1. Nkareso musinke zongwa va kara nazo vantu vaJehova?

NARE-NARE, Bibeli kwa pumbire asi vantu vaKarunga “ngava ligava” vene mosirugana saJehova kupitira mepitisiro lyaMunwendi Jesus Kristusa. (Epis. 110:3) Uporofete owo kuna kusikilira mo neina. Nkenye mvhura vakareli vaJehova kuzuvhisa noupampi novili mamiliyona mosirugana sokuzuvhisa. Awo kapi ava va futu va rugane sirugana esi, nye awo kusirugana morwa va kara neharo. Ntani awo kulitulira po siruwo mokuvatera vapuli vakwawo panyama, pampepo ntani pokuvakorangeda. Vakuronambunga novakwafimbunga kuruganesa novili dononzi yipo va liwapaikire maruha gokomapongo ntani nokukadingura vapuli vakwawo va ka va korangede. Yisinke a yi tumangeda vantu vaKarunga yipo va rugane yirugana nayinye eyi? Awo kuyirugana oyo morwa va hara Jehova ntani novantu.​—Mat. 22:37-39.

2. Ngomu va yi faturura moVaroma 15:1-3, sihonena musinke ga tu tulira po Jesus?

² Jesus kwa tu tulira po sihonena sosiwa pokutura yihepwa yovakwawo muhowo kupitakana yihepwa yanyamwendi. Ose kuna kuhetekera ko paapa twa hulira mokumuhonena. (Resa Varoma 15:1-3.) Ava ava mu honene ngava gwanena mo mauwa. Jesus kwa tente asi: “Kugava kureta ruhafo kupitakana kutambura.”​—Yirug. 20:35.

3. Yisinke natu ka zogera mosirongwa esi?

³ Mosirongwa esi tatu ka tarurura malizambero gamwe aga ga tulire po Jesus yipo a vatere wopeke ntani tatu ka lironga omu natu honena sihonena sendi. Natu ka zogera hena omu natu kara neharo lyokulizambera yipo tu vatere wopeke.

4. Ngapi omu Jesus ga tulire yihepwa yovakwawo muhowo kupitakana yihepwa yanyamwendi?

⁴ Jesus nga vatere wopeke nampili poyiruwo eyi nga lizuvhu eroroko. Gazadara ko eyi ga rugene Jesus apa mbunga zovantu za mu wizilire kondundu ezi za kere pepi naKaperenaumu. Jesus kwa kanderere masiku mudima. Age nampo kwa rorokere, nye apa ga mwene mbunga ozo, age kwa fililire nkenda vantu woruhepo nava wokuvera ava va kere mombunga ozo. Age kapi tupu ga va verwire nye hena kwa geve yiuyungwa yekorangedo eyi ya divikwa asi Eudiso lyopoNdundu.​—Ruk. 6:12-20.

5. Ngapi omu vanturagumbo vana kuhonena sihonena saJesus selizambero apa ava roroka?

⁵ Omu vanturagumbo vana kuhonena Jesus. Gazadareni ko kosihonena esi: Nturagumbo ogu ana ka tunda koyirugana ana roroka ngomu ana kuyasika pembo. Nampili ngomu ana hara kuhagekesa po ukareli wepata wongurova ozo, age kuna kulikwambera kwaJehova yipo a mu pe ko nonkondo dokupitisira ukareli owo wepata. Makura Jehova ta limburura ekanderero lyendi ntani nturagumbo ta rugana ukareli wepata kumwe nepata lyendi ngwendi moomu tupu a va yi rugana nkenye sivike. Mongurova ozo, vanona vana li rongo sirongwa somulyo esi asi kukarera Jehova kuna kara sininke somulyo po unene kupitakana yininke yapeke.

