1. Ki moya mañi omunde obanani ona batu ba Mulimu?

LILIMO zeñata-ñata kwamulaho, Bibele neipolofitile kuli batu ba Mulimu ‘nebaka ifana ka kuitatela’ kuli basebeleze Jehova ka ketelelo ya Mwanaa hae. (Samu 110:3) Kusina kukakanya, bupolofita bo, busweli bwatalelezwa kacenu. Silimo ni silimo, batanga ba Jehova babanani tukufalelo batandanga lihora zeñata-ñata mwa bukombwa. Baezanga cwalo ka kuitatela basatokwi kulifiwa sesiñwi. Hape batusanga Bakreste babañwi kwa mubili, kubasusueza, ni kubatiisa kwa moya. Baana-bahulu ni likombwa za puteho batandanga nako yeñata kuitukiseza lingambolo ni kulisa mizwale ni likaizeli babona. Ki lika mañi zebasusueza kueza musebezi wo kaufela? Ki lilato labona ku Jehova ni batu babañwi.—Mat. 22:37-39.

2. Sina mokuboniselizwe kwa Maroma 15:1-3, ki mutala mañi walutomezi Jesu?

² Jesu ulutomezi mutala omunde hahulu wa kubeya lika zebatokwa babañwi mwa sibaka sapili. Luswanela kueza molukonela kaufela kumulikanyisa. (Mubale Maroma 15:1-3.) Haiba lueza cwalo, lukafuyaulwa hahulu. Jesu naabulezi kuli: “Kunani tabo yetuna mwa kufana yefita ye mwa kufiwa.”—Lik. 20:35.

3. Lukanyakisisañi mwa taba ye?

³ Mwa taba ye, lukanyakisisa lika zeñwi zanaaitombozi Jesu kuli asebeleze babañwi, mi lukabona molukona kulikanyiseza  mutala wahae. Hape lukanyakisisa zekona kulutusa kutabela kusebeleza babañwi.

4. Jesu naabonisize cwañi kuli naabeile lika zene batokwa babañwi mwa sibaka sapili?

⁴Jesu naatusanga batu babañwi niha naakatezi. Munyakisise zanaaezize batu babañata hane baile kuyo mukatanyeza kwatuko ni lilundu, mwendi bukaufi ni Kapernauma. Jesu naatandile busihu kaufela inzaa lapela. Ulukela kuba yanaakatezi hahulu, kono hanaaboni buñata bobutuna bwa batu, ashwela makeke babotana ni bakuli bane bali mwahalaa bona. Naasika bafolisa feela kwa matuku ane bakula, kono hape naafile ngambolo yesusueza hahulu, yona Ngambolo ya fa Lilundu.—Luka 6:12-20.

5. Litoho za mabasi bakona kulikanyisa cwañi moya wanaanani ona Jesu wa buitomboli habaikutwa kukatala?

⁵Mobalikanyiseza Jesu litoho za mabasi. Munyakisise muinelo wo: Toho ya lubasi ukutela kwa ndu hamulaho wa kusebeza ka taata kwa mubeleko mi ukatezi hahulu. Nihaike kuli unahana za kusaeza tukiso ya Kulapela Sina Lubasi fa lizazi leo bakeñisa mukatalo, ukupa Jehova kuli amufe maata a kuzamaisa tuto yeo. Jehova ualaba tapelo yahae, mi uzamaisa tukiso ya Kulapela Sina Lubasi sina kamita. Bana bahae baituta tuto ya butokwa fa lizazi leo; baituta kuli bashemi babona baanga lika za kwa moya kuba za butokwa hahulu kufita nto ifi kamba ifi.

6. Mufe mutala obonisa kuli Jesu naaitombozi nako yahae kuli atuse babañwi.

⁶Jesu naaitombolanga nako yahae kuli atuse babañwi. Munahane feela mwanaaikutwezi hanaautwile kuli mulikanaa hae Joani Mukolobezi naapumilwe toho. Jesu ulukela kuba yanaaikutwile hahulu bumaswe. Bibele ibulela kuli: “Hautwa [kuli Joani ubulailwe], aya ka sisepe kwa sibaka sesi kwahule ni batu, kuli ayo ina anosi.” (Mat. 14:10-13) Lwautwisisa libaka hanaabata kuba anosi. Batu babañwi batabelanga kuba banosi hababata kulila. Kono nekuli taata kuli Jesu abe anosi. Buñata bobutuna bwa batu bwafita kwa sibaka sanaaya ku sona pili yena asika fita kale. Jesu naaikutwile cwañi hanaa baboni? Naanahanisisize zene batokwa mi “abashwela makeke.” Naalemuhile kuli  nebatokwa kutusiwa ni kuomba-ombiwa; kacwalo, kapili-pili, akala kubaluta za Mulimu. Mane naasika baluta lika lisikai feela, kono “akala kubaluta lika zeñata.”—Mare. 6:31-34; Luka 9:10, 11.

7-8. Mufe mutala obonisa mo baana-bahulu balikanyiseza mutala wa Jesu mutu yomuñwi hatokwa tuso.

