1. Хьзмәткʹаред Йаһоԝа бь рʹәзәдьли чь дькьн?

КʹЬТЕБА Пироз бәреда готьбу ԝәки хьзмәткʹаред Хԝәде ԝе бьн рʹебәрийа Исада «бь рʹәзәдьли» Йаһоԝарʹа хьзмәт кьн (Зәбур 110:3). Әв пʹехәмбәрти ньһа бәр чʹәʹве мә те сери. Һәр сал, хьзмәткʹаред Йаһоԝа шьхӧле бәлакьрьна мьзгинеда бь милйона сьһʹәта хәрщ дькьн. Әԝана ви шьхӧли бь рʹәзәдьли у бе пʹәрә тиньн сери. Ӧса жи, әԝана жь алийе материали, емосийали у рʹӧһʹанида пьштгьрийа хушк-бьред сәр тʹәмамийа дьнйайе дькьн. Хенщи ве йәке, бьред кʹьфшкьри гәләк ԝәʹде хԝә хәрщ дькьн, ԝәки щьвата дәрбаз кьн у шьвантийе хушк-бьра бькьн. Гәло чь ԝана һелан дькә, кӧ ван тьшта бькьн? Әԝана һьм Йаһоԝа һьм жи мәрьва һʹьз дькьн (Мәтта 22:37-39).

2. Ль гора Рʹомайи 15:1-3, Иса мәсәләкә ча мәрʹа һишт?

² Иса һәри зедә нә кӧ кʹара хԝә, ле кʹара мәрьва дьгәрʹийа, у әм жи һәр тьшти дькьн, ԝәки чʹәʹв бьдьнә ԝи (Рʹомайи 15:1-3 бьхунә). Мәрьвед кӧ чʹәʹв дьдьнә ԝи, ԝе кʹарәкә мәзьн бьстиньн. Иса ӧса готьбу: «Хԝәзи ль дайийа, нә кӧ ль стандийа» (Кʹаред Шандийа 20:35).

3. Ве готареда, әме чь шеԝьр кьн?

³ Ве готареда, әме дина хԝә бьдьне кӧ Иса чь дькьр, ԝәки али кәсед дьн бькә, у әме бьвиньн кӧ әм ча дькарьн чʹәʹв бьдьнә ԝи. Ӧса жи, әме пебьһʹәсьн кӧ әм  ча дькарьн хԝәстьна хԝә зедә кьн ԝәки али мәрьвед дьн бькьн.

4. Иса ча дькʹәтә һʹәйра мәрьва?

⁴Чахе Иса ԝәстийайи бу, әԝи һьнге жи али мәрьва дькьр. Щарәке бәр чʹийаки, дьԛәԝьмә незики бажаре Кәфәрнаһуме, гәләк мәрьв һатьн кӧ Иса бьвиньн. Әԝи тʹәмамийа шәве дӧа кьрьбу. Дьбәкә әԝ гәләк ԝәстийайи бу, ле гава әԝи әв мәрьвед нәхԝәш у бәләнгаз дитьн, дьле ԝи сәр ԝан шәԝьти. Иса әԝ һьм ԛәнщ кьрьн һьм жи бь сайа готара хԝәйә мәхсус, йа кӧ әм нав дькьн Хьзмәта сәр Чʹийе, гәләк тьшт әԝ һин кьрьн (Луԛа 6:12-20).

5. Гава сәред малбәта ԝәстийайи нә, әԝана чьда чʹәʹв дьдьнә Иса?

⁵Сәред малбәте чʹәʹв дьдьнә Иса. Бинә бәр чʹәʹве хԝә кӧ паши рʹожәкә дьреж, малхе мале вәдьгәрʹә мале. Әԝ гәләк ԝәстийайи йә, у ԝирʹа чәтьн ә Ԛӧльхкьрьна тʹәви Малбәте дәрбаз кә. Диса жи, әԝ жь Йаһоԝа ԛәԝате дьхԝазә у Ԛӧльхкьрьна тʹәви Малбәте ча һәр гав дәрбаз дькә. Ви чахи зарʹ дьвиньн, ԝәки бона де-баве ԝан, ԛӧльхкьрьна Йаһоԝарʹа жь һәр тьшти фәрзтьр ә.

6. Иса ча ԝәʹде хԝә бона мәрьва хәрщ дькьр? Мәсәле бинә.

