1. Jehova mite zîngah eng rilru put hmang ṭha tak nge kan hmuh?

HMAN lai aṭang tawhin, Bible chuan Jehova mite chu a Fapa kaihhruaina zuia Jehova rawngbâwl tûrin “mahni duh thuin an inpe” dâwn tih a sawi lâwk a. (Sâm 110:3) Chu hrilh lâwkna chu tûnah a thleng famkim mêk a ni. Kum tin hian, Jehova chhiahhlawh ṭhahnemngai takte chuan thu hrilh rawngbâwlnaah dârkâr maktaduai tam tak an hmang a. Chu chu mahni duh thu leh mahni sum leh pai sênga ti an ni. Chu bâkah, an Kristian unaute tisa lam, rilru lam, leh thlarau lam mamawhte pawh an ṭanpui bawk. Kohhran upate leh kohhranho rawngbâwltute chuan inkhâwmte atâna inbuatsaih nân leh berâmte tlawh nân dârkâr tam tak an hmang a. Chûng zawng zawng ti tûra anmahni chêttîrtu chu eng nge ni? Hmangaihna—Jehova leh vêngte hmangaihna a ni.—Mt. 22:37-39.

2. Rom 15:1-3-a chhinchhiah angin, Isua’n eng entawn tûr nge a siam?

² Isua chuan mahni ṭhatna tûr aia mi dangte ṭhatna tûr dah pawimawhna kawngah entawn tûr ṭha tak a siam a. A entawn tûr siam chu theih tâwp chhuaha zui kan tum a ni. (Rom 15:1-3 chhiar rawh.) Amah entawntute chuan hlâwkna tam tak an hmu ang. Isua’n: “Englo lâk aiin pêkin lukhâwng a nei zâwk,” tiin a sawi si a.—Tirh. 20:35.

3. He thuziakah hian eng nge kan sawiho vang?

³ He thuziakah hian Isua’n mi dangte rawng a bâwlsak nâna a inpêkna ṭhenkhat kan ennawn ang a, a entawn tûr siam kan zui theih dânte pawh kan sawiho vang. Mi dangte tâna rawngbâwl  duhna kan neih lehzual theih dân pawh kan sawiho bawk ang.

4. Engtin nge Isua’n mahni ṭhatna tûr aia mi dangte ṭhatna tûr a dah pawimawh?

⁴Isua chu a chauh hunah pawh mi dangte tân a inpe. Isua’n Kapernaum kiang tlâng chunga a awm laia amah hmuh tuma rawn pantu mipui a chhân lêt dân kha han ngaihtuah teh. Zan khuaa a ṭawngṭai avângin a chau hle ngei ang; mahse, mipui a hmuh chuan an zînga mi retheite leh damlote chu a khawngaih ta hle a. Anni chu a tidam mai ni lovin, mi tichak thei ber thusawi zînga pakhat—Tlâng Chunga Thusawi—chu a sawi ta a ni.—Lk. 6:12-20.

5. Engtin nge chhûngkaw lû berte chuan an chauh hunah pawh Isua lantîr mahni inpêkna rilru put hmang chu an entawn theih?

⁵Chhûngkaw lûte’n Isua an entawn theih dân. He dinhmun hi han ngaihtuah teh: Chhûngkaw lû ber chu nilênga hna a thawh hnu chuan chau takin in a lo thleng a. Chumi zâna Chhûngkuaa Pathian Biakna neih tûr chu ṭhulh mai duhna nei mah se, kaihruai thei tûrin Jehova hnênah chakna dîlin a ṭawngṭai a. Jehova’n a ṭawngṭaina chhângin, ṭhulh lovin a kaihruai thei a ni. Chumi zân chuan, naupangte chuan zir tûr pawimawh tak an zir a ni—nu leh pate’n thil dang zawng aiin thlarau lam thilte chu an ngai pawimawh ber tûr a ni tih chu.

