တၢ်မၤလိ ၉
ကွၢ်လိမၤဒိးယ့ၣ်ၡူး ခီဖျိဟ့ၣ်လီၤသးလၢ ပှၤဂၤအဂီၢ်
“ဟ့ၣ်တၢ်န့ၣ် ဒုးအိၣ်ထီၣ် တၢ်သးခုအါန့ၢ်ဒံး ဒိးန့ၢ်ဘၣ်တၢ် တက့ၢ်လီၤ.”—မၤတၢ် ၂၀:၃၅.
တၢ်သးဝံၣ် ၁၇ “ယသးအိၣ်”
တၢ်မၤလိအံၤ အတၢ်တိာ်ပာ် *
၁. ယဟိဝၤယွၤ အခ့အပှၤတဖၣ် အိၣ်ဒီးတၢ်ပာ်သူၣ်ပာ်သး လၢအဂ့ၤဒ်လဲၣ်.
လံာ်စီဆှံ တဲဆိပာ်စၢၤဝဲလၢ ယဟိဝၤယွၤအ “ပှၤဂီၢ်မုၢ်ကဟ့ၣ်လီၤအသးလၢ တၢ်သးအိၣ်အပူၤ” လၢကမၤယွၤအတၢ်မၤ လၢယ့ၣ်ၡူး အတၢ်ဟံးစုနဲၣ်ကျဲအဖီလာ်လီၤ. (စံးထီၣ်ပတြၢၤ ၁၁၀:၃, ခ့ခါစှီၤကျိာ်) ဝံအတၢ်စံးပာ်အံၤ လၢထီၣ်ပှဲၤထီၣ်ဝဲလၢ မုၢ်မဆါတနံၤအံၤ သပှၢ်ကတၢၢ်လံ. တနံၣ်ဘၣ်တနံၣ်န့ၣ် ယဟိဝၤယွၤအခ့အပှၤလၢ အသူၣ်ဆူၣ်သးဆူၣ်တဖၣ်န့ၣ် စံၣ်တဲၤတဲလီၤတၢ် အနၣ်ရံၣ်အကကွဲၢ်လၢအကယၤ. အဝဲသ့ၣ် မၤဝဲဒ်အံၤလၢ မုာ်သးမၤကလီ ဒီးတဒိးန့ၢ်ဘၣ်ဝဲ အဘူးအလဲဘၣ်. ဒီးအဝဲသ့ၣ် ဟ့ၣ်လီၤတၢ်ဆၢကတီၢ်လၢ ကမၤစၢၤဝဲ ဒီပုၢ်ဝဲၢ်မုၣ်ခွါတဖၣ်လၢ နီၢ်ခိ, နီၢ်သး ဒီးလၢသးအတၢ်တူၢ်ဘၣ်တကပၤ စ့ၢ်ကီးလီၤ. ဒီးဒီပုၢ်ဝဲၢ်ခွါလၢ အဘၣ်တၢ်ဃုထၢထီၣ်အီၤတဖၣ်န့ၣ် သူဝဲအတၢ်ဆၢကတီၢ်အါမးလၢ ကကတဲာ်ကတီၤအသးလၢ တၢ်အိၣ်ဖှိၣ်ရိဖှိၣ်အဂီၢ် ဒီးကလဲၤဟးအိၣ်သကိးဝဲ တၢ်အိၣ်ဖှိၣ်ဖိအဂီၢ်လီၤ. ပဒီပုၢ်ဝဲၢ်မုၣ်ခွါတဖၣ်အံၤန့ၣ် မ့ၢ်လၢအဝဲသ့ၣ် အဲၣ်ယဟိဝၤယွၤ ဒီးပှၤလၢအဃၢၤအဃိ မၤဝဲဒ်အံၤလီၤ.—မးသဲ ၂၂:၃၇-၃၉.
၂. ဒ် ရိမ့ၤ ၁၅:၁-၃ ပာ်ဖျါထီၣ်ဝဲအသိး ယ့ၣ်ၡူး ပာ်လီၤဒိဂ့ၤတဲာ်ဘၣ်ဒ်လဲၣ်.
၂ ယ့ၣ်ၡူး ပာ်လီၤတၢ်ဒိဂ့ၤတဲာ်ဘၣ် လၢပဂီၢ်ခီဖျိ ပာ်ဆိပှၤဂၤအတၢ်လိၣ်ဘၣ်လၢညါ. အဃိ ပဂုာ်ကျဲးစၢး ယီၢ်ယ့ၣ်ၡူးအခီၣ်လီၢ်လီၤ. (ဖး ရိမ့ၤ ၁၅:၁-၃.) ပမ့ၢ်ကွၢ်လိမၤဒိး ယ့ၣ်ၡူးန့ၣ် ပကဒိးန့ၢ်ဘၣ်အဘျုး. ယ့ၣ်ၡူးတဲဝဲလၢ “ဟ့ၣ်တၢ်န့ၣ် ဒုးအိၣ်ထီၣ် တၢ်သးခုအါန့ၢ်ဒံး ဒိးန့ၢ်ဘၣ်တၢ် တက့ၢ်လီၤ.”—မၤတၢ် ၂၀:၃၅.
၃. လၢတၢ်မၤလိအံၤအပူၤ ပကတဲသကိး တၢ်ဂ့ၢ်မနုၤလဲၣ်.
၃ လၢတၢ်မၤလိအံၤအပူၤ ပကတဲသကိး ဘၣ်ဃးဒီး ယ့ၣ်ၡူးတူၢ်ဆါအသး လၢကမၤစၢၤပှၤဂၤအဂီၢ်ဒ်လဲၣ်. ဒီးပကွၢ်လိမၤဒိးအီၤ ကသ့ဒ်လဲၣ်. တကးဒံးဘၣ် ပကတဲသကိး ဒ်သိး ပကသးအိၣ်မၤစၢၤအါထီၣ် ပှၤဂၤအဂီၢ် ပကဘၣ်မၤဒ်လဲၣ်.
