1. O zola kufilanga o nkangu a Yave mu vanga nkia diambu?

 SE VIOKA mvu miayingi, Bibila kiasakula vo nkangu a Nzambi “ukuyivana kuna mvevo” muna salu kia Yave eki kifilwanga kwa Mwan’andi. (Nku. 110:3) Kieleka, o ungunza wau mu lungana wina o unu. Konso mvu, e selo ya Yave yo vema kwawonso beviokesanga mafunda ye mafunda ma ola muna salu kia samuna e nsangu zambote. Bevanganga wo kuna mvevo wawonso yo sadila nkutu nzimbu zau muna salu kiaki. Bevaulanga mpe e ntangwa muna sadisa akwau Akristu muna kubavana ina bavuidi o mfunu muna zinga, kubakasakesa yo kumika lukwikilu lwau muna Yave. Akuluntu ye selo ya salu, bevaulanga ntangwa yayingi muna kubika malongi ma tukutakanu yo kingula mpangi muna kubakasakesa. Nki kikubafilanga mu sala e salu kiaki? I zola, i sia vo, zola kwau muna Yave ye muna wantu.—Mat. 22:37-39.

2. Landila e sono kia Roma 15:1-3, nkia mbandu Yesu katusisila?

² Yesu mbandu ambote katusisila. Wasianga e nsatu za wantu ankaka va fulu kiantete ke mu zandi ko. Tuvanganga mawonso tulenda muna landa e ntambi zandi. (Tanga Roma 15:1-3.) Avo tuvangidi wo nluta tuvua. Yesu wavova vo: “E diambu disundidi e kiese i vana, ke mu tambula ko.”—Mav. 20:35.

3. Nkia mambu tulongoka mu longi diadi?

³ Mu longi diadi, tufimpulula e maka mambu kavanga o Yesu muna sadisa akaka ye una tulenda tanginina e mbandu  andi. Tulongoka mpe una tulenda wokesela luzolo lweto lwa sadisa akaka.

4. Aweyi Yesu kasilanga e nsatu za wantu ankaka va fulu kiantete?

⁴ Yesu wasadisanga kaka kana nkutu vava kakalanga wayoya. Yesu wasamba fuku wawonso kuna mongo lukufi ye mbanz’a Kafanau. Yindula una Yesu kamona vava kamona ndong’a wantu bayiza vana kakala. Kana una vo wayoya kikilu kakala, vava kamona e ndonga wabafwila e nkenda yo wuka e mbevo. Yesu kabawuka kaka ko, kansi mpe wabakasakesa yo kubakumika muna longi diandi dizayakene o unu vo, Elongi vana Mongo.—Luka 6:12-20.

5. Awana bevitang’o ntu muna nzo aweyi balenda tanginina Yesu vava bekalanga bayoya?

⁵ Una awana bevitanga o ntu muna nzo balenda tanginina Yesu. Badika nona eki: Kuna mfoko a lumbu kia salu kiayingi, o se yovo ngudi olweke ku nzo wayoya kikilu. Wau vo wayoya kena, ozolele vo e nsambila ya esi nzo yavangama lumbu kiankaka, kansi osambidi kwa Yave muna lomba o nkuma kimana kafila e nsambila ya esi nzo. Yave ovene e mvutu za sambu kiandi, olendele fila e nsambila ya esi nzo nze una kevanganga konso lumingu. Muna fuku wauna, o wana balongokele diambu diamfunu, i sia vo, mase mau mambu ma mwanda besianga va fulu kiantete.

6. Yika e nona kisonganga una Yesu kasadilanga e ntangw’andi muna sadisa akaka.

⁶ Yesu wasadilanga e ntangw’andi muna sadisa akaka kana nkutu vava kazolanga kala va fulu kia yandi mosi kaka. Olenda yindula una Yesu kamona vava kazaya vo nkundi andi Yoane wa Mvubi ovondelo? Yesu watoma kendalala. E Bibila kivovanga vo: “Vava kawidi [oma ma lufwa lwa Yoane], Yesu okatukidi vo, obakidi e nzaza wele kuna makanga kakala yandi mosi kaka.” (Mat. 14:10-13) Tulenda bakula e kuma kazola kadila va fulu kia yandi mosi kaka. Wantu ankaka bezolanga kala va fulu kia yau kaka vava bedilanga. Kansi, Yesu kalenda kala va fulu kia yandi kaka ko. Wau vo ndong’ayingi bazaya kuna Yesu  kayendanga, yau i wantu antete balwaka ko. Aweyi Yesu kamona? Wayindula e nsatu za mwanda bakala zau yo ‘kubafwila e nkenda.’ Yesu wabakula vo lusadisu ye lufiaulwisu lwa Nzambi bavuanga o mfunu, vana vau wabasadisa. Ozevo, “oyantikidi kubalonga [ke mambu makete ko, kansi] mambu mayingi.”—Maku 6:31-34; Luka 9:10, 11.

7-8. Yika e nona kisonganga una akuluntu betangininanga Yesu vava mpangi kevuanga lusadisu o mfunu.