6. Gava sihonena omu Jesus ga li zamberere pokuruganesa siruwo sendi yipo a vatere wopeke.

⁶ Jesus nga ruganesa siruwo sendi esi ga hepere kukara gelike yipo a vatere vantu wopeke. Gazareni tupu omu ga lizuvhire Jesus apa ga zuvhire asi kaume kendi Johanesa Mukuhwi vana mu dipaga. Jesus nampo ga guvire sili unene. Bibeli kuuyunga asi: ‘Apa Jesus ga zuvhire nomfa daJohanesa makura ta tundu po nowato, ta zi kevega lya hana muntu a ka kare gelike.’ (Mat. 14:10-13) Ose kuvhura kukwata egano konda zeyi ga here kukara pwagelike. Sinzi setu kwa hara kuguva mokahore-hore. Nye Jesus age kapi ga vhulire kukara pwagelike. Mbunga zonene kwa hovere kukasika kevega oku kwa dilire kukara vantu komeho a ka sike ko. Yisinke ga rugene Jesus? Age kwa gazadarere ko koyihepwa yovantu vena ntani ‘kwava fililire nkenda.’ Jesus ga  ya dimbwilire asi awo va hepere evatero nehengagwido lyokutunda kwaJehova. Yipo nye, Jesus kwa rugene ko yuma usimbu yipo a va vatere. Makura ‘Jesus yipo ga tamekere kuvaronga [kapisi yininke tupu yoyisesu nye] yininke yoyinzi.’​—Mar. 6:31-34; Ruk. 9:10, 11.

7-8. Gava sihonena esi sina kulikida omu vakuronambunga ava honene Jesus apa gumwe gomombungakriste a hepa evatero.

⁷ Omu vakuronambunga ava honene Jesus. Ose kuhafera yirugana yelizambero eyi ava tu ruganene vakuronambunga. Sinzi sovanavazinyetu womombungakriste kapi va diva yirugana nayinye eyi ava tu ruganene vakuronambunga. Pasihonena, vakuronambunga ava va kara moKomitiye zeruganeno kumwe nosipangero awo kurugana ko yuma usimbu yipo va vatere vanavazinyetu ava vana hepa evatero lyokuhamena kouhaku. Rorunzi vakuronambunga vangoso kugava evatero kovapuli vakwawo pokatji komasiku. Nye nkenda kutumangeda vakuronambunga nomapata gawo yipo va ture yihepwa yovapuli vakwawo muhowo kupitakana yihepwa yanyamwawo.

⁸ Vakuronambunga kuvatera hena mokutunga Yinyanga yoUhompa nomatungo gamwe ntani awo kuvatera moyimpagwa. Ntani awo kuruganesa siruwo sawo sosinzi mokuturonga, mokutukorangeda ntani mokutuvatera. Twa hepa kupandadeka vanavazinyetu owo kumwe nomapata gawo. Jehova ngano a tungike yirugana yoyiwa eyi ava rugana. Nye nampili ngoso, vakuronambunga nawo va hepa kukara nehetakano ngwendi moomu tupu ava yi rugana vantu navenye. Kapisi va ruganese unene siruwo sawo koyininke yomombungakriste eyi nayi vhura kuvaninkisa va dire kugwana siruwo sokupakera mbili mapata gawo.

9. Kuliza noVafilipi 2:4, 5, nkareso musinke va hepa kutunga po Vakriste navenye?

⁹ Resa Vafilipi 2:4, 5. Yimo, natuvenye kapisi vakuronambunga, nye natuvenye kuvhura kuhonena nkareso zaJesus zelizambero. Bibeli kuuyunga asi: ‘Age kwa ya kere ngwendi mupika.’ (Fil. 2:7) Gazadareni ko eyi natu lirongera ko kovelise ozo. Mupika ndi mukareli gomuwa, age kupapara nompito yipo a hafese hekurwendi. Mokumona asi ose vapika vaJehova ntani kuvatera vapuli vakwetu, ose tuna hara Jehova a tu ruganese unene ntani nokuvatera vanavazinyetu. Ove kuvhura o yi rugane oyo pokukakonakona yitwa eyi yina ka kwama ko.

