1. ¿Tlen kinyolinia tokniuan ma tlapaleuikan?

 YIUEJKIKA itech Biblia okijkuilojkej itekipanojkauan Jehová kipejpenaskiaj kitekichiuiliskej uan Jesús kinyekanaskia (Sal. 110:3). Axkan mochijtok ijkon ken kijtoua profecía. Sejse xiuitl tetlapouiaj miak horas uan amo kintlaxtlauiaj, noijki kinpaleuiaj tokniuan, kinyolchikauaj uan kinpaleuiaj ma mouikakan iuan Jehová. Noijki tlayekankej uan siervos ministeriales kuali moyektlaliaj uan kinmachtiaj tokniuan ijkuak inmiuan monechikouaj uan noijki ijkuak kintlajpalotiuij. ¿Tlen kinyolinia ma tlapaleuikan? Ijkon kichiuaj porque kitlasojtlaj Jehová uan tokniuan (Mat. 22:37-39).

2. Ijkon ken kijtoua Romanos 15:1-3, ¿ken uelis tikchiuaskej ijkon ken Jesús?

² Tejuan timochijchikauaj tikchiuaj ken Jesús, tikitaj ken tikinpaleuiskej oksekimej uan amo san tikitaj tlen tejuan techpanoua (xiktlajtolti Romanos  15:1-3). Tla ijkon tikchiuaj, techpanos tlen Jesús okijto: “Okachi yolpaki akin itlaj kitemaka uan amo ijkuak itlaj kiselia” (Hech. 20:35, TNM).

3. ¿Tlen timomachtiskej?

³ Axkan tikitaskej tlen okichi Jesús inpatka oksekimej uan noijki tikitaskej ken uelis tikchiuaskej ken ye. Noijki tikitaskej tlen uelis tikchiuaskej para noijki tiknekiskej tikinpaleuiskej oksekimej.

4. ¿Ken okiteititi Jesús okinekiaya kinpaleuis oksekimej uan amo san okitekipacho tlen okipanouaya?

⁴ Maski Jesús osotlauaya okinpaleui oksekimej. Ma timokuayejyekokan tlen okichi ijkuak miakej okajsitoj ompa altepetl Capernaum. Xamo sapanoua osotlauaya porque nochi se youak omotlatlaujti. Ijkuak okinmitak akinmej ompa oajsitoj, okinmiknomatki porque amitlaj okipiayaj uan omokokouayaj. Amo san okinpajti, noijki kualtsin okinmachti (Luc. 6:12-20).

5. ¿Ken kichiuaj tetajmej ijkon ken Jesús?

⁵ ¿Ken kichiuaj tetajmej ijkon ken Jesús? Ma timokuayejyekokan se teta sotlaua porque nochi se tonal otekipanoto pero non youak moneki momachtis iuan ifamilia, xamo kijtos okse tonal momachtiskej. Pero kitlatlaujtia Jehová ma kipaleui, ye kikaki uan kipaleuia ma momachti iuan ifamilia. Non youak konemej kitaj itatajuan okachi kipatioitaj kiueyichiuaskej Jehová.

6. Xikijto ken Jesús okinpaleui sekimej.

⁶ Jesús okipaktiaya kinpaleuis oksekimej. Ye okimatiaya iyolikni Juan okimiktijkej, ik non, sapanoua omoyolkokouaya. Biblia kijtoua: “Ijkuak Jesús okima tlan okitoktijkeh n Juan, otlejkok itech se barka iwa oyá iselti kan amaka kikuejsoskia” (Mat. 14:10-13). Jesús okinekiaya yetos  iselti. Axkan miakej noijki kinekij yetoskej inselti ijkuak ixpoliui akin okitlasojtlayaj. Pero Jesús amo uelis yetoskia iselti porque miakej yokichixtokaj. ¿Tlen okichi? Ye omokuayejyeko tlen okinpanotoka uan okinmiknomatki. Noijki okitak omonekiaya kinpaleuis ma mouikakan iuan Jehová, ik non, san niman opejki kinmachtia miak tlamantli (Mar. 6:31-34; Luc. 9:10, 11).

7, 8. Xikyekijto ken tlayekankej kichiuaj ken Jesús ijkuak se tokni moneki ma kipaleuikan.