6. Isua’n mi dangte ṭanpui nâna a mi mal hun hman tûr a pêk dân entîrna pakhat sawi rawh.

⁶Isua’n mi dangte ṭanpui nân a mi mal hun hman tûr a pe. A ṭhian Baptistu Johana tihhlum a ni tih a hriat huna Isua awm dân tûr chu i mitthla thei em? Ani chu a lungchhe hle ngei ang. Bible chuan: “Isuan chu chu [Johana thih thu] a hriatin, chuta ta chu lawngin thlalêr hmunah a kal hrang ta a,” tiin a sawi. (Mt. 14:10-13) A hranga awm a duh chhan chu kan hriatthiampui thei a ni. Mi ṭhenkhat chuan lû an sûn laiin mahni chauhva awm an duh zâwk thei a. Mahse, Isua chu chutiang chuan a awm hman lo. A fâla awm a tumna hmun a thlen hmain mipui chuan an lo thlen khalh dêr tawh a ni. Engtin nge Isua’n a chhân lêt? Mipui mamawh a ngaihtuah avângin anni chu “a khawngaih ta êm  êm a.” Thlarau lama tihharhna an mamawh tak zet tih a hmu a, a phuhhrûksak ta nghâl a ni. Dik tak chuan, anni chu “thu [tlêm tê ni lovin] tam tak a zirtîr ta a.”—Mk. 6:31-34; Lk. 9:10, 11.

7-8. Hmangaihna nei tak kohhran upate’n ṭanpui mamawhna a lo awm huna Isua an entawn theih dân entîrna pe rawh.

⁷Hmangaihna nei tak kohhran upate’n Isua an entawn dân. Mahni hmasialna tel lova kan tâna thawkrim êm êmtu kohhran upate chu kan va ngaihlu tak êm! An hnathawh tam tak chu kohhrana unau a tam zâwk chuan an hre lo. Entîr nân, damdawi lama rîkrum thil a thlen hian, Hospital Liaison Committee-a tel unaute chu an Kristian unaute tân an inpe nghâl vat a. Chutiang rîkrum thilte chu zan laiah a thleng fo ṭhîn! Chuti chung pawhin, chûng kohhran upate leh an chhûngte chuan rilru hrehawma awm an unaute chunga khawngaihna an neih avângin, mahni ṭhatna aiin unaute ṭhatna tûr chu an dah pawimawh zâwk a ni.

⁸ Kohhran upate chuan Kingdom Hall leh theocratic in saknate bâkah, leilung chhiatna tâwkte chhawmdâwlnaahte pawh an ṭanpui a. Unaute zirtîrna te, fuihna te, leh ṭanpuinate kawnga kan lawina kohhrana upate hun pêk chungchângah pawh sawi tûr tam tak kan nei ngei ang. Chûng kan unaute leh an chhûngte chuan thinlung taka kan fak chu an phû a ni. An inpêknaah Jehova’n awmpui zêl rawh se! Ni e, unau dangte ang bawkin, kohhran upate pawh an inbûk tâwk thiam a ngai a. Anni chuan an chhûngte tawrh phah khawpin chûng theocratic thiltihnaahte chuan hun an pe tam lutuk tûr a ni lo.

9. Philippi 2:4, 5-a sawi angin, Kristian zawng zawngte neih ngai rilru put hmang chu eng nge ni?

⁹ Philippi 2:4, 5 chhiar rawh. Kan za hian kohhran upa ni vek lo mah ila, Isua lantîr mahni inpêkna rilru put hmang erawh kan entawn ṭheuh thei a ni. Bible chuan ani chu “bawih angah a insiam a,” tiin a sawi. (Phil. 2:7) Chu Bible châng aṭanga kan zir theih chu han ngaihtuah teh. Bâwih, a nih loh leh chhiahhlawh ṭangkai tak chuan a pu tihlâwm theihna hun remchâng a zawng a. Jehova chhiahhlawh leh i unaute tâna rawngbâwlsaktu i nih angin, Jehova leh i Kristian unaute tâna mi ṭangkai tak nih chu i duh ngei ang. A hnuaia rawtnate ngun taka ngaihtuahna hmangin chutiang chuan i ti thei a ni.

