ARTIKLU GĦALL-ISTUDJU 9
Imita lil Ġesù Billi Tkun Lest li Tgħin lil Oħrajn
“Hemm iktar hena meta tagħti milli meta tirċievi.”—ATTI 20:35.
GĦANJA 17 “Irrid żgur”
ĦARSA BIL-QUDDIEM *
1. Ix-Xhieda taʼ Ġeħova x’jagħmlu għax iħobbu lil Ġeħova u n-nies?
ĦAFNA snin ilu, il-Bibbja bassret li n-nies t’Alla kienu “se joffru lilhom infushom minn rajhom” biex jaqdu lil Ġeħova waqt li jsegwu d-direzzjoni taʼ Ġesù. (Salm 110:3) Bla dubju, din il-profezija qed narawha titwettaq illum. Kull sena, qaddejja żelużi taʼ Ġeħova jqattgħu miljuni taʼ sigħat fix-xogħol tal-ippritkar. Huma ma jitħallsux għal dan ix-xogħol imma jagħmluh minn qalbhom. Huma jużaw il-ħin minn tagħhom ukoll biex jgħinu lil aħwa b’modi prattiċi, jinkuraġġuhom, u jsaħħulhom l-imħabba tagħhom għal Ġeħova. L-anzjani u l-qaddejja ministerjali jqattgħu sigħat jippreparaw għal-laqgħat u biex jinkuraġġixxu lill-aħwa biż-żjarat li jagħmlulhom. Ix-Xhieda taʼ Ġeħova għala jagħmlu dan ix-xogħol kollu? Għax huma jħobbu lil Ġeħova u n-nies.—Mt. 22:37-39.
2. Bħalma naraw f’Rumani 15:1-3, Ġesù x’eżempju ħallielna?
2 Ġesù wera li hu jimpurtah iktar mill-bżonnijiet t’oħrajn milli tiegħu. Aħna qed nagħmlu dak li nistgħu biex nimitawh. (Aqra Rumani 15:1-3.) Dawk li jagħmlu hekk se jgawdu ħafna affarijiet tajbin. Ġesù qal: “Hemm iktar hena meta tagħti milli meta tirċievi.”—Atti 20:35.
3. X’se nikkunsidraw f’dan l-artiklu?
3 F’dan l-artiklu se naraw xi affarijiet li Ġesù għamel biex jgħin lil oħrajn, u se nikkunsidraw kif aħna nistgħu nimitaw l-eżempju tiegħu. Se naraw ukoll kif aħna nistgħu nkabbru x-xewqa tagħna biex nagħmlu iktar għal oħrajn.
IMITA L-EŻEMPJU TAʼ ĠESÙ
Minkejja li Ġesù kien għajjien, x’għamel meta folla nies marret għandu? (Ara paragrafu 4)
4. Ġesù kif poġġa l-interessi t’oħrajn qabel tiegħu?
4 Ġesù għen lil oħrajn anki meta kien għajjien. Aħseb dwar dak li għamel Ġesù meta ħafna nies marru ħdejh waqt li kien qiegħed fuq il-muntanja, x’aktarx qrib Kafarnahum. Ġesù kien għadu kif qattaʼ l-lejl kollu jitlob. Allura jistaʼ jkun li kien għajjien ħafna, imma meta ra l-folla hu tħassar lill-foqra u lill-morda li kien hemm fosthom. Hu mhux biss fejjaqhom imma ta waħda mill-iktar prietki inkuraġġanti, magħrufa bħala l-Prietka taʼ Fuq il-Muntanja.—Lq. 6:12-20.
B’liema modi nistgħu nimitaw l-eżempju taʼ Ġesù u npoġġu l-interessi t’oħrajn qabel tagħna? (Ara paragrafu 5)
5. Il-kapijiet tal-familja kif jimitaw lil Ġesù meta jkunu għajjenin?
5 Kif il-kapijiet tal-familja qed jimitaw lil Ġesù. Aħseb dwar dan l-eżempju: Wara ġurnata xogħol iebsa, missier jasal id-dar għajjien mejjet. Forsi għall-ewwel ma jkollux aptit jagħmel il-Qima bħala Familja, imma mbagħad jitlob lil Ġeħova biex jagħtih is-saħħa ħalli jagħmel l-istudju. Ġeħova jwieġeb it-talba tiegħu, u l-missier jagħmel l-istudju mal-familja bħalma jagħmel kull ġimgħa. Dik il-lejla t-tfal tgħallmu lezzjoni importanti, għax raw li l-affarijiet spiritwali huma l-iktar ħaġa importanti għall-ġenituri tagħhom.
