1. Us fayn tin Jiova in pipul dɛn de du?

 DI BAYBUL bin dɔn tɔk se Gɔd in pipul dɛn “go gladi” fɔ sav Jiova as dɛn de fala wetin Jizɔs tɛl dɛn. (Sam 110:​3) Da prɔfɛsi de, de kam tru tide. Ɛni ia, Jiova in savant dɛn we gɛt zil de yuz bɔku pan dɛn tɛm fɔ du di prichin wok. Dɛn nɔ de pe dɛn fɔ du dis wok, dɛn de du am bikɔs dɛn want fɔ du am. Dɛn de yuz dɛn tɛm bak fɔ sɔpɔt dɛn brɔda dɛn wit di tin dɛn we dɛn nid, fɔ ɛnkɔrej dɛn, ɛn fɔ ɛp dɛn fɔ gɛt strɔng fet pan Jiova. Ɛlda ɛn ministerial savant dɛn de yuz bɔku pan dɛn tɛm fɔ pripia mitin pat dɛn ɛn fɔ go fɛn dɛn brɔda ɛn sista dɛn fɔ ɛnkɔrej dɛn. Wetin mek Jiova in pipul dɛn de du ɔl dis wok? Na bikɔs dɛn lɛk Jiova ɛn dɛn neba.—Mat. 22:​37-39.

2. Akɔdin to wetin de na Romans 15:​1-3, us ɛgzampul Jizɔs bin sɛt?

² Jizɔs bin sɛt fayn ɛgzampul fɔ put wetin ɔda pipul dɛn want bifo wetin i want. Wi de tray wi bɛst fɔ falamakata am. (Rid Romans 15:​1-3.) Di wan dɛn we de falamakata am go gɛt bɔku bɛnifit. Jizɔs bin se: “We pɔsin gi, i de gladi mɔ pas we dɛn gi am.”—Akt 20:​35.

3. Wetin wi go tɔk bɔt insay dis atikul?

³ Insay dis atikul, wi go tɔk bɔt sɔm pan di tin dɛn we Jizɔs bin du fɔ ɛp ɔda pipul dɛn ɛn wi go tɔk bɔt aw wi go falamakata in ɛgzampul. Wi go tɔk bak bɔt aw wi kin du mɔ fɔ ɛp ɔda pipul dɛn.

4. Aw Jizɔs bin put wetin ɔda pipul dɛn want bifo wetin i want?

⁴ Jizɔs bin de ɛp ɔda pipul dɛn pan ɔl we i bin taya. Tink bɔt wetin Jizɔs bin du we bɔku pipul dɛn bin kam to am we i bin de na wan mawntin; i go bi se na nia Kepanyɔm. Jizɔs bin dɔn pre ol nɛt. I go bi se i bin rili taya, bɔt we i si di bɔku pipul dɛn, i bin sɔri fɔ di po wan dɛn ɛn di wan dɛn we sik. I nɔ bin jɔs mɛn di po wan dɛn, bɔt i bin tich dɛn bak bɔku fayn fayn tin dɛn we bin rili ɛnkɔrej dɛn.—Lyuk 6:​12-20.

5. Aw di wan dɛn we de oba dɛn famili de falamakata Jizɔs in ɛgzampul fɔ sho lɔv pan ɔl we dɛn taya?

⁵ Aw di wan dɛn we de oba dɛn famili de falamakata Jizɔs? Tink bɔt dis ɛgzampul. Afta wan papa dɔn wok tranga wan ol de, i kam na os in taya taya wan. Pan ɔl we i nɔ go want mek dɛn du Famili Wɔship da ivintɛm de, i beg Jiova fɔ mek i gi am trɛnk fɔ kɔndɔkt di stɔdi. Jiova ansa in prea, ɛn dɛn ebul fɔ du dɛn Famili Wɔship lɛk aw dɛn kin du ɛvri wik. Di pikin dɛn lan wan impɔtant lɛsin da ivintɛm de se, fɔ dɛn mama ɛn papa, dɛn padi biznɛs wit Jiova impɔtant to dɛn pas ɛni ɔda tin.