10. Eng zawhnate nge kan inzawh theih?

¹⁰I rilru put hmang chu endik rawh. Hêng zawhnate hi inzâwt ang che: ‘Mi dangte ṭanpui nân engtiang khawpin nge inpêk ka inhuam? Entîr nân, tar enkawlna hmuna awm kum upa unaupa va tlawh tûr leh kum upa unaunu chu inkhâwma hruai tûra tih ni ta ila, engtin nge ka chhân lêt ang? Inkhâwmpuina hmun, a nih loh leh Kingdom Hall tifai tûrin tlâwmngaia thawktu tûr mamawh a nih hian ka inpe nghâl vat ṭhîn em?’ tiin. Kan inpumpêknain a ken tel anga kan hun leh tha leh thil neihte mi dangte ṭanpui nâna phal taka kan hman hian Jehova a lâwm a ni. Chumi kawnga hma kan sâwn a ngaihna lai kan hmu a nih chuan, eng nge kan tih theih?

11. Engtin nge ṭawngṭainain mahni inpêkna rilru put hmang nei tûra min ṭanpui theih?

¹¹Tih tak zetin Jehova hnênah ṭawngṭai rawh. Hmasâwn ngaihna lai i nei a; mahse, inthlâk danglamna siam duhna emaw, siam châkna emaw i nei lo angah han inchan teh. Chutiang dinhmunah chuan, Jehova hnênah tih tak zetin ṭawngṭai ang che. Mahni inthlîr dân dik nei la. I rilrua awmte chu Jehova hnênah hrilhin, “thil tih châkna leh thiltihtheihna” pe tûr chein dîl ang che.—Phil. 2:13, NWT.

12. Baptisma chang tawh ṭhalai chuan eng mamawhna nge a phuhhrûk theih?

¹² Baptisma chang tawh ṭhalai i nih chuan, kohhran tâna tam lehzuala inhman duhna nei tûrin Jehova hnênah dîl ang che. Ram ṭhenkhatah chuan kohhran upate chu kohhranho rawngbâwlute aiin an tam zâwk a, kohhranho rawngbâwlute zînga tam tak chu ṭhalai an nih tawh lo. Inawpna pâwl a ṭhan chhoh zêl avângin, Jehova mite enkawltu tûr ṭhalai unaupate kan mamawh lehzual a ni. Eng kawng pawha hman i inhuam a nih chuan, i hlim ngei ang. Engvângin nge? Jehova i tihlâwm avângin hming ṭha i nei ang a, mi dangte ṭanpuina aṭanga lo awm lungawina i nei bawk ang.

13-14. Kan unaute ṭanpui tûrin eng ang hma lâkna ṭha tak nge kan neih theih? (A kâwma milem en rawh.)

¹³Mi dangte mamawh chu hriat tum rawh. Tirhkoh Paula chuan Judai rama Kristian unaute chu: “Thil tihṭhat leh thilphal hi theihnghilh suh u; chutiang inthawina chungah chuan Pathian a lungni êm êm si a,” tiin a fuih a. (Heb. 13:16) Fuihna ṭha tak a va ni êm! Chu lehkhathawn an dawn hnu rei vak lovah, chûng Kristiante chu an in leh lo te, an sumdâwnna te, leh ring lotu an chhûngte chu kalsanin ‘tlangahte an tlân’ a ngai a ni. (Mt. 24:16) Chutih hun lai chuan, inṭanpui tawn chu an tân thil pawimawh tak a ni ngei ang. Chutiang dinhmuna an awm hmaa inṭanpui tawn tûra Paula fuihnate an lo nunpui tawh a nih chuan, an nun kawng thar mila  insiamrem chu a awlsam lehzual tih an hmu ngei ang.

