانداماسى — تاۋداعى ۋاعىزىن ايتادى (لۇقا 6:12—20).
يسانىڭ جانقيارلىعىن قالاي ۇلگى ەتسەك بولادى؟ (5-ابزاستى قاراڭىز)
5. وتاعالارى شارشاپ تۇرعاندا يسانىڭ جانقيارلىعىن قالاي ۇلگى ەتە الادى؟
5 وتاعالارى يسادان قانداي ۇلگى الادى؟ مىناداي ٴبىر جاعدايدى ەلەستەتەيىك: وتاعاسى كۇنى بويى اۋىر جۇمىس ىستەپ، كەشكىسىن ۇيگە سىلىكپەسى شىعىپ كەلەدى. ٴسۇيتىپ: «بۇگىن بولاتىن وتباسىلىق عيباداتتى وتكىزبەي-اق قويسام قايتەدى؟»— دەپ ويلايدى. ٴبىراق ول ەحوباعا دۇعا ايتىپ، كۇش بەرۋىن جالبارىنىپ سۇرايدى. ەحوبا ونىڭ دۇعاسىنا جاۋاپ بەرىپ، وتباسىلىق عيبادات ادەتتەگىدەي وتەدى. سول كەشتە بالالارى وتە ٴبىر ماڭىزدى جايتتى — اتا-انالارى ٷشىن رۋحاني ىستەر ٵرقاشان ٴبىرىنشى ورىندا تۇراتىنىن — تۇسىنەدى.
6. يسا ٶزىنىڭ ۋاقىتىن وزگەلەر ٷشىن قالاي قۇربان ەتتى؟ مىسال كەلتىرىڭىز.
6 يسا وزىنە ارنالعان ۋاقىتىن دا اياماعان. دوسى جاقيانىڭ باسى الىنعاندا، يسانىڭ قانداي كۇي كەشكەنىن ەلەستەتىپ كورىڭىزشى. ول قاتتى قايعىرسا كەرەك. كيەلى كىتاپتا: «بۇنى [ياعني جاقيانىڭ ولتىرىلگەنىن] ەستىگەندە، يسا وڭاشا بولۋ ٷشىن ٴبىر ەلسىز جەرگە قايىقپەن ٴجۇزىپ كەتتى»، — دەلىنگەن (مات. 14:10—13). يسانىڭ نەگە بۇلاي ەتكەنى تۇسىنىكتى-اق. ويتكەنى كوبىمىز قايعىرعاندا وڭاشا قالعىمىز كەلەدى. ٴبىراق يسادا ونداي مۇمكىندىك تە بولمادى. ويتكەنى جۇرت سول جەرگە ٴبىرىنشى جەتىپ، ونى كۇتىپ تۇردى. سوندا يسا بۇعان قالاي قارادى؟ ول سول ادامداردىڭ مۇقتاجدىعىن ويلادى. حالىقتىڭ رۋحاني جۇدەۋ كۇيدە جۇرگەنىن كورىپ، «ولاردى اياپ كەتتى». ٴسۇيتىپ، ولاردى بىرەن-ساران ەمەس، «كوپ نارسەگە ۇيرەتە باستادى» (مار. 6:31—34؛ لۇقا 9:10، 11).
7، 8. قاۋىمداعىلارعا كومەك قاجەت بولعاندا، اقساقالدار يسادان قانداي ۇلگى الادى؟ مىسال كەلتىرىڭىز.
7 جاناشىر اقساقالدار يسادان قانداي ۇلگى الادى؟ ٴبىز قاۋىم ٷشىن ايانباي تەر توگەتىن اقساقالدارىمىزدى قاتتى باعالايمىز! ولاردىڭ اتقارىپ جۇرگەن كوپ ٸسى كوزگە كورىنە بەرمەيدى. مىسالى، اۋرۋحانالارمەن بايلانىس كوميتەتىندە قىزمەت ەتەتىن اقساقالداردى الايىق. الدەبىر باۋىرلاسقا شۇعىل تۇردە مەديسينالىق كومەك قاجەت بولسا، ولار ٴبارىن تاستاپ، كومەكتەسۋگە جۇگىرەدى. بۇنداي جاعدايلار ٴجيى ٴتۇن ورتاسىندا ورىن الادى. ٴبىراق بۇل اقساقالدار دا، ولاردىڭ وتباسىلارى دا باۋىرلاستارعا جاندارى اشىعاندىقتان، ولاردىڭ مۇددەسىن وزدەرىنىكىنەن جوعارى قويادى.