6. Agħti eżempju taʼ kif Ġesù ta mill-ħin tiegħu biex jgħin lil oħrajn.
6 Ġesù ta mill-ħin tiegħu anki meta kellu bżonn ikun waħdu. Tistaʼ timmaġina kif ħassu Ġesù meta sar jaf li l-ħabib tiegħu Ġwanni l-Battista ġie maqtul? Min jaf kemm kien imdejjaq! Il-Bibbja tgħid: “Malli semaʼ b’dan [dwar il-mewt taʼ Ġwanni], Ġesù telaq minn hemmhekk b’dgħajsa lejn post imwarrab biex ikun waħdu.” (Mt. 14:10-13) Nistgħu nifhmu għala Ġesù għamel hekk. Ħafna minna, meta jmutilna xi ħadd, inkunu nixtiequ noqogħdu għall-kwiet. Imma Ġesù ma setax ikun waħdu. Folla kbira waslet f’dak il-post imwarrab qabel wasal hu. Ġesù x’għamel? Hu ħaseb dwar il-bżonnijiet tan-nies u “tħassarhom.” Ġesù nduna li huma għandhom bżonn l-inkuraġġiment u l-għajnuna mingħand Alla, u għalhekk mill-ewwel beda jgħinhom. Fil-fatt, hu “beda jgħallimhom ħafna affarijiet.”—Mk. 6:31-34; Lq. 9:10, 11.
7-8. Agħti eżempju li juri kif l-anzjani jimitaw lil Ġesù meta xi ħadd ikollu bżonn l-għajnuna.
7 Kif l-anzjani jimitaw lil Ġesù. Kemm napprezzaw ix-xogħol li l-anzjani lesti li jagħmlu għalina! Ħafna aħwa ma jafux ix-xogħol kollu li jagħmlu l-anzjani. Pereżempju, meta tinqalaʼ xi emerġenza, l-aħwa li jagħmlu parti mill-Kumitat taʼ Koordinazzjoni mal-Isptarijiet (HLC) ikunu lesti li jmorru jgħinu lill-aħwa mill-ewwel. Spiss dawn l-emerġenzi jinqalgħu matul il-lejl! Imma minħabba li jħobbu u jħossu għall-aħwa, dawn l-anzjani flimkien mal-familji tagħhom ipoġġu l-interessi t’oħrajn qabel l-interessi tagħhom.
8 L-anzjani jgħinu wkoll fil-kostruzzjoni tas-Swali tas-Saltna, proġetti taʼ bini, u anki meta jseħħ xi diżastru. Barra minn hekk, iqattgħu ħafna ħin jgħallmuna u jinkuraġġuna. L-anzjani kollha u l-familji tagħhom ħaqqhom proset. Jalla Ġeħova jippremjahom għas-sagrifiċċji li jagħmlu! Bla dubju, bħal kulħadd, l-anzjani jridu jkunu bilanċjati. Huma m’għandhomx iqattgħu tant ħin biex jagħmlu l-affarijiet għall-kongregazzjoni li mbagħad ma jsibux ħin biex jieħdu ħsieb il-bżonnijiet tal-familja tagħhom.
KIF INKOMPLU NPOĠĠU L-INTERESSI T’OĦRAJN QABEL TAGĦNA
9. Skont Filippin 2:4, 5, il-Kristjani x’attitudni għandu jkollhom?
9 Aqra Filippin 2:4, 5. Mhux l-anzjani biss imma lkoll kemm aħna nistgħu nitgħallmu nimitaw lil Ġesù u npoġġu l-interessi t’oħrajn qabel tagħna. Il-Bibbja tgħid li Ġesù “ħa s-sura taʼ lsir.” (Flp. 2:7) Aħseb dwar dak li nistgħu nitgħallmu minn dan il-vers. Ilsir jew qaddej tajjeb se jagħmel affarijiet biex sidu jieħu pjaċir. Bħala lsir taʼ Ġeħova u qaddej taʼ ħutek żgur tixtieq tkun iktar t’għajnuna għal Ġeħova u għall-aħwa. Int tistaʼ tagħmel dan billi taħseb dwar is-suġġerimenti li ġejjin.
