1. ¿Ndáaña kéʼé na̱ ñuu Jehová?

NU̱Ú Biblia ni̱ka̱ʼyi̱ iin profecía ña̱ káʼa̱n xa̱ʼa̱ na̱ ñuu Ndióxi̱ ña̱ xíʼin ña̱ si̱í-ini kachíñuna nu̱úra ta kundiku̱nna yichi̱ se̱ʼera (Sal. 110:3). Ta tiempo vitin xínu profecía yóʼo. Ndiʼi ku̱i̱ya̱, na̱ ndásakáʼnu Ndióxi̱ ku̱a̱ʼání hora nátúʼunna xa̱ʼa̱ra xíʼin na̱ yiví, ta kǒo na̱ cháʼvina ña̱ keʼéna chiñu yóʼo, chi kéʼénaña xa̱ʼa̱ ña̱ kúni̱ miína. Ta saátu chíndeétáʼanna xíʼin na̱ hermanona tá kúma̱ní ña̱ʼa nu̱úna, chíka̱a̱na ndee̱ xíʼinna ta chíndeétáʼanna xíʼinna ña̱ kandíxakana Ndióxi̱. Ta na̱ anciano xíʼin na̱ siervo ministerial, ku̱a̱ʼání hora xíniñúʼuna ña̱ va̱ʼa ya̱chi̱ka kaʼvina ña̱ taxina ti̱xin reunión á ña̱ va̱ʼa tavána discursona, saátu xáʼa̱nna xítona sava na̱ hermano ña̱ va̱ʼa chika̱a̱na ndee̱ xíʼinna. ¿Nda̱chun kéʼéna ndiʼi ña̱yóʼo? Kéʼénaña xa̱ʼa̱ ña̱ kúʼvi̱-inina xínina Jehová ta saátu xa̱ʼa̱ ña̱ kúʼvi̱-inina xínina na̱ yiví xíʼin na̱ hermanona (Mat. 22:37-39).

2. Nda̱a̱ táki̱ʼva káchi Romanos 15:1-3, ¿ndáa yichi̱ sa̱ndákoo ta̱ Jesús nu̱úyó?

² Ta̱ Jesús ni̱ndi̱ʼi̱ka-inira xa̱ʼa̱ ña̱ xi̱xiniñúʼu na̱ yiví nu̱úka ña̱ kundi̱ʼi̱-inira xa̱ʼa̱ miíra, ta miíyó na̱ ndásakáʼnu Ndióxi̱ chíka̱a̱yó ndee̱ ña̱ kundiku̱nyó yichi̱ra (kaʼvi Romanos 15:1-3). Tá saá ná keʼéyó ku̱a̱ʼání ña̱ va̱ʼa ndakiʼinyó. Chi ta̱ Jesús ka̱chira: “Kúsi̱íka-iniyó tá táxiyó ña̱ʼa ndaʼa̱ inkana nu̱úka ña̱ ndakiʼinyóña” (Hech. 20:35).

3. ¿Ndáaña sakúaʼayó nu̱ú artículo yóʼo?

³ Nu̱ú artículo yóʼo sakúaʼayó xa̱ʼa̱ sava ña̱ ke̱ʼé ta̱ Jesús xa̱ʼa̱ inkana, ta sakúaʼayó ndáa ki̱ʼva kundiku̱nyó yichi̱ra. Ta saátu sakúaʼayó ndáaña kivi keʼéyó ña̱ va̱ʼa kutóoyó chindeétáʼanyó xíʼin inkana.

4. ¿Ndáa ki̱ʼva ni̱na̱ʼa̱ ta̱ Jesús ña̱ xi̱ndi̱ʼi̱-inira xa̱ʼa̱ inkana nu̱úka ña̱ kundi̱ʼi̱-inira xa̱ʼa̱ miíra?

⁴Ta̱ Jesús chi̱ndeétáʼanra xíʼin inkana ni ku̱naáníra. Ná ndakanixi̱níyó ndáaña ke̱ʼé ta̱ Jesús tá ni̱xa̱a̱ ku̱a̱ʼání na̱ yiví nu̱úra chí xa̱ʼa̱ iin yuku̱, ta sana yatin ñuu Capernaúm xi̱kuu ña̱yóʼo. Sana ku̱naání ta̱ Jesús ki̱vi̱ kán saáchi iníí ñuú ni̱ka̱ʼa̱nra xíʼin Jehová. Soo tá xi̱nira na̱ nda̱ʼví ta saátu na̱ ndeéndóʼo, ku̱ndáʼviní-inira xi̱nirana. Ña̱kán va̱ása nísandáʼa kuitírana, chi saátu ta̱xira iin discurso ña̱ chi̱ka̱a̱ní ndee̱ xíʼinna, ta nda̱a̱ tiempo vitin chíka̱a̱ña ndee̱ xíʼinyó (Luc. 6:12-20).