ကွၢ်လိမၤဒိး ယ့ၣ်ၡူးအဒိအတဲာ်
ဖဲယ့ၣ်ၡူး လီၤဘှံးလီၤတီၤ ဒီးပှၤဂီၢ်မုၢ် ဟဲလၢအအိၣ်အခါ အမၤဝဲဒ်လဲၣ် (ကွၢ်လံာ်အဆၢ ၄)
၄. ယ့ၣ်ၡူးပာ်ဆိ ပှၤဂၤအတၢ်လိၣ်ဘၣ် လၢညါဒ်လဲၣ်.
၄ ဖဲယ့ၣ်ၡူးလီၤဘှံးအခါဒၣ်လဲာ် အမၤစၢၤပှၤဂၤ. ပကဆိကမိၣ်ကွၢ် ဘၣ်တဘျီ ဖဲပှၤဂီၢ်မုၢ်တဖၣ် ဟဲလၢယ့ၣ်ၡူးအအိၣ် လၢကစၢၢ်ခီၣ်ထံးအခါ. တၢ်လီၢ်တတီၤအံၤန့ၣ် လီၤဂာ်လၢအအိၣ်ဘူးဒီး ဝ့ၢ်ကပ့းရနီၣ်. ယ့ၣ်ၡူးဃ့ဘါထုကဖၣ်တၢ် ဒီတနၤကျၢၤအဃိ ကလီၤဘှံးလီၤတီၤဒိၣ်မး. ဘၣ်ဆၣ် ဖဲအထံၣ်ဘၣ် ပှၤဂီၢ်မုၢ်, ပှၤဖှီၣ်ဖိယာ်ဖိ ဒီးပှၤလၢအအိၣ်တဆူၣ်ဘၣ်အခါ အသးကညီၤဘၣ် အဝဲသ့ၣ်. အဃိ ယ့ၣ်ၡူးမၤဘျါက့ၤ အဝဲသ့ၣ် အတၢ်ဆူးတၢ်ဆါ ဒီးဟ့ၣ်တၢ်စံၣ်တဲၤတဲလီၤတခါ လၢကထိၣ်ဟူးထိၣ်ဂဲၤထီၣ် အဝဲသ့ၣ်. တၢ်စံၣ်တဲၤတဲလီၤတခါအံၤ ပှၤသ့ၣ်ညါအီၤလၢ တၢ်စံၣ်တဲၤတဲလီၤလၢ တၢ်လူၢ်ခိၣ်လီၤ.—လူၤကၣ် ၆:၁၂-၂၀.
ပကွၢ်လိမၤဒိး ယ့ၣ်ၡူးအတၢ်တူၢ်ဆါသး ကသ့လၢကျဲဒ်လဲၣ် (ကွၢ်လံာ်အဆၢ ၅)
၅. ဟံၣ်ခိၣ်တဖၣ်န့ၣ် ဖဲအဝဲသ့ၣ် လီၤဘှံးအခါ ကွၢ်လိမၤဒိး ယ့ၣ်ၡူးအဒိအတဲာ် ကသ့ဒ်လဲၣ်.
၅ ဟံၣ်ခိၣ်တဖၣ် ကွၢ်လိမၤဒိးယ့ၣ်ၡူး ကသ့ဒ်လဲၣ်. ပကဆိကမိၣ်ကွၢ် တၢ်အဒိတခါ. ဟံၣ်ခိၣ်တဂၤ မၤတၢ်ဒီနံၤကျၢၤ ဒီးဖဲအဟဲက့ၤလၢဟံၣ်အခါ လီၤဘှံးလီၤတီၤ. ဒီးဘၣ်လၢ အကဘၣ်မၤဝဲ ဟံၣ်ဖိဃီဖိတၢ်မၤလိလံာ်စီဆှံ အမုၢ်နံၤ ဘၣ်ဆၣ် အဝဲတအဲၣ်ဒိးမၤဝဲလၢၤဘၣ်. သနာ်က့ အဝဲဃ့ဘါထုကဖၣ်လၢ ယဟိဝၤယွၤအအိၣ် ဒ်သိးအကအိၣ်ဒီး တၢ်ဂံၢ်တၢ်ဘါလၢ ကမၤဝဲ ဟံၣ်ဖိဃီဖိ တၢ်မၤလိလံာ်စီဆှံအဂီၢ်. ဒီးယဟိဝၤယွၤ စံးဆၢအတၢ်ထုကဖၣ်အဃိ အမၤဝဲဟံၣ်ဖိဃီဖိ တၢ်မၤလိလံာ်စီဆှံ ဒ်အမၤညီနုၢ်ဝဲအသိးလီၤ. အဃိ ဖဲတၢ်တဟါန့ၣ် အဖိတဖၣ် သ့ၣ်ညါဘၣ်ဝဲလၢ အမိၢ်အပၢ်တဖၣ်န့ၣ် ပာ်ဆိဝဲ နီၢ်သးအတၢ်ဖံးတၢ်မၤ လၢညါလီၤ.
၆. ဖဲယ့ၣ်ၡူးလိၣ်ဘၣ် တၢ်ဆၢကတီၢ်လၢ ကအိၣ်ထဲတဂၤအခါဒၣ်လဲာ် မၤစၢၤပှၤဂၤဒ်လဲၣ်.