8 بۇعان قوسا، اقساقالدار پاتشالىق سارايلارى مەن وزگە دە عيماراتتاردىڭ قۇرىلىسىنا قاتىسادى جانە اپاتتان زارداپ شەككەن باۋىرلاستارعا جاردەم بەرەدى. سونداي-اق ولار قاۋىمدا بىزگە ٴتالىم بەرىپ، جىگەرلەندىرۋ ٷشىن ۋاقىتتارىن ايامايدى. قىمباتتى اقساقالدار، سىزدەرگە جانە وتباسىلارىڭىزعا العىسىمىز شەكسىز! ەحوبا سىزدەردىڭ جانقيارلىق رۋحتارىڭىزعا باتاسىن توگە بەرسىن! ارينە، ٴبارىمىز سياقتى، اقساقالدارعا دا بالانس ساقتاۋ كەرەك. تەوكراتيالىق ىستەرگە بار ۋاقىتتى سارپ ەتىپ، وتباسى قامى شەتتە قالىپ كەتپەۋ كەرەك.
جانقيار بولۋ ٷشىن
9. فىلىپىلىكتەرگە 2:4، 5 كە ساي، بارلىق ماسىحشىلەر نەنى ويلاۋلارى كەرەك؟
9 فىلىپىلىكتەرگە 2:4، 5 وقىڭىز. يسانىڭ جانقيارلىعىن اقساقالدار عانا ەمەس، بارلىعىمىز دا ۇلگى ەتە الامىز. كيەلى كىتاپتا يسانىڭ «قۇلدىڭ كەيپىن قابىلداعانى» ايتىلعان (ٴفىلىپ. 2:7). بۇل سوزدەردەن قانداي ساباق الامىز؟ جاقسى قۇل ٵرقاشان قوجايىنىنىڭ كوڭىلىنەن شىعۋدى ويلاپ تۇرادى. ٴبىز دە ەحوبانىڭ قۇلدارى بولعاندىقتان جانە باۋىرلاستارىمىزعا قىزمەت ەتۋدى قالاعاندىقتان، ولارعا بارىنشا پايدامىزدى تيگىزگىمىز كەلەدى. ٴقازىر وسى جاعىنان جاقسارۋعا كومەكتەسەتىن كەڭەستەردى قاراستىرايىق.