⁷ Una akuluntu betangininanga Yesu. Tutoma yangalelanga una akuluntu bekuyivaninanga kuna mvevo mu sala muna wete dieto! Nkumbu miayingi ampangi muna nkutakani ke bazeye ko e salu yawonso akuluntu besalanga. Kasikil’owu, vava mpangi kevuanga lusadisu lwa mawuku o mfunu mu nzaki-nzaki, akuluntu ana besadilanga muna buka kia Comissão de Ligação Hospitalar, vana vau besadisanga mpangi ndioyo. Nkumbu miayingi e mambu ma mpila yayi mu fuku metoma bwanga. Kansi, e nkenda zifilanga akuluntu awaya azolwa kumosi ye esi nzo zau mu sia e wete dia mpangi zau va fulu kiantete.

⁸ Akuluntu mpe bekuyivananga muna salu kia tunga Maseka ma Kintinu ye fulu yankaka ya nsambila ye vava vebwanga e sumbula. Lembi yika ntangw’ayingi akuluntu a nkutakani eto beviokesanga muna kutulonga, kutukasakesa yo kutusadisa. Kieleka, tusanisini mpangi zazi zawonso ye esi nzo zau. Yambula Yave kakwamanana sambula mpangi zazi wau besonganga luzolo lwa sadisa akaka. Kansi nze yeto awonso, akuluntu bafwete kalanga ye tezo. Ke bafwete viokesanga kaka ntangwa yayingi ko muna salu ya nkutakani, bafwete mpe vaulanga e ntangwa muna lunga-lunganga esi nzo zau.

9. Landila e sono kia Filipi 2:4, 5, nkia fu Akristu awonso bafwete yima?

⁹ Tanga Filipi 2:4, 5. Dialudi vo ke yeto awonso ko tu akuluntu, kansi yeto awonso tulenda tanginina luzolo lwa Yesu lwa sianga e wete dia wantu ankaka va fulu kiantete. E Bibila kivovanga vo Yesu “wabaka e mpw’a ntaudi.” (Fili. 2:7) Yindula e nsas’a mvovo miami. O ntaudi ambote ovanganga mawonso muna yangidika mfumu andi. Wau vo tu ntaudi za Yave yo sadila mpangi zeto, tuzolele vanga mawonso muna yangidika Yave yo sadila mpangi zeto. Yambula twafimpa e mpila tulenda wo vangila.

10. Nkia yuvu tulenda kukiyuvula?

¹⁰ Uyifimpa. Ukiyuvula: ‘Yamu nkia tezo isadilanga ntangwa ye ngolo zame muna sadisa akaka? Kasikil’owu, aweyi imona avo bampovese vo ngienda kingula mpangi una vo nunu kuna nzo ilunga-lunganga anunu yovo ngienda baka mpangi ankento una vo nunu yo kunata kuna lukutakanu? Nga ikuyivananga vana vau vava vevavuanga akwa luzolo lwambote mu velelesa e fulu kivangamena lukutakanu lwa mvivu yovo Seka dia Kintinu?’ Vava twakiyekola kwa Yave, twasia nsilu vo tusadila yawonso tuna yau muna kunsadila. Ozolele vo twasadila e ntangwa, ngolo ye mavua meto muna sadisa akaka. Yave otoma yangalalanga vava tuvanganga wo. Kansi, avo tumwene vo diambu tufwete soba, adieyi tulenda vanga?

11. Aweyi e sambu kilenda kutusadisila mu yima luzolo lwa sadisa akaka?

¹¹ Samba kwa Yave ye nsi a ntima. Yindula vo tima una diau dia wokesa luzolo lwaku lwa sadisa akaka, kansi kuzeye ko una olenda wo vangila. Avo iwau, samba kwa Yave ye nsi a ntima wawonso. Unzayisa una omonanga yo kunlomba vo kavana “luzolo yo nkuma wa sala.”—Fili. 2:13.

12. Aweyi o nleke una vo wavubwa kalenda sadisila e nkutakani?

¹² Avo u nleke wavubwa, lomba kwa Yave kasadisa wakala ye luzolo lwa sadisa mpangi zaku muna nkutakani. Muna nsi zankaka, e nkutakani zivuidi akuluntu ayingi ke mu selo ya salu ko. Ayingi muna selo ya salu se ambuta yovo anunu. Wau vo e nkubik’a Yave mu nungunuka kaka yina, mpangi zayingi za makala bena vo aleke bavuilu o mfunu muna sadisa akuluntu batoma lunga-lunga ampangi mu nkutakani. Avo oyimini e tima dia sala kwayingi, kiese kiayingi omona. Ekuma? Kadi, oyangidika Yave, ampangi mpe bekuyangalela ye ngeye kibeni mpe omona e kiese kitukanga muna sadisa akaka.

13-14. Nkia mambu tulenda vanga muna sadisa mpangi zeto? (Tala e fwaniswa kia fukwa.)