၆ ဖဲယ့ၣ်ၡူးလိၣ်ဘၣ် တၢ်ဆၢကတီၢ်လၢ ကအိၣ်ဝဲတဂၤအခါဒၣ်လဲာ် အဝဲမၤစၢၤပှၤဂၤဒံး. ဆိကမိၣ်ကွၢ် ဖဲယ့ၣ်ၡူးနၢ်ဟူဝဲလၢ ပှၤဒီၣ်တဲာ်ကွံာ် ပှၤဘျၢတၢ်စီၤယိၤဟၣ်အခိၣ်အခါ ယ့ၣ်ၡူးကတူၢ်ဘၣ်ဝဲဒ်လဲၣ်. ယ့ၣ်ၡူးအသး ကဘၣ်ဒိဒိၣ်မး. လံာ်စီဆှံတဲဝဲလၢ “ဖဲယ့ၣ်ၡူး နၢ်ဟူဝဲ [စီၤယိၤဟၣ်သံ] အခါ အဝဲဒိးထီၣ်ကဘီ ဒီးလဲၤဝဲဆူ တၢ်လီၢ်လၢ ပှၤတအိၣ် နီတဂၤဘၣ်အလီၢ် ဒ်သိး ကအိၣ်ဝဲထဲတဂၤ ဖဲန့ၣ်လီၤ.” (မးသဲ ၁၄:၁၀-၁၃) မ့ၢ်လၢယ့ၣ်ၡူး အသးဘၣ်ဒိဝဲအဃိ အကအဲၣ်ဒိး အိၣ်ထဲတဂၤဧိၤလီၤ. မ့မ့ၢ်ပှၤနာ်က့ ပကအဲၣ်ဒိး အိၣ်ထဲတဂၤလီၤ. ဘၣ်ဆၣ် ယ့ၣ်ၡူးအိၣ်ထဲတဂၤဧိၤ တသ့ဘၣ်, မ့ၢ်လၢ ပှၤဂီၢ်မုၢ်တဖၣ် လဲၤခိးသရီာ်ဆိအခိၣ်လၢ တၢ်လီၢ်လၢ အကလဲၤဝဲလီၤ. အဃိ ယ့ၣ်ၡူးမၤဝဲဒ်လဲၣ်. ယ့ၣ်ၡူးဆိကမိၣ်ဘၣ်ဝဲ ပှၤဂီၢ်မုၢ်တဖၣ် အတၢ်လိၣ်ဘၣ်ဒီး “သးကညီၤဘၣ် အဝဲသ့ၣ်လီၤ.” ယ့ၣ်ၡူးထံၣ်ဘၣ်ဝဲလၢ အဝဲသ့ၣ်လိၣ်ဘၣ် နီၢ်သးအတၢ်ဂံၢ်တၢ်ဘါ ဒီးအဲၣ်ဒိးမၤစၢၤ အဝဲသ့ၣ် တဘျီဃီလီၤ. ဒီးယ့ၣ်ၡူး “သိၣ်လိအဝဲသ့ၣ် တၢ်ဂ့ၢ်အါမံၤလီၤ.”—မၢ်ကူး ၆:၃၁-၃၄; လူၤကၣ် ၉:၁၀, ၁၁.
၇-၈. ဖဲပှၤလၢ ပတၢ်အိၣ်ဖှိၣ်ပူၤတဂၤဂၤ လိၣ်ဘၣ်တၢ်မၤစၢၤအခါ ပတၢ်အိၣ်ဖှိၣ်သးပှၢ် လၢအအိၣ်ဒီးတၢ်အဲၣ်တၢ်ကွံတဖၣ်န့ၣ် ကွၢ်လိမၤဒိးဝဲ ယ့ၣ်ၡူးဒ်လဲၣ်, ဟ့ၣ်တၢ်အဒိတက့ၢ်.
၇ တၢ်အိၣ်ဖှိၣ်သးပှၢ် လၢအအိၣ်ဒီး တၢ်အဲၣ်တၢ်ကွံတဖၣ် ကွၢ်လိမၤဒိးယ့ၣ်ၡူး. တၢ်အိၣ်ဖှိၣ်သးပှၢ်တဖၣ် ဟ့ၣ်လီၤအသးလၢပဂီၢ် အဃိ ပပာ်လုၢ်ပာ်ပှ့ၤ အဝဲသ့ၣ်အတၢ်မၤဒိၣ်မး. တၢ်လၢအဝဲသ့ၣ် မၤဝဲအါတက့ၢ်န့ၣ် ဒီပုၢ်ဝဲၢ်မုၣ်ခွါလၢ တၢ်အိၣ်ဖှိၣ်ပူၤတဖၣ် တသ့ၣ်ညါဝဲဘၣ်. အဒိ, ဖဲဂ့ၢ်ဂီၢ်အူ (emergency) မ့ၢ်ကဲထီၣ်လၢ တၢ်အိၣ်ဆူၣ်အိၣ်ချ့တကပၤန့ၣ် ဒီပုၢ်ဝဲၢ်လၢ အမၤတၢ်လၢ ကမံးတံာ်လၢ အဆဲးကျိးဒီး တၢ်ဆါဟံၣ်န့ၣ် ဟဲမၤစၢၤဝဲ ဒီပုၢ်ဝဲၢ်မုၣ်ခွါ လၢအဆိအချ့လီၤ. အါဘျီန့ၣ် ဂ့ၢ်ဂီၢ်အူ တၢ်ဂ့ၢ်သ့ၣ်တဖၣ်အံၤ ကဲထီၣ်အသးလၢ မုၢ်နၤခီ. ပတၢ်အိၣ်ဖှိၣ်သးပှၢ်တဖၣ်အံၤ ဃုာ်ဒီးအဝဲသ့ၣ် အဟံၣ်ဖိဃီဖိန့ၣ် သးကညီၤဘၣ်ဝဲ ဒီပုၢ်ဝဲၢ်မုၣ်ခွါလၢ အထံၣ်ဘၣ်ဒီး တၢ်ကီတၢ်ခဲတဖၣ်အံၤ အဃိ အဝဲသ့ၣ် ပာ်ဆိဝဲ ဒီပုၢ်ဝဲၢ်မုၣ်ခွါတဖၣ်အံၤ အတၢ်လိၣ်ဘၣ်လၢညါ.
