1. Wapi bamambu ya mbote bisadi ya Yehova ke na salá bubu yayi?

 BIBLIA zonzá ti bisadi ya Yehova ke ‘kupesama na luzolo ya bawu mosi’ na kisalu ya Yehova. Ni Yesu zolá twadisa bawu na kisalu yango. (Nku. 110:3) Bamambu yayi ke na lunganá bubu yayi. Bamvula nyonso, bisadi ya Yehova ke lakisá tiya na kisalu ya kusamuna. Ba ke lutisá ba-million ya ba-heure na kisalu yango. Ba ke futá ve bawu na kusala yawu. Ba ke salak’ yawu na luzolo ya bawu mosi. Ba ke sadisá mpe bampangi ya bawu: ba ke pesá bawu bima yina ba ke na yawu nsatu, ngolo, mpe ba ke sadisá bawu na kuzola Yehova. Bakuluntu na basadisi (ba-assistant) ke lutisá bantangu mingi na kubongisa bamambu yina ba ke zonzila na balukutakanu. Mpe ba ke kwendá talá bampangi ya kento na ya bakala samu na kukindisa bawu. Samu na yinki bisadi ya Yehova ke salá bisalu nyonso yayi? Ni luzolo samu na Yehova mpe na bampangi ya bawu ke natá bawu na kusala yawu.—Mat. 22:37-39.

2. Faso ke na lakisak’ yawu Baroma 15:1-3, wapi kifwani ya mbote Yesu bikilá beto?

² Ntangu nyonso, Yesu vandá tulá bansatu ya bampangi na mantwala ya bansatu ya yandi. Beto ke salá bangolo na kulanda kifwani ya yandi. (Tanga Baroma 15:1-3.) Ba yina ke salak’ yawu ke kuzwa bambote. Yesu zonzaka: “Kilengi ke vwandaka mingi na muntu yina ke kabulaka, kulutila muntu yina ke kuzwaka.”—Bis. 20:35.

3. Yinki beto ke tala na artikle yayi?

³ Na artikle yayi, beto ke tala bima yina Yesu salá samu na kusadisa bantu ya nkaka mpe faso beto lenda landa kifwani ya yandi. Beto ke zonzila mpe wa’ faso beto lenda kulisa nsatu ya beto ya kusadisa bampangi.

4. Wa’ faso Yesu tulá bansatu ya bantu ya nkaka na mantwala ya bansatu ya yandi?

⁴ Yesu sadisá bantu ya nkaka ata na ntangu yina yandi vandá ya kulemba. Kanisa na yina salamá kilumbu mosi. Yesu me lutisa mpimpa ya muvimba na kusambila. Ntangu ya nkaka, nzutu ya yandi ke ya kulemba. Kasi ntangu yandi me tala bantu mingi kukwiza na mongo kisika yina yandi vandá, pene-pene na Kapenawume, yandi kumá na kyadi samu yandi vandá tala ba yina vandá ya kubela mpe ba yina vandá na nsatu ya kuzaba mingi na kimpeve. Yandi suká ve kaka na kubelusa ba yina vandá na bimbevo. Kilumbi yina, na zulu ya mongo, yandi salá mosi ya ba-discours ya yandi ya kulutila kitoko.—Luke 6:12-20.

5. Wa’ faso bamfumu ya makanda lenda landa kifwani ya Yesu ntangu ba ke ya kulemba?

⁵ Faso bamfumu ya makanda lenda landa kifwani ya Yesu. Tala mambu yina lenda salama: mfumu ya dikanda me kuma na yinzo ya kulemba, na manima ya kulutisa kilumbu nyonso na kisalu. Na nkokila yina, yandi ke na programme ya kulongoka Biblia na dikanda ya yandi. Kasi yandi ke dyaka ve na ngolo ya kusala yawu. Dikanisi ke na kwizilak’ yandi ya kunata yawu kilumbu ya nkaka. Yandi me sambila Yehova pesa yandi ngolo. Yehova me sadisa yandi, mpe yandi me lenda kulongoka na dikanda ya yandi na nkokila yina. Mambu yina yandi me sala me simba bantima ya bana ya yandi. Ba me kwiza tala ti bibuti ya bawu ke tulá bima ya kimpeve na kisika ya ntete na luzingu ya bawu.

