1. Ino nkulyaaba kwabuyani bantu bakwe Yehova nkobacita?

 BAIBO yakaambila limwi ayi bantu bakwe Lesa “balakulyaaba amyoyo yoonse” muncito yakwe Yehova ndyebatokonkela butanjilishi bwakwe Yesu. (Kulu. 110:3) Ncakutatoonsha kwaamba ayi bushinshimi ubu butokumanishikwa munshiku shino. Mwaaka amwaaka, basebenshi bakwe Yehova basebensa cankusu, balasebensa mawoola aanji muncito yakushimikila. Balacita boobo mukuliyandila alimwi tabalipilwi. Alimwi balasebensesha ciindi cabo kucafwa bashominyinaabo lwakumushimu, lwakumubili alimwi akubayuminisha. Bamanene alimwi abasebenshi bacafwilisha, balatola ciindi cilaamfu kulibambila mbasu shakumabungano alimwi akucita bweembeshi kubashominyinaabo. Ino nciinshi cibayuminisha kucita shoonse ishi? Nceebo cakwaamba ayi balisuni Yehova alimwi abantu.​—Mate. 22:37-39

2. Kweelana a Bene Loma 15:1-3, ino ncakubonenaako ca buyani Yesu ncaakatondesha?

² Yesu wakatondesha cakubonenaako cibotu kwiinda mukubikila maano abuumbi kushintu shakalinga kuyandika bamwi. Tuleelesha kucita nsheenga twacikonsha kwaamba ayi tunokonkela cakubonenaako cakwe. (Amubelenge Bene Loma 15:1-3.) Abo bakonkela cakubonenaako cakwe balaakucana shoolwe. Yesu wakaamba ayi: “Kupa kulapa lusangalalo abuumbi kwiinda kutambula.”​—Milimo 20:35.

3. Ino nshiinshi nsheshi twiiye mumutwi uyu?

³ Mumutwi uyu, tutobandika pashintu shimwi Yesu nshaakacita kwaamba ayi acafwe bamwi ambweenga twakonkela cakubonenaako cakwe. Tutobandika ansheenga twaciita kwaamba ayi tusunishishe kunoocafwa bamwi.

4. Ino nshiinshi Yesu nshaakacita shakatondesha ayi wakalinga kubikila maano abuumbi kushintu bamwi nshobakalinga kuyandika?

⁴ Yesu wakalyaaba kucafwa bamwi nabi ndyaakalinga kulemete. Amuyeeye Yesu nshaakacita bantu baanji ndyebakaya kulinguwe ndyaakalinga kukalundu, mpashi kufwiifwi aku Kapenaumu. Yesu ndyaakalinga kukalundu mashiku alya, wakacesha kapaila. Alyeelete wakalema abuumbi. Sombi ndyaakabona bantu baanji, wakanyumfwila nkumbu bakandu alimwi abalwashi. Aboobo wakabashilika alimwi akwaamba likani liyuminisha abuumbi liitwa ayi Likani lya Pakalundu.​—Luka 6:12-20.

5. Ino mitwi ya mikwashi batokonkela buyani cakubonenaako cakwe Yesu cakulyaaba nabi ndyebalemete?

⁵ Mitwi ya mikwashi mboitokonkela cakubonenaako cakwe Yesu. Amuyeeye pacakubonenaako ici: Pesule lyakusebensa cankusu kuncito bushiku boonse, mushali musankwa walema. Mpashi alisuni kwaamba ayi bushiku ubo bataciti Kulambila kwa Mukwashi. Nacibi boobo, wapaila kuli Yehova kwaamba ayi amupe nkusu shakucikonsha kutanjilila Kulambila kwa Mukwashi. Yehova wakumbula mupailo wakwe, lyalo baba a Kulambila kwa Mukwashi bweenka mbobacita lyoonse. Ici cacafwa baana kwiiya kwaamba ayi shintu shakumushimu shilayandika abuumbi kwiinda cintu cimwi cili coonse.

