1. Le i ngikadila’ka miyampe yotumonanga mu bantu ba Yehova?

 PANO ke padi myaka, Bible wālaile amba bantu ba Leza “bakepānanga na mutyima tō” mu mwingilo wa Yehova wendejibwa na wandi Mwana. (Ñim. 110:3) Buno bupolofeto bufikidilanga dyalelo. Mwaka ne mwaka, bengidi ba Yehova bapyasakane bapityijanga mansá midiyo tutwa na tutwa mu mwingilo wa busapudi. Bewingilanga ku bitupu kadi balupula lupeto lwabo pa kwiwingila. Kadi betūdilanga’ko kitatyi kya kukwatakanya banababo mu lwitabijo na bisakibwa bya ku ngitu, kwibakankamika, ne kukomeja lwitabijo lwabo. Bakulumpe ne bengidi ba mingilo bapityijanga mansá mavule, bateakanya bipindi bya ku kupwila ne kukumba banababo mu lwitabijo. Le i kika kibalengejanga bengile uno mwingilo? I buswe​—buswe bobasenswe Yehova ne bakwabo.​—Mat. 22:37-39.

2. Mungya Bene Loma 15:1-3, le Yesu wāshile kimfwa’ka?

² Yesu wāshile kimfwa kiyampe, kya kutangidija tumweno twa bakwabo kumeso kwa tumweno twandi. Netu tuloñanga bukomo bwa kumwiula. (Tanga Bene Loma 15:1-3.) Boba bamwiula bakamwena’mo. Yesu wānenene amba: “Nsangaji ya kupāna itabukile ya kupebwa.”​—Bil. 20:35.

3. Le i bika byotusa kwisambila’po mu kino kishinte?

³ Mu kino kishinte tusa kwisambila’mo pa bintu bimo byālongele Yesu mwanda wa kukwasha bakwabo, ne kwisambila pa muswelo otubwanya kwiula kimfwa kyandi. Kadi tusa kwisambila ne pa muswelo otubwanya kwikala na mutyima wa kukwasha bakwetu.

4. Le i muswelo’ka wātangidije Yesu bisakibwa bya bakwabo kumeso kwa byandi?

⁴ Yesu wākweshe bakwabo nansha ke paādi mukōke. Tulangulukilei bidi pa mwalongēle Yesu kitatyi kyākamusambakene kibumbo kya bantu ku lūlu, padi i kubwipi na Kapanama. Yesu wāpityije bufuku bonso ulombela. Wādi mukōke bininge, ino aye pa kumona kibumbo kya bantu, wākwatyilwa lusa balanda ne babela bādi mu bukata mwabo. Kēbabelwilepo’tu bitupu, ino wānenene ne mwisambo wa kasekuseku mu mānga, uyukene bu Busapudi bwa ku Lūlu.​—Luka 6:12-20.

5. Le mitwe ya bisaka iulanga namani mushipiditu wa kwipāna wādi na Yesu kitatyi kyoikōkele?

⁵ Muswelo obeulanga Yesu kudi mitwe ya bisaka. Langulukila’po pa uno mwanda: Ku mfulo kwa difuku dya mingilo, mutwe wa kisaka wajokela ku njibo mukōke bininge. Nansha byadi pa ditompo dya kuleka kulonga Butōtyi bwa Kisaka, ino walombe Yehova amupe bukomo bwa kwendeja’bo. Yehova walondolola milombelo yandi, wefunde na kisaka’nka mwalongelanga. Mu kino kyolwa bana abefunde kintu kya kamweno, amba babo bambutwile bamwene bintu bya ku mushipiditu bu bidi na mvubu kutabuka kintu kyo-kyonso.

6. Leta kimfwa kilombola muswelo wāpēne Yesu kitatyi kyandi mwanda wa kukwasha bakwabo.

⁶ Yesu wāpēne kitatyi kyandi pa mwanda wa bakwabo. Lelo ubwanya kufwatakanya mwēivwanine Yesu paāivwene amba abateta mulunda nadi Yoano Mubatyiji mutwe? Yesu wāivwene bulanda bininge. Bible unena’mba: “Pa kwivwana kino, Yesu wataluka’po lwa bwato kaenda kufula mwanda wa kwitolwela kwa bunka.” (Mat. 14:10-13) Tubwanya kwivwanija kine kyaādi usakila kwikala kwa bunka. Bantu bamo mu bukata mwetu basakanga kwitolwela kwa bunka kitatyi kyobadi na njia. Inoko Yesu kābwenyepo kwikala kwa bunka. Kibumbo kikatampe kya bantu kyābadikile kufika ku kino kifuko aye kafikile’ko. Le Yesu wālongele’po namani? Wālangulukīle pa bisakibwa bya kibumbo, ‘wēbakwatyilwa lusa.’ Yesu wājingulwile amba basakilwa kukwashibwa ne kusengibwa na Leza, ebiya wēbakwasha bukidibukidi. Na bubine, “[wāshilwile]  kwibafundija [ke bintu bityetyepo, ino] bintu bivule.”​—Mako 6:31-34; Luka 9:10, 11.