5. ¿Ndáa ki̱ʼva ndíku̱n na̱ íyo se̱ʼe yichi̱ ta̱ Jesús tá kúnaána?

⁵¿Ndáa ki̱ʼva ndíku̱n na̱ íyo se̱ʼe yichi̱ ta̱ Jesús? Ná ndakanixi̱níyó ña̱ iin ta̱ hermano ku̱naáníra nda̱xaa̱ra veʼera xa̱ʼa̱ ña̱ ni̱xa̱ʼa̱nra ka̱chíñura. Soo ñuú saá xíniñúʼu kaʼvira xíʼin na̱ veʼera, ta xa̱ʼa̱ ña̱ ku̱naáníra va̱ása kúni̱ra kaʼvira xíʼinna, ña̱kán va̱ʼaka káʼa̱nra xíʼin Jehová ña̱ ná taxira ndee̱ ndaʼa̱ra. Ta nda̱kuiinva Jehová oración ña̱ ke̱ʼéra, chi ta̱xira ndee̱ ndaʼa̱ra ña̱ va̱ʼa ka̱ʼvira xíʼin na̱ veʼera. Ta na̱ va̱lí se̱ʼera ki̱ʼinna kuenta ña̱ iin ña̱ ndáyáʼviníka nu̱ú na̱ yivána kúú ña̱ ndasakáʼnuna Ndióxi̱.

6. Ka̱ʼa̱n xa̱ʼa̱ iin yichi̱ ña̱ xi̱niñúʼu ta̱ Jesús tiempora ña̱ chi̱ndeétáʼanra xíʼin inkana.

⁶Ni xi̱kuni̱va ta̱ Jesús koo mitúʼunra, soo ta̱vára tiempo ña̱ chindeétáʼanra xíʼin inkana. Ná ndakanixi̱níyó xa̱ʼa̱ ña̱ ku̱u iin yichi̱: Ta̱ Jesús ku̱nda̱a̱-inira ña̱ xa̱ʼnína migora ta̱ Juan ta̱ xi̱sandákuchi na̱ yiví, ña̱kán ku̱suchíníva-inira. Tu̱ʼun Ndióxi̱ káchiña: “Tá na̱kunda̱a̱-ini ta̱ Jesús xa̱ʼa̱ ña̱yóʼo, nda̱ara barco ta nda̱kiʼinra ku̱a̱ʼa̱n xíkára ña̱ va̱ʼa koo mitúʼunra” (Mat. 14:10-13). Ta kúnda̱a̱va-iniyó nda̱chun xi̱kuni̱ra koo mitúʼunra. Chi sava na̱ yiví kúni̱na koo mitúʼunna tá xíʼi̱ iin na̱ kúʼvi̱ní-inina xínina. Soo va̱ása níkiviví koo mitúʼun ta̱ Jesús, saáchi tá xa̱a̱ ni̱xa̱a̱ra kán xi̱nira ña̱ ku̱a̱ʼání na̱ yiví ndátunara. ¿Ndáaña ke̱ʼéra? Nda̱kanixi̱níra xa̱ʼa̱ ña̱ xíniñúʼuna ta xa̱ʼa̱ ña̱yóʼo ku̱ndáʼviní-inira xi̱nirana. Ki̱ʼinra kuenta ña̱ xi̱niñúʼu chindeétáʼan Ndióxi̱ xíʼin na̱ yiví kán ta sandíkora-inina, ña̱kán ndi̱ku̱n kama chi̱ndeétáʼanra xíʼinna. Ta ki̱xáʼara sánáʼa̱rana xa̱ʼa̱ “ku̱a̱ʼá ña̱ʼa” (Mar. 6:31-34; Luc. 9:10, 11).

7, 8. ¿Ndáa ki̱ʼva ndíku̱n na̱ anciano yichi̱ ta̱ Jesús?

