1. I miyele ci isuma ino antu yakwe Yeova yakwata?

 BAIBO yasowile ukuti antu yakwe Leza “yalaipeelesya” ukuomba umulimo wakwe Yeova ala yakulondela utunguluzi uwa Mwanakwe. (Masa. 110:3) Usesemo uu ukufikiliziwa ndakai. Cila mwaka aomvi yakwe Yeova yakaitemelwa ukuomba maawazi aingi umu mulimo wa kusimikila. Nupya yakaitemelwa ukucita vii ukwaula ukulipilwa. Nupya yakaavwa aina na ya nkazi muli vino yakulondekwa, mu melenganyo, nu kukomya utailo wao. Aina asontwa yakaomvya maawazi aingi ukupekanya malyasi alino nu kuomba umulimo uwa ucemi. I cani cikalenga yaomba imilimo ii yonsi? A pa mulandu wakuti yatemwa Yeova alino na antu yauze.—Mate. 22:37-39.

2. Wakwe vino Loma 15:1-3 ikalanda, i vyani vino Yesu wacisile vino tungamukolanya?

² Yesu watulangilile ningo vino tulinzile ukukolezya vino antu yanji yakulondekwa kucila ukukolezya ivya pa lwitu. Tukaezya na maka itu ukulamukolanya. (Belengini Loma 15:1-3.) Yonsi aakakolanya Yesu yalapaalwa. Yesu watiile: “Mukupeela mwaya insansa izingi ukucila izyaya umu kupokelela.”—Mili. 20:35.

3. I vyani vino tumasambilila umu cipande cii?

³ Umu cipande cii tumasambilila pali vimwi vino Yesu wacisile pakuti aazwa yauze. Tumalola vino tungamukolanya. Nupya tumasambilila na vino tungacita pakuti twalondesya ukwavwa yauze.

4. Uzye Yesu walanganga uli ukuti wikanga sana mano kuli vino yauze yakulondekwa ukucila sile kuli vino walondanga?

⁴ Yesu wazwilizyanga yauze na lino atatonta. Elenganyini pali vino Yesu wacisile lino iumba lya yantu lyaile uku mwamba kuno wali, umupiipi nu ku Kapenaumu. Uwanda uwa ala Yesu wali akupepa usiku onsi. Afwile watonsile sana, nomba lino waweni iumba lya yantu uvwilile aapiina aali api iumba liili uluse kumwi na aali alwale. Atapozizye sile alwale lelo walanzile ni lyasi ilicindamisye sana ilyakomelizye antu, ilikaamwa ukuti Ilyasi Lya pa Mwamba.—Luka 6:12-20.

5. Uzye imitwe ya ndupwa ingakolanya uli vino Yesu waipeelesyanga?

⁵ Vino imitwe ya indupwa ikakolanya Yesu. Elenganyini pa cilangililo cii: Umutwe wa lupwa wawela ukufuma uku ncito ala atatonta, walonda ukuti afumyeko mapepo ya lupwa, nomba wapepa kuli Yeova ukuti amwavwe ukutungulula ukupepa kwa lupwa. Yeova nawe wamwasuka, wakwanisya nu kutungulula mapepo ya lupwa. Kucita vii kungalenga ana yasambilile icintu cicindame icakuti avyazi yao iika sana mano uku kusambilila pali Yeova ukucila ivintu vyuze.

6. Langililini vino Yesu waomvyanga insita yakwe uku kwazwa yauze.

⁶ Yesu waomvyanga insita yakwe uku kwazwa yauze na lino walondanga ukuya wenga. Uzye mungelenganya vino Yesu wayuvwile lino uvwile ukuti Yoani Kabatizya cuza wakwe iyamukoma? Yesu uvwile sana ulanda. Baibo ikati: “Lino Yesu uvwile vivyo [kuli kuti imfwa yakwe Yoani wafumilepo apita nu wato aya uku ncende kuno kutali antu pakuti akaye wenga.” (Mate. 14:10-13) Tungamanya nu mulandu uno Yesu walondelanga ukuya wenga. Sweingi nga tuli nu ulanda tukalonda ukuya swenga. Nomba asi avino cali kuli Yesu. Iumba lya yantu lyafisile kuno wayanga ala acili nu kufikako. Uzye Yesu wacisile uli? Welenginye pali vino antu yaayo yalondekwanga nupya “wayuvwilile uluse.” Waweni ukuti antu yaaya yalondekwanga ukusambilila pali Leza nupya wayavwilizye zuwa zuwa. Nupya “watandike ukuyasambilizya ivintu vingi.”—Mako 6:31-34; Luka 9:10, 11.

7-8. Landini vimwi ivikulangilila ukuti ya eluda aaya nu kutemwa yakakolanya Yesu lino umwi walondekwa uwavwilizyo.