6. Pesa kifwani yina ke na lakisá ti Yesu tulá bansatu ya bampangi na mantwala, ata na ntangu yina yandi vandá na nsatu ya kuvanda yandi mosi.

⁶ Ata na ntangu yina yandi vandá na nsatu ya kuvanda yandi mosi, Yesu niminá ve bantu na kukwiza na kisika ya yandi . Kanisa na mpasi yina ya salá Yesu ntangu ba zonzá na yandi ti ba me kufwa ndiku ya yandi, Yoane Mbotiki (Jean le Baptiseur). Ya nyongisá mingi Yesu. Biblia ke zonzaka: “Ntangu Yesu kuwaka nsangu yina, yandi kotaka na bwatu, mpe kwendaka na kisika yina [bantu vwandaka] ve.” (Mat. 14:10-13) Bantu mingi, ntangu ba ke kuwá nsangu ya lufwa ya muntu ya bawu, ba ke sosá ntete kuvanda bawu mosi. Kasi Yesu lendá ve kusala yawu, samu bantu mingi kwizá kisika yina yandi kwendá. Yinki Yesu salaka? Yandi kanisá na bansatu ya ba yina kwizá tala yandi, mpe yandi “kumaka ya kufuluka na kyadi samu na bawu.”  Ba vandá na nsatu yandi sadisa bawu, mpe yandi pesa bawu ngolo. Ni yina yandi salaka. “Yandi bandaka na kulongisa bawu [kaka mambu fioti ve, kasi] mambu mingi.” —Mrk. 6:31-34; Luke 9:10, 11.

7-8. Pesa kifwani yina ke na lakisá ti faso Yesu, bakuluntu ke sadisá bampangi ya bawu.

⁷ Faso bakuluntu lenda landa kifwani ya Yesu. Beto ke sepelá mingi na kisalu ya ngolo yina bakuluntu ke salá samu na beto! Mingi ya bisalu yina ba ke salá, bampangi na bimvuka zaba ve yawu. Na kifwani, bakuluntu ya nkaka ke salá na comité de liaison hospitalier. Mpe ba ke kwendá na mbangu kusadisa bampangi. Ntangu ya nkaka ba ke salak’ yawu na mpimpa! Samu ba ke na kyadi ya bampangi yina ke na mpasi, bakuluntu yayi mpe makanda ya bawu ke ndimá kutula bansatu ya bampangi na mantwala ya bansatu ya bawu mosi.

⁸ Bakuluntu ya nkaka ke salá mpe samu na kutunga ba-salle du Royaume mpe bayinzo ya nkaka. Ya ke mpe na ba yina ke kwendá pesá diboko ntangu bamvula ya nene to kuningana ya ntoto ke natiná bampangi bampasi. Mpe beto lenda zaba ve ntangu nyonso yina ba ke lutisá na kulonga kimvuka, kupesa bampangi bukindi mpe kusadisa bawu. Beto ke vutulá matondo na bakuluntu mpe na makanda ya bawu samu na nyonso yina ba ke salaka. Bika Yehova sakumuna bawu! Ata bakuluntu ke zolá bampangi ya kimvuka, kasi ya ke ve mbote ba lutisa ntangu ya bawu nyonso na kusadisa kimvuka mpe ba kipe dyaka ve makanda ya bawu.

9. Faso Bafilipi 2:4, 5 me zonza, yinki bakristo nyonso zolá sala?

⁹ Tanga Bafilipi 2:4, 5. Kaka bakuluntu ve me lunga kutula bansatu ya bampangi na mantwala.  Beto nyonso zolá landa kifwani ya Yesu. Biblia ke zonzá ti yandi “kumaka mutindu mosi na kisadi.” (Flp. 2:7) Yinki verse yayi zola zonza? Kisadi ya mbote ke sosá kusala bamambu yina ke sepelisa mfumu ya yandi. Beto ke bisadi ya Yehova mpe beto ke sadilá bampangi ya beto. Beto tala bamambu yina nge lenda sala samu na kukulisa nsatu ya nge ya kusadisa bampangi.