6. Gi wan ɛgzampul bɔt aw Jizɔs bin yuz di tɛm we i fɔ yuz fɔ insɛf fɔ ɛp ɔda pipul dɛn.

⁶ Jizɔs bin de yuz in tɛm fɔ ɛp ɔda pipul dɛn pan ɔl we i bin nid fɔ de in wan. Yu ebul fɔ imajin aw Jizɔs bin fil we i no se dɛn dɔn kil in padi we na Jɔn we Bin De Baptayz Pipul Dɛn? Jizɔs in at go dɔn rili pwɛl. Di Baybul se: “We Jizɔs yɛri [bɔt Jɔn in day], i go insay bot ɛn go na wan ples usay pipul dɛn nɔ de, so dat i go de in wan.” (Mat. 14:​10-13) Wi kin ɔndastand wetin mek Jizɔs bin want fɔ de in wan. Sɔm pipul dɛn kin lɛk fɔ de dɛn wan we dɛn at pwɛl. Bɔt Jizɔs nɔ bin ebul fɔ de in wan. Bɔku pipul dɛn bin go na di ples bifo i de rich de. Wetin Jizɔs bin du? I bin tink bɔt  wetin di pipul dɛn nid, ɛn i “sɔri” fɔ dɛn. Jizɔs bin no se dɛn bin rili nid ɛp ɛn kɔrej frɔm Gɔd, so i bigin ɛp dɛn wantɛm wantɛm. Infakt, “i bigin fɔ tich dɛn bɔku tin.”—Mak 6:​31-34; Lyuk 9:​10, 11.

7-8. Gi wan ɛgzampul we de sho aw ɛlda dɛn de falamakata Jizɔs we pɔsin nid ɛp na di kɔngrigeshɔn.

⁷ Aw ɛlda dɛn de falamakata Jizɔs? Wi rili gladi fɔ di wok we wi ɛlda dɛn de du fɔ wi we de sho se dɛn nɔ jɔs bisin bɔt dɛnsɛf. Bɔku pan di brɔda ɛn sista dɛn we de na di kɔngrigeshɔn nɔ no ɔl di wok dɛn we dɛn de du. Fɔ ɛgzampul, we brɔda ɛn sista dɛn gɛt wɛlbɔdi prɔblɛm we dɛn nid fɔ atɛnd to kwik kwik wan, di brɔda dɛn we de na di Hospital Liaison Committee kin rɔsh fɔ ɛp dɛn brɔda ɛn sista dɛn. Bɔku tɛm, dɛn tin dɛn de kin apin midul nɛt. Bɔt bikɔs dɛn lɛk dɛn brɔda ɛn sista dɛn, di ɛlda dɛn wit dɛn famili de put wetin dɛn kɔmpin Kristian dɛn want bifo wetin dɛn want.

⁸ Ɛlda dɛn de ɛp bak wit di wok fɔ bil Kiŋdɔm Ɔl dɛn ɛn ɔda bildin dɛn, ɛn dɛn de ɛp wit di dizasta rilif wok. Ɛn di ɛlda dɛn na wi kɔngrigeshɔn kin yuz bɔku tɛm fɔ tich wi, fɔ ɛnkɔrej wi, ɛn fɔ sɔpɔt wi. Wi nid fɔ tɛl ɔl dɛn brɔda dɛn ya ɛn dɛn famili dɛn plɛnti tɛnki. Mek Jiova blɛs dɛn as dɛn de sho se dɛn gɛt gud kwaliti dɛn! Bɔt jɔs lɛk ɔlman, ɛlda dɛn nid fɔ tek tɛm mek dɛn nɔ du tin pasmak. Dɛn nɔ fɔ yuz ɔl dɛn tɛm fɔ du tin dɛn fɔ di kɔngrigeshɔn ɛn fɔgɛt fɔ kia fɔ dɛn famili.

9. Akɔdin to Filipians 2:​4, 5, us we Kristian dɛn fɔ tray fɔ tink?

⁹ Rid Filipians 2:​4, 5. Nɔto wi ɔl na ɛlda, bɔt wi ɔl kin lan fɔ bi lɛk Jizɔs ɛn put wetin ɔda pipul dɛn want bifo wetin wi want. Di Baybul tɔk se Jizɔs bin “tan lɛk slev.” (Fil. 2:​7) Tink bɔt wetin wi kin lan frɔm dat. Slev ɔ savant we gɛt valyu go luk fɔ we dɛn fɔ mek in masta gladi. Bikɔs wi na Jiova in slev dɛn ɛn wi de ɛp wi brɔda ɛn sista dɛn, dat de mek wi want fɔ mek Jiova ɛn wi brɔda ɛn sista dɛn yuz wi mɔ. Yu go du dat bay we yu tink bɔt di tin dɛn we wi de kam tɔk bɔt.