7-8. Leta kimfwa kilombola’mba bakulumpe ba buswe beulanga Yesu shi kubaikala bisakibwa.

⁷ Muswelo obabwanya kwiula Yesu kudi bakulumpe ba buswe. Tufwijanga’ko bininge pa mwingilo witwingidila bakulumpe na kwipāna! Batutu ne bakaka bavule mu kipwilo kebamonengapo uno mwingilo. Kimfwa, shi kubaikala myanda ya bundapi bwa bukidibukidi, batutu ba mu Komite Utala Myanda ya Lupitalo bapēlakananga kukakwasha banabetu mu lwitabijo. Divule dine myanda ya buno bundapi ifikanga mu bukata bwa bufuku! Ino pa lusa lobakwatyilwanga batutu ne bakaka, bano bakulumpe baswe, pamo ne bisaka byabo, batangidijanga tumweno twa bakwabo kumeso kwa tumweno twabo.

⁸ Kadi bakulumpe bakwashanga ku mwingilo wa kūbaka Mobo a Bulopwe ne mobo makwabo a kukwasha boba baponenwe na bimpengele. Kadi bakulumpe ba mu kyetu kipwilo bapityijanga mansá mavule, betufundija, betukankamika, ne kwitukwasha. Bano batutu ne bisaka byabo bafwaninwe kufwijibwa’ko bya binebine. Bine, Yehova ekale nabo pobalombola uno mushipiditu! Shako, pamo bwa muntu ye-yense, bakulumpe bafwaninwe kwikala na bujalale. Kebafwaninwepo kupityija kitatyi kilampe bininge bengila mingilo ya Leza, ino bailwa’ko kuvuija bisakibwa bya bisaka byabo.

9. Mungya Bene Fidipai 2:4, 5, le bene Kidishitu bonso bafwaninwe kwikala na mushipiditu’ka?

⁹ Tanga Bene Fidipai 2:4, 5. Shako batwe bonso ketudipo bakulumpe, inoko batwe bonso tubwanya  kuboila ñeni ku mushipiditu wa kwipāna wādi na Yesu. Bible unena’mba, wāikele “mu muswelo wa bu umpika.” (Fid. 2:7) Langulukila’po bidi pa bitufundija bino binenwa. Umpika wa mvubu nansha mwingidi, wādi ukimba muswelo wa kusangaja mfumwandi. Byodi umpika wa Yehova kadi mwingidi wingidila banabenu, usakanga kwingidila Yehova ne banabenu mu lwitabijo. Ubwanya kulonga namino na kulangulukila pa madingi alonda’ko.

10. Le i bipangujo’ka byotubwanya kwiipangula?

¹⁰ Bandaula ngikadila yobe. Wiipangule bino bipangujo amba: ‘Le ngitabijanga kwipāna mwanda wa kukwasha bakwetu? Kimfwa, le nkalonga namani shi abaunena kukapempula tutu mununu ku lupitalo nansha kukatūla kaka mununu ku kupwila? Le ngitabijanga kukwasha’ko shi bakimba bantu ba kwilanga ba kukundula pa kulongela kitango nansha ku Njibo ya Bulopwe?’ Byotudi bepāne kudi Yehova, usangalanga shi tupāna pampikwa kwisakila kitatyi kyetu ne bintu byetu mwanda wa kukwasha bakwetu. Shi tubamone amba tufwaninwe kwilumbulula, le tubwanya kulonga bika?

11. Le milombelo ibwanya kwitukwasha namani twikale na mushipiditu wa kwipāna?

¹¹ Lomba Yehova na kininga. Langa’po bidi shi ubajingulula’mba ufwaninwe kwilumbulula pantu kampanda, ino ubabulwe bukankamane bwa kushinta. Nabya lombela kudi Yehova na kininga. Mulombole byonso. Lombola Yehova mowiivwanina, kadi munene akupe “mutyima ne bukomo bwa kulonga monka mwaloelelwe.”​—Fid. 2:13.

12. Le tutu nkasampe mubatyijibwe ubwanya kukwasha kipwilo namani?

¹² Shi wi tutu nkasampe mubatyijibwe, lomba Yehova akukwashe wikale na mutyima wa kukwasha kipwilo bininge. Mu matanda amo, mudi bakulumpe bavule ino bengidi ba mingilo batyetye, kadi bengidi ba mingilo bavule badi na myaka 50 ne kupita, ne banunu. Bantu pobenda bavula mu bulongolodi, bakulumpe basakilwa batutu bankasampe bavule ba kwitukwasha pa kulama bantu ba Yehova. Ukekala na nsangaji shi witabije kwingila mwingilo o-onso ukupebwa. Mwanda waka? Mwanda ukasangaja Yehova, ukapwana na bantu bayampe, kadi ukemwena nsangaji itambanga mu kukwasha bakwabo.

13-14. Le i bika byotubwanya kulonga pa kukwasha batutu ne bakaka? (Tala kifwatulo pa kibalu.)

