អត្ថបទសិក្សា ៩
ចូរយកតម្រាប់លោកយេស៊ូដោយបម្រើអ្នកឯទៀត
«ការឲ្យគេ នោះមានសុភមង្គលច្រើនជាងការទទួល»។—សកម្ម. ២០:៣៥
ចម្រៀងលេខ១៧ ចូរបង្ហាញចិត្តមេត្តាដូចគ្រិស្ត
សេចក្ដីសង្ខេប *
១. តើរាស្ត្ររបស់ព្រះយេហូវ៉ាមានចិត្តគំនិតបែបណា?
ជាយូរមកហើយ គម្ពីរបានប្រាប់ទុកជាមុនថាក្រោមការដឹកនាំរបស់លោកយេស៊ូ រាស្ត្ររបស់ព្រះនឹង«ប្រគល់ខ្លួនដោយស្ម័គ្រចិត្ត»ក្នុងកិច្ចបម្រើព្រះយេហូវ៉ា។ (ចសព. ១១០:៣) ទំនាយនេះកំពុងតែក្លាយជាការពិតនៅសព្វថ្ងៃនេះ។ ជារៀងរាល់ឆ្នាំ រាស្ត្រដ៏ខ្នះខ្នែងរបស់ព្រះយេហូវ៉ាចំណាយពេលរាប់លានម៉ោងក្នុងកិច្ចការផ្សព្វផ្សាយ។ ពួកគេធ្វើកិច្ចការនេះដោយស្ម័គ្រចិត្ត និងដោយចំណាយធនធានផ្ទាល់ខ្លួន។ ម្យ៉ាងទៀត ពួកគេក៏ចំណាយពេលដើម្បីជួយបងប្អូនរួមជំនឿដោយផ្ដល់អ្វីដែលបងប្អូននោះត្រូវការ លើកទឹកចិត្តពួកគេ និងពង្រឹងជំនឿរបស់ពួកគេទៅលើព្រះយេហូវ៉ា។ ពួកអ្នកចាស់ទុំនិងជំនួយការខាងកិច្ចបម្រើក៏ចំណាយពេលជាច្រើនដើម្បីរៀបចំផ្នែកផ្សេងៗនៃកិច្ចប្រជុំ និងពង្រឹងកម្លាំងចិត្តបងប្អូន។ តើអ្វីជំរុញចិត្តរាស្ត្ររបស់ព្រះយេហូវ៉ាឲ្យធ្វើកិច្ចការទាំងអស់នេះ? គឺដោយសារពួកគេមានសេចក្ដីស្រឡាញ់ចំពោះព្រះនិងចំពោះអ្នកជិតខាង។—ម៉ាថ. ២២:៣៧-៣៩
២. ដូចបានរៀបរាប់នៅរ៉ូម ១៥:១-៣ តើលោកយេស៊ូបានទុកគំរូអ្វី?
២ លោកយេស៊ូបានទុកគំរូដ៏ល្អប្រសើរស្ដីអំពីការចាត់ទុកសេចក្ដីត្រូវការរបស់អ្នកឯទៀតថាសំខាន់ជាងសេចក្ដីត្រូវការរបស់ខ្លួន។ យើងព្យាយាមអស់ពីសមត្ថភាពដើម្បីដើរតាមលំអានដានរបស់លោក។ (សូមអាន រ៉ូម ១៥:១-៣) ពួកអ្នកដែលយកតម្រាប់លោកនឹងទទួលប្រយោជន៍ផ្សេងៗ។ លោកយេស៊ូបានមានប្រសាសន៍ថា៖ «ការឲ្យគេ នោះមានសុភមង្គលច្រើនជាងការទទួល»។—សកម្ម. ២០:៣៥
៣. តើយើងនឹងពិចារណាអ្វីខ្លះក្នុងអត្ថបទនេះ?