10. Wapi byuvu beto lenda yufula?

¹⁰ Kanisa na faso ke ntima ya nge. Yufula byuvu mutindu yayi: ‘Na ntima mosi, mu ke ndimá kwandi kupesa ntangu mpe bangolo ya munu samu na kusadisa bampangi? To ya ke na bima yina mu lenda ndima ve kusala samu na bampangi? Na kifwani, yinki ya ke sala munu si ba me lomba na munu na kwenda lutisa ntangu na mpangi mosi ya bakala yina me nuná, to si ba me zonza na munu na kunata mpangi mosi yina me nuná na balukutakanu? Ntangu ba ke sosá bampangi samu na kukipe Salle du Royaume to Salle d’assemblées, mu ke kwendá kwandi na mbangu kutula diboko?’ Ntangu beto pesá luzingu ya beto na Yehova, beto zonzá na yandi ti beto ke pesa ntangu, bangolo mpe mbongo ya beto na kisalu ya yandi. Yehova zola ti beto sadila nyonso yina ke na beto samu na kusadisa bampangi. Yandi ke na kilengi ntangu beto ke salak’ yawu na ntima mosi. Kana beto ke na talá ti bubu yayi beto ke na salá ve yawu, yinki beto lenda sala?

11. Wa’ faso lusambu lenda sadisa beto na kukulisa nsatu ya beto ya kusadisa bampangi?

¹¹ Fungula ntima ya nge na Yehova na lusambu. Kanisa ntete. Nge me kwiza tala ti ya ke mpasi na nge na kutula bansatu ya bampangi na mantwala. Ata nge me tala yawu, kasi na ntima ya nge, nge ke ve na nsatu ya kusoba. Yinki nge lenda sala? Fungula ntima ya nge na Yehova na lusambu. Zonzila yandi mambu nyonso. Kubumba ata kima. Lomba na yandi na kupesa nge “ngolo ya kuzola mpe kusala mambu.”—Flp. 2:13.

12. Samu na yinki beto ke na nsatu ya bampangi ya bakala ya ntwenya na kati ya kimvuka?

¹² Si nge ke ntwenya ya bakala yina ke na baptême, lomba na Yehova na kusadisa nge na kukulisa nsatu ya nge ya kusadisa bampangi ya nge ya kimvuka. Na babwala ya nkaka, na kati ya bimvuka, bakuluntu me lutila basadisi na mingi. Mpe na kati ya basadisi yango, mingi ke biboba. Kimvuka ya Yehova ke na kulaka. Na yawu, beto ke na nsatu ya bampangi ya bakala mingi ya ntwenya samu na kukipe bisadi ya Yehova. Si nge ndima kusala kima ni kima samu na kusadisa bampangi, nge ke vanda na kilengi. Samu na yinki? Samu nge ke sepelisa Yehova, bampangi ke tala ti nge ke zolá bawu mpe nge ke tala faso kusadisa bampangi ke pesá kilengi.

13-14. Yinki beto lenda sala samu na kusadisa bampangi ya beto ya kento na ya bakala? (Tala foto ya paje ya kubanda.)

¹³ Fungula meso mpe tala yina bampangi lenda vanda na yawu nsatu. Ntumwa Polo zonzá na Baebre: ‘Dyaka, beno zimbana ve na kusala mambu ya mbote mpe na kukabula na bantu ya nkaka bima yina beno kele na yawu, samu Nzambi ke talaka kiese na minkayulu ya mutindu yina.’ (Ebr. 13:16) Malongi yayi kwizá na ntangu ya kulunga! Samu mwa bamvula na manima ya kuzwa mukanda yina, bakristo ya Zude biká bayinzo ya bawu, mimbungu ya bawu, bantu ya makanda ya bawu yina vandá sadila ve Yehova, mpe “[kimaka] na zulu ya myongo.” (Mat. 24:16) Na ntangu yina, ya vandá mfunu ba sadisa bampangi. Si ba sadilá malongi ya Polo ntangu ba kuzwak’ yawu, mpe ba kulisá kifu ya kusadisá bampangi, ba zolá nyonga ve ata ba vandá kaka na bima fioti kisika yina ba kwendaka.

