CILONGESA 9
Tembwinineni Yesu mu Kukwasa Bakweni
“Muli kujolela kwakama manene mu kwana kutubakana mu kutambula.”—VILI 20:35.
MWASO 17 “Njishaka”
BILI MUNO MU CILONGESA *
1. Sipilitu muka yaibwa ibakala nayo banu ba Yehova?
MBIMBILIYA yapolofwetele ngwayo banu ba Njambi “bakalyana na bimbunge byabo byoshe” mu cipangi ca Yehova mu kubatwamenena kuli Munendi. (Myaso 110:3, NWT) Obu bupolofweto buli na kulishulisilila ano matangwa. Ha mwaka na mwaka bangamba ba Yehova bakapanga maola amangi mu cipangi ca kwambulula. Bakalyana kupanga eci cipangi, co kubesi kubafweta. Bakakwasa bandolome na bandokazi babo bakanyamese busamba bwabo na Yehova, bawane byuma bya ku mubila na kubazembeleka. Bakulunu na baka-kupangela bakapangesa simbu yabo yaingi mu kulibwahesela biwano na kwendela bandolome na bandokazi babo mangana babashongangeye. Mwafwa bika banu ba Njambi bakalingi ebi bipangi byoshe? Bakabilingi mwafwa bazema Yehova na banu.—Mateo 22:37-39.
2. Kwesekesa na byuma bibanendeka ku mukanda wa Loma 15:1-3, mwanja muka waubwa wanatumwesa Yesu?
2 Yesu natumwesa mwanja waubwa mwafwa wakele manene mbunge ku bujene bwa bakwabo. Tuli na kweseka mwoshe mutwasela kumutembwinina. (Tandeni Loma 15:1-3.) Nga tumutembwinina, co tubezika manene. Yesu wendekele ngwendi: “Muli kujolela kwakama manene mu kwana kutubakana mu kutambula.”—Vili 20:35.
3. Bika bitusimutwiya muno mu cilongesa?
3 Muno mu cilongesa tusimutwiya byuma byalingile Yesu mangana akwase banu nomwo mutunasa kumutembwinina. Tusimutwiya lalo byuma bitukwasa tukale na mbunge ya kulyana mangana tukwase bakwetu.
TEMBWININENI YESU
Nameme wajukile, Yesu walingile bika omwo banu babangi bezile kuli ikeye? (Taleni palagilafu 4)
4. Yesu wamwesele bati ngwendi washakele manene kukwasa bakwabo?
4Yesu wakwasele bakwabo nameme ha simbu yajukile. Acisinganyekeni byuma byalingile Yesu omwo banu babangi bezile kuli ikeye ha simbu yakele ha munkinda, kuyehi na Kapenauma. Yesu walombelele butsiki bwoshe. Ha simbu ije hamo Yesu wajukile, oloni mwamwene banu babangi wabazibilile ngozi mwafwa hakati kabo hakele tuhutu na baka-kubinja. Co kabakangwisile lika, oloni wabalongesele byuma byabingi mu Ñanda yendi ya ha Munkinda ije yapwa ya kulitila.—Luka 6:12-20.
Twasa kutembwinina bati sipilitu ya Yesu ya kulyana? (Taleni palagilafu 5)
5. Mitwe ya binaanga bakatembwinina bati sipilitu ya Yesu ya kulyana nameme mubakajuka?
5Mitwe ya binaanga bali na kutembwinina bati Yesu? Tucisimutwiyeni ha cakumwenako eci. Mutwe wa naanga napanga manene mutanya, co eta ha njibo mangwezi oku najuka manene. Hamo aliziba ngwendi kasa kutwamenena kulemesa kwa naanga ha litangwa olyo mangwezi, oloni alomba Yehova mangana amwane nzili ya kulinga ngoco. Yehova akumbulula lilombelo lyou ndolome, co alilongesa na naanga yendi ngwe mwakalingila simbu yoshe. Bana bananguka ngwabo bisemi babo bamona byuma bya ku sipilitu kupwa bya seho manene kutubakana cuma coshe-coshe.
