MBANDU YAKUDILONGA 9
Kayela o Phangu ya Jezú Mukusidivila Akwenu
“O kubhana kota mu kuzediwisa, o kutambula ndenge.”—IKA. 20:35.
MWIMBU 17 Ngandala
ITWANDADILONGA *
1. Ukexilu webhi wambote ulondekesa o mundu wa Jihova?
O BIBIDYA yakanene kya kwila, o mundu wa Nzambi wa “kà di bheka mwene mu vondadi yâ” phala kusidivila Jihova, mukukayela o itendelesu ya Jezú. (Jisá. 110:3) O polofesiya yiyi sé phata yamudikumbidila mu izuwa yalelu. Mumivu yoso o Jiselevende jafiyele ja Jihova abhakula mazunda ni mazunda ajyola mu kikalakalu kya kuboka. Ene abhanga o kikalakalu kiki sé kwafuta, mukonda amesena kukibhanga muvondadi yâ. Ene we angastala o kithangana kyâ mukukwatekesa kudikila o ibhindamu ya jiphange jâ, kwa aswinisa, ni kukolesa o kixikanu kyâ kwa Jihova. O tufunga ni akwatekexi atufunga, angastala jyola javulu mukusokejeka o milongi phala o yônge ni kwinga o jiphange. Ihi ya abhangesa kubhanga o kikalakalu kiki? O henda yâ kwa Jihova ni kumundu wê.—Mat. 22:37-39.
2. Kala kyosoneke mu mukanda kwa akwa Loma 15:1-3, phangu yebhi yatuxila Jezú?
2 Jezú watuxila phangu yambote mukuta o jivondadi ja akwa kupholo dya jivondadi jê. Kima kyambote kukayela o phangu yê. (Tanga Loma 15:1-3.) O yó akayela o phangu yê andakatula mbote yavulu. Jezú wambe: “O kubhana kota mu kuzediwisa, o kutambula ndenge.”—Ika. 20:35.
3. Ihi itwandadilonga mumilongi yiyi?
3 Mumilongi yiyi twandabhitulula o ima yabhangele Jezú phala kuta o ibhindamu ya akwa kupholo dya ibhindamu yê ni kyebhi kitutena kukayela o phangu yê. Twandazwela we kyebhi kitutena kubandekesa o vondadi yetu yakusidivila akwetu.
KAYELA O PHANGU YA JEZÚ
Sumbala ni kutohoka, kyebhi kyadivu Jezú kyoso kyamusange kwala o kifuxi kya athu? (Tala okaxi 4)
4. Kyebhi Jezú kyate o ibhindamu ya akwa kupholo dya ibhindamu yê?
4Jezú wakwatekesa akwa né mwene kyoso kyatohokele. Xinganeka kyebhi kyadivu Jezú kyoso kibuka kya athu kyamusange ku mulundu, nange bhwazukama o mbanza ya Kafanawu. Jezú wabhitile o usuku woso ni kusamba. Mwene nange watohokele kyavulu, maji kyoso kyamono o kifuxi kya athu, mwene wakwatela henda kujingadyama ni jihaxi jexile bhukaxi kâ. Mwene ka asake ngó, maji wa abhangela we diskulusu dyakatunda—o Diskulusu dyabhangele ku Mulundu.—Luka 6:12-20.
Ku mwenyu wetu, kyebhi kitutena kukayela o phangu ya Jezú mukuta kupholo o ibhindamu ya akwa? (Tala okaxi 5)
5. Kyebhi o atwameni amiji kyakayela o phangu ya Jezú yakuta o ibhindamu ya akwa kupholo, kyoso kya tohoka?
5Kyebhi o atwameni amiji kyene mukayela o phangu ya Jezú. Xinganeka mukifika kiki: O tata wakalakala kyavulu kizuwa kyoso, anga ubhixila kubhata wabhwila. Mwene uxinganeka kwila nange kota se o Ubhezelu Kumwiji uxala phala kizuwa kyengi, maji mwene usamba kwa Jihova phala kumubhana nguzu yakwendesa o ubhezelu kumwiji. Jihova utambwijila o musambu wê, anga o ubhezelu kumwiji a ubhanga mwene mu kizuwa kyenyókyo. O twana adilonga disá dyakatunda mu usuku wenyó, dya kwila, phala o jitata jâ o ima mu nzumbi yene yabetakota o ima yamukwa ndenge.