၈ တကးဒံးဘၣ် တၢ်အိၣ်ဖှိၣ်သးပှၢ်တဖၣ် မၤစၢၤတၢ်လၢ တၢ်သူၣ်ထီၣ်ဘှီထီၣ် ဘီမုၢ်ဘျီၣ်ဒိၣ် ဒီးတၢ်သူၣ်ထီၣ်လၢအဂၤတဖၣ် ဒီးမၤစၢၤစ့ၢ်ကီးတၢ်လၢ န့ဆၢၣ်တၢ်ဘၣ်ဒိဘၣ်ထံး ကဲထီၣ်အသးအခါလီၤ. ဒီးပတၢ်အိၣ်ဖှိၣ်သးပှၢ် လၢပတၢ်အိၣ်ဖှိၣ်ပူၤတဖၣ်စ့ၢ်ကီး ဟ့ၣ်လီၤတၢ်ဆၢကတီၢ် အါမးလၢ ကသိၣ်လိပှၤ, ဟ့ၣ်ဂံၢ်ဟ့ၣ်ဘါပှၤ ဒီးမၤစၢၤပှၤလီၤ. တၢ်အိၣ်ဖှိၣ်သးပှၢ်တဖၣ်အံၤ ဒီးအဟံၣ်ဖိဃီဖိန့ၣ် ကြၢးဒိးန့ၢ်ဘၣ်ဝဲ ပတၢ်စံးပတြၢၤ အဝဲသ့ၣ်နီၢ်နီၢ်. ပဆၢမုၢ်လၢ်လၢ ယဟိဝၤယွၤ ကဆိၣ်ဂ့ၤ အဝဲသ့ၣ် အတၢ်ဟ့ၣ်လီၤသးအံၤ. ဘၣ်ဆၣ် အဝဲသ့ၣ် တဘၣ်မၤကစၢ်ယွၤ အတၢ်မၤအါတလၢ တုၤဒၣ်လဲာ် အကွၢ်ထွဲ အဟံၣ်ဖိဃီဖိ တၢ်လိၣ်ဘၣ် တချုးလၢၤဘၣ်န့ၣ်ဘၣ်. အဃိ အဝဲသ့ၣ် ကဘၣ်ဟ့ၣ်တၢ်ဆၢကတီၢ် တခါလၢအလီၢ်ဒၣ်ဝဲ ဖဲအကြၢးအဘၣ်လီၤ.
ဒ်သိး ပကသးအိၣ်မၤစၢၤအါထီၣ် ပှၤဂၤအဂီၢ် ပကဘၣ်မၤဒ်လဲၣ်
၉. ဒ် ဖံလံးပံၤ ၂:၄, ၅ ပာ်ဖျါဝဲအသိး ခရံာ်ဖိတဖၣ် ကဘၣ်အိၣ်ဒီး တၢ်ပာ်သူၣ်ပာ်သးဒ်လဲၣ်.
၉ ဖး ဖံလံးပံၤ ၂:၄, ၅. ပဝဲကိးဂၤဒဲးန့ၣ် ပတကဲ တၢ်အိၣ်ဖှိၣ်သးပှၢ်ဘၣ်. ဘၣ်ဆၣ် ပကွၢ်လိမၤဒိး ယ့ၣ်ၡူးအတၢ်သးအိၣ်ဟ့ၣ်လီၤသးသ့. လံာ်စီဆှံ တဲဝဲလၢ ယ့ၣ်ၡူး “ဟံးထီၣ်ဝဲ ကုၢ်အက့ၢ်အဂီၤ” လီၤ. (ဖံလံးပံၤ ၂:၇) ပကဆိကမိၣ်ကွၢ် ပန့ၢ်ဘၣ် တၢ်မၤလိလၢ လံာ်စီဆှံတဆၢအံၤဒ်လဲၣ်. မ့ၢ်လၢ ပကဲယဟိဝၤယွၤ အခ့အပှၤ ဒီးပကဲပှၤမၤစၢၤ ပဒီပုၢ်ဝဲၢ်မုၣ်ခွါတဖၣ်အဃိ ပအဲၣ်ဒိး မၤတၢ်လၢယဟိဝၤယွၤ ဒီးပဒီပုၢ်ဝဲၢ်မုၣ်ခွါတဖၣ်အဂီၢ် အါန့ၢ်အလီၢ်. ပမၤအီၤကသ့ဒ်လဲၣ်န့ၣ် ပကဆဲးကွၢ်သကိးအီၤလီၤ.
၁၀. ပကဘၣ်သံကွၢ်လီၤပသး ဒ်လဲၣ်.
၁၀ နတၢ်ပာ်သူၣ်ပာ်သး အိၣ်ဒ်လဲၣ်န့ၣ် သမံသမိးလီၤက့ၤနသး. သံကွၢ်လီၤနသးလၢ ‘ယသးအိၣ်တူၢ်ဆါသးလၢ ယကမၤစၢၤပှၤဂၤအဂီၢ် ထဲလဲၣ်. အဒိ, ပှၤမ့ၢ်မၢ ယလဲၤအိၣ်သကိး ဒီပုၢ်ဝဲၢ်လၢအသးပှၢ် မ့တမ့ၢ် ပှၤမ့ၢ်မၢ ယလဲၤအိၣ် ဒီပုၢ်ဝဲၢ်မုၣ်သးပှၢ် လၢကဟဲထီၣ် တၢ်အိၣ်ဖှိၣ်အဂီၢ်န့ၣ် မ့ၢ်ယမၤဒ်လဲၣ်, ဖဲပှၤသံကွၢ်ယၤလၢ ယကလဲၤမၤကဆှဲကဆှီ တၢ်အိၣ်ဖှိၣ်ဖးဒိၣ်အလီၢ် မ့တမ့ၢ် ဘီမုၢ်ဘျီၣ်ဒိၣ်အခါ မ့ၢ်ယမၤဒ်လဲၣ်.’ ဖဲပကဟ့ၣ်လုၢ်ထီၣ်ပသး လၢယဟိဝၤယွၤအအိၣ်အခါ မ့ၢ်ဝဲ ပအၢၣ်လီၤအီၤလၢ ပကသူ တၢ်လၢအအိၣ်ဒီးပှၤခဲလၢာ်လၢ ပကမၤအတၢ်. ကစၢ်ယွၤအဲၣ်ဒိးလၢ ပကသူ ပတၢ်ဆၢကတီၢ်, ပတၢ်ဂံၢ်တၢ်ဘါ ဒီးတၢ်စုလီၢ်ခီၣ်ခိၣ် လၢပကမၤစၢၤပှၤဂၤ. ဖဲအဝဲထံၣ်လၢ ပဟ့ၣ်လီၤပသး ဒ်န့ၣ်အခါ အသးခုဒိၣ်မး. ဒီးပမ့ၢ်သ့ၣ်ညါ လၢပကဘၣ် မၤဂ့ၤထီၣ်ပသးန့ၣ် ပကဘၣ်မၤဒ်လဲၣ်.