 ⁷¿Ndáa ki̱ʼva ndíku̱n na̱ anciano yichi̱ ta̱ Jesús? Táxiníyó tíxa̱ʼvi ndaʼa̱ na̱ anciano xa̱ʼa̱ ndiʼi ña̱ kéʼéna ña̱ va̱ʼa chindeétáʼanna xíʼinyó. Ku̱a̱ʼáníyó va̱ása kúnda̱a̱-iniyó xa̱ʼa̱ ndiʼi ña̱ kéʼéna. Tá kúú, tá ndeéndóʼo iin na̱ hermano á tá kúu iin tu̱ndóʼo xíʼinna, na̱ Comité na̱ nátúʼun xíʼin na̱ hospital ndi̱ku̱n kama chíndeétáʼanna xíʼin na̱yóʼo, ni kúúña ma̱ʼñú ñuú. Na̱ anciano yóʼo ta saátu na̱ veʼena, siʼnaka na̱ hermano ndíʼi̱-inina xa̱ʼa̱ nu̱úka ña̱ kundi̱ʼi̱-inina xa̱ʼa̱ miína, saáchi kúndáʼviní-inina xíninana.

⁸ Ta saátu va̱ʼaní chíndeétáʼanna tá kúva̱ʼa veʼe nu̱ú ndátakayó á tá kúva̱ʼa inkaka veʼe. Ta chíndeétáʼanna xíʼin na̱ hermano nu̱ú kúu iin tu̱ndóʼo. Saátu ku̱a̱ʼání hora xíniñúʼuna ña̱ va̱ʼa sanáʼa̱na inkana, ña̱ va̱ʼa chindeétáʼanna xíʼin na̱ hermano ta chika̱a̱na ndee̱ xíʼinna. Ña̱kán, ndáyáʼviní ka̱ʼa̱nyó xíʼin na̱ anciano ta saátu xíʼin na̱ veʼena ña̱ va̱ʼaní chiñu kéʼéna. Kúni̱yó ná taxi Jehová ku̱a̱ʼání ña̱ va̱ʼa ndaʼa̱ na̱ anciano xa̱ʼa̱ ña̱ va̱ʼaní chíndeétáʼanna xíʼin na̱ hermano. Soo ná kiʼinnína kuenta saáchi va̱ása xíniñúʼu kundi̱ʼi̱ kuití inina xa̱ʼa̱ chiñu ña̱ íyo ti̱xin congregación, chi saátu xíniñúʼu kundi̱ʼi̱-inina xa̱ʼa̱ na̱ veʼena.

9. Nda̱a̱ táki̱ʼva káchi Filipenses 2:4, 5, ¿ndáa ki̱ʼva xíniñúʼu ndakanixi̱níyó?

⁹ (Kaʼvi Filipenses 2:4, 5). Su̱ví ndiʼivíyó kúú anciano, soo ndiʼivayó kivi sakúaʼa chindeétáʼan xíʼin inkana nda̱a̱ táki̱ʼva chi̱ndeétáʼan ta̱ Jesús xíʼin inkana. Tu̱ʼun Ndióxi̱ káʼa̱nña xa̱ʼa̱ra ña̱ “ndu̱ura iin esclavo” (Filip. 2:7). ¿Ndáaña sákuaʼayó xíʼin ña̱yóʼo? Na̱ kúú esclavo á na̱ káchíñu nu̱ú inkana ndúkúna ki̱ʼva ña̱  sakúsi̱ína-ini na̱ káchíñuna nu̱ú. Xa̱ʼa̱ ña̱ káchíñuyó nu̱ú Jehová ta saátu nu̱ú na̱ hermanoyó, kúni̱yó chika̱a̱yó ndee̱ ña̱ viíníka kachíñuyó nu̱úra ta viíníka chindeétáʼanyó xíʼin na̱ hermano. ¿Ndáa ki̱ʼva keʼéyóña? Ná kotoyó sava ña̱ kivi keʼéyó.

10. ¿Ndáaña kivi ndakanixi̱níyó xa̱ʼa̱?