¹⁴ Kan Kristian unaute chuan an mamawhte chu min hriattîr reng lo thei a. Entîr nân, unaunu chu a boral avângin, a pasal chu lusûnin a awm a. Kan unaupa chuan ei rawngbâwl te, veivahna te, leh inchhûng sekrek thilahte ṭanpui a mamawh em? Mi dang tihbuai a duh loh avângin eng mah a sawi chhuak lo pawh a ni thei. Mahse, amah ṭanpui tûra hma kan la hmasa a nih chuan a lâwm hle ngei ang. Ṭanpuitu tûr an awm mai ang tiin emaw, ṭanpuina mamawhtu chuan kan ṭanpui theih dân tûrte min hriattîr mai ang tiin emaw kan ngai tûr a ni lo. Heti hian inzâwt rawh, ‘Chutiang dinhmunah chuan awm ta ila, eng ang ṭanpuinate nge ka mamawh ang?’ tiin.

15. Mahni inpêkna nei tûr chuan eng tih nge kan tum tlat ang?

¹⁵Pan nuam tak ni rawh. Mi dangte ṭanpui tûra inpeih reng ṭhîn kohhrana unaute chu i hre ngei ang. Ṭanpui an inpeih reng avângin anmahni tibuai nia inhriatna kan nei ngai lo. Englai pawhin min ṭanpui an inpeih reng tih kan hriat avângin anmahni ang nih chu kan va duh tak êm! Kum 40 chuang tawh kohhran upa Alan-a chuan pan nuam tak nih a duh a. Isua entawn tûr siam chu ngaihtuahin, ani chuan: “Isua chu a buai hle a; mahse, a pui a pangte chuan pan nuam an tiin, a hnêna ṭanpuina dîl pawh an hreh lo. Anmahni a ngaihsak tak zet tih an hria a. Isua rilru put hmang ang lantîr a, pan nuam tak, nêlawm tak, leh mite ngaihsak tak nia hriat hlawh chu ka duh a ni,” tiin a sawi.

16. Engtin nge Sâm 119:59, 60-na chuan Isua entawn tûr siam zui tlat tûra min ṭanpui theih?

¹⁶ Sawisêl bova Isua kan entawn theih loh avângin kan lunghnual tûr a ni lo. (Jak. 3:2)  Lem ziak zirlai chuan zirtîrtu kut chhuak chu sawisêl bovin an entawn thei lo. Mahse, a tihsualte aṭanga a inzir a, zirtîrtu entawn tûr siam chu a theih ang tâwka zui a tum phawt chuan, zirlai chuan hma a sâwn chho zêl ang. Chutiang bawkin, mi mala Bible zirna aṭanga kan thu zirte nunpui a, kan chak lohna laite theih tâwp chhuaha siam ṭhat kan tum phawt chuan, Isua entawn tûr siam chu hlawhtling takin kan zui thei ang.—Sâm 119:59, 60 chhiar rawh.

17-18. Isua lantîr mahni inpêkna rilru put hmang kan entawn chuan, eng hlâwknate nge kan hmuh ang?

¹⁷ Mahni inpêkna rilru put hmang chuan mi dangte pawh chutiang rilru put hmang nei ve tûrin a chêttîr thei a. Kohhran upa Tim-a chuan: “Hmasâwnna nei ṭhalai unaupate leh kohhranho rawngbâwltu nia ruat unaupate kan nei a, an zînga ṭhenkhat chu la naupang tak an ni, a chhan chu, inhuam taka rawngbâwl duhna rilru put hmang nei unau dangte an entawn vâng a ni. Mahni hmasialna tel lo an tawhrimna chu unaute leh kohhran upate tân ṭanpuina nasa tak a ni,” tiin a sawi.

¹⁸ Mahni hmasialnaa khat khawvêlah kan awm a. Mahse, Jehova mite chu an danglam hle a ni. Isua lantîr mahni inpêkna rilru put hmang chu kan ngaihhlut êm avângin, a entawn tûr siam chu zui kan tum tlat a. Sawisêl bovin zui thei lo mah ila, ‘a hniak chu kan zui tlat’ thei a ni. (1 Pet. 2:21) Isua lantîr mahni inpêkna rilru put hmang chu theih tâwp chhuaha kan entawn a nih chuan, keini pawhin Jehova duhsakna dawngin hlimna kan nei ang.