10. Us kwɛstyɔn dɛn wi fɔ aks wisɛf?

¹⁰ Tink bɔt di we aw yu de du tin. Aks yusɛf dɛn kwɛstyɔn dɛn ya: ‘A rɛdi fɔ yuz mi tɛm ɛn trɛnk fɔ ɛp ɔda pipul dɛn? Fɔ ɛgzampul, wetin a go du if dɛn aks mi fɔ go fɛn wan ol brɔda ɔ fɔ go wit wan ol sista na mitin? A kwik fɔ se a want fɔ ɛp we dɛn nid vɔlɔntia dɛn fɔ go klin di ples fɔ gɛt di kɔnvɛnshɔn ɔ fɔ kia fɔ di Kiŋdɔm Ɔl?’ We wi gi wi layf to Jiova, wi dɔn prɔmis am se wi go yuz ɔl wetin wi gɛt fɔ sav am. So i kin gladi we i de si wi de yuz wi tɛm, wi ɛnaji, ɛn wi prɔpati fɔ put wetin ɔda pipul dɛn want bifo wetin wi want. Wetin wi fɔ du if wi si se wi nid fɔ mek chenj dɛn?

11. Aw prea go ɛp wi fɔ put wetin ɔda pipul dɛn want bifo wetin wi want?

¹¹ Pre to Jiova wit ɔl yu at. Sɔntɛm yu si se chenj dɛn de we yu nid fɔ mek so dat yu go bi pɔsin we de put wetin ɔda pipul dɛn want bifo wetin yu want, bɔt yu nɔ fil fɔ du am. If na so i bi, pre to Jiova wit ɔl yu at. Tɛl am ɔltin. Tɛl Jiova aw yu de fil ɛn aks am fɔ gi yu wetin yu nid fɔ “mek [yu] want fɔ du sɔntin ɛn gi [yu] di pawa fɔ du am.”—Fil. 2:​13.

12. Wetin yɔŋ brɔda we dɔn baptayz go ebul fɔ du na in kɔngrigeshɔn?

¹² If yu na yɔŋ brɔda we dɔn baptayz, aks Jiova fɔ ɛp yu fɔ want fɔ du mɔ fɔ di brɔda ɛn sista dɛn na yu kɔngrigeshɔn. Insay sɔm kɔntri dɛn, di ɛlda dɛn bɔku pas di ministerial savant dɛn, ɛn bɔku pan di ministerial savant dɛn nɔ yɔŋ igen. As di ɔganayzeshɔn de gro, wi nid mɔ yɔŋ brɔda dɛn fɔ kia fɔ di brɔda ɛn sista dɛn na di kɔngrigeshɔn. If yu gri fɔ ɛp usay dɛn nid yu, dat go mek yu gladi. Wetin mek? Bikɔs yu go mek Jiova gladi, yu go gɛt gudnem, ɛn yu go fil fayn we yu no se yu de ɛp yu brɔda ɛn sista dɛn.

13-14. Wetin na di tin dɛn we wi go du fɔ ɛp wi brɔda ɛn sista dɛn? (Luk di pikchɔ na di frɔnt pej.)

¹³ Tray fɔ notis we ɔda pipul dɛn nid ɛp. Apɔsul Pɔl bin ɛnkɔrej di brɔda ɛn sista dɛn we bin de na Judia se: “Una nɔ fɔgɛt fɔ de du gud ɛn sheb wetin una gɛt wit ɔda pipul dɛn, bikɔs Gɔd rili lɛk dɛn kayn sakrifays dɛn de.” (Ibru. 13:​16) Dat na fayn advays! Shɔt tɛm afta di Kristian dɛn na Judia gɛt dis lɛta, dɛn bin nid fɔ lɛf dɛn os dɛn, dɛn biznɛs dɛn, ɛn dɛn fambul dɛn we nɔto Kristian fɔ “bigin rɔn go na di mawntin dɛn.” (Mat. 24:​16) Da tɛm de, wan dawt nɔ bin de se dɛn bin nid fɔ ɛp dɛn kɔmpin dɛn. If bifo dis tɛm dɛn bin dɔn de fala di advays we Pɔl bin gi dɛn fɔ sheb wetin dɛn gɛt wit dɛn kɔmpin dɛn, i fɔ bin izi fɔ mek dɛn kɔntinyu fɔ  du dat naw we dɛn nɔ gɛt bɛtɛ tin dɛn igen.