⁷ ¿Ken kichiuaj tlayekankej ijkon ken Jesús? ¿Tikpatioitaj nochi tlen kichiuaj tlayekankej para techpaleuiskej? Miakej amo tikmatij nochi tlen kichiuaj. Sekimej tlayekankej motlapouiaj iuan akinmej tlapajtiaj ijkuak se tokni mokokoua uan miak uelta moneki kitatiuij maski youak. Tokniuan tlayekankej uan infamilias techtlasojtlaj.

⁸ Tlayekankej tlapaleuiaj kanin kinchijchiuaj kalmej para oksekimej tokniuan ompa ma monechikokan uan noijki ijkuak kanaj tlaxixini. Noijki miak horas kinmachtiaj, kinpaleuiaj uan kinyolchikauaj tokniuan tlen inmiuan monechikouaj. Ma tikintlasojkamatilikan tokniuan tlayekankej uan infamilia. Tiknekij Jehová nochipa ma kinpaleui porque techpaleuiaj. Pero tlayekankej moneki kimatoskej moneki okachi kinmaluiskej infamilia uan satepan tokniuan.

9. Ijkon ken kijtoua Filipenses 2:4, 5, ¿ken uelis tikchiuaskej ijkon ken Jesús?

⁹ (Xiktlajtolti Filipenses 2:4, 5). Amo tinochtin uelis tikchiuaskej tlen kichiuaj tlayekankej pero tinochtin uelis tikinpaleuiskej oksekimej ken okichiuaya Jesús. Biblia kijtoua “omochiwako kemi se tetlakewáli” (Filip. 2:7). ¿Non tlen techmachtia? Se tlakeuali nochipa kineki kiyolpaktis iteko. Tejuan tiktekichiuiliaj Jehová uan tikinpaleuiaj tokniuan, ik non, tiknekij okachi tikinpaleuiskej. ¿Ken uelis ijkon tikchiuaskej? Ma tikitakan seki tlamantli.

10. ¿Tlen moneki ma timotlajtlanikan?

¹⁰ Xikita tlen moneki tikchiuas. Ximotlajtlani: “¿Tlen nikchiuas para nikinpaleuis oksekimej? ¿Tlen nikchiuas tla nechiluiaj ma nikitati se tokni tlen yikipia miak xiuitl noso tla nechiluiaj ma nikuika kanin timonechikouaj? ¿Nitlapaleuia ijkuak tlachipauaj para tikpiaskej toueyi nechikol noso kanin timonechikouaj?”. Ijkuak otimotemakakej ixpan Jehová otikiluijkej nochipa tiktekichiuiliskej uan tikmakaskej tlen tikpiaj. Jehová yolpaki ijkuak tikinpaleuiaj oksekimej. ¿Tlen moneki tikchiuaskej ijkuak tikitaj itlaj moneki tikpatlaskej?

11. ¿Ken techpaleuis tla timotlapouiaj Jehová?

¹¹ Ximotlapoui iuan Jehová. Tla tikita itlaj moneki tikpatlas itech monemilis pero amo tikneki ijkon tikchiuas xikilui Jehová ken timomachilia uan ye mitspaleuis xikchiua tlen moneki (Filip. 2:13).

12. ¿Ken uelis okachi tlapaleuiskej telpochmej tlen yomoapolaktijkej?

¹² ¿Titelpochtli uan yotimoapolakti? Xikilui Jehová ma mitspaleui para okachi titlapaleuis kanin timonechikoua. Itech seki tlanechikolmej katej okachi tlayekankej uan amo siervos ministeriales uan sekimej yikipiaj miak xiuitl. Axkan okachi yomomiaktilijkej tokniuan, ik non, telpochmej moneki kinpaleuiskej tlayekankej para kinmaluiskej tokniuan. Tla titlapaleuiti kanin okachi moneki, tiyolpakis porque tikchiuas tlen Jehová kineki. Noijki oksekimej kitaskej tlen tikchiua uan kuali timomachilis porque tikinpaleuis oksekimej.

13, 14. ¿Tlen uelis tikchiuaskej tla tiknekij tikinpaleuiskej tokniuan? (Xikita dibujo itech página 1).