៣ ក្នុងអត្ថបទនេះ យើងនឹងពិចារណាអំពីការលះបង់មួយចំនួនរបស់លោកយេស៊ូដើម្បីជួយអ្នកឯទៀត និងរបៀបដែលយើងអាចយកតម្រាប់លោក។ យើងក៏នឹងពិចារណាដែរអំពីរបៀបដែលយើងអាចមានបំណងចិត្តកាន់តែខ្លាំងដើម្បីបម្រើអ្នកឯទៀត។
ចូរធ្វើតាមគំរូរបស់លោកយេស៊ូ
ទោះជាអស់កម្លាំងក្ដី តើលោកយេស៊ូបានធ្វើអ្វីពេលមនុស្សមួយក្រុមធំបានមកជួបលោក? (សូមមើលវគ្គ៤)
៤. តើលោកយេស៊ូបានបង្ហាញយ៉ាងណាថាលោកចាត់ទុកសេចក្ដីត្រូវការរបស់អ្នកឯទៀតថាសំខាន់ជាងសេចក្ដីត្រូវការរបស់ខ្លួន?
៤លោកយេស៊ូបានជួយអ្នកឯទៀត ទោះជាលោកអស់កម្លាំងក្ដី។ សូមគិតអំពីប្រតិកម្មរបស់លោកយេស៊ូ ពេលដែលមនុស្សជាច្រើនកុះករបានមកជួបលោកនៅជម្រាលភ្នំមួយដែលទំនងជាជិតក្រុងកាពើណិម។ នៅពេលនោះ លោកបានអធិដ្ឋានពេញមួយយប់ហើយ។ ដូច្នេះ លោកច្បាស់ជាអស់កម្លាំងជាខ្លាំង ប៉ុន្តែពេលលោកបានឃើញមនុស្សមួយក្រុមធំនោះ លោកមានចិត្តអាណិតអាសូរចំពោះអ្នកក្រីក្រ និងអ្នកជំងឺក្នុងចំណោមពួកគេ។ លោកមិនគ្រាន់តែធ្វើឲ្យពួកគេជាសះស្បើយពីជំងឺប៉ុណ្ណោះទេ តែក៏ថ្លែងសុន្ទរកថាមួយដែលលើកទឹកចិត្តយ៉ាងខ្លាំង ពោលគឺសុន្ទរកថានៅលើភ្នំ។—លូក. ៦:១២-២០
តើយើងអាចមានចិត្តគំនិតដែលលះបង់ប្រយោជន៍ខ្លួនដូចលោកយេស៊ូតាមរបៀបណាខ្លះ? (សូមមើលវគ្គ៥)
៥. តើប្រមុខគ្រួសារយកតម្រាប់លោកយេស៊ូស្ដីអំពីចិត្តគំនិតដែលលះបង់ប្រយោជន៍ខ្លួនយ៉ាងដូចម្ដេច ពេលអស់កម្លាំង?
៥របៀបដែលប្រមុខក្រុមគ្រួសារយកតម្រាប់លោកយេស៊ូ។ សូមស្រមៃគិតស្ថានភាពមួយ។ បន្ទាប់ពីធ្វើការពេញមួយថ្ងៃ ឪពុកម្នាក់ត្រឡប់មកផ្ទះវិញទាំងអស់កម្លាំង ហើយគិតថាមិនចាំបាច់គោរពប្រណិប័តន៍ជាក្រុមគ្រួសារនៅល្ងាចនោះទេ។ ប៉ុន្តែ គាត់អធិដ្ឋានសុំកម្លាំងពីព្រះយេហូវ៉ា ហើយលោកតបឆ្លើយសេចក្ដីអធិដ្ឋានរបស់គាត់។ ដូច្នេះ ពួកគេធ្វើការគោរពប្រណិប័តន៍ជាក្រុមគ្រួសារដូចធម្មតា។ នៅល្ងាចនោះ កូនរបស់ពួកគេរៀនមេរៀនដ៏សំខាន់មួយគឺថា ការគោរពប្រណិប័តន៍ព្រះយេហូវ៉ាគឺជាអ្វីដ៏សំខាន់បំផុតចំពោះឪពុកម្ដាយ។