⁶Иса һазьр бу кӧ ԝәʹде хԝә бона кәсед дьн хәрщ бькә. Бинә бәр чʹәʹве хԝә, кӧ гава Йуһʹәннайе Ньхӧмдар һатә кӧштьне, Иса чьԛас хәмгин бу. Кʹьтеба Пироз дьбежә: «Гава Иса әв йәк бьһист, жь ԝе дәре бь ԛәйьке тʹәне чу щики хәԝлә» (Мәтта 14:10-13). Гава кәсәк шине дькә, нормал ә кӧ әԝ дьхԝазә тʹәне бьминә. Ле щәм Иса әв йәк нә нәһатә стандьне. Пешийа кӧ Иса гьһиштә щики хәԝлә, әʹлаләтәкә мәзьн пешийа ԝи чу ԝедәре. Гәло Иса ча хԝә да кʹьфше? Әԝи һʹале ԝан дит, у «гӧне ԝи ль ԝан һат». Иса дит кӧ әԝана рʹӧһʹанида бьрʹчи бун у һʹәԝще бәрдьлийе бун, ләма жи әԝ һазьр бу али ԝан бькә. Һьнге, әԝи «дәстпекьр [нә тʹәне чәнд тьшт, ле] гәләк тьшт әԝ һин кьрьн» (Марԛос 6:31-34; Луԛа 9:10, 11).

7-8. Рʹуспийед дьлован ча чʹәʹв дьдьнә Иса? Мәсәле бинә.

 ⁷Рʹуспийед дьлован чʹәʹв дьдьнә Иса. Рʹуспи бона мә гәләк щәфа дькʹьшиньн, у әм ве йәке гәләк дьшекьриньн! Һʹәчʹи зәʹф хушк-бьра навиньн, кӧ әԝана чьԛас шьхӧл дькьн. Мәсәлә, гава хушк йан бьраки мә дькʹәвә ԛәзийе, әндәмед Комитейа Һәвкʹарийа Нәхԝәшхане, дәрберʹа тенә һәԝара ԝи. Тьштед ӧса гәләк щар ниве шәве дьԛәԝьмьн. Ле чьмки дьле ван рʹуспийа сәр хушк-бьра дьшәԝьтә, әԝана тʹәви нәфәред хԝә дьһа зедә дькʹәвьнә һʹәйра ԝан, нә кӧ һʹәйра хԝә.

⁸ Хенщи ве йәке, рʹуспи пьштгьрийа шьхӧле авакьрьна Одед Щьвата у авайед дьн дькьн, у ӧса жи ԝәʹде тʹәшԛәлед тʹәбийәте аликʹарийе дьдьн. Һьм жи, әԝана гәләк ԝәʹде хԝә хәрщ дькьн ԝәки али мә бькьн, мә һин кьн у дьле мә ԛәԝи кьн. Әв бьра у малбәтед ԝан бь рʹасти жи һежайи пʹайа нә. Бьра әԝана хԝәйикьрийе Йаһоԝа бьн! Һьлбәт лазьм ә кӧ рʹуспи дәрәщед ӧсада сәрԝахт у бәрбьһер бьн, ԝәки шьхӧлед кӧ әԝана бона щьвате дькьн, һаԛас ԝәʹдә жь ԝан нәстинә, кӧ малбәта ԝан зьраре кʹәвә.

9. Ль гора Филипи 2:4, 5, гәрәке ньһерʹандьна мә чь щурʹәйи бә?

⁹ Филипи 2:4, 5 бьхунә. Һәмьки әм гьшк рʹуспи ниньн, ле диса жи әм гьшк дькарьн чʹәʹв бьдьнә Иса у бькʹәвьнә һʹәйра мәрьва. Кʹьтеба Пироз дьбежә кӧ Иса «кʹәтә бьнйатʹа хӧламәки»  (Филипи 2:7). Ԝәрә әм бьфькьрьн, кӧ мәʹнийа ван готьна чь йә. Хӧламе баш мәщала дьгәрʹийа, ԝәки ахайе хԝә рʹази кә. Әм хӧламед Йаһоԝа у кʹомәкдаред хушк-бьра нә, ләма әм бешьк дьхԝазьн дьле Йаһоԝа у дьле хушк-бьра һе зедә ша кьн у кери ԝан бен. Гәло әм чаԝа дькарьн ве йәке бькьн? Кʹа әм дина хԝә бьдьнә чәнд дәрәща.

10. Ԝе баш бә кӧ әм жь хԝә чь бьпьрсьн?