¹³ Sianga e sungididi muna nsatu za akaka. Paulu wa ntumwa wavovesa Akristu bazingilanga kuna Yuda vo: “Ke nuvilakani vanga o wete ko yo kayila ankaka ina luna yau, kadi o Nzambi tukau twa mpila yayi keyangalelanga.” (Ayib. 13:16) Ediadi longi diambote kikilu diakala. Vava batambula nkanda wau, ke vavioka kolo ko diavava vo Akristu kuna Yuda basisa nzo zau, yinkita ye yitu yau ana ke basambilanga Yave ko yo ‘tinina muna miongo.’ (Mat. 24:16) Kalukatikisu ko vo muna kolo kiakina diavava vo basadisa muntu yo nkwandi. Avo bakala kala ye fu kia kayila muntu yo nkwandi, diasazu diakala mu kulukilwa e zingu kiampa.

¹⁴ Nkumbu miayingi ke dikalanga diasazu ko kwa mpangi zeto mu kutuzayisa vo lusadisu bavuidi o mfunu. Kasikil’owu, yindula vo mpangi ayakala ntantu zayingi kena zau mu  kuma kia lufwa lwa nkento andi. Nga mpangi ndioyo lusadisu kavuidi o mfunu muna sumba madia, sala e salu yankaka ya nzo yovo natwa mu kalu? Dilenda kala vo ke lombanga lusadisu ko kadi kazolele tokanesa ampangi ko. Kansi, otoma yangalala avo yeto tuvitidi o ntu muna kumvana lusadisu kavuidi o mfunu vitila kalomba. Ke tufwete yindula ko vo vekala yo muntu ankaka okumvana lusadisu yovo kafwete kutuvovesa avo lusadisu kavuidi o mfunu. Ukiyuvula: ‘Avo mono mbwidilu diambu diadi, nkia lusadisu yadi vua o mfunu?’

15. Adieyi tufwete vanga avo tuzolele sadisa akaka?

¹⁵ Ziula e nzila kimana akaka balomba lusadisu. Ke lukatikisu ko vo ozeye ampangi muna nkutakani aku ana bekalanga bakubama ntangwa zawonso mu sadisa akaka. Ke befilanga ampangi ko mu yindula vo tokanesa bekubatokanesanga. Tuzeye wo vo tulenda kubalomba lusadisu tuvuidi o mfunu. Kieleka, tuzolele tanginina mpangi zazi. Mpangi Alan, una ye kimbuta kia mvu 40, una vo nkuluntu oziulanga e nzila kimana akaka banlomba lusadisu. Tala dina mpangi Alan kavova mu kuma kia mbandu a Yesu: “Yesu salu kiayingi kakala kiau, kansi wantu a ntela zawonso bamfinamanga ye ke bakalanga yo wonga ko wa kunlomba lusadisu. Bakala ye ziku vo Yesu okubasadisa. Mono mpe nzolele tanginina e mbandu a Yesu yo songa vo yakubama ngina mu sadisa konso mpangi ovuidi lusadisu o mfunu.”

16. E sono kia Nkunga 119:59, 60, aweyi kilenda kutusadisila mu tanginina e mbandu a Yesu una ufwene?

¹⁶ Ke tufwete yoya ko avo tumwene vo diampasi kwa yeto mu tanginina e mbandu a Yesu mu mpila yalunga. (Yak. 3:2) Kasikil’owu, o nlongoki olongokanga bandula kalendi bandula e fwaniswa ko nze una nlongi andi  kebandulwilanga. Kansi o nlongoki okwamanene longoka muna vilwa wandi yo sia ngolo za tanginina nlongi andi una ufwene. Kuna kulanda, o nlongoki ndioyo onungunuka kikilu muna umbangu wa bandulwila. Diau dimosi mpe kwa yeto, avo tusadila mana tulongokanga muna Bibila yo sia e ngolo za soba, tulenda kweto tanginina mbandu a Yesu una ufwene.—Tanga Nkunga 119:59, 60.

17-18. Nkia nluta tuvua avo tutanginini luzolo lwa Yesu lwa sadisa akaka?

¹⁷ Vava tusonganga luzolo lwa sadisa akaka, mpangi zankaka mpe balenda tanginina e mbandu eto. Mpangi Tim una vo nkuluntu wavova vo: “Mu nkutakani eto tuvuidi mpangi zayingi bena vo aleke batumbikilu se selo ya salu kadi batanginini mpangi zankaka ana besonganga luzolo lwa sadisa akaka. Aleke awaya betoma sadisanga akuluntu kumosi ye nkutakani yawonso.”

¹⁸ E nza tuzingilanga yazala ye wantu ana betokanenanga kaka e wete dia yau kibeni. Kansi, nkangu a Yave waswaswana. E mbandu a Yesu ya sia e wete dia akaka va fulu kiantete, ikutusivikisanga kikilu yo kutufila mu tanginina e mbandu andi. Dialudi vo, ke tulendi tanginina Yesu ko mu mpila yalunga, kansi tulenda ‘landa ntambi zandi una ufwene.’ (1 Pet. 2:21) Ekolo tuvanganga mawonso tulenda muna tanginina luzolo lwa Yesu lwa sadisa akaka, yeto mpe tukala ye kiese kadi tuzeye wo vo Yave tuyangidikanga.