¹³ Xikita ken uelis tikinpaleuis oksekimej. Apóstol Pablo nin okintlajkuilili tokniuan hebreos: “Amo xikilkawakah nonkichiwaskeh tlan kuali. Xikimpalewikah akimeh amitla kipiah, ye tlan Dios kipaktia” (Heb. 13:16). Non okinpaleui porque satepan tokniuan tlen ochantiayaj Judea okikajkej inkalijtik, kanin otlanemakayaj, infamilia tlen amo okitekichiuiliayaj Jehová uan ocholojkej itech tepetl (Mat. 24:16). Ijkuakon nochtin tokniuan omonekiaya mopaleuiskej. Tla achto yokichijkaj tlen okijto Pablo, satepan amo kitaskiaj oui kanin ochantitoj maski amo kipiaskiaj miak tlamantli.

 ¹⁴ Xamo tokniuan amo techiluiskej ma tikinpaleuikan. Ma timokuayejyekokan se tokni oixpoliuik inamik. ¿Amo kipia tlen ika mopanoltis, moneki yaski kanaj noso moneki itlaj ma tikyektlalitij ikalijtik? Xamo amo kineki techiluis porque amo kineki ma tikijtokan san kineki ma tikpaleuikan pero techtlasojkamatilis tla tikpaleuiaj. Amo ma timokuayejyekokan okse tokni kipaleuis noso ye techiluis ma tikpaleuikan. Ik non, ma timotlajtlanikan: “Tla ne ijkon nechpanoskia, ¿nechpaktiskia ma nechpaleuikan?”.

15. ¿Tlen moneki tikchiuaskej para tikinpaleuiskej oksekimej?

¹⁵ Nochipa ma titlapaleuikan. Kanin timonechikouaj katej tokniuan tlen nochipa kinpaktia kinpaleuiskej oksekimej. Yejuan amo kijtouaj san nochipa tiknekij ma techpaleuikan. Tikmatij yejuan kinpaktia ijkon kichiuaskej uan tejuan noijki tiknekij tikchiuaskej ken yejuan. Se tlayekanki tlen itoka Alan uan kipia 45 xiuitl yokijto kineki kinpaleuis tokniuan. Mokuayejyekoua tlen Jesús okichi uan okijto: “Jesús okichiuaya miak tlamantli pero miakej okipaktiaya iuan yetoskej porque ye okipaleuiaya ijkuak moneki. Nikneki nikchiuas ijkon ken ye, nikintlasojtlas tokniuan uan nikinpaleuis ijkuak moneki”.

16. ¿Ken techpaleuis tlen kijtoua Salmo 119:59, 60 ma tikchiuakan ken Jesús?

¹⁶ Amo ma timotekipachokan tla amo tikchiuaj nochi tlen Jesús okichi  (Sant. 3:2). Akin momachtia amo uelis kichiuas nochi ken akin kimachtia pero tla mochijchikaua kichiua ijkon ken ye kimachtia satepan kuali kichiuas. Tejuan noijki ijkon, tla tikchiuaj tlen kijtoua Biblia uan timochijchikauaj ayakmo tikchiuaj tlen achto otikchiuayaj, uelis tikchiuaskej ijkon ken Jesús (xiktlajtolti Salmo 119:59, 60).

17, 18. ¿Tlen panos tla titlapaleuiaj ijkon ken okichi Jesús?

¹⁷ Tla techpaktia titlapaleuiskej, oksekimej noijki ijkon kichiuaskej. Se tlayekanki tlen itoka Tim okijto: “Kanin timonechikouaj sekimej telpochmej omochijkej siervos ministeriales porque okitakej tokniuan kinpaktia tlapaleuiskej uan yejuan noijki ijkon kinekij kichiuaskej. Nonmej telpochmej kinpaleuiaj tokniuan uan noijki kinpaleuiaj tlayekankej”.

¹⁸ Axkan miakej amo kintekipachoua tlen kinpanoua oksekimej pero tejuan kema. Tiknekij tikchiuaskej ijkon ken Jesús uan tikinpaleuiskej tokniuan maski amo ueli tikchiuaj ijkon ken Jesús okichi, ye “otechititi kenijki tikchiwaskeh” (1 Ped. 2:21). Tla timochijchikauaj tikchiuaskej ijkon ken Jesús, tiyolpakiskej porque tikchijtoskej tlen Jehová kineki.