6. Ino Yesu wakasebensesha buyani ciindi cakwe kucafwa bamwi?

⁶ Yesu wakalinga kusebensesha ciindi cakwe kucafwa bamwi. Amuyeeyebo Yesu mbwaakalinyumfwa ndyaakanyumfwa ayi Joni Mubombeki shicibusa wakwe wacaikwa. Alyeelete wakalinyumfwa cibiibi abuumbi. Baibo ilaamba ayi: ‘Yesu ndyaakanyumfwa [ayi Joni wacaikwa], wakenjila mubwaato akuswaako uko. Wakaya kumusena umwi kwatakalinga bantu kwaamba ayi abe eenka.’ (Mate. 14:10-13) Inga twanyumfwishisha cakapa kwaamba ayi asune kuba eenka. Bantu bamwi balalila ndyebali beenka na kabacite buumba. Nacibi boobo, tacina kukonsheka kwaamba ayi Yesu abe eenka. Bantu baanji bakataanguna kushika kumusena nkwaakalinga kusuni kuya lakwe kaatana kushika. Ino Yesu wakacita buyani? Wakabona nshobakalinga kuyandika alimwi “wakabanyumfwila nkumbu.” Yesu wakabona ayi bakalinga kuyandika kucafwikwa lwakumushimu, aboobo wakatalika kubacafwa peenkapo. Alimwi “wakatalika kubeeisha shintu shiinji.”​—Maako 6:31-34; Luka 9:10, 11.

7-8. Amwaambe cakubonenaako citotondesha bamanene batondesha lusuno mbobakonkela cakubonenaako cakwe Yesu na umwi mulibungano atoyandika lucafwo.

 ⁷ Bamanene batondesha lusuno mbobakonkela cakubonenaako cakwe Yesu. Tulalumba abuumbi pancito bamanene njobasebensa cakulyaaba kwaamba ayi batucaafwe. Bamakwesu abenankashi baanji mulibungano tabacishiwo incito shoonse bamanene nshobasebensa. Kucakubonenaako, na mukwesu nabi nankashi atoyandika lucafwo pamakani ashakucipatela, bamakwesu basebensa Mukomiti Ilanga Pamakani Ashakucipatela balafwambaana kumucafwa. Alimwi liinji shamushobo uyu shilacitika mashiku! Sombi ceebo cakunyumfwila nkumbu mukwesu nabi nankashi utoyandika lucafwo, bamanene aba batondesha lusuno pomwi amikwashi yabo, balabikila maano kushitoyandika bashominyinaabo kwiinda nshebatoyandika.

⁸ Alimwi bamanene balaabanamo lubasu muncito yakuyaka Maanda a Bwaami, misena yakubunganinaamo kwiilikaawo akupa lucafwo paciindi ndyekwacitika mapensho akutengashila. Alimwi balasebensesha bunene ciindi cabo kutwiisha akutuyuminisha. Tulyeelete kunoobalumba abuumbi bamakwesu aba boonse pomwi amikwashi yabo. Yehova aabape shoolwe ceebo camushimu wakulyaaba ngobatondesha! Ncakwiila bweenka mbuli ndiswe soonse, bamanene abalo balayandika kunookweelanya kabotu shintu. Tabeelete kunoosebensabo ncito shamulibungano cakwaamba ayi babula aciindi cakulama mikwashi yabo.

9. Kweelana a Bene Filipi 2:4, 5, ino nshiinshi Beneklistu boonse nshobeelete kucita?

⁹ Amubelenge Bene Filipi 2:4, 5. Teshibo bamanene beenka bayandika kutondesha mushimu wakulyaaba. Soonse inga tweeya kuswa kucakubonenaako  cakwe Yesu cakutondesha mushimu wakulyaaba. Baibo ilaamba ayi ‘wakalibika muciimo cabusha.’ (Filip. 2:7) Amuyeeye nsheenga tweeya kuswa ku lilembo ili. Musha na musebenshi alalangoola nshila sha mbweenga wasangalasha mwaami wakwe. Mukwiinga muli basebenshi bakwe Yehova alimwi mulasebensela bashominyinaanu, ncakutatoonsha kwaamba ayi mulisuni kusebenseshekwa abuumbi a Yehova alimwi akusebensela bashominyinaanu. Inga mwacita boobo kwiinda mukukonkela shakucita shitokonkelaawo.