¹³ Jingulula bantu basakilwa bukwashi. Mutumibwa Polo wādingile Bahebelu amba: “Kemwakilwai kulonga biyampe ne kwiabila na bakwabo byomudi nabyo, mwanda bitapwa bidi namino bisangajanga Leza.” (Bah. 13:16) Ano ādi madingi mayampe! Kitatyi’tu kityetye pa kupwa kutambula uno mukanda, bene Kidishitu ba mu Yudea bādi banenwe kushiya abo mobo, bya busunga byabo, ne babutule babo bampikwa kwitabija, kadi bādi bafwaninwe “kunyemena ku ngulu.” (Mat. 24:16) Na bubine mu kine kitatyi’kya, bādi bafwaninwe kwikwasha abo bene na bene. Shi dibajinji bāingidije madingi a Polo a kwiabila na bakwabo bintu byobādi nabyo, bādi ba kupēlelwa kwikala na bintu bityetye kobanyemēne.

¹⁴ Batutu ne bakaka kebabwanyapo kwitulombola nyeke amba basakilwa bukwashi.  Kimfwa, kaka umo wafwile, wandi mulume washala na bulanda. Le tutu usakilwa kukwashibwa na byakudya, ka kufuta byendwa nabyo, nansha na mingilo ya njibo? Aye mwine kabwanyapo padi kunena kutyina wa ketutwika kiselwa. Inoko ubwanya kufwija’ko bininge shi tubadikile kumukwasha aye kalombele bukwashi. Ketufwaninwepo kulanga’mba kudi muntu mukwabo usa kumukwasha, nansha amba aye mwine usa kwitulombola muswelo otubwanya kumukwasha. Wiipangule bidi amba, ‘shi wadi’mba i ami, nadi wa kusangela bukwashi’ka?’

15. Le i bika byotufwaninwe kulonga shi tusaka kukwasha bakwetu?

¹⁵ Ikala muntu ulumbwa. Na bubine uyukile’ko batutu ne bakaka mu kyenu kipwilo basakanga kukwasha bakwabo. Kebetulengejangapo twimone bu kiselwa kobadi. Tuyukile amba bakekala nyeke na mutyima wa kwitukwasha kitatyi kyotusakilwa bukwashi, kadi tukasaka kwikala pamo bwa abo! Alan, mukulumpe umo wa myaka 40 ne kupita, usakanga kwikala muntu ulumbwa. Pa kupwa kulangulukila pa kimfwa kya Yesu, Alan unena’mba: “Yesu wādi muvudilwe bya kulonga, inoko bantu ba myaka yonso bādi bamufwena kadi kebādipo batyina kumunena ebakwashe. Bādi bamumona bu muntu wibatele mutyima bya binebine. Nsakanga na mutyima umo kwikala pamo bwa Yesu ne kuyukwa bu muntu ulumbwa, wa nsangaji, kadi wa buswe.”

16. Le kwingidija Ñimbo ya Mitōto 119:59, 60, kubwanya kwitukwasha namani tulonde kimfwa kya Yesu senene?

¹⁶ Shi tubakomenwa kwiula Yesu mu muswelo mubwaninine, ketufwaninwepo kutyumukwa mutyima. (Yak. 3:2) Muntu wifunda busendwe kabwanyapo kwiula mu muswelo mubwaninine yewa umufundija. Ino byaboilanga ñeni ku bilubo byandi  ne kulonga bukomo bwa kulonda kimfwa kya yewa umufundija busendwe, ukendelela kwilumbulula. Muswelo umo onka, shi twingidija byobya byotwifunda mu kifundwa kya pa kasuku, ne kulonga bukomo bwa kulemununa bilubo byetu, tubwanya kulonda biyampe kimfwa kyētushidile Yesu.​—Tanga Ñimbo ya Mitōto 119:59, 60.

17-18. Le i bika byotukamwena’mo shi twiula mushipiditu wa kwipāna wādi na Yesu?

¹⁷ Mushipiditu wetu wa kwipāna ubwanya kusambukila bakwabo. Mukulumpe umo witwa bu Tim unena’mba: “Tudi na batutu baendelele kupwa batongwa bu bengidi ba mingilo​—bamo bankasampe bininge—​mwanda’tu baiwile mutyima wa kwingila obamwene mu bakwabo. Bano batutu bankasampe bakwashanga kyetu kipwilo ne kukwasha bakulumpe bininge.”

¹⁸ Tudi mu ntanda muyudile kwisakila. Inoko bantu ba Yehova i beshile na bantu ba ino ntanda. Twi batengwe na mushipiditu wa Yesu wa kwipāna, kadi twi basumininwe kulonda kimfwa kyandi. Shako ketubwanyapo kulonda mu mayo andi mu muswelo mubwaninine, inoko tubwanya kulonda “senene mu mayo andi.” (1 Pe. 2:21) Shi tulonge bukomo bwa kwiula mushipiditu wa kwipāna wādi na Yesu, netu tukasangala pa mwanda wa kusangaja Yehova.