 ⁷ Vino ya eluda aaya nu kutemwa yakakolanya Yesu. Tukataizya sana pali vino ya eluda yakaipeelesya ukutwavwa. Imilimo imwi ino yakaomba tutanga tuilole nu kuilola. Ndi cakuti aina yamwi na ya nkazi yalondekwa uwazwilizyo mu vya ku cipatala, aina aya muli Komiti Yakulanzyanya ni Vipatala, yakaaya uku ina na ya nkazi zuwa zuwa ukuti yakayavwe. Ilingi uwazwilizyo uu ukalondekwa nu mu nsita ya usiku sana! Nomba pa mulandu wakuti ya eluda ya ni indupwa zyao yaaya ni cikuuku uku ina na ya nkazi yakaipeelesya ukuya umu kwazwa aakulondekwa uwazwilizyo nu mu nsita kwene ii.

⁸ Ya eluda yakaomba nu mulimo wa kukuula Amang’anda ya Wene ni vikuulwa vyuze alino nu mu mulimo wa kwazwilizya atiyaponelwa na mazanzo. Nupya yakaomvya na maawazi aingi sana kutungulula aa mu cilongano, kuyakomelezya, nu kuyazwilizya. Tulinzile ukulataizya sana ya eluda yaa na indupwa zyao. Yeova atwalilile ukuyapaala pa kuombesya kwao. Wakwe vino caya kuli swensi na ya eluda kwene yalinzile ukutantika ningo ivintu, yatalinzile sile ukwika amano ku milimo ya mu cilongano icakuti yatazyela na indupwa zyao.

9. Ukulingana na Filipi 2:4, 5, i miyeele ci ino Aina Klistu yonsi yalinzile ukukwata?

⁹ Belengini Filipi 2:4, 5. Ukuya kwene swensi kwene tulinzile ukusambilila kuli vino Yesu waipeelesyanga. Baibo ikati “wasiile  vyonsi vino wakweti nu kuya wa muzya.” (Filipi 2:7) Elenganyini pali vino tungasambilila uku mazwi yaa. Umuzya nanti umuomvi mucindikwe akalola vino angacita pakuti azanzya umusambazi wakwe. Vino sweswe aomvi yakwe Yeova nupya tukaombela aina na ya nkazi tukaezya na maka ukuleka Yeova aatuomvya nu kuombela aina na ya nkazi. Tungakwanisya ukucita vii nga tukucita ivyalondelelapo.

10. A mauzyo ci yano tulinzile ukuyuzya?

¹⁰ Mwaelenganya pali vino mukacita. Mungayuzya mauzyo yaa: ‘Uzye nkaitemelwa ukuomvya insita yane uku kwazwa yauze? Wakwe,ningacita uli nga yanenyile ukutandalila umwina uwacikoloci uku ng’anda kuno yakasungila akoloci nanti ukuyasenda nkazi uwacikoloci ku kulongana? Uzye nkaitemelwa ukuyazifya kuno tukalonganila ukongano nanti ukuzifyako Ing’anda ya Wene?’ Yeova akataizya sana lino tukuipeelesya ukuomvya insita na ivikwatwa vino watupeela uku kwazwako yauze. Ndi cakuti twalola ukuti muli mumwi muno tulinzile ukuzifya, tulinzile ukucita uli?

11. Uzye ipepo lingatwavwa uli ukulalondesya ukwazwa yauze?

¹¹ Mwapepa kuli Yeova lyonsi. Mungacita uli nga cikumutalila ukusenuka pakuti mwaipeelesya ukwazwa yauze? Mulinzile ukupepa kuli Yeova ukufuma pansi ya mwenzo, mwaya acisinka lino mukupepa, mwanena Yeova vino mukuyuvwa nu kumulenga ukuti amupeele “amaka nu mwenzo wa kulondesya ukuomba.”—Filipi 2:13.

12. Uzye umwina uwacance umubatiziwe angazwilizyako uli aa mu cilongano?

¹² Ndi cakuti mwemwe umwina uwacance nupya mwabatiziwa, mwalenga Yeova ukuti aamwazwa ukulondesya ukwazwa aina na ya nkazi aa mu cilongano cino mwayamo. Umu mpanga zimwi mwavula ya eluda ukucila aomvi akatumikila, nupya aomvi yaayo yamwi akoloci. Vino iuvi lyakwe Yeova likukula, kukulondekwa sana aina acance aingi aakwazwilizya aomvi yakwe Yeova. Ndi cakuti mukuitemelwa ukuomba umulimo onsi uno mwapeelwa mulaya sana ni nsansa. U mulandu ci? Pano mulazanzya Yeova, aina na ya nkazi yalamutaizya pali vino mukuyazwa, nupya mulaya sana ni nsansa izikaiza pa mulandu nu kwazwilizya yauze.

13-14. I vyani vino tulinzile ukucita pakuti twaazwa aina na ya nkazi? (Lolini icikope icili pa nkupo.)