¹⁴ Nɔto ɔltɛm wi brɔda ɛn sista dɛn go mek wi no se dɛn nid sɔntin. Fɔ ɛgzampul, i go bi se wan sista dɔn day ɛn lɛf in man biɛn. Fɔ se wi brɔda nid ɛp wit tin fɔ it, transpɔt, ɔ fɔ du os wok? Sɔntɛm i nɔ go want fɔ tɛl wi se i nid ɛp bikɔs i nɔ want fɔ ambɔg wi. Bɔt i go rili gladi if wi ɛp am wit di tin dɛn we i nid ivin bifo i aks wi. Wi nɔ fɔ fil se ɔda pɔsin go ɛp am ɔ i go mek wi no ɛnitɛm we i nid wi fɔ ɛp am. Aks yusɛf, ‘If na bin mi, wetin a go want mek dɛn ɛp mi wit?’

15. Fɔ bi pɔsin we de put wetin ɔda pipul dɛn want bifo wetin wi want, wetin wi fɔ mekɔp wi maynd fɔ du?

¹⁵ Bi pɔsin we izi fɔ tɔk to. Wan dawt nɔ de se yu sabi brɔda ɛn sista dɛn na yu kɔngrigeshɔn we rɛdi fɔ ɛp ɔda pipul dɛn ɔltɛm. Dɛn nɔ de ɛva mek wi fil lɛk se wi de ambɔg dɛn. Wi no se dɛn go de de fɔ wi we wi nid ɛp, ɛn wi go want fɔ tan lɛk dɛn. Wan ɛlda we ol 45 ia, we nem Alan, want fɔ bi pɔsin we izi fɔ tɔk to. We i bin de tɔk bɔt Jizɔs in ɛgzampul, i tɔk se: “Jizɔs bin bizi, bɔt pan ɔl dat yɔŋ ɛn ol pipul dɛn bin lɛk am ɛn dɛn nɔ bin de fred fɔ aks am fɔ ɛp dɛn. Dɛn bin si am as pɔsin we rili bisin bɔt dɛn. A rili want fɔ falamakata Jizɔs in ɛgzampul, ɛn a want fɔ mek pipul dɛn sabi mi as pɔsin we izi fɔ tɔk to, we de sho se i lɛk ɔda pipul dɛn ɛn bisin bɔt dɛn.”

16. We wi de aplay Sam 119:​59, 60, aw dat go ɛp wi fɔ falamakata Jizɔs in ɛgzampul gud gud wan?

¹⁶ Wi at nɔ fɔ pwɛl if wi nɔ ebul fɔ falamakata Jizɔs in ɛgzampul pafɛkt  wan. (Jems 3:​2) Studɛnt nɔ go ebul fɔ falamakata di wok we in ticha de du pafɛkt wan. Bɔt we di studɛnt kɔntinyu fɔ lan frɔm di mistek dɛn we i de mek ɛn tray fɔ falamakata in ticha gud gud wan, dat go ɛp am fɔ kɔntinyu fɔ go bifo. Semweso, if wi aplay wetin wi de lan na wi pasɔnal Baybul stɔdi ɛn du wi bɛst fɔ kɔrɛkt di mistek dɛn we wi de mek, wi go ebul fɔ falamakata di ɛgzampul we Jizɔs sɛt fɔ wi.—Rid Sam 119:​59, 60.

17-18. Us bɛnifit dɛn wi go gɛt we wi falamakata Jizɔs fɔ put wetin ɔda pipul dɛn want bifo wetin wi want?

¹⁷ We wi de put wetin ɔda pipul dɛn want bifo wetin wi want, dat go mek ɔda pipul dɛn want fɔ du di sem tin. Wan ɛlda we nem Tim tɔk se: “Sɔm brɔda dɛn we rili yɔŋ dɔn bi ministerial savant. Wan rizin na bikɔs dɛn si aw ɔda brɔda dɛn bin want fɔ ɛp, ɛn dɛnsɛf bin want fɔ bi lɛk dɛn. We dɛn yɔŋ brɔda dɛn de nɔ de tink bɔt dɛnsɛf nɔmɔ, dɛn de ɛp di kɔngrigeshɔn ɛn gi di ɛlda dɛn mɔ sɔpɔt.”

¹⁸ Bɔku pipul dɛn na di wɔl tide jɔs bisin bɔt dɛnsɛf nɔmɔ. Bɔt Jiova in pipul dɛn nɔ de so atɔl. Wi lɛk wetin wi dɔn lan bɔt aw Jizɔs bin de put wetin ɔda pipul dɛn want bifo wetin i want, ɛn wi dɔn mekɔp wi maynd fɔ falamakata in ɛgzampul. Wi nɔ go ebul fɔ fala in futmak pafɛkt wan, bɔt wi go ebul fɔ “fala in futmak gud gud wan.” (1 Pit. 2:​21) As wi de tray tranga wan fɔ falamakata Jizɔs, wisɛf go gladi bikɔs wi de mek Jiova gladi.