6. Endekeni cakumwenako cije cimwesa ngwaco Yesu wapangesele simbu yendi mu kukwasa bakwabo.
6Yesu wawanene simbu ya kusikama na bakwabo. Acisinganyekeni mwalizibililile Yesu omwo wazibile ngwendi kabusamba kendi Yowano Muka-kumbwitika banamutapa mutwe? Yesu hamo wazibile manene busiwa. Mbimbiliya ngwayo: “Yesu mwazibile muzimbu wa kutsa kwa Yowano, watundile ku mutambela uje mu bwato, waile mu mambo kwa likalyendi.” (Mateo 14:10-13) Tuzibisisa byalingisile Yesu ashake kukala kwa likalyendi. Banu bamo bakashaka kukala kwa likalyabo nga bali mu busiwa. Oloni Yesu kasele kukala likalyendi mwafwa mwaketele kuje ku mwela kwashakele kukakala likalyendi wakawanene banu babangi banamubandamena. Yesu walingile bati? Wasinganyekesesele ha bukalu bubakele na kuliwana nabwo baje banu, co wabazibilile mema ku mbunge. Yesu wanangukile ngwendi baje banu bashakele kubakwasa ku sipilitu, co wabakwasele bwasi-bwasi. “Washangumukile kubalongesa [keti byuma byabindondo oloni] byuma byabingi.”—Mako 6:31-34; Luka 9:10, 11.
7-8. Endekeni cakumwenako cije cimwesa omwo bakulunu bakatembwininamo Yesu nga ndolome nambe ndokazi mu cikungulukilo atonda kumukwasa.
7Bakulunu bali na kutembwinina bati Yesu? Tuli na kukandelela manene ku bipangi byoshe bibali na kutulingila bakulunu mu cizemo. Bandolome na bandokazi babangi mu cikungulukilo kubesi kumona bipangi byoshe bibakalingi aba bakulunu. Cakumwenako, nga kunakatuka bukalu ku cipatela, bandolome ba mu Komiti ya Kulizibasana na Baka-cipatela bakashatukilako bwasi-bwasi mangana bakakwase bandolome na bandokazi babo. Kakangi bukalu bwa cifwa eci bukakatuka mukati ka butsiki. Oloni aba bakulunu bakazibila ngozi bandolome na bandokazi babo baje bali mu bukalu. Co simbu imo bakaseze binaanga byabo na kushatukila bwasi kuli ndolome nambe ndokazi yabo uje ali mu bukalu mangana bakamukwase.
8 Bakulunu bakakwasa lalo mu bipangi bya kutunga Binjibo bya Bumwene na bipangi byeka bya kufwa ngwe kukwasa kuje kunasholoka bukalu bwa kulizila. Co lalo bakulunu batuli nabo mu bikungulukilo bakapangesa simbu yabo yaingi mu kutulongesa na kututakamesa. Ngeci, tunapande kukandelelako manene kuli aba bandolome na binaanga byabo. Tulomba ngwetu Yehova ababezikise mwafwa ya kulyana kwabo. Ngwe mwa baka-kwambulula boshe, bakulunu nabo banapande kunoneka mwamubwa simbu yabo. Kubapandele kuzezama manene na bipangi bya cikungulukilo na kwonowa kuwana simbu ya kunyunga naanga yabo.
BIKA BITUKWASA TUKALE NA SIPILITU YA KULYANA?
9. Kwesekesa na mukanda wa Filipu 2:4, 5, sipilitu muka ibanapande kukala nayo baka-Kilistu?
9 Tandeni Filipu 2:4, 5. Nameme yetu bamo kutwapwile bakulunu, oloni tubaboshe twasa kutembwinina sipilitu ya Yesu ya kulyana. Mbimbiliya imwesa ngwayo Yesu “watambwile cifwa ca ngamba.” (Fili 2:7) Awa majwi atulongesa bika? Kakangi ndungo nambe ngamba, wakele na kweseka mwasela mwoshe kulinga byuma bije bizibisa shukulu yendi kubwaha. Tushaka kuzibisa Yehova kubwaha mwafwa tu bangamba bendi, co lalo twashaka kukwasa bandolome na bandokazi betu. Twasa kulinga ngoco nga tukabangeya binangulo binatako.
10. Bihula muka bitunapande kulihula?
10Liluleni. Lihuleni bihula bya kufwa ngwe: ‘Njikalyana kupangesa simbu yange na nzili yange mu kukwasa bakwetu ndi? Cakumwenako, njasa kulinga bati nga banjilomba ngwabo njiye na kumona ndolome wa kakulukazi uje ali na kubinja nambe njitwale ndokazi wa kakulukazi ku biwano? Kuma njikalyana bwasi nga kutondeka baka-kukwasa mu cipangi ca kujelesa mwela wa kulingila ciwano ca mutambela nambe kubwahesa Njibo ya Bumwene ndi?’ Yehova akabwahelela mutukapangesa simbu yetu na byuma bituli nabyo mu kukwasa bandolome na bandokazi betu mwafwa twalikumiiye kulinga ngoco mubatumbwitikile. Nga kuli hamo ha tunapande kupangela, bika bitunapande kulinga?
