1. Ki bon latitid bann serviter Bondie ena?

LABIB ti predir ki pep Bondie ti pou “port li volonter” pou servi Zeova ek swiv direksion Zezi Kris. (Ps. 110:3, NW) Sa profesi-la pe realize azordi. Sak lane, bann serviter Zeova pe pas plizir milyon lertan dan travay predikasion. Zot pa gagn enn lapey pou fer sa travay-la. Zot fer li parski zot anvi fer li. Zot pran dan zot letan osi pou soutenir zot bann frer ek ser lor plan fizik, emosionel, ek spiritiel. Bann ansien ek bann asistan ministeryel pas boukou letan pou prepar bann renion ek pou vizit zot bann frer ek ser pou ankouraz zot. Ki kitsoz motiv bann serviter Zeova pou fer tousala? Zot fer sa parski zot kontan Zeova ek zot kontan zot prosin.​—Mat. 22:37-39.

2. Dapre Romin 15:1-3, ki lexanp Zezi inn donn nou?

² Zezi inn donn nou enn bon lexanp kan li’nn fer lintere lezot pas avan so prop lintere. (Lir Romin 15:1-3.) Ek azordi, nou esey fer nou best pou swiv so lexanp. Kan nou imit Zezi, nou gagn bann bienfe. Zezi ti dir: “Ena plis benediksion kan done, ki kan resevwar.”​—Zist. 20:35.

3. Ki nou pou examine dan sa lartik-la?

³ Dan sa lartik-la, nou pou get sertin kitsoz ki Zezi ti fer pou ed lezot, ek nou pou gete kouma nou kapav imit li. Nou pou gete osi kouma nou kapav ogmant nou dezir pou ed lezot.

4. Kouma Zezi ti fer lintere lezot pas avan so prop lintere?

⁴Zezi ti ed lezot mem kan li ti fatige. Reflesi lor seki Zezi ti fer kan boukou dimounn ti vinn get li kot enn montagn, ki kitfwa ti pre ar Kafarnaom. Lavey, Zezi ti priye enn lanwit. Alor, sirman li ti bien fatige. Me kan li ti trouv sa lafoul dimounn la, so leker ti fermal kan li ti trouv bann ki ti malad ek ki ti mizer. Zezi pa ti zis geri zot, me li ti fer enn parmi bann diskour pli ankourazan ki ena, setadir Sermon lor Montagn.​—Lik 6:12-20.

5. Kouma bann sef fami kapav imit Zezi kan zot fatige?

⁵Kouma bann sef fami kapav imit Zezi? Anou pran enn lexanp: Apre enn long zourne travay, enn sef fami rant lakaz ek li bien fatige. Mem si li anvi kennsel zot ladorasion an fami, li demann Zeova lafors pou ki li kapav fer zot ladorasion an fami. Zeova reponn so lapriyer, ek papa-la etidie avek so fami, parey kouma li abitie fer sak semenn. Sa swar-la, bann zanfan aprann enn leson bien inportan: Pou zot paran, bann kitsoz spiritiel pli inportan ki ninport ki kitsoz.

6. Donn enn lexanp kouma Zezi ti pran dan so letan pou ed lezot.

⁶Zezi ti pran dan so letan pou ed lezot. Esey mazine seki Zezi ti resanti kan li ti aprann ki bann dimounn ti touy so bon kamarad Zan Batis. Sirman Zezi ti bien sagrin! Labib dir: “Ler Zezi tann sa nouvel la [lamor Zan], li pran enn bato, li al dan enn landrwa retire li tousel.” (Mat. 14:10-13) Nou kapav konpran kifer li ti anvi tousel, pa vre! Sertin dimounn kontan res tousel kan zot an-dey. Me Zezi pa ti reisi res tousel parski enn lafoul dimounn ti vinn get li. Kouma li ti reazir? Letan li get zot, “so leker kase” parski li trouve ki zot bizin led ek rekonfor ki sorti kot Bondie. Alor, deswit li ed zot. Labib dir ki “li koumans ansegn zot [pa  enn tigit kitsoz, me] boukou kiksoz.”​—Mark 6:31-34; Lik 9:10, 11.

7-8. Donn enn lexanp pou montre kouma bann ansien imit Zezi kan zot ed enn kikenn ki bizin led.