၁၁. ဒ်သိး ပကသးအိၣ် မၤစၢၤအါထီၣ် ပှၤဂၤအဂီၢ် တၢ်ဃ့ထုကဖၣ် မၤစၢၤပှၤ ကသ့ဒ်လဲၣ်.
၁၁ ဃ့ထုကဖၣ် လၢယဟိဝၤယွၤအအိၣ် လၢတၢ်သူၣ်ဆူၣ်သးဆူၣ်အပူၤ. ဘၣ်သ့ၣ်သ့ၣ် နကသ့ၣ်ညါလၢ နကဘၣ် မၤဂ့ၤထီၣ်နသး အိၣ်တနီၤ, ဘၣ်ဆၣ် နတအဲၣ်ဒိးမၤဘၣ်. ဖဲန့ၣ်အခါ ဃ့ထုကဖၣ်လၢ ယဟိဝၤယွၤအအိၣ် လၢတၢ်သူၣ်ဆူၣ်သးဆူၣ်, တဲတၢ်ဒီးအီၤတီတီ ဒီးဃ့အီၤလၢ အကဟ့ၣ်နၤ ‘တၢ်သူၣ်အိၣ် သးအိၣ်တၢ် ဒီးတၢ်ဂံၢ်တၢ်ဘါလၢ နကမၤတၢ်အဂီၢ်’ တက့ၢ်.—ဖံလံးပံၤ ၂:၁၃.
၁၂. ဒီပုၢ်ဝဲၢ်ခွါသးစၢ် လၢအဒိးဘျၢထံဝံၤတဖၣ် မၤစၢၤတၢ်လၢ အတၢ်အိၣ်ဖှိၣ်ပူၤ ကသ့ဒ်လဲၣ်.
၁၂ နမ့မ့ၢ် ဒီပုၢ်ဝဲၢ်ခွါ သးစၢ်လၢ အဒိးဘျၢထံဝံၤန့ၣ် ဃ့ယဟိဝၤယွၤ တၢ်မၤစၢၤ ဒ်သိး နကသးအိၣ်မၤစၢၤအါထီၣ် ဒီပုၢ်ဝဲၢ်မုၣ်ခွါ လၢတၢ်အိၣ်ဖှိၣ်ပူၤအဂီၢ်. လၢထံကီၢ် တနီၤနီၤန့ၣ် တၢ်အိၣ်ဖှိၣ်သးပှၢ် အိၣ်အါန့ၢ်ဒံး တၢ်အိၣ်ဖှိၣ် အပှၤမၤစၢၤတၢ်တဖၣ်လီၤ. တၢ်အိၣ်ဖှိၣ် အပှၤမၤစၢၤတၢ်အါဂၤန့ၣ် အညါအိၣ်ထီၣ်တစဲး မ့တမ့ၢ် အညါပှၢ်ထီၣ်လံ. မ့ၢ်လၢ ပတၢ်ကရၢကရိ ဒိၣ်ထီၣ်ဝဲကွ့ၢ်ကွ့ၢ်အဃိ ပလိၣ်ဘၣ်အါထီၣ် ဒီပုၢ်ဝဲၢ်ခွါသးစၢ်တဖၣ် ဒ်သိး ကမၤစၢၤဝဲ တၢ်အိၣ်ဖှိၣ်သးပှၢ်တဖၣ် လၢကကွၢ်ထွဲဝဲ ဒီပုၢ်ဝဲၢ်မုၣ်ခွါတဖၣ် လၢတၢ်အိၣ်ဖှိၣ်ပူၤအဂီၢ်. ဖဲပှၤလိၣ်ဘၣ်နၤ လၢကျဲတဘိဂ့ၤတဘိဂ့ၤအခါ နမ့ၢ်သးအိၣ် ဟ့ၣ်လီၤသးန့ၣ် နကသးခုလီၤ. ဘၣ်မနုၤအဃိလဲၣ်. မ့ၢ်လၢနမၤသးခု ယဟိဝၤယွၤအသးအဃိ နကဒိးန့ၢ်ဘၣ် မံၤဂ့ၤသၣ်ဂ့ၤ ဒီးတၢ်သူၣ်မံသးမုာ် ခီဖျိ နမၤစၢၤပှၤဂၤအဃိလီၤ.
ခရံာ်ဖိလၢ ယူဒၤတဖၣ် ခီဂာ်ဝဲထံကျိယၢ်ဒ့ၣ်ဝံၤ လဲၤဃ့ၢ်ဆူ ဝ့ၢ်ဖဲလး. ပှၤလၢအလဲၤတုၤဆိ ဖဲန့ၣ်တဖၣ် နီၤလီၤန့ၢ်ဝဲ ဒီပုၢ်ဝဲၢ်လၢ အဟဲတုၤသီသီတဖၣ်တၢ်အီၣ် (ကွၢ်လံာ်အဆၢ ၁၃)
၁၃-၁၄. ပမၤစၢၤ ပဒီပုၢ်ဝဲၢ်မုၣ်ခွါတဖၣ် ကသ့ဒ်လဲၣ်. (ကွၢ်တၢ်ဂီၤ လၢလံာ်ကုခိၣ်.)