10. Liema mistoqsijiet nistgħu nsaqsu lilna nfusna?
10 Aħseb dwar l-attitudni tiegħek. Staqsi lilek innifsek mistoqsijiet bħal dawn: ‘Lest jien li nagħti mill-ħin u l-enerġija tiegħi biex ngħin lil oħrajn? Pereżempju, x’nagħmel kieku jitolbuni biex immur inżur lil ħu li jkun f’dar tal-anzjani jew biex inwassal lil oħt imdaħħla fiż-żmien għal-laqgħat? Jien ngħin fit-tindif meta jkollna xi konvenzjoni u fis-Sala tas-Saltna?’ Meta ddedikajna ħajjitna lil Ġeħova, aħna wegħednieh li se nużaw dak kollu li għandna biex naqdu lilu. Hu jrid li aħna nużaw il-ħin, l-enerġija, u l-affarijiet materjali li għandna biex ngħinu lil oħrajn. Għalhekk, hu jkun ferħan meta aħna nagħmlu dan minn jeddna. X’tistaʼ tagħmel jekk tinduna li għandek fejn tirranġa?
11. It-talb kif jistaʼ jgħinna biex inkunu lesti li ngħinu iktar lil oħrajn?
11 Itlob lil Ġeħova b’mod sinċier. Jekk tinduna li għandek fejn tirranġa, imma m’għandekx aptit tagħmel il-bidliet, itlob lil Ġeħova u kun sinċier fit-talb tiegħek. Għidlu eżatt kif tkun qed tħossok u itolbu biex jgħinek ‘kemm biex ikollok ir-rieda u kemm biex taġixxi.’—Flp. 2:13.
12. Aħwa żgħażagħ mgħammdin kif jistgħu jgħinu fil-kongregazzjoni?
12 Jekk int żagħżugħ mgħammed, itlob lil Ġeħova biex jgħinek ikollok ix-xewqa tagħmel iktar fil-kongregazzjoni tiegħek. F’xi pajjiżi, hemm iktar anzjani milli qaddejja ministerjali, u ħafna minn dawn il-qaddejja ministerjali mhumiex żgħar. Peress li l-organizzazzjoni qed tkompli tikber, hemm bżonn taʼ aħwa rġiel żgħażagħ biex jgħinu lill-anzjani jieħdu ħsieb l-aħwa fil-kongregazzjoni. Jekk int lest li tagħmel ix-xogħol li jkun hemm bżonn, se tkun ferħan. Għala? Għax tkun qed togħġob lil Ġeħova, l-aħwa se japprezzaw li qed tgħinhom, u int se tħoss il-ferħ li jiġi meta tagħti l-għajnuna.
Kristjani mil-Lhudija ħarbu u qasmu x-Xmara Ġordan biex imorru fil-belt taʼ Pella. Dawk li waslu fil-belt l-ewwel qed iqassmu l-ikel lill-aħwa li waslu warajhom (Ara paragrafu 13)
13-14. X’nistgħu nagħmlu biex ngħinu lil ħutna? (Ara l-istampa tal-qoxra.)
13 Oqgħod attent u nnota meta xi ħadd ikollu bżonn l-għajnuna. Pawlu qal lill-Kristjani li kienu qed jgħixu fil-Lhudija: “Tinsewx tagħmlu l-ġid u taqsmu m’oħrajn, għax sagrifiċċji bħal dawn jogħġbu ħafna lil Alla.” (Ebr. 13:16) Kemm kien parir tajjeb! Wara ftit li rċivew din l-ittra, il-Kristjani li kienu jgħixu fil-Lhudija kellhom jitilqu d-djar tagħhom, in-negozji tagħhom, u wħud minn tal-familja li ma kinux Kristjani, u “jaħarbu lejn il-muntanji.” (Mt. 24:16) Matul dak iż-żmien, kien importanti ħafna li jgħinu lil xulxin. Jekk huma applikaw il-parir tal-appostlu Pawlu u bdew jaqsmu dak li kellhom bejniethom minn qabel, kien se jkun iktar faċli għalihom biex jaddattaw għall-ħajja differenti li kienu se jibdew jgħixu.
14 L-aħwa jaf mhux dejjem jgħidulna meta jkollhom bżonn xi ħaġa. Ejja ngħidu li ħu tmutlu l-mara. Il-ħu għandu bżonn l-għajnuna biex ikollu l-ikel, biex imur xi mkien, jew fid-dar? Forsi ma jitlobx l-għajnuna għax ma jkun irid idejjaq lil ħadd. Imma żgur li se japprezza ħafna jekk aħna ngħinuh qabel jitlob l-għajnuna hu. Qatt m’għandna naħsbu li se jkun hemm xi ħadd ieħor li jgħinu jew li hu se jgħidilna meta jkollu bżonn xi ħaġa. Staqsi lilek innifsek, ‘Kieku kont fis-sitwazzjoni tiegħu, liema għajnuna nieħu pjaċir biha?’