៦. សូមលើកឧទាហរណ៍មួយអំពីរបៀបដែលលោកយេស៊ូបានលៃទុក្ខពេលដើម្បីជួយអ្នកឯទៀត។
៦លោកយេស៊ូបានលៃទុកពេលសម្រាប់អ្នកឯទៀត ទោះជាលោកត្រូវការពេលនៅម្នាក់ឯងក្ដី។ តើអ្នកអាចស្រមៃឃើញអំពីអារម្មណ៍របស់លោកយេស៊ូឬទេ ពេលដែលលោកបានឮថាមិត្តភក្តិរបស់លោកគឺយ៉ូហានដែលជាអ្នកជ្រមុជទឹកបានត្រូវគេកាត់ក្បាល? លោកយេស៊ូច្បាស់ជាកើតទុក្ខជាខ្លាំង។ គម្ពីរចែងថា ពេលលោក«ឮដូច្នេះ[អំពីការស្លាប់របស់យ៉ូហាន] លោកយេស៊ូបានចុះទូកចេញពីទីនោះទៅកន្លែងមួយឆ្ងាយពីគេ ដើម្បីនៅម្នាក់ឯង»។ (ម៉ាថ. ១៤:១០-១៣) យើងអាចយល់អំពីមូលហេតុដែលលោកយេស៊ូចង់នៅម្នាក់ឯង ពីព្រោះអ្នកខ្លះចូលចិត្តសំងំកើតទុក្ខតែឯង។ ប៉ុន្តែ លោកយេស៊ូមិនអាចធ្វើដូច្នេះបានទេ ព្រោះមនុស្សមួយក្រុមធំបានមកដល់កន្លែងដាច់ឆ្ងាយពីគេនោះមុនលោកទៅទៀត។ តើលោកយេស៊ូមានប្រតិកម្មយ៉ាងណា? លោកបានគិតអំពីសេចក្ដីត្រូវការរបស់មនុស្សមួយក្រុមនោះ ហើយក៏«មានចិត្តក្ដួលអាណិតពួកគេ»។ លោកដឹងថាពួកគេត្រូវការជំនួយ និងការសម្រាលទុក្ខពីព្រះ។ ដូច្នេះ ភ្លាមៗនោះលោកបានចាប់ផ្ដើមជួយពួកគេ។ តាមពិត «លោកចាប់ផ្ដើមបង្រៀនពួកគេអំពីអ្វីៗជាច្រើន»មិនមែនតិចតួចទេ។—ម៉ាក. ៦:៣១-៣៤; លូក. ៩:១០, ១១
៧-៨. សូមលើកឧទាហរណ៍អំពីរបៀបដែលពួកអ្នកចាស់ទុំយកតម្រាប់លោកយេស៊ូពេលមានសេចក្ដីត្រូវការ។
៧របៀបដែលពួកអ្នកចាស់ទុំយកតម្រាប់លោកយេស៊ូ។ យើងពិតជាឲ្យតម្លៃចំពោះកិច្ចការលះបង់ប្រយោជន៍ខ្លួនរបស់ពួកអ្នកចាស់ទុំដើម្បីជាប្រយោជន៍ដល់យើង! ក្រុមជំនុំមិនដឹងអំពីកិច្ចការភាគច្រើនរបស់ពួកអ្នកចាស់ទុំទេ។ ជាឧទាហរណ៍ ពេលបងប្អូនមានរឿងបន្ទាន់ទាក់ទងនឹងបញ្ហាសុខភាព គណៈកម្មាធិការខាងសម្ព័ន្ធការពេទ្យទៅជួយបងប្អូនទាំងនោះភ្លាមៗ។ ភាគច្រើនរឿងបន្ទាន់ទាំងនោះកើតឡើងនៅពេលយប់ជ្រៅ! ប៉ុន្តែ ដោយសារអ្នកចាស់ទុំទាំងនោះមានចិត្តអាណិតមេត្តាចំពោះបងប្អូន ពួកគេនិងក្រុមគ្រួសារសុខចិត្តលះបង់ប្រយោជន៍ខ្លួន។
