1. N’nga atu a Yohova tanoira vyongo vyapama viivi?

WALELENE, Bibilya latoonga ira atu a Nlungu tanodha “dhivelela mofunechecha” vomlabela Yohova mosogoleliwa na mwanee. (Sal. 110:3) Ulosi wen’na unaakwakwaneli-edhiwa malambowano. Yawa iliyothene, anamalaba athindi a Yohova, tanolaleela wu maora manjinji. Aliwa anoira vyevi mofunawiwa thitho tano-indi-edha basa vyongo viwa. Tanoakami-a abali naarongola voava-a vinofuneela aliwa, aalimbi-a, noakami-a kala vauxamwali wapama na Yohova. Abali aizo tanomala mahora manjinji takozeelanga vikundu viva-iwile aliwa vamigumanoni noawendelanga abali naarongoliwa. Mwasiwa ngwani ninoira vyothene vyevyi? Mwasa oi ninomdhiveliwana—Yohova thitho abali naarongoli-u.—Mat. 22:37-39.

2. Movwelana na lemba la Aroma 15:1-3, n’nga Yesu avelenle ifwanafwani-o yoi a-vi?

² Yesu atooni-a ifwanafwani-o yapama maningi vo-ela valimburo loroma vyofuna vyaatu enango a-kala vyee. Ninoira vyothene vinaode i-yo vomsazi-edha. (Muleri Aroma 15:1-3.) Atu anovilimbi-edha msazi-edha anodha kaana maraeli-o. Yesu aongile ira: “Va-a unodhi-a imwerumweru injinji kwaranya wachela.”—Mayir. 20:35.

3. N’nga ninofuna nitapanyenin’ni muyofunjedha yei?

³ Muyofunjedha yei, ninotapanya vyairile Yesu ira alabelenga atu enango thitho mwemo munasazi-edhele i-wo. Ninofunjedha thitho vinaire i-yo ira nikaengana rima ofunechecha labela atu enango.

4. N’nga Yesu a-elile a-vi vyofuna vyaatu enango vasogolo a-kala vyee?

⁴Yesu anokami-a atu enango angalive anoochela. Kathuulelani vyairile Yesu angaoni mwinji waatu udhanga waliye chindo  mwa mwango venango, duzi na kapernau. Liye ali angachedhile nolobela vaisi yenio. Vyevi vinooni-a ira liye ali angachenyenle vinjinji, mbwenye angaoni mwinji waatwao, liye atoroma thuulela vinjinji vyaatu obulela na osauwa tali vevo. Yesu kaate aili-a baa-i arendao, mbwenye atoonga mwasa mwamyasa yolimbi-a vinjinji yenio inaidhiweyana—ulaliki wavamwangoni.—Luka 6:12-20.

5. N’nga alombwana tali miru yamabanja tanasazi-edha a-vi Yesu takala ochenyela?

⁵Miru yamabanja munoirela aliwa vyongo vomsazi-edha Yesu. Kathuulelani ifwanafwani-o ila: Vanduli volaba basa dambo lothene, lombwana uli muru wa banja unofiya vandhe angamadhi chenyela. Angalive ira unokaana mathuulelo oi ta-aire lambela wavabanjani dambo lelo, liye unovepa Yohova ira amva-e kopolo ira taire lambela wavabanjani. Voi e-no Yohova utowakula lobelolee thitho labela wavabanjanio, unaaireya ninga munoirelecha aliwa hora dhothene. Dambo lelo a-imee anofunjedhavo likundo lofuneya vinjinji, loi anamabaliwa tanoona vyongo vyauzimu kala vyofuneya maningi kwaranyedha yongo iliyothene.

