1. I meej kaay malengel mady baat ba Yehow biikal naam?

BIBL uleebel kal neey: baat ba Mawej ‘biiyiiy biikal ni cyuuy ciiciin’ mu kukadil Yehow mudimw ku bulombody bwa Mwaan indiy. (Mus. 110:3) Diiy dya buprofet eedy cyendend ni kukumban leeloow. Muvw woos oow, biin mudimw ba Yehow ba cisumy bahihitij diib divul mu mudimw a kudiil baat musah. Kabiin bakaam bwa biibafut bwa kulong mudimw oow, ki bamuloolong ku lukat lwa bab. Bangangat cikwaabw diib dya bab bwa kwambulwiish biin kwiitabij naabw bwa biit bidyobw naaby diikeng, kwiibakashish ku micim, ni kwiibambulwiish bwa bakashish diitabij dyaababw kudy Yehow. Bakul ni bakwanjok ba mudimw bahiihitij diib bwa kulongolol midimw yidyobw naay mu bisangil ni bwa kukumbul biin Krist naabw bwa kwiibakashish. I biny biibasaasak bwa kulong mudimw oow? I lukat​—Bwaal i bakat Yehow ni baat.​—Mat. 22:37-39.

2. Bilondeshel Rom 15:1-3, i cileejel kaay cyaakady Yeez mushiy?

² Yeez i mushiy cileejel cilengel hakuteek myand ya bakwaabw kuuhal kwa yindiy. Tuloolong mwiitut moos bwa kumufwaanok. (Bal Biin Rom 15:1-3.) Baat bamwiimwiidikij biiyiiy kuhet kis yivul. Yeez uleebel neey: “Waakaakishangan biit udy ni musangal muvul muhitok waakaakishobw.”​—Yil. 20:35.

3. I biny bitwiiyiiy kukontonon mu ciin bwaal eecy?

³ Mu ciin bwaal eecy, twiiyiiy kutal cikwaabw myand yilongel Yeez bwa kwambulwiishey baat ni twiiyiiy kukontonon mutudy mwa kwiidikij cileejel cindiy. Twiiyiiy kwiisamb cikwaabw mutudy mwa kwiikal ni lukat luvul bwa kukadil bakwaabw mudimw.

4. I mushind kaay waakady Yeez muteek myand ya baat kuuhal kwa yindiy?

⁴ Yeez waakady mwambulwiish bakwaabw ning hakadyey mukooy. Lang cyaakady Yeez mulong diib dyaakady baat bavul  beeh biiy ha mulund akadyey mushikacil, bimweek neey: haakady habwiiy ni Kafarnawum. Yeez uciishil bufuk butuutul ulomb teng kulomb. Waakady misang yikwaabw muman kukooy, ki hatadiley bisumbw bya baat umvwiil lus, bwaal mu baat aab mwaakady balam-lam ni baakady ni mabenj. Kaakadyoh bend mwiibondah ki waakady mwiibakashish hakwiibalongel miisamb ya hatook yaakadyobw kabay banj kumvwoh kacyah​—i bwiin kuleeb neey: Mwiisamb a ha Mulund.​—Luuk 6:12-20.

5. I mushind kaay udy bafumw ba cisak mwa kwiidikij dileejel cya Yeez ha kuleej lukat ning bab bakooy?

⁵ Mudy bafumw ba bisak mwa kwiidikij Yeez. Langil ha bwaal oobw: Kubulekel kwa diifuk baman kukal mudimw muvul, fumw a cisak ufiifik kwindiy mukooy woos. Misang yikwaabw i mukat bwa kwiimanyik kuhambidil kwa mu cisak kwa kawul aak, ki uloolomb Yehow bwa hamwaakish bukash bwa kulomboley dilong dya mu cisak eedy, Yehow waalaalabul kulomb kwindiy ni dilong dya mu cisak diloolongek teng bu haciibidil. Baan baheehet dilongweesh dya buseeb kawulaak, i bwiin kuleeb neey: bwa balel, myand ya mu spirit yangangat cyaab cya kuuhal mu shikacil aababw.