¹⁰Koto ndáa ki̱ʼva íyo ña̱ kéʼún. Ndakanixi̱ní xa̱ʼa̱ ña̱yóʼo: “¿Á kútói̱ kuniñúʼi̱ tiempoi̱ xíʼin ndeéi̱ ña̱ va̱ʼa chindeétáʼi̱n xíʼin inkana? ¿Ndáaña keʼíi̱ tá ná ka̱ʼa̱nna xíʼi̱n ña̱ ku̱ʼi̱n kotoi̱ iin ta̱ hermano ta̱ xa̱a̱ chée? Ta, ¿ndáaña keʼíi̱ tá ná ka̱ʼa̱nna xíʼi̱n ña̱ ya̱ʼi̱ xa̱ʼa̱ iin ñá hermana ñá xa̱a̱ chée ña̱ va̱ʼa ku̱ʼu̱nñá reunión? ¿Á chíndeétáʼi̱n xíʼin na̱ hermano ña̱ va̱ʼa ndatiʼvíi̱ á ndaya̱kúi̱n nu̱ú xíyo asamblea? ¿Á chíndeétáʼi̱n xíʼinna tá ndásaviína veʼe nu̱ú ndátakayó?”. Tá nda̱taxiyó miíyó ndaʼa̱ Jehová, ki̱ndooyó ña̱ kuniñúʼuyó ndiʼi ña̱ kúúmiíyó ña̱ va̱ʼa kachíñuyó nu̱úra, tá kúú tiempoyó xíʼin xu̱ʼúnyó. Ña̱kán kúsi̱íníva-inira tá xíniñúʼuyó ña̱yóʼo ña̱ va̱ʼa chindeétáʼanyó xíʼin inkana, ta va̱ása ndátuyó ndakiʼinyó nda̱a̱ ni iin ña̱ʼa xa̱ʼa̱ ña̱ kéʼéyó. Soo, ¿ndáaña kivi keʼéyó tá íxayo̱ʼvi̱ña xíʼinyó chindeétáʼanyó xíʼin inkana?

11. ¿Ndáa ki̱ʼva chíndeétáʼan oración xíʼinyó ña̱ kutóoyó chindeétáʼanyó xíʼin inkana?

¹¹Xíʼin ndiʼi níma̱ún ka̱ʼún xíʼin Jehová. Tá ki̱ʼún kuenta ña̱ íxayo̱ʼvi̱níña xíʼún chindeétáʼún xíʼin inkana soo va̱ása kúni̱ún nasamaún ña̱ kéʼún, ka̱ʼa̱n xíʼin Jehová xíʼin ndiʼi níma̱ún xa̱ʼa̱ña. Natúʼun xíʼinra xa̱ʼa̱ ña̱ ndóʼún, ta ka̱ʼa̱n xíʼinra ña̱ ná taxira ndee̱ ndaʼún ña̱ va̱ʼa kutóún chindeétáʼún xíʼin inkana, ta saátu ña̱ ná taxira ndee̱ ndaʼún ña̱ va̱ʼa keʼúnña (Filip. 2:13).

12. ¿Ndáa ki̱ʼva kivi chindeétáʼan na̱ va̱lí na̱ xa̱a̱ nda̱kuchi xíʼin na̱ ñuu Jehová?

¹² ¿Á iin ta̱ loʼo kúún ta xa̱a̱ nda̱kuchiún? Tá saá, ka̱ʼa̱n xíʼin Jehová ña̱ ná chindeétáʼanra xíʼún ña̱ kuniún keʼún ku̱a̱ʼáka chiñu ti̱xin congregación. Sava ñuu, ku̱a̱ʼáka kúú na̱ anciano íyo nu̱ú na̱ siervo ministerial, ta ku̱a̱ʼání na̱ siervo ministerial yóʼo xa̱a̱ ku̱chéevana. Ta xa̱ʼa̱ ña̱ ku̱a̱ʼání ku̱a̱ʼa̱n ndúu na̱ ñuu Jehová, kúma̱níní na̱ hermano na̱ válíka na̱ kivi chindeétáʼan xíʼin na̱ anciano ña̱ va̱ʼa kundaana na̱ ñuura. Tá ná ku̱ʼún inka congregación ña̱ va̱ʼa chindeétáʼún xíʼin na̱ hermano, saá kúú ña̱ kusi̱íní-iniún chi sákusi̱íún-ini Jehová, ta na̱ hermano kiʼinna kuenta ña̱ kútóún chindeétáʼún xíʼin inkana. Ta va̱ʼaní kuniún tá ná keʼún ña̱yóʼo.

13, 14. ¿Ndáaña kivi keʼéyó ña̱ va̱ʼa chindeétáʼanyó xíʼin na̱ hermanoyó? (Koto na̱ʼná ña̱ va̱xi chí sa̱tá tutu yóʼo).