៨ ពួកអ្នកចាស់ទុំក៏ចូលរួមក្នុងកិច្ចការសាងសង់សាលប្រជុំនិងអគារផ្សេងទៀត ព្រមទាំងកិច្ចការផ្ដល់ជំនួយជាបន្ទាន់ពេលមានមហន្តរាយ។ ម្យ៉ាងទៀត ពួកគេចំណាយពេលជាច្រើនទៅលើការបង្រៀននិងលើកទឹកចិត្តយើង។ បងប្អូនប្រុសទាំងអស់នេះនិងក្រុមគ្រួសាររបស់ពួកគេ សមនឹងទទួលការសរសើរដ៏ស្មោះពីយើង។ សូមព្រះយេហូវ៉ាផ្ដល់រង្វាន់ដល់ពួកគេចំពោះចិត្តគំនិតលះបង់ប្រយោជន៍ខ្លួនដែលពួកគេបង្ហាញ។ ដូចអ្នកឯទៀត ពួកអ្នកចាស់ទុំត្រូវធ្វើជាមនុស្សសមហេតុសមផល។ ពួកគេមិនគួរចំណាយពេលច្រើនទៅលើសកម្មភាពផ្សេងៗរបស់ក្រុមជំនុំ រហូតដល់ពួកគេគ្មានពេលបំពេញសេចក្ដីត្រូវការរបស់ក្រុមគ្រួសារខ្លួនឯងឡើយ។
របៀបបណ្ដុះឲ្យមានចិត្តគំនិតដែលលះបង់ប្រយោជន៍ខ្លួន
៩. យោងទៅតាមភីលីព ២:៤, ៥ តើគ្រិស្តសាសនិកទាំងអស់គួរបណ្ដុះឲ្យមានចិត្តគំនិតបែបណា?
៩ សូមអាន ភីលីព ២:៤, ៥។ មិនគ្រាន់តែពួកអ្នកចាស់ទុំប៉ុណ្ណោះអាចរៀនឲ្យមានចិត្តគំនិតលះបង់ប្រយោជន៍ខ្លួនដូចលោកយេស៊ូទេ ប៉ុន្តែយើងទាំងអស់គ្នាអាចធ្វើដូច្នេះដែរ។ គម្ពីរចែងថា លោកយេស៊ូបាន«យកសណ្ឋានជាខ្ញុំបម្រើ»។ (ភី. ២:៧) តើយើងអាចរៀនអ្វីពីពាក្យនោះ? ពេលខ្ញុំបម្រើឬក៏អ្នកបម្រើតែងតែរកគ្រប់ឱកាសដើម្បីផ្គាប់ចិត្តម្ចាស់របស់គាត់ គាត់មានប្រយោជន៍។ ដូច្នេះ ដោយសារយើងជាខ្ញុំបម្រើព្រះយេហូវ៉ា ហើយយើងបម្រើបងប្អូនឯទៀត យើងចង់ធ្វើជាបុគ្គលដែលកាន់តែមានប្រយោជន៍ចំពោះលោកនិងចំពោះបងប្អូន។ អ្នកអាចធ្វើដូច្នេះបាន ដោយពិចារណាអំពីយោបល់ដូចតទៅនេះ។
១០. តើយើងអាចសួរខ្លួននូវសំណួរអ្វីខ្លះ?