10. Ino njimiipusho nshi njotweelete kuliipusha?

¹⁰ Amuyeeye pa mbomubona shintu. Inga mwaliipusha miipusho mbuli: ‘Sa ndalyaaba kusebensesha ciindi ankusu shangu kucafwa bamwi? Kucakubonenaako, ino inga ndacita buyani na bansenga kwaamba ayi mfwakashile mukwesu wacinene uli kumusena nkobalamina bacinene, na kutola nankashi wacinene kumabungano? Sa ndafwambaana kulyaaba kucafwa na kwaba kuyandika kwa kubotesha musena nkotucitila kubungana kunene na kubamba Ŋanda ya Bwaami?’ Ndyetwakalyaaba kuli Yehova, twakashomesha ayi tulakunoosebensesha shintu shesu shoonse kumusebensela. Alisuni ayi tunoosebensesha ciindi, nkusu shesu alimwi ashintu shesu kucafwa bamwi. Aboobo alasangalala na katucafwako bamwi cakulyaaba. Ino nshiinshi nsheenga twaciita na twaboona ayi kuli mpotweelete kusebenselawo kwaamba ayi tucite kabotu?

11. Ino kupaila inga kwatucafwa buyani kwaamba ayi tube amushimu wakulyaaba?

¹¹ Amupaile kuli Yehova camoyo woonse. Mpashi mutoobona ayi kuli pamwi mpomweelete kusebensela kwaamba ayi munotondesha mushimu wakulyaaba. Sombi mutolinyumfwa ayi inga tamucikonshi. Na ubo mbomutolinyumfwa, amupaile kuli Yehova kuswa panshi lya moyo. Amulwiite Yehova mbomutolinyumfwa akumusenga kwaamba ayi amupe lusuno ‘ankusu shakucitawo comwi.’​—Filip. 2:13.

12. Ino nshiinshi bamakwesu bacanike bakabombekwa nsheenga bacita kwaamba ayi bacafwilishe mulibungano?

¹² Na muli mukwesu wacanike wakabombekwa, amusenge Yehova kwaamba ayi amucaafwe kuba alusuno lwakucita shiinji mulibungano. Mushishi shimwi bamanene mbaanji kwiinda basebenshi bacafwilisha. Alimwi basebenshi bacafwilisha baanji mbacinene. Libunga ndyelitooya cikomenenaako, tutoyandika bamakwesu bacanike baanji bakutucafwa kulama bantu bakwe Yehova. Mulaakusangalala na mwalyaaba kusebensa ncito iliyoonse njeenga mwapeekwa. Ino nceebonshi? Mukwiinga mulaakusangalasha Yehova, mulaakuba ampuwo ibotu alimwi mulaakuba alusangalalo ceebo cakucafwa bamwi.

13-14. Ino nshiinshi nsheenga twaciita kwaamba ayi tucafwe bamakwesu abenankashi? (Amubone cikope cili papeeji yakutaanguna.)

¹³ Amubikile maano kushintu shitoyandika bamwi. Paulo wakalwiita Beneklistu baku Judeya ayi: “Mutaluubi kucita shibotu alimwi akucafwana ceebo iyi njemilambu isangalasha Lesa.” (Ebu. 13:16) Aya akalinga makani acafwa abuumbi! Ndyepakeendabo ciindi ciniini kuswa ndyebakatambula nkalata iyi, Beneklistu baku Judeya bakalinga kweelete kushiya maandaabo, makwebo, alimwi abeshikamukowa batakalinga bashomi, lyalo akutalika “kucicila kutulundu.” (Mate. 24:16) Ncakutatoonsha kwaamba ayi paciindi ici bakalinga kuyandika kunoocafwana. Na bakalinga kukonkela kululika kwakwe Paulo ishi kashitana kucitika, cilyeelete kwaamba ayi cakalinga cuubu kushibila bukaalo ubu bupya.