6. Bhana phangu ilondekesa kyebhi Jezú kyangastala o kithangana kyê phala kukwatekesa akwa.
6Jezú wabhiti kithangana ni akwa né mwene kyoso kyabhindamene kukala ubheka wê. Utena kuxinganeka kyebhi kyadivu Jezú kyoso kyamutangela kwila kamba dyê Nzwá dya Batizu amujibha? Sé phata Jezú waluwalele kyavulu. O Bibidya yamba: “Jezú kya k’ivu, [o njimbu ya ufwilu wa Nzwá] ukatuka mu ixi yoyo, wendela mu bote, anga uya ku matutu, ku kididi kya ubheka.” (Mat. 14:10-13) Tutena kutendela se mukonda dyahi mwene wamesenene kukala ubheka. Avulu mudyetu, kyoso kyakala ni malamba, amesena kukala ubheka. Maji Jezú katenene kukala ubheka wê. Kyoso kyabhixila bhukididi kyakanene, wasange kifuxi kya athu, kya dyanga kubhixilaku. Kyebhi kyadivu Jezú? Mwene wamono o ibhidi ya athu, yu “wa kwatela henda.” Mwene watenene kumona kwila ene abhindamene kiswinisu mu nzumbi, yu wa abhanakyu sé kulaleka. Mukidi, Jezú, “anga ukwata ku alonga ima yavulu.”—Mál. 6:31-34; Luka 9:10, 11.
7-8. Bhana phangu ilondekesa kyebhi o tufunga twa henda kyene mukayela o phangu ya Jezú kyoso ki kumoneka ibhidi.
7Kyebhi o tufunga twa henda kyene mukayela o phangu ya Jezú. Tubhana valolo yavulu mu kikalakalu kibhanga o tufunga phala o mbote yetu! Ima yavulu yene mubhanga o tufunga kene mu imona kujiphange mukilunga. Mukifika, kyoso phange wala mu inzo yakusaka kyabhindamena kikwatekesu, o tufunga atokala mu Kibuka Kikwatekesa o Jiphange mu Ididi Yakusaka, aya mukwatekesa ni lusolo lwoso. Sayi ithangana a exana mukaxi ka usuku! Mukonda dya henda yâ kujiphange jabhindama, o tufunga tutu twakazola, ni miji yâ, ata o ibhindamu yajiphange jâ kupholo dya ibhindamu yâ.
8 O tufunga akwatekesa we mu kikalakalu kyakutunga Ididi ya Ubhezelu ni ididi yamukwa, ni kukwatekesa yó abhiti ni mavuwa. Kituzwela dingi o jyola ni jyola jene mungastala o tufunga mukutulonga, kutuswinisa ni kutwinga. Twatokala kuximana o jiphange joso jiji ni miji yâ. Jihova asuluke ni kubesowala o henda yene mulondekesa! Mukidi, kala kibhita ni jiphange joso, o tufunga abhingi we kusokesa kyambote o kithangana kyâ. Ene katokala kungastala o kithangana kyoso mu ikakalakalu ya kilunga, maji atokala kuxisa kithangana phala kudikila o ibhindamu ya miji yâ.
KYEBHI KITUTENA KUKALA NI KIFWA KYAKUTA O MBOTE YAKWETU KUPHOLO
9. Kala kilondekesa Filipe 2:4, 5 ukexilu webhi watokala kulondekesa o Jikidistá joso?
9 Tanga Filipe 2:4, 5. Mukidi, k’o tufunga ngó, maji etwenyoso twatokala kukayela o phangu ya Jezú yakuta o mbote ya akwetu kupholo. O Bibidya yamba kuma, mwene ‘watambula kididi kya mubhika.’ (Fil. 2:7) Xinganeka mu ima itutena kudilonga muvelusu yiyi. O mubhika mba selevende usota kusangulukisa ngana yê. Kuma tu abhika a Jihova, twamusidivila we o jiphange jetu, sé phata twamesena kubhanga yoso itubhinga Jihova ni kukwatekesa o jiphange jetu. Eye utena kubhanga kiki mukukayela o itendelesu yakayela.