6. Twaal cileejel cya mwaakady Yeez mutwaal diib dindiy bwa kwambulwiishey bakwaabw.

⁶ Yeez waakady ukaam kuhitij diib divul ni bakwaabw ning haakadyey ukaam ciisang cya kwiikaley kaayend. Udy mwa kulang mwaakady Yeez mwiiyumvw hamanyikiley neey: mulund nend Jah Batist waakady muzuh hamukosweelobw mut eeny? Yeez waakady mwa kwiiyumvw bibiih menmen. Bibl uleeleeb neey: “Humvwiil Yeez musah mwiinoow [habitaatal lufw lwa Jah Batist], waalukil kwaakadyey aak waasambukil mu bwaat waay mu hat ha kaayend.” (Mat. 14:10-13) Tudy mwa kumvw bwabiny waakady ukaam kwiikal ha kaayend. Bavul ba kutudy i bakat kuleej kakunying hadyobw ha kaayaabw . Ki Yeez, kaakadyoh bend mukat kwiikal kaayend. Baat bavul beeh bakafik ha cyaab cyaakadyey uy kuuhal kwa yiy kay mwanj kufik. I biny bilongeley? Ulangil ha biit byaakady baat bavul beeh aab biikal naaby dikeng, ni i batadiley “lus lwaamukwaat.” Yeez utadil neey: baakady bakaam dyambulwiish ni busamby bya kudy Mawej, ki bwabingany Yeez utwaadijil musang umw kwiibambulwiish ni byaakadyobw bakaam. Nook, “utangil kwiibalongweesh [kiin myand yikeeh, ki] myand yivul”​—Mark 6:31-34; Luuk 9:10, 11.

7-8. Twaal cileejel cileeleej mudy bakul mwa kwiidikij Yeez hady muut ukaam dyambulwiish.

 ⁷ Mudy bakul ba lukat biidikij Yeez. Tufwiifwiijok bakul bwa mudimw a lukat udyobw bakal bwa kwiitukashish mu diitabij! Biin-kweet baan-balum ni baan-bakaj bavul mu cisumbw kabiin bamanyik midimw yoos yidyobw bakal. Cileejel, hadyok bwaal bwa kulong lwang-lwang butaatal londah, biin Komiteh Utaatalangan ni Bamingang bayaay lwang-lwang bwa kwambulwiish baan-baabw. Misang yivul myand ya kulong lwang-lwang eey yidyaakal teng yimweek mukacy mwa bufuk! Bu mudyobw ni micim yibiit mund bwa baan-baabw baan-balum ni baan-bakaj bady mu kakunying, bakul ba lukat aab haakaabumw ni bisak byaababw, bateeteek myand ya biin kwiitabij naabw kuuhal kwa yaababw.

⁸ Bakul bady mwa kwambulwiish cikwaabw mu midimw ya lwiibak lwa Mazubw ma Bukaleng ni mazubw makwaabw bu mudy ma biin-kweet ha cyaab cidy cihuh cilongek. Ni bakul ba mu cisumbw ciitut bahihitij cikwaabw meeb mavul ha kwiitulongesh, kwiitukashish ni ha kwiitwambulwiish. Biin-kweet baan-balum boos aab ni bisak byaababw i bakumbanyin kwiibeel lunganyingany ni lumbandy’aalw bwa byoos biloolongobw. Yehow iikal naab bwa meej malengel madyobw naam! Biin-biin, teng bu baat boos, bikaam bakul biikal ni kacy-kacy. Kabiin biikaam bakul biikal teng bahitij diib divul mu midimw ya cisumbw hakulek kutacil biin cisak cyaababw bwa bikaakaamobw.

9. Bikaam biin krist boos biikal ni meej kaay bilondeshel mukand a Biin Filipw 2:4, 5?

⁹ Bal Biin Filipw 2:4, 5. Kiin teng bakul, ki woos waakutudy udy mwa kwiidikij Yeez ha kuteet  myand ya bakwaabw kuuhal kwa yindiy. Bibl uleeleeb neey: wiiteekel mu ‘mulong a muhik.’ (Fili. 2:7) Lang bwa citudy mwa kulongel ku verseh oow. Muhik udy ni buseeb, eecy mwiin mudimw, ukaakaam mishind yidyey mwa kusangeej fumwend. Bu muwukaakadil Yehow mudimw ni baan-been, biin-biin ukaakaam kushaal cikwaabw ni buseeb buvul ku mees kwa Yehow ni kudy biin Krist neeb. Udy mwa kulong nook ha kukontonon myand yiloolond eey.