១០សូមគិតអំពីចិត្តគំនិតរបស់អ្នក។ សូមសួរខ្លួនអ្នកថា ‹តើខ្ញុំសុខចិត្តលះបង់ប្រយោជន៍ខ្លួនច្រើនប៉ុណ្ណាដើម្បីជួយអ្នកឯទៀត? ជាឧទាហរណ៍ តើខ្ញុំនឹងធ្វើអ្វីបើខ្ញុំបានត្រូវសុំឲ្យទៅសួរសុខទុក្ខបងប្រុសវ័យចាស់ម្នាក់នៅផ្ទះរបស់គាត់ ឬឲ្យឌុបបងស្រីវ័យចាស់ម្នាក់ទៅកិច្ចប្រជុំ? ម្យ៉ាងទៀត តើខ្ញុំស្ម័គ្រចិត្តជួយសម្អាតកន្លែងមហាសន្និបាត ឬជួយថែទាំសាលប្រជុំឬទេ?›។ ព្រះយេហូវ៉ាពេញចិត្តពេលយើងលះបង់ពេលវេលានិងធនធានរបស់យើងដើម្បីជួយអ្នកឯទៀត ដោយសារនេះសមស្របនឹងពាក្យសន្យារបស់យើងពេលប្រគល់ខ្លួនជូនលោក ថាយើងនឹងប្រើអ្វីទាំងអស់ដើម្បីបម្រើលោក។ បើយើងឃើញថាយើងត្រូវរីកចម្រើនថែមទៀត តើយើងអាចធ្វើអ្វីខ្លះ?
១១. តើការអធិដ្ឋានអាចជួយយើងឲ្យចេះលះបង់ប្រយោជន៍ខ្លួនយ៉ាងដូចម្ដេច?
១១សូមអធិដ្ឋានយ៉ាងអស់ពីចិត្តទៅព្រះយេហូវ៉ា។ បើអ្នកពិនិត្យឃើញថាមានចំណុចខ្លះដែលអ្នកត្រូវរីកចម្រើន ប៉ុន្តែអ្នកមិនសូវចង់ធ្វើការកែប្រែដែលចាំបាច់ សូមអធិដ្ឋានយ៉ាងអស់ពីចិត្តទៅព្រះយេហូវ៉ា។ សូមនិយាយត្រង់ៗ ហើយប្រាប់លោកអំពីអារម្មណ៍របស់អ្នក ព្រមទាំងសុំលោកឲ្យជួយអ្នក«មានបំណងប្រាថ្នានិងមានការប្រព្រឹត្ត»។—ភី. ២:១៣
១២. តើប្អូនប្រុសវ័យក្មេងដែលបានទទួលការជ្រមុជទឹកអាចជួយក្រុមជំនុំតាមរបៀបណា?
១២ បើអ្នកជាប្អូនប្រុសវ័យក្មេងដែលបានទទួលការជ្រមុជទឹក សូមសុំព្រះយេហូវ៉ាឲ្យជួយអ្នកមានបំណងប្រាថ្នាចង់ធ្វើថែមទៀតដើម្បីជួយបងប្អូនក្នុងក្រុមជំនុំ។ នៅប្រទេសខ្លះមានអ្នកចាស់ទុំច្រើនជាងជំនួយការខាងកិច្ចបម្រើ ហើយជំនួយការខាងកិច្ចបម្រើជាច្រើនទាំងនោះមានវ័យរាងជ្រេ។ កាលដែលអង្គការរបស់ព្រះបន្តរីកចម្រើន យើងត្រូវការប្អូនប្រុសវ័យក្មេងកាន់តែច្រើនដើម្បីជួយពួកអ្នកចាស់ទុំមើលថែរាស្ត្ររបស់ព្រះយេហូវ៉ា។ អ្នកនឹងអរសប្បាយពេលអ្នកសុខចិត្តជួយខាងផ្នែកណាក៏ដោយដែលត្រូវការជំនួយ។ ហេតុអ្វី? ពីព្រោះអ្នកនឹងធ្វើឲ្យព្រះយេហូវ៉ាពេញចិត្ត មានកេរ្តិ៍ឈ្មោះល្អ និងមានការស្កប់ចិត្តដែលមកពីការជួយអ្នកឯទៀត។