¹³Koto ndáaña xíniñúʼu inkana. Ta̱ apóstol Pablo ta̱xira consejo yóʼo nu̱ú carta ña̱ chi̱ndaʼára ndaʼa̱ na̱ Hebreos: “Kǒo nandósóndó ña̱ keʼéndó ña̱ va̱ʼa xíʼin inkana ni ña̱ taxindó ña̱ kúúmiíndó ndaʼa̱ inkana chi ña̱yóʼo nda̱a̱ táki̱ʼva íyo ña̱ sóko̱ndó ndaʼa̱ Ndióxi̱ saá íyoña ta kúsi̱íní-inira xíʼinña” (Heb. 13:16). Va̱ʼaní consejo ta̱xira ndaʼa̱na. Saáchi tá ni̱ya̱ʼa loʼo tiempo ña̱ nda̱kiʼinna carta yóʼo, na̱ hermano yóʼo xi̱niñúʼu sandákoona veʼena, chiñuna ta saátu na̱ veʼena na̱ va̱ása níxi̱kuu cristiano ña̱ va̱ʼa kununa ku̱ʼu̱nna chí yuku̱ (Mat. 24:16). Tá ku̱u ña̱yóʼo, xi̱niñúʼu chindeétáʼannína xíʼin na̱ hermanona. Ña̱kán, tá xa̱a̱ ya̱chi̱ka nísakúaʼana taxina ña̱ kúúmiína ndaʼa̱ inkana nda̱a̱ táki̱ʼva ka̱chi ta̱ Pablo xíʼinna, va̱ása ixayo̱ʼvi̱ña xíʼinna kuumiína loʼo ña̱ʼa ñuu nu̱ú xa̱a̱na.

¹⁴ Sana va̱ása ka̱ʼa̱nví na̱ hermano xíʼinyó ndáa ña̱ʼa kúú ña̱ kúma̱ní nu̱úna. Ná ka̱ʼa̱nyó xa̱ʼa̱ iin ta̱ hermano ta̱ ni̱xi̱ʼi̱ ñá síʼi. ¿Á xíniñúʼu chindeétáʼanyó xíʼinra keʼéyó ña̱ kuxura? ¿Á xíniñúʼu chindeétáʼanyó xíʼinra ña̱ ku̱ʼu̱nra iin lugar? ¿Á xíniñúʼu chindeétáʼanyó xíʼinra keʼéra inkaka chiñu ña̱ íyo ti̱xin veʼera? Sana  va̱ása ka̱ʼa̱nvíra xíʼinyó chindeétáʼanyó xíʼinra, saáchi va̱ása kúni̱ra sandíʼi̱ra-iniyó. Soo taxinívara tíxa̱ʼvi ndaʼa̱yó tá ná chindeétáʼanyó xíʼinra. Ná va̱ása ndakanixi̱níyó ña̱ íyova na̱ chindeétáʼan xíʼinra á ka̱ʼa̱n miívara xíʼinyó ndáaña xíniñúʼura. Ña̱kán, ná ndakanixi̱níyó xa̱ʼa̱ ña̱yóʼo: “Tá yi̱ʼi̱ ná kundoʼo táʼan ña̱ ndóʼora, ¿ndáaña kutói̱ ná keʼéna xa̱ʼíi̱?”.

15. ¿Ndáaña xíniñúʼu keʼéyó tá kúni̱yó chindeétáʼanyó xíʼin inkana?

¹⁵Taxi ná ka̱ʼa̱nna xíʼún ndáaña xíniñúʼuna. Sana ti̱xin congregaciónyó íyo na̱ hermano xíʼin ná hermana na̱ va̱ʼaní chíndeétáʼan xíʼin inkana. Ta nda̱a̱ ni iin yichi̱ va̱ása ka̱ʼa̱nvína xíʼinyó ña̱ sándi̱ʼi̱níyó-inina, saáchi kúnda̱a̱va-iniyó ña̱ chindeétáʼanna xíʼinyó tá íyo iin ña̱ xíniñúʼuyó. Ña̱kán kúni̱yó kundiku̱nyó yichi̱ na̱ hermano yóʼo. Iin ta̱ anciano ta̱ kúúmií 45 ku̱i̱ya̱ ta̱ naní Alan, chi̱ka̱a̱-inira ña̱ chindeétáʼanra xíʼin inkana. Ña̱yóʼo káchira: “Ni̱xi̱yoní chiñu nu̱ú ta̱ Jesús, soo ni saá ndiʼi na̱ yiví xi̱kutóonína kutáʼanna xíʼinra ta va̱ása níyi̱ʼvína ka̱ʼa̱nna xíʼinra ña̱ chindeétáʼanra xíʼinna. Saáchi xi̱kunda̱a̱-inina ña̱ ndixa xi̱ndi̱ʼi̱-inira xa̱ʼa̱na. Ta nda̱a̱ táki̱ʼva xi̱keʼé ta̱ Jesús saá kúni̱i̱ keʼíi̱, chi kúni̱i̱ taxii̱ ná ka̱ʼa̱n inkana xíʼi̱n ndáaña xíniñúʼuna ta kúni̱tui̱ va̱ʼa koo inii̱ xíʼinna ta kundi̱ʼi̱-inii̱ xa̱ʼa̱na”.