11. Kulombela kutukwasa bati tukale na sipilitu ya kulyana?
11Lombeni Yehova amikwase. Munapande kulinga bika nga munanguka ngweni kuli hamo hamunapande kupangela mangana mukale na sipilitu ya kulyana, oloni muliziba ngweni kumwesi na cizango ca kulinga ngoco? Nga muliziba ngoco, lombeni Yehova kutundilila kwisi ya mbunge yeni mangana amikwase. Mulekeni mwoshe mumuli na kulizibila na kumulomba mangana amyane “cizango na nzili ya kupanga.”—Fili 2:13.
12. Bandolome ba bakwenje ba kumbwitika basa kukwasa bati cikungulukilo?
12 Nga mu bakwenje ba kumbwitika, lombeni Yehova amikwase kukala na cizango ca kupanga byabingi mu cikungulukilo. Mu bikungulukilo bya mu mafuti amo, bakulunu bapwa babangi, oloni baka-kupangela bapwa babandondo, co lalo baka-kupangela bamo banakolo. Omwo munga ya Yehova ili na kukola kutondeka bandolome ba bakwenje babangi mangana bakwase bakulunu bapange mwamubwa cipangi ca kunyunga bandolome na bandokazi mu cikungulukilo. Nga mulyana kupanga bipangi byoshe-byoshe bibamyana, co mupwa ba kubwahelela. Bika twendekela ngoco? Mwafwa muzibisa Yehova kubwaha, co lalo mukala na lizina lyalibwa na kupwa ba kubwahelela mwafwa ya kukwasa bandolome na bandokazi mu cikungulukilo.
Baka-Kilistu baje banatundu ku Yundeya bali musambwa lya Ndonga ya Yondau mu nganda ya Pela. Baje balibangele kweta omu mu nganda bali na kwanako byakulya bakwabo baka- Kilistu baje banete ololo (Taleni palagilafu 13)
13-14. Bika bitunapande kulinga mangana tukwase bandolome na bandokazi betu? (Taleni cikupulo cili ha liputa lya kulibanga.)
13Akeni mbunge bakweni na kunanguka bukwasi bubatonda. Paulu walekele baka-Kilistu ba Bahebelu ngwendi: “Kesi mwibale kulinga mwamubwa na kulikwasa umo na mukwabo, mwafwa ou ukewo mulambu uzibisa Njambi kubwaha.” (Heve 13:16) Cije capwile cinangulo cacibwa. Mukwetile simbu yaindondo kutunda ha batambwilile uje mukanda, baka-Kilistu ba mu Yundeya basezele membo abo, mingoso yabo na babushoko bwabo baje kubapwile baka-kukulahela, co ‘batewelele ku malundu.’ (Mateo 24:16) Ngeci ha simbu ije, kwapwile kwa seho manene kulikwasa umo na mukwabo bwasi-bwasi. Nga bashangumukile kupangesa cinangulo ca Paulu ca kulipangela bibakele nabyo simbu kanda batewele ku malundu, co kwabapwililile kwakwasi kwizilila yoyesi yaiha.
14 Bandolome na bandokazi simbu imo kukabakaluwila kutuleka bujene bwoshe bubali nabwo. Cakumwenako, hamo ndolome natsisa mwebwendi, co ali mu busiwa bwakama. Hamo ou ndolome yetu atonda kumutelekelako byakulya, kumwanako kambongo ka ngila nambe kumukwasako ku bipangi byeka bya ha njibo. Nasa kwonowa kwendeka mwafwa ya kutewa ngwendi atwika bandolome na bandokazi citele. Oloni akandelela manene nga yetu babenya tunanguka bukwasi bwatonda na kumukwasa bwasi-bwasi. Kutwapandele kusinganyeka ngwetu bakwetu bakamukwasa nambe ngwetu nga kuli bukwasi bwatonda, co atuleka. Lihuleni ngweni: ‘Ngwe yange njaliwana na bukalu bwa cifwa eci, ngwe njibandamena ngwange bakwetu banjikwase mu bingila muka?’