10. Ibhwidisu yebhi itutena kudibhanga?
10Tonginina o ukexilu wé. Dibhwidise: ‘O kwila ngene mudibhakula phala kukwatekesa akwetu? Mukifika, kyebhi ki ngidivwa se angibhinga phala kuya mukunda phange wakuka kya, wala mu inzo yakusaka mba kumwambata muyônge? O kwila ngene mudibhakula ni lusolo lwoso phala kukwatekesa mu kuzelesa o kididi kya Yonge Yamakota, mba kuyudika o Kididi kya Ubhezelu?’ Jihova usanguluka kyavulu kyoso kitubhakula o kithangana ni jimbote jetu phala kukwatekesa akwetu. Yoso yiyi, twa ibhakula kwa mwene. Se tumona kwila kitwamuditunda kyambote mu maka yá, ihi itwatokala kubhanga?
11. O musambu utukwatekesa kyebhi kuta o mbote ya akwetu kupholo?
11Samba kwa Jihova ni muxima woso. Nange udivwa kwila, wabhingi kubhanga dingi, maji kiwala ni hanji yakubhanga kiki. Se kyene, samba kwa Jihova ni muxima woso. Zwela o kidi. Tangela kwa Jihova kyebhi kiwamudivwa, mubhinge phala n’a kubhangese “kutumaka kyoso kya mu kala mu vondadi yê yambote.”—Fil. 2:13.
12. Kyebhi o minzangala a abatizala kya, kyatena kukwatekesa o kilunga?
12 Se eye umunzangala wadiyala, akubatizala kya, bhinga kwa Jihova n’a kukwatekese kukala ni hanji yakubhanga dingi mukilunga. Sayi jixi, kwala dingi tufunga, o akwatekexi atufunga ndenge. O kumbandu yamukwa, akwatekexi avulu atufunga, adyakime kya, amukwa akuka kya. Kuma o kilunga kyamuya ni kudibandekesa, kwabhingi minzangala ya mala phala kukwatekesa o tufunga kulanga o jiphange. Se udibhakula phala kusidivila kwoso kwabhindamena dingi aboki, wandasanguluka. Mukonda dyahi? Mukonda wandasangulukisa o muxima wa Jihova, o jiphange andamona o phangu yé yambote, wandakala ni kisangusangu kijila mukukwatekesa akwenu.
Jikidistá ja Judeya, amuzawuka o Ngiji ya Njolodá, amulengela ku mbanza ya Pela. O adyanga kubhixila amuwanena kudya ku jiphange jâ jabhixila kindala (Tala okaxi 13)
13-14. Ihi itutena o kubhanga phala kukwatekesa o jiphange jetu? (Tala ofoto yakapa.)
13Sota kutonginina se akwenu abhindamena kikwatekesu. Poxolo Phawulu watendelesa akwa Jihebelewu: “O kubhanga o mbote ni ku di bhindumuna mudyenu ki ku mi jimbe, mukonda ilumbu kala yiyi Nzambi ya mu wabhela kyavulu.” (Jihe. 13:16) Kiki kyexile kitendelesu kyambote! Kikubhitile ithangana yavulu tunde kyatambula o mukanda wa Phawulu, o Jikidistá mu mbanza ya Judeya abhingile kuxisa o jinzo jâ, o ikalakalu yâ ni jindandu jâ kexile mubheza Jihova, phala “kulengela ku milundu.” (Mat. 24:16) Mu kithangana kyokyo, ene abhingile kudikwatekesa mudya. Se ene exile kya mukayela o kitendelesu kya Phawulu, kikyeji kwa abhonza kuxikina o ukexilu wa ubhe wa mwenyu.
14 Sayi ithangana, o jiphange kandatutangela kwila abhindamena kima. Mukifika, phange yadiyala utena kufunda muhatwê. O kwila phangyetu wandabhinga kikwatekesu mu maka alungu ni kulamba, kuxixila, kuteka menya ni kumwambata ni dikalu dyetu? Kuma kamesena kutubhana salu, mwene nange kandatutangela kima. Maji mwene wandakiwabhela se tudibhakula phala kumukwatekesa mu ibhidi yiyi. Kitwatokala kuxinganeka kwila, sayi phange yengi wandamukwatekesa, mba mwene wandatutangela se ubhindamena kima. Dibhwidise: ‘Se éme ngexile mudibhana ni ibhidi yiyi, kikwatekesu kyahi ki ngeji mesena kutambula?’