10. Mapuro musinke twa hepa kulipura nyamwetu?

¹⁰ Konakona nkareso zoge. Lipura mapuro ngwendi gaaga asi: ‘Ame na kara neharo mokuruganesa siruwo sange nononkondo dange ni vatere wopeke ndi? Pasihonena, yisinke nani rugana nsene va pura nge ni ka dingure mukurupe gomugara ogu ga tunga membo omu ava pakere mbili vakurupe ndi ni tware mukurupe gomukadi komapongo? Ame na kara neharo mokuvatera kuzeresa kevango oku asi karere sigongi somazuva gatatu ndi mokupakera mbili Sinyanga soUhompa ndi?’ Apa twa li geve kwaJehova ose kwa mu tumbwidilire asi ngatu ruganesa nayinye eyi twa kara nayo mokumukarera. Age ana hara tu ruganese siruwo setu nonkondo detu ntani noyininke eyi twa weka yipo tu vatere wopeke. Age kuhafa apa atu mono asi tuna kara neharo lyokuyirugana oyo. Yisinke eyi twa hepa kurugana nsene tuna dimburura asi koyili eyi twa hepa kuwapukurura?

11. Ngapi omu kukanderera naku tu vatera tu tunge po nkareso zokulizambera?

¹¹ Kanderera unene kwaJehova. Tu tante asi ono dimburura asi ono hara kukara nonkareso zokulizambera, nye kapi ono kara neharo lyokuyirugana ngoso. Nsene yimo o lizuvhu ngoso, kanderera unene kwaJehova. Mu tantera nayinye. Tantera Jehova kuhamena omu ono kulizuvha ntani mu pura a ku pe “nononkondo dokusikisa mo nayinye eyi ga hara.”​—Fil. 2:13.

12. Ngapi omu vanavazinyetu wovagara wovadinkantu nava vhura kuvatera mbungakriste?

¹² Nsene asi ove mudinkantu gomugara ogu wa gwana ekuho, pura Jehova a ku pe eharo yipo o rugane unene mokukuvatera vapuli vakweni mombungakriste. Moyirongo yimwe kwa kara mo vakuronambunga wovanzi kupitakana vakwafimbunga ntani sinzi sovakwafimbunga owo kapisi vadinkantu. Ngomu mbunga zaJehova zina kuligwederera, tuna hepa vanavazinyetu wovagara wovadinkantu yipo va pakere mbili vantu vaJehova. Nsene o kara neharo lyokuvatera mwankenye eyi, ove ngo hafa. Morwasinke? Morwa ngo hafesa Jehova ntani vanavazinyetu ngava yi dimburura asi wa kara neharo lyokuvatera wopeke ntani ngo limonena ruhafo oru aru tundu mokuvatera wopeke.

13-14. Yisinke twa hepa kurugana yipo tu vatere vanavazinyetu? (Tara efano lyopontunda.)

¹³ Diva ntani nomena nsene gumwe ana hepa evatero. Paurusa kwa tanterere Vakriste ava va tungire moJudeya asi: “Walye omu divara kurugana yoyiwa nokuligavera novakweni eyi mwa kara nayo, yeeyi Karunga kumuhafesa unene nonzambo dangoso.” (Heb. 13:16) Olyo kwa kere epukururo lyewa. Konyima tupu zapa Vakriste owo va gwene mbilive ezi, awo va hepere kusiga mambo gawo, nongesefa dawo novanekoro vawo wovahapuli ntani va hepere ‘kutjwavyukira konondundu.’ (Mat. 24:16) Posiruwo oso, ayo ya kere nomulyo unene mokuvatera vakwawo. Nsene asi  ngano va tulire pasirugana epukururo lyaPaurusa mokuvatera vakwawo neyi va kere nayo, eyi ngano ya va rerupilire mokuyika mparukiso zawo zompe.