15. X’għandna nagħmlu jekk irridu ngħinu lil oħrajn?
15 Agħmilha faċli għal oħrajn biex jitolbuk l-għajnuna. Bla dubju inti taf aħwa fil-kongregazzjoni tiegħek li huma dejjem lesti biex jgħinu lil oħrajn. Huma qatt ma jġegħluna nħossu li qed indejquhom. Aħna nafu li huma dejjem lesti biex jgħinuna u għalhekk nixtiequ nkunu bħalhom. Alan, anzjan li għandu 45 sena, jixtieq jagħmilha faċli għal oħrajn biex jitolbuh l-għajnuna. Meta jaħseb dwar l-eżempju taʼ Ġesù, hu jgħid: “Ġesù kellu ħafna x’jagħmel imma kemm il-kbar u anki ż-żgħar kienu jħobbuh u ma ddejqux jitolbuh l-għajnuna. Huma kienu jafu li hu vera jimpurtah minnhom. Jien irrid inkun bħal Ġesù. Nixtieq li l-aħwa jarawni bħala wieħed li lest li ngħinhom, dħuli, u li jimpurtani minnhom.”
16. Salm 119:59, 60 kif jistaʼ jgħinna nimitaw l-eżempju taʼ Ġesù iktar mill-qrib?
16 M’għandniex inħossuna skuraġġiti jekk ma jirnexxilniex nimitaw lil Ġesù b’mod perfett. (Ġak. 3:2) Student li qed jitgħallem ipinġi ma jistax ipinġi eżatt bħall-għalliem tiegħu. Imma meta hu jitgħallem mill-iżbalji tiegħu u jagħmel l-almu tiegħu biex jimita l-eżempju tal-għalliem, se jkompli jagħmel progress. Bl-istess mod, jekk aħna napplikaw dak li nitgħallmu mill-Bibbja u nibqgħu nipprovaw nagħmlu progress, se nkunu nistgħu nimitaw l-eżempju taʼ Ġesù iktar mill-qrib.—Aqra Salm 119:59, 60.
IL-BENEFIĊĊJI TAʼ META NPOĠĠU L-INTERESSI TAʼ OĦRAJN QABEL TAGĦNA
Meta l-anzjani jimitaw l-eżempju taʼ Ġesù se jħallu eżempju tajjeb liż-żgħażagħ (Ara paragrafu 17) *
17-18. Meta nimitaw l-eżempju taʼ Ġesù, x’benefiċċji se jkun hemm?
17 Meta aħna nkunu lesti li ngħinu, oħrajn se jkunu jridu jagħmlu bħalna. Anzjan li jismu Tim jgħid: “Fil-kongregazzjoni tagħna kien hemm żgħażagħ li għamlu progress u ġew maħturin bħala qaddejja ministerjali, uħud minnhom kienu għadhom żgħar. Xi ħaġa li għenithom jagħmlu dan il-progress kienet l-eżempju taʼ dawk li kienu lesti li jgħinu lil oħrajn. Dawn l-aħwa żgħażagħ mhux biss huma t’għajnuna għall-aħwa fil-kongregazzjoni imma anki għall-anzjani.”
18 Ħafna nies illum il-ġurnata huma egoisti. Imma x-Xhieda taʼ Ġeħova mhumiex hekk. Dak li għamel Ġesù għal oħrajn messilna qalbna, u aħna determinati li nimitaw l-eżempju tiegħu. Vera li ma nistgħux nimxu warajh b’mod perfett, imma nistgħu ‘nimxu mill-qrib wara l-passi tiegħu.’ (1 Pt. 2:21) Meta nagħmlu l-almu tagħna biex nimitaw lil Ġesù, aħna se nkunu ferħanin għax inkunu qed nogħġbu lil Ġeħova.
GĦANJA 13 Kristu, l-eżempju tagħna
^ Ġesù dejjem poġġa l-interessi t’oħrajn qabel tiegħu. F’dan l-artiklu, se naraw xi modi kif aħna nistgħu nimitawh. Se naraw ukoll kif meta nagħmlu dan se jgħinna.
^ X’TGĦIDILNA L-ISTAMPA: Ħu żagħżugħ, jismu Dan, jinnota lil żewġ anzjani li marru jżuru lil missieru l-isptar. L-eżempju tal-anzjani misslu qalbu lil Dan u dan għenu biex hu wkoll jara kif jistaʼ jgħin lil oħrajn. Ħu żagħżugħ ieħor, Ben, jinnota l-għajnuna li qed jagħti Dan. L-eżempju taʼ Dan jinkuraġġixxi lil Ben biex jgħin fit-tindif tas-Sala tas-Saltna.