¹⁰Ньһерʹандьна хԝә бьщерʹьбинә. Жь хԝә бьпьрсә: «Гәло әз һазьр ьм кӧ бона мәрьвед дьн ԝәʹдә у ԛәԝата хԝә хәрщ кьм? Мәсәлә, һәгәр рʹуспи мьнрʹа бежьн, ԝәки әз тʹәсәлийа бьраки бькьм, йе кӧ мала кал-пирада дьжи, йан жи хушкәкә әʹмьрда мәзьн бьвьм щьвине, гәло әз һазьр ьм кӧ дәрберʹа ве йәке бькьм? Чахе лазьм ә, ԝәки Ода щьвате йан жи щийе щьвата мәзьн бе тʹәмьзкьрьне йан тʹәзәкьрьне, гәло әз һазьр ьм ван шьхӧлада аликʹарийе бьдьм?» Гава кӧ әм ԝәʹдә у ԛәԝата хԝә бона кʹара мәрьвед дьн хәрщ дькьн, Йаһоԝа жь мә рʹази йә. Чьмки ԝәʹде тʹәсмилкьрьна хԝә, мә әв йәк Ԝирʹа соз дайә. Ле һәгәр әм тедәрхьн, ԝәки әм ча лазьм ә ве йәке накьн, әм ча дькарьн сәр хԝә бьхәбьтьн?

11. Дӧа ча дькарә али мә бькә, ԝәки хԝәстьна мә пешда бе кӧ али мәрьва бькьм?

¹¹Жь дьл дӧа бькә. Һәгәр әм тедәрхьн кӧ гәрәке әм хԝә һьнә алийава бьгӧһәрʹиньн, ле хԝәстьна мә һьндьк ә, гәрәке әм жь дьл дӧа бькьн у дәрһәԛа проблема хԝә Йаһоԝарʹа бежьн. Йаһоԝа дькарә хԝәстьн у ԛәԝата мә зедә кә, ԝәки әм бьхԝазьн ве йәке бькьн (Филипи 2:13).

12. Бьред щаһьл дькарьн чь бькьн?

¹² Ԝе баш бә ԝәки бьред щаһьл жь Йаһоԝа рʹәща бькьн кӧ әԝ хԝәстьна ԝан зедә кә, ԝәки әԝана дьһа зедә али хушк-бьред щьвате бькьн. Һьнә ԝәлатада, рʹуспийед щьвате гәләк ьн, ле бәрдәстийед щьвате һьндьк ьн, у гәләк жь ԝан ида щаһьл ниньн. Тʹәшкиләт чьԛас дьчә дьһа мәзьн дьбә, у рʹуспи һе зедә һʹәԝще аликʹарийа бьред щаһьл ьн, сәва кӧ аликʹарийе бьдьнә хушк-бьра. Йаһоԝа жь хортед кӧ һазьр ьн һәр шьхӧли бькьн, рʹази йә. Ләма жи бьред ӧса дьбьн хԝәйе навәки баш, у дьле ԝан ша дьбә, чьмки әԝана али кәсед дьн дькьн.

13-14. Әм чаԝа дькарьн али хушк-бьра бькьн? (Бьньһерʹә шькле рʹуйе журнале.)

¹³Һаш жь һʹәԝщед кәсед дьн һәбә. Паԝлосе шанди Ибранийарʹа ӧса готьбу: «Ԛәнщи у алиһәвкьрьне бир нәкьн, чьмки ԛӧрбанед ӧса ль Хԝәде хԝәш тен» (Ибрани 13:16). Әв ширәт бь рʹасти жи ԝәʹдәда бу! Чахе шагьртед Иса Щьһустанеда әв нәʹмә стандьн, лазьм бу ԝәки әԝана мал, хәбат у мәрьвед хԝәйи нәбаԝәрмәнд бьһельн у «бьрʹәвьнә чʹийа» (Мәтта 24:16). Һьнге һʹәԝщәти һәбу ԝәки әԝана али һәвдӧ бькьн. Бона ԝан Мәсиһийа, йед кӧ пешда жи гӧһ дабунә ве ширәта Паԝлос, ԝәки чь щәм ԝан һәбу һәвдӧрʹа пʹаравәкьрана, бешьк дьһа һеса бу кӧ һини дәрәщед хԝәйә тʹәзә бьн.

¹⁴ Щара хушк-бьра рʹастә-рʹаст дәрһәԛа һʹәԝщед хԝә навежьн. Мәсәлә, бьдә бәр чʹәʹве хԝә кӧ хушкәк мьрийә у мере ԝе тʹәне майә. Гәло дьбәкә әԝ бона чекьрьна хԝарьне, чуйин-һатьне йан жи бона шьхӧлед мале һʹәԝще  аликʹарийа мә йә? Дьбәкә әԝ мәрʹа тьштәки навежә, чьмки әԝ нахԝазә зәʹмәте бьдә мә. Ле һәгәр әм хԝәха ԝирʹа аликʹарийе бьдьн, дьбәкә әԝ гәләк рʹази бә. Гәрәке әм нәфькьрьн кӧ һәр тьшт ԝе хԝәха сафи бә йан әԝед кʹе һʹәԝще аликʹарийе нә ԝе хԝәха жь мә аликʹарийе бьхԝазьн. Жь хԝә бьпьрсә: «Һәгәр әз дәԝса ԝи бума, мьне чь щурʹә аликʹари бьхԝәста?»