၁၃ ပာ်သူၣ်ပာ်သး ဒ်သိးနကသ့ၣ်ညါ ဖဲပှၤလိၣ်ဘၣ် တၢ်မၤစၢၤအခါ. တၢ်မၢဖိပီလူးတဲဘၣ် ခရံာ်ဖိလၢအအိၣ်လၢ ယူၤဒၣ်တဖၣ်လၢ “တဘၣ်သးပ့ၤနီၣ် မၤတၢ်ဂ့ၤ ဒီးတဘၣ်သးပ့ၤနီၣ် ဟ့ၣ်နီၤလီၤပှၤဂၤလၢ တၢ်လၢအအိၣ်ဒီးနၤန့ၣ်တဂ့ၤ. ကစၢ်ယွၤ ဘၣ်သူၣ်ဘၣ်သးဝဲ တၢ်လုၢ်ဒ်အံၤတဖၣ်ဒိၣ်မးလီၤ.” (ဧ့ၤဘြံၤ ၁၃:၁၆) စီၤပီလူး အတၢ်ဟ့ၣ်ကူၣ်ဟ့ၣ်ဖးအံၤန့ၣ် ဂ့ၤဒိၣ်မး. ဖဲခရံာ်ဖိလၢ ယူၤဒၤတဖၣ် ဒိးန့ၢ်ဘၣ်ဝဲ စီၤပီလူး အလံာ်ပရၢအံၤ တယံာ်ဘၣ်ဒီး အဝဲသ့ၣ် ဘၣ်ပာ်တ့ၢ်ကွံာ်ဝဲ အဟံၣ်အဃီ, အတၢ်ဖံးတၢ်မၤ ဒီးအဘူးအတံၢ် လၢအတမ့ၢ် ခရံာ်ဖိတဖၣ်. ဒီးအဝဲသ့ၣ်ဘၣ် “လဲၤဃ့ၢ်ထီၣ်လၢ ကစၢၢ်ကလိအကျါ” လီၤ. (မးသဲ ၂၄:၁၆) ဖဲန့ၣ်အဆၢကတီၢ် အရ့ဒိၣ်ဒိၣ်မးလၢ အဝဲသ့ၣ် ကမၤစၢၤလိာ်သး တဂၤဒီးတဂၤ. လၢအပူၤကွံာ် ပှၤလၢအမၤထွဲ စီၤပီလူးအတၢ်ဟ့ၣ်ကူၣ် ခီဖျိလၢ အမၤစၢၤလိာ်သး တဂၤဒီးတဂၤန့ၣ် ဖဲအဝဲသ့ၣ် လဲၤတုၤလၢ တၢ်လီၢ်အသီ ဒီးကဘၣ်စးထီၣ် တၢ်အိၣ်မူလၢအသီအခါ ကညီလၢ အဝဲသ့ၣ်အဂီၢ်လီၤ.
၁၄ ပဒီပုၢ်ဝဲၢ်မုၣ်ခွါတဖၣ်န့ၣ် ဘၣ်သ့ၣ်သ့ၣ် တၢ်လၢအလိၣ်ဘၣ်ဝဲန့ၣ် တမ့ၢ်လၢ အကတဲဘၣ်ပှၤ ကိးဘျီဒဲးဘၣ်. အဒိ, ဒီပုၢ်ဝဲၢ်ခွါတဂၤ အမါမ့ၢ်သံသဒၣ်ကွံာ်အီၤန့ၣ် အသးကဘၣ်ဒိဒိၣ်မး. ဖဲန့ၣ်အဆၢကတီၢ် ဘၣ်သ့ၣ်သ့ၣ် အဝဲကလိၣ်ဘၣ် တၢ်မၤစၢၤလၢ ပှၤကဖီန့ၢ်အီၤ တၢ်အီၣ်တၢ်အီ, တၢ်လဲၤတၢ်က့ၤ မ့တမ့ၢ် ပှၤကဘၣ် မၤကဆှဲကဆှီန့ၢ် အဟံၣ်လီၤ. ဘၣ်ဆၣ် မ့ၢ်လၢအအါနၣ်ပှၤဂၤအဃိ တမ့ၢ်လၢအကဃ့ တၢ်မၤစၢၤဘၣ်. အဃိ ပမ့ၢ်လဲၤမၤစၢၤဆိအီၤ တချုးလၢ အဃ့ပတၢ်မၤစၢၤဒံးဘၣ်န့ၣ် အကပာ်လုၢ်ပာ်ပှ့ၤဝဲဒိၣ်မး. ပတကြၢး ဆိကမိၣ်လၢ ပှၤဂၤကမၤစၢၤအီၤ မ့တမ့ၢ် အမ့ၢ်လိၣ်ဘၣ် တၢ်မၤစၢၤန့ၣ် အကဟဲတဲပှၤန့ၣ်ဘၣ်. သံကွၢ်လီၤနသးလၢ ‘ယမ့ၢ်အိၣ်ဘၣ်လၢ အလီၢ်န့ၣ် ယကလိၣ်ဘၣ် တၢ်မၤစၢၤမနုၤလဲၣ်.’
၁၅. ပမ့ၢ်အဲၣ်ဒိး မၤစၢၤပှၤဂၤန့ၣ် ပကဘၣ်ကဲထီၣ် ပှၤဒ်လဲၣ်.