⁷Mobalikanyiseza Jesu baana-bahulu babalilato. Luitebuha hahulu musebezi omutuna obasweli kuluezeza baana-bahulu babanani moya wa buitomboli. Mizwale ni likaizeli mwa puteho habazibangi buñata bwa musebezi obaezanga. Ka mutala, mizwale ba mwa Tutengo Totuswalisanisa Lipaki ni ba Sipatela batusanga mizwale ni likaizeli babona kapili-pili hakuba ni muinelo omuñwi osika libelelwa otokwa kuli baalafiwe kwa sipatela. Hañata, miinelo yesika libelelwa yeo iezahalanga busihu! Kono bakeñisa kuli balata mizwale ni likaizeli babona babatalimana ni miinelo yetaata, baana-bahulu bao ni mabasi abona, babeyanga zebatokwa Bakreste babañwi mwa sibaka sapili.

⁸ Baana-bahulu hape batusanga mwa musebezi wa kuyaha Mandu A Mubuso ni miyaho yemiñwi, hamohocwalo ni kutusa babawezwi ki likozi. Mi baana-bahulu mwa liputeho zaluna batandanga nako yeñata kululuta, kulususueza, ni kulutusa. Mizwale ba kaufela ni mabasi abona baswanela kubabazwa. Haike Jehova abafuyaule kabakala moya wabona wa buitomboli! Nihakulicwalo, sina batu kaufela, baana-bahulu ni bona baswanela kuba ni maciñekelo. Habaswaneli kutanda nako yeñata hahulu kueza lika za puteho kuli mane bapalelwa kuba ni nako ya kutusa mabasi abona.

9. Ka kuya ka Mafilipi 2:4, 5, ki mubonelo mañi obaswanela kuba ni ona Bakreste kaufela?

⁹ Mubale Mafilipi 2:4, 5. Ki niti kuli babañwi ku luna halu baana-bahulu, kono kaufelaa luna lwakona kulikanyisa mutala wa Jesu wa buitomboli. Bibele ibulela kuli Jesu “aba sina mutanga.” (Mafil. 2:7) Munahanisise zelukona kuituta kwa taba yeo. Mutanga yalatiwa uezanga mwakonela kaufela kuli atabise mulenaa hae. Bakeñisa kuli lu batanga ba Jehova mi lusebeleza mizwale baluna, lubata kueza lika zekatabisa Jehova ni kutusa mizwale ni likaizeli baluna. Mukona kueza cwalo ka kusebelisa liakalezo zelatelela.

10. Ki lipuzo mañi zeluswanela kuipuza?

¹⁰Mutatube moya omunani ona. Muipuze kuli: ‘Kana naitombolanga lika zeñwi kuli nituse babañwi? Ka mutala, niezanga cwañi hanikupiwa kupotela muzwale kamba kaizeli wa musupali kamba kumutusa kufumaneha kwa mikopano ya puteho? Kana naifananga hakutokwahala baitateli ba kukenisa sibaka sa mukopano kamba kubabalela Ndu ya Mubuso?’ Jehova watabanga haluitusisa nako yaluna ni maluwo aluna kuli lutuse babañwi kakuli hane luineela ku yena, neluitamile kuli lukaeza cwalo. Luswanela kuezañi haiba lulemuha kuli lutokwa kueza licinceho?

11. Tapelo ikona kulutusa cwañi kuba ni moya wa buitomboli?

¹¹Mulapele ku Jehova ka taata. Luungeñi kuli mulemuha kuli mutokwa kubonisa hahulu moya wa buitomboli kono mupalelwa kueza cwalo. Haiba ki cwalo, mulapele ku Jehova ka taata. Mueze cwalo ka kunonga. Mutaluseze Jehova momuikutwela mi mumukupe kuli amife “takazo ni maata a kuunga muhato.”—Mafil. 2:13.

12. Mizwale babakolobelizwe babasali babanca bakona kutusa cwañi liputeho zebaswalisana ni zona?

¹² Haiba mu mizwale babakolobelizwe babasali babanca, mukupe Jehova kuli amife takazo ya kueza zeñata kuli mutuse mizwale ni likaizeli bamina mwa puteho. Mwa linaha zeñwi, kunani baana-bahulu babañata kufita likombwa za puteho, mi buñata bwa likombwa za puteho zeo sebahulile kamba sebali basupali. Liputeho halinze liekezeha, kutokwahala mizwale babañata babasali babanca kuli batusane ni baana-bahulu kubabalela mutapi wa Jehova. Haiba muitatela kuyo sebeleza kai ni kai kokutokwahala tuso yamina, mukaba ni tabo. Kabakalañi? Kabakala kuli mukatabisa Jehova, kuba ni libubo lelinde, mi mukaba ni tabo yetahiswa ki kutusa batu babañwi.

13-14. Lukona kutusa cwañi mizwale ni likaizeli baluna? (Mubone siswaniso sesi fa kava.)