10. ٶزىمىزدى قالاي تەكسەرىپ كورسەك بولادى؟
10 ٶزىڭىزدى تەكسەرىپ كورىڭىز. بۇل ٷشىن بىلاي دەپ وي جۇگىرتسەڭىز بولادى: «بىرەۋگە كومەكتەسۋ ٷشىن قۇرباندىقتارعا بارۋعا دايىنمىن با؟ ەگەر مەنەن ەگدە تارتقان ەر باۋىرلاستىڭ جاعدايىن ٴبىلىپ قايتۋدى نەمەسە قارت ايەل باۋىرلاستى قاۋىمعا اكەلىپ-اكەتۋدى وتىنسە، قۋانا كەلىسەمىن بە؟ كونگرەسس وتەتىن جەردى تازالاۋعا نەمەسە پاتشالىق سارايىن جوندەۋگە ەرىكتىلەر قاجەت بولعاندا، كومەگىمدى ۇسىنامىن با؟» ٴبىز ەحوباعا ٶزىمىزدى باعىشتاعاندا، وعان بارىمىزدى بەرەمىز دەپ ۋادە ەتتىك. ال ەحوبا كۇش-جىگەرىمىزدى، ۋاقىتىمىزدى، قولدا بارىمىزدى باۋىرلاستاردىڭ يگىلىگىنە جۇمساعانىمىزدى قالايدى. جانقيارلىقپەن وسىلاي ەتكەنىمىزدە، ەحوبا وتە ريزا بولادى. وسى جاعىنان جاقسارۋىڭىز كەرەكتىگىن بايقاساڭىز، نە ىستەسەڭىز بولادى؟
11. جانقيار بولۋعا دۇعا قالاي كومەكتەسەدى؟
11 دۇعادا ەحوباعا شىنىڭىزدى ايتىڭىز. ٴسىز وزىڭىزگە جانقيارلىق جەتىسپەيتىنىن بايقادىڭىز دەلىك، ٴبىراق وزگەرۋگە اسا ىقىلاسىڭىز جوق. مۇندايدا شىن نيەتىڭىزبەن ەحوباعا دۇعا ايتىڭىز. شىنشىل بولىڭىز. ىشتەي نە سەزىنىپ تۇرعانىڭىزدىڭ ٴبارىن اشىق ايتىڭىز. ودان «بويىڭىزدا ىقىلاس وياتىپ، كۇش بەرۋىن» سۇراڭىز (ٴفىلىپ. 2:13).
12. شومىلدىرۋ راسىمىنەن وتكەن جاس ەر باۋىرلاستار قاۋىمعا قالاي كومەكتەسسە بولادى؟
12 ەگەر سەن شومىلدىرۋ راسىمىنەن وتكەن جاس ەر باۋىرلاس بولساڭ، ەحوبادان قاۋىمعا كوبىرەك قىزمەت ەتۋىمە ىقىلاس بەرشى دەپ سۇراساڭ بولادى. كەي ەلدەردەگى قاۋىمداردا اقساقالداردىڭ سانىمەن سالىستىرعاندا، قىزمەت كومەكشىلەرى وتە از جانە ولار ورتا جاستا نەمەسە جاستارى ودان دا ۇلكەن. ۇيىمىمىز جىل ساناپ ٶسىپ جاتقاندىقتان، ەحوبانىڭ حالقىنىڭ قامىن ويلايتىن جاس ەر باۋىرلاستار اۋاداي قاجەت. ەگەر سەن قاۋىمعا كەز كەلگەن كومەگىڭدى ۇسىنۋعا دايىن بولساڭ، مول باقىتقا كەنەلەسىڭ. ويتكەنى وسىلاي سەن ەحوبانى ريزا قىلاسىڭ، باۋىرلاستاردىڭ اراسىندا جاقساتتى بولاسىڭ جانە كومەكتەسكەنىڭنەن قاناعات الاسىڭ.
ياھۋدەياداعى ماسىحشىلەر يوردان وزەنىنەن ٶتىپ، پەللا قالاسىنا قاشتى. ٴبىرىنشى كەلگەندەرى كەيىن كەلگەندەرىنە تاماق ۇلەستىرىپ جاتىر (13-ابزاستى قاراڭىز)
13، 14. وزگەلەرگە كومەكتەسۋ ٷشىن نە ىستەۋ كەرەك؟ (مۇقاباداعى سۋرەتتى قاراڭىز.)
13 كىمنىڭ قانداي كومەككە مۇقتاج ەكەنىن بايقاپ ٴجۇرىڭىز. ەلشى پاۋىل ەۆرەيلەرگە بىلاي دەپ كەڭەس بەرگەن: «جاقسىلىق ىستەۋدى جانە وزگەلەرمەن قولدا بارلارىڭمەن ٴبولىسۋدى ۇمىتپاڭدار. ويتكەنى مۇنداي قۇرباندىقتار قۇدايعا ۇنامدى» (ەۆر. 13:16). بۇل وتە پايدالى كەڭەس ەدى! ويتكەنى كەيىنىرەك باۋىرلاستارعا شۇعىل كومەك قاجەت بولعان ٴبىر جاعداي بولدى. ياھۋدەياداعى ماسىحشىلەر ۇيلەرىن، شارۋالارىن، سەنبەيتىن تۋىستارىن تاستاپ، «تاۋلارعا قاشۋعا» ٴماجبۇر بولدى (مات. 24:16). ەگەر ولار وسىعان دەيىن پاۋىلدىڭ كەڭەسىنە قۇلاق اسىپ، بارلارىمەن ٴبولىسىپ ۇيرەنگەن بولسا، ولارعا جاڭا جەردەگى قاراپايىم ومىرگە ۇيرەنىپ كەتۋ الدەقايدا جەڭىل بولعان.