¹⁴ Vanavazinyetu kapi ngava tu tantera nkenye apa nsene vana hepa yuma yongandi. Pasihonena, munazinyetu gomugara nampo ga dogorokesa mukadendi. Ngoso munazinyetu ogo gomugara ana hepa ko evatero lyonondya, ugendero ndi evatero lyoyirugana yemembo ndi? Age nampo kuvhura a dire kutupura tu mu vatere morwa kapi ana hara kutupa mudigo. Nye ayo ngayi mu hafesa unene nsene tu mu vatera komeho a pure evatero kwetu. Kapisi tu gazare asi kweli gumwe ogu na vhura kumuvatera nanayinye ndi tu gazare asi natu tantera yihepwa yendi eyi ana hepa yipo tu mu vatere. Lipura nyamoge asi ‘ngano nyame nina kara moukaro wangoso, evatero musinke nani hepa?’

15. Yisinke twa hepa kurugana nsene tuna hara kuvatera wopeke?

¹⁵ Kara goureru kuhedera. Twa si huguvara asi wa diva vanavazinyetu womombungakriste zeni ava ava ava vatere vakwawo nkenye apa. Awo kapi ava tu ninkisa tu lizuvhe asi ose kuna kuvapa mudigo. Ose twa yi diva asi awo nkenye apa ngava kara neharo mokutuvatera ntani nose tuna hara kuvahonena. Mukuronambunga gedina Alan gonomvhura 45, kwa hara kukara muntu goureru kuhedera. Alan kwa uyunga kuhamena sihonena saJesus asi: “Jesus ga kere noyirugana yoyinzi nye yikare asi vanona ndi vakondi kwa mu here ntani ngayi va karere ureru kumupura evatero. Awo va yi divire asi age ngava pakere mbili. Nina hara kuhonena nkareso zaJesus ntani yipo vantu va dive nge asi ame muntu goureru kuhedera, muntu gombili ntani muntu ogu ga hara kuvatera vakwawo.”

16. Ngapi omu kutura pasirugana etjangwa lyemEpisarome 119:59, 60 nayi tu vatera tu kwame sihonena saJesus paapa twa hulira?

 ¹⁶ Kapisi yi tu dompese nsene kapi yina kututompoka kuhonena Jesus nawa-nawa. (Jak. 3:2) Murongwa kapi ta vhuru kuhonena nawa-nawa yirugana yomurongi gwendi. Nye ngomu murongwa ana kulirongera ko komapuko gendi ntani nokukondja paapa ga hulira a honene sihonena somurongi gwendi, age nga twikira kutura po marunduruko. Mokulifana, nsene tu tura pasirugana eyi atu lirongo moBibeli ntani nokutura po marunduruko, ngayi tu tompoka mokukwama sihonena saJesus paapa twa hulira.​—Resa Episarome 119:59, 60.

17-18. Mauwa musinke ngatu gwanena mo ngomu tuna kuhonena nkareso zaJesus zelizambero?

¹⁷ Nkareso zokulizambera kuvhura kutumangeda wopeke nawo va rugane yokulifana. Mukuronambunga gedina Tim kwa tanta asi: “Ose twa kara novadinkantu wovagara ava vana kara vakwafimbunga, konda zimwe kuna kara asi morwa awo kwa mwene nkareso zelizambero mwava wopeke ntani awo kwa here kuvahonena. Vanavazinyetu wovagara wovadinkantu kuvatera mbungakriste zetu ntani awo kukwatesa ko unene vakuronambunga.”

¹⁸ Ose kuna kuparuka mouzuni omu mwa kara vantu wovanzi ava va kara nonkareso zokudira kuvatera wopeke. Nye vantu vaJehova kapi va kara nonkareso zangoso. Nkareso zaJesus zelizambero zina tu vatere unene ntani tuna tokomene kukwama sihonena sendi. Ose kapi tatu vhuru nawa-nawa kukwama sihonena sendi nye ose kuvhura kuhonena “sihonena sendi.” (1 Pet. 2:21) Ngomu tuna kurugana unene paapa twa hulira mokuhonena nkareso zaJesus zelizambero, ose ngatu hafa morwa kuna kuhafesa Jehova.