¹³Mube ni temuho mi muise pilu ku zebatokwa babañwi. Muapositola Paulusi naabulelezi Bakreste ba Maheberu kuli: “Musike mwalibala kueza zende ni kuikabela ni babañwi zemunani zona, kakuli Mulimu utabiswa ki matabelo acwalo.” (Maheb. 13:16) Yeo neli kelezo yende luli! Nakonyana kuzwa fobaamuhela liñolo leo, Bakreste ba mwa Judea nebatokwa kusiya mandu abona, lipisinisi zabona, ni bahabo bona bane basi balumeli ni ‘kukala kusabela kwa malundu.’ (Mat. 24:16) Kusina kukakanya, ka nako yeo, nebatokwa kutusana hahulu kufita lili kaufela. Haiba nebakalile kusebelisa kelezo yanaa bafile Paulusi ya kuli baikabele zabona ni babañwi, nekuka babela bunolo kutwaela mupilelo omunca kwa sibaka sisili kone basabezi.

¹⁴ Fokuñwi, mizwale ni likaizeli baluna habana kulutaluseza kuli batokwa tuso. Ka mutala, mwendi muzwale ushwezwi ki musalaa  hae. Mwendi utokwa kutusiwa kulukisa lico, kufiwa nzila, kamba kutusiwa kueza misebezi yemiñwi ya fa lapa. Mwendi haana kulutaluseza kuli utokwa tuso ka kunahana kuli walukataza. Kono mwendi ukaitumela hahulu haiba lumutusa mane asika kupa kale tuso yeo. Haluswaneli kunahana kuli mutu yomuñwi uka mutusa kamba kuli uka lutaluseza kuli utokwa tuso. Muipuze kuli: ‘Kambe nenili mwa muinelo oswana ni wali ku ona, ki sika mañi sene nikatabela kuli batu baniezeze?’

15. Ki lika mañi zeluswanela kuikatulela kueza haiba lubata kuba ni moya wa buitomboli?

¹⁵Mube babaatumeleha. Kusina kukakanya, mukana mwaziba mizwale ni likaizeli mwa puteho yamina babatabela kutusa babañwi. Habaikutwangi kuli lwabakataza. Lwaziba kuli lwakona kubaatumela halutokwa tuso, mi lubata kubalikanyisa! Bo Alan, baana-bahulu babali mwa lilimo za ma 40 babata kuba babaatumeleha. Habanahanisisa mutala wa Jesu, bo Alan batalusa kuli: “Jesu naali mutu yapatehile, kono batu kaufela, babahulu ni banana neba mulata mi nebalukuluhanga kukupa tuso ku yena. Nebaziba kuli naaiyakatwa bona luli. Nibata kulikanyisa mutala wa Jesu, mi nibata kuzibahala sina mutu yaatumeleha, yanani lilato, ni yaisa pilu batu.”

16. Kusebelisa sikuka sesi kwa Samu 119:59, 60 kukona kulutusa cwañi kulikanyisa hande mutala wa Jesu?

¹⁶ Haluswaneli kuzwafa haiba lupalelwa kulikanyisa Jesu ka kutala. (Jak. 3:2) Mutu yaituta kuswanisa haakoni kulikanyisa ka kutala mutala wa muluti wahae yali caziba. Kono muituti yo hanzaa bolosola mafosisa aeza haswanisa ni kueza mwakonela kaufela kulikanyisa muluti wahae, ukaba muswanisi yomunde. Ka mukwa oswana, ni luna haiba lusebelisa zeluitutile ka nako yene lueza tuto ya  Bibele ya ka butu, kueza molukonela kaufela kutula bufokoli bolukona kuba ni bona, lukakona kulikanyisa hande mutala wa Jesu.—Mubale Samu 119:59, 60.

17-18. Lukatusiwa cwañi haiba lulikanyisa mutala walutomezi Jesu wa buitomboli?

¹⁷ Haiba luba ni moya wa buitomboli, batu babañwi ni bona bakasusuezwa kueza nto yeswana. Muuna-muhulu yabizwa Tim utalusa kuli: “Mwa puteho yaluna, kunani mizwale babasali babanca babaezize zwelopili mi baketilwe kuba likombwa za puteho, babañwi ku bona baketilwe inze basali banana. Leliñwi la mabaka atahisize kuli baeze zwelopili ki kabakala kulikanyisa mutala wa mizwale bane batabela kusebeleza babañwi. Mizwale babasali babanca ba, batusa puteho yaluna hamohocwalo ni baana-bahulu.”

¹⁸ Lupila mwa lifasi, ili mo batu babañata banani buitati. Kono batanga ba Jehova bona habayo cwalo. Lususuelizwe hahulu ki mutala wa Jesu wa buitomboli mi luikatulezi kumulikanyisa. Ki niti kuli halukoni kulikanyisa mutala wahae ka kutala, kono lwakona ‘kuhata ka busepahali mwanaahatile.’ (1 Pit. 2:21) Haiba lueza molukonela kaufela kulikanyisa mutala walutomezi Jesu wa buitomboli, ni luna lukaba ni tabo mi lukatabisa Jehova.