6. Ongani ifwanafwani-o yooni-a mwemo Yesu mwa-indi-edha liye basa hora yoira vyongo vaekene vokami-a atu enango.

⁶Yesu anookami-a atu enango vaora ile vyafwanela liye ira vyongo vinango vaekene. N’nga munooda thuulelani mwemo Yesu mwavivwela liye angaidhi ira Juwau namabatiza utopiwa? Liye atokaana tangaranga vinjinji. Bibilya linoonga ira: “Yesu angavwide vyevi, [vyoonga piwa wa Juwau], atookuma wali liye namwadiya dhowa wulimburo wa-ali atu ira amakale vaekene.” (Mat. 14:10-13) Ninooda vwechecha mwasiwa wafunela liye kala vaekene. Anjinji a i-yo ninodhiveliwa kala vaokene nakala osukwala. Mbwenye wa Yesu, vyevi kavyaodeile. Mwinji waatu watofiya ulimburonio liye a-anafiyeo. N’nga Yesu airilen’ni? Liye atoroma thuulela vyafuneela atwao, thitho “atoavwela tangaranga.” Liye atovaelatu ona ira atwao tanofwanela limbi-iwa mwauzimu, voi e-no atoalimbi-adi. Voi e-no, atoroma aafunji-a “a-kala [muvyongo vyoeva,  mbwenye] muvyongo vinjinji.”—Marku 6:31-34; Luka 9:10, 11.

7-8. Ongani ifwanafwani-o yaandimuwa avapingoni audhivela munasazi-edhela aliwa Yesu vokami-a atu, abali naarola.

⁷Mwemo andimuwa avapingoni audhivela munosazi-edhela aliwa Yesu. Ninosimba vinjinji basa lelo andimuwa avapingoni odhivelela linolaba aliwa vonikami-a! Mumabasa manjinji anolaba aliwa, abali naarongola pingoni katinaaona. Mofwanafwani-a, andimuwa avapingoni enao tanokami-a Komisau Yoongana Ximitari, anombaranya ira takami-e Makristau afwiwa tafuneelanga kami-iwa. Muhora dhinjinji vyevi vinoireecha vari vama-iyu! Namwasa oadhiveliwa abali aguman’nena nyarwa, andimuwa avapingonala vambo-i na mabanjiwa, tano-ela valimburo loroma vyofuna vya Makristau afwiwa a-kala viwa.

⁸ Andimuwa avapingoni tanokami-a thitho vabasa lomanga Nyumba dha Umwene na vyongo vinango vya guluni, thitho tanokami-a vaireya masoka avilengo. Thitho vatokala vinjinji vinaonge i-yo vyevyo andimuwa avapingoni vi-u vinoira aliwa vonilangi-a, nilimbi-a, thitho nikami-a. Ninofwanela asimbanga vinjinji abalala vambo-i namabanjiwa. Yohova adhowenave araeli-a namwasa wa rimiwa odhivelela! Mbwenye mofwanafwana na uliwethene, naandimuwene avapingoni, tanofwanela ira vyongo mothuulela pama. Aliwa katinofwanela kalelangave ira vyongo vyokuza urumiwiwa fiyedhela imwanana samalela mabanjiwa.

9. Movwelana na lemba la Afilipi 2:4, 5, n’nga Makristau othene anofwanela kaana mathuulelo oi a-vi?

⁹ Muleri Afilipi 2:4, 5. Pyaimbarimbari ira i-yo othene, kanili andimuwa avapingoni, mbwenye ninooda sazi-edha rima wa Yesu  vofunechecha kami-a abali naarongola. Bibilya linoonga ira liye ali “ninga dhaari.” (Afil. 2:7) Kathuulelani likundoli vinothapulela aliwa. Dhaari wapama unovilimbi-edha munaodele liye, ira adhiveliwi-e patrawee. Ninga dhaari wa Yohova na mutu unolabela abalee, pyo-okaikela ira munofuna labela Makristau afwinyu. Makundo o-arela anoukami-ani irana vyongo vyevi.