¹⁴ Ni ntangu nyonso ve bampangi lenda  zonza na beto ti ba ke na nsatu ya mwa kima. Na kifwani, mpangi mosi ya bakala yina me fwidila kento ya yandi, lenda vanda na nsatu ba lambila yandi mwa madya, ba nata yandi na balukutakanu to bisika ya nkaka, to ba sadisa yandi na bisalu ya yinzo. Ata yandi ke na bansatu nyonso yayi, yandi lenda zonzila ve beto yawu samu yandi ke ve na nsatu ya kuvanda kilo samu na beto. Si beto mosi kwenda kisika ya yandi samu na kulakisa yandi ti beto ke na nsatu ya kusadisa yandi, yandi ke vanda na kilengi. Beto kanisa ve ti si beto sadisa ve mpangi, muntu ya nkaka ke sala yawu. Mpe beto vingila ve ti mpangi yina ke na nsatu beto pesa yandi diboko zonzila beto yawu tekila beto sadisa yandi. Nge lenda yufula: ‘Si ya vandá ni munu, yinki mu zolá vingila bampangi sala samu na munu?’

15. Wa’ faso beto me lunga kuvanda, si beto zola kusadisa bampangi?

¹⁵ Sala ti bampangi vanda ve na boma ya nge. Ntangu ya nkaka na kimvuka ya nge, nge zaba bampangi yina ke sosá ntangu nyonso kusadisa bampangi. Bampangi ya kimvuka ke ve na boma ya kwenda tala bawu samu ba zaba ti ba ke manga ve kusadisa bawu. Beto ke na nsatu ya kuvanda mutindu bampangi ya faso yina! Alan, kuluntu mosi yina ka na kati ya bamvula 40, ke salá nyonso samu bampangi vanda ve na boma ya yandi. Samu na kifwani yina Yesu bikilá beto, Alan me zonza: “Yesu vandá na mingi ya kusala. Ata faso yina, bana fioti mpe bakuluntu vandá ve na boma ya kukwiza kisika ya yandi mpe ya kulomba yandi sadisa bawu. Ba zabilak’ yandi mutindu muntu yina ke zolá mingi bampangi. Mu ke zolá mingi kuvanda mutindu Yesu. Mu zola bampangi zabila munu mutindu muntu ya mbote yina ke zolá bawu, mpe ba vanda ve na boma ya kulomba mu sadisa bawu.”

16. Wa’ faso Nkunga 119:59, 60 lenda sadisa beto na kulanda kifwani ya Yesu?

 ¹⁶ Beto zolá nyonga ve si bantangu ya nkaka beto ke na lendá ve kulanda kifwani ya Yesu na faso ya kulunga. (Zaki. 3:2) Muntu yina ke na longoká kisalu mosi, lendá sala ve yawu mbote-mbote mutindu muntu yina ke na lakisak’ yandi yawu. Bafoti yina yandi ke sala, ke sadisa yandi na kukulisa mayela ya yandi na kisalu. Kana yandi sala bangolo samu na kulanda kifwani ya muntu yina me lakisa yandi kisalu, fioti-fioti yandi ke bongisa faso ya yandi ya kusala. Faso mosi mpe, si beto sadila bamambu yina beto ke kuzwá ntangu beto ke longoká Biblia beto mosi, mpe beto sala bangolo na kukatula mwa bifu ya yimbi yina ke na beto, beto ke lenda kulanda kifwani ya Yesu.—Tanga Nkunga 119:59, 60.

17-18. Wapi bambote beto ke kuzwa si beto landa kifwani ya Yesu?

¹⁷ Si bampangi ke na talá ti beto ke zolá kusadisa bantu ya nkaka, bawu mpe ke sala faso beto. Tim kuluntu mosi, me zonza: “Na kimvuka ya beto, beto ke na bantwenya mingi yina ke basadisi. Ni kifwani ya mbote ya bampangi ya nkaka me pesa bawu nsatu ya kusadisa. Yina ba ke salá ke sadisá mingi bakuluntu mpe kimvuka.”

¹⁸ Beto ke zingá na yinza yina bantu ke talá kaka bansatu ya bawu mosi. Kasi bisadi ya Yehova ke ve mutindu yina. Ntangu beto ke talá mutindu Yesu sadisá bampangi, ya ke simbá bantima ya beto. Beto zola kusala bangolo na kulanda kifwani ya yandi. Ya tsyeleka, beto lenda landa ve kifwani ya yandi na faso ya kulunga, kasi beto lenda “landa bitambi [ya] yandi mbote-mbote.” (1 Pi. 2:21, nwt-MK) Si faso Yesu beto ke salá bangolo na kutula bansatu ya bampangi na mantwala, beto ke vanda na kilengi ya kuzaba ti beto ke na sepelisá Yehova.