10. I majooj kaay matudy mwa kwiiyihanguj?

¹⁰ Kontonon meej miibuh. Iyihanguj majooj bu mudy miinaam: ‘I mushind kaay unady mwa kukal mudimw ni diikand dyaam bwa kwambulwiish bakwaabw? Cileejel, i biny binady mwa kulong bab balomb bwa kakumbul mwiin-kweet mwaan-mulum ukaady mukuluuh ha cyaab cidyobw bamondahil eecy kangat mwiin-kweet mwaan-mukaj ukaady mukuluuh bwa kuy nend mu bisangil? Nadyok habwiih bwa kuy kambulwiish hadyobw bakaam biin bukish bwa kalongolol cyaab cya ciwiil eecy bwa kulongolol Nzubw a Bukaleng eeny?’ Yehow udy ni musangal muvul hatutwaatwaal diib diitut ni biit biitut,​—ni mishind yikwaabw yitudy mwa kwambulwiish baat bakwaabw teng mutumulayil​—hatwaakady biilambul kudyey. Tut batal neey: kudy myand yikwaabw yitudy mwa kulongolol, i biny bitudy mwa kulong?

11. I mushind kaay udy diisambil mwa kwiitwambulwiish bwiitut kwiikal ni lukat bwa kwambulwiish bakwaabw?

¹¹ Lomb Yehow ni mucim aakaabumw. Lang ket neey: ukaakaam kwiitwaal bikasakan bwa kwambulwiish baat bakwaabw, ki kwiin umvw micim i kusak bwa kulong nook. Bib naak, lomb Yehow ni mucim aakaabumw. Iikal mwiin bujaalal. Ambil Yehow muwiiyumvumvw ni mulomb bwa hakwaakish “micim ya lukat ni bukash bwa kulong myand.”​—Fili. 2:13, NWT.

12. I mushind kaay udy basand baan-balum bakaady batambul mwa kwambulwiish bisumbw byaabab?

¹² Uw mwiikal ucidy sand, mwiin-kweet mwaan-mulum ukaady mutambul, lomb yehow bwa hakwambulwiish bwiibuh kwiikal ni mucim a lukat bwa kwambulwiish bikasakan biin-kweet baan-balum ni baan-bakaj mu cisumbw ciwudy. Mu bibunj bikwaabw, mudy bakul ni bakwanjok ba mudimw bavul, ni bavul ba ku bakwanjok ba mudimw aab, bakaady bakuluuh. Bu mudy bulongolody bwend buy kuuhal ni baat badyomw bend bavul, tukaakaam biin-kweet bavul baan-balum bacidy basand bwa kwambulwiish bakul mu mudimw udyobw bakal bwa kulam baat ba Yehow. Uw mukat kwambulwiish mu mudimw woos udyobw bakaam ku kwaakish, wiiyiiy kwiikal ni musangal. Bwabiny? Bwaal wiiyiiy kusangeej Yehow, ni cikwaabw wiiyiiy kwiikal ni lumw lulengel, ni wiiyiiy kwiikal ni musangal bwa mu waabambulwiish baat bakwaabw.

13-14. I biny bitudy mwa kulong bwa kwambulwiish baan-beet baan-balum ni baan-bakaj? (Tal cifwaatul cya ha cizubw.)

¹³ Kal mudimw ni mees bwa kujingunun bikaakaam bakwaabw. Mupostol Pool waakishil biin Krist biin Ebreh mubel oow: “Kanulong nwaavulaminok bwa kulong myand yilengel ni kukwanjanganok, bwaal i milambw ya nook yileelengeleel Mawej.” (Ebr. 13:16) Wiin oow waakady mubel a buseeb! Mafuk makeeh baman kuhet mukand oow, biin Krist baakady mu Yuudeh baakady mwa kushiy mazubw maabab, midimw yaabab, ni baan babw baakady kabay biin Krist bwa kuyobw ‘kasokotobw mu milund.’ (Mat. 24:16) Ciisang aacy, byaakady ni buseeb bwaabab kwambulwiishangan. Bwaal oobw, bub bwiikal ni buseeb buvul kudyobw, baakady mwa kukooyel mubel utwaadil Pool wa kwaabanyinanganobw byaakadyobw naaby, mubel oow, waakady mwa kwiibaheehedyel menmen bwa kwiibidilanganobw ni shikacil muhyaamuhy ha cyaab cyeeny.