14 ادەتتە، باۋىرلاستار قانداي كومەككە مۇقتاج ەكەندەرىن ايتا بەرمەيدى. مىسالى، جان جارىنان ايىرىلىپ قالعان ەر باۋىرلاستى الايىق. وعان قانداي كومەك قاجەت بولۋى مۇمكىن؟ مىسالى، تاماق ازىرلەپ، ٴبىر جەرگە اپارىپ-اكەلىپ، ۇيىندەگى تىرلىكتەردى ىستەپ بەرۋ كەرەك شىعار. ٴبىراق ول وزگەگە ماسىل بولمايىن دەپ، ەشكىمنەن كومەك سۇراماۋى مۇمكىن. الايدا ٴبىز ايتقىزباي ٴبىلىپ، قول ۇشىن بەرسەك، ول قاتتى ريزا بولىپ قالادى. ٴبىز كومەكتەسەتىن باسقالار بار عوي، ٴبىر نارسە قاجەت بولسا، ٶزى ايتادى دا دەپ ويلاماۋىمىز كەرەك. قايتا، مەن سونداي جاعدايعا ٴتۇسىپ قالسام، قانداي كومەككە مۇقتاج بولار ەدىم دەپ وي جۇگىرتەيىك.
15. جانقيار بولعىمىز كەلسە، نە ىستەۋىمىز كەرەك؟
15 باسقالار سىزدەن كومەك سۇراۋعا قىسىلمايتىن ادام بولىڭىز. ٴسىز قاشاندا كومەكتەسۋگە دايىن تۇراتىن باۋىرلاستاردى بىلەسىز بە؟ ولاردىڭ كومەگىنە جۇگىنەتىن كەزدە، مازاسىن الامىن-اۋ دەپ ۋايىمدامايمىز. ٴبىز ولاردىڭ كەز كەلگەن جاعدايدا قول ۇشىن بەرۋگە اسىق ەكەنىن بىلەمىز جانە ٶزىمىز دە سولارعا ۇقساعىمىز كەلەدى! جاسى قىرىقتارعا كەلگەن الان دەگەن ٴبىر اقساقال وسىنداي بولعىسى كەلەدى ەكەن. بۇل ٷشىن ول يسانىڭ ۇلگىسى جايلى وي جۇگىرتىپتى. الان بىلاي دەيدى: «يسانىڭ اتقاراتىن ٸسى كوپ بولعان. ٴبىراق ەڭبەكتەگەن بالادان ەڭكەيگەن قارياعا دەيىن يسانىڭ جانىنا قىسىلماي بارىپ، ودان ەركىن كومەك سۇراي العان. ويتكەنى ونىڭ شىن قامقور ەكەنى بارىنە سەزىلىپ تۇرعان. سوندىقتان مەن دە يسا سياقتى وزگەلەرگە قامقور، جۇمساق، اشىق-جارقىن بولعىم كەلەدى. باسقالار مەنەن قىسىلماي كومەك سۇراي بەرگەنىن قالايمىن».