10. N’nga ninadhifuke vyofuka viivi?

¹⁰Musakesakenga vifunelo vinyu. Mudhifukenga vyofuka ninga vi: ‘N’nga miyo ndili ofunechecha e-la vyofuna vyaatu enango valimburo loroma ira ndaakami-e? Mwaifwanafwani-o, n’nga ndiwakule a-vi, akala nditovepiwa ira ndimawaredhele bali oulula venango mtukula rongola oulula vodhowa migumanoni? N’nga miyo ndili ombaranya vovivelela vafuneyanga atu ira tamakami-e cheni-a valimburo loireliwa gumano wa isa na wagawo venango sakaedha va Nyumbani ya Umwene?’ Yohova unosangalala namwasa waudheveli-u navelelanga hora na vyongovi-u, vokami-a atu enango. N’nga ndinaire a-vi akala ninoona ira ninofwanela chinja mwemo munairela i-yo vyongo, vokami-a abali naarongola?

11. N’nga lobelo linanikami-e a-vi ira nifunechechenga kami-a abali naarongola?

¹¹Nilobelenga wa Yohova kumela vathi va rima. Nifwanafwani-edhe ira mutozindiyela ira munofuna saka-edha vyongo vinango, mbwenye mutoona ira kamunofuna irana vyevo. Akala vili e-no, mulobelenga wa Yohova kumela vathi va rima. Mum’mwandelenga imbarimbari ninga mule munovwela nyo. Thitho muvepenga ira alimbi-e vyofuna vinyu, ira “mwiirenga vyongo vyothene vinodhiveliwana liye.”—Afil. 2:13.

12. N’nga bali wazombwe obadiziwa unakami-e a-vi pingoni?

¹² Akala muli bali wa zombwe obadiziwa, mumvepenga Yohova ira aukami-eni kaana rima ofunechecha irana vyongo vinjinji pingoni. Vilambo vinjinji, andimuwa avapingoni mbaanjinji mo-iyana na arumiwi okami-a, mbwenye anjinji mwa arumiwi okami-ala kai azombwe. Vevo gululi munoulukula aliwa, vanofuneyave abali anjinji aazombwe ira takami-enga vosamalela atu a Yohova. Munodha sangalala vinjinji, akala muli ofunechecha labela ulivothene wewo unafuneeleya. Mwasiwa ngwanni ninoonga ee-no? Namwasa oi munodha mdhiveliwi-a Yohova, munodha kaana limbili lapama thitho munodha kaana imwerumweru inodha namwasa okami-a abali naarongola.

13-14. N’nga ninaire vyongo viivi vofuna kami-a abali naarongoli-u? (Muone iruthiruthi yavakapani.)

¹³Mukalenga ovuruwanechecha ira muone vinofuneela atu enango. Rumiwi Paulo atowalimbi-a Makristau Auebere ira: “Kamudiwale irana vyapama gawana vyongo naatu enango, namwasa oi sembe dhoi e-no Nlungu unodhidhiveliwana.” (Aeb. 13:16) Enala ali malangi-o okami-a! Namwasa oi va-anavire hora indendai kumela vawachenle aliwa karta yen’na, Makristau au Yuda tanofwanela i-yachi nyumba dhiwa, malondiwa, naabaliwa ta-ali Makristau, “notawela myangoni.” (Mat. 24:16) Pyo-oira fuka ira vahoriyo, aliwa tafuneela kami-ana maningi. Aakale ira Makristauwala taromile wale a-rela malangi-o a Paulo oi tagawanenga naatu enango vyevyo vinaaliwa, vingakanle vyo-orucha lemeela makalelo mapya wewo watawele aliwawo.