15. Phala kuta kupholo o mbote yakwetu, ihi itwatokala kubhanga?
15Ehela akwenu kukubhinga kikwatekesu. Sé phata eye wejiya jiphange awabhela kukwatekesa akwa, mukilunga kyé. Ene katubhangesa kudivwa kwila, twamu abhindamesa. Twejiya kwila, se kumoneka kibhidi, ene andatukwatekesa, twamesena kyavulu kukayela o phangu yâ! Phange Adá, kafunga wala ni 40 amivu, wamesena kukala polondo phala kukwatekesa akwa. Mukuxinganeka mu phangu ya Jezú, phange Adá wambe: “Jezú wexile ni ikalakalu yavulu, maji athu a itala yoso, kexile mukala ni hele phala kumuzukama mu kumubhinga kikwatekesu. Ene ejidile kwila, Jezú wamesenene o mbote yâ. Eme we ngamesena kukayela o phangu ya Jezú, ngamesena kukala muthu kabhonzo kuzwela ne, dikamba dilanga akwa.”
16. Kukumbidila Jisálamu 119:59, 60 kitukwatekesa kyebhi kukayela kyambote o phangu ya Jezú?
16 Kitwatokala kuluwala se tumona kwila, kitwamutena kukayela o phangu ya Jezú mu ukexilu watenena. (Tiya. 3:2) O muthu wamudilonga o uhete wakupindala, katena kukayela o mesene yê ni kuyuka kwoso. Maji kyoso kyaya ni kukatula madisá mu itondalu yé, anga ubhanga nguzu phala kukayela o phangu ya mesene kate bhwoso bhwatena, o uhete wê wandadibandekesa dingi. Kyene we kimoxi. Se tukumbidila yoso itudilonga mu Bibidya, anga tusota kubandekesa jinga o uhete wetu, twandatena kukayela kyambote o phangu ya Jezú.—Tanga Jisálamu 119:59, 60.
KUTA KUPHOLO O MBOTE YA AKWETU KUTUBHEKELA WE MBOTE
Mukukayela o phangu ya Jezú mukuta kupholo o ibhindamu ya akwa, o tufunga abhana phangu yambote ku minzangala (Tala okaxi 17) *
17-18. Kukayela o phangu ya Jezú yakuta kupholo o mbote ya akwa, kutubhekela we mbote yahi?
17 Se tudibhakula phala kukwatekesa akwetu, oso amukimona andamesena kukibhanga we. Sayi kafunga amwixana Tim, wambe: “Mukilunga kyetu mwala minzangala yavulu yamukula kyambote munzumbi, a asolo phala kusidivila kala akwatekexi atufunga. Kiki kyamubhita mukonda amesena kukayela o phangu ya yó amukwatekesa akwa abhindama. O nguzu yabhanga iximbakatesa o kilunga kyetu, ikwatekesa we o tufunga kubhanga o ikalakalu yâ.”
18 Mu ngongo mu twatungu, athu avulu asota ngó o mbote yâ. Maji o mundu wa Jihova wadifu kyengi. Etu tusota kukayela o ukexilu wa Jezú, tubhanga yoso phala kukayela o phangu yê. Etu kitutena kukayela o phangu ya Jezú mu ukexilu watenena, maji tutena ‘kumukayela mu makanda,’ kate bhwoso bhututena. (1 Phe. 2:21) Kyoso kituya ni kubhanga yoso phala kukayela o phangu ya Jezú, mukuta kupholo o mbote ya akwa, twandatambula we o kisangusangu kya kutuxikina kwala Jihova.
MWIMBU 13 Kidistu, Phangu Yetu
^ kax. 5 Mu ithangana yoso Jezú wasoto kuta o vondadi ya akwa kupholo dya vondadi yê. Mu milongi yiyi, twandadilonga maukexilu ututena kukayela o phangu yé. Twandadilonga we kyebhi o kukayela o phangu ya Jezú yakuta o vondadi yakwa kupholo dya jivondadi jê kutubhekela mbote inangenena.
^ kax. 57 KILOMBOLWELU KYA FOTO: Phange yamunzangala amwixana Dan, wamutala tufunga tuyadi eza mukunda tat’ê mu inzo yakusaka. Dan wakayela o phangu yambote yamubhana o tufunga. Kiki kyamubhangesa kusota we maukexilu akukwatekesa akwa mu kilunga. O munzangala wamukwa, amwixana Ben, wamutala o phangu ya Dan. O phangu ya Dan, yaswinisa Ben kudibhakula mu kikalakalu kya kuzelesa o Kididi kya Ubhezelu.