¹⁴ Biin-kweet baan-balum ni baan-bakaj kabiin teng mwa kwiitwambil biit bikaakaamobw. Cileejel, mwiin-kweet mwaan-mukaj udy  mwa kufw, ni ushiy mbayend mu kakunying. Mwiin-kweet mwaan-mulum udy mwa kwiikalok ukaam bya kudy eeny, makut ma kufut naam njil (Transpoor) eecy bady mwa kumukwaajok bwa midimw ya ku cibel eeny? Kiin mwa kwiitulomb dyambulwiish bwaal kiish mukat bwa kwiitutacish mu meej. Ki udy mwa kwanyish bikasakan tut bihangadij bwa kumwaakish ciit cikaakaamey. Katwiin mwa kulang neey: muut mukwaabw wiiyiiy umwambulwiish eecy wiiyiiy teng kwiitwambil bikaakaamey. Hiyihanguj neey: ‘Mim mwiikal mu shikacil wa bwiin nook, i dyambulwiish kaay diikal baat mwa kuyaakish dinady mwa kwanyish?’

15. Bikaam tulong biny bwa kwambulwiish bakwaabw?

¹⁵ Iikal muut wa kukwaacil myand. Biin-biin, udyok mumanyik biin-kweet baan-balum ni baan-bakaj ba mu cisumbw ciwudy badyaakal ni cibidil cya kwambulwiish bakwaabw. Kabiin bakat bwa bumvw neey: twiibaloolongeesh myand ku makand bwa kwiitwambulwiish. Tudy bamanyik neey: biikaakal teng ni lukat lwa kwiitwambulwiish ni tudy bakat kwiikal teng bu bab! Alan, mukul udy ni mivw ihit a 40, i mukat kwiikal muut udy bakwaabw mwa kukwaacil myand. Halangiley a cileejel cya Yeez, Alan uleebel neey: “Yeez waakady ni bivul bya kulong, ki baat ba mivw yoos bafweejel kudyey kabay ni mooy ni baakady biyumvw bilengel haakadyobw bamulomb dyambulwiish. Bamutadil bu muut waakady wiibatacil. Nady mukat ni mucim woos bwa kwiikal ni meej bu ma Yeez, bwa baat bamanyik neey: nady muut udyobw mwa kukwaacil myand, mulund a baat ni wiibataatacil.”

16. I mushind kaay udy Musambw 119:59, 60 wiitwambulwiish bwa kwiidikij cileejel cya Yeez?

¹⁶ Kabiin bikaam tukooyel mu mabok mutudy katuy ni mushind a kwiidikij Yeez mu mushind muwaakan. (Jak 3:2) Mulony kiin muhitok mulongweesh indiy. Ki hady mulony ulongel ku bilem bindiy ni wiikashishomw bwa kulond cileejel  cya mulongweesh indiy mu mushind udyeby bikaam, wiiyiiy kuvudij diimany ni wiiy kweelekeen ni mulongweesh indiy. Bya mushind aakaabumw, tut tulong myand bilondeshel bitudy balong ku dyambulwiish dya kwiilongel kwiitut kwa Bibl, ni tulong mwiitut moos bwa kulongolol bilem bitudy mwa kwiikal naaby, tudy mwa kulond bilengel cileejel cidy Yeez mwiitushiil.​—Bal Musambw 119:59, 60.

17-18. Hatwiidiidikij lukat lwa Yeez bwa kwambulwiish bakwaabw, i musangal kaay utwiiyiiy kwiikal nend?

¹⁷ Tut tuleej lukat bwa kwambulwiish bakwaabw, biiyiiy kusak baat bakwaabw bwa kulongobw byaabw naak. Tim udy mukul uleeleeb neey: “Tudy ni biin-kweet baan-balum bacidy baasand bady bay kuuhal ni bashaal bakwanjok ba mudimw​—bamw hacyaakadyobw batofw menmen​—kamw ka kutumbingil kady neey: bwaal batadil mwaakady bakwaabw bakat kwambulwiishangan. Ni bakacil bwa kulond mu diikas dyaababw, baasand aab bambambulwiish cisumbw ciitut ni bakwaakwanjok bakul.”

¹⁸ Baat bavul ba mubulongolody oobw i biikat menmen. Ki baat ba Yehow i bashilangan naabw. Meej maakady naam Yeez ma kwambulwiish bakwaabw i mituteng, ni tudy biswiik bwa kulond cileejel cindiy. Tumanyik neey: katwiin mwa kulond mu diikas dindiy mu mushind muwaakan, ki tudy mwa “kulond mu diikas dindiy.” (1 Py. 2:21) Hatwiikaakashishomw bwa kulond meej ma bwiin ma Yeez, twiiyiiy kwiikal ni musangal bwaal tusasangeej Yehow.