15. Әм гәрәке чь бькьн һәгәр дьхԝазьн али хушк-бьра бькьн?

¹⁵Дьлгәрм бә. Щьвата тәда бешьк хушк-бьред ӧса һәнә, йед кӧ һәр гав һазьр ьн, ԝәки али кәсед дьн бькьн у тʹӧ щар жь ве йәке әʹщьз набьн. Әм заньн, кӧ һәгәр әм һʹәԝще аликʹарийе бьн, әԝе бенә һәԝара мә. Әм жи дьхԝазьн бьбьнә мина ԝан, ӧса нинә? Рʹуспики бь наве Алан, йе кӧ 45 сали йә, дьхԝазә бьбә мәрьвәки дьлгәрм, сәва кӧ кәсед дьн бькарьбьн һеса аликʹарийе жь ԝи бьхԝазьн. Алан дәрһәԛа мәсәла Иса ӧса дьбежә: «Иса тʹӧ щар бәтал нәдьма, ле һьм щаһьл һьм кәсед әʹмьрда мәзьн ԝи һʹьз дькьрьн у һеса жь ԝи аликʹари дьхԝәстьн. Ԝана заньбу ԝәки әԝ бь рʹасти бона ԝан хәм дькә. Әз бь дьл у щан дьхԝазьм мина ԝи бьм, у хԝәстьна мьн әв ә ԝәки мәрьвед дьн мьн нас кьн ча мәрьвәки дьлгәрм, һʹәйф у хәмкʹеш».

16. Готьнед Зәбур 119:59, 60 ча дькарьн али мә бькьн, ԝәки чʹәʹв бьдьнә Иса?

¹⁶ Әм һәмьки нькарьн бь тʹәмами чʹәʹв бьдьнә Иса, ле сәва ве йәке әм гәрәке дьлтәнг нәбьн (Аԛуб 3:2). Шагьрт нькарә бь тʹәмами бьбә мина дәрсдаре хԝә. Ле диса жи әԝ дькарә чʹәʹв бьдә мәсәла дәрсдаре хԝә у жь шашийед хԝә дәрса һин бә. Бь ви щурʹәйи,  шагьрт ԝе гав бь гав пешда һәрʹә. Мина ве йәке, һәгәр әм чь жь Кʹьтеба Пироз һин дьбьн, дьдьнә хәбате, у чь жь дәсте мә те дькьн ԝәки кемасийед хԝә рʹаст кьн, әме бькарьбьн дьһа баш чʹәʹв бьдьнә Иса (Зәбур 119:59, 60 бьхунә).

17-18. Һәгәр әм чʹәʹв бьдьнә Иса у тʹьме һазьр бьн кӧ али мәрьва бькьн, әме чь кʹаре бьстиньн?

¹⁷ Гава әм тʹьме һазьр ьн ԛәнщийе бькьн, йед дьн жи ԝе чʹәʹв бьдьнә мә. Рʹуспики бь наве Тим ӧса дьбежә: «Һьнә хорт у щаһьлед мә пешда чунә у ча бәрдәстийед щьвате һатьнә кʹьфш кьрьне. Мәʹникә пешдачуйина ԝан әв бу, кӧ ԝана чʹәʹв дьда ԝан хушк-бьра, йед кӧ тʹьме һазьр ьн аликʹарийе бьдьн. Щәфа у шьхӧлед ԝан, бона щьвате у бона рʹуспийа, гәләк ԛимәт ә».

¹⁸ Һʹәчʹи зәʹф мәрьвед ве дьнйайе хԝәһʹьз ьн. Ле хьзмәткʹаред Йаһоԝа мина ԝан ниньн. Иса тʹьме һазьр бу али мәрьва бькә, у әԝ йәк дьле мә дьгьрә, ләма жи әм дьхԝазьн чʹәʹв бьдьнә ԝи. Әм һәмьки беԛьсур ниньн, ле диса жи әм дькарьн «пʹегәһа ԝида һәрʹьн» (1 Пәтрус 2:21). Һәгәр әм чь жь дәсте мә те бькьн ԝәки чʹәʹв бьдьнә Иса, Йаһоԝа ԝе жь мә рʹази бә, у дьле мә ԝе ша бә!