¹³ Mwaika mano kuli vino yauze yakulondekwa. Mutumwa Paulo wakomelizye Aebele ukuti: “Mutailila ukucita ivisuma nu kwankanyako yauze vino mukweti, pano Leza watemwa malambo ya musango uuwo.” (Aeb. 13:16) Kuu kwali ukusunda ukusuma sana! Lino papisile imyaka inono ukufuma pano yapokeliile kalata, Aina Klistu aali mu Yudeya, yasiile mang’anda yao, mabizinesi, na ya lupwa aataali ya kapepa nu “ukuutukila uku myamba.” (Mate. 24:16) Apa nsita iiya calondekwanga sana ukulaazwana. Ndi cakuti yatandike ukulondela ukusunda kwakwe Paulo lino yapokeliile sile kalata, ale cayazwile lino yaile yatandika ukwikala imikalile yuze.

¹⁴ Asi lyonsi lino aina na ya nkazi yangatunena vino yakulondekwa. Wakwe, limwi umwina angafwilwa umuci. Fwandi angalondekwa ivyakulya, imipitile, nu kumwazwa mu milimo ya pa ng’anda. Nomba limwi angatiina ati akutucuzya ndi cakuti watunena ukuti akulondekwa ivintu vivyo. Nomba angataizya sana ndi cakuti twaitandikila sile sweineco ukumucitila vino akulondekwa.  Tutalinzile ukwelenganya ukuti yauze yamamwazwa, nanti ukwelenganya ukuti amatunena vino akulondekwa. Tulinzile ukuyuzya ukuti, ‘Ndi cakuti neene nakweti intazi ii, u wazwilizyo ci uno ningalondekwa?’

15. I cani cino tungacita nga tukulonda ukuti twaazwa yauze?

¹⁵ Mwaleka caangukila yauze ukulenga uwazwilizyo kuli mwemwe. Ukwaula nu kutwisika mufwile mwamanya aina na ya nkazi umu cilongano cino mwayamo akaitemelwa ukwazwa yauze lyonsi. Yasilola ukuti tukuyapeela icisendo lyonsi lino twalenga uwazwilizyo kuli aliyo. Twamanya ukuti tungalenga uwazwilizyo lyonsi lino calondekwa ukucita vivyo, nupya tulinzile ukukolanya imiyeele yao. Eluda uwi zina lyakuti Alan uwa myaka 45 walondanga ukuti caangukila yauze ukulenga uwazwilizyo kuli aliwe. Lino welenginye pali Yesu, walanzile ukuti: “Nanti cakuti Yesu wali umupamviwe, antu amisinku ipusanepusane yayanga kuli aliwe nupya yali antungwa ukumunena ukuti ayazwe. Yalolanga ukuti Yesu waisileko sana mano. Nkulonda nakolanya sana Yesu muli vino nkacita, nupya nkulonda ukuti caangukila antu ukulanda nani nu kuyuvwa ukuti nayatemwa nupya naikako amano.”

16. Uzye ilembo lya Masamu 119:59, 60 lingatwavwa uli ukukolanya Yesu?

¹⁶ Ndi cakuti cikututalila ukukolanya Yesu muli vyonsi, tutalinzile ukutoovoka. (Yako. 3:2) Tulinzile ukwiusya ukuti aakusambilila atanga akolanye aakumusambilizya muli vyonsi sile. Lelo ndi cakuti musambi akusambilila kuli vino akuluvyanya nu kwezya na maka ukukolanya kasambilizya wakwe, alatwalilila ukulunduluka. Mu nzila ili imwi kwene, ndi cakuti tukuomvya vino tukusambilila lino tukuisambilizya Baibo, nu kulaezya  na maka ukuzifya muno tusikucita ningo, tulatwalilila ukulunduluka nu kulakolanya Yesu.—Belengini Masamu 119:59, 60.

17-18. I visuma ci ivilatucitikila ndi cakuti tukukolanya vino Yesu waitemelwanga ukwazwa yauze?

¹⁷ Ndi cakuti tukuitemelwa ukwazwa yauze, nayo kwene yalaatukolanya. Eluda uwi zina lya kuti Tim walanzile ukuti: “Pa mulandu wakuti aina na ya nkazi yakaitemelwa ukwazwa yauze, cikalenga ukuti aina acance yayakolanya, icakuti iyalunduluka iyaya na aomvi akatumikila. Aina yaa yakaazwilizya aa mu cilongano nu kutungilila sana ya eluda.”

¹⁸ Tukaikala umu nsi umwavula sana ukaitemwe. Nomba antu yakwe Yeova yene yapusanako. Tukakolanya sana Yesu uwaitemelwanga ukwazwa yauze. Ukuya kwene tutanga tukolanye Yesu muli vyonsi, lelo tungakwanisya ukumukolanya nu “kulondela umu ntampulo zyakwe.” (1 Pet. 2:21) Ndi cakuti tukwezya na maka ukukolanya vino Yesu waitemelwanga ukwazwa yauze tulaya sana nu luzango pa mulandu wakuti Yeova alatutemwa.