ក្រោយគ្រិស្តសាសនិកពីតំបន់យូឌាឆ្លងទន្លេយ៉ូដាន់ ពួកគេបានរត់ទៅក្រុងភេឡា។ ពួកអ្នកដែលបានទៅដល់ក្រុងនោះមុន ចែកស្បៀងអាហារឲ្យគ្រិស្តសាសនិកឯទៀតដែលទើបតែបានមកដល់ (សូមមើលវគ្គ១៣)
១៣-១៤. តើយើងអាចធ្វើអ្វីខ្លះដើម្បីជួយបងប្អូនរបស់យើង? (សូមមើលរូបភាពនៅក្រប)
១៣ចូរចេះសង្កេតមើលនិងកត់សម្គាល់ពេលបងប្អូនត្រូវការជំនួយ។ ប៉ូលបានលើកទឹកចិត្តគ្រិស្តសាសនិកជនជាតិហេប្រឺថា៖ «កុំភ្លេចធ្វើការល្អ ហើយចែករំលែកដល់អ្នកឯទៀត ព្រោះព្រះពេញចិត្តគ្រឿងបូជាបែបនេះ»។ (ហេ. ១៣:១៦) យោបល់នេះគឺពិតជាមានប្រយោជន៍មែន! មិនយូរក្រោយពីប៉ូលបានឲ្យយោបល់នេះ គ្រិស្តសាសនិកដែលនៅតំបន់យូឌាត្រូវលះចោលផ្ទះ ការងារ និងសាច់ញាតិដែលមិនមែនជាអ្នកជឿរបស់ពួកគេ ហើយត្រូវ«ចាប់ផ្ដើមរត់ទៅតំបន់ភ្នំ»។ (ម៉ាថ. ២៤:១៦) នៅពេលនោះ គឺជាការសំខាន់មែនដែលពួកគេត្រូវចេះជួយគ្នាទៅវិញទៅមក។ ពួកអ្នកដែលធ្វើតាមយោបល់របស់ប៉ូលដែលឲ្យចេះចែករំលែកគ្នាទៅវិញទៅមក ងាយស្រួលជាងក្នុងការសម្របខ្លួននឹងរបៀបរស់នៅថ្មី។
១៤ បងប្អូនរបស់យើងប្រហែលជាមិនតែងតែប្រាប់យើងអំពីសេចក្ដីត្រូវការរបស់ពួកគេឡើយ។ ជាឧទាហរណ៍ ក្នុងករណីដែលប្រពន្ធរបស់បងប្រុសម្នាក់បានស្លាប់ តើបងប្រុសនោះត្រូវការជំនួយខាងម្ហូបអាហារ ការធ្វើដំណើរ ឬកិច្ចការផ្ទះឬទេ? គាត់ប្រហែលជាមិនសុំជំនួយទេ ដោយសារគាត់ខ្លាចចិត្តយើង។ ប៉ុន្តែ គាត់ប្រហែលជាឲ្យតម្លៃយ៉ាងខ្លាំង បើយើងចាត់វិធានការជួយគាត់។ យើងមិនគួរគិតថាទុកឲ្យអ្នកឯទៀតជួយគាត់ក៏បាន ឬថាបើគាត់ត្រូវការអ្វី គាត់នឹងប្រាប់យើងនោះទេ។ សូមសួរខ្លួនអ្នកថា ‹បើខ្ញុំស្ថិតក្នុងស្ថានភាពបែបនេះ តើខ្ញុំត្រូវការជំនួយអ្វីខ្លះ?›។
១៥. ដើម្បីចេះលះបង់ប្រយោជន៍ខ្លួន តើយើងត្រូវតាំងចិត្តធ្វើអ្វី?