၁၅ ကဲထီၣ်ပှၤလၢ ပှၤလဲၤဃ့အီၤတၢ်မၤစၢၤညီ. လၢနတၢ်အိၣ်ဖှိၣ်ပူၤန့ၣ် နကသ့ၣ်ညါလိာ်သးဒီး ဒီပုၢ်ဝဲၢ်မုၣ်ခွါလၢ အသးအိၣ်မၤစၢၤပှၤဂၤ ထီဘိလီၤ. အဝဲသ့ၣ် ကဲပှၤလၢ နကဃ့အတၢ်မၤစၢၤအဂီၢ် နတလိၣ် အါနၣ်အီၤဘၣ်. ဖဲပလိၣ်ဘၣ် တၢ်မၤစၢၤအခါ ပသ့ၣ်ညါလၢ အဝဲသ့ၣ် ကမၤစၢၤပှၤထီဘိ ဒီးပအဲၣ်ဒိး လီၤဂာ်ဒီး အဝဲသ့ၣ်စ့ၢ်ကီး. တၢ်အိၣ်ဖှိၣ်သးပှၢ် အဲလဲၣ် လၢအသးအိၣ် ၄၅ နံၣ်တဂၤန့ၣ် အအဲၣ်ဒိးကဲထီၣ်ပှၤလၢ ပှၤဟဲဃ့အီၤတၢ်မၤစၢၤညီလီၤ. ဘၣ်ဃးဒီး ယ့ၣ်ၡူးအဒိအတဲာ်န့ၣ် ဒီပုၢ်ဝဲၢ်ခွါ အဲလဲၣ် တဲဝဲလၢ “ယ့ၣ်ၡူးန့ၣ် အတၢ်မၤအါ, ဘၣ်ဆၣ် ပှၤသးပှၢ်မ့ၢ်ဂ့ၤ ပှၤသးစၢ်မ့ၢ်ဂ့ၤ ဘၣ်သူၣ်ဘၣ်သးအီၤ ဒီးဃ့ဝဲယ့ၣ်ၡူးအတၢ်မၤစၢၤဘူၣ်ဝဲ. အဝဲသ့ၣ် သ့ၣ်ညါလၢ ယ့ၣ်ၡူးသူၣ်အိၣ်သးအိၣ် အဝဲသ့ၣ်နီၢ်နီၢ်. ယၤစ့ၢ်ကီး ယအဲၣ်ဒိး လီၤဂာ်ဒ်ယ့ၣ်ၡူးအသိး, ယအဲၣ်ဒိးလၢ ပှၤဟဲရ့ဘၣ်ယၤညီ, ယအဲၣ်ဒိးကဲပှၤသးဂ့ၤ ဒီးသူၣ်အိၣ်သးအိၣ်ပှၤဂၤ.”
၁၆. ပမ့ၢ်မၤထွဲ စံးထီၣ်ပတြၢၤ ၁၁၉:၅၉, ၆၀ န့ၣ်ကမၤစၢၤပှၤလၢ ပကကွၢ်လိမၤဒိး ယ့ၣ်ၡူးအဒိအတဲာ် ဘူးဘူးတံၢ်တံၢ် ကသ့ဒ်လဲၣ်.
၁၆ ပကွၢ်လိမၤဒိးယ့ၣ်ၡူး မ့ၢ်တန့ၢ် လီၤတံၢ်လီၤဆဲးဘၣ်နာ်က့ ပတကြၢး သးဟးဂီၤဘၣ်. (ယၤကိာ် ၃:၂) ပှၤကၠိဖိလၢ အမၤလိ တၢ်ဆွဲတၢ်ဂီၤန့ၣ် တမ့ၢ်လၢ အဆွဲတၢ်ဂီၤ ကဂ့ၤထဲသိးဒီးအသရၣ် ဒီးဆွဲဝဲဒ်သိးအသရၣ် လီၤတံၢ်လီၤဆဲး ကသ့ဘၣ်. ဘၣ်ဆၣ် အဝဲ မ့ၢ်ဟံးန့ၢ်တၢ်မၤလိလၢ အတၢ်ကမၣ် ဒီးမ့ၢ်ဂုာ်ကျဲးစၢး ဆွဲဝဲဒ် အသရၣ်ဆွဲဝဲအသိးန့ၣ် ကလဲၤထီၣ်လဲၤထီဝဲ ကယီကယီလီၤ. ဒ်န့ၣ်အသိး ဖဲပမၤထွဲ တၢ်လၢပမၤလိဘၣ်အီၤ လၢလံာ်စီဆှံအပူၤ ဒီးဂုာ်ကျဲးစၢး မၤဂ့ၤထီၣ်ပသးအခါ လီၤဂာ်ဒ် ပကွၢ်လိမၤဒိး ယ့ၣ်ၡူးအဒိအတဲာ် ဘူးဘူးတံၢ်တံၢ်လီၤ.—ဖး စံးထီၣ်ပတြၢၤ ၁၁၉:၅၉, ၆၀.
ပမ့ၢ်ဟ့ၣ်လီၤပသးန့ၣ် ပကဒိးန့ၢ်ဘၣ်အဘျုးဒ်လဲၣ်
တၢ်အိၣ်ဖှိၣ်သးပှၢ်တဖၣ် ကွၢ်လိမၤဒိး ယ့ၣ်ၡူး အတၢ်ဟ့ၣ်လီၤသးအဃိ ကဲထီၣ်တၢ်ဒိဂ့ၤတဲာ်ဘၣ်လၢ ပှၤသးစၢ်တဖၣ်အဂီၢ် (ကွၢ်လံာ်အဆၢ ၁၇) *
၁၇-၁၈. ပမ့ၢ်ကွၢ်လိမၤဒိး ယ့ၣ်ၡူးအတၢ်ဟ့ၣ်လီၤသးန့ၣ် ကကဲဘျုးဒ်လဲၣ်.