¹⁴ Kai hora dothene ira abali naarongoli-u anoniwandela vinofuneela aliwa. Mofwanafwani-a, nifwanafwani-edhe ira bali mwinango, i-yanee utokwa. N’nga balula unofwanela kami-wa vamwasa wa vyodya, mawendelo venango mabasa avandhe? Pyooneya ira liye kanaoda vepa yongo iliyothene voova  ira unongoniwoni-a nyarwa. Mbwenye unooda simba vinjinji akala nitomkami-a vo-odedi-edhela ira anivepe. Kaninofwanela thuulelanga ira abali enango tanomkami-a thitho ira hora dhothene unongoniwandela mwemo munamkami-edhe i-yo. Dhifukeni ira ‘N’nga aakale ninga miyo, ndafune ira abali enango tandikami-e moi a-vi?’

15. N’nga ninofwanela sikimizela rimanimwi-u iranan’ni, ira nikami-enga abali naarongoli-u?

¹⁵Mukalenga owaredheleya. Mo-okaikela mutoidhiwa abali naarongola apingoni mwinyu anokala okozeya vokami-a abali naarongola. Mbwenye aliwa katinairi-a ira nionenga ira ninoawoni-a nyarwa. Nitoidhiwa ira ninoanyindela nagumanana vyorucha thitho ninofwanela asazi-a! Alan, ndimuwa wa pingoni wa vyawa 40, unofuna ira atu enango takalenga othathuwa vovepa kami-iwa. Vothuulela ifwanafwani-o ya Yesu, Alan aongile ira: “Yesu akalecha opingeya, mbwenye atu atunga nlilothene tanomdhiveliwana thitho kataova vomvepa ira aakami-e. Aliwa tam’mona ira ngumutu aadhiveliwana vinjinji. Ndinofuna a-rela ifwananafwani-o yee, noidhiweya ninga mutu olemeeleya, wauxamwali, thitho othuulela abali naarongola.”

16. N’nga indi-edha basa malangi-o ava lemba la Salimo 119:59, 60 unaukami-eni a-vi msazi-edha Yesu mwapolepole?

¹⁶ Kaninofwanela sukwala akala ninoimwanana msazi-edha Yesu mokwakwanela. (Tiy. 3:2) Mofwanafwani-a, namafunjedha kanaode kwakwaneli-edha pama vinoira namafunji-ee. Mbwenye afunjedhangavo yongo vavinodawi-a liye novilimbi-edhanga sazi-edha namafunji-eo mwapolepole, liye unodhowanave wenjedhela dodolisolee. Mofwanafwana na vyevi, na-indi-edhanga basa vifunjedhile i-yo vofunjedha Bibilya vaokene novilimbi-edha saka-edha vinodawi-a i-yo,  ninooda kwakwaneli-edha ifwanafwani-o ini-iyedhele Yesu.—Muleri Salimo 119:59, 60.

17-18. N’nga ninodha wachela maraeli-o oi a-vi namwasa o-arela rima wan’na Yesu ofucheche kami-a atu enango?

¹⁷ Abali enango tanooda sazi-edha ifwanafwani-o yi-u vofunechecha kami-a abali naarongola. Bali mwinango dhinalee Tim aongile ira: “Nitokaana abali anjinji aazombwe adhowile vasogolo mombaranya fiyedhela kala arumiwi okami-a, thitho enango mwaaliwa tairile vyevyi tangana vyawa vyoeva. Namwasa wa rimiwa ofunechecha kami-a atu, abalala tanokami-a maningi pingo vambo-i naandimuwa.”

¹⁸ Ninokala mwiilambo yoi atu anjinji mbovidhiveliwana okene. Mbwenye atu a Yohova mbo-iyana maningi naatu ailamboi. Ninokuzeya narima wan’na Yesu ofuna kami-a atu enango thitho nili osikimiza ira nimsazi-edhenga. Pyaimbarimbari ira kaninaode msazi-edha mokwakwanela, mbwenye ninooda “a-rela manyalwee mwapolepole.” (1 Pe. 2:21) Nairanga vyothene vinaode i-yo vosazi-edha rima wan’na Yesu ofuna kami-a atu enango, ninokala aimwerumweru namwasa oi Yohova unonisangalalana.