១៥ចូរធ្វើជាមនុស្សដែលស្រួលពឹងពាក់។ អ្នកប្រហែលជាស្គាល់បងប្អូននៅក្នុងក្រុមជំនុំដែលប្រុងប្រៀបជានិច្ចដើម្បីជួយអ្នកឯទៀត។ ពួកគេមិនដែលធ្វើឲ្យយើងមានអារម្មណ៍ថា យើងរំខានពួកគេទេ។ យើងដឹងថា យើងអាចពឹងពាក់ពួកគេបានពេលដែលត្រូវការជំនួយ ហើយយើងក៏ចង់ធ្វើជាមនុស្សស្រួលពឹងពាក់ដូចពួកគេដែរ។ បងអាឡិនដែលជាអ្នកចាស់ទុំមានអាយុ៤៥ឆ្នាំចង់ធ្វើជាមនុស្សដែលស្រួលពឹងពាក់។ ពេលគិតអំពីគំរូរបស់លោកយេស៊ូ គាត់និយាយថា៖ «លោកយេស៊ូជាមនុស្សរវល់ណាស់ ប៉ុន្តែទាំងក្មេងទាំងចាស់ចូលចិត្តលោក ហើយមិនខ្លាចសុំជំនួយពីលោកទេ។ ពួកគេដឹងថាលោកពិតជាយកចិត្តទុកដាក់ចំពោះពួកគេ។ ពេលគិតអំពីគំរូរបស់លោក ខ្ញុំក៏ចង់ធ្វើជាមនុស្សដែលស្រួលពឹងពាក់ កក់ក្ដៅ និងយកចិត្តទុកដាក់ចំពោះអ្នកឯទៀតដែរ»។
១៦. តើតាមរបៀបណាការអនុវត្តចម្រៀងសរសើរព្រះ ១១៩:៥៩, ៦០ អាចជួយយើងឲ្យធ្វើតាមគំរូរបស់លោកយេស៊ូយ៉ាងដិតដល់?
១៦ យើងមិនគួរធ្លាក់ទឹកចិត្តទេ បើយើងមិនអាចយកតម្រាប់លោកយេស៊ូបានយ៉ាងល្អឥតខ្ចោះ។ (យ៉ា. ៣:២) សូមគិតអំពីឧទាហរណ៍មួយ។ សិស្សផ្នែកវិចិត្រករម្នាក់មិនអាចគូរគំនូរបានល្អដូចវិចិត្រករដ៏ចំណានទេ។ ប៉ុន្តែ កាលដែលសិស្សនោះរៀនពីកំហុសរបស់ខ្លួន ហើយព្យាយាមធ្វើតាមគំរូរបស់អ្នកបង្រៀនយ៉ាងដិតដល់ គាត់នឹងបន្តរីកចម្រើន។ ស្រដៀងគ្នាដែរ បើយើងធ្វើតាមអ្វីដែលយើងបានរៀនតាមរយៈការសិក្សាគម្ពីរផ្ទាល់ខ្លួន ហើយខំអស់ពីសមត្ថភាពកែតម្រូវគុណវិបត្តិណាដែលយើងប្រហែលជាមាន យើងអាចធ្វើតាមគំរូរបស់លោកយេស៊ូឲ្យបានដិតដល់ជាង។—សូមអាន ចម្រៀងសរសើរព្រះ ១១៩:៥៩, ៦០
ប្រយោជន៍ដែលមកពីការលះបង់ប្រយោជន៍ខ្លួន
ដោយមានចិត្តគំនិតលះបង់ប្រយោជន៍ខ្លួនដូចលោកយេស៊ូ ពួកអ្នកចាស់ទុំទុកគំរូសម្រាប់ប្អូនៗវ័យក្មេង (សូមមើលវគ្គ១៧) *
១៧-១៨. តើយើងនឹងទទួលប្រយោជន៍យ៉ាងណា កាលដែលយើងព្យាយាមមានចិត្តគំនិតដែលលះបង់ប្រយោជន៍ខ្លួនដូចលោកយេស៊ូ?