16. ٴزابۇر 119:59، 60 تاعى كەڭەس يساعا جاقسىراق ەلىكتەۋگە قالاي كومەكتەسەدى؟
16 يساعا ٴمىنسىز تۇردە ەلىكتەي الماي جاتساق، ساعىمىز سىنباسىن (جاق. 3:2). مىسالى، سۋرەت سالۋدى ۇيرەنىپ جاتقان وقۋشى ۇستازىنىڭ سالعانىن دالمە-ٴدال قايتالاي المايدى. ٴبىراق ول ٶز قاتەلىكتەرىنەن ۇيرەنىپ، ۇستازىنا ەلىكتەۋگە بارىنشا تىرىسا بەرسە، قابىلەتىن جاقسارتا الادى. سول سياقتى، كيەلى كىتاپتى جەكە زەرتتەگەندە بىلگەندەرىمىزدى قولدانىپ، تۇزەلە بەرسەك، يسانىڭ ۇلگىسىنە جاقسىراق ەلىكتەيتىن بولامىز (ٴزابۇر 119:59، 60 وقىڭىز).
جانقيار بولۋدىڭ يگىلىگى
يسانىڭ جانقيارلىعىن ۇلگى ەتەتىن اقساقالدار جاستارعا كەرەمەت ۇلگى كورسەتەدى (17-ابزاستى قاراڭىز) *
17، 18. يسانىڭ جانقيارلىعىنا ەلىكتەسەك، قانداي جەمىسىن كورەمىز؟
17 ەگەر ٴبىز جانقيار بولساق، باسقالارعا دا سونداي بولۋعا قوزعاۋ سالامىز. تيم ەسىمدى اقساقال بىلاي دەيدى: «ٴبىزدىڭ قاۋىمداعى جاس ەر باۋىرلاستار — كەيبىرى ٴتىپتى وتە جاس بولسا دا — العا باسىپ، قىزمەت كومەكشىسى بولدى. بۇنىڭ ٴبىر سەبەبى — ولارعا جانقيار، ٵردايىم كومەكتەسۋگە دايىن تۇراتىن باۋىرلاستاردىڭ ۇلگىسى اسەر ەتتى. ٴقازىر بۇل جاس ەر باۋىرلاستار قاۋىمعا قىزمەت ەتىپ، اقساقالدارعا كوپ قولعابىس ەتىپ ٴجۇر».
18 قازىرگى دۇنيەدە اركىم ٶز قارا باسىن ويلايدى. ٴبىراق ەحوبانىڭ حالقى ونداي ەمەس. يسانىڭ جانقيارلىعى ٴبىزدىڭ جۇرەگىمىزدى تەبىرەنتەدى. سوندىقتان ٴبىز ونىڭ ىستەگەنىن 100 پايىز قايتالاي الماساق تا، «ونىڭ ىزىمەن تۋرا جۇرۋگە» بارىنشا تىرىسامىز (پەت. 1-ح. 2:21). سوندا ٴبىز دە يسا سياقتى، ەحوبانىڭ ىقىلاسىنا بولەنىپ، قۋانىش الامىز!
13-ٵن ٴماسىحتى ۇلگى تۇتايىق
^ 5-ابزاس يسا ٵرقاشان ٶزىنىڭ ەمەس، وزگەنىڭ يگىلىگىن ويلاعان. وسى جاعىنان يساعا قالاي ەلىكتەي الامىز؟ ول سياقتى جانقيار بولعانىمىزدىڭ ٶزىمىز ٷشىن قانداي پايداسى بار؟ ٴقازىر سول تۋرالى بىلەيىك.
^ 57-ابزاس سۋرەت سيپاتتاماسى: دەن دەگەن جاس ەر باۋىرلاستىڭ اۋرۋحانادا جاتقان اكەسىنە ەكى اقساقال كەلدى. ولاردىڭ ۇلگىسىنە ٴتانتى بولعاندىقتان، دەننىڭ ٶزى دە كەيىن قاۋىمداعىلارعا قامقورلىق كورسەتە باستادى. بۇنى بەن دەگەن باسقا جاس باۋىرلاس بايقادى. ول دەننەن ۇلگى الىپ، پاتشالىق سارايىن تازالاۋعا اتسالىسىپ ٴجۇر.