၁၇ ပမ့ၢ်မၤစၢၤပှၤဂၤန့ၣ် ပဒိပတဲာ် ဘၣ်ကူဘၣ်ဂာ်ပှၤဂၤသ့. တၢ်အိၣ်ဖှိၣ်သးပှၢ်ထံ(မ်) တဲဝဲလၢ “ဒီပုၢ်ဝဲၢ်ခွါဖိတနီၤန့ၣ် ကဲထီၣ်ဝဲ တၢ်အိၣ်ဖှိၣ်အပှၤမၤစၢၤတၢ် ဒီးအဝဲသ့ၣ် အသးစၢ်ဒိၣ်မး. တၢ်ဂ့ၢ်တခါလၢ အဝဲသ့ၣ် အဲၣ်ဒိးကဲထီၣ်ဝဲ တၢ်အိၣ်ဖှိၣ် အပှၤမၤစၢၤတၢ်န့ၣ် မ့ၢ်လၢ အဝဲသ့ၣ်ထံၣ်ဘၣ်ဝဲ ပှၤတနီၤ မၤစၢၤပှၤဂၤအဃိ အဝဲသ့ၣ်နာ်က့ အဲၣ်ဒိးမၤစၢၤတၢ်စ့ၢ်ကီး. အဝဲသ့ၣ် အတၢ်ဟ့ၣ်လီၤသးအံၤ ကဲဘျုးဝဲလၢ တၢ်အိၣ်ဖှိၣ်အဂီၢ် ဒီးကဲထီၣ် တၢ်မၤစၢၤလၢ တၢ်အိၣ်ဖှိၣ်သးပှၢ်တဖၣ်အဂီၢ်ဒိၣ်မး.”
၁၈ ပအိၣ်မူဘၣ်လၢ ဟီၣ်ခိၣ်လၢ အပှဲၤဒီး ပှၤအဲၣ်လီၤထဲသးတဖၣ်. ဘၣ်ဆၣ် ယဟိဝၤယွၤ အခ့အပှၤတဖၣ်န့ၣ် တမ့ၢ်ဒ်န့ၣ်ဘၣ်. ယ့ၣ်ၡူးန့ၣ် အိၣ်ဒီးတၢ်ဒိဂ့ၤတဲာ်ဘၣ်လၢ အဟ့ၣ်လီၤသးလၢ ပှၤဂၤအဂီၢ်. ပဝဲစ့ၢ်ကီး ပပာ်လီၤပသးလၢ ပကကွၢ်လိမၤဒိး အဒိအတဲာ်. ပကယီၢ်ယ့ၣ်ၡူး အခီၣ်လီၢ် လီၤတံၢ်လီၤဆဲးဒု တသ့ဘၣ်, ဘၣ်ဆၣ်ပ “ယီၢ်အခီၣ်လီၢ် ဘူးဘူးတံၢ်တံၢ်” သ့. (၁ ပ့းတရူး ၂:၂၁) ဖဲပဂုာ်ကျဲးစၢး အဂ့ၤကတၢၢ် လၢပကကွၢ်လိ ယ့ၣ်ၡူးအတၢ်ဟ့ၣ်လီၤသးအခါန့ၣ် ပကဒိးန့ၢ်ဘၣ် တၢ်သးခု မ့ၢ်လၢပမၤယဟိဝၤယွၤ အတၢ်ဘၣ်သးအဃိလီၤ.
တၢ်သးဝံၣ် ၁၃ ခရံာ်, မ့ၢ်ပှၤဒိဂ့ၤတဲာ်ဘၣ်လၢပဂီၢ်
^ လံာ်အဆၢ. 5 ယ့ၣ်ၡူးပာ်ဆိပှၤဂၤအတၢ်လိၣ်ဘၣ် လၢညါထီဘိ. လၢတၢ်မၤလိအံၤအပူၤ ပကတဲသကိးဘၣ်ဃးဒီး ပကွၢ်လိမၤဒိး ယ့ၣ်ၡူးအဒိအတဲာ် ကသ့ဒ်လဲၣ်. ဒီးယ့ၣ်ၡူးတအဲၣ်လီၤထဲ အနီၢ်ကစၢ်အသးဘၣ်အဃိ ပမ့ၢ်ကွၢ်လိမၤဒိးအီၤန့ၣ် ပကဒိးန့ၢ်ဘၣ်အဘျုးထီဘိလီၤ.
^ လံာ်အဆၢ. 57 တၢ်တဲဖျါထီၣ်တၢ်ဂီၤ အခီပညီ– ဒီပုၢ်ဝဲၢ်ခွါသးစၢ်ဒဲ(န်) န့ၣ်ထံၣ်ဝဲ တၢ်အိၣ်ဖှိၣ်သးပှၢ်ခံဂၤ ဟဲအိၣ်သကိးအပါ လၢတၢ်ဆါဟံၣ်. ဒီပုၢ်ဝဲၢ်ခွါဒဲ(န်) ဘၣ်သူၣ်ဘၣ်သးဝဲ တၢ်အိၣ်ဖှိၣ်သးပှၢ်တဖၣ်အံၤ အဒိအတဲာ်ဒိၣ်မး အဃိ ထိၣ်ဟူးထိၣ်ဂဲၤထီၣ်အီၤလၢ အီၤစ့ၢ်ကီး အကပာ်သူၣ်ပာ်သး ပှၤလၢတၢ်အိၣ်ဖှိၣ်ပူၤတဖၣ် အတၢ်လိၣ်ဘၣ်. ဒီပုၢ်ဝဲၢ်ခွါသးစၢ်လၢအဂၤတဂၤ လၢအမ့ၢ်ဘဲ(န်) န့ၣ်ထံၣ်ဝဲ ဒီပုၢ်ဝဲၢ်ခွါဒဲ(န်) သူၣ်အိၣ်သးအိၣ်ဝဲပှၤဂၤလီၤ. ဒီပုၢ်ဝဲၢ်ခွါဒဲ(န်) အဒိအတဲာ် ဟ့ၣ်ဂံၢ်ဟ့ၣ်ဘါ ဒီပုၢ်ဝဲၢ်ခွါဘဲ(န်) လၢကမၤကဆှဲကဆှီဝဲ ဘီမုၢ်ဘျီၣ်ဒိၣ်.