⁷Kouma bann ansien kapav imit Zezi? Nou bien rekonesan anver bann ansien pou zot lespri sakrifis ek pou travay ki zot fer! Boukou frer ek ser dan lasanble pa kone ki kantite travay zot ena. Par exanp, kan ena enn irzans medikal, bann frer ki dan Komite Liezon Ospitalie deswit al ed zot bann frer ek ser. Ek souvan, sa bann irzans-la arive omilie lanwit! Me sa bann ansien-la ek zot fami kontan zot bann frer ek ser. Akoz sa, zot fer lintere zot bann frer ek ser pas avan zot prop lintere.

⁸ Bann ansien partisip osi dan konstriksion bann Lasal Renion ek bann lezot batiman, ek zot ede kan ena bann katastrof. Zot pas boukou letan osi pou ansegn ek ankouraz zot bann frer ek ser. Li bien inportan ki nou felisit sa bann frer-la ek zot fami. Ki Zeova beni zot pou zot lespri sakrifis! Me biensir, parey kouma tou dimounn, bann ansien bizin rezonab. Fode pa ki zot pas telman letan pou okip bann kitsoz lasanble, ki zot pena ase letan pou pas avek zot fami.

9. Dapre Filipien 2:4, 5, ki latitid tou bann Kretien bizin ena?

⁹ Lir Filipien 2:4, 5. Nou tou nou bizin imit lespri sakrifis Zezi, pa zis  bann ansien. Labib dir ki Zezi ti aksepte pou vinn kouma “enn esklav.” (Fil. 2:7) Anou reflesi lor seki nou kapav aprann ar sa verse-la. Enn bon esklav, ouswa enn bon serviter, pou rod tou lokazion pou fer so met plezir. Alor, parski nou bann esklav Zeova ek ki nou servi nou bann frer ek ser, nou anvi vinn pli itil pou zot ek servi zot pli bien. Anou get de-trwa fason kouma nou kapav fer sa.

10. Ki kestion nou kapav poz noumem?

¹⁰Reflesi lor to latitid. To kapav demann tomem: ‘Eski mo anvi donn mo letan ek mo lenerzi pou ed lezot? Par exanp, si enn kikenn demann mwa pou vizit enn frer aze dan enn home, ouswa pou amenn enn ser aze renion, kouma mo pou reazir? Kan bizin bann volonter pou netway Lasal Lasanble ouswa Lasal Renion, eski deswit mo al ede?’ Kan nou’nn vwe nou lavi ar Zeova, nou’nn promet Li ki nou pou servi tou seki nou ena pou servi Li. Li anvi ki nou servi nou letan, nou lenerzi, ek nou bann kitsoz materyel pou ed lezot. Alor, Li bien kontan kan nou fer sa ar tou nou leker. Si nou trouve ki nou bizin fer bann zefor dan sa bann domenn-la, ki nou kapav fer?

11. Kouma lapriyer kapav ed nou pou kiltiv dezir pou ed lezot?

¹¹Fer bann lapriyer sinser. Kitfwa to’nn trouve ki to bizin vinn mwin egois, me to mank motivasion pou fer sa. Dan sa ka-la, fer bann lapriyer sinser ek demann Zeova pou ed twa. To bizin onet. Dir Zeova seki to resanti ek demann Li pou donn twa “dezir ek kapasite pou azir.”​—Fil. 2:13, NW.

12. Kouma bann zenn frer batize kapav ed zot lasanble?

¹² Si to enn zenn frer batize, demann Zeova pou ed twa pou kiltiv dezir pou fer plis dan to lasanble. Dan sertin pei, ena plis ansien ki asistan ministeryel, ek boukou parmi sa bann asistan ministeryel-la, zot nepli tro zenn. Sak lane, kantite bann Temwin Zeova pe ogmante. Alor, nou bizin pli boukou zenn frer pou ed bann ansien pou pran swin bann frer ek ser. Si to dispoze pou ede dan ninport ki fason, sa pou rann twa ere. Kifer? Parski to pou fer Zeova plezir, ek to pou zwaye parski to pe ed lezot.

13-14. Ki nou kapav fer pou ed nou bann frer ek ser? (Get zimaz lor kouvertir.)