១៧ ពេលអ្នកឯទៀតឃើញយើងចេះលះបង់ប្រយោជន៍ខ្លួន នេះជំរុញចិត្តពួកគេឲ្យចង់ធ្វើដូចយើងដែរ។ អ្នកចាស់ទុំម្នាក់ឈ្មោះធីមនិយាយថា៖ «មូលហេតុមួយដែលប្អូនប្រុសវ័យក្មេងខ្លះបានរីកចម្រើនរហូតដល់ទៅជាជំនួយការខាងកិច្ចបម្រើ គឺដោយសារពួកគេឃើញបងប្អូនសុខចិត្តជួយអ្នកឯទៀត។ ដូច្នេះពួកគេក៏ចង់ធ្វើដូចបងប្អូនទាំងនោះដែរ។ ការខំប្រឹងលះបង់ប្រយោជន៍ខ្លួនរបស់ពួកគេជួយដល់ក្រុមជំនុំ និងផ្ដល់ការគាំទ្រច្រើនជាងដល់ពួកអ្នកចាស់ទុំ»។
១៨ មនុស្សជាច្រើនក្នុងពិភពលោកសព្វថ្ងៃនេះគិតតែពីប្រយោជន៍ខ្លួនឯងប៉ុណ្ណោះ។ ប៉ុន្តែ រាស្ត្ររបស់ព្រះយេហូវ៉ាខុសគ្នាស្រឡះពីមនុស្សបែបនោះ។ យើងកោតស្ងើចចំពោះចិត្តគំនិតដែលលះបង់ប្រយោជន៍ខ្លួនរបស់លោកយេស៊ូ ហើយយើងតាំងចិត្តធ្វើតាមគំរូរបស់លោក។ គ្មានយើងណាម្នាក់អាចដើរតាមលំអានដានរបស់លោកយ៉ាងល្អឥតខ្ចោះទេ ប៉ុន្តែយើងអាច«ដើរតាមលំអានដានរបស់លោកឲ្យបានដិតដល់»។ (១ពេ. ២:២១) កាលដែលយើងខំអស់ពីសមត្ថភាពដើម្បីមានចិត្តគំនិតដែលលះបង់ប្រយោជន៍ខ្លួនដូចលោកយេស៊ូ យើងក៏នឹងមានអំណរដែលមកពីការធ្វើឲ្យព្រះយេហូវ៉ាពេញចិត្ត។
ចម្រៀងលេខ១៣ គ្រិស្តជាគំរូរបស់យើង
^ វគ្គ 5 លោកយេស៊ូតែងតែចាត់ទុកសេចក្ដីត្រូវការរបស់អ្នកឯទៀតថាសំខាន់ជាងសេចក្ដីត្រូវការរបស់ខ្លួន។ ក្នុងអត្ថបទនេះ យើងនឹងពិចារណាអំពីរបៀបផ្សេងៗដែលយើងអាចធ្វើតាមគំរូរបស់លោក។ យើងក៏នឹងពិចារណាអំពីរបៀបដែលការមានចិត្តគំនិតលះបង់ប្រយោជន៍ខ្លួនដូចលោកយេស៊ូ នឹងនាំឲ្យយើងទទួលប្រយោជន៍ជាយូរអង្វែង។
^ វគ្គ 57 ការពណ៌នាអំពីរូបភាព: ពេលប្អូនប្រុសម្នាក់ឈ្មោះដានឃើញអ្នកចាស់ទុំពីរនាក់មកសួរសុខទុក្ខឪពុកគាត់នៅមន្ទីរពេទ្យ នេះជំរុញចិត្តគាត់ឲ្យចង់ធ្វើតាមគំរូរបស់អ្នកចាស់ទុំដែលបង្ហាញសេចក្ដីស្រឡាញ់នោះ ហើយក៏ជំរុញចិត្តគាត់ឲ្យរកវិធីជួយអ្នកឯទៀតដែលត្រូវការជំនួយក្នុងក្រុមជំនុំដែរ។ ប្អូនប្រុសម្នាក់ទៀតឈ្មោះបេន ឃើញការយកចិត្តទុកដាក់ដែលប្អូនដានបង្ហាញចំពោះអ្នកឯទៀត។ គំរូរបស់ប្អូនដានលើកទឹកចិត្តប្អូនបេនឲ្យជួយសម្អាតសាលប្រជុំ។