¹⁴ Teshi lyoonse bamakwesu abenankashi ndyeenga batulwiita nshebatoyandika. Kucakubonenaako, mpashi mukwesu wakafwitwa mukaakwe inga wayandika kumucafwaako anciito mbuli kuteleka, makani abwakweenda, na nciito shimwi shapalubaansa. Mpashi inga taatulwiiti nshatoyandika ceebo cakuyeeya ayi inga watupa mukuli. Sombi inga walumba na twacitawo  comwi kwaamba ayi tumucaafwe nabi kaatana kutusenga ayi tumucaafwe. Tatweelete kuyeeya ayi umwi alaakumucafwa, na mpashi ayi uyo utoyandika lucafwo ananootulwiita lyoonse na kuli ncatoyandika. Amuliipushe ayi, ‘Ino nshiinshi nsheenga ndasuna bamwi kuncitila na kaandi mubukaalo ubu?’

15. Ino nciinshi ncotweelete kunoocita na tulisuni kunoocafwa bamwi?

¹⁵ Amube muntu ngweenga caba cuubu kubandikaakwe. Ncakutatoonsha kwaamba ayi mulishi bamakwesu abenankashi mulibungano lyanu balibambite lyoonse kucafwa bamwi. Tabatupi kulinyumfwa anga tutoobapa mukuli na batucafwa. Tulicishi kwaamba ayi lyoonse balilibambite kutucafwa alimwi inga twasuna kukonkela cakubonenaako cabo! Munene mulibungano waliina lya Alan uyo ucite myaaka 45, alisuni kuba muntu bamwi ngweenga caba cuubu kubandikaakwe. Kwaamba pacakubonenaako cakwe Yesu, ba Alan bakaamba ayi: “Yesu wakalinga kucite shakucita shiinji, sombi bantu bashiimo shipusenepusene bakalinga kumusuni alimwi bakalinga kulinyumfwa kwaanguluka kumusenga lucafwo. Bakalinga kucishi ayi ngumuntu ubabikila maano abuumbi. Ndisuni kukonkela cakubonenaako cakwe Yesu alimwi akushibikwa mbuli muntu ngweenga caba cuubu bamwi kubandikaakwe, utondesha lusuno alimwi ubikila maano.”

16. Ino kukonkela shaamba Kulumbaisha 119:59, 60 inga kwatucafwa buyani kukonkela cakubonenaako cakwe Yesu?

¹⁶ Tatweelete kulefuka na twaalilwa kukonkela cakubonenaako cakwe Yesu cakumaninina. (Jemu. 3:2) Shikwiiya inga taacikoonshi kukonkela cakumaninina cakubonenaako ca wooyo utomwiisha. Nacibi boobo, inga watolelela kuya panembo na kaiiya kuswa kushilubo shakwe akweelesha cankusu kukonkela cakubonenaako ca wooyo utomwiisha. Aswebo inga twakonkela cakubonenaako cakwe Yesu na katukonkela nshetwiiya paciiyo ca Baibo capalweesu alimwi akutolelela kweelesha kusebensela pa mbasu  nshetutaciti kabotu.​—Amubelenge Kulumbaisha 119:59, 60.

17-18. Ino nshoolwe nshi nsheshi tukacane na katukonkela cakubonenaako cakwe Yesu cakutondesha mushimu wakulyaaba?

¹⁷ Na katulyaaba kucafwa bamwi, bamwi inga bakonkela cakubonenaako cesu. Munene mulibungano waliina lya Tim wakaamba ayi: “Bamakwesu bamwi bacanike abuumbi bakeelela kuba basebenshi bacafwilisha. Comwi cakabacafwa kweelela nkubona bamwi mbobakalinga kulyaaba kucafwa bamwi, aboobo abalo bakalinga kusuni kukonkela cakubonenaako cabo. Bamakwesu aba bacanike balacafwilisha bamanene alimwi alibungano.”

¹⁸ Tulekala mucishi muli bantu baanji balisuni. Sombi bantu bakwe Yehova teshi mbobabete. Cakubonenaako cakwe Yesu cakutondesha mushimu wakulyaaba catuyuminisha, aboobo tulisunishishi kukonkela cakubonenaako cakwe. Ncakwiila inga tatukonkeli cakubonenaako cakwe cakumaninina, sombi inga tweelesha kukonkela mwaakeenda. (1 Pit. 2:21) Ndyetutookweelesha cankusu kukonkela cakubonenaako cakwe Yesu cakutondesha mushimu wakulyaaba, aswebo tulaakusangalala ceebo cakwaamba ayi tutoosangalasha Yehova.