15. Tunapande kulinga bika mangana tukwase mwamubwa bakwetu?
15Pweni ba kuzituka mangana bakweni bamilombe bukwasi. Twakulahela muzibuka bandolome na bandokazi ba mu cikungulukilo ceni baje bakakwasa bakwabo simbu yoshe. Kubesi kuliziba ngwabo twabaka mu cikela. Twakulahela ngwetu basa kutukwasa hoshe-hoshe hatuliwanena na bukalu, co tushaka kutembwinina sipilitu yabo ya kulyana. Ndolome Alan wa myaka 45, uje wapwa mukulunu mu cikungulukilo nalyakela cilengo ca kupwa wa kuzituka ku bandolome na bandokazi bendi. Munima ya kusinganyekesesa ha mwanja wa Yesu, ndolome Alan wendekele ngwendi: “Yesu wazezamene, oloni banike na bakulunu bazitukile kumushwenya na kumulomba bukwasi. Balimwenenene ngwabo wabaka mbunge, co asa kubakwasa. Njishaka kweseka munjasela mwoshe kutembwinina Yesu. Njishaka bandolome na bandokazi banjizibuke ngwabo njakala na cizemo, njapwa wa kuzituka, co lalo njabaka mbunge.”
16. Kupangesa majwi ali ku mukanda wa Myaso 119:59, 60 kutukwasa bati tutembwinine Yesu mwamubwa?
16 Kutwapandele kuzeya nga twonowa kutembwinina Yesu mu bingila bimo. (Yako 3:2) Muka-kulilongesa kasa kutubakana mulongesi wendi. Oloni omwo alilongesa ku byuma byasebuka na kweseka mwasela mwoshe kutembwinina mulongesi wendi, co abwezelela ku butongwe bwendi. Mu ngila imo lika, nga tupangesa bituli na kulilongesa mu Mbimbiliya na kupangela ha buzeye bwetu, co twasa kutembwinina mwamubwa Yesu.—Tandeni Myaso 119:59, 60.
BUBWA MUKA BUTUNDA MU KUKALA NA SIPILITU YA KULYANA?
Nga bakulunu batembwinina sipilitu ya Yesu ya kulyana, co bamwesa bandolome ba banike mwanja waubwa (Taleni palagilafu 17) *
17-18. Kutembwinina sipilitu ya Yesu ya kulyana kutukwasa bati?
17 Nga tukala na sipilitu ya kulyana, co tushongangeya bakwetu nabo balinge ngoco. Ndolome Tim, uje wapwa mukulunu mu cikungulukilo wendekele ngwendi: “Tuli na bandolome baje bacilli bakwenje banakolo ku sipilitu, co banabangula kupwa baka-kupangela. Nameme banapu banike, oloni banabangula mwafwa banatembwinina bandolome baje bali na sipilitu ya kulyana. Aba bandolome ba bakwenje bali na kukwasa manene bakulunu mu cikungulukilo na bandolome na bandokazi.”
18 Tuli na kuyoya mu kaye muje mwalisala banu balishaka bakebo babenya. Oloni banu ba Yehova kubafwile ngoco. Mwanja wanatumwesa Yesu wa sipilitu ya kulyana utunasimutwiya unatukwasa manene, co tushaka kumutembwinina. Nameme kutwasa ‘kukabangeya mwanja’ wa Yesu mu kulumbunuka, oloni twasa kumutembwinina mwamubwa. (1 Petu 2:21) Nga tweseka mutwasela mwoshe kutembwinina sipilitu ya Yesu ya kulyana, co tupwa ba kubwahelela mwafwa tuzibisa Yehova kubwaha.
MWASO 13 Kilistu Ikeye Mwanja Wetu
^ par. 5 Yesu wakele manene mbunge ku bujene bwa bakwabo. Muno mu cilongesa tusimutwiya mutwasa kutembwinina Yesu. Tusimutwiya lalo ha bubwa buli mu kutembwinina Yesu na kukala na mbunge ya kulyana.
^ par. 57 KULUMBUNUNA CIKUPULO: Ndolome wa mwanike wa lizina lya Dan, natala bakulunu baje banaija na kumona baishe mu cipatela. Mwanja waubwa ubanamwesa aba bakulunu unashongangeya Dan awane bingila bya kukwaselamo bandolome na bandokazi mu cikungulukilo. Ndolome mukwabo wa mwanike wa lizina lya Ben, natala Dan uje ali na kukwasa ndokazi wa kakulukazi. Mwanja waubwa wa ndolome Dan unashongangeya ndolome Ben alyane mu cipangi ca kujelesa mu Njibo ya Bumwene.