¹³Remarke kan lezot bizin led. Lapot Pol ti dir bann Kretien ki ti res Zide: “Pa bliye pou fer dibien ek partaz seki zot ena, parski samem bann sakrifis ki fer plezir Bondie.” (Ebre 13:16) Sa ti enn bon konsey! Pa tro lontan apre ki zot ti gagn sa let-la, bann Kretien ki ti res Zide ti bizin kit zot lakaz, zot biznes, ek zot fami ki pa Kretien, pou “sove al lor montagn.” (Mat. 24:16) Dan sa moman-la, li ti bien inportan ki sakenn ed so kamarad. Si zot ti swiv konsey lapot Pol, avan ki sa bann problem-la arive, ek ki zot ti partaz seki zot ti ena avek zot kamarad, zot ti pou trouv sa pli fasil pou viv avek pli tigit kitsoz dan nouvo landrwa kot zot ti pou al reste.

¹⁴ Nou bann frer ek ser pa pou  touletan dir nou si zot bizin led. Anou pran enn lexanp. Fer koumadir enn frer so madam fek mor. Eski nou frer bizin led pou kwi so manze, pou amenn li kitpar, ouswa pou netway so lakaz? Kitfwa li pa pou anvi rod led, parski li pa anvi deranz nou. Me kitfwa li pou bien apresie si nou pran linisiativ pou ed li. Fode pa nou panse ki enn lot dimounn pou ed li, ouswa ki li pou touletan dir nou kan li bizin nou led. Nou kapav demann noumem: ‘Si mo ti dan so plas, ki kalite led mo ti pou anvi gagne?’

15. Ki nou bizin fer si nou anvi ed lezot?

¹⁵To bizin abordab. Sirman to konn bann frer ek ser dan to lasanble ki touletan pre pou ed lezot. Kan nou bizin zot led, zot pa donn nou linpresion ki nou pe deranz zot. Nou kone ki nou kapav kont lor zot, ek nou ti pou kontan vinn parey kouma zot! Alan, enn ansien ki ena 45 an, anvi vinn enn kikenn ki abordab. Apre ki li’nn reflesi lor lexanp Zezi, Alan dir: “Zezi ti bien okipe. Kanmem sa, bann dimounn, ki zot zenn ouswa vie, ti bien kontan li ek zot pa ti per pou demann li so led. Zot ti kone ki Zezi ti vremem gagn zot traka. Mo anvi resanble Zezi, ek mo anvi ki lezot trouv mwa kouma enn kikenn ki abordab, ki amikal, ek ki gagn zot traka.”

16. Kan nou aplik seki ena dan Psom 119:59, 60, kouma sa kapav ed nou pou swiv lexanp Zezi?

¹⁶ Fode pa nou dekouraze si nou pa reisi swiv lexanp Zezi dan enn fason parfe. (Zak 3:2) Par exanp, enn kikenn ki pe aprann penn, pa pou kapav imit dan enn fason parfe tablo ki  enn gran artis inn fer. Me si li aprann ar so bann erer, ek si li fer zefor pou imit stil sa gran artis-la, li pou kontign amelior limem. Dan mem fason, si nou met an pratik seki nou pe aprann kan nou etidie Labib, ek si nou kontign fer zefor pou amelior noumem, nou pou kapav swiv lexanp Zezi pli bien.​—Lir Psom 119:59, 60.

17-18. Ki bienfe nou gagne kan nou imit Zezi so lespri sakrifis?

¹⁷ Kan nou dispoze pou ede, lezot osi pou anvi fer parey. Enn ansien ki apel Tim, dir: “Sertin frer inn vinn asistan ministeryel bien zenn. Zot inn progrese parski zot inn trouve kouma lezot frer ti dispoze pou ed lezot, ek zot osi zot ti anvi fer parey. Sa bann zenn frer-la bien itil dan lasanble, ek zot bien soutenir bann ansien.”

¹⁸ Azordi, boukou dimounn bien egois. Me bann serviter Zeova bien diferan. Nou les nou inflianse par lespri sakrifis Zezi, ek nou bien determine pou swiv so lexanp. Nou pa kapav swiv Zezi so bann tras dan enn fason parfe, me nou kapav “swiv bien so tras.” (1 Pier 2:21, NW) Kan nou fer nou maximum pou swiv lexanp Zezi, nou pou ere parski nou pe fer plezir Zeova.