16. ¿Ndáa ki̱ʼva chíndeétáʼan Salmo 119:59, 60 xíʼinyó ña̱ kundiku̱nyó yichi̱ ta̱ Jesús?

¹⁶ Ná va̱ása ndakava-iniyó tá va̱ása kúchiñuyó viíní kundiku̱nyó yichi̱ ta̱ Jesús (Sant. 3:2). Iin na̱ káʼvi, va̱ása kiviví xa̱a̱na koona nda̱a̱ táki̱ʼva íyo na̱ sánáʼa̱ miína, soo tá chíka̱a̱na ndee̱ ña̱ vií keʼéna ña̱ íxayo̱ʼvi̱ xíʼinna, ta saátu tá chíka̱a̱na ndee̱ ña̱ kundiku̱nna yichi̱ na̱ sánáʼa̱ miína, loʼo tá loʼo sakúaʼana keʼéna táʼan ña̱ kéʼé na̱yóʼo. Ta saátu miíyó, tá chíka̱a̱yó ndee̱ ña̱ keʼéyó ña̱ sákuaʼayó nu̱ú tu̱ʼun Ndióxi̱, ta ndásaviíyó ña̱ va̱ása va̱ʼa kéʼéyó, saá  kúú ña̱ kuchiñuyó kundiku̱nyó yichi̱ ta̱ Jesús (kaʼvi Salmo 119:59, 60). *

17, 18. ¿Ndáaña va̱ʼa ndakiʼinyó tá ná chindeétáʼanyó xíʼin inkana nda̱a̱ táki̱ʼva ke̱ʼé ta̱ Jesús?

¹⁷ Tá xíto na̱ hermanoyó ña̱ kútóoyó chindeétáʼanyó xíʼin inkana, saátu na̱yóʼo kutóona chindeétáʼanna xíʼin inkana. Iin ta̱ anciano ta̱ naní Tim, káchira: “Ti̱xin congregaciónndi̱ íyo ku̱a̱ʼání na̱ hermano na̱ válí, na̱ va̱ʼaní xa̱ʼnu xíʼin tu̱ʼun Ndióxi̱ ta ni̱xa̱a̱na ku̱una siervo ministerial, saáchi ña̱ chi̱ndeétáʼan xíʼinna kúú ña̱ xi̱tona ndáa ki̱ʼva kútóo inka na̱ hermano chindeétáʼanna xíʼin inkana. Ta ña̱ kéʼéna va̱ʼaní chíndeétáʼanña xíʼin na̱ congregación ta saátu va̱ʼaní chíndeétáʼanna xíʼin ndi̱ʼi̱ na̱ anciano”.

¹⁸ Na̱ ñuyǐví yóʼo iinlá xa̱ʼa̱ miívana ndíʼi̱-inina, soo su̱ví saá íyo miíyó na̱ ndásakáʼnu Jehová. Ndákanda̱ní-iniyó xíʼin ña̱ ke̱ʼé ta̱ Jesús saáchi chi̱ndeétáʼanra xíʼin inkana, ta kúni̱yó kundiku̱nyó yichi̱ra. Va̱ása kiviví keʼéyó nda̱a̱ táki̱ʼva ke̱ʼéra, soo kiviva kundiku̱nyó yichi̱ra (1 Ped. 2:21). Tá ná chika̱a̱yó ndee̱ ña̱ chindeétáʼanyó xíʼin inkana nda̱a̱ táki̱ʼva ke̱ʼé ta̱ Jesús, saá kúú ña̱ kusi̱íní-ini Jehová xíʼinyó ta kusi̱ínítu-ini miívayó.